[НЕПОРОЧНЫ]Избрáннiи стiхù из псалмá 118: (глас 5 всегдá): Блажéни непорóчнiи в путь, ходя́щiи в закóне Госпóдни. Блажéни испытáющiи свидéнiя Егó, всем сéрдцем взы́щут Егó, не дéлающiи бо беззакóнiя, в путéх Егó ходи́ша. Ты заповéдал еси зáповеди Твоя сохрани́ти зелó. Дабы́ испрáвилися путié мои, сохрани́ти оправдáнiя Твоя. Тогдá не постыжýся, внегдá призрéти ми на вся зáповеди Твоя. Исповéмся Тебé в прáвости сéрдца, внегдá научи́ти ми ся судьбáм прáвды Твоея́. Оправдáнiя Твоя сохраню́, не остáви менé до зелá. В чесóм испрáвит юнéйшiй путь свой? Внегдá сохрани́ти словесá Твоя. Всем сéрдцем мои́м взыскáх Тебé, не отри́ни менé от зáповедей Твои́х. В сéрдце моéм скрых словесá Твоя, яко да не согрешý Тебé. Благословéн еси, Гóсподи: научи́ мя оправдáнiем Твои́м.
Áнгельскiй собóр удиви́ся,/ зря Тебé в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел мvронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Зелó рáно мvронóсицы течáху/ ко грóбу Твоему рыдáющiя,/ но предстá к ним Áнгел и речé:/ рыдáнiя врéмя престá, не плáчите,/ воскресéнiе же апóстолом рцы́те.
Мvронóсицы жены́ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речé, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егó Сы́нови, и Святóму Дýху,/ Святéй Трóице во еди́ном существé,/ с Серафíмы зовýще:/ Свят, Свят, Свят еси, Гóсподи.
И ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехá, Дéво, Адáма избáвила еси,/ рáдость же Éве/ в печáли мéсто подалá еси,/ пáдшiя же от жи́зни/ к сей напрáви/ из Тебé воплоти́выйся Бог и Человéк.
Святы́м Дýхом вся́кое богáтство слáвы,/ от Негóже благодáть, и живóт вся́кой твáри:// со Отцéм бо воспевáемь есть, и с Слóвом.
И ны́не и прúсно и во вéки векóв. Амúнь.
Святы́м Дýхом вся́кое богáтство слáвы,/ от Негóже благодáть, и живóт вся́кой твáри:// со Отцéм бо воспевáемь есть, и с Слóвом.
ПРОКИМЕН
Чтец: Прокíмен, глас трéтiй, псалóм Давíдов. Рцы́те во язы́цех, я́ко Госпóдь воцари́ся, и҆́бо испрáви вселéнную, я́же не подви́жится. (Пс.95:10А)
Хор: Рцы́те во язы́цех, я́ко Госпóдь воцарúся,/ и҆́бо испрáви вселéнную, я́же не подвúжится.
Чтец: Воспóйте Гóсподеви песнь нóву, воспóйте Гóсподеви вся земля́. (Пс.95:1)
Хор: Рцы́те во язы́цех, я́ко Госпóдь воцарúся,/ и҆́бо испрáви вселéнную, я́же не подвúжится.
Чтец: Рцы́те во язы́цех, я́ко Госпóдь воцари́ся,
Хор: И҆́бо испрáви вселéнную, я́же не подвúжится.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода. (Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Луки́ Святáго Евáнгелiя чтéнiе.
Хор: Слáва Тебé, Гóсподи, слáва Тебé.
(Лк.зач.112): Во врéмя óно, во еди́ну от суббóт, зелó рáно, прiидóша жены́ на гроб, нося́ще я́же уготóваша аромáты, и другíя с ни́ми. Обретóша же кáмень отвалéн от грóба, и вшéдше, не обретóша телесé Гóспода Iисýса. И бысть не домышля́ющимся им о сем, и се мýжа два стáста в них в ри́зах блещáщихся. Пристрáшным же бы́вшим им, и поклóншим ли́ца на зéмлю, рекóста к ним: что и́щете живáго с мéртвыми? Несть зде, но востá. Помяни́те, я́коже глагóла вам, ещé сый в Галiлéи, глагóля, я́ко подобáет Сы́ну Человéческому прéдану бы́ти в рýце человéк грéшник, и прóпяту бы́ти, и в трéтiй день воскрéснути. И помянýша глагóлы Егó. И возврáщшася от грóба, возвести́ша вся сiя́ единомунáдесяте и всем прóчим. Бя́ше же Магдали́на Марíя, и Iоáнна, и Марíя Iáковля, и прóчiя с ни́ми, я́же глагóлаху ко апóстолом сiя́. И яви́шася пред ни́ми я́ко лжа глагóлы их, и не вéроваху им. Петр же востáв течé ко грóбу, и прини́к ви́де ри́зы еди́ны лежáща, и оты́де, в себé дивя́ся бы́вшему.
[Русский синодальный перевод]В то время, в первый же день недели, очень рано, неся приготовленные ароматы, пришли они ко гробу, и вместе с ними некоторые другие; но нашли камень отваленным от гроба. И, войдя, не нашли тела Господа Иисуса. Когда же недоумевали они о сем, вдруг предстали перед ними два мужа в одеждах блистающих. И когда они были в страхе и наклонили лица свои к земле, сказали им: что вы ищете живого между мертвыми? Его нет здесь: Он воскрес; вспомните, как Он говорил вам, когда был еще в Галилее, сказывая, что Сыну Человеческому надлежит быть предану в руки человеков грешников, и быть распяту, и в третий день воскреснуть. И вспомнили они слова Его; и, возвратившись от гроба, возвестили всё это одиннадцати и всем прочим. То были Магдалина Мария, и Иоанна, и Мария, мать Иакова, и другие с ними, которые сказали о сем Апостолам. И показались им слова их пустыми, и не поверили им. Но Петр, встав, побежал ко гробу и, наклонившись, увидел только пелены лежащие, и пошел назад, дивясь сам в себе происшедшему. (Лк 24:1-12).
Хор: Слáва Тебé, Гóсподи, слáва Тебé.
Воскресéнiе Хрїстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрїстé, и святóе Воскресéнiе Твоé поéм и слáвим: Ты бо еси́ Бог наш, рáзве Тебé инóго не знáем, и҆́мя Твоé именýем. Прiиди́те вси вéрнiи, поклони́мся Святóму Хрїстóву Воскресéнiю: се бо прiи́де Крестóм рáдость всемý мíру. Всегдá благословя́ще Гóспода, поéм Воскресéнiе Егó: распя́тiе бо претерпéв, смéртiю смерть разруши́.(Трúжды)
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моé. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх роди́ мя мáти моя. Се бо и҆́стину возлюби́л еси́, безвéстная и тáйная премýдрости Твоея яви́л ми еси́. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отврати́ лицé Твоé от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéнiя Твоегó, и Дýхом Влады́чним утверди́ мя. Научý беззакóнныя путéм Твоим, и нечести́вiи к Тебé обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажи́, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моé. (Пс.50:3)
Стiхúра, глас 6: Воскрéс Iисýс от грóба,/ я́коже проречé,/ дадé нам живóт вéчный// и вéлiю ми́лость.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ПАСХИ, ГЛАС 1
(Канóн Пáсхи с Богорóдичнами, совмещéнный с канóном Трióди, о расслáбленном, глас 3)
ПЕСНЬ 1
Iрмóс: Воскресéнiя день,/ просвети́мся, лю́дiе./ Пáсха, Госпóдня Пáсха:/ от смéрти бо к жизни,/ и от землѝ к небесѝ,/ Хрїстóс Бог нас преведé,// побéдную пою́щiя.(Двáжды)
Хор (припéв): Хрїстóс воскрéсе из мéртвых.
Чтец (тропáрь): Очи́стим чýвствiя, и ýзрим/ непристýпным свéтом/ Воскресéнiя, Хрїстá/ блистáющася,/ и рáдуйтеся, рекýща,/ я́сно да услы́шим,// побéдную пою́ще. (Двáжды)
Хор (припéв): Хрїстóс воскрéсе из мéртвых.
Чтец (тропáрь): Небесá ýбо достóйно да веселя́тся,/ земля́ же да рáдуется,/ да прáзднует же мiр,/ ви́димый же весь и неви́димый:/ Хрiстóс бо востá,// весéлiе вéчное. (Двáжды)
Хор: Пресвятáя Богорóдице, спасù нас.
Богорóдичен: Умерщвлéнiя предéл сломи́ла еси,/ вéчную жизнь рóждшая Хрїстá,/ из грóба возсiя́вшаго днесь,/ Дéво Всенепорóчная,// и мiр просвети́вшаго.
Хор: Пресвятáя Богорóдице, спасù нас.
Богорóдичен: Воскрéсшаго ви́девши Сына Твоегó и Бóга,/ рáдуйся со апóстолы Богоблагодáтная Чи́стая:/ и éже рáдуйся пéрвее,/ яко всех рáдости винá, воспрiя́ла еси,// Богомáти Всенепорóчная.
Канон цветной Триоди, о расслабленном, глас 3
Хор: Слáва Тебé, Бóже наш, слáва Тебé.
Чтец: Дéйствуяй знáменiя, творя́й чудесá еди́не Царю́,/ распя́тiе вóлею претерпéл есѝ, я́ко Щедр,// и смерть смéртiю умертви́в, оживотвори́л есѝ нас.
Хор: Слáва Тебé, Бóже наш, слáва Тебé.
Чтец: Во Хрiстóве востáнiи лю́дiе днесь ликýим вéрно,/ пленéн бысть ад,/ ю́зники я́же содержáше, отдадé со тщáнiем,// пою́щiя вели́чiя Бóжiя.
Чтец: В купéль иногдá óвчую Áнгел схождáше,/ и еди́наго исцелевáше на вся́кое лéто:/ крещéнiем же Божéственным ны́не очищáет// безчи́сленная мнóжества Хрiстóс.
Слáва Ѻтцý и Сы́ну и Святóму Дýху.
Трóичен: В трiéх Ли́цех, еди́ном же Естествé/ безначáльнаго Бóга пои́м непрестáнно со безплóтными,/ Отцá, Слóва и Дýха,// Цáрство и держáву имýща нераздéльную.
И ны́не и прúсно и во вéки векóв. Амúнь.
Богорóдичен: Чтýщiй сей, Чи́стая, град Твой всегдá вéрно,/ спасáй от бед, пленéнiя вáрварскаго, междоусóбныя брáни, и мечá,// и вся́каго инóго прещéнiя.
Катавáсiя: Воскресéнiя день,/ просвети́мся, лю́дiе./ Пáсха, Госпóдня Пáсха:/ от смéрти бо к жизни,/ и от землѝ к небесѝ,/ Хрiстóс Бог нас преведé,// побéдную пою́щiя.
ПЕСНЬ 3
Iрмóс: Прiиди́те, пи́во пiéм нóвое,/ не от кáмене неплóдна чудодéемое,/ но нетлéнiя истóчник/ из грóба одожди́вша Хрiстá,// в Нéмже утверждáемся. (Двáжды)
Хор: Хрїстóс воскрéсе из мéртвых.
Чтец: Ныне вся испóлнишася свéта,/ нéбо же и земля́, и преиспóдняя:/ да прáзднует ýбо вся тварь/ востáнiе Хрiстóво,// в нéмже утверждáется.(Двáжды)
Хор: Хрїстóс воскрéсе из мéртвых.
Чтец: Вчерá спогребóхся Тебé Хрiстé,/ совостаю́ днесь/ воскрéсшу Тебé,/ сраспинáхся Тебé вчерá,// Сам мя спрослáви Спáсе во Цáрствiи Твоéм.(Двáжды)
Хор: Пресвятáя Богорóдице, спасù нас.
Богорóдичен: На нетлéнную жизнь прихождý днесь/ блáгостiю рóждшагося из Тебé, Чи́стая,// и всем концéм свет облистáвшаго.
Хор: Пресвятáя Богорóдице, спасù нас.
Богорóдичен: Бóга, Егóже родилá еси́ плóтiю,/ из мéртвых, я́коже речé,/ востáвша ви́девши, Чи́стая, ликýй,// и Сегó я́ко Бóга Пречи́стая возвеличáй.
Глас 3
Хор: Слáва Тебé, Бóже наш, слáва Тебé.
Чтец: Зря Тебé иногдá сóлнце, на дрéве ви́сяща, Слóве, свет скры,/ и трясáшеся земля́ вся,/ мéртвiи востáша,// мéртву бы́вшу Тебé, Всеси́льне.
Хор: Слáва Тебé, Бóже наш, слáва Тебé.
Чтец: С душéю пришéдшу Тебé во утрóбу земли́,/ дýши, я́же стяжá ад, издавáше со тщáнiем,// вопiю́щiя держáве Твоéй песнь благодáрную, еди́не Гóсподи.
Хор: Святы́й архiстратúже Мiхаúле, молù Бóга о нас.
Чтец: С вы́шними чи́нми Бóжiи, архáнгеле,/ мольбу́ сотвори́ о вéрою пою́щих тя,/ соблюдáя и храня́ нас,// житéйскими страстьмѝ нападáемых.
Слáва Отцý и Сы́ну и Святóму Дýху.
Трóичен: Слáва Отцý, возопiи́м, Сы́ну, и Дýху,/ Еди́н бо есть Естествóм Бог,/ Егóже си́лы вся небéсныя со стрáхом слáвят,// Свят, Свят, Свят есѝ, зовýще.
Катавáсiя: Прiиди́те, пи́во пiéм нóвое,/ не от кáмене неплóдна чудодéемое,/ но нетлéнiя истóчник/ из грóба одожди́вша Хрiстá,// в Нéмже утверждáемся.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Кондáк, глас 8: Áще и во гроб снизшéл есѝ, Безсмéртне,/ но áдову разруши́л есѝ си́лу,/ и воскрéсл есѝ, я́ко победи́тель, Хрiстé Бóже,/ женáм миронóсицам вещáвый: рáдуйтеся,/ и Твои́м апóстолом мир дáруяй,// пáдшим подая́й воскресéнiе.
Íкос: Éже прéжде сóлнца Сóлнце зашéдшее иногдá во гроб,/ предвари́ша ко ýтру, и҆́щущiя яко дне миронóсицы дéвы,/ и другá ко друзéй вопiя́ху:/ о други́ни! Прiиди́те, воня́ми помáжем тéло живонóсное и погребéное,/ плоть воскреси́вшаго пáдшаго Адáма, лежáщую во грóбе./ И҆́дем, потщи́мся я́коже волсвѝ, и поклони́мся,/ и принесéм ми́ра я́ко дáры, не в пеленáх, но в плащани́це обви́тому,/ и плáчим, и возопiи́м: о Влады́ко, востáни,// пáдшим подая́й воскресéнiе.
Седáлен Трióди (о расслáбленном), глaс 3: Глагóл разслáбленнаго тóкмо стягнý,/ я́ко всеми́рное Слóво еди́но,/ нас рáди на земли́ я́вльшагося за благоутрóбiе./ Тéмже и одр нося́, мимохождáше,/ áще и кни́жницы зрéти содéянное не терпя́ху,// злóбы содержи́ми зáвистiю, дýши разслабля́ющею.
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Богорóдичен Трióди, глaс 3: Красотé дéвства Твоегó, и пресвéтлой чистотé Твоéй,/ Гаврiи́л удиви́вся, вопiя́ше Ти, Богорóдице:/ кýю Ти похвалý принесý достóйную;/ что же возименýю Тя; недоумевáю и ужасáюся./ Тéмже я́ко повелéн бых, вопiю́ Ти:// рáдуйся, Благодáтная.
ПЕСНЬ 4
Iрмóс: На Божéственней стрáжи/ богоглагóливый Аввакýм/ да стáнет с нáми, и покáжет/ светонóсна Áнгела,/ я́сно глагóлюща:/ днесь спасéнiе мíру,/ я́ко воскрéсе Хрiстóс,// я́ко всеси́лен.(Двáжды)
Чтец: Яко единолéтный áгнец,/ благословéнный нам венéц Хрiстóс,/ вóлею за всех заклáн бысть,/ Пáсха чисти́тельная,/ и пáки из грóба крáсное// прáвды нам возсiя́ Сóлнце.
Богорóдичен: Создáвый Адáма, Твоегó прáотца, Чи́стая,/ зи́ждется от Тебé,/ и смéртное жили́ще разори́ Своéю смéртiю днесь,/ и озари́ вся// божéственными блистáньми воскресéнiя.
Хор: Пресвятáя Богорóдице, спасù нас.
Богорóдичен: Егóже родилá еси́ Хрiстá,/ прекрáсно из мéртвых возсiя́вша, Чи́стая, зря́щи,/ дóбрая и непорóчная в женáх и крáсная,/ днесь во спасéнiе всех,// со апóстолы рáдующися, Тогó прославля́й.
Глас 3
Хор: Слáва Тебé, Бóже наш, слáва Тебé.
Чтец: Еврéйскiй собóр, зáвистiю растаявáемь,/ на Дрéве распя́т Тя, Гóсподи:/ и разори́в осуждéнiе смéрти,/ я́ко си́лен востáл еси́,// мир с Собóю совоздви́гнув.
Хор: Слáва Тебé, Бóже наш, слáва Тебé.
Чтец: С мѵ́ры жены́, что неистощи́мое мѵ́ро и́щете; востáл есть, мѷронóсицам речé, сѣдя́й в бѣ́лых ри́зах, поднебéсную испóлнив мы́сленнагo благоухáнiя.
Хор: Слáва Тебé, Бóже наш, слáва Тебé.
Чтец: Рáбiй нося́ ѻ́браз, за мнóгое благоутрóбiе ходя́й пришéл еси́, и здрáва показáл еси́, во мнóгих лѣ́тѣх лежáщаго, слóве, повелѣ́в и ѻ́др взя́ти.
Чтец: Вои́стинну постыди́теся беззакóннiи,/ Хрiстóс бо воскрéсе, и совоздви́же мéртвыя, зовы́й:/ дерзáйте, аз победи́х мiр./ Вéруйте ýбо Емý, или́ умолчи́те лестцы́,// отметáющiися Воскресéнiя Егó.
Хор: Слáва Тебé, Бóже наш, слáва Тебé.
Чтец: Ióсифа благообрáзнаго,/ ревни́теля благочéстiя, совéтника и ученикá,/ с миронóсицами почти́м, и апóстолами, зовýще с ни́ми,// и вéрно воспевáюще Спáсово Воскресéнiе свéтло.
Слáва Отцý и Сы́ну и Святóму Дýху.
Трóичен: Соединя́емая естествóм, и раздѣля́емая ли́цы, есть святáя Трóица, Ѻтéц пресýщный, соприсносýщный же Сын, и святы́й и еди́ный всеси́льный Дух.
И ны́не и прúсно и во вéки векóв, амúнь.
Богорóдичен: Чи́стая, кáкo дои́ши; кáкo же родилá еси́ Младéнца, Адáма дрéвнѣйшаго; кáкo на рукý нóсиши Сы́на, сýщаго на рáму херувíмску, я́кo знáетъ, я́коже вѣ́сть, вся oсуществовáвый.
Катавáсiя: На Божéственней стрáжи/ богоглагóливый Аввакýм/ да стáнет с нáми, и покáжет/ светонóсна Áнгела,/ я́сно глагóлюща:/ днесь спасéнiе мíру,/ я́ко воскрéсе Хрiстóс,// я́ко всеси́лен.
ПЕСНЬ 5
Iрмóс: Утренюем ýтреннюю глубокý,/ и вмéсто ми́ра песнь принесéм Влады́це,/ и Хрiстá ýзрим/ прáвды Сóлнце,// всем жизнь возсiя́юща.(Двáжды)
Чтец: Пристýпим свещенóснiи,/ исходя́щу Хрiстý из грóба, я́ко женихý,/ и спрáзднуем любопрáзднственными чи́нми// Пáсху Бóжiю спаси́тельную.(Двáжды)
Хор: Пресвятáя Богорóдице, спасù нас.
Богорóдичен: Просвещáется божéственными лучáми и живонóсными/ воскресéнiя Сы́на Твоегó,/ Богомáти Пречи́стая,// и рáдости исполня́ется благочести́вых собрáнiе.
Хор: Пресвятáя Богорóдице, спасù нас.
Богорóдичен: Не развéрзл еси́ вратá дéвства в воплощéнiи,/ грóба не разруши́л еси́ печáтей, Царю́ создáнiя:// отонýдуже воскрéсшаго Тя зря́щи, Мáти, рáдовашеся.
Глас 3
Хор: Слáва Тебé, Бóже наш, слáва Тебé.
Чтец: Вознесы́йся на Дрéве крéстнем, и совознесы́й мир весь,/ и быв в мéртвых Бóже,// от вéка мéртвыя воздвизáеши.
Хор: Слáва Тебé, Бóже наш, слáва Тебé.
Чтец: Воскрéсе, я́коже речé, Хрiстóс,/ истощи́вый вся áдова цáрствiя,/ и явля́ется апóстолом,// рáдость подавáя вéчнующую.
Хор: Слáва Тебé, Бóже наш, слáва Тебé.
Чтец: Белообрáзен ви́ден бысть женáм блистáяйся Áнгел:/ не ктомý плáчите, Жизнь вáша востá,// сýщiя во гробéх мéртвыя оживи́вшая.
Хор: Слáва Тебé, Бóже наш, слáва Тебé.
Чтец: Разслáбленнаго я́ко воздви́гл еси́, Хрiстé,/ разслáбленную мою́ дýшу преступлéньми оздрáви,// и шéствовати мне Твоя́ прáвыя стези́ споспешествýй.
Слáва Отцý и Сы́ну и Святóму Дýху.
Трóичен: Равночéстная тричи́сленная Еди́нице,/ разделя́емая ýбо вéрно Ипостáсьми,/ соединя́емая же Естествóм есть,// Отéц, Сын и Божéственный Дух.
И ны́не и прúсно и во вéки векóв, амúнь.
Богорóдичен: Безсéменное Рождествó Твоé, Чи́стая,/ непостижи́моé поéм рождéнiе,// блажáще Тя, я́ко Мáтерь Творцá всех и Влады́ки.
Катавáсiя: Утренюем ýтреннюю глубокý,/ и вмéсто ми́ра песнь принесéм Влады́це,/ и Хрiстá ýзрим/ прáвды Сóлнце,// всем жизнь возсiя́юща.
ПЕСНЬ 6
Iрмóс: Снизшéл есѝ в преиспóдняя землѝ,/ и сокрушил еси вереѝ вéчныя,/ содержáщiя свя́занныя, Хрiстé,/ и триднéвен, яко от ки́та Ióна,// воскрéсл есѝ от грóба. (Двáжды)
Хор: Хрїстóс воскрéсе из мéртвых.
Чтец: Сохрани́в цéла знáменiя Хрiстé,/ воскрéсл еси от грóба,/ ключѝ Дéвы не вреди́вый в рождествé Твоéм,// и отвéрзл еси нам рáйскiя двéри.(Двáжды)
Хор: Хрїстóс воскрéсе из мéртвых.
Чтец: Спáсе мой,/ живóе же и нежéртвенное заколéнiе,/ яко Бог Сам Себé/ вóлею привéл Отцý,/ совоскреси́л еси всерóднаго Адáма,// воскрéс от грóба.(Двáжды)
Хор: Пресвятáя Богорóдице, спасù нас.
Богорóдичен: Возведéся дрéвле держи́мое смéртiю и тлéнiем,/ воплоти́вшимся от Твоегó пречи́стаго чрéва,/ к нетлéнней и присносу́щней жи́зни,// Богорóдице Дéво.
Хор: Пресвятáя Богорóдице, спасù нас.
Богорóдичен: Сни́де в преиспóдняя земли́,/ в ложеснá Твоя́, Чи́стая, сшéдый,/ и всели́выйся и воплоти́выйся пáче умá,/ и воздви́же с Собóю Адáма,// воскрéс от грóба.
Глас 3
Хор: Слáва Тебé, Бóже наш, слáва Тебé.
Чтец: Вознесы́йся вóлею на Дрéво,/ положи́лся еси́ я́ко мертв во грóбе,/ и сýщiя во áде мéртвыя вся вкýпе оживи́в, Хрiстé,// воскреси́л еси́ Божéственною си́лою.
Хор: Слáва Тебé, Бóже наш, слáва Тебé.
Чтец: Ад срет Тя Щéдре дóле, огорчи́ся,/ свя́занныя отдавáя со тщáнiем,/ Твоé стрáшное пою́щiя, Спáсе, Воскресéнiе,// во глáсех немóлчных.
Хор: Слáва Тебé, Бóже наш, слáва Тебé.
Чтец: Божéственнiи ученицы́,/ ви́девше Жизнь всех из грóба востáвша, Хрiстá,/ любо́вiю мнóгою, и нрáвом прáвым,// и весéлiем душéвным покланя́хуся.
Хор: Слáва Тебé, Бóже наш, слáва Тебé.
Чтец: Дрéвле на одрé болéзненном, в лéтех мнóзех слежáй,/ Твои́м, Хрiстé, повелéнiем исцелéв, слáвит,// воспевáя благоутрóбiе Твоé, Жизнодáтелю.
Слáва Отцý и Сы́ну и Святóму Дýху.
Трóичен: Трóицу Ли́цы Тя чту,/ Еди́ницу же Существóм проповéдаю,/ безначáльне Ѻ́тче, Сы́не, Дýше Прáвый: Бóже всех,// с вы́шними стрáшными вóинствы.
И ны́не и прúсно и во вéки векóв, амúнь.
Богорóдичен: Вся Божéственным мановéнiем нося́й,/ держи́мь есть, Богорóдице Дéво, во объя́тiях Твои́х,// всех нас восхищáя, от руки́ рабóты лукáваго, я́ко Щедр.
Катавáсiя: Снизшéл есѝ в преиспóдняя землѝ,/ и сокрушил еси вереѝ вéчныя,/ содержáщiя свя́занныя, Хрiстé,/ и триднéвен, яко от ки́та Ióна,// воскрéсл есѝ от грóба.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Кондáк прáздника Тріóди (о расслáбленном) глас 3: Дýшу мою́, Гóсподи, во гресéх вся́ческих,/ и безмéстными дея́ньми лю́те разслáблену,/ воздви́гни Божéственным Твои́м предстáтельством,/ я́коже и разслáбленнаго воздви́гл еси́ дрéвле,/ да зову́ Ти, спасáемь:// Щéдрый, слáва Хрiстé, держáве Твоéй.
Íкос: Руки́ Твоея́ гóрстiю содержáй концы́, Iисýсе Бóже, Отцý собезначáльный, и Дýху Святóму совлады́чествуяй всéми, плóтiю яви́лся еси́, недýги исцеля́я, и стрáсти отгнáл еси́: слепцы́ просвети́л еси́, и разслáбленнаго слóвом Божéственным Ты возстáвил еси́, семý напрáсно ходи́ти повелéв, и сегó носи́вшiй одр на рáму взя́ти. Тéмже вси с ним воспевáем, и возопiи́м: Щéдрый, слáва Хрiстé, держáве Твоéй.
ПЕСНЬ 7
Iрмóс: Ѻ́троки от пéщи избáвивый,/ быв Человéк,/ стрáждет яко смéртен,/ и стрáстiю смéртное,/ в нетлéнiя облачи́т благолéпiе,/ Еди́н благословéн// отцéв Бог, и препрослáвлен. (Двáжды)
Хор: Хрїстóс воскрéсе из мéртвых.
Чтец: Жены́ с ми́ры богомýдрыя в след Тебé течáху:/ Егóже, я́ко мéртва, со слезáми искáху,/ поклони́шася рáдующiяся Живóму Бóгу,/ и Пáсху тáйную// Твои́м, Хрiстé, ученикóм благовести́ша. (Двáжды)
Хор: Хрїстóс воскрéсе из мéртвых.
Чтец: Смéрти прáзднуем умерщвлéнiе,/ áдово разрушéнiе,/ инóго житiя́ вéчнаго начáло,/ и игрáюще поéм Винóвнаго,/ Еди́наго благословéннаго// отцéв Бóга, и препрослáвленнаго.
Хор: Хрїстóс воскрéсе из мéртвых.
Чтец: Яко вои́стинну свящéнная,/ и всепрáзднственная сiя́ спаси́тельная нощь,/ и светозáрная,/ светонóснаго дне,/ востáнiя сýщи провозвéстница:// в нéйже безлéтный Свет из грóба плóтски всем возсiя́.
Хор: Пресвятáя Богорóдице, спасù нас.
Богорóдичен: Умертви́в Сын Твой смерть, Всенепорóчная, днесь,/ всем смéртным пребывáющiй живóт/ во вéки векóв даровá,/ еди́н благословéнный// отцéв Бог и препрослáвленный.
Хор: Пресвятáя Богорóдице, спасù нас.
Богорóдичен: Всем цáрствуяй создáнiем, быв человéк,/ всели́ся в Твою́, Богоблагодáтная, утрóбу,/ и распя́тiе претерпéв и смерть,/ воскрéсе боголéпно,// совозстáвив нас я́ко всеси́лен.
Глас 3
Хор: Слáва Тебé, Бóже наш, слáва Тебé.
Чтец: Простéрта Тя на Дрéве я́ко зря́ше,/ свет скры сóлнце, не могýщее мíрови свети́ти,// Тебé вóлею зашéдшу Всецарю́, на просвещéнiе всех язы́ков.
Хор: Слáва Тебé, Бóже наш, слáва Тебé.
Чтец: Воскрéсл еси́ истощи́вый грóбы,/ и плени́вый ад си́лою всеси́льною:// тéмже поéм честнóе Твоé, Хрiстé, и Божéственное востáнiе.
Хор: Слáва Тебé, Бóже наш, слáва Тебé.
Чтец: Я́ко мéртва что Живáго и́щете?/ Востá, несть во грóбе, миронóсицам вопiя́ше дрéвле,// блистáяйся зрáком божéственный Áнгел.
Хор: Слáва Тебé, Бóже наш, слáва Тебé.
Чтец: Слежáща в лéтех мнóзех разслáбленнаго слóвом исцели́вый, вопiя́л еси́:// возми́ одр твой и ходи́, поя́ вели́чiя Бóжiя.
Слáва Отцý и Сы́ну и Святóму Дýху.
Трóичен: О Трóице, вéрою пою́щiя Тя,/ я́ко Бóга всех и Влады́ку,/ от вся́ких бед спасáй,// и Твои́х благ причáстники сотвори́.
И ны́не и прúсно и во вéки векóв, амúнь.
Богорóдичен: Дéвствуеши, рóждши пáче слóва,/ прéжде всех век роди́вшагося от безначáльна Отцá нетлéнно:// сегó рáди, Чи́стая, Тебé ублажáем.
Катавáсія: Ѻ́троки от пéщи избáвивый,/ быв Человéк,/ стрáждет яко смéртен,/ и стрáстiю смéртное,/ в нетлéнiя облачи́т благолéпiе,/ Еди́н благословéн// отцéв Бог, и препрослáвлен.
ПЕСНЬ 8
Iрмóс: Сей наречéнный и святы́й день,/ Еди́н суббóт Царь и Госпóдь,/ прáздников прáздник/ и торжествó есть торжéств,// вóньже благослови́м Хрiстá во вéки. (Двáжды)
Хор: Хрїстóс воскрéсе из мéртвых.
Чтец: Прiиди́те, нóваго виногрáда рождéнiя,/ Божéственнаго весéлiя,/ в нарóчитом дни Воскресéнiя,/ Цáрствiя Хрiстóва приобщи́мся,/ пою́ще Егó// яко Бóга во вéки. (Двáжды)
Хор: Хрїстóс воскрéсе из мéртвых.
Чтец: Возведи óкрест óчи твои, Сióне, и виждь:/ се бо прiидóша к тебé,/ яко богосвéтлая свети́ла,/ от зáпада, и сéвера, и мóря,/ и востóка чáда твоя́,// в тебé благословя́щая Хрiстá во вéки.
Хор: Пресвятáя Трóице, Бóже наш, слáва Тебé.
Трóичен: Ѻ́тче Вседержи́телю, и Слóве, и Дýше,/ тремѝ соединя́емое во Ипостáсех Естествó,/ Пресýщественне и Пребожéственне,/ в Тя крести́хомся,// и Тя благослови́м во вся вéки.
Хор: Пресвятáя Богорóдице, спасù нас.
Богорóдичен: Прiи́де Тобóю в мiр Госпóдь, Дéво Богорóдице,/ и чрéво áдово растóрг,/ смéртным нам воскресéнiе даровá:// Тéмже благослови́м Егó во вéки.
Хор: Пресвятáя Богорóдице, спасù нас.
Богорóдичен: Всю низложи́в смéрти держáву Сын Твой, Дéво,/ Свои́м воскресéнiем,/ я́ко Бог крéпкiй совознесé нас и обожи́:// тéмже воспевáем Егó во вéки.
Глас 3
Хор: Слáва Тебé, Бóже наш, слáва Тебé.
Чтец: Завéса раздрáся, распéншуся Тебé, Спáсе наш,/ и отдавáше мéртвыя, я́же пожрé, смерть:// и ад обнажи́ся, Тебé зря в преиспóдних земли́ бы́вша.
Хор: Слáва Тебé, Бóже наш, слáва Тебé.
Чтец: Где твоé жáло есть, смéрте;/ где твоя́, áде, ны́не побéда?/ Воскрéсшу Царю́, умертви́лся еси́ и поги́бл, не ктомý цáрствуеши:// Крéпкiй бо взят, я́же имéл еси́ свя́занныя.
Хор: Слáва Тебé, Бóже наш, слáва Тебé.
Чтец: Тецы́те скóро, возвести́те апóстолом Воскресéнiе,/ мvронóсицам явлéйся ю́ноша вещáше:/ воскрéсе Влады́ка,// и с Ним и́же от вéка мéртвiи преслáвно.
Хор: Слáва Тебé, Бóже наш, слáва Тебé.
Чтец: Лéты мнóгими слежáй разслáбленный, взывáше:/ поми́луй мя, Избáвителю, недоумéнiем содержи́ма.// Сей же повелевáет емý взя́ти тщáтельно одр, и прáво ступáти.
Благословúм Отцá, и Сы́на, и Святáго Дýха, Гóспода.
Трóичен: Несоздáнное, непресекóмое Существó, Трiипостáсное Божествó,/ Отцá безначáльна Бóга, и Сы́на, и Дýха Святáго// воспои́м соглáсно, серафíмскую зовýще стрáшную песнь.
И ны́не и прúсно и во вéки векóв. Амúнь.
Богорóдичен: Сви́ток Тя дрéвле зря́ше Исáiа, Приснодéво,/ в нéмже пéрстом Ѻ́тчим Слóво безлéтное написáся,/ от вся́каго безсловéсiя спасáющее нас,// словесы́ Тя свящéнными воспевáющих.
Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя: Сей наречéнный и святы́й день,/ Еди́н суббóт Царь и Госпóдь,/ прáздников прáздник/ и торжествó есть торжéств,// вóньже благослови́м Хрiстá во вéки.