Неделя 27 по Пятидесятнице. Преподобного Саввы Освященного, глас 2 ВСЕНОЩНОЕ БДЕНИЕ. УТРЕНЯ. КАНОН
18 декабря́ 2022 гóда. Недéля 27 по Пятидеся́тнице. Преподóбнаго Сáввы Освящéннаго. Глас 2. Воскрéсная прáздничная слýжба для домáшнего (келéйнаго) совершéнiя. Послéдованiе ýтрени. Слýжба мiрскúм чúном.
Начало зри здесь ( великая вечéрня) и здесь ( ýтреня)
ПСАЛОМ ИЗБРАННЫЙ
Терпя́ потерпéх Гóспода, и внят ми, и услы́ша моли́тву мою́:/ Постáви на кáмени нóзе мои́, и испрáви стопы́ моя́./ Се удали́хся бéгая, и водвори́хся в пусты́ни./ Уподóбихся нея́сыти пусты́нней./ Бдех, и бых я́ко пти́ца осóбящаяся на зде./ Колéна моя́ изнемогóста от пóста:/ И плоть моя́ измени́ся елéа рáди./ Слезáми мои́ми постéлю мою́ омочý./ Я́ко обыдóша мя пси мнóзи, сонм лукáвых одержáша мя./ Напрягóша лук свой вещь гóрьку:/ Состреля́ти в тáйных непорóчнаго./ Предзрéх Гóспода предо мнóю вы́ну, я́ко одеснýю менé есть, да не подви́жуся./ Вси язы́цы обыдóша мя, и И́менем Госпóдним противля́хся им./ Благословéн Госпóдь, И́же не дадé нас в лови́тву зубóм их:/ Да исповéдятся Тебé, Гóсподи, вся делá Твоя́:/ И преподóбнiи Твои́ да благословя́т Тя./ И увéдите, я́ко удиви́ Госпóдь преподóбнаго Своегó./ И утруди́ся во век, и жив бýдет до концá./ Храни́т Госпóдь дýши преподóбных Свои́х./ Восхвáлятся преподóбнiи во слáве, и возрáдуются на лóжах свои́х./ Честнá пред Гóсподем смерть преподóбных Егó.// Пóйте Гóсподеви преподóбнiи Егó, и исповéдайте пáмять святы́ни Егó, во всех лю́дех чудесá Егó.
Хор: Величáем Тя,/ преподóбне óтче Сáвво,/ и чтим святýю пáмять твою́,/ настáвниче монáхов// и собесéдниче áнгелов.
ТРОПАРИ ВОСКРЕСНЫЕ, ГЛАС 5
Благословéн есú, Гóсподи,/научù мя оправдáнiем Твоúм. (Пс.118:12)
Áнгельскiй собóр удиви́ся,/ зря Тебé в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Благословéн есú, Гóсподи,/научù мя оправдáнiем Твоúм.
Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел миронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Благословéн есú, Гóсподи,/научù мя оправдáнiем Твоúм.
Зелó рáно мvронóсицы течáху/ ко грóбу Твоему рыдáющiя,/ но предстá к ним Áнгел и речé:/ рыдáнiя врéмя престá, не плáчите,/ воскресéнiе же апóстолом рцы́те.
Благословéн есú, Гóсподи,/научù мя оправдáнiем Твоúм.
Мvронóсицы жены́ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речé, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егó Сы́нови, и Святóму Дýху,/ Святéй Трóице во еди́ном существé,/ с Серафíмы зовýще:/ Свят, Свят, Свят еси, Гóсподи.
И ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехá, Дéво, Адáма избáвила еси,/ рáдость же Éве/ в печáли мéсто подалá еси,/ пáдшiя же от жи́зни/ к сей напрáви/ из Тебé воплоти́выйся Бог и Человéк.
Чтец: Аллилýiа, аллилýiа, аллилýiа, слáва Тебé Бóже. (3 раза)
Гóсподи, поми́луй. (3 раз)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоú воскрéсны, глас 2: По стрáсти шéдша во гроб жены́,/ во éже помáзати тéло Твоé, Хрїстé Бóже,/ ви́деша áнгелы во грóбе, и ужасóшася:/ глас бо слы́шаху от них, яко воскрéсе Госпóдь,// дáруя мíрови вéлiю ми́лость.
СЕДАЛЬНЫ ПРАЗДНИКА
Глас 1 (по 1‑м стiхослóвiи): Житié благочéстно на земли́ скончáв,/ прiя́телище чи́стое ты Дýха яви́лся еси́,/ просвещáя вéрою к тебé притекáющiя, блажéнне./ Тéмже моли́ твоегó Влады́ку просвети́ти дýши нáша,// воспевáющих тя, Сáвво Богомýдре, óтче наш.
Глас 4 (по 2‑м стiхослóвiи): Возсiя́в я́коже сóлнце, лучáми облистáеши, преподóбне,/ всемý ми́ру, далечесiя́тельными учéнiи твои́ми,// чýдный Сáвво светонóсче, преподóбных похвалó.
Слáва Отцý и Сы́ну и Святóму Дýху.
Седáлен прáздника по полiелéи, глас 8: Из утрóбы освяти́лся еси́ я́ко вои́стинну свящéннейшiй, Сáвво,/ и на земли́, я́ко Áнгел, пожи́л еси́:/ плоть бо умертви́л еси́ воздержáнiем,/ Евфи́мiя бо Вели́каго нрáву достóйно поревновáл еси́/ и Трóицы показáлся еси́ угóдник, блажéнне./ Тéмже и к рéвности Божéственнаго твоегó житiя́/ ли́ки совокýпил еси́ монáшествующих,/ приснопáмятне, Богонóсе óтче наш,/ моли́ся Хрiстý Бóгу грехóв оставлéнiе подáти// чтýщим любóвiю святýю пáмять твою́.
И ны́не и прúсно и во вéки векóв. Амúнь.
Богорóдичен из Минéи, глас 8: Небéсную дверь и кiвóт,/ всесвятýю гóру, свéтлый óблак воспои́м,/ неопали́мую купинý, словéсный рай,/ Éвы воззвáнiе, вселéнныя всея́ вели́кое сокрóвище,/ я́ко спасéнiе в Ней содéяся мíра/ и оставлéнiе дрéвних согрешéнiй./ Сегó рáди и вопiéм Ей:/ моли́ся Сы́ну Твоемý прегрешéнiй оставлéнiе даровáти/ благочéстно покланя́ющимся всесвятóму Рождествý Твоемý.
СТЕПЕННА, ГЛАС 2
1 АНТИФОН
Хор: На нéбо óчи пущáю моего сéрдца, к Тебé, Спасé,// спасú мя Твоúм осiя́нiем. (Двáжды)
Поми́луй нас согрешáющих Тебé мнóго,/ на вся́кiй час, о Хрїстé мой,// и даждь óбраз прéжде концá покáятися Тебé. (Двáжды)
Слáва Ѻтцý и Сы́ну и Святóму Дýху.
Святóму Дýху, Éже цáрствовати подобáет,/ освящáти, подвизáти тварь:// Бог бо есть, Единосýщен Ѻтцý и Слóву.
И ны́не и прúсно и во вéки векóв. Амúнь.
Святóму Дýху, Éже цáрствовати подобáет,/ освящáти, подвизáти тварь:// Бог бо есть, Единосýщен Ѻтцý и Слóву.
2 АНТИФОН
Áще не Госпóдь бы был в нас,/ кто довóлен цел сохранéн бы́ти от врагá,// кýпно и человекоубíйцы? (Двáжды)
Зубóм их не предáждь, Спáсе, Твоегó рабá:// и҆́бо львóвым óбразом на мя подвизáются вразѝ мои. (Двáжды)
Слáва Ѻтцý и Сы́ну и Святóму Дýху.
Святóму Дýху живоначáлiе и честь:/ вся бо создáнная,/ я́ко Бог сый си́лою,// соблюдáет во Ѻтцé, Сы́ном же.
И ны́не и прúсно и во вéки векóв. Амúнь.
Святóму Дýху живоначáлiе и честь:/ вся бо создáнная,/ я́ко Бог сый си́лою,// соблюдáет во Ѻтцé, Сы́ном же.
3 АНТИФОН
Надéющiися на Гóспода, уподóбишася горé святéй:// и҆́же никáкоже двúжутся прилóги врáжiими. (Двáжды)
В беззакóнiи рук свои́х, да не прóструт божéственне живýщiи:// не оставля́ет бо Хрїстóс жезлá на жрéбiи Своéм. (Двáжды)
Слáва Ѻтцý и Сы́ну и Святóму Дýху.
Святы́м Дýхом тóчится вся́ка премýдрость:/ отсю́ду благодáть апóстолом,// и страдáльчествы венчáются мýченицы, и прорóцы зрят.
И ны́не и прúсно и во вéки векóв. Амúнь.
Святы́м Дýхом тóчится вся́ка премýдрость:/ отсю́ду благодáть апóстолом,// и страдáльчествы венчáются мýченицы, и прорóцы зрят.
ПРОКИМЕН
Чтец: Прокíмен, глас вторы́й. Востáни, Гóсподи, Бóже мой, повелéнiем, и҆́мже заповéдал есѝ, и сонм людéй обы́дет Тя. (Пс.7:7Б-8А)
Хор: Востáни, Гóсподи, Бóже мой, повелéнiем, и҆́мже заповéдал есú,/ и сонм людéй обы́дет Тя.
Чтец: Гóсподи Бóже мой, на Тя уповáх, спасѝ мя. (Пс.7:2А)
Хор: Востáни, Гóсподи, Бóже мой, повелéнiем, úмже заповéдал есú,/ и сонм людéй обы́дет Тя.
Чтец: Востáни, Гóсподи, Бóже мой, повелéнiем, и҆́мже заповéдал есѝ.
Хор: И сонм людéй обы́дет Тя.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода. (Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Луки́ Святáго Евáнгелiя чтéнiе.
Хор: Слáва Тебé, Гóсподи, слáва Тебé.
(Лк.зач.113) Во врéмя óно Петр востáв течé ко грóбу, и прини́к ви́де ри́зы еди́ны лежáща: и оты́де, в себé дивя́ся бы́вшему. И се два от них бéста идýща в тóйже день в весь, отстоя́щу стáдiй шестьдеся́т от Iерусали́ма, éйже и҆́мя Еммаýс: и та бесéдоваста к себé о всех сих приклю́чшихся. И бысть бесéдующема и҆́ма и совопрошáющемася, и Сам Iисýс прибли́жився идя́ше с ни́ма: óчи же ею́ держáстеся, да Егó не познáета. Речé же к ни́ма: что суть словесá сiя́, о ни́хже стязáетася к себé идýща, и естá дря́хла? Отвещáв же еди́н, емýже и҆́мя Клеóпа, речé к Немý: Ты ли еди́н пришлéц еси́ во Iерусали́м, и не увéдел еси́ бы́вших в нем во дни сiя́? И речé и҆́ма: кíих? Óна же рéста емý: я́же о Iисýсе Назаряни́не, и҆́же бысть Муж Прорóк, си́лен дéлом и слóвом пред Бóгом и всéми людьми́: кáко предáша Егó архiерéи и кня́зи нáши на осуждéнiе смéрти, и распя́ша Егó: мы же надéяхомся, я́ко Сей есть хотя́ избáвити Iзрáиля: но и над всéми си́ми, трéтiй сей день есть днесь, отнéлиже сiя́ бы́ша. Но и жены́ нéкiя от нас ужаси́ша ны, бы́вшыя рáно у грóба: и не обрéтша телесé Егó, прiидóша, глагóлюща, я́ко и явлéнiе Áнгел ви́деша, и҆́же глагóлют Егó жи́ва. И идóша нéцiи от нас ко грóбу, и обрéтоша тáко, я́коже и жены́ рéша: Самогó же не ви́деша. И Той речé к ни́ма: о несмы́сленная и кóсная сéрдцем, éже вéровати о всех, я́же глагóлаша прорóцы: не сiя́ ли подобáше пострадáти Хрiстý и вни́ти в слáву свою́? И начéн от Моисéа и от всех прорóк, сказáше и҆́ма от всех писáнiй я́же о Нем. И прибли́жишася в весь, в ню́же идя́ста: и Той творя́шеся далечáйше ити́. И нуждáста Егó, глагóлюща: обля́зи с нáма, я́ко к вéчеру есть, и приклони́лся есть день. И вни́де с ни́ма облещи́. И бысть я́ко возлежé с ни́ма, и прiи́м хлеб благослови́, и преломи́в дая́ше и҆́ма. Óнема же отверзóстеся óчи, и познáста Егó: и Той неви́димь бысть и҆́ма. И рекóста к себé: не сéрдце ли нáю горя́ бе в нáю, егдá глагóлаше нáма на пути́ и егдá скáзоваше нáма писáнiя? И востáвша в той час, возврати́стася во Iерусали́м, и обретóста совокýпленны единагонáдесяте и и҆́же бя́ху с ни́ми, глагóлющих, я́ко вои́стинну востá Госпóдь и яви́ся Сíмону. И та повéдаста, я́же бы́ша на пути́, и я́ко познáся и҆́ма в преломлéнiи хлéба.
[Русский синодальный перевод]Но Петр, встав, побежал ко гробу и, наклонившись, увидел только пелены лежащие, и пошел назад, дивясь сам в себе происшедшему. В тот же день двое из них шли в селение, отстоящее стадий на шестьдесят от Иерусалима, называемое Эммаус; и разговаривали между собою о всех сих событиях. И когда они разговаривали и рассуждали между собою, и Сам Иисус, приблизившись, пошел с ними. Но глаза их были удержаны, так что они не узнали Его. Он же сказал им: о чем это вы, идя, рассуждаете между собою, и отчего вы печальны? Один из них, именем Клеопа, сказал Ему в ответ: неужели Ты один из пришедших в Иерусалим не знаешь о происшедшем в нем в эти дни? И сказал им: о чем? Они сказали Ему: что было с Иисусом Назарянином, Который был пророк, сильный в деле и слове пред Богом и всем народом; как предали Его первосвященники и начальники наши для осуждения на смерть и распяли Его. А мы надеялись было, что Он есть Тот, Который должен избавить Израиля; но со всем тем, уже третий день ныне, как это произошло. Но и некоторые женщины из наших изумили нас: они были рано у гроба и не нашли тела Его и, придя, сказывали, что они видели и явление Ангелов, которые говорят, что Он жив. И пошли некоторые из наших ко гробу и нашли так, как и женщины говорили, но Его не видели. Тогда Он сказал им: о, несмысленные и медлительные сердцем, чтобы веровать всему, что предсказывали пророки! Не так ли надлежало пострадать Христу и войти в славу Свою? И, начав от Моисея, из всех пророков изъяснял им сказанное о Нем во всем Писании. И приблизились они к тому селению, в которое шли; и Он показывал им вид, что хочет идти далее. Но они удерживали Его, говоря: останься с нами, потому что день уже склонился к вечеру. И Он вошел и остался с ними. И когда Он возлежал с ними, то, взяв хлеб, благословил, преломил и подал им. Тогда открылись у них глаза, и они узнали Его. Но Он стал невидим для них. И они сказали друг другу: не горело ли в нас сердце наше, когда Он говорил нам на дороге и когда изъяснял нам Писание? И, встав в тот же час, возвратились в Иерусалим и нашли вместе одиннадцать апостолов и бывших с ними, которые говорили, что Господь истинно воскрес и явился Симону. И они рассказывали о происшедшем на пути, и как Он был узнан ими в преломлении хлеба.(24:12-35)
Хор: Слáва Тебé, Гóсподи, слáва Тебé.
Воскресéнiе Хрiстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрiстé, и святóе Воскресéнiе Твоé поéм и слáвим: Ты бо еси́ Бог наш, рáзве Тебé инóго не знáем, и҆́мя Твоé именýем. Прiиди́те вси вéрнiи, поклони́мся Святóму Хрiстóву Воскресéнiю: се бо прiи́де Крестóм рáдость всемý мíру. Всегдá благословя́ще Гóспода, поéм Воскресéнiе Егó: распя́тiе бо претерпéв, смéртiю смерть разруши́.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моé. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх роди́ мя мáти моя. Се бо и҆́стину возлюби́л еси́, безвéстная и тáйная премýдрости Твоея яви́л ми еси́. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отврати́ лицé Твоé от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéнiя Твоегó, и Дýхом Влады́чним утверди́ мя. Научý беззакóнныя путéм Твоим, и нечести́вiи к Тебé обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажи́, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Слáва Ѻтцý и Сы́ну и Святóму Дýху.
глас 6: Моли́твами апóстолов,/ Ми́лостиве, очи́сти// мнóжество согрешéнiй нáших.
И҆ ны́не и прúсно и во вéки векóв. Амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моé. (Пс.50:3)
Стiхúра, глас 6: Воскрéс Iисýс от грóба,/ я́коже проречé,/ дадé нам живóт вéчный// и вéлiю ми́лость.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ВОСКРЕСНЫЙ, ГЛАС 2
(совмещенный с канóном крестовоскрéсным (глас 2), Борóдицы (глас 2) и канóном св. прп.Сáввы Освящéннаго, глас 8)
ПЕСНЬ 1
Iрмóс: Во глубинé постлá иногдá/ фараони́тское всевóинство преоружéнная си́ла;/ воплóщшееся же Слóво всезлóбный грех потреби́ло есть,/ препрослáвленный Госпóдь,// слáвно бо прослáвися.
Хор (припéв): Слáва, Гóсподи, Святóму Воскресéнiю Твоемý.
Чтец (тропáрь): Мiрскíй князь Блáже, емýже написáхомся,/ зáповеди Твоея́ не послýшавше, крестóм Твои́м осуди́ся:/ прирази́ся бо Ти я́ко смéртну:/ отпадé же влáсти Твоея́ держáвою,// и немощны́й обличи́ся.
Хор: Слáва, Гóсподи, Святóму Воскресéнiю Твоемý.
Чтец: Избáвитель рóда человéческаго,/ и нетлéнному животý Начáльник/ в мiр пришéл еси́:/ Воскресéнiем бо Твои́м раздрáл еси́ смéртныя пелены́,// Éже славослóвим вси: слáвно бо прослáвися.
Хор: Пресвятáя Богорóдице, спасù нас.
Богорóдичен: Превы́шши яви́лася еси́, Чи́стая Приснодéво,/ вся́кiя неви́димыя же и ви́димыя твáри:/ Зижди́теля бо родилá еси́,/ я́ко благоволи́ воплоти́тися во утрóбе Твоéй,// Егóже со дерзновéнiем моли́, спасти́ дýши нáша.
Канон Богородицы, глас 2
Хор: Пресвятáя Богорóдице, спасù нас.
Чтец: Невещéственная дрéвле лéствица,/ и стрáнно оледенéвшiй путь мóря,/ Твоé явля́ше Рождествó, Чи́стая,// éже поéм вси: я́ко прослáвися.
Хор: Пресвятáя Богорóдице, спасù нас.
Чтец: Си́ла Вы́шняго, Ипостáсь Совершéнная, Бóжiя Мýдрость,/ воплóщшися, Пречи́стая, из Тебé,// к человéком бесéдова: я́ко прослáвися.
Хор: Пресвятáя Богорóдице, спасù нас.
Чтец: Прóйде сквозé дверь непрохóдную,/ заключéнныя утрóбы Твоея́,/ прáвды Сóлнце, Чи́стая,// и мíрови возсiя́: я́ко прослáвися.
Канон преподобного Саввы Освященного, глас 8
Хор: Преподóбне óтче Сáвво, молù Бóга о нас.
Чтец: Светозарéнiем Святáго Дýха, Сáвво,/ озари́ благочéстною любóвiю пéсньми восхваля́ющiя тя,/ пóстников похвалý, монáшествующих слáву,// пусты́ни украси́теля, благочéстiя учи́теля. (Двáжды)
Хор: Преподóбне óтче Сáвво, молù Бóга о нас.
Чтец: Всю любóвь к Бóгу возложи́в от ю́ности,/ и к Немý, рáдуяся, все твоé желáнiе имéя,/ плóти движéнiя и страстéй нахóды воздержáнiем умертви́л еси́,// Сáвво Богонóсе всехвáльне. (Двáжды)
Хор: Преподóбне óтче Сáвво, молù Бóга о нас.
Чтец: Победи́в плодóм, сокровéннаго змíя попрáл еси́/ и тогó сéти легкó преминýл еси́,/ Богочéстiя крилы́ впери́вся, óтче;// жизнь же, рáдуяся, объя́л еси́ от сáда крéстнаго. (Двáжды)
Слáва Ѻтцý и Сы́ну и Святóму Дýху.
Тропáрь: Просвещáемь Свéтом благодáти, во огнь вшел еси́,/ я́коже трié óтроцы пребы́л еси́ неопалéн,/ Бóгу тя сохрáншу/ и явля́ющу всем бýдущее тебé преспéянiе,// пóслежде, óтче, и совершéнiе.
И ныне и прúсно и во вéки векóв. Аминь.
Богорóдичен: Неудéржными на нас смерть стремлéньми я́тся,/ но, Твоемý Рождествý прибли́жившися, поги́бе/ и, прирази́вшися, упраздни́ся, Богорóдице Дéво,// Жизнь бо вои́стинну присносýщную воплоти́вшуюся родилá еси́.
Катавáсiя Рождествá вторóе (глас 1): Спасé лю́ди чудодéйствуяй Влады́ка,/ мóкрую мóря вóлну оземлени́в дрéвле;/ вóлею же рóждся от Дéвы,/ стезю́ прохóдну Небесé полагáет нам.// Егóже, по Существý рáвна же Отцý и человéком, слáвим.
ПЕСНЬ 3
Iрмóс: Процвелá есть пусты́ня, я́ко крíн, Гóсподи,/ язы́ческая неплодя́щая цéрковь,/ пришéствiем Твои́м,// в нéйже утверди́ся моé сéрдце.
Хор: Слáва, Гóсподи, Святóму Воскресéнiю Твоемý.
Чтец: Тварь в стрáсти Твоéй изменя́шеся,/ зря́щи Тя в нищéтне óбразе от беззакóнных поругáема,// основáвшаго вся Божéственным мановéнiем.
Хор: Слáва, Гóсподи, Святóму Воскресéнiю Твоемý.
Чтец: От пéрсти по óбразу мя рукóю Твоéю создáл еси́:/ и сокрушéнна пáки в персть смéртную за грех,// Хрiстé сошéд во ад, совоскреси́л еси́.
Хор: Пресвятáя Богорóдице, спасù нас.
Богорóдичен: Чи́ни удиви́шася áнгельстiи, Пречи́стая,/ и человéческая устраши́шася сердцá о Рождествé Твоéм:// тéмже Тя, Богорóдицу, вéрою чтим.
Глас 2
Хор: Пресвятáя Богорóдице, спасù нас.
Чтец: И҆́же врéмене превы́шшiй вся́каго,/ я́ко врéменем Творéц,// из Тебé, Дéво, вóлею Младéнец создáся.
Хор: Пресвятáя Богорóдице, спасù нас.
Чтец: Чрéво прострáннейшее небéс воспои́м,// и҆́мже Адáм на небесéх рáдуяся, живéт.
Глас 8
Хор: Преподóбне óтче Сáвво, молù Бóга о нас.
Чтец: Ум влады́ку над страстьми́, всебогáте, постáвив,/ подáтель прáвды показáлся еси́,/ лýчшему бо я́ве хýждшее повинýл еси́.// Тéмже я́ко фíнiкс, óтче, в пусты́нях процвéл еси́.(Двáжды)
Хор: Преподóбне óтче Сáвво, молù Бóга о нас.
Чтец: Послéдовати разумéв стопáм Влады́ки,/ пресéльник отéчества был еси́/ и, в пусты́ни обитáя, побéду воздви́гл еси́ на противобóрныя,// Божéственною си́лою укрепля́емь. (Двáжды)
Хор: Преподóбне óтче Сáвво, молù Бóга о нас.
Чтец: Твéрдостiю рáзума, всеблажéнне, укрепля́емь,/ разли́чная врáжiя ковáрства обличи́л еси́, мýдре,/ и всем яви́л еси́// и горды́ню óнаго возвы́шенную низложи́л еси́. (Двáжды)
Слáва Ѻтцý и Сы́ну и Святóму Дýху.
Тропáрь: Свящéнна тя душéю/ и простоты́ изволéнiя добродéтельми укрáшена ви́дя,/ светлéйшая звездá Евфи́мiй прiя́т,// прорóчески вещáя твою́, всеблажéнне, свéтлость.
И ныне и прúсно и во вéки векóв. Аминь.
Богорóдичен: Спаси́тельнаго нас рáди Слóва строéнiя/ свéтлая Ты, Мáти Дéво, дверь познáлася еси́ вои́стинну:// Ты бо нам ввелá еси́ ýмную лучý Пребожéственнаго Божествá.
Катавáсiя Рождествá вторóе (глас 1): При́зри на пéнiя рабóв, Благодéтелю,/ врагá смиря́я вознесéнную горды́ню,/ нося́й же, Всеви́дче, грехá превы́шше,/ непоколéблемо утверждéнныя, Блáже, певцы́// основáнiем вéры.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк прп. Сáввы, глас 8: Я́ко от младéнства Бóгу жéртва непорóчная/ принéслся еси́ добродéтелiю, Сáвво блажéнне,/ садодéлатель быв благочéстiя;/ тéмже был еси́ преподóбных удобрéнiе,/ граждани́н же пусты́нный достохвáлен.// Тéмже зовéм ти: рáдуйся, Сáвво пребогáте.
Íкос: О отцéв верхóвниче и преподóбных красотó,/ пóстников ко Хрiстý дерзновéнiе,/ пусты́нный граждани́не и садодéлателю./ Кáко воспою́ твоé житié, преподóбне?/ Блистáеши бо концéм, я́ко сóлнце./ Тем вопiю́ ти:/ рáдуйся, крáсная каппадóков слáво;/ рáдуйся, честнóе вселéнныя знáменiе;/ рáдуйся, пусты́ни добрéйшее прозябéнiе;/ рáдуйся, прáведных Божéственное наслаждéнiе;/ рáдуйся, я́ко презрéл еси́ текýщая и тлéнная;/ рáдуйся, я́ко на Небесéх со Áнгелы обитáеши;/ рáдуйся, монáшествующих исправлéнiе и прáвило;/ рáдуйся, леня́щихся к Бóгу воздви́женiе;/ рáдуйся, истóчниче чудéс Боготóчный;/ рáдуйся, честны́й Дýха оргáне;/ рáдуйся, и҆́мже украси́ся востóк;/ рáдуйся, и҆́мже зáпадная сiя́ют;// рáдуйся, Сáвво пребогáте.
Седáлен прп. Сáввы, глас 8: Земнáя вся остáвив, в мíре сый телéсно,/ дýхом был еси́ Áнгелом сопричáстник:/ настоя́щiя бо стрáсти телéсныя умертви́в,/ Трóицы показáлся еси́ служи́тель, блажéнне./ Тéмже и недýгующих врачýеши стрáсти/ и слóвом дýхи отгóниши благодáтiю, Богонóсе óтче наш;/ моли́ся Хрiстý Бóгу прегрешéнiй оставлéнiю даровáтися// прáзднующим любóвiю святýю пáмять твою́.
Слáва Ѻтцý и Сы́ну и Святóму Дýху,
Ин седáлен прп. Сáввы, глас 8: Молвы́ житéйскiя остáвив,/ крест твой на рáмена взем,/ всегó возложи́л еси́ тебé Бóгу,/ плóти же и мíра вне быв,/ Дýху был еси́ Святóму собесéдник./ Тéмже и к рéвности лю́ди воздвизáя,/ грáды истощи́л еси́/ и пусты́ни грáды сотвори́л еси́, Богонóсе óтче наш,/ моли́ Хрiстá Бóга прегрешéнiй оставлéнiю даровáтися/ прáзднующим любóвiю святýю пáмять твою́.
И ны́не и прúсно и во вéки векóв. Амúнь.
Богорóдичен из минéи, глас 8: Я́ко Всенепорóчная Невéсто Творцá,/ я́ко Неискусомýжная Мáти Избáвителя,/ прiя́телище я́ко сýщи Утéшителя, Всепéтая,/ беззакóнiю мя сýща сквéрное оби́телище/ и дéмоном игрáлище в рáзуме бы́вша,/ потщи́ся и тех злодéйствiя мя избáвити/ и свéтлое жилище добродéтелей соверши́, Светонóсная, Нетлéнная,/ отжени́ óблак страстéй и Вы́шняго причáстiя сподóби// и Свéта Невечéрняго, моли́твами Твои́ми.
ПЕСНЬ 4
Iрмóс: Пришéл еси́ от Дéвы, не ходáтай, ни Áнгел,/ но Сам, Гóсподи, воплóщься,/ и спасл еси́ всегó мя человéка./ Тем зовý Ти:// слáва си́ле Твоéй, Гóсподи.
Хор: Слáва, Гóсподи, Святóму Воскресéнiю Твоемý.
Чтец: Предстои́ши суди́щу я́ко суди́мь, Бóже мой,/ не вопiя́ Влады́ко, суд износя́ язы́ком:/ и́мже стрáстiю Твоéю, Хрiстé// вселéнней содéлал еси́ Спасéнiе.
Хор: Слáва, Гóсподи, Святóму Воскресéнiю Твоемý.
Чтец: Стрáстiю Твоéю, Хрiстé,/ врагý оскудéша орýжiя,/ проти́вным же éже во ад схождéнiем Твои́м, грáды разруши́шася,// и мучи́телева дéрзость низложéна бысть.
Хор: Пресвятáя Богорóдице, спасù нас.
Богорóдичен: Тя пристáнище спасéнiя, и стéну недви́жиму,/ Богорóдице Влады́чице, вси вéрнiи свéмы:// Ты бо моли́твами Твои́ми избавля́еши от бед дýши нáша.
Глас 2
Хор: Пресвятáя Богорóдице, спасù нас.
Чтец: Се превознесéся Божéственная Горá дóму Госпóдня,// превы́шше сил, Богомáтерь я́вственнейше.
Хор: Пресвятáя Богорóдице, спасù нас.
Чтец: Закóнов естéственных кромé,/ Еди́на Дéво рóждши влады́чествующаго твáрiю,// сподóбилася еси́ Божéственнаго звáнiя.
Глас 8
Хор: Преподóбне óтче Сáвво, молù Бóга о нас.
Чтец: Душéвное очищáя устроéнiе/ и разширя́я Божéственными видéнiи,/ вмéстну сiю́ вои́стинну Божéственных даровáнiй содéлал еси́, Богоблажéнне:/ возложéнiем же рук твои́х немощствýющiя исцели́л еси́,// подражáтель Влады́ки быв.(Двáжды)
Хор: Преподóбне óтче Сáвво, молù Бóга о нас.
Чтец: И҆́же на тя, óтче, лю́те разсвирéпев,/ поглоти́ся, я́ко Дафáн окая́нный, и, я́ко Авiрóн, потреби́вся:/ тя бо неви́димо Божéственная храня́ше благодáть,/ мнóгих промышля́ющи спасéнiе, всеблажéнне,// слáвный Сáвво Богомýдре. (Двáжды)
Хор: Преподóбне óтче Сáвво, молù Бóга о нас.
Чтец: Закóном Бóжiим наказáв, Богоглагóливе, чýвства,/ к разумéнiю безтелéсных и мы́сленных/ твою́ худóжную упрáвил еси́ мысль,/ проходя́ неослáбно от слáвы в слáву,// от си́лы, óтче, в си́лу. (Двáжды)
Слáва Ѻтцý и Сы́ну и Святóму Дýху.
Тропáрь: Благодéтельствовати единоплемéнныя предложи́в,/ в пусты́ни грáды создáл еси́ Боголéпны и душеполéзны,/ и в земли́ жáждущей истóчники вод извéл еси́,/ и тýчи с небесé преслáвно, Богомýдре,// в безвóдных сéлех низвéл еси́.
И ныне и прúсно и во вéки векóв. Аминь.
Богорóдичен: Новоцвéтный безсмéртiя рай/ и красéн вои́стинну показáлася еси́,/ Дрéво жи́зни, в Тебé насаждéнное, Богоначáльнейше чревонося́щи и раждáющи,/ всем искáпающее спаси́тельныя надéжды,// вéрно Богорóдицу мýдрствующим Тя.
Катавáсiя Рождествá вторóе (глас 1): Рóда человéча обновлéнiе/ дрéвле, поя́, прорóк Аввакýм предвозвещáет,/ ви́дети неизречéнно сподóбився óбраз:/ млады́й Младéнец бо из горы́ - Дéвы изы́де// людéй во обновлéнiе, Слóво.
ПЕСНЬ 5
Iрмóс: Ходáтай Бóгу и человéком был еси́, Хрiстé Бóже;/ Тобóю, бо Влады́ко, к Светоначáльнику, Ѻтцý Твоемý,/ от нóщи невéденiя// приведéнiе и́мамы.
Хор: Слáва, Гóсподи, Святóму Воскресéнiю Твоемý.
Чтец: Я́ко кéдры, Хрiстé, язы́ков шатáнiе сокруши́л еси́ вóлею, Влады́ко:/ я́ко извóлил еси́ на кипари́се, и на пéвке, и кéдре,// плóтiю совозвышáемь.
Хор: Слáва, Гóсподи, Святóму Воскресéнiю Твоемý.
Чтец: В рóве, Хрiстé, преиспóднем положи́ша Тя бездыхáнна мéртва:/ но Твоéю я́звою забвéнныя мéртвыя, и́же во гробéх спя́щiя, уя́звен// с Собóю воскреси́л еси́.
Хор: Пресвятáя Богорóдице, спасù нас.
Богорóдичен: Моли́ Сы́на Твоегó и Гóспода, Дéво Чи́стая,/ на Тя уповáющим мир даровáти, пленéнным избавлéнiе,// от сопроти́вных настоя́нiй.
Глас 2
Хор: Пресвятáя Богорóдице, спасù нас.
Чтец: Ѻ́блацы весéлiя слáдость кропи́те сýщим на земли́:/ я́ко Отрочá дадéся,/ И҆́же сый прéжде век,// от Дéвы воплóщься Бог наш.
Хор: Пресвятáя Богорóдице, спасù нас.
Чтец: Житiю́ и плóти моéй свет возсiя́,/ и дря́хлость грехá разруши́:// напослéдок от Дéвы без сéмене воплóщься Вы́шнiй.
Глас 8
Хор: Преподóбне óтче Сáвво, молù Бóга о нас.
Чтец: Неуклóнною мы́слiю к твоему́ Желáемому простирáяся,/ от Негó благодáть величáйших чудéс незави́стну прiя́л еси́, óтче,// и вéрно приходя́щiя сострадáтельно уврачевáл еси́, преподóбне. (Двáжды)
Хор: Преподóбне óтче Сáвво, молù Бóга о нас.
Чтец: Плотски́х тя́жестей дебельствó отложи́в,/ сосýд Богодéланен избрáн был еси́ Святáго, чýдне, Дýха,// ошáянiем снéдей, и моли́твою, и терпéнiем, и смиренномýдрiем украшáемь. (Двáжды)
Хор: Преподóбне óтче Сáвво, молù Бóга о нас.
Чтец: Проповéдник Божéственных догмáт велеглáснейшiй рукоположéн еси́,/ собóров, óтче, святы́х соóбщник был еси́, цари́ умудря́я,// и́миже я́ве, благодáтiю Божéственною ограждáемь, яви́лся еси́, блажéнне. (Двáжды)
Слáва Ѻтцý и Сы́ну и Святóму Дýху.
Тропáрь: От Бóга дáвшаяся благодáть тебé, Богодохновéнне, провозгласи́ся,/ раздадéся всем бо вселéнныя концы́,// я́ве творя́щи боголéпно показáнiя чудéс Божéственное дéйство.
И ныне и прúсно и во вéки векóв. Аминь.
Богорóдичен: Вéрных Предстáтельница,/ стенá неразруши́ма благохвáлящих Тя,/ я́ко всемý рóду человéческому я́вльшееся спасéнiе,/ Бóга рóждши телéсне я́вльшася,// дýшу мою́ спаси́, Пречи́стая.
Катавáсiя Рождествá вторóе (глас 1): Из нóщи дел омрачéнныя прéлести/ очищéнiе нам, Хрiстé, бóдренно ны́не совершáющим песнь, я́ко Благодéтелю,/ прiиди́, подавáяй удóбну стезю́,// по нéйже востекáюще, обря́щем слáву.
ПЕСНЬ 6
Iрмóс: В бéздне грехóвней валя́яся,/ неизслéдную милосéрдiя Твоегó призывáю бéздну:// от тли Бóже, мя возведи́.
Хор: Слáва, Гóсподи, Святóму Воскресéнiю Твоемý.
Чтец: Я́ко злодéй Прáведник осуди́ся/ и со беззакóнными на дрéве пригвозди́ся,// пови́нным оставлéнiе Своéю дáруя крóвiю.
Хор: Слáва, Гóсподи, Святóму Воскресéнiю Твоемý.
Чтец: Еди́нем ýбо человéком,/ пéрвым Адáмом дрéвле в мiр вни́де смерть,// и Еди́нем Воскресéнiе Сы́ном Бóжiим яви́ся.
Хор: Пресвятáя Богорóдице, спасù нас.
Богорóдичен: Неискусомýжно, Дéво, родилá еси́,/ и вéчнуеши Дéва, явля́ющи И҆́стиннаго Божествá,// Сы́на и Бóга Твоегó óбразы.
Глас 2
Хор: Пресвятáя Богорóдице, спасù нас.
Чтец: Естествó человéческое рабóтающее грехý,/ Влады́чице Чи́стая, Тобóю свобóду улучи́:// Твой бо Сын, я́ко áгнец, за всех закалáется.
Хор: Пресвятáя Богорóдице, спасù нас.
Чтец: Вопiéм Ти вси, и҆́стинней Богомáтери,/ прогнéвавшiя рабы́ избáви:// Еди́на бо дерзновéнiе к Сы́ну и҆́маши.
Глас 8
Хор: Преподóбне óтче Сáвво, молù Бóга о нас.
Чтец: Любóвь к Бóгу и бли́жнему стяжáв,/ закóна и прорóков исполня́я глави́зну,// преимýщую бо всех несосýдно добродéтель, óтче, испрáвил еси́. (Трúжды)
Хор: Преподóбне óтче Сáвво, молù Бóга о нас.
Чтец: Равноáнгельное на земли́ ты жи́тельство стяжáл еси́,/ равноáнгельну же честь Хрiстóс тебé даровá,// святы́х чи́ны спутьшéствующiя души́ твоéй послáв. (Трúжды)
Слáва Ѻтцý и Сы́ну и Святóму Дýху.
Тропáрь: Премýдрости порóд яви́вся,/ начáло премýдрости возжелéл еси́ - страх Бóжiй,// и҆́мже укрепля́емь к совершéнiю вмéстному человéком, óтче, дости́гл еси́.
И ныне и прúсно и во вéки векóв. Аминь.
Богорóдичен: Спáса и Избáвителя, Бóга всех и Гóспода рóждши,/ нам плóтiю приобщи́вшася,// спасáй, Пречи́стая, призывáющiя Тя от бед, Влады́чице.
Катавáсiя Рождествá вторóе (глас 1): Обитáя Ióна в преиспóдних морски́х,/ прiити́ моля́шеся и бýрю утоли́ти;/ унзéн же аз мучáщаго стрелóю,/ Хрiстý воспевáю, зол губи́телю,// скóро прiити́ Тебé к моéй лéности.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк воскрéсный, глас 2: Воскрéсл еси́ от грóба, Всеси́льне Спáсе,/ и ад, ви́дев чýдо, ужасéся,/ и мéртвiи востáша;/ тварь же ви́дящи срáдуется Тебé,/ и Адáм свесели́тся,// и мiр, Спáсе мой, воспевáет Тя при́сно.
Íкос: Ты еси́ Свет омрачéнным,/ Ты еси́ Воскресéнiе всех, и Живóт человéков,/ и всех совоскреси́л еси́,/ смéртную держáву, Спáсе, разóрь,/ и áдова вратá сокруши́вый, Слóве:/ и мéртвiи ви́девше чýдо, чудя́хуся,/ и вся́ка тварь срáдуется о Воскресéнiи Твоéм, Человеколю́бче./ Тéмже и вси слáвим и поéм Твоé снизхождéнiе,// и мiр, Спáсе мой, воспевáет Тя при́сно.
ПЕСНЬ 7
Iрмóс: Богопроти́вное велéнiе/ беззакóннующаго мучи́теля/ высóк плáмень вознеслó есть;/ Хрiстóс же прострé Богочести́вым отрокóм рóсу духóвную,// Сый благословéн и препрослáвлен.
Хор: Слáва, Гóсподи, Святóму Воскресéнiю Твоемý.
Чтец: Не терпéл еси́, Влады́ко, за благоутрóбiе/ смéртiю человéка зрéти мýчима,/ но пришéл и спасл еси́ Твоéю крóвiю, человéк быв:// Сый благословéн и Препрослáвлен, Бог отец нáших.
Хор: Слáва, Гóсподи, Святóму Воскресéнiю Твоемý.
Чтец: Ви́девше Тя, Хрiстé, оболчéна во одéжду отмщéнiя,/ ужасóшася врáтницы áдовы:/ безýмнаго бо мучи́теля рабá, Влады́ко, пришéл еси́ уби́ти:// Сый благословéн и Препрослáвлен, Бог отéц нáших.
Хор: Пресвятáя Богорóдице, спасù нас.
Богорóдичен: Святы́х Святéйшую Тя разумéем,/ я́ко Еди́ну рóждшую Бóга Непремéннаго,/ Дéво Несквéрная, Мáти Безневéстная:/ всем бо вéрным источи́ла еси́ нетлéнiе,// Божéственным Рождествóм Твои́м.
Продолжение здесь