Неделя 29 по Пятидесятнице, святых отец. Глас 4. ВСЕНОЩНОЕ БДЕНИЕ. УТРЕНЯ.КАНОН Служба мирским чином

[mirskim]

1 января́ 2023 г. Недéля 29 по Пятидеся́тнице, святы́х отцéв. Глас 4. Воскрéсная прáздничная слýжба для домáшнего (келéйнаго) совершéнiя. Послéдованiе ýтрени.

Начало зри здесь ( великая вечéрня) и здесь ( ýтреня)

ТРОПАРИ ВОСКРЕСНЫЕ, ГЛАС 5

Благословéн есú, Гóсподи,/научù мя оправдáнiем Твоúм. (Пс.118:12)

Áнгельскiй собóр удиви́ся,/ зря Тебé в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.

Благословéн есú, Гóсподи,/научù мя оправдáнiем Твоúм.

Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел миронóсицам вещáше:/ ви́дите вы гроб и уразумéйте,/ Спас бо воскрéсе от грóба.

Благословéн есú, Гóсподи,/научù мя оправдáнiем Твоúм.

Зелó рáно мvронóсицы течáху/ ко грóбу Твоему рыдáющiя,/ но предстá к ним Áнгел и речé:/ рыдáнiя врéмя престá, не плáчите,/ воскресéнiе же апóстолом рцы́те.

Благословéн есú, Гóсподи,/научù мя оправдáнiем Твоúм.

Мvронóсицы жены́ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речé, глагóля:/ что с мéртвыми живáго помышля́ете?/ Яко Бог бо, воскрéсе от грóба.

Слáва Ѻтцý и Сы́ну и Святóму Дýху.

Трóичен: Поклони́мся Ѻтцý/ и Егó Сы́нови, и Святóму Дýху,/ Святéй Трóице во еди́ном существé,/ с Серафíмы зовýще:/ Свят, Свят, Свят еси, Гóсподи.

И ны́не и прúсно и во вéки векóв. Амúнь.



Богорóдичен: Жизнодáвца рóждши,/ грехá, Дéво, Адáма избáвила еси,/ рáдость же Éве/ в печáли мéсто подалá еси,/ пáдшiя же от жи́зни/ к сей напрáви/ из Тебé воплоти́выйся Бог и Человéк.

Чтец: Аллилýiа, аллилýiа, аллилýiа, слáва Тебé Бóже. (3 раза)

Гóсподи, поми́луй. (3 раз)

Слáва Ѻтцý и Сыну и Святóму Дýху, и ныне и при́сно и во вéки векóв. Аминь.

Ипакоú воскрéсны, глас 4: Я́же Твоегó преслáвнаго востáнiя, предтéкша мvронóсицы,/ апóстолом проповéдаху Хрiстé,/ я́ко воскрéсл еси́ я́ко Бог,// подая́ мíрови вéлiю ми́лость.

СЕДАЛЬНЫ

Седáлен отцéв по полiелéи, глас 8: Авраáма, Iсаáка же и Iáкова восхвáлим вси пéсненно,/ Давíда крóткаго, Iисýса и дванáдесять патрiáрхи/ кýпно с треми́ ю́ношами, угаси́вшими óгненный плáмень си́лою духóвною,/ рáдуйтеся, - вопiю́ще к ним, - прéлесть дóблественне обличи́вше царя́ безýмнаго,/ и Хрiстý моли́теся// согрешéнiй оставлéнiе даровáти прáзднующим любóвью святýю пáмять вáшу.

Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.

Богорóдичен из Минéи, глас 8: Благодáрственное похвалéнiе дóлжно,/ я́коже вдови́ца óная два лéпта,/ приношý Тебé, Влады́чице, о всех даровáнiих Твои́х:/ Ты бо яви́лася еси́ покрóв, кýпно и пóмощь,/ напáстей и скорбéй при́сно мя изымáющи./ Тéмже, я́ко от среды́ горя́щiя пéщи, избáвлься оскорбля́ющих мя,/ от сéрдца взывáю Тебé:/ Богорóдице, помози́ ми,/ моля́щи Хрiстá Бóга согрешéнiй оставлéнiе дáти мне,// Тя бо имéю надéжду, раб Твой.

СТЕПЕННА, ГЛАС 4

1 АНТИФОН

Хор: От ю́ности моея́/ мнóзи бóрют мя стрáсти,/ но Сам мя заступú// и спасú, Спáсе мой. (Двáжды)

Ненави́дящiи Сióна,/ посрами́теся от Гóспода,/ я́ко травá бо огнéм// бýдете изсóхше. (Двáжды)

Слáва Ѻтцý и Сы́ну и Святóму Дýху.

Святы́м Дýхом/ вся́ка душá живи́тся,/ и чистотóю возвышáется,// светлéется Трóйческим еди́нством, священнотáйне.

И ны́не и прúсно и во вéки векóв. Амúнь.

Святы́м Дýхом/ вся́ка душá живи́тся,/ и чистотóю возвышáется,// светлéется Трóйческим еди́нством, священнотáйне.

2 АНТИФОН

Воззвáх Тебé Гóсподи тéпле,/ из глубины́ душù моея́,/ и мне да бýдут на послушáнiе// Божéственная Твоя́ ушесá. (Двáжды)

На Гóспода надéжду всяк кто стяжáв,// вы́шшiй есть всех скорбя́щих. (Двáжды)

Слáва Ѻтцý и Сы́ну и Святóму Дýху.

Святы́м Дýхом/ тóчатся благодáтныя струи́,/ напая́юща вся́ку тварь// ко оживлéнiю.

И ны́не и прúсно и во вéки векóв. Амúнь.

Святы́м Дýхом/ тóчатся благодáтныя струи́,/ напая́юща вся́ку тварь// ко оживлéнiю.

3 АНТИФОН

Сéрдце моé/ к Тебé, Слóве, да возвы́сится,/ и да ничтóже усладúт мя// от мiрскúх красóт на слáбость. (Двáжды)

К мáтери своéй/ я́коже и҆́мать кто любóвь,/ ко Гóсподу тéпльше// люблéнiем дóлжни есмы́. (Двáжды)

Слáва Ѻтцý и Сы́ну и Святóму Дýху.

Святы́м Дýхом/ боговéденiя богáтство,/ зрéнiя, и премýдрости:// вся бо в сем отéческая велéнiя слóво открывáет.

И ны́не и прúсно и во вéки векóв. Амúнь.

Святы́м Дýхом/ боговéденiя богáтство,/ зрéнiя, и премýдрости:// вся бо в сем отéческая велéнiя слóво открывáет.

ПРОКИМЕН

Чтец: Прокíмен, глас четвéртый. Воскресни́, Гóсподи, помози́ нам и избáви нас и́мене Твоегó рáди. (Пс.43:27)

Хор: Воскреснú, Гóсподи, помозù нам/ и избáви нас úмене Твоегó рáди.

Чтец:  Бóже, уши́ма нáшима услы́шахом, и отцы́ нáши возвести́ша нам. (Пс.43:2А)

Хор: Воскреснú, Гóсподи, помозù нам/ и избáви нас úмене Твоегó рáди.

Чтец: Воскресни́, Гóсподи, помози́ нам.

Хор: И избáви нас úмене Твоегó рáди.

Чтец: Гóсподу помóлимся.

Хор: Гóсподи, помúлуй.

Слáва Отцý и Сы́ну и Святóму Дýху, и ны́не и прúсно и во вéки векóв, амúнь.

Чтец: Вся́кое дыхáнiе да хвáлит Гóспода.(Пс.150:6)

Хор: Всякое дыхáнiе да хвáлит Гóспода.

Чтец: Хвали́те Бóга во святы́х Егó, хвали́те Егó во утвержéнiи си́лы Егó.

Хор: Всякое дыхáнiе да хвáлит Гóспода.

Чтец:Вся́кое дыхáнiе.

Хор: Да хвáлит Гóспода.

Господи, помилуй. (3раза)

Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.

ЕВАНГЕЛИЕ

Чтец: От Iоáнна Святáго Евáнгелiя чтéнiе

Хор: Слáва Тебé, Гóсподи, слáва Тебé.

(Ин.зач.63): Во врéмя óно, во еди́ну от суббóт, Марíя Магдали́на прiи́де заýтра, ещé сýщи тме, на гроб, и ви́де кáмень взят от грóба. Течé ýбо и прiи́де к Сíмону Петрý, и к другóму ученикý, егóже любля́ше Iисýс, и глагóла и҆́ма: взя́ша Гóспода от грóба, и не вем, где положи́ша Егó. Изы́де же Петр и другíй учени́к, и идя́ста ко грóбу. Течáста же óба вкýпе: и другíй учени́к течé скорéе Петрá, и прiи́де прéжде ко грóбу. И прини́к ви́де ри́зы лежáща, обáче не вни́де. Прiи́де же Сíмон Петр в след егó, и вни́де во гроб, и ви́де ри́зы еди́ны лежáща. И судáрь, и҆́же бе на главé Егó, не с ри́зами лежáщь, но осóбь свит на еди́ном мéсте. Тогдá ýбо вни́де и другíй учени́к, пришéдый прéжде ко грóбу, и ви́де, и вéрова. Не у бо вéдяху Писáнiя, я́ко подобáет Емý из мéртвых воскрéснути. Идóста же пáки к себé ученикá.

[Русский синодальный перевод]В то время, в первый же день недели, Мария Магдалина приходит ко гробу рано, когда было еще темно, и видит, что камень отвален от гроба. Итак, бежит и приходит к Симону Петру и к другому ученику, которого любил Иисус, и говорит им: унесли Господа из гроба, и не знаем, где положили Его. Тотчас вышел Петр и другой ученик, и пошли ко гробу. Они побежали оба вместе; но другой ученик бежал скорее Петра, и пришел ко гробу первый. И, наклонившись, увидел лежащие пелены; но не вошел во гроб. Вслед за ним приходит Симон Петр, и входит во гроб, и видит одни пелены лежащие, и плат, который был на главе Его, не с пеленами лежащий, но особо свитый на другом месте. Тогда вошел и другой ученик, прежде пришедший ко гробу, и увидел, и уверовал. Ибо они еще не знали из Писания, что Ему надлежало воскреснуть из мертвых. Итак ученики опять возвратились к себе.(Ин.20:1-10)

Хор: Слáва Тебé, Гóсподи, слáва Тебé.

Воскресéнiе Хрiстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрiстé, и святóе Воскресéнiе Твоé поéм и слáвим: Ты бо еси́ Бог наш, рáзве Тебé инóго не знáем, и҆́мя Твоé именýем. Прiиди́те вси вéрнiи, поклони́мся Святóму Хрiстóву Воскресéнiю: се бо прiи́де Крестóм рáдость всемý мíру. Всегдá благословя́ще Гóспода, поéм Воскресéнiе Егó: распя́тiе бо претерпéв, смéртiю смерть разруши́.

Псалом 50

Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моé. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх роди́ мя мáти моя. Се бо и҆́стину возлюби́л еси́, безвéстная и тáйная премýдрости Твоея яви́л ми еси́. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отврати́ лицé Твоé от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéнiя Твоегó, и Дýхом Влады́чним утверди́ мя. Научý беззакóнныя путéм Твоим, и нечести́вiи к Тебé обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажи́, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.

Слáва Ѻтцý и Сы́ну и Святóму Дýху.

глас 6: Моли́твами апóстолов,/ Ми́лостиве, очи́сти// мнóжество согрешéнiй нáших.

И҆ ны́не и прúсно и во вéки векóв. Амúнь.

Моли́твами Богорóдицы,/ Ми́лостиве, очи́сти// мнóжество согрешéнiй нáших.

Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моé. (Пс.50:3)

Стiхúра, глас 6: Воскрéс Iисýс от грóба,/ я́коже проречé,/ дадé нам живóт вéчный// и вéлiю ми́лость.

Гóсподи, поми́луй. (12 раз)

Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.

КАНОН ВОСКРЕСНЫЙ, ГЛАС 4

(совмещенный с канóном крестовоскрéсным (глас 4), Борóдицы (глас 4) и канóном прáотцев, (глас 6)

ПЕСНЬ 1

Iрмóс: Мóря чермнýю пучи́ну/ невлáжными стопáми/ дрéвнiй пешешéствовав Iзрáиль,/ крестообрáзныма Моисéовыма рукáма// Амали́кову си́лу в пусты́ни победи́л есть.

Хор (припéв): Слáва, Гóсподи, Святóму Воскресéнiю Твоемý.

Чтец (тропáрь): Вознéслся еси́ на пречи́стем дрéве крéстнем,/ нáше отпадéнiе исправля́я,/ éже на дрéве исцеля́я всегуби́тельство, Влады́ко,// я́ко Благ и Всеси́лен.

Хор: Слáва, Гóсподи, Святóму Воскресéнiю Твоемý.

Чтец: Во грóбе плóтски, во áде же с душéю, я́ко Бог:/ в раи́ же с разбóйником, и на Престóле был еси́, Хрiстé, со Ѻтцéм и Дýхом,// вся исполня́я Неопи́санный.

Хор: Пресвятáя Богорóдице, спасù нас.

Богорóдичен: Без сéмене Ѻ́тчею вóлею/ от Божéственнаго Дýха Бóжiя зачалá еси́ Сы́на,/ и плóтiю родилá еси́:/ И҆́же из Ѻтцá без мáтере,// нас же рáди, из Тебé без отцá.

Канон крестовоскресный, глас 4

Хор: Слáва, Гóсподи, Крестý Твоемý Честнóму и Воскресéнiю.

Чтец: Исцели́л еси́ сокрушéнiе человéчества, Гóсподи,/ Божéственною Твоéю Крóвiю обнови́вый то:/ и сокруши́л еси́ си́льнаго в крéпости,// и́же дрéвле сокруши́вшаго Твоé создáнiе.

Хор: Слáва, Гóсподи, Крестý Твоемý Честнóму и Воскресéнiю.

Чтец: Мéртвых востáнiе, умерщвлéнiем был еси́:/ крéпость бо отъя́тся умерщвлéнiя, брáвшися с Жи́знiю вéчною,// И́же всéми влады́чествующу воплощéнному Бóгу.

Канон Богородицы, глас 4

Хор: Пресвятáя Богорóдице, спасù нас.

Чтец: Сотрясóшася лю́дiе, смятóшася язы́цы,/ цáрствiя же держáвная уклони́шася, Чи́стая, от стрáха рождествá Твоегó:/ прiи́де бо Царь мой, и низложи́ мучи́теля,// и мiр от тли избáви.

Хор: Пресвятáя Богорóдице, спасù нас.

Чтец: Жили́ще Своé, живы́й в вы́шних,/ к человéком сошéд, освяти́ Хрiстé, и непоколеби́мо яви́:/ Еди́на бо по рождествé дéвства сокрóвище,// Зижди́теля рóждши пребылá еси́.

Канон святых отцев, глас 6

Хор: Святíи отцы́, молúте Бóга о нас.

Чтец: Днесь собóр Божéственных отéц Хрiстóво Рождествó предпрáзднует свéтло,/ и прописýет сié преслáвная благодáть:// Авраáм бо óбраз закóна и óтроцы суть. (Двáжды)

Хор: Святíи отцы́, молúте Бóга о нас.

Чтец: Дрéвле прiéмлет Божествó Еди́но Триипостáсное свящéнный Авраáм,/ ны́не же сопрестóльное Слóво Ѻ́тчее Божéственным Дýхом к дéтем прихóдит,// слáвно восхваля́емое.

Хор: Святíи отцы́, молúте Бóга о нас.

Чтец: Числóм и вéрою Божéственныя Трóицы безбóжiе низвéргше,// в пещи́ дéти óбразы чýвственными сокровéнныя Бóжiя тáйны мíру прояви́ша.

Слáва Ѻтцý и Сы́ну и Святóму Дýху.

Тропáрь: Авраáм избáвися от руки́ непрáведныя,/ плáмене же пéщнаго Божéственнiи óтроцы иногдá,/ и Данiи́л прорóк от зверéй и рóва спасéся.// Тéмже ны́не Рождествó Хрiстóво предпрáзднуем.

И ны́не и прúсно и во вéки векóв. Амúнь.

Богорóдичен: Обрáдованная, Безневéстная Мáти, Дéво нетлéнная, блажи́м Тя:/ и́бо от рóда Авраáмля и плéмене Давíдова процвелá еси́,// Хрiстá же родилá еси́, прорóки проповéданнаго прéжде.

Катавáсiя Рождествá (глас 1): Хрiстóс раждáется - слáвите,/ Хрiстóс с Небéс - сря́щите./ Хрiстóс на земли́ - возноси́теся./ Пóйте Гóсподеви, вся земля́,/ и весéлiем воспóйте, лю́дiе,/ я́ко прослáвися.

ПЕСНЬ 3

Iрмóс: Весели́тся о Тебé Цéрковь Твоя́, Хрiстé, зовýщи:/ Ты моя́ крéпость, Гóсподи,// и прибéжище, и утверждéнiе.

Хор: Слáва, Гóсподи, Святóму Воскресéнiю Твоемý.

Чтец: Дрéво живóтное, мы́сленный и́стинный виногрáд,// на Крестé ви́сит, всем источáя нетлéнiе.

Хор: Слáва, Гóсподи, Святóму Воскресéнiю Твоемý.

Чтец: Я́ко вели́к, я́ко стрáшен, я́ко áдово низлóжь шатáнiе,// и я́ко Бог нетлéнен, ны́не плóтски воскрéсе.

Хор: Пресвятáя Богорóдице, спасù нас.

Богорóдичен: Ты еди́на сýщим на земли́,/ я́же пáче естествá благи́х Ходáтаица,/ Мáти Бóжiя былá еси́:// тéмже Ти, рáдуйся, принóсим.

Глас 4

Хор: Слáва, Гóсподи, Крестý Твоемý Честнóму и Воскресéнiю.

Чтец: Я́дом испóлнены в мя змiй зýбы вонзé, Спáсе,/ я́же, Вседержи́телю Влады́ко, гвоздьми́ рук Твои́х сокруши́л еси́:// я́ко несть свят во святы́х, пáче Тебé, Человеколю́бче.

Хор: Слáва, Гóсподи, Крестý Твоемý Честнóму и Воскресéнiю.

Чтец: Ви́ден был еси́, Человеколю́бче, вóлею во грóбе мертв, Животвóрче,/ и вратá развéргл еси́ áдова, я́же от векóв душáм:// я́ко несть свят во святы́х рáзве Тебé, Человеколю́бче.

Глас 4

Хор: Пресвятáя Богорóдице, спасù нас.

Чтец: Очищáется человéков существó,/ Тобóю присовокýпльшееся нестерпи́мому Божéственному Огню́:/ я́ко сокровéнный, Пречи́стая Дéво, в Тебé Хлеб испéкшееся,// И́же и Тебé невреждéнну сохрáншему.

Хор: Пресвятáя Богорóдице, спасù нас.

Чтец: Кáя сiя́ я́же вои́стинну близ Бóга;/ я́ко превозшéдши вся áнгельскiя чи́ны,/ еди́на добрóтою дéвства,// я́ко Мáти сiя́ющи Вседержи́теля.

Глас 6

Хор: Святíи отцы́, молúте Бóга о нас.

Чтец: Ю́же по óбразу слáву и по подóбiю Бóжiю вéрно соблюдáюще,/ златáго óбраза плáмень огнéм духóвным страдáльчески угаси́ша óтроцы, пою́ще:// Еди́наго Гóспода знáем. (Двáжды)

Хор: Святíи отцы́, молúте Бóга о нас.

Чтец: Мýдростiю обложéни и Дýха си́лою, óтроцы/ мудрецы́ Вавилóнскiя пленéннiи посрами́ша и дéрзостне взывáху:// несть свят, рáзве Тебé, Гóсподи Человеколю́бче. (Двáжды)

Слáва Ѻтцý и Сы́ну и Святóму Дýху.

Тропáрь: Рáдуется и сликовствýет с детьми́ и прорóки закóн/ и предъигрáет Госпóдню Божéственному пришéствiю днесь,// и Авраáм рáдуется, я́ко от сéмене егó ви́де Гóспода воплощáема.

И ны́не и прúсно и во вéки векóв. Амúнь.

Богорóдичен: Зачáтiе без стрáсти,/ прiя́тiе пáче слóва прóйде Рождествá Твоегó, Богорóдице:/ прорóки бо проповéданное пáче естествá тáинство нам яви́ся,// Слóво Бóжiе, Сый Бог.

Катавáсiя Рождествá (глас 1): Прéжде век от Отцá рождéнному нетлéнно Сы́ну/ и в послéдняя от Дéвы/ воплощéнному безсéменно,/ Хрiстý Бóгу возопiи́м:/ вознесы́й рог наш,// свят еси́, Гóсподи.

Гóсподи, поми́луй. (Трúжды)

Слáва Ѻтцý и Сыну и Святóму Дýху, и ны́не и присно и во вéки векóв, аминь.

Ипакоú отцéв, глас 8: Áнгел отрокóв ороси́ пещь,/ ны́не же жен плач разреши́, глагóля:/ Что принóсите ми́ра?/ Когó и́щете во грóбе?/ Востá Хрiстóс и Бог:// есть бо Жизнь и Спасéнiе рóда человéческаго.

ПЕСНЬ 4

Iрмóс: Вознесéна Тя ви́девши Цéрковь на Крестé,/ Сóлнце Прáведное,/ ста в чи́не своéм,/ достóйно взывáющи:// слáва си́ле Твоéй, Гóсподи.

Хор: Слáва, Гóсподи, Святóму Воскресéнiю Твоемý.

Чтец: Возшéл еси́, стрáсти моя́ исцеля́я, на Крест/ стрáстiю Пречи́стыя плóти Твоея́,/ в ню́же вóлею облéклся еси́./ Тéмже Ти взывáем:// слáва си́ле Твоéй, Гóсподи.

Хор: Слáва, Гóсподи, Святóму Воскресéнiю Твоемý.

Чтец: Безгрéшнаго смерть вкуси́вши,/ Животворя́щаго Тéла Твоегó,/ достóйно, Влады́ко, умертви́ся:/ мы же вопiéм Ти,// слáва си́ле Твоéй, Гóсподи.

Хор: Пресвятáя Богорóдице, спасù нас.

Богорóдичен: Неискусобрáчно родилá еси́, Дéво,/ и по рождествé яви́лася еси́ дéвствующи пáки:/ тéмже немóлчными глáсы,/ éже рáдуйся, Тебé, Влады́чице,// вéрою несумнéнною взывáем.

Глас 4

Хор: Слáва, Гóсподи, Крестý Твоемý Честнóму и Воскресéнiю.

Чтец: Взакóнен сый Iзрáиль,/ Тебé, Хрiстé, взакóнившаго Бóга не познá:/ но я́ко беззакóнника, законопреступáя, на Крестé пригвозди́,// и́же законоположéнiю недостóйный.

Хор: Слáва, Гóсподи, Крестý Твоемý Честнóму и Воскресéнiю.

Чтец: Обожéна Твоя́, Спáсе, Душá,/ áдова сокрóвища плени́вши,/ я́же от вéка совоскреси́ дýши:// живонóсное же Тéло всем нетлéнiе источи́.

Глас 4

Хор: Пресвятáя Богорóдице, спасù нас.

Чтец: Поживé с человéки, ви́димь быв Неви́димый,/ во зрáце сый Непостижи́маго Божествá,/ и вообрáжься из Тебé, Отрокови́це, в чуждéе,// вéдущих Тя, Чи́стую Богомáтерь, спасáет.

Хор: Пресвятáя Богорóдице, спасù нас.

Чтец: Прiя́т в вещéственне Дéва Невещéственнаго, в причáстiи веществá,/ Младéнца от Нея́ бы́вша./ Тéмже во дву существý, Еди́н познавáется// плотонóсец Бог, и Человéк Пресýщественный.

Глас 6

Хор: Святíи отцы́, молúте Бóга о нас.

Чтец: Отцéв начáток: Авраáма, Iсаáка и Iáкова почти́м,/ я́ко из тех сéмене возсiя́ Хрiстóс,// воплóщься из Дéвы, я́ко Всеси́лен. (Двáжды)

Хор: Святíи отцы́, молúте Бóга о нас.

Чтец: Прописýяй бýдущая сошéствiю Хрiстóву Данiи́л/ звéри, я́ко óвцы, показá всем я́ве:// прови́де бо бýдущее, я́ко прорóк Бóжiй. (Двáжды)

Слáва Ѻтцý и Сы́ну и Святóму Дýху.

Тропáрь: Грехóвным не привлечéни я́дом,/ от плáмене избáвистеся, дéти:// злáта бо чистéйше сýще мýдрiи, в пещи́ прéлести не слiя́шася.

И ны́не и прúсно и во вéки векóв. Амúнь.

Богорóдичен: Велеглáсно проповéдуется ожидáнiе язы́ков/ и спасéнiе ми́ра пáче естествá Рождествó Твоé, Пречи́стая, Честнáя,// егóже поéт отéческая пáмять днесь.

Катавáсiя Рождествá (глас 1): Жезл из кóрене Iессéева/ и цвет от негó, Хрiстé,/ от Дéвы прозя́бл еси́,/ из горы́, Хвáльный, приосенéнныя чáщи,/ пришéл еси́, воплóщся от Неискусомýжныя,/ Невещéственный и Бóже:// слáва си́ле Твоéй, Гóсподи.

ПЕСНЬ 5

Iрмóс: Ты, Гóсподи мой,/ Свет в мiр пришéл еси́,/ Свет Святы́й, обращáяй из мрáчна невéденiя// вéрою воспевáющiя Тя.

Хор: Слáва, Гóсподи, Святóму Воскресéнiю Твоемý.

Чтец: Ты, Гóсподи, к земли́ ми́лостивно сошéл еси́:// Ты вознéсл еси́ пáдшее человéческое существó, на дрéве воздвизáемь.

Хор: Слáва, Гóсподи, Святóму Воскресéнiю Твоемý.

Чтец: Ты взял ми еси́, Хрiстé, прегрешéнiй осуждéнiе:// Ты разруши́л еси́ болéзни смéртныя, Щéдре, Божéственным воскресéнiем Твои́м.

Хор: Пресвятáя Богорóдице, спасù нас.

Богорóдичен: Тя орýжiе непобеди́мое на враги́ предлагáем,// Тя утверждéнiе, и надéжду нáшего спасéнiя, Богоневéсто, стяжáхом.

Глас 4

Хор: Слáва, Гóсподи, Крестý Твоемý Честнóму и Воскресéнiю.

Чтец: Прiя́т Тя всегó усты́ ад безýмный:/ на Крестé бо пригвождéна Тя ви́дев,/ копiéм прободéна, бездыхáнна,/ Живáго Бóга прóста вменя́ше человéка.// Разумé же искуси́вый крéпость Твоегó Божествá.

Хор: Слáва, Гóсподи, Крестý Твоемý Честнóму и Воскресéнiю.

Чтец: Разрушéный, Человеколю́бче, Храм Твоегó Телесé,/ гроб раздели́вый и ад невóлею óба судá истязýеми суть:/ ов ýбо святы́х Твои́х дýши,// телесá же другíй соотсылáюще, Безсмéртне.

Глас 4

Хор: Пресвятáя Богорóдице, спасù нас.

Чтец: Дом Тя слáвы, Гóру Бóжiю Святýю, Чи́стая,/ Невéсту, Чертóг, Храм освящéнiя,/ Сын Бóжiй, в Тя всели́вся,// и рай слáдости присносýщныя нам содéла.

Хор: Пресвятáя Богорóдице, спасù нас.

Чтец: Плоть от крóве Дéвственныя прiя́л еси́, Хрiстé,/ Безсéменну, Пречи́сту, Ипостáсну,/ и словéсну и ýмну, одушевлéнну,/ дéйственну, хотéтельну,// Самовлады́чну и Самовлáстну.

Глас 6

Хор: Святíи отцы́, молúте Бóга о нас.

Чтец: Отцéв начáток, я́ко началовождá закóна и благодáти,/ от рóда Авраáмля днесь Данiи́ла Божéственнаго почти́м:/ я́ко прорóк бо Бóжiй предвозвести́ Хрiстá от Дéвы// и Сегó предусретáет Божéственное рождéнiе. (Двáжды)

Хор: Святíи отцы́, молúте Бóга о нас.

Чтец: Прописáвше я́сно к нам Госпóдне пришéствiе Áнгеловым сошéствiем,/ угаси́ша Авраáмстiи óтроцы пещь/ и, тучерóсен огнь содéлавше,// в сем вéрою óбраза златáго слáву изнури́ша. (Двáжды)

Слáва Ѻтцý и Сы́ну и Святóму Дýху.

Тропáрь: Загради́ устá зверéй Данiи́л в рóве Дýхом,/ óгненную же крéпость угаси́ша Авраáмстiи óтроцы благодáтiю/ и, спáсшеся сíи от тли, предвозвещáют Хрiстá из Дéвы,// моля́ще я́ко Избáвителя спасéнiя нáшего.

И ны́не и прúсно и во вéки векóв. Амúнь.

Богорóдичен: Божéственным Дýхом явля́я от нас безстрáстно Твоé прiя́тiе, Исáiа вопiя́ше, Гóсподи,/ бóдрствуя закóном благодáти:/ от рóда ýбо Авраáмля, от плéмене же Iýдова по плóти Дéва,// без сéмене, грядéт раждáющи.

Катавáсiя Рождествá (глас 1): Бог сый ми́ра, Отéц щедрóт,/ Вели́каго Совéта Твоегó Áнгела,/ мир подавáюща, послáл еси́ нам:/ тем, Богоразýмiя к свéту настáвльшеся,/ от нóщи ýтренююще,// славослóвим Тя, Человеколю́бче.

ПЕСНЬ 6

Iрмóс: Пожрý Ти со глáсом хвалéнiя, Гóсподи,/ Цéрковь вопiéт Ти,/ от бесóвскiя крóве очи́щшися/ рáди ми́лости от ребр Твои́х// истéкшею Крóвiю.

Хор: Слáва, Гóсподи, Святóму Воскресéнiю Твоемý.

Чтец: Возшéл еси́ на Крест, си́лою препоя́сався,/ и соплéтся с мучи́телем, я́ко Бог, с высоты́ свергл еси́,// Адáма же непобеди́мою си́лою воскреси́л еси́.

Хор: Слáва, Гóсподи, Святóму Воскресéнiю Твоемý.

Чтец: Воскрéсл еси́ блистáяйся крáсный из грóба, Хрiстé,/ и разгнáл еси́ вся враги́ Божéственною си́лою Твоéю,// и вся, я́ко Бог, весéлiя испóлнил еси́.

Хор: Пресвятáя Богорóдице, спасù нас.

Богорóдичен: О чýдо всех чудéс новéйшее!/ Я́ко Дéва во утрóбе, вся́ческая обдержáщаго// неискусомýжно зачéнши, не тесновмести́.

Глас 4

Хор: Слáва, Гóсподи, Крестý Твоемý Честнóму и Воскресéнiю.

Чтец: Прiя́т Тя всегó усты́ ад безýмный:/ на Крестé бо пригвождéна Тя ви́дев,/ копiéм прободéна, бездыхáнна,/ Живáго Бóга прóста вменя́ше человéка.// Разумé же искуси́вый крéпость Твоегó Божествá.

Хор: Слáва, Гóсподи, Крестý Твоемý Честнóму и Воскресéнiю.

Чтец: Разрушéный, Человеколю́бче, Храм Твоегó Телесé,/ гроб раздели́вый и ад невóлею óба судá истязýеми суть:/ ов ýбо святы́х Твои́х дýши,// телесá же другíй соотсылáюще, Безсмéртне.

Глас 4

Хор: Пресвятáя Богорóдице, спасù нас.

Чтец: Дрéвле ýбо прельсти́ мя змíй, и умори́ мя,/ прамáтерiю моéю Éвою:// ны́не же, Чи́стая, Тобóю создáвый мя из истлéнiя воззвá.

Хор: Пресвятáя Богорóдице, спасù нас.

Чтец: Бéздна Тя бéздну неизречéнно,/ благоутрóбiя Отрокови́це, избрáнную показá чудéс:/ и҆́бо из Тебé мóлнiею Божествá,// би́сер Хрiстóс возсiя́.

Глас 6

Хор: Святíи отцы́, молúте Бóга о нас.

Чтец: Нрав страннолюби́в, вéра же высокá Авраáма, сýща прáотца;/ тéмже, Божéственное тáинство обрáзне прiéм, рáдовашеся,// пред Хрiстóм же текíй ны́не весели́тся. (Двáжды)

Хор: Святíи отцы́, молúте Бóга о нас.

Чтец: Тварь повинý ны́не вéра отрокóм дáром Зижди́теля:/ огнь бо всея́дец и безстýдный устыдéся// чтýщих огня́ дéлателя, Iисýса Хрiстá. (Двáжды)

Слáва Ѻтцý и Сы́ну и Святóму Дýху.

Тропáрь: Мíра свирéпство пришéствiем Хрiстóвым сочисля́тися изъяви́,/ к ми́ру глубóкому боголéпно, загради́в устá львов,// Данiи́л прорóк в рóве иногдá.

И ны́не и прúсно и во вéки векóв. Амúнь.

Богорóдичен: Из ложéсн родилá еси́ дéвственных Хрiстá, Марíе, Мáти безмýжная,/ Егóже прорóцы ви́девше духóвне,// Тогó предликовствýют ны́не отцы́ рождéственная.

Катавáсiя Рождествá (глас 1): Из утрóбы Ióну младéнца изблевá морскíй зверь,/ яковá прiя́т,/ в Дéву же всéльшееся Слóво/ и плоть прiéмшее прóйде сохрáншее нетлéнну./ Егóже бо не пострадá истлéнiя,// Рóждшую сохрани́ невреждéнну.

Гóсподи, поми́луй. (Трúжды)

Слáва Ѻтцý и Сыну и Святóму Дýху, и ны́не и присно и во вéки векóв, аминь.

Кондáк отцев, глас 6: Рукопи́саннаго óбраза не почéтше,/ но Неопи́санным Существóм защити́вшеся, треблажéннiи,/ в пóдвизе огня́ прослáвистеся,/ средé же плáмене нестерпи́маго стоя́ще, Бóга призвáсте:/ ускори́, о Щéдрый, и потщи́ся, я́ко Ми́лостив, в пóмощь нáшу,// я́ко мóжеши хотя́й.

Íкос: Простри́ Твою́ рýку,/ éюже дрéвле прiя́ша искушéнiе еги́птяне борю́щiи и еврéе бори́мiи./ Не остáви нас, да не пожрéт нас смерть, жáждущая нас,/ и сатанá, ненави́дяй нас,/ но прибли́жися нам и пощади́ дýши нáша,/ я́коже пощади́л еси́ иногдá óтроки Твоя́,/ сýщiя в Вавилóне, непрестáнно слáвящiя Тя,/ и ввéрженныя Тебé рáди в пещь,/ и от сея́ вопiю́щiя Ти:/ ускори́, Щéдрый, и потщи́ся, я́ко Ми́лостив, на пóмощь нáшу,// я́ко мóжеши хотя́й.

ПЕСНЬ 7

Iрмóс: В пещи́ Авраáмстiи óтроцы перси́дстей,/ любóвiю благочéстiя пáче,/ нéжели плáменем, опаля́еми, взывáху:// благословéн еси́ в хрáме слáвы Твоея́, Гóсподи.

Хор: Слáва, Гóсподи, Святóму Воскресéнiю Твоемý.

Чтец: К нетлéнiю человéчество призвáся,/ Божéственною измовéно Крóвiю Хрiстóвою, благодáрно воспевáющее:// благословéн еси́ в хрáме Слáвы Твоея́, Гóсподи.

Хор: Слáва, Гóсподи, Святóму Воскресéнiю Твоемý.

Чтец: Я́ко Живонóсец, я́ко рая́ краснéйшiй/ вои́стинну, и чертóга вся́каго цáрскаго показáся светлéйшiй, Хрiстé, гроб Твой,// истóчник нáшего воскресéнiя.

Хор: Пресвятáя Богорóдице, спасù нас.

Богорóдичен: Вы́шняго освящéнное Божéственное селéнiе, рáдуйся,/ Тобóю бо дадéся рáдость, Богорóдице, зовýщим:// благословéна Ты в женáх еси́, Всенепорóчная Влады́чице.

Глас 4

Хор: Слáва, Гóсподи, Крестý Твоемý Честнóму и Воскресéнiю.

Чтец: Смири́л еси́ на дрéво воздвизáемь, óко высóкое,/ и превознесéнную бровь на зéмлю низложи́л еси́, спасы́й человéка:// Препéтый отцéв Госпóдь и Бог, благословéн еси́.

Хор: Слáва, Гóсподи, Крестý Твоемý Честнóму и Воскресéнiю.

Чтец: Си́лою Твоéю рог наш возвы́си служáщих Ти, воскресы́й из мéртвых,/ и áдово истощи́вый прéжде многочеловéчное богáтство, Влады́ко:// Препéтый отцéв Госпóдь и Бог, благословéн еси́.

Глас 4

Хор: Пресвятáя Богорóдице, спасù нас.

Чтец: Привлачи́т мя к пéнiю любóвь дéвственная огнь,/ и҆́же в сéрдцы, вопи́ти Мáтери и Дéве:// Благословéнная, Госпóдь си́лам с Тобóю.

Хор: Пресвятáя Богорóдице, спасù нас.

Чтец: Превы́шши твáри яви́лася еси́,/ я́ко Творцá рóждши и Гóспода./ Тéмже Ти вопiю́, Богорóдице:// Благословéнная, Госпóдь си́лам с Тобóю.

Глас 6

Хор: Святíи отцы́, молúте Бóга о нас.

Чтец: Хрiстá роди́в по плóти, вéрою,/ родоначáльниче óтче Авраáме, яви́лся еси́ язы́ков дýхом отéц я́ве/ во спасéнiе нас, пою́щих:// Избáвителю Бóже, благословéн еси́.(Двáжды)

Хор: Святíи отцы́, молúте Бóга о нас.

Чтец: Бездýшнаго шýма, вотщé восклицáющаго,/ одушевлéнных посрами́ песнь:/ пещь бо, огнéм горя́щую, телесы́ попирáюще,/ óтроцы неврéдно Избáвителю пою́т:// Бóже, благословéн еси́. (Двáжды)

Слáва Ѻтцý и Сы́ну и Святóму Дýху.

Тропáрь: Видéнiем воззрéв духóвным, прорóк дрéвле Данiи́л/ Хрiстóво яви́ вторóе пришéствiе/ и я́же в нем стрáшная предвозвещáет, вопiя́:// Избáвителю Бóже, благословéн еси́.

И ны́не и прúсно и во вéки векóв. Амúнь.

Богорóдичен: Стрáнное чýдо, во прорóцех повествýемое и отцéм дрéвле явлéнно:/ Дéва Чи́стая, роди́ти хотя́щи, прiи́де на спасéнiе нас, песнопою́щих:// Избáвителю Бóже, благословéн еси́.

Катавáсiя Рождествá (глас 1): Óтроцы, благочéстiю совоспитáни,/ злочести́ваго велéнiя небрéгше,/ óгненнаго прещéнiя не убоя́шася,/ но, посредé плáмени стоя́ще, поя́ху:// отцéв Бóже, благословéн еси́.

ПЕСНЬ 8

Iрмóс: Рýце распростéр Данiи́л,/ львов зiя́нiя в рóве затчé,/ óгненную же си́лу угаси́ша,/ добродéтелiю препоя́савшеся,/ благочéстiя рачи́тели, óтроцы, взывáюще:// благослови́те, вся делá Госпóдня, Гóспода.

Хор: Слáва, Гóсподи, Святóму Воскресéнiю Твоемý.

Чтец: Рýце распростéр на Крестé, язы́ки вся собрáл еси́,/ и еди́ну яви́л еси́, Влады́ко/ Цéрковь воспевáющую Тя, земнýю и небéсную, соглáсно пою́щим:/ благослови́те вся делá Госпóдня, Гóспода,// пóйте и превозноси́те Егó во вéки.

Хор: Слáва, Гóсподи, Святóму Воскресéнiю Твоемý.

Чтец: Белообрáзен яви́ся женáм,/ непристýпным свéтом воскресéнiя блистáяйся Áнгел,/ что Живáго во грóбе, вопiя́, и҆́щете я́ко мéртва;/ вои́стинну востá Хрiстóс, Емýже вопiéм:/ вся делá пóйте Гóспода,// и превозноси́те во вся вéки.

Хор: Пресвятáя Богорóдице, спасù нас.

Богорóдичен: Ты Еди́на во всех рóдех, Дéво Пречи́стая,/ Мáти яви́лася еси́ Бóжiя:/ Ты Божествá былá еси́ жили́ще, Всенепорóчная,/ не опáльшися огнéм Непристýпнаго Свéта.// Тéмже вси Тя благослови́м, Марíе Богоневéсто.

Глас 4

Хор: Слáва, Гóсподи, Крестý Твоемý Честнóму и Воскресéнiю.

Чтец: Непрáведное ви́дящи заколéнiе Твоé тварь, омрачáющися рыдáше:/ земли́ бо смущáющейся, во мрак, я́ко в ри́зу чéрну сóлнце облечéся:/ мы же Тя непрестáнно поéм,// и превознóсим, Хрiстé, во вéки.

Хор: Слáва, Гóсподи, Крестý Твоемý Честнóму и Воскресéнiю.

Чтец: Сшéдый ко мне дáже до áда,/ и всем путесотвори́вый воскресéнiе, пáки возшéл еси́,/ взем мя на рáму Твоéю, и Отцý привéл еси́./ Тéмже зовý Ти: Гóспода пóйте делá,// и превозноси́те во вся вéки.

Глас 4

Хор: Пресвятáя Богорóдице, спасù нас.

Чтец: От ребрá Адáмова создáвый Тя,/ от Твоегó дéвства воплоти́ся, И҆́же всех Госпóдь,/ Егóже пою́ще, вопiéм:/ вся делá благослови́те, пóйте Гóспода,// и превозноси́те Егó во вéки.

Хор: Пресвятáя Богорóдице, спасù нас.

Чтец: В сéни Авраáм узрé, éже в Тебé, Богорóдице, тáинство,/ Сы́на бо Твоегó Безплóтнаго прiя́т, поя́:/ вся делá благослови́те, пóйте Гóспода,// и превозноси́те Егó во вéки.

Глас 6

Хор: Святíи отцы́, молúте Бóга о нас.

Чтец: Твоé заколéнiе предъизобразýя, Авраáм, Хрiстé,/ егóже роди́ сы́на, на горé повинýяся Тебé, Влады́ко,/ я́коже овчá, взы́де пожрéти хотя́й вéрою;/ но возврати́ся, рáдуяся, с ним,// и слáвя, и превознося́ Тя, Избáвителя ми́ра.(Двáжды)

Хор: Святíи отцы́, молúте Бóга о нас.

Чтец: Плáменем неутруждéнным, Хрiстé, облечéну Ти, я́ко ри́зою Божéственною,/ огнь святы́х óтрок Твои́х угаси́ зелó,/ и росá Твои́м низхождéнiем пою́щим шумя́ше:// свящéнницы, пóйте и превозноси́те Егó во вéки. (Двáжды)

Благословúм Отцá, и Сы́на, и Святáго Дýха, Гóспода.

Тропáрь: Даéтся львом в снедь судóм непрáведным прорóк Данiи́л,/ но имя́ше повелéнiем воздержáнiя спóстники благочéстно звéри во глубинé рóвища./ Тогó моли́твами, Авраáма же и отрокóв// спаси́ в мíре, Хрiстé, пою́щiя Тя.

И ны́не и прúсно и во вéки векóв. Амúнь.

Богорóдичен: Егóже провозвести́ша вéрно прорóчестiи глáси,/ Iисýса Емманýила, в человéчесте óбразе грядýща,/ Бóжiя и Ѻ́тча Сы́на же и Собезначáльное Слóво,// от Дýха Святáго Дéва Марíя раждáет неискусомýжно в Вифлеéме грáде.

Хор: Хвáлим, благословúм, покланя́емся Гóсподеви, пою́ще и превознося́ще во вся вéки.

Катавáсiя Рождествá (глас 1): Чýда преестéственнаго/ росодáтельная изобрази́ пещь óбраз:/ не бо, я́же прiя́т, пали́т ю́ныя,/ я́ко нижé огнь Божествá Дéвы,/ в Ню́же вни́де утрóбу./ Тем воспевáюще, воспоéм:/ да благослови́т тварь вся Гóспода// и превознóсит во вся вéки.

Продолжение здесь