ПРОЩЕНОЕ ВОСКРЕСЕНЬЕ Неделя сыропустная.Глас 4.ВСЕНОЩНОЕ БДЕНИЕ ВЕЛИКАЯ ВЕЧЕРНЯ Служба мирским чином
26 февраля́ 2023 г. Недéля о сыропýстная. Прощéное воскресéнье. Воспоминáнiе Адáмова изгнáнiя. Заговенье на Велúкiй пост. Глас 4. Всeнóщное бдéнiе для домáшнего (келéйнаго) совершéнiя состоúт из Велúкой вечéрни, ýтрени, тáкже канóна и пéрваго чáса. Слýжба мiрскúм чúном.
ВЕЛИКАЯ ВЕЧЕРНЯ
Моли́твами святы́х отéц нáших, Гóсподи Iисýсе Хрїстé, Бóже наш, поми́луй нас, ами́нь.
Слáва Тебé, Бóже наш, слáва Тебé.
Царю́ Небéсный, Утéшителю, Дýше И҆́стины, И҆́же вездé сый и вся исполня́яй, Сокрóвище благи́х и жи́зни Подáтелю, прiиди́ и всели́ся в ны, и очи́сти ны от вся́кiя сквéрны, и спаси́, Блáже, Дýши нáша.
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстé, Сы́не Бóжїй, поми́луй нас. Ами́нь.
Гóсподи, поми́луй, (12 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Прїиди́те, поклони́мся Царéви нáшему Бóгу.
Прїиди́те, поклони́мся и припадéм Хрїстý, Царéви нáшему Бóгу.
Прїиди́те, поклони́мся и припадéм Самомý Хрїстý, Царéви и Бóгу нáшему.
Псалом 103, предначинáтельный
Стiхú избрáннiи: Благословѝ, душé моя́, Гóспода./ Благословéн есѝ, Гóсподи./ Гóсподи, Бóже мой, возвели́чился еси́ зелó./ Благословéн есѝ, Гóсподи./ Во исповéданiе и в велелéпоту/ облéклся есѝ. Благословéн есѝ, Гóсподи./ Посредé гор прóйдут вóды./ Ди́вна делá Твоя́, Гóсподи./ Вся премýдростiю сотвори́л есѝ./ Слáва Ти, Гóсподи, сотвори́вшему вся.
[Псалом полностью]Благослови, душé моя, Гóспода, Бóже мой, возвеличился есѝ зелó. Во исповéданiе и в велелéпоту облéклся есѝ. Одея́йся свéтом, яко ри́зою, простирáяй нéбо, яко кóжу. Покрывáяй водáми превы́спренняя Своя́, полагáяй óблаки на восхождéнiе Своé, ходя́й на крилý вéтреню. Творя́й Áнгелы Своя дýхи и слугѝ Своя плáмень óгненный. Основáяй зéмлю на твéрди ея́, не преклони́тся в век вéка. Бéздна, яко ри́за, одея́нiе ея́, на горáх стáнут вóды, от запрещéнiя Твоегó побéгнут, от глáса грóма Твоегó убоя́тся. Восхóдят гóры и нисхóдят поля́ в мéсто, éже основáл есѝ им. Предéл положи́л есѝ, eгóже не прéйдут, нижé обратя́тся покры́ти зéмлю. Посылáяй истóчники в дéбрех, посредé гор прóйдут вóды. Напая́ют вся звéри сéльныя, ждут онáгри в жáжду свою. На тых пти́цы небéсныя привитáют, от среды́ кáменiя дадя́т глас. Напая́яй гóры от превы́спренних Свои́х, от плодá дел Твоих насы́тится земля́. Прозябáяй травý скотóм, и злак на слýжбу человéком, известѝ хлеб от землѝ. И винó весели́т сéрдце человéка, умáстити лицé елéем, и хлеб сéрдце человéка укрепи́т. Насы́тятся древá польскáя, кéдри Ливáнстiи, и҆́хже еси насади́л. Тáмо пти́цы вогнездя́тся, еродíево жили́ще предводи́тельствует и҆́ми. Гóры высóкiя елéнем, кáмень прибéжище зáяцем. Сотвори́л есть лунý во временá, сóлнце познá зáпад свой. Положи́л есѝ тму, и бысть нощь, в нéйже прóйдут вси звéрiе дубрáвнiи. Ски́мни рыкáющiи, восхи́тити и взыскáти от Бóга пи́щу себé. Возсiя́ сóлнце и собрáшася и в лóжах свои́х ля́гут. Изы́дет человéк на дéло своé и на дéланiе своé до вéчера. Яко возвели́чишася делá Твоя, Гóсподи, вся премýдростiю сотвори́л есѝ, испóлнися земля́ твáри Твоея́. Сié мóре вели́кое и прострáнное, тáмо гáди, и҆́мже несть числá, живóтная мáлая с вели́кими, тáмо кораблѝ преплáвают, змiй сей, eгóже создáл есѝ ругáтися eмý. Вся к Тебé чáют, дáти пи́щу им во блáго врéмя. Дáвшу Тебé им соберýт, отвéрзшу Тебé рýку вся́ческая испóлнятся блáгости, отврáщшу же Тебé лицé, возмятýтся, отъи́меши дух их, и исчéзнут, и в персть свою возвратя́тся. Пóслеши Дýха Твоегó, и сози́ждутся, и обнови́ши лицé землѝ. Бýди слáва Госпóдня во вéки, возвесели́тся Госпóдь о дéлех Свои́х, призирáяй на зéмлю, и творя́й ю́ трясти́ся, прикасáяйся горáм, и дымя́тся. Воспою́ Гóсподеви в животé моéм, пою́ Бóгу моемý, дóндеже есмь, да услади́тся Емý бесéда моя, аз же возвеселю́ся о Гóсподе. Да исчéзнут грéшницы от землѝ, и беззакóнницы, я́коже не бы́ти им. Благословѝ, душé моя́, Гóспода. Сóлнце познá зáпад свой. Положи́л еси тму, и бысть нощь. Яко возвели́чишася делá Твоя, Гóсподи, вся премýдростiю сотвори́л есѝ.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебé Бóже. (3 раза)
Гóсподи, поми́луй. (12 раз)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Первая кафизма
Читáем лúбо кафíсму 1-ю (1-ю cтатiю(«Блажéн муж» - 1-й антiфóн.)
[Псалом 1]Блажéн муж, и҆́же не и҆́де на совéт нечести́вых и на путѝ грéшных не ста, и на седáлищи губи́телей не сéде, но в закóне Госпóдни вóля eгó, и в закóне Егó поучи́тся день и нощь. И бýдет яко дрéво насаждéнное при исхóдищих вод, éже плод свой даст во врéмя своé, и лист eгó не отпадéт, и вся, ели́ка áще твори́т, успéет. Не тáко нечести́вiи, не тáко, но яко прах, eгóже возметáет ветр от лицá землѝ. Сегó рáди не воскрéснут нечести́вiи на суд, нижé грéшницы в совéт прáведных. Яко весть Госпóдь путь прáведных, и путь нечести́вых поги́бнет.
[Псалом 2]Вскýю шатáшася язы́цы, и лю́дiе поучи́шася тщéтным? Предстáша цáрiе зéмстiи, и кня́зи собрáшася вкýпе на Гóспода и на Хрїстá Егó. Растóргнем ýзы их и отвéржем от нас и҆́го их. Живы́й на Небесéх посмеéтся им, и Госпóдь поругáется им. Тогдá возглагóлет к ним гнéвом свои́м и я́ростiю Своéю смятéт я́. Аз же постáвлен есмь Царь от Негó над Сióном, горóю святóю Егó, возвещáяй повелéнiе Госпóдне. Госпóдь речé ко Мне: Сын Мой еси Ты, Аз днесь роди́х Тя. Просѝ от Менé, и дам Ти язы́ки достоя́нiе Твоé, и одержáнiе Твоé концы́ землѝ. Упасéши я́ жезлóм желéзным, я́ко сосýды скудéльничи сокруши́ши я́. И ны́не, цáрiе, разумéйте, накажи́теся вси судя́щiи землѝ. Рабóтайте Гóсподеви со стрáхом и рáдуйтеся Емý с трéпетом. Прiими́те наказáнiе, да не когдá прогнéвается Госпóдь и поги́бнете от путѝ прáведнаго, егдá возгори́тся вскóре я́рость Егó. Блажéни вси надéющiися Нань.
[Псалом 3]Гóсподи, что ся умнóжиша стужáющiи ми? Мнóзи востаю́т на мя, мнóзи глагóлют душѝ моéй: несть спасéнiя eмý в Бóзе eгó. Ты же, Гóсподи, Застýпник мой есѝ, слáва моя́ и вознося́й главý мою́. Глáсом мои́м ко Гóсподу воззвáх, и услы́ша мя от горы́ святы́я Своея́. Аз уснýх, и спах, востáх, я́ко Госпóдь застýпит мя. Не убою́ся от тем людéй, óкрест напáдающих на мя. Воскреснѝ, Гóсподи, спасѝ мя, Бóже мой, я́ко Ты порази́л есѝ вся враждýющыя ми всýе: зýбы грéшников сокруши́л есѝ. Госпóдне есть спасéнiе, и на лю́дех Твои́х благословéнiе Твоé.
Лúбо поéм стiхú избрáннiи
БЛАЖЕН МУЖ
Чтец (или хор): Блажéн муж, и҆́же не и҆́де на совéт нечести́вых.
Хор: Аллилýїа, аллилýїа, аллилýїа.
Чтец (или хор): Яко весть Госпóдь путь прáведных, и путь нечести́вых поги́бнет.
Хор: Аллилýїа, аллилýїа, аллилýїа.
Чтец (или хор): Рабóтайте Гóсподеви со стрáхом и рáдуйтеся Емý с трéпетом.
Хор: Аллилýїа, аллилýїа, аллилýїа.
Чтец (или хор): Блажéни вси надéющiися Нань.
Хор: Аллилýїа, аллилýїа, аллилýїа.
Чтец (или хор): Воскреснѝ, Гóсподи, спасѝ мя, Бóже мой.
Хор: Аллилýїа, аллилýїа, аллилýїа.
Чтец (или хор): Госпóдне есть спасéнiе, и на лю́дех Твои́х благословéнiе Твоé.
Хор: Аллилýїа, аллилýїа, аллилýїа.
Чтец: Слáва Ѻтцý и Сы́ну и Святóму Дýху.
Хор: Аллилýїа, аллилýїа, аллилýїа.
Хор: И ны́не и при́сно и во вéки векóв, ами́нь.
Хор: Аллилýїа, аллилýїа, аллилýїа.
Аллилýїа, аллилýїа, аллилýїа, слáва Тебé Бóже. (трúжды)
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
ГОСПОДИ ВОЗЗВАХ, ГЛАС 4
Хор: Гóсподи, воззвáх к Тебé, услы́ши мя./ Услы́ши мя, Гóсподи./ Гóсподи, воззвáх к Тебé, услы́ши мя:/ вонми́ глáсу молéнія моегó,/ внегдá воззвáти ми к Тебé./ Услы́ши мя, Гóсподи.
Хор: Да испрáвится моли́тва моя́,/ я́ко кади́ло пред Тобóю,/ воздея́ніе рукý моéю/ - жéртва вечéрняя./ Услы́ши мя, Гóсподи.
[В приходской практике пропускается до стихир]Положѝ, Гóсподи, хранéнiе устóм мои́м, и дверь ограждéнiя о устнáх мои́х. Не уклонѝ сéрдце моé в словесá лукáвствiя, непщевáти вины́ о гресéх, с человéки дéлающими беззакóнiе, и не сочтýся со избрáнными их. Накáжет мя прáведник ми́лостiю и обличи́т мя, елéй же грéшнаго да не намáстит главы́ моея́, я́ко ещé и моли́тва моя́ во благоволéнiих их. Пожéрты бы́ша при кáмени судiѝ их: услы́шатся глагóли моѝ, я́ко возмогóша. Я́ко тóлща землѝ просéдеся на землѝ, расточи́шася кóсти и҆́х при áде. Я́ко к Тебé, Гóсподи, Гóсподи, óчи моѝ: на Тя уповáх, не отымѝ дýшу мою́. Сохранѝ мя от сéти, ю́же состáвиша ми, и от соблáзн дéлающих беззакóнiе. Падýт во мрéжу свою́ грéшницы: еди́н есмь аз, дóндеже прейдý.
[В приходской практике пропускается до стихир]Глáсом мои́м ко Гóсподу воззвáх, глáсом мои́м ко Гóсподу помоли́хся. Пролiю́ пред Ним молéнiе моé, печáль мою́ пред Ним возвещý. Внегдá исчезáти от менé дýху моемý: и Ты познáл есѝ стезѝ моя́: на путѝ сем, по немýже хождáх, скры́ша сеть мне. Смотря́х одеснýю и возгля́дах, и не бе знáяй менé: поги́бе бéгство от менé, и несть взыскáяй дýшу мою́. Воззвáх к Тебé, Гóсподи, рех: Ты есѝ уповáнiе моé, часть моя́ есѝ на землѝ живы́х. Вонмѝ молéнiю моемý, я́ко смири́хся зелó, избáви мя от гоня́щих мя, я́ко укрепи́шася пáче менé.
На 10 Чтец: Изведù из темнúцы дýшу мою́,// исповéдатися и҆́мени Твоемý.
Стiхúры воскрéсные, глас 4: Животворя́щему Твоемý Крестý,/ непрестáнно клáняющеся, Хрїстé Бóже,/ триднéвное Воскресéнiе Твоé слáвим:/ тем бо обнови́л еси́ истлéвшее человéческое естествó, Всеси́льне,/ и и҆́же на Небесá восхóд обнови́л еси́ нам,// я́ко Еди́н Благ и Человеколю́бец.
Менé ждут прáведницы,// дóндеже воздáси мне.
Стiхúра: Дрéва преслушáнiя запрещéнiе/ разреши́л еси́, Спáсе,/ на дрéве крéстнем вóлею пригвозди́вся,/ и во ад сошéд, Си́льне,/ смéртныя ýзы, я́ко Бог, растерзал еси́./ Тéмже клáняемся éже из мéртвых Твоемý Воскресéнiю,/ рáдостiю вопiю́ще:// Всеси́льне Гóсподи, слáва Тебé.
На 8. Стiх: Из глубины́ воззвáх к Тебé, Гóсподи,// Гóсподи, услы́ши глас мой.
Стiхúра: Вратá áдова сокруши́л еси́, Гóсподи,/ и Твоéю смéртiю смéртное цáрство разруши́л еси́:/ род же человéческiй от истлéнiя свободи́л еси́,/ живóт и нетлéнiе мíру даровáв,// и вéлiю ми́лость.
Да бýдут ýши Твоú// внéмлюще глáсу молéнiя моегó.
И҆́ны стiхúры анатóлiевы: Прiиди́те, воспои́м лю́дiе,/ Спáсово триднéвное востáнiе,/ и҆́мже избáвихомся áдовых нереши́мых уз;/ и нетлéнiе и жизнь вси воспрiя́хом зовýще:/ Распны́йся, и Погребы́йся, и Воскресы́й,/ спаси́ ны Воскресéнiем Твои́м,// Еди́не Человеколю́бче.
На 6. Стiх: Áще беззакóнiя нáзриши, Гóсподи, Гóсподи, кто постоúт?// Яко у Тебé очищéнiе есть.
Стiхúра: Áнгели и человéцы, Спáсе,/ Твоé пою́т триднéвное Востáнiе,/ и҆́мже озари́шася вселéнныя концы́,/ и рабóты врáжiя вси избáвихомся, зовýще:/ Животвóрче Всеси́льне Спáсе,/ спаси́ ны Воскресéнiем Твои́м,// Еди́не Человеколю́бче.
И҆́мене рáди Твоегó потерпéх Тя, Гóсподи, потерпé душá моя́ в слóво Твоé,// уповá душá моя на Гóспода.
Стiхúра: Вратá мéдная стерл еси́,/ и вереи́ сокруши́л еси́, Хрїстé Бóже,/ и род человéческiй пáдшiй воскреси́л еси́./ Сегó рáди соглáсно вопiéм:// Воскресы́й из мéртвых, Гóсподи, слáва Тебé.
На 4. Стiх: От стрáжи ýтреннiя до нóщи, от стрáжи ýтреннiя,// да уповáет Iзрáиль на Гóспода.
Стiхúры Трióди, глас 6: Создáтель мой Госпóдь,/ персть от земли́ приéм мя,/ живонóсным дуновéнiем вдуши́в оживи́,/ и почтé на земли́ начáльствующа ви́димыми все́ми,/ и áнгелом купножи́теля./ Сатанá же льсти́вый,/ сосýд зми́я употреби́в, снéдiю прельсти́,/ и Бóжiя слáвы разлучи́,/ и преиспóднейшей смéрти предадé в зéмлю,/ но я́ко Влады́ка и Благоутрóбен,// пáки воззови́.
Яко у Гóспода мúлость, и мнóгое у Негó избавлéнiе,// и Той избáвит Iзрáиля от всех беззакóнiй eгó.
Стiхúра: Одéжды боготкáнныя совлекóхся окая́нный,/ Твоé Божéственное повелéнiе преслýшав Гóсподи, совéтом врагá,/ и смокóвным ли́ствiем, и кóжными ри́зами ны́не облекóхся:/ пóтом бо осуждéн бых хлеб трýдный снéсти:/ тéрнiе же и волчéц мне принести́,/ земля́ проклятá бысть./ Но в послéдняя лéта воплоти́выйся от Дéвы,// воззвáв мя введи́ пáки в рай.
На 2. Стiх: Хвалúте Гóспода вси язы́цы, похвалúте Егó вси лю́дiе.
Стiхúра:Раю́ всечестны́й, краснéйшая добрóто,/ богоздáнное селéнiе,/ весéлiе некончáемое и наслаждéнiе,/ слáво прáведных, прорóков красотó,/ и святы́х жили́ще,/ шýмом ли́ствiй твои́х Содéтеля всех моли́,/ вратá отвéрсти ми, я́же преступлéнiем затвори́х,/ и сподóбитися дрéва живóтнаго прiя́ти, и рáдости,// ея́же прéжде в тебé наслади́хся.
Яко утвердúся мúлость Егó на нас,// и и҆́стина Госпóдня пребывáет во век.
Стiхúра: Адáм изгнáн бысть из рая́ преслушáнiем,/ и слáдости извéржен, жéнскими глагóлы прельщéнный,/ и наг седи́т, селá, увы́ мне, пря́мо рыдáя./ Тéмже потщи́мся вси врéмя подъя́ти постá,/ послýшающе Евáнгельских предáнiй:/ да си́ми благоугóдни бы́вше Хрїстý,// рая́ жили́ще пáки воспрiи́мем.
Слáва Отцý и Сыну и Святóму Дýху.
Стiхúра Трióди, глас 6: Сéде Адáм пря́мо рая́,/ и свою́ наготý рыдáя плáкаше:/ увы́ мне, прéлестiю лукáвою увещáнну бы́вшу/ и окрáдену и слáвы удалéну!/ Увы́ мне, простотóю нáгу, ны́не же недоумéнну!/ Но о раю́, ктомý твоея́ слáдости не наслаждýся:/ ктомý не узрю́ Гóспода и Бóга моегó и Создáтеля:/ в зéмлю бо пойдý, от нея́же и взят бых./ Ми́лостиве щéдрый, вопiю́ Ти:// поми́луй мя пáдшаго.
И ны́не и прúсно и во вéки векóв, амúнь.
Догмáтик. Глас 4: И҆́же Тебé рáди, богоотéц прорóк Давíд,/ пéсненно о Тебé провозгласи́,/ вели́чiя Тебé сотвóршему:/ предстá Цари́ца одеснýю Тебé./ Тя бо Мáтерь, ходáтаицу животá показá,/ без Отцá из Тебé вочеловéчитися благоволи́вый Бог:/ да Свой пáки обнови́т óбраз, истлéвшiй страстьми́,/ и заблýждшее горохи́щное обрéт овчá,/ на рáмо воспрiи́м, ко Отцý принесéт,/ и Своемý хотéнiю, с небéсными совокупи́т си́лами,/ и спасéт Богорóдице мiр,// Хрїстóс имéяй вéлiю и богáтую ми́лость.
СВЕТЕ ТИХИЙ
Хор: Свéте Ти́хiй святы́я слáвы Безсмéртнаго Ѻтцá Небéснаго, Святáго, Блажéннаго, Iисýсе Хрїстé! Пришéдше на зáпад сóлнца, ви́девше свет вечéрнiй, поéм Ѻтцá, Сы́на и Святáго Дýха, Бóга. Достóин есѝ во вся временá пет бы́ти глáсы преподóбными, Сы́не Бóжiй, живóт дая́й; тéмже мiр Тя слáвит.
ПРОКИМЕН ВОСКРЕСНЫЙ
Чтец: Прокíмен, глас шесты́й: Госпóдь воцари́ся, в лéпоту облечéся.
Хор: Госпóдь воцарúся,/ в лéпоту облечéся. (Пс.92:1А)
Чтец: Облечéся Госпóдь в си́лу и препоя́сася. (Пс.92:1Б)
Хор: Госпóдь воцарúся,/ в лéпоту облечéся.
Чтец: И҆́бо утверди́ вселéнную, я́же не подви́жится. (Пс.92:1В)
Хор: Госпóдь воцарúся,/ в лéпоту облечéся.
Чтец: Дóму Твоемý подобáет святы́ня, Гóсподи, в долготý днiй.(Пс.92:2Б)
Хор: Госпóдь воцарúся,/ в лéпоту облечéся.
Чтец: Госпóдь воцари́ся.
Хор: В лéпоту облечéся.
Гóсподи, поми́луй. (40 раз)
Слáва Отцý и Сыну и Святóму Дýху, и ныне и присно и во вéки векóв, аминь.
СПОДОБИ ГОСПОДИ
Хор: Сподóби, Гóсподи, в вéчер сей без грехá сохрани́тися нам./ Благословéн есѝ, Гóсподи Бóже ѻтéц нáших,/ и хвáльно и прослáвлено и҆́мя Твоé во вéки, ами́нь.
Бýди, Гóсподи, ми́лость Твоя́ на нас, я́коже уповáхом на Тя./ Благословéн есѝ, Гóсподи, научѝ мя оправдáнiем Твои́м./ Благословéн есѝ, Влады́ко, вразумѝ мя оправдáнiем Твои́м./ Благословéн есѝ, Святы́й, просветѝ мя оправдáнiи Твои́ми.
Гóсподи, ми́лость Твоя́ во век, дел рукý Твоéю не прéзри./ Тебé подобáет хвалá. Тебé подобáет пéнiе,/ Тебé слáва подобáет, Ѻтцý и Сы́ну и Святóму Дýху, ны́не и при́сно и во вéки векóв. Ами́нь.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
ЛИТИЯ
Слáва Отцý и Сыну и Святóму Дýху.
Стiхúра Трióди, глас 6: Cóлнцe лучи́ cкры,/ лунá co звeздáми в крoвь прeлoжи́cя,/ го́ры ужаcóшаcя, хóлми вocтрeпeтáша,/ eгдá рай заключи́cя./ Иcхoдя́ Адáм рукáма бiя́ в лицé, глагóлашe:// Ми́лocтивe, пoми́луй мя пáдшагo.
И ныне и прúсно и во вéки векóв. Амúнь.
Богорóдичен, Трióди, глас тóйже: Тáинcтвeннo вocпeвáeм Тя Бoгoрóдицe Марíe,/ яви́лаcя бo ecи́ прecтóл вeли́кагo Царя́,/ ceнь вcecвятáя, нeбéc ши́ршая,/ хeрувíмcкая кoлecни́ца,/ вы́шшая жe ceрафíмoв, чeртóг cлáвы:/ из Тeбé бo прóйдe вoплoти́выйcя вceх Бoг.// Тoгó мoли́ cпаcти́cя душáм нáшим.
Гóсподи, поми́луй. (40 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
СТИХИРЫ НА СТИХОВНЕ
Стiхúра воскрéсная, глас 4: Гóсподи, восшéд на Крест,/ прáдеднюю нáшу кля́тву потреби́л еси́,/ и сошéд во ад,/ я́же от вéка ýзники свободи́л еси́,/ нетлéнiе дáруя человéческому рóду,/ сегó рáди пою́ще слáвим// Животворя́щее и Спаси́тельное Твоé Востáнiе.
Стiх: Госпóдь воцарúся,/ в лéпоту облечéся.
И҆́ны по алфавúту, глас 4: Повéшен на дрéве, Еди́не Си́льне,/ всю тварь поколебáл еси́:/ положéн же во грóбе,/ живýщiя во гробéх воскреси́л еси́,/ нетлéнiе и жизнь дáруя человéческому рóду./ Тéмже пою́ще, слáвим// триднéвное Твоé Востáнiе.
Стiх: И҆́бо утвердú вселéнную,/ я́же не подвúжется.
Лю́дiе беззакóннiи, Хрїстé,/ Тебé, предáвше Пiлáту, распя́ти осуди́ша,/ неблагодáрнiи о Благодéтеле яви́вшеся./ Но вóлею претерпéл еси́ погребéнiе:/ самовлáстно воскрéсл еси́ триднéвно, я́ко Бог,// дáруя нам безконéчный живóт, и вéлiю ми́лость.
Стiх: Дóму Твоемý подобáет святы́ня, Гóсподи,/ в долготý днiй.
Со слезáми жены́ дошéдша грóба, Тебé искáху,/ не обрéтша же, рыдáюща с плáчем вопiю́ща глагóлаху:/ увы́ нам, Спáсе наш Царю́ всех,/ кáко укрáден был еси́;/ кóе же мéсто держи́т Живонóсное Тéло Твоé?/ Áнгел же к ним отвещавáше, не плáчите, глагóлет,/ но шéдша проповéдите, я́ко воскрéсе Госпóдь,// подая́ нам рáдость, я́ко Еди́н Благоутрóбен.
Слáва Ѻтцý и Сы́ну и Святóму Дýху.
Стiхúра Трióди, глас 6: Изгнáн бысть Адáм из рая́ снéдию,/ тéмже и седя́ пря́мо сегó рыдáше,/ стеня́ умили́тельным глáсом, и глагóлаше:/ увы́ мне, что пострадáх окая́нный аз:/ еди́ну зáповедь преступи́х Влады́чню,/ и благи́х вся́ческих лиши́хся!/ Раю́ святéйшiй, менé рáди насаждéнный быв,/ и Éвы рáди затворéнный,/ моли́ тебé сотвóршаго, и менé создáвшаго,/ я́ко да твои́х цветóв испóлнюся!/ Тéмже и к немý Спас:/ Моемý создáнiю не хощý поги́бнути,/ но хощý семý спасти́ся,/ и в познáнiе и́стины прiити́,// я́ко грядýщаго ко Мне не изгоня́ю вон.
И ны́не и прúсно и во вéки векóв, амúнь.
Богорóдичен воскрéсный, глас 6 (по глáсу «Слáвы»): Творéц и Избáвитель мой Пречи́стая,/ Хрїстóс Госпóдь из Твои́х ложéсн прошéд,/ в мя оболки́йся,/ пéрвыя кля́твы Адáма свободи́./ Тéмже Ти Всечи́стая,/ я́ко Бóжiи Мáтери же и Дéве,/ вои́стинну вопiéм немóлчно:/ рáдуйся áнгельски, рáдуйся Влады́чице,/ предстáтельство и покрóве,// и спасéнiе душ нáших.
Молитва святаго Симеона Богоприимца
Ны́не отпущáеши рабá Твоегó, Влады́ко,/ по глагóлу Твоемý, с ми́ром;/ я́ко ви́деста óчи моѝ спасéнiе Твоé,/ éже есѝ уготóвал пред лицéм всех людéй,/ свет во откровéнiе язы́ков,// и слáву людéй Твои́х Iзрáиля.
Трисвятое по Отче наш
Святы́й Бóже, Святы́й Крéпкiй, Святый Безсмéртный, поми́луй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнія нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстé, Сы́не Бóжiй, поми́луй нас. Ами́нь.
Тропáрь, глас 4: Богорóдице Дéво, рáдуйся,/ Благодáтная Марíе, Госпóдь с Тобóю:/ благословéна Ты в женáх/ и благословéн Плод чрéва Твоегó,// яко Спáса родилá есѝ душ нáших. (Трúжды)
Бýди и҆́мя Госпóдне благословéно от ны́не и до вéка. (Трúжды)
Псалом 33
Благословлю́ Гóспода на вся́кое врéмя,/ вы́ну хвалá Егó во устéх мои́х./ О Гóсподе похвáлится душá моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм и҆́мя Егó вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицá вáша не постыдя́тся./ Сей ни́щiй воззвá, и Госпóдь услы́ша и҆̀,/ и от всех скорбéй егó спасé и҆̀./ Ополчи́тся Áнгел Госпóдень óкрест боя́щихся Егó,/ и избáвит их./ Вкуси́те и ви́дите, я́ко благ Госпóдь;/ блажéн муж, и҆́же уповáет нань./ Бóйтеся Гóспода, вси святíи Егó,/ яко несть лишéнiя боя́щымся Егó./ Богáтiи обнищáша и взалкáша,/ взыскáющiи же Гóспода не лишáтся вся́каго блáга.[B приходской практитке пропускается]/ Прiиди́те, чáда, послýшайте менé,/ стрáху Госпóдню научý вас./ Кто есть человéк хотя́й живóт,/ любя́й дни ви́дети блáги;/ Удержѝ язык твой от зла,/ и устнé твоѝ, éже не глагóлати льсти./ Уклони́ся от зла и сотворѝ блáго,/ взыщѝ ми́ра, и поженѝ и҆̀./ Ѻ́чи Госпóдни на прáведныя,/ и ýши Егó в моли́тву их./ Лицé же Госпóдне на творя́щiя злáя,/ еже потреби́ти от землѝ пáмять их./ Воззвáша прáведнiи, и Госпóдь услы́ша их,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я́ Госпóдь./ Храни́т Госпóдь вся кóсти их,/ ни еди́на от них сокруши́тся./ Смерть грéшников лютá,/ и ненави́дящiи прáведнаго прегрешáт./ Избáвит Госпóдь дýши раб Своих,/ и не прегрешáт вси уповáющiи на Негó.
И глаголи ýтреню