ОБЕДНИЦА (Изобразительные) ПРОЩЕНОЕ ВОСКРЕСЕНИЕ. Неделя сыропустная. Воспоминание Адамова изгнания
26 февраля́ 2023 г. Недéля о сыропýстная. Прощéное воскресéнье. Воспоминáнiе Адáмова изгнáнiя. Заговенье на Велúкiй пост. Глас 4. Воскрéсная прáздничная слýжба для домáшнего (келéйнаго) совершéнiя. Послéдованiе изобразúтельных.
Прежде глагóли часы. Аще имаши произволéнiе то чти ýтреню с канóном и пéрвым чáсом, áще же ни, тóкмо часы.
ЧИН ОБЕДНИЦЫ
Глагóли сúце: Благословѝ, душé моя́, Гóспода,/ благословéн есѝ Гóсподи.
Псалом 102
Благословѝ, душé моя́, Гóспода,/ и вся внýтренняя моя и҆́мя святóе Егó./ Благословѝ, душé моя, Гóспода,/ и не забывáй всех воздая́нїй Егó,/ очищáющаго вся беззакóнїя твоя́,/ исцеля́ющаго вся недýги твоя́,/ избавля́ющаго от истлéнiя живóт твой,/ венчáющаго тя ми́лостїю и щедрóтами,/ исполня́ющаго во благи́х желáнїе твоé:/ обновится я́ко óрля юность твоя́./ Творя́й ми́лостыни Госпóдь,/ и судьбý всем оби́димым./ Сказá путѝ Своя́ Моисéови,/ сыновóм Iзрáилевым хотéнїя Своя́:/ Щедр и Ми́лостив Госпóдь,/ Долготерпели́в и Многоми́лостив./ Не до концá прогнéвается,/ нижé во век враждýет,/ не по беззакóнїем нáшим сотвори́л есть нам,/ нижé по грехóм нáшым воздáл есть нам./ Я́ко по высотé небéсней от землѝ,/ утверди́л есть Госпóдь ми́лость Свою́ на боя́щихся Егó./ Ели́ко отстоят востóцы от зáпад,/ удáлил есть от нас беззакóнїя нáша./ Я́коже щéдрит отéц сы́ны,/ ущéдри Госпóдь боя́щихся Егó./ Я́ко Той познá создáнїе нáше,/ помянý, яко персть есмы́./ Человéк, яко травá днíе eгó,/ яко цвет сéльный, тáко оцветéт,/ яко дух прóйде в нем,/ и не бýдет, и не познáет ктомý мéста своегó./ Ми́лость же Госпóдня от вéка и до вéка на боя́щихся Егó,/ и прáвда Егó на сынéх сынóв, храня́щих завéт Егó, и пóмнящих зáповеди Егó твори́ти я./ Госпóдь на Небесѝ уготóва Престóл Свой,/ и Цáрство Егó всéми обладáет./ Благослови́те Гóспода вси Áнгели Егó,/ си́льнїи крéпостїю, творя́щїи слóво Егó, услышати глас словéс Егó./ Благослови́те Гóспода вся Си́лы Егó,/ слýги Егó, творя́щїи вóлю Егó./ Благослови́те Гóспода вся делá Егó,/ на всяком мéсте влады́чества Егó.
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Благослови́, душé моя, Гóспода,/ и вся внýтренняя моя и҆́мя святóе Егó./ Благословéн еси, Гóсподи.
Слáва Ѻтцý и Сы́ну и Святóму Дýху.
Псалом 145
Хвали́, душé моя, Гóспода./ Восхвалю́ Гóспода в животé моéм,/ пою Бóгу моемý, дóндеже есмь./ Не надéйтеся на кня́зи, на сы́ны человéческїя,/ в ни́хже несть спасéнїя./ Изы́дет дух eгó/ и возврати́тся в зéмлю свою́./ В той день поги́бнут вся помышлéнїя eгó./ Блажéн, eмýже Бог Iáковль Помóщник егó,/ уповáнiе eгó на Гóспода Бóга своегó,/ сотвóршаго нéбо и зéмлю,/ мóре и вся, я́же в них,/ храня́щаго и҆́стину в век,/ творя́щаго суд оби́димым,/ даю́щаго пи́щу áлчущим./ Госпóдь реши́т оковáнныя./ Госпóдь умудря́ет слепцы́./ Госпóдь возвóдит низвéрженныя./ Госпóдь лю́бит прáведники./ Госпóдь храни́т пришéльцы,/ си́ра и вдову прїи́мет/ и путь грéшных погуби́т./ Воцари́тся Госпóдь во век,/ Бог твой, Сióне, в род и род.
И ны́не и прúсно и во вéки векóв. Амúнь.
Единорóдный Сы́не и Слóве Бóжiй, Безсмéртен Сый/ и извóливый спасéнїя нáшего рáди/ воплоти́тися от Святы́я Богорóдицы и Приснодéвы Марíи,/ непрелóжно вочеловéчивыйся,/ распны́йся же, Хрїстé Бóже, смéртїю смерть попрáвый,/ Един Сый Святы́я Трóицы,/ спрославля́емый Отцý и Святóму Дýху, спасѝ нас.
И поем Блаженны с тропарями из Октоиха
Хор: Во Цáрствiи Твоéм помянú нас, Гóсподи,/ егдá прiúдеши, во Цáрствiи Твоéм.
На 12. Хор: Блажéни нúщiи дýхом,/ я́ко тех есть Цáрство Небéсное.
Хор: Блажéни плáчущiи,/ я́ко тíи утéшатся.
На 10. Хор: Блажéни крóтцыи,/ я́ко тíи наслéдят зéмлю.
Чтец (стiхúры воскрéсные, глас 4): Дрéвом Адáм рая́ бысть изселéн;/ дрéвом же крéстным разбóйник в рай всели́ся./ Ов ýбо вкуш, зáповедь отвéрже Сотвóршаго;/ ов же сраспинáем, Бóга исповéда Тая́щагося,// помяни́ мя, вопiя́, во Цáрствiи Твоéм.
Хор: Блажéни áлчущiи и жáждущiи прáвды,/ я́ко тíи насы́тятся.
Чтец: Вознесы́йся на Крест, смéртную разруши́вый си́лу,/ и заглáдивый, я́ко Бог, éже на ны рукописáнiе, Гóсподи,/ разбóйниче покая́нiе и нам подáждь, Еди́не Человеколю́бче,/ вéрою служáщим, Хрїстé Бóже наш, и вопiю́щим Ти:// помяни́ и нас во Цáрствiи Твоéм.
На 8. Хор: Блажéни мúлостивiи,/ я́ко тíи помúловани бýдут.
Чтец: Рукописáнiе нáше на Крестé копiéм раздрáл еси́,/ и вмени́вся в мéртвых, тáмошняго мучи́теля связáл еси́,/ избáвивый всех от уз áдовых воскресéнiем Твои́м,/ и҆́мже просвети́хомся, Человеколю́бче Гóсподи, и вопiéм Ти:// помяни́ и нас во Цáрствiи Твоéм.
Хор: Блажéни чúстiи сéрдцем,/ я́ко тíи Бóга ýзрят.
Чтец: Распны́йся и воскресы́й я́ко Си́лен из грóба триднéвен,/ и первоздáннаго Адáма воскреси́вый, Еди́не Безсмéртне:/ и менé на покая́нiе обрати́тися, Гóсподи, сподóби от всегó сéрдца моегó,/ и тéплою вéрою при́сно взывáти Ти:// помяни́ мя, Спáсе, во Цáрствiи Твоéм.
На 6. Хор: Блажéни миротвóрцы,/ яко тíи сы́нове Бóжiи нарекýтся.
Чтец: Нас рáди, И҆́же безстрáстен, стрáстный бысть человéк,/ и вóлею на Крестé пригвождéйся, нас совоскреси́,/ тéмже и слáвим со Крестóм страсть и воскресéнiе,/ и҆́миже возсоздáхомся, и҆́миже и спасáемся, взывáюще:// помяни́ и нас во Цáрствiи Твоéм.
Хор: Блажéни изгнáни прáвды рáди,/ я́ко тех есть Цáрство Небéсное.
Чтец: Воскрéсшаго из мéртвых, и áдову держáву плени́вшаго,/ и ви́дима женáми миронóсицами, рáдуйтеся, глагóлющаго,/ вéрнiи умóлим, от истлéнiя избáвити дýши нáша,/ зовýще всегдá разбóйника благоразýмнаго глáсом к Немý:// помяни́ и нас во Цáрствiи Твоéм.
На 4. Хор: Блажéни естé, егдá понóсят вам,/ и изженýт, и рекýт всяк зол глагóл на вы лжýще Менé рáди.
Чтец (стiхúры Трióди, глас 6): Одéждею мя облéкл еси́ боготкáнною Спáсе, во Едéме, я́ко благоутрóбен:/ аз же Твою́ преступи́х зáповедь, вéровав льсти́вому,// и наг ви́дехся окая́нный.
Хор: Рáдуйтеся и веселúтеся, я́ко мзда вáша мнóга на Небесéх.
Чтец: Душé всестрáстная моя́, удали́лася еси́ от Бóга,/ невнимáнiем твои́м рáйскаго лиши́лася еси́ наслаждéнiя,/ от áнгел разлучи́лася еси́, во тлю ввелáся еси́:// о падéнiя!
Хор: Слáва Ѻтцý и Сы́ну и Святóму Дýху.
Чтец: Поми́луй, ущéдри Вседержи́телю Бóже,/ Твоéю рукý творéнiе,/ не прéзри менé, молю́ся, Блáже,// отлучи́вшаго себé самагó от ли́ка áнгел Твои́х.
Хор: И ны́не и прúсно и во вéки векóв. Амúнь.
Богорóдичен: Марíе Богозвáнная, Госпожé вся́ческих,/ я́ко рóждшая Гóспода Царя́ всех и Избáвителя,// пленéна мя сýща от рáйскiя слáвы, воззови́.
Тропари и кондаки
Тропáрь воскрéсный, глас 4: Свéтлую Воскресéнiя прóповедь/ от Áнгела увéдевша Госпóдни учени́цы/ и прáдеднее осуждéнiе отвéргша,/ апóстолом хвáлящася глагóлаху:/ испровéржеся смерть,/ воскрéсе Хрїстóс Бог,// дáруяй мíрови вéлiю ми́лость.
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Кондáк Триóди, глас 6: Премýдрости настáвниче, смы́сла подáтелю,/ немýдрых наказáтелю, и ни́щих защи́тителю,/ утверди́, вразуми́ сéрдце моé Влады́ко./ Ты даждь ми слóво, Óтчее Слóво,/ се бо устнé мои́ не возбраню́,/ во éже звáти Тебé:// Ми́лостиве, поми́луй мя пáдшаго.
Трисвятое
Хор: Святы́й Бóже,/ Святы́й Крéпкїй,/ Святы́й Безсмéртный, поми́луй нас. (3 раза)
Хор: Слáва Отцý и Сы́ну и Святóму Дýху, и ны́не и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкїй,/ Святы́й Безсмéртный, поми́луй нас.
Прокимен недели сыропустной, глас 8
Чтец: Прокíмен, глас осьмы́й: Помоли́теся и воздади́те Гóсподеви Бóгу нáшему.(Пс.75:12А)
Хор: Помолúтеся и воздадúте/ Гóсподеви Бóгу нáшему.
Чтец: Вéдом во Iудéи Бог, во Iзрáили вéлiе И҆́мя Егó.(Пс.75:2)
Хор: Помолúтеся и воздадúте/ Гóсподеви Бóгу нáшему.
Чтец: Помоли́теся, и воздади́те.
Хор: Гóсподеви Бóгу нáшему.
АПОСТОЛ
Чтец: К Ри́мляном послáнiя святáго апóстола Пáвла чтéнiе.
(Рим.зач.112): Брáтiе, ны́не ближáйшее нам спасéнiе, нéжели егдá вéровахом. Нощь ýбо прéйде, а день прибли́жися: отложи́м ýбо делá тéмная, и облечéмся во орýжiе свéта. Я́ко во дни, благообрáзно да хóдим, не козлогласовáнiи и пiя́нствы, не любодея́нiи и студодея́нiи, не рвéнiем и зáвистiю, но облецы́теся Гóсподем нáшим Iисýс Хрїстóм, и плóти угóдiя не твори́те в пóхоти. Изнемогáющаго же в вéре прiéмлите, не в сомнéниiе помышлéнiй. Ов бо вéрует я́сти вся, а изнемогáяй зéлiя да яст. Яды́й не ядýщаго да не укоря́ет, и не яды́й ядýщаго да не осуждáет, Бог бо егó прiя́т. Ты кто еси́ судя́й чуждéму рабý? Своемý Гóсподеви стои́т, или́ пáдает, стáнет же, си́лен бо есть Бог постáвити егó.
[Русский синодальный перевод]Братия, ныне ближе к нам спасение, нежели когда мы уверовали. Ночь прошла, а день приблизился: итак отвергнем дела тьмы и облечемся в оружия света. Как днем, будем вести себя благочинно, не предаваясь ни пированиям и пьянству, ни сладострастию и распутству, ни ссорам и зависти; но облекитесь в Господа нашего Иисуса Христа, и попечения о плоти не превращайте в похоти. Немощного в вере принимайте без споров о мнениях. Ибо иной уверен, что можно есть все, а немощный ест овощи. Кто ест, не уничижай того, кто не ест; и кто не ест, не осуждай того, кто ест, потому что Бог принял его. Кто ты, осуждающий чужого раба? Перед своим Господом стоит он, или падает. И будет восставлен, ибо силен Бог восставить его.(Рим.13:11-14:4)
Аллилуарий недели сыропустной, глас 6
Чтец: Аллилýїа, аллилýїа, аллилýїа, глас шесты́й.
Хор: Аллилýїа, аллилýїа, аллилýїа.
Чтец: Блáго есть исповéдатися Гóсподеви, и пéти и҆́мени Твоемý Вы́шнiй. (Пс.91:2)
Хор: Аллилýїа, аллилýїа, аллилýїа.
Чтец: Возвещáти заýтра ми́лость Твою́, и и҆́стину Твою́ на вся́ку нощь. (Пс.91:3)
Хор: Аллилýїа, аллилýїа, аллилýїа.
ЕВАНГЕЛИЕ
От Матфéя Святáго Евáнгелiя чтéнiе.
Хор: Слáва Тебé, Гóсподи, слáва Тебé.
(Мф.зач.17): Речé Госпóдь: áще отпущáете человéком согрешéнiя их, отпýстит и вам Отéц ваш Небéсный. А́ще ли не отпущáете человéком согрешéнiя их, ни Отéц ваш отпýстит вам согрешéнiй ва́ших. Егдá же поститéся, не бýдите я́коже лицемéри сéтующе: помрачáют бо ли́ца своя́, я́ко да явя́тся человéком постя́щеся. Ами́нь глагóлю вам, я́ко воспрiéмлют мзду свою́. Ты же постя́ся помáжи главý твою́, и лицé твоé умы́й, я́ко да не яви́шися человéком постя́ся, но Отцý твоемý, И́же втáйне, и Отéц твой, ви́дяй втáйне, воздáст тебé я́ве. Не скрывáйте себé сокрóвищ на земли́, идéже червь и тля тлит, и идéже тáтiе подкóпывают и крáдут. Скрывáйте же себé сокрóвище на небеси́, идéже ни червь, ни тля тлит, и идéже тáтiе не подкóпывают, ни крáдут. Идéже бо есть сокрóвище вáше, ту бýдет и сéрдце вáше.
[Русский синодальный перевод]Сказал Господь: Ибо если вы будете прощать людям согрешения их, то простит и вам Отец ваш Небесный, а если не будете прощать людям согрешения их, то и Отец ваш не простит вам согрешений ваших. Также, когда поститесь, не будьте унылы, как лицемеры, ибо они принимают на себя мрачные лица, чтобы показаться людям постящимися. Истинно говорю вам, что они уже получают награду свою. А ты, когда постишься, помажь голову твою и умой лице твое, чтобы явиться постящимся не пред людьми, но пред Отцом твоим, Который втайне; и Отец твой, видящий тайное, воздаст тебе явно. Не собирайте себе сокровищ на земле, где моль и ржа истребляют и где воры подкапывают и крадут, но собирайте себе сокровища на небе, где ни моль, ни ржа не истребляют и где воры не подкапывают и не крадут, ибо где сокровище ваше, там будет и сердце ваше.(6:14-21)
Хор: Слáва Тебé, Гóсподи, слáва Тебé.
Помяни́ нас, Гóсподи, егдá прїи́деши во Цáрствiи Твоéм.
Помяни́ нас, Влады́ко, егдá прїи́деши во Цáрствiи Твоéм.
Помяни́ нас, Святы́й, егдá прїи́деши во Цáрствiи Твоéм.
Лик небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
Стiх: Приступи́те к Немý и просвети́теся, и лицá вáша не постыдя́тся.
Лик Небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
Слáва Ѻтцý и Сы́ну и Святóму Дýху.
Лик святы́х Áнгел и Архáнгел со всéми Небéсными си́лами поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
И ны́не и прúсно и во вéки векóв. Амúнь.
Символ веры
Вéрую во Еди́наго Бóга Ѻтцá, Вседержи́теля, Творцá нéбу и землѝ, ви́димым же всем и неви́димым. И во Еди́наго Гóспода Iисýса Хрїстá, Сы́на Бóжiя, Единорóднаго, И҆́же от Ѻтцá Рождéннаго прéжде всех век; Свéта от Свéта, Бóга И҆́стинна от Бóга И҆́стинна, рождéнна, несотворéнна, единосýщна Ѻтцý, И҆́мже вся бы́ша. Нас рáди человéк и нáшего рáди спасéнiя сшéдшаго с небéс и воплоти́вшагося от Дýха Свята и Марíи Дéвы и вочеловéчшася. Распя́таго же за ны при Понтíйстем Пилáте, и страдáвша и погребéнна. И воскрéсшаго в трéтiй день по Писáнiем, и҆ возшéдшаго на небесá и седя́ща одеснýю Ѻтцá. И пáки грядýщаго со слáвою суди́ти живы́м и мéртвым, Егóже Цáрствiю не бýдет концá. И в Дýха Святáго, Гóспода, Животворя́щаго, И҆́же от Ѻтцá исходя́щаго, И҆́же со Ѻтцéм и Сы́ном спокланя́ема и сслáвима, Глагóлавшего прорóки. Во еди́ну Святýю, Собóрную и Апóстольскую Цéрковь. Исповéдую еди́но крещéнiе во оставлéнiе грехóв. Чáю воскресéнiя мéртвых, и жи́зни бýдущаго вéка. Аминь.
Ослáби, остáви, прости Бóже, прегрешéнiя нáша, вóльная, и невóльная, я́же в слóве и в дéле, я́же в вéденiи и не в вéденiи, я́же во дни и в нощѝ, я́же во умé и помышлéнiи, вся нам простѝ, я́ко Благ и Человеколю́бец.
Ѻ́тче наш, И҆́же есѝ на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстé, Сы́не Бóжiй, поми́луй нас. Ами́нь.
КОНДАК
Кондáк Трióди, глас 6: Премýдрости настáвниче, смы́сла подáтелю,/ немýдрых наказáтелю, и ни́щих защи́тителю,/ утверди́, вразуми́ сéрдце моé Влады́ко./ Ты даждь ми слóво, Óтчее Слóво,/ се бо устнé мои́ не возбраню́,/ во éже звáти Тебé:// Ми́лостиве, поми́луй мя пáдшаго.
Гóсподи, поми́луй. (12 раз)
И молитву: Всесвятáя Трóице, Единосýщная Держáво, Нераздéльное Цáрство, всех благи́х Винá, благоволи́ же и о мне грéшнем, утвердѝ, вразумѝ сéрдце моé, и всю мою отымѝ сквéрну, просветѝ мою мысль, да вы́ну слáвлю, пою, покланя́юся и глагóлю: Еди́н Свят, Един Госпóдь, Iисýс Хрїстóс, во слáву Бóга Ѻтцá, ами́нь.
Бýди и҆́мя Госпóдне благословéно от ны́не и до вéка. (3 раза)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Псалом 33
Благословлю́ Гóспода на вся́кое врéмя,/ вы́ну хвалá Его во устéх мои́х./ О Гóсподе похвáлится душá моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм и҆́мя Егó вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицá вáша не постыдя́тся./ Сей ни́щiй воззвá, и Госпóдь услы́ша и҆̀,/ и от всех скорбéй егó спасé и҆̀./ Ополчи́тся Áнгел Госпóдень óкрест боя́щихся Егó,/ и избáвит их./ Вкуси́те и ви́дите, я́ко благ Госпóдь;/ блажéн муж, и҆́же уповáет нань./ Бóйтеся Гóспода, вси святíи Егó,/ яко несть лишéнiя боя́щымся Его./ Богáтiи обнищáша и взалкáша,/ взыскáющiи же Гóспода не лишáтся вся́каго блáга./Прiиди́те, чáда, послýшайте менé,/ стрáху Госпóдню научý вас./ Кто есть человéк хотя́й живóт,/ любя́й дни ви́дети блáги;/ Удержѝ язык твой от зла,/ и устнé твоѝ, éже не глагóлати льсти./ Уклони́ся от зла и сотворѝ блáго,/ взыщѝ ми́ра, и поженѝ и҆̀./ Óчи Госпóдни на прáведныя,/ и ýши Егó в моли́тву их./ Лицé же Госпóдне на творя́щiя злáя,/ еже потреби́ти от землѝ пáмять их./ Воззвáша прáведнiи, и Госпóдь услы́ша и҆́х,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я Госпóдь./ Храни́т Госпóдь вся кóсти их,/ ни еди́на от них сокруши́тся./ Смерть грéшников лютá,/ и ненави́дящiи прáведнаго прегрешáт./ Избáвит Госпóдь дýши раб Свои́х,/ и не прегрешáт вси уповáющiи на Негó.
Достойно есть
Хор: Достóйно есть я́ко вои́стинну блажи́ти Тя, Богорóдицу,/Присноблажéнную и Пренепорóчную и Мáтерь Бóга нáшего./ Честнéйшую Херувíм и слáвнeйшую без сравнéнiя Серафíм,/ без истлéнiя Бóга Слóва рóждшую, сýщую Богорóдицу Тя величáем.
Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.
Гóсподи, поми́луй. (3 раза)
Гóсподи, благословᴎ́.
ОТПУСТ
Гóсподи, Iисýсе Хрїстé, Сыне Бóжїй, моли́твами пречи́стыя Своея́ Мáтере, святы́х слáвных и всехвáльных Апóстол, святы́х и прáведных богоотéц Iоакíма и Áнны, и всех святы́х, поми́лует и спасéт нас, я́ко Благ и Человеколю́бец.