ОБРЕЗАНИЕ ГОСПОДНЕ. Святителя Василия Великаго. Суббота перед Богоявлением. УТРЕНЯ. КАНОН.
14 января́ 2022 г. Обрéзанiе Госпóдне. Суббóта пéред Богоявлéнiем. Святúтеля Васíлiя Велúкаго, архiепúскопа Кесарíи Каппадокíйской. Прáздничная слýжба для домáшнего (келéйнаго) совершéнiя. Послéдованiе ýтрени (канóн)
Начало зри здесь ( великая вечéрня) и здесь ( ýтреня)
ПСАЛОМ ИЗБРАННЫЙ
Услы́шите сiя́ вси язы́цы, внуши́те вси́, живýщiи по вселéнней. Устá моя́ возглагóлют премýдрость, и поучéнiе сéрдца моегó рáзум./ Прiиди́те, чáда, послýшайте менé, стрáху Госпóдню научý вас./ Благовести́х прáвду в цéркви вели́цей./ И҆́стину Твою́ и спасéнiе Твоé рех./ Повéм И҆́мя Твоé брáтiи моéй, посредé цéркве воспою́ Тя./ Услы́шати ми глас хвалы́ Твоея́ и повéдати вся чудесá Твоя́./ Гóсподи, возлюби́х благолéпiе дóму Твоегó, и мéсто селéнiя слáвы Твоея́./ Возненави́дех цéрковь лукáвнующих, и с нечести́выми не ся́ду./ Я́ко сохрани́х пути́ Госпóдни и не нечéствовах от Бóга моегó./ Устá прáведнаго поучáтся премýдрости, и язы́к егó возглагóлет суд./ Прáвда Егó пребывáет в век вéка./ Свящéнницы Твои́ облекýтся прáвдою, и преподóбнiи Твои́ возрáдуются.// Блажéни живýщiи в домý Твоéм, в вéки векóв восхвáлят Тя.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебé Бóже. (3 раза)
Хор: Величáем Тя,/ преподóбне óтче Васíлiе,/ и чтим святýю пáмять твою́,/ ты бо мóлиши о нас // Хрїстá Бóга нáшего.
Гóсподи, поми́луй. (12 раз)
Седáльны прáздника по полiелéе, глас 8: Си́лою словéс Божéственных éреси низложи́л еси́ мрáчныя,/ вся шатáнiя Евнóмiева погрузи́л еси́,/ человéком бо Дýха Бóга бы́ти проповéдал еси́/ и рук воздéнiем враги́ умертви́л еси́./ Все прогнáл еси́ Савéллiево служéнiе,/ вся же мудровáнiя Нестóрiева упраздни́л еси́,/ святи́телю Васíлiе./ Моли́ся Хрїстý Бóгу/ прегрешéнiй оставлéнiе даровáти// прáзднующим любóвiю святýю пáмять твою́.
Слáва Отцý и Сыну и Святóму Дýху.
Благодáть словéс твои́х Божéственных и догмáт высотá тáинственная/ Божéственнаго нам бысть восхождéнiя лéствица:/ Дýха бо, óтче, стяжáвый трубý,/ тóю проповéдал еси́ Божéственная учéнiя./ Тéмже и на мéсте всели́лся еси́ злáчне,/ мзды пóдвигов твои́х прiéм, преподóбне iерáрше Васи́лiе./ Моли́ся Хрїстý Бóгу/ прегрешéнiй оставлéнiе даровáти// прáзднующим любóвiю святýю пáмять твою́.
И ныне и прúсно и во вéки векóв. Амúнь.
Вся́ческих Влады́ка и Творéц, из пречи́стыя утрóбы Твоея́ плоть прiéмый,/ Предстáтельницу Тя показá человéком, Всенепорóчная./ Сегó рáди вси к Тебé прибегáем,/ очищéнiя прегрешéнiй прося́ще, Влады́чице,/ и вéчнующiя избáвитися мýки,/ и вся́каго озлоблéнiя лю́таго мiродéржца./ Сегó рáди вопiéм Ти:/ Моли́ся Твоемý Сы́ну и Бóгу/ прегрешéнiй оставлéнiе даровáти// покланя́ющимся вéрою всесвятóму Рождествý Твоемý.
СТЕПЕННА, ГЛАС 4
1 АНТИФОН
Хор: От ю́ности моея́/ мнóзи бóрют мя стрáсти,/ но Сам мя заступú// и спасú, Спáсе мой. (Двáжды)
Ненави́дящiи Сióна,/ посрами́теся от Гóспода,/ я́ко травá бо огнéм// бýдете изсóхше. (Двáжды)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Святы́м Дýхом/ вся́ка душá живи́тся,/ и чистотóю возвышáется,// светлéется Трóйческим еди́нством, священнотáйне. (Двáжды)
ПРОКИМЕН И ЧТЕНИЕ ЕВАНГЕЛИЯ
Чтец: Прокíмен, глас четвéртый. Устá моя́ возглагóлют премýдрость,/ и поучéнiе сéрдца моегó рáзум. (Пс.48:4)
Хор: Устá моя́ возглагóлют премýдрость,/ и поучéнiе сéрдца моегó рáзум.
Чтец: Услы́шите сiя́, вси язы́цы,/ внуши́те, вси, живýщiи по вселéнней. (Пс.48:2)
Хор: Устá моя́ возглагóлют премýдрость,/ и поучéнiе сéрдца моегó рáзум.
Чтец: Устá моя́ возглагóлют премýдрость.
Хор: И поучéнiе сéрдца моегó рáзум.
Чтец: Гóсподу помóлимся.
Хор: Гóсподи, помúлуй.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода.(Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
Гóсподи, помилуй. (3раза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
ЕВАНГЕЛИЕ
От Iоáнна Святáго Евáнгелiя чтéнiе.
Хор: Слáва Тебé, Гóсподи, слáва Тебé.
(Ин.зач.36): Речé Госпóдь ко пришéдшим к Немý Iудéем: Аз eсмь дверь. Мнóю áще кто вни́дет, спасéтся; и вни́дет, и изы́дет, и пáжить обря́щет. Тать не прихóдит, рáзве да укрáдет и убиéт и погуби́т: Аз прiидóх, да живóт и́мут, и ли́шше и́мут. Аз eсмь пáстырь дóбрый: пáстырь дóбрый дýшу свою́ полагáет за óвцы: А наéмник, и́же несть пáстырь, eмýже не суть óвцы своя́, ви́дит вóлка грядýща, и оставля́ет óвцы, и бéгает. И волк расхи́тит их, и распýдит óвцы. А наéмник бежи́т, я́ко наéмник eсть, и неради́т о oвцáх. Аз eсмь пáстырь дóбрый, и знáю Моя́, и знáют Мя Моя́. Якоже знáет Мя Oтéц, и Аз знáю Oтцá, и дýшу Мою́ полагáю за óвцы. И и́ны óвцы и́мам, я́же не суть от дворá сегó, и ты́я Ми подобáет привести́, и глас Мой услы́шат, и бýдет eди́но стáдо, и eди́н Пáстырь.
[Русский синодальный перевод]Я есмь дверь: кто войдет Мною, тот спасется, и войдет, и выйдет, и пажить найдет. Вор приходит только для того, чтобы украсть, убить и пажить найдет. Вор приходит только для того, чтобы украсть, убить и погубить. Я пришел для того, чтобы имели жизнь и имели с избытком. Я есмь пастырь добрый: пастырь добрый полагает жизнь свою за овец. А наемник, не пастырь, которому овцы не свои, видит приходящего волка, и оставляет овец, и бежит; и волк расхищает овец, и разгоняет их. А наемник бежит, потому что наемник, и нерадит об овцах. Я есмь пастырь добрый; и знаю Моих, и Мои знают Меня. Как Отец знает Меня, так и Я знаю Отца; и жизнь Мою полагаю за овец. Есть у Меня и другие овцы, которые не сего двора, и тех надлежит Мне привести: и они услышат голос Мой, и будет одно стадо и один Пастырь.(Ин.10:9-16)
Хор: Слáва Тебé, Гóсподи, слáва Тебé.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моé. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх роди́ мя мáти моя. Се бо и҆́стину возлюби́л еси́, безвéстная и тáйная премýдрости Твоея яви́л ми еси́. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отврати́ лицé Твоé от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéнiя Твоегó, и Дýхом Влады́чним утверди́ мя. Научý беззакóнныя путéм Твоим, и нечести́вiи к Тебé обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажи́, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Слáва Ѻтцý и Сы́ну и Святóму Дýху.
глас 6: Моли́твами святи́теля Васíлiя,/ Ми́лостиве, очи́сти// мнóжество согрешéнiй нáших.
И҆ ны́не и прúсно и во вéки векóв. Амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моé. (Пс.50:3)
Стiхúра cвятúтеля, глас 6: Излiя́ся благодáть во устнáх твои́х, преподóбне óтче,/ и был еси́ пáстырь Хрїстóвы Цéркве,/ учá словéсныя óвцы/ вéровати в Трóицу Единосýщную// во Еди́ном Божествé.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ПРАЗДНИКА, ГЛАС 2
(совмещенный с канóном Святúтеля Васíлiя Велúкаго, глас 2)
ПЕСНЬ 1
Iрмóс: Гряди́те, лю́дiе,/ пои́м песнь Хрїстý Бóгу,/ раздéльшему мóре и настáвльшему лю́ди,/ я́же изведé из рабóты еги́петскiя,// я́ко прослáвися. (Двáжды)
Хор (припéв): Слáва Тебé, Бóже наш, слáва Тебé.
Чтец (тропáрь): Осмери́ца дней, нося́щая óбраз бýдущаго,/ Твоéю, Хрїстé, просвещáется и освящáется вóльною нищетóю,// в сей бо закóнно обрéзался еси́ плóтiю. (Двáжды)
Хор: Слáва Тебé, Бóже наш, слáва Тебé.
Чтец: Обрéзанiе прiéмлет осмоднéвное Хрїстóс Своегó рождествá,/ и сегó днесь сень спря́тает,// свет возсiявáя нóвыя благодáти. (Двáжды)
Канон св. Василия, глас 2
Хор: Святúтелю óтче Васíлiе, молù Бóга о нас.
Чтец: Твоемý глáсу подобáше прiити́, Васíлiе, начáти хотя́щим хвалы́ твоя́,// но, óтче, мольбý прiéм, благодáть подавáй незави́стно нам.(Двáжды)
Хор: Святúтелю óтче Васíлiе, молù Бóга о нас.
Чтец: Добродéтелей ты жестóкiй шéствовал еси́ путь,/ в глáдкiй дости́гл еси́ и несопроти́вный Небéсный восхóд// и всем яви́лся еси́ óбраз, Васíлiе.(Двáжды)
Хор: Святúтелю óтче Васíлiе, молù Бóга о нас.
Чтец: Страстнóе взыгрáнiе, томя́щее плоть, любомýдрiя желáнiем наказáл еси́,/ тéмже в нетлéнных водворя́ешися Цáрствiих,// óтче Васíлiе.
Хор: Святúтелю óтче Васíлiе, молù Бóга о нас.
Чтец: Душéвныя стрáсти благопотрéбно, Васíлiе,/ вкýпе же и телéсныя, духóвным посéкл еси́ мечéм,// себé же Влады́це жéртву принéсл еси́.
Хор: Слáва Отцý и Сы́ну и Святóму Дýху.
Тропáрь: Ты, быв неизречéнных таи́нник, Васíлiе,/ Хрїстóву Цáрствiю тайнонаучи́л еси́, свящéнне óтче,// я́ве Трóйческiй свет облистáл еси́ нам.
Хор: И ны́не и прúсно и во вéки векóв. Амúнь.
Богорóдичен: Кто изрещи́ Твоé по достóинству возмóжет, éже пáче слóва зачáтiе? Бóга бо родилá еси́ плóтiю, Всечи́стая,// нам я́вльшася Спáса и Гóспода.
Катавáсiи Богоявлéнiя (глас 2): Глубины́ откры́л есть дно/ и сýшею Своя́ влечéт,/ в ней покры́в проти́вныя,/ крéпкiй во бранéх Госпóдь,// я́ко прослáвися.
Шéствует морскýю волня́щуюся бýрю,/ сýшу áбiе Iзрáиль я́вльшуюся./ Чермны́й же понт тристáты еги́петскiя покры́ кýпно,/ водостлáнен гроб,// си́лою крéпкою десни́цы Влады́чни.
ПЕСНЬ 3
Iрмóс: Утверди́ нас в Тебé, Гóсподи,/ Дрéвом умерщвлéй грех,/ и страх Твой всади́// в сердцá нас, пою́щих Тя. (Двáжды)
Хор: Слáва Тебé, Бóже наш, слáва Тебé.
Чтец: Слóво воплóщшееся Пресýщественное в престáтiе закóна обрéзася,// начáток же Божéственныя благодáти и жи́зни нетлéнныя нам подадé.(Двáжды)
Хор: Слáва Тебé, Бóже наш, слáва Тебé.
Чтец: Закóна исполни́тель, не я́ко сопроти́вен Бóгу сый, Хрїстóс воплоти́выйся показáся// и сподóбися вóлею обрéзатися осмоднéвен. (Двáжды)
Глас 2
Хор: Святúтелю óтче Васíлiе, молù Бóга о нас.
Чтец: Спритечé Хрїстóву и спросiя́ пáмять твоя́, óтче, Рождествý,// Егóже несказáнное тáинство твои́ми учéньми я́ве сотвори́л еси́.(Двáжды)
Хор: Святúтелю óтче Васíлiе, молù Бóга о нас.
Чтец: Стрáхом Госпóдним утверждáем, начáло бо мýдрости сей есть,// любóвiю лýчшею впери́лся еси́ премýдрости, о Васíлiе.(Двáжды)
Хор: Святúтелю óтче Васíлiе, молù Бóга о нас.
Чтец: Наказáнiя быв вся́каго испóлнен,/ не тóкмо дóльнаго и попирáемаго, мнóго же пáче лýчшаго,// показáлся еси́ мíру свет, Васíлiе.(Двáжды)
Хор: Слáва Отцý и Сы́ну и Святóму Дýху.
Тропáрь: Васíлiе премýдре, вшел еси́ дея́нiем,/ и дея́нiе вшéствiе видéнiя Божéственнейшаго показáл еси́,// и сýщих рáзуму научи́лся еси́ я́ве.
Хор: И ны́не и прúсно и во вéки векóв. Амúнь.
Богорóдичен: Безсéменно во чрéве Бóга зачалá еси́/ и раждáеши несказáнно воплощéнна,// на Негóже зрéти не смéют, Чи́стая, Небéсных си́лы, Приснодéво.
Катавáсiи Богоявлéнiя (глас 2): Крéпость дая́й царéм нáшим Госпóдь/ и рог помáзанных Свои́х вознося́й/ от Дéвы раждáется, грядéт же ко Крещéнiю./ Томý, вéрнiи, возопiéм:// несть свят, я́ко Бог наш.
Ели́цы дрéвних изреши́хомся сéтей/ брáшен львов, сотрéнных членóвными,/ рáдуимся и разшири́м устá, слóво плетýще от словéс сладкопéнiя,// и́мже к нам наслаждáется даровáнiй.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк прáздника, глас 3: Всех Госпóдь обрéзанiе терпи́т/ и человéческая прегрешéнiя, я́ко Благ, обрéзует,/ даéт спасéнiе днесь мíру./ Рáдуется же в Вы́шних и Создáтелев iерáрх,// и светонóсный, Божéственный таи́нник Хрiстóв Васíлiй.
Седáлен святúтеля Васíлiя, глас 8: Премýдрости слóва навы́к и писáнiе закóна отложи́в,/ всем проповéдал еси́ благодáти слóво/ и душ скрижáли углáдил еси́ словесы́ твои́ми,/ в ни́хже начертáл еси́ Божéственная учéнiя./ Тéмже и мрак прошéд óблаком покрóва телесé,/ и просiя́л еси́ дýхом, святи́телю Васíлiе./ Моли́ Хрiстá Бóга/ грехóв оставлéнiе подáти// чтýщим любóвiю святýю пáмять твою́. (Двáжды)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Седáлен прáздника, глас 4: Я́ко Сый бéздна человеколю́бiя,/ одéялся еси́, Влады́ко, в зрак рáбiй/ и плóтiю обрéзался еси́,// дáруя всем человéком вели́кую Твою́ ми́лость.
ПЕСНЬ 4
Iрмóс: Услы́шах, Гóсподи,/ слух Твоегó смотрéнiя/ и прослáвих Тя,// Еди́не Человеколю́бче. (Двáжды)
Хор: Слáва Тебé, Бóже наш, слáва Тебé.
Чтец: Обрéзанiе престá, отнéлеже Хрiстóс вóлею обрéзася,// язы́к мнóжество спасáя благодáтiю. (Двáжды)
Хор: Слáва Тебé, Бóже наш, слáва Тебé.
Чтец: Бýдущаго непрестáнную осмáго вéка жизнь изображáет,// в ню́же Влады́ка обрéзася плóтiю. (Двáжды)
Глас 2
Хор: Святúтелю óтче Васíлiе, молù Бóга о нас.
Чтец: Украшáется я́коже Рождествóм Хрiстóва невéста Цéрковь,// тáко и пáмятiю твоéю, всеблажéнне. (Двáжды)
Хор: Святúтелю óтче Васíлiе, молù Бóга о нас.
Чтец: Непребори́м яви́лся еси́, по Бóзе боря́, Васíлiе,// во всех Тогó повелéнiю покаря́яся. (Двáжды)
Хор: Святúтелю óтче Васíлiе, молù Бóга о нас.
Чтец: Цéркви подадéся от Бóга ограждéнiе и стенá твердá,// Васíлiе всеблажéнне. (Двáжды)
Хор: Слáва Отцý и Сы́ну и Святóму Дýху.
Тропáрь: Сопротивобóжным сéчиво ты секáтельное// и огнь, поядáяй прéлесть, яви́лся еси́, óтче Васíлiе.
Хор: И ны́не и прúсно и во вéки векóв. Амúнь.
Богорóдичен: Мóлим Тя, Чи́стая,/ я́же Бóга безсéменно зачéнши,// при́сно моли́ти за рабы́ Твоя́.
Катавáсiи Богоявлéнiя (глас 2): Услы́шах, Гóсподи, глас Твой, егóже рекл еси́,/ глас вопiю́щаго в пусты́ни,/ я́ко возгремéл еси́ над водáми мнóгими,/ Твоемý свидéтельствуяй Сы́ну,/ весь быв сошéдшаго Дýха, возопи́:// Ты еси́ Хрiстóс, Бóжiя мýдрость и си́ла.
Огнéм очи́щся тáйнаго зрéнiя,/ поя́ прорóк человéков новодéйство,/ возглашáет глас, Дýхом плéщущ,/ воплощéнiе явля́ющ Неизречéнна Слóва,// И́мже си́льных держáвы сотрóшася.
ПЕСНЬ 5
Iрмóс: Свéта Подáтелю/ и векóв Твóрче, Гóсподи,/ во свéте Твои́х повелéнiй настáви нас,// рáзве бо Тебé, инóго бóга не знáем. (Двáжды)
Хор: Слáва Тебé, Бóже наш, слáва Тебé.
Чтец: Ты, от Дéвы Мáтере несказáнно прошéд, Гóсподи,/ и в человéческiй не не сподóбился еси́ одéятися óбраз,// я́ко Младéнец закóнно закóн испóлнил еси́. (Двáжды)
Хор: Слáва Тебé, Бóже наш, слáва Тебé.
Чтец: Нóщи уподóбися, я́ко сень закóнную лю́бящи Iзрáиля, Рóждшая,// из Нея́же облистáвшiй Свет мíра, Хрiстóс, яви́ся. (Двáжды)
Глас 2
Хор: Святúтелю óтче Васíлiе, молù Бóга о нас.
Чтец: Вóдит вои́стинну сугýб Цéрковь прáздник днесь обрéзанiя,/ я́ко младéнца Влады́ки, я́вльшагося на земли́,// и пáмять рабá, мýдра и треблажéнна. (Двáжды)
Хор: Святúтелю óтче Васíлiе, молù Бóга о нас.
Чтец: Непостижи́мый свет почи́в в тебé, преподóбне,/ пресвéтлу свещý мíру тя показá Хрiстóс,// тéмже пáмять твою́ поéм, Васíлiе.(Двáжды)
Хор: Святúтелю óтче Васíлiе, молù Бóга о нас.
Чтец: Всетéмно напи́санное в Сiнáи бытié Моисéем,/ ты, сказу́я от Божéственных сокрóвищ,// начертáл еси́ всем, преблажéнне Васíлiе. (Двáжды)
Хор: Слáва Отцý и Сы́ну и Святóму Дýху.
Тропáрь: Ни законополóжник Моисéй, ни пéрвее закóна Ióсиф бысть,/ и́же по тебé пи́щи пшеницомéритель:// Божéственныя бо плóти сам раздроби́тель яви́лся еси́, Васíлiе.
Хор: И ны́не и прúсно и во вéки векóв. Амúнь.
Богорóдичен: Тебé, рóждшей Хрiстá, всех Содéтеля, зовéм:/ рáдуйся, Чи́стая, рáдуйся, Свет возсiя́вшая нам,// рáдуйся, вмести́вшая Бóга Невмести́маго.
Катавáсiи Богоявлéнiя (глас 2): Iисýс, животá Начáльник,/ разреши́ти осуждéнiе грядéт Адáма первоздáннаго,/ очищéнiй же, я́ко Бог, не трéбуя,/ пáдшаго очищáет во Iордáне,/ в нéмже враждý уби́в,// преимýщ всяк ум мир дáрует.
Врагá тéмнаго и осквернéннаго я́да очищéнiем Дýха измовéни,/ к нóвой пристáхом неблáзненной стези́,/ водя́щей в непристýпную рáдость, еди́нем пристýпну,// и́мже Бог примири́ся.
ПЕСНЬ 6
Iрмóс: Бéздна мя мнóга грехóвная окружáет,/ и вопiю́ Ти, прорóка подражáяй:// от тли мя, Гóсподи, возведи́.(Двáжды)
Хор: Слáва Тебé, Бóже наш, слáва Тебé.
Чтец: Прiя́т конéц закóн, отнéлеже Хрiстóс, младéнствовав,/ исполни́тель закóна Сый, обрéзанiе воспрiя́т// и разреши́ закóнную кля́тву. (Двáжды)
Хор: Слáва Тебé, Бóже наш, слáва Тебé.
Чтец: Суббóтство, обрéзанiе же шатáнiя еврéйскаго/ я́вльшагося Хрiстá мановéнiем престá,// и возсiя́ благодáти веснá. (Двáжды)
Глас 2
Хор: Святúтелю óтче Васíлiе, молù Бóга о нас.
Чтец: Напитáл еси́ дýши, тáющiя глáдом, ни́щих оби́льно// и áлчущих сердцá вся́каго испóлнил еси́, Васíлiе, Божéственнаго весéлiя. (Двáжды)
Хор: Святúтелю óтче Васíлiе, молù Бóга о нас.
Чтец: Напитáл еси́ богáтно áлчущiя пи́щею Небéсною:/ хлеб бо Áнгельскiй есть слóво твоé, Васíлiе,// и́мже изря́ден пшеницодáвец был еси́.(Двáжды)
Хор: Святúтелю óтче Васíлiе, молù Бóга о нас.
Чтец: Собрáл еси́ пчéльный, Васíлiе, люботрýдно добродéтели вся́кiя цвет// и, худóг быв, в ни́хже ублажáешися. (Двáжды)
Хор: Слáва Отцý и Сы́ну и Святóму Дýху.
Тропáрь: Потщáлся еси́ мíра отлучи́тися и с Бóгом пожи́ти,/ тéмже нестоя́тельная и тлéнная, всеблажéнне Васíлiе, остáвль,// пребывáющая, я́ко мудр, стяжáл еси́.
Хор: И ны́не и прúсно и во вéки векóв. Амúнь.
Богорóдичен: Спаси́ от бед рабы́ Твоя́, Богорóдице,/ я́ко вси по Бóзе к Тебé прибегáем,// я́ко к Неруши́мей Стенá и Предстáтельству.
Катавáсiи Богоявлéнiя (глас 2): Глас Словесé, свети́льник Свéта,/ денни́ца Сóлнца, Предтéча в пусты́ни, -/ покáйтеся! - всем вопiéт лю́дем, - и предочи́ститеся:/ се бо предстои́т Хрiстóс,// от тли мiр избавля́яй.
Вожделéннаго я́вствова со всеблажéнным глáсом Отéц,/ Егóже из чрéва отры́гну./ Ей, - глагóлет, - Сей соестéствен Сын,/ Сый светозáрен, произни́че из человéча рóда,// Слóво же моé жи́во, и Человéк промышлéнiем.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк Васíлiя Велúкаго, глас 4: Яви́лся еси́ основáнiе непоколеби́мое Цéркве,/ подая́ всем некрадóмое госпóдьство человéком,/ запечатлéя твои́ми велéньми,// небоявлéнне Васíлiе преподóбне.
Íкос: Целомýдрiя чáша, устá премýдрости/ и степéнь учéнiй, Васíлiй Вели́кiй всем облистáет мы́сленно./ Прiиди́те ýбо, и стáнем в домý Бóжiи, тéпле взирáюще,/ чудесы́ сегó крася́щеся, я́коже лучéю, облистáвшеся житiя́,/ чи́стым дýхом прохлáждшеся,/ подóбящеся тогó вéре, и теплотé, и смирéнiю,/ и́миже дом яви́ся естествá Бóжiя./ К немýже вопiю́ще, поéм:// небоявлéнне Васíлiе преподóбне.
ПЕСНЬ 7
Iрмóс: Óбразу златóму, на пóле Деи́ре служи́му,/ трíе Твои́ óтроцы небрегóша безбóжнаго велéнiя,/ посредé же огня́ ввéржени, орошáеми, поя́ху:// благословéн еси́, Бóже отéц нáших. (Двáжды)
Хор: Слáва Тебé, Бóже наш, слáва Тебé.
Чтец: Свéтло и пресвéтло Рождествó Хрiстóво,/ и бýдущаго обновлéнiя подписáвшее тáинство днесь,/ я́ко закóнным чи́ном Спас обрéзуется,// не я́ко Бог, но я́ко Человéк и закóна исполнéнiе. (Двáжды)
Хор: Слáва Тебé, Бóже наш, слáва Тебé.
Чтец: Закóн исполня́я, закóна Творéц, плóтiю днесь вóлею обрéзуется,/ обрéзанiе содевáя грехóвныя зимы́ и звáти дáруя:// благословéн еси́, Бóже отéц нáших. (Двáжды)
Глас 2
Хор: Святúтелю óтче Васíлiе, молù Бóга о нас.
Чтец: Óбраз Отцá Сын, и Сы́на Дух есть./ Ты же Дýха, о Васíлiе, несквéрнено зерцáло, дом же всея́ Трóицы.// Блажéнна пáмять твоя́, и слáвящiи ю воспрославля́ются. (Двáжды)
Хор: Святúтелю óтче Васíлiе, молù Бóга о нас.
Чтец: Углуби́в ум во глубины́ Бóжiя непостижи́мыя/ и собрáв многоцéнный ты би́сер рáзума,/ напóлнил еси́ мiр премýдростiю и звáти научи́л еси́:// благословéн еси́, Бóже отéц нáших.(Двáжды)
Хор: Святúтелю óтче Васíлiе, молù Бóга о нас.
Чтец: О, еди́но дохновéнiе умá свящéнных сопрýг,/ я́коже еди́на душá во двою́ телесéх нераздéльно:/ в Григóрiи Васíлiй, желáнiем Божéственным совокýплени, в Васíлiи же Григóрiй,// ны́не моли́те Хрiстá о стáде вáшем.
Хор: Святúтелю óтче Васíлiе, молù Бóга о нас.
Чтец: Отéц сирóт, и вдов защи́тник, и богáтство ни́щих,/ боля́щих утешéнiе и сýщих в богáтстве окормлéнiе,/ стáрости жезл яви́лся еси́, и наказáнiе ю́ности,// и монáшествующих добродéтели прáвило, Васíлiе.
Хор: Слáва Отцý и Сы́ну и Святóму Дýху.
Тропáрь: Очи́стив от вся́каго ти́ннаго сквернéнiя ум, Васíлiе,/ сразсмотри́л еси́ духóвная желáнным твои́м дýхом./ Тéмже, воспевáя Трóицу, со дерзновéнiем взывáл еси́:// благословéн еси́, Бóже отéц нáших.
Хор: И ны́не и прúсно и во вéки векóв. Амúнь.
Богорóдичен: Тя купину́ Моисéй в горé Сiнáйстей огнепали́му, Чи́стая, прови́дяше,/ прiéмшую неопáльно нестерпи́мую зарю́ Неизглагóланнаго Существá,// соедини́вшагося дебельствý плóти еди́ныя в Нем святы́х Ипостáсей.
Катавáсiи Богоявлéнiя (глас 2): Ю́ноши благочести́выя, пéщи óгненней приобщи́вшiяся,/ шумя́щ дух рóсный невреди́мы сохрани́/ и Бóжiя А́нгела снизхождéнiе./ Тéмже, в плáмени орошáеми, благодáрственно воспевáху:// препéтый отéц Гóсподи и Бóже, благословéн еси́.
Опали́ струéю змíевы главы́ пéщный высóкiй плáмень,/ ю́ноши нося́щ благочести́выя,/ Ути́шивый, неудободержи́мую мглу из грехá// всю же омывáет росóю Дýха.
ПЕСНЬ 8
Iрмóс: Неизречéнною мýдростiю состáвльшаго вся́ческая Бóга Слóва/ и от не сýщих во éже бы́ти привéдшаго,/ благослови́те, делá, я́ко Гóспода,// и превозноси́те во вся вéки.(Двáжды)
Хор: Слáва Тебé, Бóже наш, слáва Тебé.
Чтец: Во осмы́й день обрéзуется я́ко Младéнец Влады́ка,/ Iисýса же прiéмлет именовáнiе,// я́ко мíра есть Спас и Госпóдь. (Двáжды)
Хор: Слáва Тебé, Бóже наш, слáва Тебé.
Чтец: Ко Хрiстóву Рождествý достóйно осмы́й спряжéся,/ святи́теля всеслáвная пáмять,// ю́же почитáюще вéрою, поéм Гóспода и превознóсим во вéки. (Двáжды)
Глас 2
Хор: Святúтелю óтче Васíлiе, молù Бóга о нас.
Чтец: Несказáнным Прóмыслом даровáвшаго Васíлiя мíру,/ свет благочéстiя, трубý же Богослóвiя,// благослови́те, делá Госпóдня, Гóспода. (Двáжды)
Хор: Святúтелю óтче Васíлiе, молù Бóга о нас.
Чтец: Богáтным дéйством всéльшася в мýдраго Васíлiя/ и тем благочéстно Богослóвившаго,// благослови́те, делá Госпóдня, Гóспода.(Двáжды)
Хор: Святúтелю óтче Васíлiе, молù Бóга о нас.
Чтец: Божéственных твои́х словéс наслади́вшiися, Васíлiе,/ непрестáнно в твоéй пáмяти торжествýюще, вопiéм:// благослови́те, делá Госпóдня, Гóспода. (Двáжды)
Хор: Благословúм Отцá, и Сы́на, и Святáго Дýха, Гóспода.
Тропáрь: Лучи́ словéс испусти́л еси́, Васíлiе, мíру,/ свéтом наставля́ющiя Еди́но чествовáти Трóйческое Естествó:// благослови́те, делá Госпóдня, Гóспода.
Хор: И ны́не и прúсно и во вéки векóв. Амúнь.
Богорóдичен: Из Отцá, прошéдшаго прéжде век, и безлéтнаго Бóга Слóва/ и в послéдняя возсiя́вша из Дéвы,// благослови́те, делá Госпóдня, Гóспода.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiи Богоявлéнiя (глас 2): Тáйну преслáвную вавилóнская показá пещь, источи́вшая рóсу,/ я́ко струя́ми имя́ше Невещéственный Огнь воспрiя́ти Iордáн/ и объя́ти плóтiю крещáема Зижди́теля,// Егóже благословя́т лю́дiе и превознóсят во вся вéки.
Свобóдна ýбо тварь познавáется/ и сы́нове Свéта, прéжде омрачéннiи,/ еди́н стенéт тьмы предстáтель./ Ны́не да благослови́т усéрдно Винóвнаго// прéжде окая́нное язы́ков всенаслéдiе.
Вóзглас: Величáй, душé моя́,// по закóну плóтiю обрéзавшагося Гóспода.
Песнь 9
Iрмóс: Я́же прéжде сóлнца свети́льника Бóга возсiя́вшаго,/ плóтски к нам пришéдшаго из бокý Деви́чу,/ неизречéнно воплоти́вшая, Благословéнная, Всечи́стая,/ Тя, Богорóдице, величáем.
Хор: Величáй, душé моя́,// по закóну плóтiю обрéзавшагося Гóспода.
Iрмóс: Я́же прéжде сóлнца свети́льника Бóга возсiя́вшаго,/ плóтски к нам пришéдшаго из бокý Деви́чу,/ неизречéнно воплоти́вшая, Благословéнная, Всечи́стая,/ Тя, Богорóдице, величáем.
Хор: Величáй, душé моя́,// во осмы́й день обрéзанiе Прiéмлюща.
Чтец: Прешéд предéлы Хрiстóс человéческаго всегó естествá,/ преестéственно из Дéвы раждáется,/ и, писáнiе закóнное я́коже повелевáет,/ плóтiю обрéзается,// и испóлнитель закóна явля́ется.
Хор: Величáй, душé моя́,// во осмы́й день обрéзанiе Прiéмлюща.
Чтец: Прешéд предéлы Хрiстóс человéческаго всегó естествá,/ преестéственно из Дéвы раждáется,/ и, писáнiе закóнное я́коже повелевáет,/ плóтiю обрéзается,// и испóлнитель закóна явля́ется.
Хор: Днесь Влады́ка обрéзуется плóтiю я́ко Младéнец,/ исполня́я закóн.
Чтец: Прiиди́те, Влады́ки слáвная Хрiстóва именовáнiя во святы́ни торжествýим,/ Iисýс бо Боголéпно наречéся днесь.// С си́ми же и пáмять святи́теля величáем.
Хор: Днесь Влады́ка плóтiю обрéзася ,/ Iисýс наречéся.
Чтец: Прiиди́те, Влады́ки слáвная Хрiстóва именовáнiя во святы́ни торжествýим,/ Iисýс бо Боголéпно наречéся днесь.// С си́ми же и пáмять святи́теля величáем.
Глас 2
Хор: Величáй, душé моя́,/ во iерáрсех Васíлiя Велúкаго.
Чтец: Пéрваго пáстыря, я́ко овчá вéрное Хрiстóво, Васíлiе,/ живонóсным стопáм послéдовал еси́,/ мучи́телю бо твою́ дýшу, óтче, прéдал еси́,// дóблественне предбéдствуя о Цéркви, всеблажéнне.(Двáжды)
Хор: Величáй, душé моя́,/ вселéнныя пресвéтлаго светúльника.
Чтец: Пéрваго пáстыря, я́ко овчá вéрное Хрiстóво, Васíлiе,/ живонóсным стопáм послéдовал еси́,/ мучи́телю бо твою́ дýшу, óтче, прéдал еси́,// дóблественне предбéдствуя о Цéркви, всеблажéнне.
Хор: Величáй, душé моя́,/ вселéнныя пресвéтлаго светúльника.
Чтец: Церкóвное всесвящéнное Хрiстóво ви́дев совокуплéнiе,/ твои́м укрáшено святи́тельством, мýдре,/ всегуби́тель, я́ко от грóма, тресновéн быв, падéся мучи́тель,// сýщiя бо в тебé Дýха зари́ не стерпé, Васíлiе.
Хор: Величáй, душé моя́,/ от Кесарíи Васíлiя Велúкаго.
Чтец: Церкóвное всесвящéнное Хрiстóво ви́дев совокуплéнiе,/ твои́м укрáшено святи́тельством, мýдре,/ всегуби́тель, я́ко от грóма, тресновéн быв, падéся мучи́тель,// сýщiя бо в тебé Дýха зари́ не стерпé, Васíлiе.
Хор: Величáй, душé моя́,/ от Кесарíи Васíлiя Велúкаго.
Чтец: Апóстолов седáлища, ли́ка же страдáлец Хрiстóвых,/ патрiáрхов ски́нiи, и прáведных слáдости,/ и рáдости прорóков сподóбился еси́, Васíлiе:// Богорóдицы бо служи́тель и Трóицы таи́нник был еси́.
Хор: Величáй, душé моя́,/ украсúвшаго Хрiстóву Цéрковь.
Чтец: Апóстолов седáлища, ли́ка же страдáлец Хрiстóвых,/ патрiáрхов ски́нiи, и прáведных слáдости,/ и рáдости прорóков сподóбился еси́, Васíлiе:// Богорóдицы бо служи́тель и Трóицы таи́нник был еси́.
Хор: Величáй, душé моя́,/ Честнéйшую Небéсных вóинств,/ Дéву Пречúстую Богорóдицу.
Чтец: Превы́спренняя водáми покрывáяй Еди́н Госпóдь,/ востязýяй мóре, бéздны же изсушáяй, из Тебé, Чи́стая, плоть воспрiéмый,// от Вифлеéма тщи́тся ко Iордáну крести́тися плóтiю.
Хор: Величáй, душé моя́,// по закóну плóтiю обрéзавшагося Гóспода.
Катавáсiи Богоявлéнiя (глас 2): Недоумéет всяк язы́к благохвали́ти по достоя́нiю,/ изумевáет же ум и преми́рный пéти Тя, Богорóдице,/ обáче Благáя сýщи, вéру прiими́,/ и́бо любóвь вéси Божéственную нáшу:// Ты бо хрiстiáн еси́ Предстáтельница, Тя величáем.
Хор: Величáй, душé моя́,// Честнéйшую Небéсных вóинств, Дéву Пречúстую Богорóдицу.
О, пáче умá Рождествá Твоегó чудéс!/ Невéсто Всечи́стая,/ Мáти Благословéнная,/ Éюже получи́вше всесовершéнное спасéнiе,// достóйно хвáлим я́ко Благодéтеля, дар нося́ще песнь благодарéнiя.
Гóсподи, помилуй (3 раза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Светúлен cвятúтеля: Любомýдрiя желáнiем обрéзал еси́, óтче, души́ твоея́ покрывáло,/ и ми́ру показáлся еси́, я́ко сóлнце, чудесы́,/ и вéрных озари́л еси́ мы́сли, Богомýдре,// Трóицы таи́нниче, о Васи́лiе мýдре, и служи́телю Богорóдицы.(Двáжды)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Светúлен прáздника: Плóтiю обрéзуется закóн испóлнивый, я́ко Младéнец осмоднéвен, векóв Зижди́тель,/ и пеленáми повивáется, я́ко Человéк, и млекóм питáется,/ И́же вся безмéрною крéпостiю я́ко Бог содержáй// и мановéнiем возводя́й.
Продолжение здесь