БЛАГОВЕЩЕНИЕ ПРЕСВЯТОЙ БОГОРОДИЦЫ. Великопостные часы Час шестый. Служба мирским чином
7 апрéля 2023 гóда. Пя́тница 6-й седмúцы, вáiй. Благовéщенiе Пресвятóй Богорóдицы. Воскрéсная прáздничная слýжба для домáшнего (келéйнаго) совершéнiя. Послéдованiе великопóстных часóв (шестый)
Прежде глаголи третiй час
ЧАС ШЕСТЫЙ
Пріиди́те, поклони́мся Царéви нáшему Бóгу.
Пріиди́те, поклони́мся и припадéм Хрїстý, Царéви нáшему Бóгу.
Пріиди́те, поклони́мся и припадéм Самомý Хрїстý, Царéви и Бóгу нáшему.
Псалом 53
Бóже, во и҆́мя Твоé спасѝ мя, и в силе Твоéй судѝ ми. Бóже, услы́ши молитву мою, внушѝ глагóлы уст моих. Яко чýждiи востáша на мя и крéпцыи взыскáша дýшу мою, и не предложи́ша Бóга пред собóю. Се бо Бог помогáет ми, и Госпóдь застýпник душѝ моéй. Отврати́т злáя врагóм мои́м, и҆́стиною Твоéю потребѝ их. Вóлею пожрý Тебé, исповéмся и҆́мени Твоемý, Гóсподи, яко блáго; Яко от вся́кiя печáли избáвил мя есѝ, и на врагѝ моя воззрé óко моé.
Псалом 54
Внушѝ, Бóже, молитву мою и не прéзри молéнiя моегó. Вонмѝ ми и услыши мя: возскорбéх печáлiю моéю и смятóхся. От глáса врáжiя и от стужéнiя грéшнича, яко уклони́ша на мя беззакóнiе и во гнéве враждовáху ми. Сéрдце мое смятéся во мне и боя́знь смéрти нападé на мя. Страх и трéпет прiиде на мя и покры́ мя тьма. И рех: кто даст ми крилé, яко голуби́не, и полещý, и почíю; Се удалихся бéгая и водворихся в пустыни. Чáях Бóга спасáющаго мя от малодýшiя и от бýри. Потопи Гóсподи, и разделѝ языки и҆́х: я́ко видех беззакóнiе и пререкáнiе во грáде. Днем и нóщiю обыдет и по стенáм егó: беззакóнiе и труд посредé егó и непрáвда. И не оскудé от стогн его лихва и лесть. Яко áще бы враг поносил ми, претерпéл бых ýбо, и áще бы ненавидяй мя на мя велерéчевал, укрыл бых ся от негó. Ты же человéче равнодýшне, владыко мой и знáемый мой; И҆́же кýпно наслаждáлся еси со мнóю брáшен, в дoмý Бóжiи ходихом единомышлéнiем. Да прiидет же смерть на ня, и да снидут во ад живи, яко лукáвство в жилищах и҆́х, посредé и҆́х. Аз к Бóгу воззвáх, и Госпóдь услыша мя. Вéчер и заýтра, и полýдне повéм, и возвещý, и услышит глас мой. Избáвит миром дýшу мою от приближáющихся мне, яко во мнóзе бяху со мнóю. Услышит Бог и смири́т я, Сый прéжде век. Несть бо им изменéнiя, яко не убояшася Бóга. Прострé рýку свою на воздаянiе, оскверниша завéт Егó. Разделишася от гнéва лицá Егó, и прибли́жишася сердцá их, умякнуша словесá их пáче елéа, и та суть стрéлы. Возвéрзи на Гóспода печáль твою, и Той тя препитáет, не даст в век молвы прáведнику. Ты же, Бóже, низведéши их во студенéц истлéнiя, мýжiе кровéй и льсти не преполовя́т дней свои́х. Аз же, Гóсподи, уповáю на Тя.
Псалом 90
Живы́й в пóмощи Вы́шняго, в крóве Бóга Небéснаго водвори́тся. Речéт Гóсподеви: застýпник мой есѝ и прибéжище моé, Бог мой, и уповáю на Негó. Яко Той избáвит тя от сéти лóвчи, и от словесé мятéжна; Плещмá Свои́ма осени́т тя, и под крилé Егó надéешися: орýжiем обыдет тя и҆́стина Егó. Не убои́шися от стрáха нощнáго, от стрелы летя́щiя во дни; От вéщи во тме преходя́щiя, от сря́ща и бéса полýденнаго. Падéт от страны́ твоея́ ты́сяща, и тма одеснýю тебé, к тебé же не прибли́жится; Обáче очи́ма твои́ма смóтриши, и воздаянiе грéшников ýзриши. Яко Ты, Гóсподи, уповáнiе моé, Вы́шняго положи́л есѝ прибéжище твоé. Не прiи́дет к тебé зло, и рáна не прибли́жится телесѝ твоемý; Яко Áнгелом Свои́м заповéсть о тебé, сохрани́ти тя во всех путéх твои́х. На рукáх вóзмут тя, да не когдá преткнéши о кáмень нóгу твою́; На áспiда и васiлíска настýпиши, и поперéши льва и змíя. Яко на Мя уповá, и избáвлю и҆̀: покры́ю и҆̀, я́ко познá и҆́мя Моé. Воззовéт ко Мне, и услышу егó: с ним есмь в скóрби, измý егó, и прослáвлю егó; Долготóю дней испóлню егó, и явлю́ емý спасéнiе Моé.
Чтец: Слáва Ѻтцý и Сы́ну и Святóму Дýху, и ны́не и при́сно и во вéки векóв, ами́нь.
Аллилýїа, аллилýїа, аллилýїа, слáва Тебé Бóже. (3 раза)
Гóсподи, поми́луй. (3 раза)
Слáва Отцý и Сы́ну и Святóму Дýху.
Ин чтец: И ны́не и при́сно и во вéки векóв. Ами́нь.
Кафизма двадцатая
И чтем кафíсму 20-ю ( или одúн псалóм, или до 1-й Слáвы)
[Псалом 143]Благословéн Госпóдь Бог мой, научáяй рýце мои́ на ополчéнiе, пéрсты моя́ на брань. Ми́лость моя́ и прибéжище моé, Застýпник мой и Избáвитель мой, Защи́титель мой, и на Негó уповáх: повинýяй лю́ди моя́ под мя. Гóсподи, что есть человéк, я́ко познáлся еси́ eмý? Или́ сын человéчь, я́ко вменя́еши eгó? Человéк суетé уподóбися: днíе eгó я́ко сень прехóдят. Гóсподи, приклони́ небесá, и сни́ди, косни́ся горáм, и воздымя́тся. Блесни́ мóлнiю, и разженéши я́, посли́ стрéлы Твоя́, и смятéши я́. Посли́ рýку Твою́ с высоты́, изми́ мя и избáви мя от вод мнóгих, из руки́ сынóв чужди́х, и҆́хже устá глагóлаша суетý, и десни́ца их - десни́ца непрáвды. Бóже, песнь нóву воспою́ Тебé, во псалти́ри десятострýннем пою́ Тебé, даю́щему спасéнiе царéм, избавля́юшему Давíда, рабá Своегó, от мечá лю́та. Избáви мя, и изми́ мя из рýки сынóв чужди́х, и҆́хже устá глагóлаша суетý, и десни́ца их - десни́ца непрáвды. И҆́хже сы́нове их я́ко новосаждéнiя водружéнная в ю́ности своéй. Дщéри их удóбрены, преукрáшены, я́ко подóбiе хрáма. Храни́лища их испóлнена, отрыгáющая от сегó в сié, óвцы их многоплóдны, мнóжащыяся во исхóдищах свои́х, волóве их тóлсти. Несть падéнiя оплóту, нижé прохóда, нижé вóпля в стóгнах их. Ублажи́ша лю́ди, и҆́мже сiя́ суть. Блажéни лю́дiе, и҆́мже Госпóдь Бог их.
[Псалом 144]Вознесý Тя, Бóже мой, Царю́ мой, и благословлю́ и҆́мя Твоé в век и в век вéка. На всяк день благословлю́ Тя и восхвалю́ и҆́мя Твоé в век и в век вéка. Вéлiй Госпóдь и хвáлен зелó, и вели́чiю Егó несть концá. Род и род восхвáлят делá Твоя́ и си́лу Твою́ возвестя́т. Великолéпiе слáвы святы́ни Твоея́ возглагóлют и чудесá Твоя́ повéдят. И си́лу стрáшных Твои́х рекýт и вели́чiе Твоé повéдят. Пáмять мнóжества блáгости Твоея́ отры́гнут и прáвдою Твоéю возрáдуются. Щедр и Ми́лостив Госпóдь, Долготерпели́в и Многоми́лостив. Благ Госпóдь вся́ческим, и щедрóты Егó на всех дéлех Егó. Да исповéдятся Тебé, Гóсподи, вся делá Твоя́, и преподóбнiи Твои́ да благословя́т Тя. Слáву Цáрствiя Твоегó рекýт, и силу Твою́ возглагóлют, сказáти сыновóм человéческим си́лу Твою́, и слáву великолéпiя Цáрствiя Твоегó. Цáрство Твоé, Цáрство всех векóв, и влады́чество Твоé во вся́ком рóде и рóде. Вéрен Госпóдь во всех словесéх Свои́х и Преподóбен во всех дéлех Свои́х. Утверждáет Госпóдь вся низпáдающыя и возставля́ет вся низвéрженныя. Óчи всех на Тя уповáют, и Ты даéши им пи́щу во благоврéменiи. Отверзáеши Ты рýку Твою́ и исполня́еши вся́кое живóтно благоволéнiя. Прáведен Госпóдь во всех путéх Свои́х и Преподóбен во всех дéлех Свои́х. Близ Госпóдь всем призывáющым Егó, всем призывáющым Егó во и҆́стине. Вóлю боя́щихся Егó сотвори́т и моли́тву их услы́шит и спасéт я́. Храни́т Госпóдь вся лю́бящыя Егó и вся грéшники потреби́т. Хвалý Госпóдню возглагóлют устá моя́, и да благослови́т вся́ка плоть и҆́мя святóе Егó в век и в век вéка.
Чтец: Слáва Ѻтцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýiа, аллилýiа, аллилýiа, слáва Тебé Бóже. (3 рáза)
Гóсподи, помúлуй. (3 рáза)
Слáва Ѻтцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
[Псалом 145]Хвали́, душé моя́, Гóспода. Восхвалю́ Гóспода в животé моéм, пою́ Бóгу моемý, дóндеже есмь. Не надéйтеся на кня́зи, на сы́ны человéческiя, в ни́хже несть спасéнiя. Изы́дет дух eгó и возврати́тся в зéмлю свою́. В той день поги́бнут вся помышлéния eгó. Блажéн, eмýже Бог Iáковль Помóщник егó, уповáнiе eгó на Гóспода Бóга своегó, сотвóршаго нéбо и зéмлю, мóре и вся, я́же в них, храня́щаго и҆́стину в век, творя́щаго суд оби́димым, даю́щаго пи́щу áлчушым. Госпóдь реши́т оковáнныя. Госпóдь умудря́ет слепцы́. Госпóдь возвóдит низвéрженныя. Госпóдь лю́бит прáведники. Госпóдь храни́т пришéльцы, си́ра и вдовý прiи́мет и путь грéшных погуби́т. Воцари́тся Госпóдь во век, Бог твой, Сióне, в род и род.
[Псалом 146]Хвали́те Гóспода, я́ко благ псалóм. Бóгови нáшему да услади́тся хвалéнiе. Зи́ждай Iерусали́ма Госпóдь, разсéянiя Iзрáилева соберéт. Исцеля́яй сокрушéнныя сéрдцем и обязýяй сокрушéнiя их. Исчитáяй мнóжество звезд и всем им именá нарицáяй. Вéлiй Госпóдь наш, и вéлiя крéпость Егó, и рáзума Егó несть числá, Прiéмляй крóткiя Госпóдь, смиря́яй же грéшники до земли́. Начни́те Гóсподеви во исповéданiи, пóйте Бóгови нáшему в гýслех. Одевáющему нéбо óблаки, уготовля́ющему земли́ дождь, прозябáющему на горáх травý и злак на слýжбу человéком, даю́щему скотóм пи́щу их, и птенцéм врáновым призывáющым Егó. Не в си́ле кóнстей восхóщет, нижé в лы́стех мýжеских благоволи́т. Благоволи́т Госпóдь в боя́щихся Егó и во уповáющих на ми́лость Егó.
[Псалом 147]Похвали́, Iерусали́ме, Гóспода, хвали́ Бóга Твоегó, Сióне, я́ко укрепи́ вереи́ врат Твои́х, благослови́ сы́ны твоя́ в тебé. Полагáяй предéлы Твоя́ мир, и тýка пшени́чна насыщáяй тя. Посылáяй слóво Своé земли́, до скóрости течéт слóво Егó, даю́щаго снег Свой, я́ко вóлну, мглу, я́ко пéпел, посыпáющаго, метáющаго гóлоть Свой, я́ко хлéбы. Проти́ву лицá мрáза Егó кто постои́т? Пóслет слóво Своé, и истáет я́, дхнет дух Егó, и потекýт вóды. Возвещáяй слóво Своé Iáкову, оправдáнiя и судьбы́ Своя́ Iзрáилеви. Не сотвори́ тáко вся́кому язы́ку, и судьбы́ Своя́ не яви́ им.
Чтец: Слáва Ѻтцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýiа, аллилýiа, аллилýiа, слáва Тебé Бóже. (3 рáза)
Гóсподи, помúлуй. (3 рáза)
Слáва Ѻтцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
[Псалом 148]Хвали́те Гóспода с небéс, хвали́те Егó в вы́шних. Хвали́те Егó, вси Áнгели Егó, хвали́те Егó, вся си́лы Егó. Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речé, и бы́ша, Той повелé, и создáшася. Постáви я́ в век и в век вéка, повелéнiе положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
[Псалом 149]Воспóйте Гóсподеви песнь нóву, хвалéнiе Егó в цéркви преподóбных. Да возвесели́тся Iзрáиль о Сотвóршем eгó, и сы́нове Сióни возрáдуются о Царé своéм. Да восхвáлят и҆́мя Егó в ли́це, в тимпáне и псалти́ри да пою́т Емý. Я́ко благоволи́т Госпóдь в лю́дех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остры́ в рукáх их: сотвори́ти отмщéнiе во язы́цех, обличéнiя в лю́дех, связáти цари́ их пýты, и слáвныя их ручны́ми окóвы желéзными, сотвори́ти в них суд напи́сан. Слáва сiя́ бýдет всем преподóбным Егó.
[Псалом 150]Хвали́те Бóга во святы́х Егó, хвали́те Егó во утвержéнiи си́лы Егó. Хвали́те Егó на си́лах Егó, хвали́те Егó по мнóжеству вели́чествiя Егó. Хвали́те Егó во глáсе трýбнем, хвали́те Егó во псалти́ри и гýслех. Хвали́те Егó в тимпáне и ли́це, хвали́те Егó во стрýнах и оргáне. Хвали́те Егó в кимвáлех доброглáсных, хвали́те Егó в кимвáлех восклицáнiя. Вся́кое дыхáнiе да хвáлит Гóспода.
Чтец: Слáва Отцý и Сыну и Святóму Дýху, и ныне и присно и во вéки векóв, аминь.
Аллилýїа, аллилýїа, аллилýїа, слáва Тебé Бóже. (3 рáза)
Гóсподи, поми́луй. (3 рáза)
Слáва Отцý и Сы́ну и Святóму Дýху.
Тропáрь Благовéщенiя, глас 4: Днесь спасéнiя нáшего глави́зна и éже от вéка тáинства явлéнiе: Сын Бóжiй Сын Дéвы бывáет, и Гаврiи́л благодáть благовествýет. Тéмже и мы с ним Богорóдице возопiи́м: рáдуйся, Благодáтная, Госпóдь с Тобóю.
И ны́не и прúсно и во вéки векóв. Амúнь.
Богорóдичен: Яко не и҆́мамы дерзновéнiя за премнóгiя грехи́ нáша, Ты И҆́же от Тебé Рóждшагося молѝ, Богорóдице Дéво: мнóго бо мóжет молéнiе Мáтернее ко благосéрдiю Владыки: не прéзри грéшных мольбы, Всечи́стая, яко ми́лостив есть и спастѝ могíй, И҆́же и страдáти о нас извóливый.
Тропарь пророчества
Тропáрь прорóчества, глас трéтiй: Нестерпи́мый есть Гóсподи, гнев на грéшники прещéнiя Твоегó, и нéсмы достóйни воззрéти, и проси́ти от Тебé ми́лости: да не я́ростiю Твоéю, ни гнéвом Твои́м погуби́ши нас, и́хже от земли́ рукóю Твоéю создáл еси́.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Нестерпи́мый есть Гóсподи, гнев на грéшники прещéнiя Твоегó, и нéсмы достóйни воззрéти, и проси́ти от Тебé ми́лости: да не я́ростiю Твоéю, ни гнéвом Твои́м погуби́ши нас, и́хже от земли́ рукóю Твоéю создáл еси́.
Прокимен триоди
Чтец: Прокíмен, глас четвéртый: Дóму рáди Гóспода Бóга нáшего взыскáх благáя Тебé. (Пс.121:9)
Хор: Дóму рáди Гóспода Бóга нáшего взыскáх благáя Тебé.
Чтец: Возвесели́хся о рéкших мне: в дом Госпо́день по́йдем. (Пс.121:1)
Хор: Дóму рáди Гóспода Бóга нáшего взыскáх благáя Тебé.
Чтец: Дóму рáди Гóспода Бóга нáшего.
Хор: Взыскáх благáя Тебé.
Чтец: Прорóчества Исáiина чтéнiе.
(Из главы 66) Весели́ся Иерусали́ме, и торжеству́йте в не́м вси́ лю́бящии его́, и живу́щии в не́м ра́дуйтеся вку́пе с ни́м ра́достию, вси́ ели́цы пла́касте о не́м, Да ссе́те и насы́титеся от сосца́ утеше́ния его́, да сса́вше насладите́ся от вхо́да сла́вы его́. Я́ко сия́ глаго́лет Госпо́дь: се́ А́з уклоня́ю на Ня́, а́ки реку́ ми́ра, и а́ки пото́к наводня́емый, сла́ву язы́ков: де́ти и́х на ра́мена взя́ты бу́дут, и на коле́ну уте́шатся. Я́коже а́ще кого́ ма́ти утеша́ет, та́ко и А́з уте́шу вы́, и во Иерусали́ме уте́шитеся. И у́зрите, и возра́дуется се́рдце ва́ше, и ко́сти ва́ша я́ко трава́ прозя́бнут: и позна́ется рука́ Госпо́дня боя́щимся его́, и запрети́т непокаря́ющимся. Се́ бо Госпо́дь, я́ко о́гнь прии́дет, и я́ко бу́ря колесни́цы Его́, возда́ти я́ростию отмще́ние Свое́, и преще́ние во пла́мени о́гненне. Огне́м бо Госпо́дним суди́тися бу́дет вся́ земля́, и мече́м Его́ вся́ка пло́ть: мно́зи я́звени бу́дут от Го́спода. Очища́ющиися и освяща́ющиися в вертогра́дех, и в преддве́риих яду́щии мя́со свино́е, и ме́рзости, и мы́ши, вку́пе поги́бнут, рече́ Госпо́дь. И А́з дела́ и́х и помышле́ния и́х ве́м и гряду́ собра́ти вся́ наро́ды и язы́ки, и прии́дут, и у́зрят сла́ву Мою́: И оста́влю на ни́х зна́мение, и послю́ от ни́х спасе́ных во язы́ки, в Фарси́с, и в Фу́д, и в Лу́д, и в Мосо́х, и в Фове́ль, и во Елла́ду, и во о́стровы да́льныя, и́же не слы́шаша и́мене Моего́, ниже́ ви́деша сла́ву Мою́: и возвестя́т сла́ву Мою́ во язы́цех. И приведу́т бра́тию ва́шу от все́х язы́к да́р Го́сподеви, с ко́ньми и колесни́цами и с носи́лами мско́в, под се́ньми во святы́й гра́д Иерусали́м, рече́ Госпо́дь: а́ки бы принесли́ сы́нове Изра́илевы же́ртвы своя́ Мне́ со псалмы́ в до́м Госпо́день. И от те́х пойму́ Себе́ жерцы́ и леви́ты, рече́ Госпо́дь. Я́коже бо не́бо но́во, и земля́ нова́, я́же А́з творю́, пребыва́ют предо мно́ю, глаго́лет Госпо́дь: та́ко ста́нет се́мя ва́ше, и и́мя ва́ше. И бу́дет ме́сяц от ме́сяца, и суббо́та от суббо́ты, прии́дет вся́ка пло́ть поклони́тися предо Мно́ю во Иерусали́м, рече́ Госпо́дь. И изы́дут: и у́зрят тру́пы челове́ков преступи́вших Мне́, че́рвь бо и́х не сконча́ется, и о́гнь и́х не уга́снет, и бу́дут в позо́р вся́кой пло́ти.
[Русский синодальный перевод]Возвеселитесь с Иерусалимом и радуйтесь о нём, все любящие его! возрадуйтесь с ним радостью, все сетовавшие о нём, чтобы вам питаться и насыщаться от сосцов утешений его, упиваться и наслаждаться преизбытком славы его. Ибо так говорит Господь: вот, Я направляю к нему мир как реку, и богатство народов - как разливающийся поток для наслаждения вашего; на руках будут носить вас и на коленях ласкать. Как утешает кого-либо мать его, так утешу Я вас, и вы будете утешены в Иерусалиме. И увидите это, и возрадуется сердце ваше, и кости ваши расцветут, как молодая зелень, и откроется рука Господа рабам Его, а на врагов Своих Он разгневается. Ибо вот, придет Господь в огне, и колесницы Его - как вихрь, чтобы излить гнев Свой с яростью и прещение Своё с пылающим огнем. Ибо Господь с огнем и мечом Своим произведет суд над всякою плотью, и много будет пораженных Господом. Те, которые освящают и очищают себя в рощах, один за другим, едят свиное мясо и мерзость и мышей, - все погибнут, говорит Господь. Ибо Я знаю деяния их и мысли их; и вот, приду собрать все народы и языки, и они придут и увидят славу Мою. И положу на них знамение, и пошлю из спасенных от них к народам: в Фарсис, к Пулу и Луду, к натягивающим лук, к Тубалу и Явану, на дальние острова, которые не слышали обо Мне и не видели славы Моей: и они возвестят народам славу Мою и представят всех братьев ваших от всех народов в дар Господу на конях и колесницах, и на носилках, и на мулах, и на быстрых верблюдах, на святую гору Мою, в Иерусалим, говорит Господь, - подобно тому, как сыны Израилевы приносят дар в дом Господа в чистом сосуде. Из них буду брать также в священники и левиты, говорит Господь. Ибо, как новое небо и новая земля, которые Я сотворю, всегда будут пред лицом Моим, говорит Господь, так будет и семя ваше и имя ваше. Тогда из месяца в месяц и из субботы в субботу будет приходить всякая плоть пред лицо Моё на поклонение, говорит Господь. И будут выходить и увидят трупы людей, отступивших от Меня: ибо червь их не умрет, и огонь их не угаснет; и будут они мерзостью для всякой плоти. (Ис.66:10-24)
Прокимен триоди
Чтец: Прокíмен, глас шесты́й: Поми́луй нас Гóсподи, поми́луй нас.
Хор: Помúлуй нас Гóсподи, помúлуй нас.(Пс.122:3А)
Чтец: К Тебé возведóх óчи мои́ живýщему на Небеси́. (Пс.122:1)
Хор: Помúлуй нас Гóсподи, помúлуй нас.
Чтец: Поми́луй нас Гóсподи.
Хор: Помúлуй нас.
Стiх: Скóро да предварят ны щедрóты Твоя, Гóсподи, яко обнищáхом зелó: помозѝ нам, Бóже Спáсе наш, слáвы рáди и҆́мене Твоегó; Гóсподи, избáви нас, и очи́сти грехѝ нáша, и҆́мене рáди Твоегó.
Посем Трисвятое по Отче наш
Свѧты́й Бóже, Свѧтый Крéпкїй, Свѧтый Безсмéртный, поми́луй нас. (3 раза)
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Пресвѧтáѧ Трóице, помилуй нас, Гóсподи, очисти грехѝ нáшѧ, Владыко, простѝ беззакóнiя нáшѧ, Святы́й, посетѝ и исцелѝ нéмощи нáшѧ и҆́мене Твоегó рáди.
Гóсподи, поми́луй. (трúжды)
Слáва Ѻтцý и Сыну и Святóму Дýху, и ныне и при́сно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоé, да прїи́дет Цáрствїе Твоé, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáшѧ, я́коже и мы оставля́ем должникóм нáшим. И не введѝ нас во искушéнїе, но избáви нас от лукáваго.
Гóсподи, Iисýсе Хрїстé, Сыне Бóжїй, поми́луй нас. Ами́нь.
КОНДAК
Кондáк Благовéщенiя, глас 8: Взбрáнной Воевóде победи́тельная, я́ко избáвльшеся от злы́х, благодáрственная восписýем Ти́ раби́ Твои́, Богорóдице; но я́ко имýщая держáву непобеди́мую, от вся́ких нас бед свободи́, да зовéм Ти́: рáдуйся, Невéсто Неневéстная.
Гóсподи, помúлуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрїстé Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесá очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн еси́ во вéки векóв, ами́нь.
Гóсподи, поми́луй. (3 раза)
Слáва Ѻтцý и Сыну и Святóму Дýху, и ныне и прúсно и во вéки векóв. Амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Моли́твами святы́х отéц нáших, Гóсподи Iисýсе Хрїстé, Бóже наш, поми́луй нас, ами́нь.
Молитва святаго Ефрема Сирина
Гóсподи и Влады́ко животá моегó, дух прáздности, уны́нiя, любоначáлiя, и празднослóвiя не даждь ми. (Земнóй поклóн.)
Дух же целомýдрiя, смиренномýдрiя, терпéнiя, и любвé, дáруй ми рабý Твоемý. (Земнóй поклóн.)
Ей, Гóсподи Царю́, дáруй ми зрéти моя прегрешéнiя, и не осуждáти брáта моегó, яко благословéн еси во вéки векóв, аминь. (Земнóй поклóн.)
Таже молитва святаго Великаго Василия
Бóже и Гóсподи сил и всея́ твáри Содéтелю, И҆́же за милосéрдiе безприклáдныя ми́лости Твоея́ Единорóднаго Сы́на Твоегó, Гóспода нáшего Iисýса Хрїстá, низпослáвый на спасéнiе рóда нáшего, и честны́м Егó Крестóм рукописáнiе грех нáших растерзáвый, и победи́вый тем начáла и влáсти тьмы. Сам, Влады́ко Человеколю́бче, прiимѝ и нас, грéшных, благодáрственныя сiя и молéбныя моли́твы и избáви нас от вся́каго всегуби́тельнаго и мрáчнаго прегрешéнiя и всех озлóбити нас и҆́щущих ви́димых и неви́димых враг. Пригвозди́ стрáху Твоемý плóти нáша и не уклонѝ сердéц нáших в словесá или помышлéнiя лукáвствiя, но любóвiю Твоéю уязвѝ дýши нáша, да, к Тебé всегдá взирáюще и éже от Тебé свéтом наставля́еми, Тебé, непристýпнаго и присносýщнаго зря́ще Свéта, непрестáнное Тебé исповéданiе и благодарéнiе возсылáем, Безначáльному Отцý со Единорóдным Твоим Сы́ном и Всесвяты́м, и Благи́м, и Животворя́щим Твои́м Дýхом ны́не, и при́сно, и во вéки векóв, ами́нь.
И глагóлем зде и девятый час