НЕДЕЛЯ 6 по ПАСХЕ, о слепом, апостола Иоанна Богослова. Глас 5. УТРЕНЯ (окончание) ЧАС ПЕРВЫЙ
21 мáя 2023 гóда. Недéля шестáя по Пáсхе, о слепóм. Апóстола и евангелíста Iоáнна Богослóва. Глас 5. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (окончáнiе). Пéрвый час.
Окончáнiе всенóщного бдéнiя. Начáло здесь ( великая вечéрня), здесь ( ýтреня) здесь ( продолжéнiе ýтрени с канóном)
ПЕСНЬ 8
Iрмóс: Сей наречéнный и святы́й день,/ Еди́н суббóт Царь и Госпóдь,/ прáздников прáздник/ и торжествó есть торжéств,// вóньже благослови́м Хрїстá во вéки. (Двáжды)
Хор: Хрїстóс воскрéсе из мéртвых.
Чтец: Прiиди́те, нóваго виногрáда рождéнiя,/ Божéственнаго весéлiя,/ в нарóчитом дни Воскресéнiя,/ Цáрствiя Хрїстóва приобщи́мся,/ пою́ще Егó// яко Бóга во вéки.
Хор: Хрїстóс воскрéсе из мéртвых.
Чтец: Возведи óкрест óчи твои, Сióне, и виждь:/ се бо прiидóша к тебé,/ яко богосвéтлая свети́ла,/ от зáпада, и сéвера, и мóря,/ и востóка чáда твоя́,// в тебé благословя́щая Хрїстá во вéки.
Хор: Пресвятáя Богорóдице, спасù нас.
Богорóдичен: Прiи́де Тобóю в мiр Госпóдь, Дéво Богорóдице,/ и чрéво áдово растóрг,/ смéртным нам воскресéнiе даровá:// Тéмже благослови́м Егó во вéки.
Хор: Пресвятáя Богорóдице, спасù нас.
Богорóдичен: Всю низложи́в смéрти держáву Сын Твой, Дéво,/ Свои́м воскресéнiем,/ я́ко Бог крéпкiй совознесé нас и обожи́:// тéмже воспевáем Егó во вéки.
Глас 8
Хор: Святы́й апóстоле и евангелúсте Iоáнне Богослóве, молù Бóга о нас.
Чтец: Я́ко благолéпна и благознамени́та преслáвная пáмять твоя́,/ благовéстниче Iисýсова Божествá,/ Божéственная, благоухáющи, Цéркви возсiя́./ Тем, рáдующеся, вéрнiи, поéм:/ óтроцы, благослови́те, свящéнницы, воспóйте,// лю́дiе, превозноси́те во вся вéки. (Двáжды)
Хор: Святы́й апóстоле и евангелúсте Iоáнне Богослóве, молù Бóга о нас.
Чтец: Богослóва имýще ли́ку чиноначáльника, Тя от негó, Хрiстé, богослóвима,/ Бóга возвещáем со Отцéм и Дýхом и, единоначáльственне песнослóвяще, вопiéм:/ óтроцы, благослóвите, свящéнницы, воспóйте,// лю́дiе, превозноси́те во вся вéки.
Хор: Пресвятáя Богорóдице, спасù нас.
Богорóдичен: Воплощéннаго родилá еси́ Бóга Слóва, Всенепорóчная,/ Сегó умоли́ огня́ мя избáвити:/ се бо житié моé все отягчи́ся, все порабóтися лю́тыми грехáми.// Тем к Тебé, Дéво, прибегáю и Тя призывáю, Обрáдованную.
Глас 5
Хор: Слáва Тебé, Бóже наш, слáва Тебé.
Чтец: Áнгельстiи чи́нове на Крестé Тя ви́девше ви́сима, Хрiстé Всецарю́,/ и тварь всю изменя́юща стрáхом,// ужасóшася, пою́ще Твоé человеколю́бiе.
Хор: Слáва Тебé, Бóже наш, слáва Тебé.
Чтец: Ад дóле Тебé ви́дев, стеня́ше,/ и подавáше скóро мéртвыя,/ от вéка тáмо храни́мыя, Хрiстé,// песнослóвящiя Твоé человеколю́бiе.
Благословúм Отцá, и Сы́на, и Святáго Дýха, Гóспода.
Трóичен: Трóице нераздéльная, Еди́нице неслiя́нная,/ Бóже вся́ческих и Зижди́телю всех,/ песнослóвящiя и вéрно покланя́ющiяся держáве Твоéй,// от вся́ких искушéнiй спасáй.
И ны́не и прúсно и во вéки векóв. Амúнь.
Богорóдичен: Дéво Пречи́стая, богоблагодáтная,/ Твоегó моли́ Сы́на всегдá,// да не посрами́т мя в день осуждéнiя, но сочтéт избрáнным овцáм.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя Вознесéнiя (глас 5): Из Отцá прéжде век рождéннаго Сы́на и Бóга,/ и в послéдняя лéта воплощéннаго от Дéвы Мáтере,/ свящéнницы пóйте,// лю́дiе превозноси́те во вся вéки.
ПЕСНЬ 9
Iрмóс: Свети́ся, свети́ся,/ нóвый Iерусали́ме:/ слáва бо Госпóдня/ на тебé возсiя́./ Ликýй ны́не/ и весели́ся, Сióне./ Ты же, Чи́стая, красýйся, Богорóдице,// о востáнiи Рождествá Твоегó. (Двáжды)
Хор: Хрїстóс воскрéсе из мéртвых.
Чтец: О Божéственнаго, о любéзнаго,/ о сладчáйшаго Твоегó глáса!/ С нáми бо нелóжно/ обещáлся еси бы́ти,/ до скончáнiя вéка Хрїстé:/ Егóже, вéрнiи,// утверждéнiе надéжди имýще, рáдуемся.
Хор: Хрїстóс воскрéсе из мéртвых.
Чтец: О Пáсха вéлiя и свящéннейшая, Хрїстé!/ О мýдросте, и Слóве Бóжiй, и си́ло!/ Подавáй нам и́стее Тебé причащáтися,// в невечéрнем дни Цáрствiя Твоегó.
Хор: Пресвятáя Богорóдице, спасù нас.
Богорóдичен: Соглáсно, Дéво, Тебé блажи́м вéрнiи:/ рáдуйся, двéре Госпóдня:/ рáдуйся, грáде одушевлéнный:/ рáдуйся, Ея́же рáди нам ны́не возсiя́ свет,// из Тебé Рождéннаго из мéртвых Воскресéнiя.
Хор: Пресвятáя Богорóдице, спасù нас.
Богорóдичен: Весели́ся и рáдуйся божéственная двéре Свéта:/ зашéдый бо Iисýс во гроб возсiя́,/ просiя́в сóлнца светлéе,/ и вéрныя вся озари́в,// Богорáдованная Влады́чице.
Глас 8
Хор: Святы́й апóстоле и евангелúсте Iоáнне Богослóве, молù Бóга о нас.
Чтец: Крестý Влады́чню предстоя́й, Дéве же и Богорóдице Чи́стей,/ учени́к возлю́бленный, чи́стый Богослóвiя оргáн,/ я́коже дéвственник вручéнiе прiя́т и, храни́тель Непорóчныя быв Богорóдицы,// ны́не достóйно ублажáется. (Двáжды)
Хор: Святы́й апóстоле и евангелúсте Iоáнне Богослóве, молù Бóга о нас.
Чтец: Достóйно возлю́бль Пречи́стый честнóе и непорóчное житié твоé,/ áнгельски пожи́вша на земли́, тя в брáта мéсто прiя́т, блажéнне Iоáнне,/ Своéй сы́на тя возвести́ Мáтери Богорóдице,// с Нéюже тя вси ублажáем.
Хор: Пресвятáя Богорóдице, спасù нас.
Богорóдичен: Спаси́тельный бýди ми столп, Чи́стая,/ дéмонов бездéльны сотвори́ полки́, искушéнiй молвý и бед отревáющи,/ и страстéй нахóды далéче отгоня́ющи, и чи́стое даю́щи свобождéнiе,// и Божéственная даровáнiя незави́стне мне преподаю́щи.
Глас 5
Хор: Слáва Тебé, Бóже наш, слáва Тебé.
Чтец: На Дрéве крéстнем пригвозди́лся еси́, Хрiстé Бóже,/ и вся победи́л еси́ врáжiя сопроти́вная начáла,/ и пéрвую кля́тву потреби́л еси́, Спáсе:// тéмже Тя по дóлгу величáем.
Хор: Слáва Тебé, Бóже наш, слáва Тебé.
Чтец: Я́ко ви́де Тя, Слóве, ад дóле с душéю, воздохнý,/ и вся мéртвыя стрáхом отреши́,/ познáвшiя держáву влáсти Твоея́:// тéмже Тя по дóлгу величáем.
Слáва Ѻтцý и Сы́ну и Святóму Дýху.
Трóичен: Свет Отцá чту, Свет слáвлю и Сы́на, Свет воспевáю Дýха Прáваго,/ еди́н Свет нераздéльный, в трiéх Ли́цех разумевáемый,// Бóга Царя́ всея́ твáри.
И ны́не и прúсно и во вéки векóв. Амúнь.
Богорóдичен: Яви́вшися прострáннейшая небéс, Дéво Чи́стая,/ вмести́ла еси́ плóтiю Бóга неопи́саннаго,/ и родилá еси́ всех Избавлéнiе,// вéрою несумнéнною воспевáющих Тя.
Катавáсiя Вознесéнiя (глас 5): Тя пáче умá и словесé Мáтерь Бóжiю,/ в лéто Безлéтнаго неизречéнно рóждшую,// вéрнiи единомýдренно величáем.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьми́ Бог наш.
Хор: Свят Госпóдь Бог наш
Ексапостилáрiй: Плóтiю уснýв,/ яко мертв,/ Царю́ и Гóсподи,/ триднéвен воскрéсл еси,/ Адáма воздви́г от тли,/ и упраздни́в смерть:/ Пáсха нетлéнiя,// ми́ра спасéнiе.
Слáва Ѻтцý и Сы́ну и Святóму Дýху.
Светúлен ап. и ев. Iоáнна: Грóмов сын быв, к человéком богослóвил еси́,/ éже: в начáле бе Слóво, - апóстоле Iоáнне,/ возлегíй бо на пéрси вéрно Влады́ки твоегó// и оттýду почéрп Богослóвiя струи́, тварь всю напоя́еши.
И ны́не и прúсно и во вéки векóв. Амúнь.
Светúлен Трióди (о слепóм): У́мныя мои́ óчи,/ ослеплéнныя, Гóсподи, от мрáчнаго грехá, Ты просвети́,/ вложи́в, Щéдре, смирéнiе,// и покая́нiя омы́й слезáми.
ХВАЛИТНЫ
Хор, глас 5: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.
[В приходской практике пропускается до стихир]Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речé, и бы́ша, Той повелé, и создáшася. Постáви я́ в век и в век вéка, повелéнiе положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
[В приходской практике пропускается до стихир]Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сы́нове Сióни возрáдуются о Царé своéм. Да восхвáлят и҆́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остри́ в рукáх их: сотвори́ти отмщéнiе во языцех, обличéнiя в лю́дех, связáти цари́ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егó.
Стiхúры воскрéсные, глас 5: Гóсподи, запечáтану грóбу от беззакóнников,/ прошéл еси́ из грóба,/ я́коже роди́лся еси́ от Богорóдицы:/ не уразумéша, кáко воплоти́лся еси́, безплóтнiи Твои́ Áнгели:/ не чýвствоваша, когдá воскрéсл еси́, стрегýщiи Тя вóини./ Обоя́ бо запечатлéстася испытýющим,/ яви́шася же чудесá клáняющимся вéрою тáинству:/ éже воспевáющим,// воздáждь нам рáдость и вéлiю ми́лость.
Хвалúте Бóга во святы́х Егó,/ хвалúте Егó в утвержéнiи сúлы Егó.
Стiхúра: Гóсподи, вереи́ вéчныя сокруши́в,/ и ýзы растерзáв, от грóба воскрéсл еси́,/ остáвль Твоя́ погребáльная,/ во свидéтельство и҆́стиннаго триднéвнаго Твоегó погребéнiя:/ и предвари́л еси́ в Галiлéи, в пещéре стрегóмый./ Вéлiя Твоя́ ми́лость, Непостижи́ме Спáсе,// поми́луй и спаси́ нас.
На 6: Хвалúте Егó на сúлах Егó, хвалúте Егó по мнóжеству велúчествiя Егó.
Стiхúра: Гóсподи, жены́ текóша на гроб,/ ви́дети Тя, Хрiстá, нас рáди пострадáвшаго,/ и пришéдша, обретóша Áнгела на кáмени седя́ща,/ стрáхом отвáльшемся,/ и к ним возопи́, глагóля:/ воскрéсе Госпóдь, рцы́те ученикóм,/ я́ко воскрéсе от мéртвых,// спасáяй дýши нáша.
Хвалúте Егó во глáсе трýбнем, хвалúте Егó во псалтúри и гýслех.
Стiхúра: Гóсподи, я́коже изшéл еси́ от запечáтаннаго грóба,/ тáко вшел еси́ и двéрем заключéным ко ученикóм Твои́м,/ показýя им телéсная страдáнiя,/ я́же подъя́л еси́, Спáсе Долготерпели́вый:/ я́ко от сéмене Давíдова я́звы претерпéл еси́,/ я́ко Сын же Бóжiй, мир свободи́л еси́./ Вéлiя Твоя́ ми́лость, Непостижи́ме Спáсе,// поми́луй и спаси́ нас.
На 4. Хвалúте Егó в тимпáне и лúце, хвалúте Егó во стрýнах и оргáне.
Стiхúры ап. Iоáнна Богослóва, глас 8: Блажéнне Iоáнне премýдре,/ мнóжеством тéплости/ ко Хрiстóве любви́/ мнóжае всех был еси́,/ учени́к возлю́блен Всеви́дцу Слóву/ и судя́щему прáвыми мéрами всей вселéнней,/ чистотóю и дéвства добрóтами озари́вся,// тéлом и помышлéнiи, Богоблажéнне.
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Стiхúра: Дéвства процветéнiе,/ честны́х добродéтелей прiя́тное жили́ще,/ премýдрости оргáн, духóвный храм,/ светонóсная устá благодáти,/ Цéркви пресвéтлое óко,/ всечестнáго Iоáнна/ пéсньми духóвными ны́не восхвáлим,// я́ко служи́теля Хрiстóва.
На 2. Во всю зéмлю изы́де вещáнiе их/ и в концы́ вселéнныя глагóлы их.(Пс.18:5А)
Стiхúра: Богослóвiя вóды,/ на пéрси возлéг,/ премýдрости почéрпл еси́/ и мир напои́л еси́,/ Iоáнне всеизря́дне,/ Трóйческим рáзумом мóре изсуши́л еси́ безбóжiя,/ столп быв и óблак одушевлéн,// наставля́еши нас к Небéсному наслéдiю.
Небесá повéдают слáву Бóжiю,/ творéнiе же рукý Егó возвещáет твердь.(Пс.18:2)
Глас 8 (самоглáсен): Благовéстниче Iоáнне,/ равноáнгельне, дéвственниче, Богослóве, Бóгом научéнне,/ правослáвно мíрови пречи́стое ребрó,/ кровь и вóду источи́вшее, проповéдал еси́,// и́мже вéчный живóт прiéмлем душáм нáшим.
Слáва Ѻтцý и Сы́ну и Святóму Дýху.
Стiхира Трióди (о слепóм), глас 8: Кто возглагóлет си́лы Твоя́, Хрiстé;/ или́ кто изочтéт чудéс Твои́х мнóжества?/ Сугýб бо я́ко ви́ден был еси́ на земли́ за блáгость,/ сугýбы и цельбы́ недýгующим подавáл еси́:/ не тóчiю бо телéсныя óчи отвéрзл еси́,/ и́же от утрóбы слепóму,/ но и душéвныя./ Тéмже Бóга Тя исповéдаше тая́щагося,// и всем подаю́ща вéлiю ми́лость.
И ны́не и прúсно и во вéки векóв. Амúнь.
Глас 2: Преблагословéнна есѝ, Богорóдице Дéво,/ Воплóщшим бо ся из Тебé ад плени́ся,/ Адáм воззвáся,/ кля́тва потреби́ся,/ Éва свободи́ся,/ смeрть умертви́ся, и мы ожи́хом./ Тем воспевáюще вопiéм:/ благословéн Хрїстóс Бог,// благоволи́вши тáко, слáва Тебé.
Возглас: Слáва Тебé, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрїстé, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцá, поми́луй нас. Яко Ты есѝ Един Свят; Ты есѝ Един Госпóдь, Iисýс Хрїстóс, в слáву Бóга Отцá, ами́нь.
На всяк день благословлю́ Тя и восхвалю́ и҆́мя Твоé во вéки, и в век вéка.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоé во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был еси нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебé. Гóсподи, к Тебé прибегóх, научѝ мя твори́ти вóлю Твою́, яко Ты есѝ Бог мой, яко у Тебé истóчник животá, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, поми́луй нас. (3 раза)
Хор: Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помилуй нас.
Тропáрь воскрéсный, глас 1: Днесь Спасéнiе мíру бысть,/ поéм Воскрéсшему из грóба,/ и Начáльнику жи́зни нáшея:/ разруши́в бо смéртiю смерть,// побéду дадé нам и вéлiю ми́лость.
Гóсподи поми́луй (40 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Гóсподи поми́луй (12раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Утвердѝ, Бóже, святýю правослáвную вéру, правослáвных хрїстiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 раза)
Гóсподи, благословѝ.
ОТПУСТ
Воскресы́й из мéртвых, Хрїстè, и́стинный Бог наш, моли́твами Пречи́стыя Своея́ Мáтере, святы́х слáвных и всехвáльных Апóстол, святых и прáведных богоотéц Iоакíма и Áнны, и всех святых, поми́луй и спасѝ нас, яко Благ и Человеколю́бец. Ами́нь.
МНОГОЛЕТИЕ
Слáва Отцý и Сы́ну и Святóму Дýху, и ны́не и прúсно и во вéки векóв. Амúнь.
Стiхúра евáнгельская осьмáя, глас 8: Марíины слéзы не всýе проливáются тéпле,/ се бо сподóбися и учáщих Áнгелов,/ и видéнiя Самогó Iисýса./ Но ещé земнáя мýдрствует, я́ко женá немощнáя:/ тéмже и отсылáется не прикасáтися Хрїстý./ Но обáче проповéдница посылáется Твои́м ученикóм,/ и҆́мже благовествовáнiе нося́щи,/ éже ко Отéческому жрéбiю восхóд возвещáющи.// С нéюже сподóби и нас явлéнiя Твоегó, Влады́ко Гóсподи.
ПЕРВЫЙ ЧАС
Хрїстóс воскрéсе из мéртвых,/ смéртiю смерть попрáв/ и сýщим во гробéх живóт даровáв. (Трúжды)
Псалом 5
Глагóлы моя́ внушѝ, Гóсподи, разумéй звáнiе моé. Вонмѝ глáсу молéнiя моегó, Царю́ мой и Бóже мой, яко к Тебé помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебé лукáвнуяй, нижé пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебé лю́бящiи имя Твоé. Яко Ты благослови́ши прáведника, Гóсподи: яко орýжiем благоволéнiя венчáл еси нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты еси. Не отвратѝ человéка во смирéнiе, и рекл еси: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травá мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л еси беззакóнiя нáша пред Тобóю: век наш в просвещéнiе лицá Твоегó. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегó, и от стрáха Твоегó, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы́ Твоя. Испóлнихомся заýтра ми́лости Твоея, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны еси, лéта в ня́же ви́дехом злáя. И при́зри на рабы́ Твоя́, и на делá Твоя, и настáви сы́ны их. И бýди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебé, Гóсподи. Пою́ и разумéю в путѝ непорóчне, когдá прiи́деши ко мне? Прехождáх в незлóбiи сéрдца моегó посредé дóму моегó. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпé мне сéрдце стропти́во, уклоня́ющагося от менé лукáваго не познáх. Оклеветáющаго тай и҆́скренняго своегó, сегó изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредé дóму моегó творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебé Бóже. (3 раза)
Гóсподи, помúлуй. (3 раза)
Тропáрь воскрéсный, глас 5: Собезначáльное Слóво Отцý и Дýхови, от Дéвы рóждшееся на Спасéнiе нáше, воспои́м, вéрнiи, и поклони́мся; я́ко благоволи́ Плóтiю взы́ти на Крест, и смерть претерпéти, и воскреси́ти умéршiя слáвным воскресéнiем Свои́м.
Слáва Отцý и Сы́ну и Святóму Дýху.
Тропáрь ап. Iоанна, глас 2: Апóстоле, Хрїстý Бóгу возлю́бленне, ускори́ избáвити лю́ди безотвéтны: прiéмлет тя припáдающа и́же пáдша на пéрси Прiéмый, Егóже моли́, Богослóве, и належáщую мглу язы́ков разгнáти, прося́ нам ми́ра и вéлiя ми́лости.
И ны́не и прúсно и во вéки векóв. Амúнь.
Богорóдичен: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблá есѝ цвет нетлéнiя. Дéву, я́ко пребылá есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогó молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы́ человéческiя, и сохраню́ зáповеди Твоя́. Лицé Твоé просветѝ на рабá Твоегó и научѝ мя оправдáнiем Твои́м.
Да испóлнятся устá моя хвалéнiя Твоегó, Гóсподи, я́ко да воспою́ слáву Твою́, весь день великолéпiе Твоé.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 раза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстé, Сыне Бóжїй, поми́луй нас. Ами́нь.
КОНДАК
Кондáк прáздника Тріóди (о слепóм) глас 4: Душéвныма очи́ма ослеплéн, к Тебé, Хрiстé, прихождý, я́коже слепы́й от рождéнiя, покая́нiем зовý Ти: Ты сýщих во тьме Свет пресвéтлый.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрїстé Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесá очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрїстè, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицá Твоегó, да в нем ýзрим Свет Непристýпный: и испрáви стопы́ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк Пáсхи, глас 8: Áще и во гроб снизшéл есѝ, Безсмéртне,/ но áдову разруши́л есѝ си́лу,/ и воскрéсл есѝ, я́ко победи́тель, Хрїстé Бóже,/ женáм мироно́сицам вещáвый: рáдуйтеся,/ и Твои́м апóстолом мир дáруяй,// пáдшим подая́й воскресéнiе.
Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.
Гóсподи, поми́луй. (3 раза)
Гóсподи, благословᴎ́.
Воскресы́й из мéртвых, Хрїстè, и҆́стинный Бог наш, моли́твами пречи́стыя Своея́ Мáтере, и всех святы́х, поми́лует и спасéт нас, я́ко Благ и Человеколю́бец.
С утрá чти часы и обéдницу