ТРОИЦКАЯ РОДИТЕЛЬСКАЯ СУББОТА. УТРЕНЯ. КАНОН. Глас 6. Суббота 7-й седмицы по Пасхе

[mirskim]

3 iю́ня 2023 гóда. Суббóта 7-й седмúцы по Пáсхе. Трóицкая родúтельская суббóта. Глас 6. Заупокóйная слýжба для домáшнего (келéйного) совершéнiя. Слýжба мiрскúм чúном. Послéдованiе ýтрени (канóн)

Начало зри здесь ( вседнéвная вечéрня) и здесь ( ýтреня)

Псалом 118 (Вторая статiя)

Твой есмь аз, спаси́ мя, я́ко оправдáний Твои́х взыскáх.

Припев: Спáсе, спасù мя. (На каждый стiх)



Менé ждáша грéшницы погуби́ти мя, свидéния Твоя́ разумéх. Вся́кiя кончи́ны ви́дех конéц, широкá зáповедь Твоя́ зелó. Коль возлюби́х закóн Твой, Гóсподи, весь день поучéние моé есть. Пáче враг мои́х умудри́л мя еси́ зáповедiю Твоéю, я́ко в век моя́ есть. Пáче всех учáщих мя разумéх, я́ко свидéнiя Твоя́ поучéние моé есть. Пáче стáрец разумéх, я́ко зáповеди Твоя́ взыскáх. От вся́каго пути́ лукáва возбрани́х ногáм мои́м, я́ко да сохраню́ словесá Твоя́. От судéб Твои́х не уклони́хся, я́ко Ты законоположи́л ми еси́. Коль сладкá гортáни моемý словесá Твоя́, пáче мéда устóм мои́м. От за́поведей Твои́х разумéх, сегó рáди возненави́дех всяк путь непрáвды. Свети́льник ногáма мои́ма закóн Твой, и свет стезя́м мои́м. Кля́хся и постáвих сохрани́ти судьбы́ прáвды Твоея́. Смири́хся до зелá, Гóсподи, живи́ мя по словеси́ Твоемý. Вóльная уст мои́х благоволи́ же, Гóсподи, и судьбáм Твои́м научи́ мя. Душá моя́ в рукý Твоéю вы́ну, и закóна Твоегó не забы́х. Положи́ша грéшницы сеть мне, и от зáповедей Твои́х не заблуди́х. Наслéдовах свидéнiя Твоя́ во век, я́ко рáдованiе сéрдца моегó суть. Приклони́х сéрдце моé сотвори́ти оправдáнiя Твоя́ в век за воздая́нiе. Законопрестýпныя возненави́дех, закóн же Твой возлюби́х. Помóщник мой и Застýпник мой еси́ Ты, на словесá Твоя́ уповáх. Уклони́теся от менé лукáвнующии, и испытáю зáповеди Бóга моегó. Заступи́ мя по словеси́ Твоемý, и жив бýду, и не посрами́ менé от чáянiя моегó. Помози́ ми, и спасýся, и поучýся во оправдáниих Твои́х вы́ну. Уничижи́л еси́ вся отступáющiя от оправдáнiй Твои́х, я́ко непрáведно помышлéнiе их. Преступáющiя непщевáх вся грéшныя земли́, сегó рáди возлюби́х свидéния Твоя́. Пригвозди́ стрáху Твоемý плóти моя́, от судéб бо Твои́х убоя́хся. Сотвори́х суд и прáвду, не предáждь менé оби́дящим мя. Воспрiими́ рабá Твоегó во блáго, да не оклеветáют менé гóрдiи. Óчи мои́ исчезóсте во спасéние Твоé, и в слóво прáвды Твоея́. Сотвори́ с рабóм Твои́м по ми́лости Твоéй, и оправдáнием Твои́м научи́ мя. Раб Твой есмь аз: вразуми́ мя, и увéм свидéния Твоя́. Врéмя сотвори́ти Гóсподеви: разори́ша закóн Твой. Сегó рáди возлюби́х зáповеди Твоя́ пáче злáта и топáзiя. Сегó рáди ко всем зáповедем Твои́м направля́хся, всяк путь непрáвды возненави́дех. Ди́вна свидéнiя Твоя́, сегó рáди испытá я́ душá моя́. Явлéнiе словéс Твои́х просвещáет и вразумля́ет младéнцы. Устá моя́ отверзóх, и привлекóх дух, я́ко зáповедей Твои́х желáх. При́зри на мя и поми́луй мя, по судý лю́бящих и́мя Твоé. Стопы́ моя́ напрáви по словеси́ Твоемý, и да не обладáет мнóю вся́кое беззакóнiе. Избáви мя от клеветы́ человéческiя, и сохраню́ зáповеди Твоя́. Лицé Твоé просвети́ на рабá Твоегó, и научи́ мя оправдáнiем Твои́м. Исхóдища воднáя изведóсте óчи мои́, понéже не сохрани́х закóна Твоегó. Прáведен еси́, Гóсподи, и прáви суди́ Твои́. Заповéдал еси́ прáвду свидéнiя Твоя́, и и́стину зелó. Истáяла мя есть рéвность Твоя́, я́ко забы́ша словесá Твоя́ врази́ мои́. Разжжéно слóво Твоé зелó, и раб Твой возлюби́ é. Юнéйшiй аз есмь и уничижéн, оправдáнiй Твои́х не забы́х. Прáвда Твоя́ прáвда во век, и закóн Твой и́стина. Скóрби и нýжды обретóша мя, зáповеди Твоя́ поучéнiе моé. Прáвда свидéнiя Твоя́ в век, вразуми́ мя, и жив бýду. Воззвáх всем сéрдцем мои́м, услы́ши мя, Гóсподи, оправдáнiя Твоя́ взыщу́. Воззвáх Ти, спаси́ мя, и сохраню́ свидéнiя Твоя́. Предвари́х в безгóдiи и воззвáх, на словесá Твоя́ уповáх. Предвари́сте óчи мои́ ко ýтру, поучи́тися словесéм Твои́м. Глас мой услы́ши, Гóсподи, по ми́лости Твоéй: по судьбé Твоéй живи́ мя. Прибли́жишася гоня́щiи мя беззакóнiем, от закóна же Твоегó удали́шася. Близ еси́ Ты, Гóсподи, и вси путié Твои́ и́стина. Испéрва познáх от свидéнiй Твои́х, я́ко в век основáл я́ еси́. Виждь смирéнiе моé и изми́ мя, я́ко закóна Твоегó не забы́х. Суди́ суд мой и избáви мя, словесé рáди Твоегó живи́ мя. Далéче от грéшник спасéние, я́ко оправдáний Твои́х не взыскáша. Щедрóты Твоя́ мнóги, Гóсподи, по судьбé Твоéй живи́ мя. Мнóзи изгоня́щiи мя и стужáющии ми, от свидéнiй Твои́х не уклони́хся. Ви́дех неразумевáющия и истáях, я́ко словéс Твои́х не сохрани́ша. Виждь, я́ко зáповеди Твоя́ возлюби́х, Гóсподи, по ми́лости Твоéй живи́ мя. Начáло словéс Твои́х и́стина, и во век вся судьбы́ прáвды Твоея́. Кня́зи погнáша мя тýне, и от словéс Твои́х убоя́ся сéрдце моé. Возрáдуюся аз о словесéх Твои́х, я́ко обретáяй коры́сть мнóгу. Непрáвду возненави́дех и омерзи́х, закóн же Твой возлюби́х. Седмери́цею днем хвали́х Тя о судьбáх прáвды Твоея́. Мир мног лю́бящим закóн Твой, и несть им соблáзна. Чáях спасéнiя Твоегó, Гóсподи, и зáповеди Твоя́ возлюби́х. Сохрани́ душá моя́ свидéнiя Твоя́ и возлюби́ я́ зелó. Сохрани́х зáповеди Твоя́ и свидéнiя Твоя́, я́ко вси путié мои́ пред Тобóю, Гóсподи. Да прибли́жится молéнiе моé пред Тя, Гóсподи, по словеси́ Твоемý вразуми́ мя. Да вни́дет прошéнiе моé пред Тя, Гóсподи, по словеси́ Твоемý избáви мя. Отры́гнут устнé мои́ пéнiе, егдá научи́ши мя оправдáнiем Твои́м. Провещáет язы́к мой словесá Твоя́, я́ко вся зáповеди Твоя́ прáвда. Да бýдет рукá Твоя́ éже спасти́ мя, я́ко зáповеди Твоя́ извóлих. Возжелáх спасéнiе Твоé, Гóсподи, и закóн Твой поучéнiе моé есть. Живá бýдет душá моя́ и восхвáлит Тя, и судьбы́ Твоя́ помóгут мне. Живá бýдет душá моя́ и восхвáлит Тя, и судьбы́ Твоя́ помóгут мне. Живá бýдет душá моя́ и восхвáлит Тя, и судьбы́ Твоя́ помóгут мне. Заблуди́х, я́ко овчá поги́бшее, взыщи́ рабá Твоегó, я́ко зáповедей Твои́х не забы́х. Заблуди́х, я́ко овчá поги́бшее, взыщи́ рабá Твоегó, я́ко зáповедей Твои́х не забы́х. Заблуди́х, я́ко овчá поги́бшее, взыщи́ рабá Твоегó, я́ко зáповедей Твои́х не забы́х.

По непорочных тропари глас 5

Благословéн есú Гóсподи,/ научú мя оправдáнием Твоúм.

Святы́х лик обрéте истóчник жи́зни и дверь рáйскую,/ да обря́щу и аз путь покая́нiем:/ поги́бшее овчá аз есмь,// воззови́ мя Спáсе, и спаси́ мя.

Благословéн есú Гóсподи,/ научú мя оправдáнием Твоúм.

Áгнца Бóжiя проповéдавше,/ и заклáни бы́вше я́коже áгнцы,/ и к жи́зни нестарéемей святíи,/ и присносýщней престáвльшеся./ Тогó прилéжно мýченицы моли́те,// долгóв разрешéнiе нам даровáти.

Благословéн есú Гóсподи,/ научú мя оправдáнием Твоúм.

В путь ýзкiй хóждшiи прискóрбный,/ вси в житiи́ крест я́ко ярéм взéмшiи,/ и Мне послéдовавшiи вéрою,/ прiиди́те наслади́теся,/ и́хже уготóвах вам пóчестей,// и венцóв небéсных.

Благословéн есú Гóсподи,/ научú мя оправдáнием Твоúм.

Óбраз есмь неизречéнныя Твоея́ слáвы,/ áще и я́звы ношý прегрешéнiй:/ ущéдри Твоé создáнiе Влады́ко,/ и очи́сти Твои́м благоутрóбiем,/ и возжелéнное отéчество подáждь ми,// рая́ пáки жи́теля мя сотворя́я.

Благословéн есú Гóсподи,/ научú мя оправдáнием Твоúм.

Дрéвле ýбо от не сýщих создáвый мя,/ и óбразом Твои́м Божéственным почты́й,/ преступлéнiем же зáповеди/ пáки мя возврати́вый в зéмлю, от нея́же взят бых,/ на éже по подóбiю возведи́// дрéвнею добрóтою возобрази́тися.

Благословéн есú Гóсподи,/ научú мя оправдáнием Твоúм.

Упокóй Бóже рабы́ Твоя́,/ и учини́ я в раи́,/ идéже ли́цы святы́х Гóсподи,/ и пра́ведницы сiя́ют я́ко свети́ла,/ усóпшiя рабы́ Твоя́ упокóй,/ презирáя их вся согрешéнiя.

Слáва Отцý и Сыну и Святóму Дýху.

Трисiя́тельное еди́наго Божествá, благочéстно поéм вопiю́ще:/ Свят еси́ Óтче Безначáльный,/ Собезначáльный Сы́не, и Божéственный Дýше:/ просвети́ нас вéрою Тебé служáщих,// и вéчнаго огня́ исхити́.

И ныне и прúсно и во вéки векóв. Амúнь.

Рáдуйся Чи́стая, Бóга плóтiю рóждшая во спасéнiе всех,/ Е́юже род человéческiй обрéте спасéнiе:/ Тобóю да обря́щем рай,// Богорóдице Чи́стая благословéнная.

Аллилýїа, аллилýїа, аллилýїа, слáва Тебé Бóже. (3 раза)

Гóсподи, помилуй. (12 раз)

Гóсподи, помилуй. (40 раз)

СЕДАЛЕН, ГЛАС 5

Покóй Спáсе наш,/ с прáведными рабы́ Твоя́,/ и сiя́ всели́ во дворы́ Твоя́,/ я́коже есть пи́сано:/ презирáя я́ко благ прегрешéнiя их/ вóльная и невóльная,// и вся я́же в вéденiи и не в вéденiи, Человеколю́бче.

Слáва Отцý и Сы́ну и Святóму Дýху, и ны́не и прúсно и во вéки векóв, амúнь.

От Дéвы возсiя́вый мíру Хрiстé Бóже,// и сы́ны свéта Тóю показáвый, поми́луй нас.

[Псалом 50]Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моé. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх роди́ мя мáти моя. Се бо и҆́стину возлюби́л еси́, безвéстная и тáйная премýдрости Твоея яви́л ми еси́. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отврати́ лицé Твоé от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéнiя Твоегó, и Дýхом Влады́чним утверди́ мя. Научý беззакóнныя путéм Твоим, и нечести́вiи к Тебé обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажи́, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.

КАНОН ИЗ ТРИОДИ, ГЛАС 8

ПЕСНЬ 1

Iрмóс: Песнь возслéм лю́дiе/ чýдному Бóгу нáшему,/ свободúвшему Iзрáиля от рабóты,/ песнь побéдную пою́ще и вопiю́ще:// поúм Тебé едúному Влады́це. (Двáжды)

Хор (припéв): Упокóй, Гóсподи, дýши усóпших раб Твоúх.

Чтец (тропáрь): Вси помóлимся Хрiстý,/ творя́ще пáмять днесь от вéка мéртвых,/ да вéчнаго огня́ избáвит я́ в вéре усóпшiя,// и надéжде жи́зни вéчныя.

Хор: Упокóй, Гóсподи, дýши усóпших раб Твоúх.

Чтец: Глубинóю судéб Твои́х Хрiстé,/ Всепремýдре Ты предопредели́л еси́/ коегóждо кончи́ну жи́зни, предéл и óбраз./ Тéмже я́же покры́ гроб во вся́кой странé,// на судé спаси́ Всещéдрый.

Хор: Упокóй, Гóсподи, дýши усóпших раб Твоúх.

Чтец: Предéлы жи́зни нáшея дáвый,/ тéмже усóпшiя от житéйскiя нóщи,/ дне невечéрняго сы́ны покажи́ Гóсподи,/ свящéнники правослáвныя, и вся вéрныя лю́ди Твоя́.

Хор: Упокóй, Гóсподи, дýши усóпших раб Твоúх.

Чтец: Я́же покры́ водá, и брань пожáт,/ трус же я́же объя́т, и убíйцы уби́ша,/ и óгнь я́же попали́, вéрныя,/ Ми́лостиве в чáсти учини́ прáведных.

Хор: Упокóй, Гóсподи, дýши усóпших раб Твоúх.

Чтец: Вся презирáяй плотскíя дóлги нáша Спáсе наш,/ во вся́ком вóзрасте всегó рóда человéча,/ пред суди́щем Твои́м постáви неосуждéны,/ Тебé Создáтелю отвещáющiя.

Хор: Слáва Отцý и Сыну и Святóму Дýху.

Трóичен: Три еди́наго Естествá пою́, Ли́ца самоипостáсная,/ нерождéнна Отцá, Сы́на рóждшагося, и Дýха Святáго:/ безначáльное Цáрство, власть, Божествó еди́но.

Хор: И ны́не и прúсно и во вéки векóв. Амúнь.

Богорóдичен: Вои́стинну Ты яви́лася еси́ нéбо на земли́,/ бóльшее вы́шняго небесé, Безневéстная Дéво:/ из Тебé бо возсiя́ Сóлнце в мíре, влады́чествуяй прáвдою.

Катавáсiя Трióди (глас 8): Песнь возслéм лю́дiе/ чýдному Бóгу нáшему,/ свободи́вшему Iзрáиля от рабóты,/ песнь побéдную пою́ще и вопiю́ще:// пои́м Тебé еди́ному Влады́це.

ПЕСНЬ 2

Iрмóс: Вúдите вúдите,/ я́ко Аз есмь Бог ваш,/ прéжде век рождéнный от Отцá,/ и от Дéвы в послéдняя без мýжа зачéншiйся// и разрушúвый грех прáотца Адáма, я́ко Человеколю́бец. (Двáжды)

Хор: Упокóй, Гóсподи, дýши усóпших раб Твоúх.

Чтец: Ви́дите ви́дите, я́ко Аз есмь Бог ваш,/ прáведным судóм водрузи́вый предéлы жи́зни,/ в нетлéнiе от тли прiéмляй вся усóпшiя// в надéжди вéчнаго воскрéсенiя.

Хор: Упокóй, Гóсподи, дýши усóпших раб Твоúх.

Чтец: От четы́рех конéц Гóсподи, прiéмляй вéрно усóпшiя,/ в мóри, или́ на земли́, или́ в рекáх, истóчницех, или́ éзерех,// или́ в ровéнницех снедь зверéм бы́вшiя, и пти́цам, и гадóм, вся упокóй.

Хор: Упокóй, Гóсподи, дýши усóпших раб Твоúх.

Чтец: В Твоéй длáни вся́ческая Гóсподи,/ предразсуди́л еси́, разрéшшiяся в состáвы четы́ри:/ в пришéствiи Твоéм собрáв воскреси́,// вся я́же в невéденiи, и рáзуме, прощáя тем прегрешéнiя.

Хор: Упокóй, Гóсподи, дýши усóпших раб Твоúх.

Чтец: О стрáшнаго Твоегó вторáго, Гóсподи, пришéствiя!/ Занé я́ко в ви́де мóлнiи на зéмлю пришéд,/ воздви́гнеши все создáнiе Твоé суди́тися,/ в вéре Тебé тогдá пожи́вших,// срéтших Тя с Тобóю бы́ти сподóби.

Хор: Слáва Отцý и Сыну и Святóму Дýху.

Трóичен: Пресовершéнная Еди́нице, Пребожéственная, Трiипостáсная,/ нерождéнне Óтче и Сы́не Единорóдне, Дýше от Отцá исходя́й, Сы́ном же явля́яйся:// Существó еди́но и Естествó, Госпóдьство, Цáрство, спаси́ всех нас.

Хор: И ны́не и прúсно и во вéки векóв. Амúнь.

Богорóдичен: Неизглагóланное чýдо Твоегó Рождествá Мáти Дéво:/ кáко бо и раждáеши, и Чистá еси́ в тóмже?/ Кáко Отрочá раждáеши, и не вéси искýса мýжеска отню́д?/ Я́коже весть пáче естествá от Менé новолéпно Слóво Бóжiе рóждшееся.

Катавáсiя Трióди (глас 8): Ви́дите ви́дите,/ я́ко Аз есмь Бог ваш,/ прéжде век рождéнный от Отцá,/ и от Дéвы в послéдняя без мýжа зачéншiйся// и разруши́вый грех прáотца Адáма, я́ко Человеколю́бец.

ПЕСНЬ 3

Iрмóс: Утверждéй рукóю Твоéю, Слóве Бóжiй небесá,/ просвещéнiем Твоегó úстиннаго познáнiя,// утвердù и нас на Тя надéющихся сердцá. (Двáжды)

Хор: Упокóй, Гóсподи, дýши усóпших раб Твоúх.

Чтец:  Прешéдшiя житiя́ течéнiе,/ в слáве благочéстной прáведным одéятися венцéм сподóби Бóже,// и вéчных благ наслади́тися.

Хор: Упокóй, Гóсподи, дýши усóпших раб Твоúх.

Чтец: Напрáсно восхищéнныя, попаля́емыя от мóлнiи,/ и измéрзшiя мрáзом, и вся́кою рáною,// упокóй Бóже, егдá огнéм вся искýсиши.

Хор: Упокóй, Гóсподи, дýши усóпших раб Твоúх.

Чтец: Присномýтное житiя́ мóре преплы́вшiя, Хрiстé,/ в нетлéнное Твоегó житiя́ сподóби пристáнище притещи́,// правослáвным житiéм окормлéныя.

Хор: Упокóй, Гóсподи, дýши усóпших раб Твоúх.

Чтец: И́хже вся́кое естествó морски́х и птиц небéсных,/ прiя́т снедéнiе Хрiстé, Твои́ми судьбáми,// воскреси́ Бóже, в послéднiй день со слáвою.

Хор: Слáва Отцý и Сыну и Святóму Дýху.

Трóичен: У́мно Божéственную Еди́ницу,/ в три Ли́ца прóсто кýпно éже пресещи́ совокупля́ю несекóмая:// я́коже бо скóрость мóлнiи, трисiя́ющая ви́дится во еди́нстве.

Хор: И ны́не и прúсно и во вéки векóв. Амúнь.

Богорóдичен: Недоумéнное Твоé чýдо: без мýжа бо раждáеши,/ и дéвство Твоé Чи́стая, соблюдáеши рóждши.// Тéмже Áнгел мнóжество, и человéческiй род поéт Тя во вéки.

Катавáсiя Трióди (глас 8): Утверждéй рукóю Твоéю, Слóве Бóжiй небесá,/ просвещéнiем Твоегó и́стиннаго познáнiя,// утверди́ и нас на Тя надéющихся сердцá.

Гóсподи, помилуй. (3 раза)

Седáлен Трióди, глaс 5: Нас рáди претерпéвый Крест и смерть,/ и умертви́вый ад, и совоскреси́вый мéртвыя,/ престáвльшiяся от нас Спáсе, упокóй, я́ко Человеколю́бец Бог,/ и в трéпетное и стрáшное пришéствiе Твоé Жизнодáвче,/ я́ко имéяй мнóжество ми́лости,// Цáрствiя Твоегó сподóби.

Слáва Отцý и Сыну и Святóму Дýху.

Нас рáди претерпéвый Крест и смерть,/ и умертви́вый ад, и совоскреси́вый мéртвыя,/ престáвльшiяся от нас Спáсе, упокóй, я́ко Человеколю́бец Бог,/ и в трéпетное и стрáшное пришéствiе Твоé Жизнодáвче,/ я́ко имéяй мнóжество ми́лости,// Цáрствiя Твоегó сподóби.

И ны́не и прúсно и во вéки векóв. Амúнь.

Богорóдичен Трióди, глaс 5: Скóрый Твой покрóв, и пóмощь и ми́лость покажи́ на рабéх Твои́х,/ и вóлны Чи́стая, укроти́ сýетных помышлéнiй,/ и пáдшую дýшу мою́ возстáви Богорóдице:// вем бо, вем Дéво, я́ко мóжеши, ели́ка и хóщеши.

ПЕСНЬ 4

Iрмóс: Из горы́ прiосенéнныя Слóве, прорóк,/ едúныя Богорóдицы,/ хотя́ще воплотúтися, боговúдно усмотрù,// и со стрáхом славослóвяше сúлу Твою́. (Двáжды)

Хор: Упокóй, Гóсподи, дýши усóпших раб Твоúх.

Чтец: Отцы́ и прáотцы, дéды и прáдеды,/ от пéрвых и дáже до послéдних,/ во благозакóнiи умéршiя и благовéрiи,// вся помяни́ Спáсе наш.

Хор: Упокóй, Гóсподи, дýши усóпших раб Твоúх.

Чтец: В горé, на пути́, на мéстех пусты́х житié остáвльшiя в вéре,/ монáхи же и бельцы́, ю́ноши и стáрцы,// со святы́ми Хрiстé всели́.

Хор: Упокóй, Гóсподи, дýши усóпших раб Твоúх.

Чтец: От печáли и рáдости прешéдшiя ненадéжно,/ вéрою áбiе премени́вшiя житié,/ в благодéнствiи пострадáвшiя, или́ злодéнствiи,// вся упокóй Спáсе наш.

Хор: Упокóй, Гóсподи, дýши усóпших раб Твоúх.

Чтец: Я́же уби́ мечь, и конь совосхи́ти,/ град, снег и тýча умнóженная:/ я́же удави́ плíнфа, или́ персть посы́па,// Хрiстé Спáсе наш упокóй.

Хор: Слáва Отцý и Сыну и Святóму Дýху.

Трóичен: Стрáнно я́ко еди́но, и три,/ Божествó все по еди́ному Лицý нераздéльно:// Отéц бо, Сын, и Дух Святы́й есть покланя́емь, я́ко един Бог.

Хор: И ны́не и прúсно и во вéки векóв. Амúнь.

Богорóдичен: Напрáви нас Дéво, моли́твами Твои́ми,/ окормля́ющи обуревáемыя волнóю грехá,/ во спаси́тельная пристáнища, Господороди́тельнице,// избавля́ющи от вся́ких лю́тых.

Катавáсiя Трióди (глас 8): Из горы́ приосенéнныя Слóве, прорóк,/ еди́ныя Богорóдицы,/ хотя́ще воплоти́тися, богови́дно усмотри́,// и со стрáхом славослóвяше си́лу Твою́.

ПЕСНЬ 5

Iрмóс: У́тренюет дух мой к Тебé Бóже,/ занé свет повелéнiя пришéствiя Твоегó:/ úмиже ýбо озарù ум наш Влады́ко,// и настáви на стезю́ жúзни. (Двáжды)

Хор: Упокóй, Гóсподи, дýши усóпших раб Твоúх.

Чтец: Коегóждо пáмять умéрших благочéстно/ от вéка днесь творя́ще Гóсподи,/ прилéжно Ти вопiéм:// вся упокóй со святы́ми Твои́ми.

Хор: Упокóй, Гóсподи, дýши усóпших раб Твоúх.

Чтец: От вся́каго, я́же прiя́л еси́, рóда и рóда/ в царéх, в князéх, или́ монáшествующих правослáвныя, Щéдре,// вéчнаго избáви мучéнiя.

Хор: Упокóй, Гóсподи, дýши усóпших раб Твоúх.

Чтец:  Всех я́же создáл еси́ полéзная вéдый,/ и́мже попусти́л еси́ Гóсподи, внезáпными падéжьми ненаде́жно умрéти,// избáви мýки вся́кiя Бóже наш.

Хор: Упокóй, Гóсподи, дýши усóпших раб Твоúх.

Чтец: Огня́ при́сно паля́щаго, и от тьмы несвети́мыя,/ скрéжета зýбнаго, и чéрвiя безконéчно мýчащаго и вся́каго мучéнiя// избáви Спáсе наш, вся вéрно умéршiя.

Хор: Слáва Отцý и Сыну и Святóму Дýху.

Трóичен: Единопрестóльная, безначáльная, Трiипостáсная Еди́нице,/ разделéнiем Еди́нство, и вопроти́в Ли́цы Естествó имýщая,// во еди́но нас совокупи́ хотéнiе Твои́х зáповедей.

Хор: И ны́не и прúсно и во вéки векóв. Амúнь.

Богорóдичен: Пáче огнезрáчных серафíмов яви́лася еси́ Чи́стая Честнéйшая,/ порóждши сим непристýпнаго Iисýса Спáса,// воплощéнiем обожи́вшаго земнорóдных смешéнiе.

Катавáсiя Трióди (глас 8): У́тренюет дух мой к Тебé Бóже,/ занé свет повелéнiя пришéствiя Твоегó:/ и́миже ýбо озари́ ум наш Влады́ко,// и настáви на стезю́ жи́зни.

ПЕСНЬ 6

Iрмóс: Содержúма мя прiимù Человеколю́бче, грехù мнóгими/ и припáдающа щедрóтам Твоúм,// я́ко прорóка Гóсподи, и спасù мя. (Двáжды)

Хор: Упокóй, Гóсподи, дýши усóпших раб Твоúх.

Чтец: Смéрти разреши́в болéзни, пострадáв Начáльниче жи́зни Бóже наш,// усóпшiя от вéка рабы́ Твоя́ упокóй.

Хор: Упокóй, Гóсподи, дýши усóпших раб Твоúх.

Чтец: Неизглагóланными Твои́ми судьбáми,/ я́же уби́ша чарóвная напоéнiя, отрáвы, кóстная удавлéнiя,// со святы́ми Гóсподи упокóй.

Хор: Упокóй, Гóсподи, дýши усóпших раб Твоúх.

Чтец: Егдá суди́ти бýдеши вся́ческим,/ стоя́щим наги́м и откровéным пред лицéм Твои́м:// тогда́ Щéдре, пощади́ послужи́вшiя Ти вéрно Бóже.

Хор: Упокóй, Гóсподи, дýши усóпших раб Твоúх.

Чтец: Послéднею ýбо трубóю воструби́вшу Твоемý Архáнгелу,/ в воскресéнiе жи́зни// всех, тогдá Хрiстé, рабы́ Твоя́ упокóй.

Хор: Упокóй, Гóсподи, дýши усóпших раб Твоúх.

Чтец: От вéка я́же прiя́л еси́ вéрныя Бóже,/ род вся́кiй человéческiй сподóби,// во вéки со служáщими Тебé, слáвити Тя.

Хор: Слáва Отцý и Сыну и Святóму Дýху.

Трóичен: Богоначáлiе Трисвятóе, единопрестóльное,/ Óтче, Сы́не со Святы́м Дýхом,// Ты еси́ Бог мой, вседержи́тельством Твои́м содержáй все.

Хор: И ны́не и прúсно и во вéки векóв. Амúнь.

Богорóдичен: От кóрене твоегó возсiя́ цвет жи́зни,/ Iессéе прáотче взыгрáй// спасáяй мир, от Чи́стыя Отрокови́цы Хрїстóс Бог.

Катавáсiя Трióди (глас 8): Содержи́ма мя прiими́ Человеколю́бче, грехи́ мнóгими/ и припáдающа щедрóтам Твои́м,// я́ко прорóка Гóсподи, и спаси́ мя.

Кондáк Трióди, глас 8: Со святы́ми упокóй/ Хрїстé, дýши раб Твои́х,/ идéже несть болéзнь, ни печáль,/ ни воздыхáнiе,// но жизнь безконéчная.

Íкос: Сам еди́н еси́ безсмéртный,/ сотвори́вый и создáвый человéка:/ земнíи ýбо от земли́ создáхомся,/ и в зéмлю тýюжде пóйдем,/ я́коже повелéл еси́, создáвый мя и реки́й ми:/ я́ко земля́ еси́, и в зéмлю оты́деши:/ а́може вси человéцы пóйдем,/ надгрóбное рыдáнiе, творя́ще песнь:// аллилýїя.

ПЕСНЬ 7

Iрмóс: В начáле зéмлю основáвый,/ и небесá Слóвом утвердúвый,/ благословéн есù во вéки,// Гóсподи Бóже Отéц нáших. (Двáжды)

Хор: Упокóй, Гóсподи, дýши усóпших раб Твоúх.

Чтец: Благочéстно от вéка престáвльшихся пáмять творя́ще, вопiéм:// благословéн еси́ во вéки, Гóсподи Бóже Отéц нáших.

Хор: Упокóй, Гóсподи, дýши усóпших раб Твоúх.

Чтец: Внезáпу благочéстно умéршiя, и от стремни́ны вся́ческiя пáдшiя,/ дрéва, желéза, вся́каго кáмене,// упокóй Бóже усóпшiя вéрныя.

Хор: Упокóй, Гóсподи, дýши усóпших раб Твоúх.

Чтец: В стрáшное Твоé пришéствiе Щéдре, одеснýю овéц Твои́х постáви,// правослáвно Ти в жи́зни послужи́вшiя Хрiстé, и престáвльшiяся к Тебé.

Хор: Упокóй, Гóсподи, дýши усóпших раб Твоúх.

Чтец: В ли́це Хрiстé, избрáнных Твои́х вчини́ Твоя́ рабы́, вопи́ти Тебé:// благословéн еси́ во вéки, Гóсподи Бóже Отéц нáших.

Хор: Упокóй, Гóсподи, дýши усóпших раб Твоúх.

Чтец: От земли́ персть содéтельствовавый,/ плоть Дýхом оживотвори́вый, Спáсе Щéдрый,// я́же прiя́л еси́, упокóй Бóже, в нестарéющем животé.

Хор: Слáва Отцý и Сыну и Святóму Дýху.

Трóичен: Я́коже треми́ сóлнцы Божествó,/ еди́ным свéта срастворéнiем да воспоéтся,/ Отéц, и Сын, и Божéственный Дух,// еди́н Естествóм, но три Ипостáсьми.

Хор: И ны́не и прúсно и во вéки векóв. Амúнь.

Богорóдичен: Давíдское соглáсно воспевáем Ти пéнiе,/ гóру Тя Бóжiю нарицáюще Дéво,/ в нéйже всели́вся плóтiю Слóво,// обоготвори́ нас духóвно в Себé.

Катавáсiя Трióди (глас 8): В начáле зéмлю основáвый,/ и небесá Слóвом утверди́вый,/ благословéн еси́ во вéки,// Гóсподи Бóже Отéц нáших.

ПЕСНЬ 8

Iрмóс: На горé святéй прослáвльшася,/ и в купинé огнéм Приснодéвы Моисéови тáйну я́вльшаго,// Гóспода пóйте и превозносúте во вся вéки. (Двáжды)

Хор: Упокóй, Гóсподи, дýши усóпших раб Твоúх.

Чтец: Сокруши́вый пéрвее сень смéртную,/ возсiя́в я́ко сóлнце из грóба,/ сы́ны Воскресéнiя Твоегó сотвори́, Гóсподи слáвы,// вся умéршiя в вéре, во вéки.

Хор: Упокóй, Гóсподи, дýши усóпших раб Твоúх.

Чтец: Безвéстных и сокровéнных Свéдетелю,/ егдá и́маши откры́ти делá тьмы и совéты сердéц нáших,// тогдá не истяжи́ слóва со всéми вéрою усóпшими.

Хор: Упокóй, Гóсподи, дýши усóпших раб Твоúх.

Чтец: Егдá и́маши сéсти на престóле, и повели́ши на суд предстáти,/ сóбранным трубóю от конéц земли́:// тогдá пощади́ всех Хрїстé, я́ко Ми́лостивый.

Хор: Упокóй, Гóсподи, дýши усóпших раб Твоúх.

Чтец: Умéршим напрáсно от слýчаев,/ от кли́ча же зéльнаго и скóраго течéнiя,/ заушéнiя, удавлéнiя же, и лягáнiя,// Гóсподи слáвы, вéрою усóпшим ослáби во вéки.

Хор: Благословúм Отцá, и Сы́на, и Святáго Дýха, Гóспода.

Трóичен: Я́ко Еди́ницу Существóм пою́ Тя,/ я́ко Трóицу Ли́цы Тя чту:/ Ѻ́тче, и Сы́не, и Дýше Пресвяты́й,// безначáльную держáву Твоегó Цáрствiя слáвлю во вéки.

Хор: И ны́не и прúсно и во вéки векóв. Амúнь.

Богорóдичен: Струи́ живы́я истóчник запечатлéнный, показáлася еси́ Богорóдице Дéво:/ без мýжа бо Гóспода рóждши,// безсмéртiя вéрныя напая́еши водóю во вéки.

Хор: Хвáлим, благословúм, покланя́емся Гóсподеви, пою́ще и превознося́ще во вся вéки.

Катавáсiя Трióди (глас 8):На горé святéй прослáвльшася,/ и в купинé огнéм Приснодéвы Моисéови тáйну я́вльшаго,// Гóспода пóйте и превозноси́те во вся вéки.

Вóзглас: Богорóдицу и Мáтерь Свéта в пéснех возвелúчим.

Хор: Вели́чит душá Моя́ Гóспода,/ и возрáдовася дух Мой о Бóзе Спáсе Моéм.

Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На каждый стiх)

Я́ко призрé на смирéнiе рабы́ Своея́,/ се бо от ны́не ублажáт Мя вси рóди.

Я́ко сотвори́ Мне вели́чiе Си́льный,/ и свя́то И҆́мя Егó, и ми́лость Егó в рóды родóв боя́щимся Егó.

Сотвори́ держáву мы́шцею Своéю,/ расточи́ гóрдыя мы́слiю сéрдца их.

Низложи́ си́льныя со престóл, и вознесé смирéнныя;/ áлчущiя испóлни благ, и богатя́щiяся отпусти́ тщи.

Воспрiя́т Iзрáиля óтрока Своегó, помянýти ми́лости,/ я́коже глагóла ко отцéм нáшим, Авраáму и сéмени егó, дáже до вéка.

ПЕСНЬ 9

Iрмóс: Проявлéнное на горé законополóжнику во огнù и купинé/ Рождествó Приснодéвы,/ в нáше вéрных спасéнiе,// пéсньми немóлчными величáем. (Двáжды)

Хор: Упокóй, Гóсподи, дýши усóпших раб Твоúх.

Чтец: Идéже есть веселя́щихся жили́ще святы́х Твои́х Гóсподи,// вся от вéка усóпшiя, в вéре же и надéжди рáдоватися сподóби.

Хор: Упокóй, Гóсподи, дýши усóпших раб Твоúх.

Чтец: Умéршiя Бóжiим прещéнiем,/ смéртных громóв вся́ких с небесé изнесéнных,/ земли́ разсéдшейся, мóрю возшумéвшуся,// вся вéрныя Хрїстé, упокóй.

Хор: Упокóй, Гóсподи, дýши усóпших раб Твоúх.

Чтец: Вся́кiй вóзраст, стáрцы и ю́ныя,/ младéнцы и дéти, и ссýщiя млекó,/ мýжеское естествó и жéнское,// упокóй Бóже, я́же прiя́л еси́ вéрныя.

Хор: Упокóй, Гóсподи, дýши усóпших раб Твоúх.

Чтец: От ядови́тых угрызéнiй умéршiя,/ от поглощéнiя змiéв, от попрáнiя кóней,/ и от удавлéнiя, и обéшенiя от и́скренняго,// вéрою Ти послужи́вшiя упокóй.

Хор: Упокóй, Гóсподи, дýши усóпших раб Твоúх.

Чтец: Коегóждо по и́мени в вéре умéршiя,/ от вéка и от рóда родóв,/ неосуждéнно предстáти Тебé Слóве,// в пришéствiи Твоéм сподóби.

Хор: Слáва Отцý и Сыну и Святóму Дýху.

Трóичен: Еди́ный в Трóице Бóже, слáва Тебé непрестáнно:/ áще бо и Бог Кíйждо, но еди́н Естествóм есть,// Отéц, и Сын, и Дух, трисвéтлыми свóйствы.

Хор: И ны́не и прúсно и во вéки векóв. Амúнь.

Богорóдичен: Пáче умá Рождествó Твоé: раждáеши бо прéжде Сýщаго,/ и млекóм питáеши несказáнно, Пищедáвца мíру:/ держи́ши же содержáщаго вся, Хрїстá еди́наго// Избáвителя нáшего, Всенепорóчная.

Катавáсiя Трióди (глас 8): Проявлéнное на горé законополóжнику во огни́ и купинé/ Рождествó Приснодéвы,/ в нáше вéрных спасéнiе,// пéсньми немóлчными величáем.

Достойно есть

Хор: Достóйно есть я́ко вои́стинну блажи́ти Тя, Богорóдицу,/Присноблажéнную и Пренепорóчную и Мáтерь Бóга нáшего./ Честнéйшую Херувíм и слáвнeйшую без сравнéнiя Серафíм,/ без истлéнiя Бóга Слóва рóждшую, сýщую Богорóдицу Тя величáем.

Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.

Гóсподи, поми́луй. (3 раза)

Ексапостiлáрiй (светúлен Трióди): Пáмять совершáюще всех усóпших во Хрїстé,/ и конéчный день воспомя́нем вéрнiи,// о нас же и о óных Хрїстá при́сно моля́ще.

Слáва Отцý и Сы́ну и Святóму Дýху, и ны́не и прúсно и во вéки векóв, амúнь.

Богорóдичен Трióди: Слáдосте áнгелов, скорбя́щих рáдосте,/ хрїстiáн предстáтельнице, Дéво Мáти Госпóдня,// заступи́ нас и избáви вéчных мук.

ХВАЛИТНЫ

Хор, глас 6: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.

Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.

Псалом 148

Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речé, и бы́ша, Той повелé, и создáшася. Постáви я́ в век и в век вéка, повелéнiе положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.

Псалом 149

Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сы́нове Сióни возрáдуются о Царé своéм. Да восхвáлят и҆́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остри́ в рукáх их: сотвори́ти отмщéнiе во языцех, обличéнiя в лю́дех, связáти цари́ их пýты, и слáвныя их ручными окóвы желéзными,

Сотвори́ти в них суд напи́сан: слáва сiя бýдет всем преподóбным Егó. Хвали́те Бóга во святы́х Егó, хвали́те Егó в утвержéнiи си́лы Егó.

На 6: Хвалúте Егó на сúлах Егó, хвалúте Егó по мнóжеству велúчествiя Егó.

Стiхúры Трióди, глас 6: Стрáшный конéц смéрти,/ и грóзный суд Влады́ки:/ огнь бо неугаси́мый уготóвися тáмо:/ червь неусыпáемый мýчай, и скрéжет зубóв,/ тьма кромéшная есть, и вéчное осуждéнiе./ Тéмже зовéм ко Спáсу:/ я́же избрáл еси́ от приврéменных, упокóй,// за вéлiю Твою́ ми́лость.

Хвалúте Егó во глáсе трýбнем, хвалúте Егó во псалтúри и гýслех.

Стiхúра: Вси в житiи́ остáвльшiися,/ прiиди́те, во гробéх ужасáющеся прини́кните,/ и ви́дите ми́ра прéлесть:/ где ны́не тéла добрóта, и слáва богáтства;/ где же гóрдость житiя́;/ вои́стинну сýетная вся./ Тéмже зовéм ко Спáсу:/ я́же избрáл еси́ от приврéменных, упокóй,// за вéлiю Твою́ ми́лость.

На 4.  Хвалúте Егó в тимпáне и лúце, хвалúте Егó во стрýнах и оргáне.

Стiхúра: Ны́не во гроб, и́же на престóле,/ ны́не и́же в порфи́ре, во тлю облечéся:/ не ктомý бо на престóле, но во грóбе лежи́т./ Се исчезé цáрская держáва,/ се я́ко сóнiе человéческое прехóдит житié./ Тéмже зовéм ко Спáсу:/ я́же избрáл еси́, упокóй,// за вéлiю Твою́ ми́лость.

Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.

Стiхúра: Вся отсéле преложи́вшияся в надéжду жи́зни вéчныя,/ и житié измени́вшия вся́ким Спáсе óбразом,/ вся́кiй чин и род, и вся́кiй вóзраст,/ мýжи вкýпе и жены́ и новорождéнные младéнцы,/ я́ко Человеколю́бец в нéдрех учини́ Авраáмлих,/ и в мéстех ослáбы,// за вéлiю Твою́ ми́лость.

Слáва Отцý и Сыну и Святóму Дýху.

Глас 2: Я́ко цвет увядáет, и я́ко сень мимогрядéт,/ разрушáется всяк человéк:/ пáки же глася́щей трубé,/ мéртвiи, я́ко в трýсе, вси востáнут ко Твоемý срéтенiю Хрiстé Бóже./ Тогдá, Влады́ко, и́хже престáвил еси́ от нас,// во святы́х Твои́х учини́ крóвех, согрешéнiя их, Благосéрде, презирáя.

Продолженiе здесь