ТОРЖЕСТВО ПРАВОСЛАВИЯ. Неделя первая Великого поста. ВСЕНОЩНОЕ БДЕНИЕ. Глас 5. УТРЕНЯ КАНОН
5 мáрта 2023 гóда. Недéля пéрвая Велúкaго постá. Торжествó Правослáвiя. Глас 5. Воскрéсная прáздничная слýжба для домáшнего (келéйнаго) совершéнiя. Послéдованiе ýтрени (канóн)
Начало зри здесь ( великая вечéрня) и здесь ( ýтреня)
[НЕПОРОЧНЫ]Избраннiи стiхи из псалма 118: (глас 5 всегда): Блажéни непорóчнiи в путь, ходя́щiи в закóне Госпóдни. Блажéни испытáющiи свидéнiя Егó, всем сéрдцем взы́щут Егó, не дéлающiи бо беззакóнiя, в путéх Егó ходи́ша. Ты заповéдал еси зáповеди Твоя сохрани́ти зелó. Дабы́ испрáвилися путié мои, сохрани́ти оправдáнiя Твоя. Тогдá не постыжýся, внегдá призрéти ми на вся зáповеди Твоя. Исповéмся Тебé в прáвости сéрдца, внегдá научи́ти ми ся судьбáм прáвды Твоея́. Оправдáнiя Твоя сохраню́, не остáви менé до зелá. В чесóм испрáвит юнéйшiй путь свой? Внегдá сохрани́ти словесá Твоя. Всем сéрдцем мои́м взыскáх Тебé, не отри́ни менé от зáповедей Твои́х. В сéрдце моéм скрых словесá Твоя, яко да не согрешý Тебé. Благословéн еси, Гóсподи: научи́ мя оправдáнiем Твои́м.
ПОЛИЕЛЕЙ
Хор: Хвали́те И҆́мя Госпóдне, хвали́те, раби́ Гóспода.
Аллилýїа (трúжды)
Благословéн Госпóдь от Сióна, живы́й во Iерусали́ме.
Аллилýїа (трúжды)
Исповéдайтеся Гóсподеви, я́ко Благ, я́ко в век ми́лость Егó.
Аллилýїа (трúжды)
Исповéдайтеся Бóгу Небéсному, я́ко в век ми́лость Егó.
Аллилýїа (трúжды)
ТРОПАРИ ВОСКРЕСНЫ ПО НЕПОРОЧНАХ, ГЛАС 5
Благословéн есú, Гóсподи,/научú мя оправдáнiем Твоúм. (Пс.118:12)
Áнгельскiй собóр удиви́ся,/ зря Тебé в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Благословéн есú, Гóсподи,/научú мя оправдáнiем Твоúм.
Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел миронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Благословéн есú, Гóсподи,/научú мя оправдáнiем Твоúм.
Зелó рáно мvронóсицы течáху/ ко грóбу Твоему рыдáющiя,/ но предстá к ним Áнгел и речé:/ рыдáнiя врéмя престá, не плáчите,/ воскресéнiе же апóстолом рцы́те.
Благословéн есú, Гóсподи,/научú мя оправдáнiем Твоúм.
Мvронóсицы жены́ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речé, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егó Сы́нови, и Святóму Дýху,/ Святéй Трóице во еди́ном существé,/ с Серафíмы зовýще:/ Свят, Свят, Свят еси, Гóсподи.
И ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехá, Дéво, Адáма избáвила еси,/ рáдость же Éве/ в печáли мéсто подалá еси,/ пáдшiя же от жи́зни/ к сей напрáви/ из Тебé воплоти́выйся Бог и Человéк.
Чтец: Аллилýїа, аллилýїа, аллилýїа, слáва Тебé Бóже. (3 раза)
Гóсподи, поми́луй. (3 раз)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоú воскрéсны, глас 5: Áнгельским зрáком ум смущáюща,/ и Божéственным востáнiем душéю просвещáемы,/ мvроно́сицы апóстолом благовествовáху:/ возвести́те во язы́цех Воскресéнiе,/ Гóсподу содéйствующу чудесы́,// подаю́щему нам вéлiю ми́лость.
СТЕПЕННА, ГЛАС 5
1 АНТИФОН
Хор: Внегдá скорбéти мне,/ Давíдски пою́ Тебé, Спáсе мой:// избáви дýшу мою́ от язы́ка льстúваго. (Двáжды)
Пусты́нным живóт блажéн есть,// Божéственным рачéнiем воскриля́ющимся. (Двáжды)
Слáва Ѻтцý и Сы́ну и Святóму Дýху.
Святы́м Дýхом одержáтся вся,/ ви́димая же с неви́димыми:/ Самодержáвен бо сый,// Трóицы Еди́н есть нелóжно.
И ны́не и прúсно и во вéки векóв. Амúнь.
Святы́м Дýхом одержáтся вся,/ ви́димая же с неви́димыми:/ Самодержáвен бо сый,// Трóицы Еди́н есть нелóжно.
2 АНТИФОН
На гóры душé, воздвúгнемся,// грядú тáмо, отню́дуже пóмощь и҆́дет. (Двáжды)
Деснáя Твоя́ рукá, и менé, Хрiстé, касáющися,// от лéсти вся́кiя да сохрани́т. (Двáжды)
Слáва Ѻтцý и Сы́ну и Святóму Дýху.
Святóму Дýху богослóвяще рцем:/ Ты еси́ Бог, Живóт, Рачéнiе, Свет, Ум:// Ты Благосты́ня, Ты цáрствуеши во вéки.
И ны́не и прúсно и во вéки векóв. Амúнь.
Святóму Дýху богослóвяще рцем:/ Ты еси́ Бог, Живóт, Рачéнiе, Свет, Ум:// Ты Благосты́ня, Ты цáрствуеши во вéки.
3 АНТИФОН
О рéкших мне: во дворы́ внúдем Госпóдня:// рáдости мнóгiя испóлнен быв, молúтвы возсылáю. (Двáжды)
В домý Давíдове стрáшная совершáются:// огнь бо тáмо паля́ всяк срáмный ум. (Двáжды)
Слáва Ѻтцý и Сы́ну и Святóму Дýху.
Святóму Дýху живоначáльное достóинство,/ от Негóже вся́кое живóтно одушевля́ется,// я́ко во Ѻтцé, кýпно же и Слóве.
И ны́не и прúсно и во вéки векóв. Амúнь.
Святóму Дýху живоначáльное достóинство,/ от Негóже вся́кое живóтно одушевля́ется,// я́ко во Ѻтцé, кýпно же и Слóве.
ПРОКИМЕН
Чтец: Прокíмен, глас пя́тый, псалóм Давíдов: Воскресни́, Гóсподи Бóже мой, да вознесéтся рукá Твоя́, я́ко Ты цáрствуеши во вéки. (Пс.9:33)
Хор: Воскреснú, Гóсподи Бóже мой, да вознесéтся рукá Твоя́,/ я́ко Ты цáрствуеши во вéки.
Чтец: Исповéмся Тебé, Гóсподи, всем сéрдцем мои́м, повéм вся чудесá Твоя́. (Пс.9:2)
Хор: Воскреснú, Гóсподи Бóже мой, да вознесéтся рукá Твоя́,/ я́ко Ты цáрствуеши во вéки.
Чтец: Воскресни́, Гóсподи Бóже мой, да вознесéтся рукá Твоя́.
Хор: Я́ко Ты цáрствуеши во вéки.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода. (Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.(Пс.150:1)
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
От Луки́ Святáго Евáнгелiя чтéнiе.
Хор: Слáва Тебé, Гóсподи, слáва Тебé.
(Лк.зач.113) Во врéмя óно Петр востáв течé ко грóбу, и прини́к ви́де ри́зы еди́ны лежáща: и оты́де, в себé дивя́ся бы́вшему. И се два от них бéста идýща в тóйже день в весь, отстоя́щу стáдiй шестьдеся́т от Iерусали́ма, éйже и҆́мя Еммаýс: и та бесéдоваста к себé о всех сих приклю́чшихся. И бысть бесéдующема и҆́ма и совопрошáющемася, и Сам Iисýс прибли́жився идя́ше с ни́ма: óчи же ею́ держáстеся, да Егó не познáета. Речé же к ни́ма: что суть словесá сiя́, о ни́хже стязáетася к себé идýща, и естá дря́хла? Отвещáв же еди́н, емýже и҆́мя Клеóпа, речé к Немý: Ты ли еди́н пришлéц еси́ во Iерусали́м, и не увéдел еси́ бы́вших в нем во дни сiя́? И речé и҆́ма: кíих? Óна же рéста емý: я́же о Iисýсе Назаряни́не, и҆́же бысть Муж Прорóк, си́лен дéлом и слóвом пред Бóгом и всéми людьми́: кáко предáша Егó архiерéи и кня́зи нáши на осуждéнiе смéрти, и распя́ша Егó: мы же надéяхомся, я́ко Сей есть хотя́ избáвити Iзрáиля: но и над всéми си́ми, трéтiй сей день есть днесь, отнéлиже сiя́ бы́ша. Но и жены́ нéкiя от нас ужаси́ша ны, бы́вшыя рáно у грóба: и не обрéтша телесé Егó, прiидóша, глагóлюща, я́ко и явлéнiе Áнгел ви́деша, и҆́же глагóлют Егó жи́ва. И идóша нéцiи от нас ко грóбу, и обрéтоша тáко, я́коже и жены́ рéша: Самогó же не ви́деша. И Той речé к ни́ма: о несмы́сленная и кóсная сéрдцем, éже вéровати о всех, я́же глагóлаша прорóцы: не сiя́ ли подобáше пострадáти Хрiстý и вни́ти в слáву свою́? И начéн от Моисéа и от всех прорóк, сказáше и҆́ма от всех писáнiй я́же о Нем. И прибли́жишася в весь, в ню́же идя́ста: и Той творя́шеся далечáйше ити́. И нуждáста Егó, глагóлюща: обля́зи с нáма, я́ко к вéчеру есть, и приклони́лся есть день. И вни́де с ни́ма облещи́. И бысть я́ко возлежé с ни́ма, и прiи́м хлеб благослови́, и преломи́в дая́ше и҆́ма. Óнема же отверзóстеся óчи, и познáста Егó: и Той неви́димь бысть и҆́ма. И рекóста к себé: не сéрдце ли нáю горя́ бе в нáю, егдá глагóлаше нáма на пути́ и егдá скáзоваше нáма писáнiя? И востáвша в той час, возврати́стася во Iерусали́м, и обретóста совокýпленны единагонáдесяте и и҆́же бя́ху с ни́ми, глагóлющих, я́ко вои́стинну востá Госпóдь и яви́ся Сíмону. И та повéдаста, я́же бы́ша на пути́, и я́ко познáся и҆́ма в преломлéнiи хлéба.
[Русский синодальный перевод]Но Петр, встав, побежал ко гробу и, наклонившись, увидел только пелены лежащие, и пошел назад, дивясь сам в себе происшедшему. В тот же день двое из них шли в селение, отстоящее стадий на шестьдесят от Иерусалима, называемое Эммаус; и разговаривали между собою о всех сих событиях. И когда они разговаривали и рассуждали между собою, и Сам Иисус, приблизившись, пошел с ними. Но глаза их были удержаны, так что они не узнали Его. Он же сказал им: о чем это вы, идя, рассуждаете между собою, и отчего вы печальны? Один из них, именем Клеопа, сказал Ему в ответ: неужели Ты один из пришедших в Иерусалим не знаешь о происшедшем в нем в эти дни? И сказал им: о чем? Они сказали Ему: что было с Иисусом Назарянином, Который был пророк, сильный в деле и слове пред Богом и всем народом; как предали Его первосвященники и начальники наши для осуждения на смерть и распяли Его. А мы надеялись было, что Он есть Тот, Который должен избавить Израиля; но со всем тем, уже третий день ныне, как это произошло. Но и некоторые женщины из наших изумили нас: они были рано у гроба и не нашли тела Его и, придя, сказывали, что они видели и явление Ангелов, которые говорят, что Он жив. И пошли некоторые из наших ко гробу и нашли так, как и женщины говорили, но Его не видели. Тогда Он сказал им: о, несмысленные и медлительные сердцем, чтобы веровать всему, что предсказывали пророки! Не так ли надлежало пострадать Христу и войти в славу Свою? И, начав от Моисея, из всех пророков изъяснял им сказанное о Нем во всем Писании. И приблизились они к тому селению, в которое шли; и Он показывал им вид, что хочет идти далее. Но они удерживали Его, говоря: останься с нами, потому что день уже склонился к вечеру. И Он вошел и остался с ними. И когда Он возлежал с ними, то, взяв хлеб, благословил, преломил и подал им. Тогда открылись у них глаза, и они узнали Его. Но Он стал невидим для них. И они сказали друг другу: не горело ли в нас сердце наше, когда Он говорил нам на дороге и когда изъяснял нам Писание? И, встав в тот же час, возвратились в Иерусалим и нашли вместе одиннадцать апостолов и бывших с ними, которые говорили, что Господь истинно воскрес и явился Симону. И они рассказывали о происшедшем на пути, и как Он был узнан ими в преломлении хлеба.(24:12-35)
Хор: Слáва Тебé, Гóсподи, слáва Тебé.
Воскресéнiе Хрїстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрїстé, и святóе Воскресéнiе Твоé поéм и слáвим: Ты бо еси́ Бог наш, рáзве Тебé инóго не знáем, и҆́мя Твоé именýем. Прiиди́те вси вéрнiи, поклони́мся Святóму Хрїстóву Воскресéнiю: се бо прiи́де Крестóм рáдость всемý мíру. Всегдá благословя́ще Гóспода, поéм Воскресéнiе Егó: распя́тiе бо претерпéв, смéртiю смерть разруши́.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моé. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх роди́ мя мáти моя. Се бо и҆́стину возлюби́л еси́, безвéстная и тáйная премýдрости Твоея яви́л ми еси́. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отврати́ лицé Твоé от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéнiя Твоегó, и Дýхом Влады́чним утверди́ мя. Научý беззакóнныя путéм Твоим, и нечести́вiи к Тебé обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажи́, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Слáва Ѻтцý и Сы́ну и Святóму Дýху.
Глас 8 (Трióди): Покая́нiя отвéрзи ми двéри Жизнодáвче,/ ýтренюет бо дух мой ко хрáму святóму Твоемý,/ храм нося́й телéсный весь осквернéн:/ но я́ко щедр, очи́сти// благоутрóбною Твоéю ми́лостiю.
И҆ ны́не и прúсно и во вéки векóв. Амúнь.
Богорóдичен (Трióди): На спасéнiя стези́ настáви мя Богорóдице,/ стýдными бо окаля́х дýшу грехми́,/ и в лéности все житié моé ижди́х:/ но Твои́ми моли́твами/ избáви мя от вся́кiя нечистоты́.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моé. (Пс.50:3)
Стiхúра (Трióди), глас 6: Мнóжества содéянных мнóю лю́тых, помышля́я окая́нный,/ трепéщу стрáшнаго дне сýднаго:/ но надéяся на ми́лость благоутрóбiя Твоегó,/ я́ко Давíд вопiю́ Ти:/ поми́луй мя Бóже// по вели́цей Твоéй ми́лости.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ВОСКРЕСНЫЙ, ГЛАС 5
(совмещенный с канóном крестовоскрéсным, глас 5; Богорóдицы глас 5 и канóном Трióди, глас 4)
ПЕСНЬ 1
Iрмóс: Коня́ и всáдника в мóре Чермнóе,/ сокрушáяй брáни/ мы́шцею высóкою,/ Хрiстóс истрясé,/ Iзрáиля же спасé,// побéдную песнь пою́ща.
Хор (припéв): Слáва, Гóсподи, Святóму Воскресéнiю Твоемý.
Чтец (тропáрь): Тебé тернонóсный еврéйскiй сонм,/ любвé, Благодéтелю, к Тебé не сохрáнь мáтернiя, Хрiстé, венчá,// родоначáльника разрешáюща тернóвное запрещéнiе.
Хор: Слáва, Гóсподи, Святóму Воскресéнiю Твоемý.
Чтец: Воздви́гл еси́ мя пáдшаго в ров,/ преклóнься, Жизнодáвче Безгрéшне:/ и моея́ злосмрáдныя тли, Хрiстé, претерпéв неискушéнно,// Божéственнаго Существá ми́ром мя облагоухáл еси́.
Хор: Пресвятáя Богорóдице, спасú нас.
Богорóдичен: Разреши́ся кля́тва, печáль престá:/ Благословéнная бо и Благодáтная,/ вéрным рáдость возсiя́,// благословéнiе всем концéм цветонося́щи Хрiстá.
Канон крестовоскресный, глас 5
Хор: Слáва, Гóсподи, Крестý Твоемý Честнóму и Воскресéнiю.
Чтец: И҆́же вóлею на крестé пригвождéнному плóтiю,/ и дрéвняго от изречéнiя дрéвом пáдшаго свобóждшему,// Томý Еди́ному воспои́м: я́ко прослáвися.
Хор: Слáва, Гóсподи, Крестý Твоемý Честнóму и Воскресéнiю.
Чтец: И҆́же из грóба мертвецý воскрéсшу Хрiстý, и пáдшаго совозстáвившу,/ и соседéнiем Отéческим украси́вшему,// Томý Еди́ному воспои́м: я́ко прослáвися.
Канон Богородицы, глас 5
Хор: Пресвятáя Богорóдице, спасú нас.
Чтец: Свéта всéльшагося в Тя, Пречи́стая,/ и просвéщшаго мíр лучáми Божествá,/ Хрiстá моли́,// просвети́ти вся пою́щiя Тя, Мáти Дéво.
Хор: Пресвятáя Богорóдице, спасú нас.
Чтец: Я́ко украшáема добрóтою добродéтелей, Благодáтная,/ добротвóрное благолéпiе лучéю Дýха,// подъя́ла еси́, Всечи́стая, вся́ческая удобри́вшаго.
Канон постной Триоди, глас 4
Хор: Слáва Тебé, Бóже наш, слáва Тебé.
Чтец: Плéщуще с весéлiем днесь вéрнiи возопiи́м:/ коль чýдна делá Твоя́ Хрiстé, и вели́ка си́ла,// нáше единомы́слiе и соглáсiе содéлавый! (двáжды)
Хор: Слáва Тебé, Бóже наш, слáва Тебé.
Чтец: День рáдостный богомýдреннiи/ прiиди́те соверши́м,/ ны́не нéбо и земля́ весели́тся, и áнгелов чи́ни,// и человéков собрáнiя изря́дно прáзднующе.
Хор: Слáва Тебé, Бóже наш, слáва Тебé.
Чтец: Превéлiе благодея́нiе ви́дяще, рукáми восплéщим,/ разстоя́щiяся ýды Хрiстóвы, совокýплены во еди́нство,// и Бóга похвáлим мир подáвшаго.
Слáва Отцý и Сыну и Святóму Дýху.
Тропáрь: Дáшася Цéркви днесь победи́тельная,/ Богодви́жным мановéнiем и совéтом,/ Мiхаи́ла же и Феодóры,// благочéстно вéру содержáщих царéй нáших.
И ныне и прúсно и во вéки векóв, амúнь.
Богорóдичен: Орýжiя злочести́вых исчезóша я́ве ересéй,/ храм бо Твой Пречи́стая Чи́стая,/ во образéх украшáемый всеблаголéпно зря́ще,// ны́не всесвящéнно рáдуемся.
Катавáсiя (глас 4):Мóря чермнýю пучи́ну/ невлáжными стопáми/ дрéвнiй пешешéствовав Iзрáиль,/ крестообрáзныма Моисéовыма рукáма// Амали́кову си́лу в пусты́ни победи́л есть.
ПЕСНЬ 3
Iрмóс: Водрузи́вый на ничесóмже зéмлю повелéнiем Твои́м,/ и повéсивый неодержи́мо тяготéющую/ на недви́жимем, Хрiстé, кáмени зáповедей Твои́х,// Цéрковь Твою́ утверди́, Еди́не Блáже и Человеколю́бче.
Хор: Слáва, Гóсподи, Святóму Воскресéнiю Твоемý.
Чтец: Желчь ýбо и҆́же из кáмене мед ссáвшiи,/ в пусты́ни чудодéйствовавшему Тебé принесóша, Хрiстé:/ óцет же за мáнну воз благодея́нiе Ти воздáша// óтроцы Iзрáилевы неблагодáрнiи.
Хор: Слáва, Гóсподи, Святóму Воскресéнiю Твоемý.
Чтец: И҆́же дрéвле светови́дным óблаком покрывáеми,/ Живóт во грóбе Хрiстá положи́ша:/ но самовлáстно воскрéс, всем вéрным подадé// тáйно осеня́ющее свы́ше Дýха сiя́нiе.
Хор: Пресвятáя Богорóдице, спасú нас.
Богорóдичен: Ты Мáти Бóжiя несочетáнно родилá еси́,/ И҆́же от Нетлéнна Отцá возсiя́вшаго, кромé болéзней мáтерних:/ тéмже Тя, Богорóдицу, воплощéнна бо родилá еси́ Слóва,// правослáвно проповéдуем.
Глас 5
Хор: Слáва, Гóсподи, Крестý Твоемý Честнóму и Воскресéнiю.
Чтец: Воскрéсл еси́ от грóба, Хрiстé,/ тли смéртныя избáвль// воспевáющих, Жизнодáвче, вóльное Твоé распя́тiе.
Хор: Слáва, Гóсподи, Крестý Твоемý Честнóму и Воскресéнiю.
Чтец: Помáзати ми́ром тéло Твоé мvронóсицы, Хрiстé, тщáхуся,/ и не обрéтша возврати́шася,// воспевáюща Твоé Востáнiе.
Глас 5
Хор: Пресвятáя Богорóдице, спасú нас.
Чтец: Лéствица, Éюже к нам сни́де Вы́шнiй,/ истлéвшее естествó испрáвити,/ Ты я́вственно, Чи́стая, всем ны́не ви́дена былá еси́:// Тобóю бо Преблагíй мíрови бесéдовати благоволи́.
Хор: Пресвятáя Богорóдице, спасú нас.
Чтец: Éже дрéвле предустáвленное, Дéво, тáинство,/ и прéжде век прови́димое вся вéдущему Бóгу,/ лéтом ны́не напослéдок в ложеснáх Твои́х, Всенепорóчная,// конéц прiéм яви́ся.
Глас 4
Хор: Слáва Тебé, Бóже наш, слáва Тебé.
Чтец: Не ктомý нечести́вых еретикóв ны́не бровь взéмлется:// Бóжiя бо си́ла правослáвiе удержáла есть. (двáжды)
Хор: Слáва Тебé, Бóже наш, слáва Тебé.
Чтец: Óблацы прорóчестiи,/ животворя́щую с небесé днесь рóсу нам да кропя́т,// на востáнiе вéры.
Хор: Слáва Тебé, Бóже наш, слáва Тебé.
Чтец: Благоглáсно тáйныя апóстолов Хрiстóвых трубы́,/ пáче естествá да вопiю́т,// честны́х образóв исправлéнiе.
Слáва Отцý и Сыну и Святóму Дýху.
Тропáрь: Воспои́м Хрiстá, показáвшаго нам/ цари́цу благочести́вую, хрiстолюби́вую,// с Боговенчáнною óтраслiю.
И ныне и прúсно и во вéки векóв, амúнь.
Богорóдичен: Селéнiе Твоé свящéнное/ дости́гше вéрнiи, Пречи́стая,// светови́дною благодáтiю ны́не озари́тися, мóлимся.
Катавáсiя (глас 4): Весели́тся о Тебé Цéрковь Твоя́, Хрiстé, зовýщи:/ Ты моя́ крéпость, Гóсподи,// и прибéжище, и утверждéнiе.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Седáльны Трióди, глaс 1: Божéственный Твой зрак, во óбразе образýюще, Хрiстé,/ я́сно вопiéм Рождествó,/ чудесá неизглагóланная, вóльное распя́тiе./ Отонýдуже бéсове отгóнятся стрáхом,/ и злослáвнiи в посуплéнiи рыдáют,// я́ко сих сопричáстницы.
Слáва Отцý и Сыну и Святóму Дýху.
Зрáками прорóков, апóстолов ви́дами,/ мýчеников свящéнных, и святы́х всех iкóнами,/ и изображéньми свящéнно красýется,/ Женихá же мы́сленнаго и Невéсты украшáется ýмными красовáньми,// мáти вы́шний Сióн.
И ны́не и прúсно и во вéки векóв, амúнь.
Богорóдичен Трióди, глас 1: Не умолчи́м никогдá Богорóдице,/ си́лы Твоя́ глагóлати недостóйнiи:/ áще бо Ты не бы предстоя́ла моля́щи,/ кто бы нас избáвил от толи́ких бед,/ кто же бы сохрани́л до ны́не свобóдны?/ Не отстýпим Влады́чице, от Тебé:// Твоя́ бо рабы́ спасáеши при́сно от вся́ких лю́тых.
ПЕСНЬ 4
Iрмóс: Божéственное Твоé разумéв истощáнiе/ прозорли́во, Аввакýм, Хрiстé, со трéпетом вопiя́ше Тебé:/ во Спасéнiе людéй Твои́х// спасти́ помáзанныя Твоя́ пришéл еси́.
Хор: Слáва, Гóсподи, Святóму Воскресéнiю Твоемý.
Чтец: Я́же от Мéрры горчáйшыя вóды,/ я́ко во óбразе проначертáя Пречи́стый Крест Твой, Блáже,/ грехóвное умерщвля́ющ вкушéнiе,// дрéвом услади́л еси́.
Хор: Слáва, Гóсподи, Святóму Воскресéнiю Твоемý.
Чтец: Крест за дрéво разýмное,/ за слáдкую же пи́щу желчь, Спáсе мой, прiя́л еси́,// за тлéнiе же смéрти кровь Твою́ Божéственную излiя́л еси́.
Хор: Пресвятáя Богорóдице, спасú нас.
Богорóдичен: Кромé ýбо сочетáнiя зачалá еси́ нетлéнно во чрéве,/ и без болéзни родилá еси́,// и по Рождествé, Дéва, Бóга плóтiю рóждши, сохрани́лася еси́.
Глас 5
Хор: Слáва, Гóсподи, Крестý Твоемý Честнóму и Воскресéнiю.
Чтец: Я́ко водрузи́ся на земли́ на лóбнем Крест,/ сокруши́шася вереи́ и врáтницы вéчнiи,// и возопи́ша: слáва си́ле Твоéй, Гóсподи.
Хор: Слáва, Гóсподи, Крестý Твоемý Честнóму и Воскресéнiю.
Чтец: Я́ко сни́де Спас к свя́занным я́ко мертв,/ совоскресóша с Ним и҆́же от вéка умéршiи,// и возопи́ша: слáва си́ле Твоéй, Гóсподи.
Глас 5
Хор: Пресвятáя Богорóдице, спасú нас.
Чтец: Сéрдцем и умóм, душéю же и усты́/ исповéдую всеблагочéстно Тя, Богорóдицу вои́стинну, Чи́стая,/ спасéнiя плод объéмля,// и спасáюся Дéво, моли́твами Твои́ми.
Хор: Пресвятáя Богорóдице, спасú нас.
Чтец: Создáвый от не сýщих вся́ческая,/ от Тебé, Чи́стыя, создáтися я́ко Благодéтель, благоволи́,// на Спасéнiе вéрою и любóвiю Тя пою́щих, Всенепорóчная.
Глас 4
Хор: Слáва Тебé, Бóже наш, слáва Тебé.
Чтец: Наи́тiем Божéственным Утéшителя, Твой храм освяти́,/ и пришéствiем Сегó ерети́ческую прéлесть отжени́,// Слóве Бóжiй многоми́лостиве. (двáжды)
Хор: Слáва Тебé, Бóже наш, слáва Тебé.
Чтец: Нýжднейшаго избáвивый злочéстiя Твоя́ лю́ди,/ покажи́ благочéстiя рéвностiю разжжéны,/ и вéрою взывáющiя:// слáва си́ле Твоéй, Гóсподи.
Хор: Слáва Тебé, Бóже наш, слáва Тебé.
Чтец: Священнообрáзными изображéньми,/ образóв Хрiстóвых зря́ще и Богорóдицы,/ сiя́ющая Божéственная селéнiя,// священнолéпно рáдуемся.
Слáва Отцý и Сыну и Святóму Дýху.
Тропáрь: Цари́ца по обоемý укрáшена,/ и́стиннаго возжелéвши Хрiстóва Цáрства,/ Сегó написá óбраз пречи́стый,// и святы́х изображéнiя.
И ныне и прúсно и во вéки векóв, амúнь.
Богорóдичен: Воплощéнна роди́вши Божéственнаго Слóва,/ Боголéпное освящéнiе Благодáтная, Сегó показáла еси́,// тéмже Твой храм светови́дный обновля́ем.
Катавáсiя (глас 4): Вознесéна Тя ви́девши Цéрковь на Крестé,/ Сóлнце Прáведное,/ ста в чи́не своéм,/ достóйно взывáющи:// слáва си́ле Твоéй, Гóсподи.
ПЕСНЬ 5
Iрмóс: Одея́йся Свéтом, я́ко ри́зою,/ к Тебé ýтреннюю, и Тебé зовý:/ дýшу мою́ просвети́ омрачéнную, Хрiстé,// я́ко Еди́н Благоутрóбен.
Хор: Слáва, Гóсподи, Святóму Воскресéнiю Твоемý.
Чтец: И҆́же слáвы Госпóдь в неслáвне зрáце,/ на дрéве обезчéщен вóлею ви́сит,// о божéственней мне слáве несказáнно промышля́я.
Хор: Слáва, Гóсподи, Святóму Воскресéнiю Твоемý.
Чтец: Ты мя преоблéкл еси́ в нетлéнiе, Хрiстé,/ тли смéртныя неистлéнно плóтiю вкуш,// и возсiя́в из грóба триднéвен.
Хор: Пресвятáя Богорóдице, спасú нас.
Богорóдичен: Ты прáвду же и избавлéнiе нам рóждши Хрiстá без сéмене,// свобóдно содéяла еси́ от кля́твы, Богорóдице, естествó прáотца.
Глас 5
Хор: Слáва, Гóсподи, Крестý Твоемý Честнóму и Воскресéнiю.
Чтец: Простéрл еси́ длáни, Спáсе наш, на дрéве,// вся призывáя к Себé, я́ко Человеколю́бец.
Хор: Слáва, Гóсподи, Крестý Твоемý Честнóму и Воскресéнiю.
Чтец: Плени́л еси́ ад, Спáсе мой, Твои́м погребéнiем,// и Твои́м Воскресéнiем рáдости вся испóлнил еси́.
Глас 5
Хор: Пресвятáя Богорóдице, спасú нас.
Чтец: Вси прорóцы Тя я́ве предвозвести́ша/ хотя́щую бы́ти Бóжiю Мáтерь, Богорóдице Чи́стая:// еди́на бо обрелáся еси́, Чи́стая, совершéнна Непорóчная.
Хор: Пресвятáя Богорóдице, спасú нас.
Чтец: Свéтел óблак Тя живóтныя вóды,/ нам тýчу нетлéнiя Хрiстá одожди́вшiй отчáянным,// Чи́стая, познавáем.
Глас 4
Хор: Слáва Тебé, Бóже наш, слáва Тебé.
Чтец: Положи́, Гóсподи, Твоéй Цéркви утверждéнiе,/ непреклóнней пребы́ти в век вéка// от смятéнiй ересéй. (двáжды)
Хор: Слáва Тебé, Бóже наш, слáва Тебé.
Чтец: Во всю зéмлю свéтлость возсiя́ свы́ше,/ дáннаго вéрным весéлiя,// и Божéственнаго заступлéнiя.
Хор: Слáва Тебé, Бóже наш, слáва Тебé.
Чтец: Еди́не Благíй, и истóчниче блáгости,/ Ты возвы́си правослáвных рог,// чтýщих óбраз Твой.
Слáва Отцý и Сыну и Святóму Дýху.
Тропáрь: Свет незаходи́мый нам благочéстiя возсiя́,/ велéнiем Богодухновéнным вéрных пáстырей,// и мáнiем Богомýдрым.
И ныне и прúсно и во вéки векóв, амúнь.
Богорóдичен: Обнови́ нам дрéвнее благолéпiе,/ Пречи́стая Богомáти,/ и дом Твой сей освяти́// Твоéю благодáтiю.
Катавáсiя (глас 4): Ты, Гóсподи мой,/ Свет в мiр пришéл еси́,/ Свет Святы́й, обращáяй из мрáчна невéденiя// вéрою воспевáющiя Тя.
ПЕСНЬ 6
Iрмóс: Неи́стовствующееся бýрею душетлéнною,/ Влады́ко Хрiстé, страстéй мóре укроти́,// и от тли возведи́ мя, я́ко Благоутрóбен.
Хор: Слáва, Гóсподи, Святóму Воскресéнiю Твоемý.
Чтец: В тлéнiе попóлзся родоначáльник, Влады́ко Хрiстé,/ преслýшаннаго брáшна вкуш,// и к животý возведéн бысть стрáстiю Твоéю.
Хор: Слáва, Гóсподи, Святóму Воскресéнiю Твоемý.
Чтец: Живóт низшéл еси́ ко áду, Влады́ко Хрiстé,/ и тлéнiе растлéвшему быв,// тлéнiем источи́л еси́ Воскресéнiе.
Хор: Пресвятáя Богорóдице, спасú нас.
Богорóдичен: Дéва роди́, и рóждши пребы́сть чистá,/ на рукý нося́щаго вся́ческая,// я́ко вои́стинну Дéва Мáти понéсшая.
Глас 5
Хор: Слáва, Гóсподи, Крестý Твоемý Честнóму и Воскресéнiю.
Чтец: Простéрл еси́ длáни Твои́, собирáя далéче расточéнная/ язы́к Твои́х собрáнiя, Хрiстé Бóже наш,// живонóсным Крестóм Твои́м, я́ко Человеколю́бец.
Хор: Слáва, Гóсподи, Крестý Твоемý Честнóму и Воскресéнiю.
Чтец: Плени́л еси́ смерть, и вратá áдова сокруши́л еси́,/ Адáм же свя́занный разрешéн быв, вопiя́ше Тебé:// Спасé мя десни́ца Твоя́, Гóсподи.
Глас 5
Хор: Пресвятáя Богорóдице, спасú нас.
Чтец: И҆́же всемý винóвный, и éже бы́ти всем подáвый,/ я́ко винóвну имя́ше воплощáемь, éже по нам,// Тя, Богомáти Всенепорóчная.
Хор: Пресвятáя Богорóдице, спасú нас.
Чтец: Исцелéнiй, Влады́чице, душепитáтельный точáщiй истóчник/ вéрно притекáющим к покрóву Твоемý благослáвному,// вéмы Тя, Всенепорóчная.
Глас 4
Хор: Слáва Тебé, Бóже наш, слáва Тебé.
Чтец: Пи́шется и почитáется вéрно/ покланя́емый óбраз Влады́ки,/ и прiéмлет пáки Цéрковь дерзновéнiе,// благочéстно Спáса прославля́ющи. (двáжды)
Хор: Слáва Тебé, Бóже наш, слáва Тебé.
Чтец: Обнажáется сéтованiя, и тьмы ересéй Хрiстóва Цéрковь,/ и нóсит ри́зу весéлiя,// и Божéственною и светонóсною покрывáется благодáтiю. (двáжды)
Слáва Отцý и Сыну и Святóму Дýху.
Тропáрь: Благослáвiя дрéвняго осiя́нiя получи́ правослáвных собóр,/ Феодóры мановéнiем цари́цы,// и ея́ сы́на благочести́ваго Мiхаи́ла самодéржца.
И ныне и прúсно и во вéки векóв, амúнь.
Богорóдичен: Дрéвле свидéнiя повелéвый бы́ти ски́нiи,/ я́ко в ски́нiи словéсней, в Тебé живéт Еди́н Препрослáвленный,// прославля́яй храм Твой, Дéво, чудесы́.
Катавáсiя (глас 4): Пожрý Ти со глáсом хвалéнiя, Гóсподи,/ Цéрковь вопiéт Ти,/ от бесóвскiя крóве очи́щшися/ рáди ми́лости от ребр Твои́х// истéкшею Крóвiю.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк Трióди, глас 2: Неопи́санное Слóво Отчее,/ из Тебé, Богорóдице, описáся воплощáемь,/ и осквéрншiйся óбраз в дрéвнее вообрази́в,/ Божéственною добрóтою смеси́,/ но исповéдающе спасéнiе,// дéлом и слóвом, сié вообрáжаем.
Íкос: Сié смотрéнiя тáинство,/ дрéвле прорóцы Богови́дно вдохновéни бы́вше,/ нас рáди в концы́ векóв дости́гших предвозвести́ша,/ получи́вше сегó сiя́нiя./ Рáзум ýбо Божéственный от негó взéмше,/ Еди́наго Гóспода Бóга знáем,/ в трiéх Ипостáсех покланя́емаго,/ и Томý еди́ному служáще,/ еди́ну вéру, и еди́но крещéнiе имýще,/ во Хрiстá облекóхомся,/ но исповéдающе спасéнiе, дéлом и слóвом,// сié воображáем.
ПЕСНЬ 7
Iрмóс: Превозноси́мый отцéв Госпóдь/ плáмень угаси́, óтроки ороси́, соглáсно пою́щiя:// Бóже, благословéн еси́.
Хор: Слáва, Гóсподи, Святóму Воскресéнiю Твоемý.
Чтец: Плóтiю облóжься я́коже на ýдице льщéнiя,/ Божéственною Твоéю си́лою змíя низвлéкл еси́// возводя́ вопiю́щiя: Бóже, благословéн еси́.
Хор: Слáва, Гóсподи, Святóму Воскресéнiю Твоемý.
Чтец: Земли́ непрохóдное осуществовáвый составлéнiе,/ во грóбе покрывáется плóтiю Невмести́мый.// Емýже вси поéм: Бóже, благословéн еси́.
Хор: Пресвятáя Богорóдице, спасú нас.
Богорóдичен: Еди́ну ýбо Ипостáсь во Двою́ Естествý, Всенепорóчная/ родилá еси́ Воплощéннаго Бóга.// Емýже вси поéм: Бóже, благословéн еси́.
Глас 5
Хор: Слáва, Гóсподи, Крестý Твоемý Честнóму и Воскресéнiю.
Чтец: И҆́же дрéвом крéстным íдольскую прéлесть разреши́вый,// благословéн Бог отéц нáших.
Хор: Слáва, Гóсподи, Крестý Твоемý Честнóму и Воскресéнiю.
Чтец: Воскресы́й из мéртвых, и сýщiя во áде совоздви́гнувый,// благословéн Бог отéц нáших.
Глас 5
Хор: Пресвятáя Богорóдице, спасú нас.
Чтец: Неопределéнный пребы́в Непрелóжен,/ плóти по Ипостáси соедини́ся, я́ко Благоутрóбен, в Тебé Пресвятéй:// И҆́же Еди́н благословéн Бог отéц нáших.
Хор: Пресвятáя Богорóдице, спасú нас.
Чтец: Невéсту Тя Всенепорóчную, Богорóдице Влады́чице, соглáсно слáвим и Престóл Зижди́теля Твоегó.// Емýже вси поéм: Бóже, благословéн еси́.
Глас 4
Хор: Слáва Тебé, Бóже наш, слáва Тебé.
Чтец: Да сликовствýет церкóвней свéтлости/ любóвiю Божéственною áнгельское вóинство,/ Богомýдренно воспевáющее:// благословéн еси́ в хрáме слáвы Твоея́, Гóсподи. (двáжды)
Хор: Слáва Тебé, Бóже наш, слáва Тебé.
Чтец: Цéрковь перворождéнных, и торжествó рáдуется,/ зря́ще ны́не божéственныя лю́ди, единомýдренно воспевáющiя:// благословéн еси́ в хрáме слáвы Твоея́, Гóсподи. (двáжды)
Слáва Отцý и Сыну и Святóму Дýху.
Тропáрь: Избáвлени прéжде мрáчныя éреси,/ мáнiем Феодóры достолéпныя цари́цы, воспевáем:// благословéн еси́ в хрáме слáвы Твоея́, Гóсподи.
И ныне и прúсно и во вéки векóв, амúнь.
Богорóдичен: Пáче вы́шних ликостоя́нiй, вознеслáся еси́ Всечи́стая,/ еди́на бы́вши Мáти Вседéтеля./ Рáдующеся ýбо взывáем:// благословéнна Ты еси́ в женáх, всенепорóчная Влады́чице.
Катавáсия (глас 4): В пещи́ Авраáмстiи óтроцы перси́дстей,/ любóвiю благочéстiя пáче,/ нéжели плáменем, опаля́еми, взывáху:// благословéн еси́ в хрáме слáвы Твоея́, Гóсподи.
ПЕСНЬ 8
Iрмóс: Тебé, Вседéтелю,/ в пещи́ óтроцы, всемíрный лик сплéтше, поя́ху:/ делá вся́кая, Гóспода пóйте// и превозноси́те во вся вéки.
Хор: Слáва, Гóсподи, Святóму Воскресéнiю Твоемý.
Чтец: Ты о вóльней спаси́тельныя стрáсти помоли́лся еси́ чáши, я́коже невóльней:// два хотéнiя, двемá бо по коемýждо нóсиши существóма, Хрiстé, во вéки.
Хор: Слáва, Гóсподи, Святóму Воскресéнiю Твоемý.
Чтец: Твои́м вседéтельным схождéнiем ад, Хрiстé, порýганный/ изблевá вся, я́же дрéвле лéстiю умерщвлéнныя,// Тебé превознося́щiя во вся вéки.
Хор: Пресвятáя Богорóдице, спаси нас.
Богорóдичен: Тя я́же пáче умá/ богомýжне Слóвом Рóждшую Гóспода, и дéвствующую,// вся делá, Дéво, благослови́м, и превознóсим во вся вéки.
Продолженiе здесь