Святителя Николая, чудотворца (Никола зимний) ВСЕНОЩНОЕ БДЕНИЕ. УТРЕНЯ (окончание) ЧАС ПЕРВЫЙ
19 декабря́ 2022 г. Святúтеля Нiколáя, архiепúскопа Мир Ликíйских, чудотвóрца (Нiкола зимнiй). Прáздничная слýжба для домáшнего (келéйнаго) совершéнiя. Слýжба мiрскúм чúном.
Окончáние всенóщного бдéния. Начáло здесь ( великая вечéрня), здесь ( ýтреня) здесь ( продолжéние ýтрени с канóном)
Глас 1
Хор: Святúтелю óтче Нiкóлае, молù Бóга о нас.
Чтец: Ликовству́ем духо́вно, вси празднолю́бцы,/ Небеса́, весели́теся, го́ры же и хо́лми,/ це́ркви, и дев ли́цы, и по́стников све́тлость,// в па́мяти всеблаже́ннаго, в не́йже, соше́дшеся, Спа́са велича́ем.
Хор: Святúтелю óтче Нiкóлае, молù Бóга о нас.
Чтец: Да пою́т пе́сньми непреста́нно вси концы́,/ похва́льными венцы́ верх Никола́я украша́юще я́ве,/ уго́дника Христа́ Бо́га,// Его́же моли́твами от страсте́й же и бед да изба́вимся.
Хор: Святúтелю óтче Нiкóлае, молù Бóга о нас.
Чтец: Я́ко досто́йное приими́ пе́ние, Нико́лае, ма́лаго труда́ сего́,/ я́коже Христо́с прия́т вдовы́ два ле́пта./ Не возгнуша́йся окая́ннаго страстьми́,// не гордя́ся бо, треблаже́нне, дерзну́х.
Хор: Слáва Отцý и Сы́ну и Святóму Дýху.
Трóичен: Соединя́ется Единосу́щною Во́лею Тро́ица,/ разделя́ется же па́ки Ли́чно неразде́льне,/ соблюда́ющи Держа́ву при́сно,/ Оте́ц, Сын и Дух Живы́й,// Еди́н Триипоста́сный Бог, Его́же велича́ем.
Хор: И ны́не и прúсно и во вéки векóв. Амúнь.
Богорóдичен: Потреби́ся вся́ка печа́ль Рождество́м Твои́м,/ и отъя́т Госпо́дь рыда́ние, и плач, и вся́ку слезу́/ от вся́каго лица́ земноро́дных, Чи́стая Богоро́дице Неискусобра́чная.// О Тебе́ и мы до́лги исполня́ем.
Катавáсiя Рождествá (глас 1): Тáинство стрáнное ви́жу и преслáвное:/ Нéбо - вертéп, Престóл Херувíмский - Дéву,/ я́сли - вмести́лище,/ в ни́хже возлежé Невмести́мый - Хрiстóс Бог,// Егóже, воспевáюще, величáем.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Светúлен святúтеля: Вели́каго архипáстыря и иерáрха вси,/ председáтеля Мирлики́йскаго Николáя восхвáлим:/ мнóги бо мýжи спасé, непрáведно умрéти имýщия,/ и царю́ явля́ется со Авлáвием во сне,// решá непрáведный суд.
Слáва Ѻтцý и Сы́ну и Святóму Дýху.
Ин светúлен святúтеля: Вельми́ тя прослáви в чудесéх Госпóдь/ и жи́ва и по концé, иерáрше Никóлае:/ кто бо от любвé вéры тóкмо святоé твоé и́мя призовéт и не áбие услы́шан,// тéпла тя предстáтеля обретáет?
И҆ ны́не и прúсно и во вéки векóв. Амúнь.
Богорóдичен из минéи: Му́дрость Ипоста́сную, и Сло́во пресу́щественное,/ и Врача́ всех Христа́ ро́ждши, Де́во,/ гное́ния и я́звы души́ моея́ исцели́ лю́тыя и многовре́менныя// и се́рдца моего́ стра́стная помышле́ния умертви́.
ХВАЛИТНЫ
Хор, глас 1: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.
Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речé, и бы́ша, Той повелé, и создáшася. Постáви я́ в век и в век вéка, повелéние положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сы́нове Сióни возрáдуются о Царé своéм. Да восхвáлят и҆́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остри́ в рукáх их: сотвори́ти отмщéнiе во языцех, обличéнiя в лю́дех, связáти цари́ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егó.
Стiхúры святúтеля, самоглáсны, глас 1: Воззрéв неуклóнно на высотý рáзума/ и узрéв неявлéнно премýдрости глубинý,/ твои́ми учéньми мир обогати́л еси́, óтче.// О нас при́сно моли́ся Христý, святи́телю Никóлае.
Хвалúте Бóга во святых Егó,/ хвалúте Егó в утвержéнiи сúлы Егó.
Стiхúра: Человéче Бóжий, и вéрный угóдниче,/ и строи́телю Тогó тáин, и мýжу желáний духóвных,/ стóлпе одушевлéнный, и вдохновéнный óбраз,/ я́ко Божéственное бо сокрóвище тя Ми́рская Цéрковь, чудя́щися, прия́ла есть// и моли́твенника о душáх нáших.
На 6: Хвалúте Егó на сúлах Егó, хвалúте Егó по мнóжеству велúчествiя Егó.
И́ны стiхúры святúтеля, глас 1: Церкóвныя цвéты облетáя,/ я́коже птенéц Вы́шняго гнездá Áнгельскаго,/ Никóлае треблажéнне,/ зовéши при́сно к Бóгу о всех нас,/ и́же в нýждных бедáх и искушéниих,// и избавля́еши моли́твами твои́ми.
Хвалúте Егó во глáсе трýбнем, хвалúте Егó во псалтúри и гýслех.
Стiхúра: Свящéнныя одéжды красотý/ дéятельными содéлал еси́ добродéтельми светлéйшую,/ óтче Богонóсе./ Тéмже нам священнодéйствуеши ди́вная,/ слáвных чудéс священнодéтелю,// лю́тых избавля́я ны.
На 4. Хвалúте Егó в тимпáне и лúце, хвалúте Егó во стрýнах и оргáне.
Стiхúра: Неви́димых добро́ты проходя́,/ стра́шную о́ну разуме́л еси́/ сла́ву святы́х, свя́те./ Те́мже нам Небе́сная словеса́/ присноживо́тных о́нех виде́ний явля́еши,// свяще́ннейший о́тче.
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Стiхúра: Я́ко во сне предста́л еси́ благочести́вому царю́/ и у́зники, о́тче, от сме́рти изба́вил еси́;/ моли́ся непреста́нно,/ я́ко да и ны́не моли́твами твои́ми/ изба́вимся от искуше́ний, и бед, и боле́зней,// досто́йно благохва́лящии тя.
Слáва Отцý и Сыну и Святóму Дýху.
Глас 5: Воструби́м трубóю пéсней,/ взыгрáем прáзднственная и ликовствýем, рáдующеся,/ в молéбное торжествó Богонóснаго отцá,/ цари́ и кня́зи да стекýтся,/ и́же сóнным стрáшным явлéнiем царя́ препирáюща/ непови́нно держи́мыя три отпусти́ти воевóды да воспою́т;/ пáстыри и учи́тели,/ Дóброму Пáстырю подобноревни́тельна пáстыря,/ сошéдшеся, восхвáлим;/ и́же в недýзех - врачá, в бедáх - избáвителя,/ грéшнiи - застýпника, ни́щiи - сокрóвище/ и и́же в скóрбех - утéшителя,/ спýтника - путешéствующiи,/ на мóри сýщiи - прави́теля/ и вси вездé тéпле предваря́юща./ Вели́каго святи́теля/ восхваля́юще, си́це рцем:/ пресвяты́й Никóлае, предвари́, и избáви нас от настоя́щiя беды́,// и спаси́ стáдо твоé моли́твами твои́ми.
И ныне и прúсно и во вéки векóв, амúнь.
Богорóдичен (самоподóбен, творéнiе Патрiáрха Гéрмана) глас 2: Востру́бим трубо́ю пе́сней:/ прини́кши бо свы́ше, Всецари́ца Ма́ти Де́ва/ благослове́ньми венчава́ет воспева́ющия Ю́./ Лю́дие да стеку́тся/ и Цари́це да воспле́щут в пе́снех, Царя́ ро́ждшей,/ и́же сме́ртию держи́мыя пе́рвее/ разреши́ти человеколю́бно благоволи́вшаго;/ па́стырие и учи́телие,/ До́браго Па́стыря Пречи́стую Ма́терь, соше́дшеся, восхва́лим./ Све́щник златоза́рный, светоно́сный о́блак,/ Небе́с простра́ннейшую, одушевле́нный киво́т,/ огнезра́чный Влады́чень престо́л,/ манноприе́мную злату́ю ста́мну,/ затворе́нную Сло́ва дверь,/ всех христиа́н прибе́жище,/ пе́сньми Богогла́сными похваля́юще, си́це рцем:/ пала́то Сло́ва,/ сподо́би смире́нных нас Небе́снаго Ца́рствия:// ничто́же бо невозмо́жно хода́тайству Твоему́.
Возглас: Слáва Тебé, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрїстé, и Святы́й Дýше. Гóсподи Бóже, Áгнче Бóжїй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцá, поми́луй нас. Яко Ты есѝ Един Свят; Ты есѝ Един Госпóдь, Iисýс Хрїстóс, в слáву Бóга Отцá, ами́нь.
На всяк день благословлю́ Тя и восхвалю́ и҆́мя Твоé во вéки, и в век вéка.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоé во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был еси нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебé. Гóсподи, к Тебé прибегóх, научѝ мя твори́ти вóлю Твою́, яко Ты есѝ Бог мой, яко у Тебé истóчник животá, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, поми́луй нас. (3 раза)
Хор: Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помилуй нас.
Тропáрь Святúтеля Николáя, глас 4: Прáвило вéры и óбраз крóтости, воздержáния учи́теля яви́ тя стáду твоему́ Я́же вещéй И́стина. Сегó рáди стяжáл еси́ смирéнием высóкая, нищетóю богáтая, óтче священноначáльниче Никóлае, моли́ Христá Бóга, спасти́ся душáм нáшим.
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Богорóдичен воскрéсный (отпустúтельный), глас 4: Éже от вéка утаéное/ и Áнгелом несвéдомое тáинство,/ Тобóю, Богорóдице, сýщим на земли́ яви́ся Бог,/ в несли́тном соединéнiи воплощáемь,/ и Крест вóлею нас рáди воспрiи́м,/ и́мже воскреси́в первоздáннаго,/ спасé от смéрти дýши нáша.
Гóсподи поми́луй (40 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Гóсподи поми́луй (12раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Утвердѝ, Бóже, святýю правослáвную вéру, правослáвных христiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 раза)
Гóсподи, благословѝ.
ОТПУСТ
Хрїстóс, и҆́стинный Бог наш, моли́твами пречи́стыя Своея́ Мáтере, святы́х слáвных и всехвáльных Апóстол, преподóбных и Богонóсных отéц нáших и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрiстý, Царéви нáшему Бóгу.
Прiиди́те, поклони́мся и припадéм Самомý Хрiстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моé. Вонмѝ глáсу молéнiя моегó, Царю́ мой и Бóже мой, яко к Тебé помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебé лукáвнуяй, нижé пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебé лю́бящiи имя Твоé. Яко Ты благослови́ши прáведника, Гóсподи: яко орýжiем благоволéнiя венчáл еси нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты еси. Не отвратѝ человéка во смирéнiе, и рекл еси: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травá мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л еси беззакóнiя нáша пред Тобóю: век наш в просвещéнiе лицá Твоегó. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегó, и от стрáха Твоегó, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы́ Твоя. Испóлнихомся заýтра ми́лости Твоея, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны еси, лéта в ня́же ви́дехом злáя. И при́зри на рабы́ Твоя́, и на делá Твоя, и настáви сы́ны их. И бýди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебé, Гóсподи. Пою́ и разумéю в путѝ непорóчне, когдá прiи́деши ко мне? Прехождáх в незлóбiи сéрдца моегó посредé дóму моегó. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпé мне сéрдце стропти́во, уклоня́ющагося от менé лукáваго не познáх. Оклеветáющаго тай и҆́скренняго своегó, сегó изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредé дóму моегó творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýиа, аллилýиа, аллилýиа, слáва Тебé Бóже. (3 раза)
Гóсподи, помúлуй. (3 раза)
Слáва Отцý и Сы́ну и Святóму Дýху.
Тропáрь Святúтеля Николáя, глас 4: Прáвило вéры и óбраз крóтости, воздержáния учи́теля яви́ тя стáду твоему́ Я́же вещéй И́стина. Сегó рáди стяжáл еси́ смирéнием высóкая, нищетóю богáтая, óтче священноначáльниче Никóлае, моли́ Христá Бóга, спасти́ся душáм нáшим.
И҆ ны́не и прúсно и во вéки векóв. Амúнь.
Богорóдичен: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблá есѝ цвет нетлéнiя. Дéву, я́ко пребылá есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогó молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы́ человéческiя, и сохраню́ зáповеди Твоя́. Лицé Твоé просветѝ на рабá Твоегó и научѝ мя оправдáнiем Твои́м.
Да испóлнятся устá моя хвалéнiя Твоегó, Гóсподи, я́ко да воспою́ слáву Твою́, весь день великолéпiе Твоé.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 раза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрiстé, Сыне Бóжiй, поми́луй нас. Ами́нь.
КОНДАК
Кондáк Святúтеля Николáя, глас 3: В Ми́рех, свя́те, священнодéйствитель показáлся еси́, Христóво бо, преподóбне, Евáнгелие испóлнив, положи́л еси́ дýшу твою́ о лю́дех твои́х и спасл еси́ непови́нныя от смéрти. Сегó рáди освяти́лся еси́, я́ко вели́кий таи́нник Бóжия благодáти.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрiстé Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесá очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрiстé, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицá Твоегó, да в нем ýзрим Свет Непристýпный: и испрáви стопы́ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 8: Взбрáнной Воевóде победи́тельная,/ я́ко избáвльшеся от злы́х,/ благодáрственная восписýем Ти́ раби́ Твои́, Богорóдице;/ но я́ко имýщая держáву непобеди́мую,/ от вся́ких нас бед свободи́, да зовéм Ти́:// рáдуйся, Невéсто Неневéстная.
Слáва Отцý и Сыну и Святóму Дýху, и ны́не и при́сно и во вéки векóв, аминь.
Гóсподи, поми́луй. (3 раза)
Гóсподи, благословѝ.
Хрiстóс, и҆́стинный Бог наш, моли́твами пречи́стыя Своея́ Мáтере, преподóбных и Богонóсных отéц нáших и всех святы́х, поми́лует и спасéт нас, я́ко Благ и Человеколю́бец.
С утрá чти часы и обéдницу