Неделя 23 по Пятидесятнице. Мчч. 33-х в Мелитине пострадавших. Глас 6 ВСЕНОЩНОЕ БДЕНИЕ. УТРЕНЯ.КАНОН
20 ноября́ 2022 гóда. Недéля 23 по Пятидеся́тнице. Святы́х 33-х мýчеников, в Мелiтíне пострадáвших. Прп. Лáзаря Галисíйского. Глас 6. Воскрéсная прáздничная слýжба для домáшнего (келéйнаго) совершéнiя. Послéдованiе ýтрени.
Начало зри здесь ( великая вечéрня) и здесь ( ýтреня)
ТРОПАРИ ВОСКРЕСНЫЕ, ГЛАС 5
Благословéн есú, Гóсподи,/научú мя оправдáнiем Твоúм. (Пс.118:12)
Áнгельскiй собóр удиви́ся,/ зря Тебé в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Благословéн есú, Гóсподи,/научú мя оправдáнiем Твоúм.
Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел миронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Благословéн есú, Гóсподи,/научú мя оправдáнiем Твоúм.
Зелó рáно мvронóсицы течáху/ ко грóбу Твоему рыдáющiя,/ но предстá к ним Áнгел и речé:/ рыдáнiя врéмя престá, не плáчите,/ воскресéнiе же апóстолом рцы́те.
Благословéн есú, Гóсподи,/научú мя оправдáнiем Твоúм.
Мvронóсицы жены́ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речé, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егó Сы́нови, и Святóму Дýху,/ Святéй Трóице во еди́ном существé,/ с Серафíмы зовýще:/ Свят, Свят, Свят еси, Гóсподи.
И ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехá, Дéво, Адáма избáвила еси,/ рáдость же Éве/ в печáли мéсто подалá еси,/ пáдшiя же от жи́зни/ к сей напрáви/ из Тебé воплоти́выйся Бог и Человéк.
Чтец: Аллилýiа, аллилýiа, аллилýiа, слáва Тебé Бóже. (3 раза)
Гóсподи, поми́луй. (3 раз)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоú воскрéсны, глас 6: Вóльною и животворя́щею Твоéю смéртiю, Хрiстé,/ вратá áдова сокруши́в, я́ко Бог,/ отвéрзл еси́ нам дрéвнiй рай, и воскрéс из мéртвых,// избáвил еси́ от тлéнiя живóт наш.
СТЕПЕННА, ГЛАС 6
1 АНТИФОН
Хор: На нéбо óчи моú возвожý, к Тебé, Слóве:// ущéдри мя, да живý Тебé. (Двáжды)
Поми́луй нас уничижéнных,// устроя́я благопотрéбныя Твоя́ сосýды, Слóве. (Двáжды)
Слáва Ѻтцý и Сы́ну и Святóму Дýху.
Святóму Дýху, вся́кая всеспаси́тельная винá,/ áще кóему сей по достоя́нiю дхнет,// скóро взéмлет от земны́х: восперя́ет, возращáет, устроя́ет горé.
И ны́не и прúсно и во вéки векóв. Амúнь.
Святóму Дýху, вся́кая всеспаси́тельная винá,/ áще кóему сей по достоя́нiю дхнет,// скóро взéмлет от земны́х: восперя́ет, возращáет, устроя́ет горé.
2 АНТИФОН
Áще не Госпóдь бы был в нас,/ никтóже от нас протúву возмóгл бы врáжiим брáнем одолéти:// побеждáющiи бо от зде вознóсятся. (Двáжды)
Зубы́ их да не я́та бýдет душá моя́ я́ко птенéц, Слóве:// увы́ мне, кáко и҆́мам от врагá избы́ти, грехолюби́в сый! (Двáжды)
Слáва Ѻтцý и Сы́ну и Святóму Дýху.
Святы́м Дýхом обожéнiе всем,/ благоволéнiе, рáзум, мир и благословéнiе:// равнодéтелен бо есть Отцý и Слóву.
И ны́не и прúсно и во вéки векóв. Амúнь.
Святы́м Дýхом обожéнiе всем,/ благоволéнiе, рáзум, мир и благословéнiе:// равнодéтелен бо есть Отцý и Слóву.
3 АНТИФОН
Надéющiися на Гóспода врагóм стрáшни, и всем дúвни:// горé бо зрят. (Двáжды)
В беззакóнiя рук свои́х, прáведных жрéбiй,// помóщника Тя имéя Спáсе, не простирáет. (Двáжды)
Слáва Ѻтцý и Сы́ну и Святóму Дýху.
Святáго Дýха держáва на всех:/ Емýже Вы́шняя вóинства покланя́ются,// со вся́ким дыхáнiем дóльным.
И ны́не и прúсно и во вéки векóв. Амúнь.
Святáго Дýха держáва на всех:/ Емýже Вы́шняя вóинства покланя́ются,// со вся́ким дыхáнiем дóльным.
ПРОКИМЕН
Чтец: Прокíмен, глас шесты́й: Гóсподи, воздви́гни си́лу Твою́, и прiиди́ во éже спасти́ нас. (Пс.79:3Б)
Хор: Гóсподи, воздвúгни сúлу Твою́,/ и прiидú во éже спастú нас.
Чтец: Пасы́й Iзрáиля вонми́, наставля́яй я́ко овчá Ióсифа. (Пс.79:2А)
Хор: Гóсподи, воздвúгни сúлу Твою́,/ и прiидú во éже спастú нас.
Чтец: Гóсподи, воздви́гни си́лу Твою́.
Хор: И прiидú во éже спастú нас.
Чтец: Гóсподу помóлимся.
Хор: Гóсподи, поми́луй.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода.
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Матфéя Святáго Евáнгелiя чтéнiе.
Хор: Слáва Тебé, Гóсподи, слáва Тебé.
(Мф.зач.116) Во врéмя óно, единiинáдесять ученицы́ идóша в Галiлéю, в гóру, áможе повелé им Iисýс: И ви́девше Егó, поклони́шася Емý: óви же усумнéшася. И пристýпль Iисýс, речé им, глагóля: дадéся Ми вся́ка власть на небеси́ и на земли́: Шéдше научи́те вся язы́ки, крестя́ще их во и҆́мя Отцá, и Сына, и Святáго Духа, учáще их блюсти́ вся, ели́ка заповéдах вам. И се, Аз с вáми есмь во вся дни, до скончáнiя вéка. Ами́нь.
[Русский синодальный перевод]В то время одиннадцать учеников пошли в Галилею, на гору, куда повелел им Иисус, и, увидев Его, поклонились Ему, а иные усомнились. И приблизившись Иисус сказал им: дана Мне всякая власть на небе и на земле. Итак идите, научите все народы, крестя их во имя Отца и Сына и Святого Духа, уча их соблюдать всё, что Я повелел вам; и вот, Я с вами во все дни до скончания века. Аминь.(Мф.28:16-20)
Хор: Слáва Тебé, Гóсподи, слáва Тебé.
Воскресéнiе Хрiстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрiстé, и святóе Воскресéнiе Твоé поéм и слáвим: Ты бо еси́ Бог наш, рáзве Тебé инóго не знáем, и́мя Твоé именýем. Прiиди́те вси вéрнiи, поклони́мся Святóму Хрiстóву Воскресéнiю: се бо прiи́де Крестóм рáдость всемý мíру. Всегдá благословя́ще Гóспода, поéм Воскресéнiе Егó:/ распя́тiе бо претерпéв, смéртiю смерть разруши́.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моé. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх роди́ мя мáти моя. Се бо и́стину возлюби́л еси́, безвéстная и тáйная премýдрости Твоея яви́л ми еси́. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отврати́ лицé Твоé от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéнiя Твоегó, и Дýхом Влады́чним утверди́ мя. Научý беззакóнныя путéм Твоим, и нечести́вiи к Тебé обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажи́, Гóсподи, благоволéнiем Твои́м Сióна, и да сози́ждутся стéны Иерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Слáва Отцý и Сыну и Святóму Дýху.
глас 6: Моли́твами апóстолов,/ Ми́лостиве, очи́сти// мнóжество согрешéнiй нáших.
И ныне и прúсно и во вéки векóв, амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моé.
Стихúра, глас 6: Воскрéс Iисýс от грóба,/ якоже проречé,/ дадé нам живóт вéчный// и вéлiю ми́лость.
Гóсподи, поми́луй. (12 раз)
Слáва Отцý и Сыну и Святóму Дýху, и ныне и прúсно и во вéки векóв, амúнь.
КАНОН ВОСКРЕСНЫЙ, ГЛАС 6
(совмещéнный с канóном Богорóдицы (глас 6) канóном мýчеников, глас 8 и канóном прп. Лáзаря Галисíйского, глас 2)
ПЕСНЬ 1
Iрмóс: Я́ко по сýху пешешéствовав Iзрáиль,/ по бéздне стопáми,/ гони́теля фараóна/ ви́дя потопля́ема,// Бóгу побéдную песнь пои́м, вопiя́ше.
Хор (припéв): Слáва, Гóсподи, Святóму Воскресéнiю Твоемý.
Чтец (тропáрь): Распростéртыма длáньма на крестé,/ отéческаго испóлнил еси́ благоволéнiя, благíй Iисýсе, вся́ческая.// тéмже побéдную песнь Тебé вси пои́м.
Хор: Слáва, Гóсподи, Святóму Воскресéнiю Твоемý.
Чтец: Стрáхом к Тебé, я́ко рабы́ня, смерть/ повелéна приступи́ Влады́це животá,// тóю подаю́щему нам безконéчный живóт и воскресéнiе.
Хор: Пресвятáя Богорóдице, спасú нас.
Богорóдичен: Своегó прiéмши Содéтеля, я́ко Сам восхотé,/ от безсéменнаго Твоегó чрéва, пáче умá воплощáема, Чи́стая,// твáрей вои́стинну яви́лася еси́, Влады́чица.
Канон Богородицы, глас 6
Хор: Пресвятáя Богорóдице, спасú нас.
Чтец: Причáщшися Éва садý, преслушáннаго брáшна, кля́тву введé:/ но сiю́ разреши́ла еси́, Чи́стая,// благословéнiя начáток Хрiстá рóждши.
Хор: Пресвятáя Богорóдице, спасú нас.
Чтец: Я́же би́сера от божéственныя мóлнiи Хрiстá рóждши,/ страстéй мои́х мглу, и прегрешéнiй смущéнiе, Чи́стая,// разжени́ свéтом Твоея́ свéтлости.
Канон мучеников, глас 8
Хор: Святíи мýченицы, молúте Бóга о нас.
Чтец: Совокýпльшеся Божéственным Небéсным си́лам,/ всем проси́ти очищéнiя,// светонóсную вáшу пáмять похваля́ющим, добропобéднiи мýченицы.
Хор: Святíи мýченицы, молúте Бóга о нас.
Чтец: Путь мучéнiя свéтло шéствовати желáюще,/ претерпéсте крéпко все треволнéнiе мучéнiя,// укрепля́еми Дýхом Святы́м.
Хор: Святíи мýченицы, молúте Бóга о нас.
Чтец: Свети́льницы яви́стеся на земли́,/ многобóжiя разрушáюще тьму, Божéственнiи страстотéрпцы,// сегó рáди невечéрнiй Свет прiéмлете.
Хор: Пресвятáя Богорóдице, спасú нас.
Богорóдичен: Мáнiем вся содевáяй,/ из Тебé пáче слóва воплощáется, Мáти Чи́стая,// страстотéрпцы венчáвый, побéдно врагá попрáвшiя.
Канон прп. Лазаря Галисийского, глас 2
Хор: Преподóбне óтче Лáзаре, молú Бóга о нас.
Чтец: Гряди́те, вéрнiи, Дýхом Божéственным веселя́щеся вéрно,/ восхвáлим Божéственнаго Лáзаря, к нему вопiю́ще:// блажéнне, твои́ми моли́твами бед избáви ны.
Хор: Преподóбне óтче Лáзаре, молú Бóга о нас.
Чтец: К твоемý пáки отéчеству прiити́ тя Бог сотвори́ и не хотя́ща:// тем приходя́ща мя при́сно к страстéм спаси́ моли́твами твои́ми.
Слáва Ѻтцý и Сы́ну и Святóму Дýху.
Тропáрь: Светозáрная Богодáнная любóвь, в тебé возсiя́вши богáтно,// свою́ дýшу за бли́жняго тя усéрдно, Богонóсе, положи́ти сотвори́.
И҆ ны́не и прúсно и во вéки векóв. Амúнь.
Богорóдичен: Спаси́ ны, Богороди́тельнице Всенепорóчная, вся́каго гнéва и скорбéй,/ покланя́ющiяся Твоемý святóму óбразу// и вéрою Богорóдицу исповéдающiя Тя.
Катавáсiя (глас 4): Отвéрзу устá моя́,/ и напóлнятся Дýха,/ и слóво отры́гну Цари́це Мáтери,/ и явлю́ся, свéтло торжествýя,/ и воспою́, рáдуяся, Тоя́ успéнiе.
ПЕСНЬ 3
Iрмóс: Несть свят,/ я́коже Ты, Гóсподи Бóже мой,/ вознесы́й рог вéрных Твои́х, Блáже,/ и утверди́вый нас на кáмени// исповéданiя Твоегó.
Хор: Слáва, Гóсподи, Святóму Воскресéнiю Твоемý.
Чтец: Бóга распинáема плóтiю зря́щи тварь, растаявáшеся стрáхом:// но содержи́тельною длáнiю нас рáди Распя́таго, крéпко держи́ма бе.
Хор: Слáва, Гóсподи, Святóму Воскресéнiю Твоемý.
Чтец: Смéртiю смерть разорéна лежи́т окая́нная без дыхáнiя:/ Животá бо не терпя́щи божéственнаго приражéнiя,// умерщвля́ется крéпкiй, и дáруется всем воскресéнiе.
Хор: Пресвятáя Богорóдице, спасú нас.
Богорóдичен: Божéственнаго рождествá Твоегó, Чи́стая,/ вся́кiй естествá чин превосхóдит чýдо:/ Бóга бо преестéственне зачалá еси́ во чрéве,// и рóждши пребывáеши при́сно Дéва.
Глас 6
Хор: Пресвятáя Богорóдице, спасú нас.
Чтец: Тлéнную мою́ плоть и смéртную, Всечи́стая Богомáти,/ из чрéва Твоегó несказáнно прiéм Благíй,// и обезтлéнив сiю́, вéчне Себé связáл есть.
Хор: Пресвятáя Богорóдице, спасú нас.
Чтец: Бóга воплощáема из Тебé зря́ще, Дéво,/ ужасáхуся стрáхом ли́цы Áнгельстiи,// и я́ко Мáтерь Бóжiю немóлчными пéсньми Тя почитáют.
Глас 8
Хор: Святíи мýченицы, молúте Бóга о нас.
Чтец: Свящéнными повелéнiи твои́ми свящéнныя мýченики, слáвне Iéроне,/ к Божéственному страдáнiю ты настáвил еси́,// и неради́ти о мýках преслáвно сотвори́л еси́, Богоблажéнне.
Хор: Святíи мýченицы, молúте Бóга о нас.
Чтец: Сокрушáеми дрéвiем, страсть честнýю, святíи, преблагáго Влады́ки изобрази́ли естé,// сокруши́сте пáгубныя лестцы́ тьмы благодáтiю Вседержи́теля.
Хор: Святíи мýченицы, молúте Бóга о нас.
Чтец: На Гóспода всех, Богови́днiи мýченицы, возлóжше уповáнiе,/ отню́д неподви́жими бы́сте стоя́нiя бóльшаго,// но закóнно Божéственное течéнiе соверши́сте нрáва прáвостiю.
Хор: Пресвятáя Богорóдице, спасú нас.
Богорóдичен: Многоимени́тая Отрокови́це, рáдуйся, Чи́стая Влады́чице,/ Я́же неопи́санное Слóво порóждши опи́санно плóтiю,// Егóже лик мýченическiй, Бóга исповéдая, стрáждет крепчáйше.
Глас 2
Хор: Преподóбне óтче Лáзаре, молú Бóга о нас.
Чтец: Крéпостiю Божéственною, мýдре, укрепля́емь,/ избáвился еси́ зверéй свирéпых.// Тем моли́ся Хрiстý от зверéй мы́сленных избáвити пою́щiя тя.
Хор: Преподóбне óтче Лáзаре, молú Бóга о нас.
Чтец: Укрепля́емь Хрiстóвою си́лою, преподóбне,/ жáжду, и тя́жесть пусты́нную, и скýдость понéсл еси́ дóблественно// надéждею неизречéнныя слáдости.
Слáва Ѻтцý и Сы́ну и Святóму Дýху.
Тропáрь: Избéгл еси́ враждéбных напáстей, всеблажéнне, Агáриных внýков,// Божéственною благодáтiю покрывáемь и мнóгим на пóльзу спасáемь.
И҆ ны́не и прúсно и во вéки векóв. Амúнь.
Богорóдичен: Влады́ку вся́ческих, Чи́стая, родилá еси́, Дéво, пáче слóва неизречéнно,// Егóже моли́, Всепéтая, пою́щiя Тя влады́чествiя измени́ти страстéй.
Катавáсiя (глас 4): Твоя́ песнослóвцы, Богорóдице,/ живы́й и незави́стный Истóчниче,/ лик себé совокýпльшiя, духóвно утверди́,/ в Божéственней пáмяти Твоéй// венцéв слáвы сподóби.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк мýчеников, глас 8: Лик мýченический я́сен, полк светонóсен,/ сошéд к нам разýмно,/ Цéрковь днесь просвети́л есть чýдными заря́ми./ Тéмже, прáзднующе честнýю пáмять их,/ прóсим от Тебé, Спáсе наш:/ тех моли́твами от бед избáви нас,// да поéм Ти: аллилýiа.
Кондáк прп. Лáзаря, глaс 4: Я́ко свети́льника превели́каго/ Цéрковь Хрiстóва слáвит тя с весéлiем псалóмски./ Тéмже не престáй моля́ся Хрiстý// дáти всем прегрешéнiй прощéнiе.
Седáлен мýчеников, глас 4: Мýжества крéпкое показáвше, мýдрiи,/ притупи́сте врагóв всезлóбныя козни, на суди́щи проповéдавше Хрiстá./ Тем главáми усéчени и Божéственною десни́цею венчáстеся,/ и҆́же к трем десяти́цам три блажéннiи, Мелити́ны же жи́тели,// нас, вéрою вы чтýщiя, помяни́те, честнíи мýченицы.
Слáва Ѻтцý и Сы́ну и Святóму Дýху.
Седáлен прп. Лáзаря, глас 3: Божéственный ум твоé сéрдце имы́й, преподóбне,/ земнáя измени́ Божéственными и стоя́щими и сликовствýеши Áнгелом,/ Свéта невещéственнаго наслаждáяся, непрестáнно веселя́ся.// Тем, преподóбне Хрiстá Бóга моли́ даровáти нам вéлiю ми́лость.
И ны́не и прúсно и во вéки векóв. Амúнь.
Богорóдичен из минéи, глас 3: Божéственная ски́нiя былá еси́ Слóва, еди́на Пречи́стая, Мáти Дéво,/ чистотóю Áнгелы превозшéдшая,/ пáче всех менé персть бы́вша, осквернéна плотски́ми прегрешéньми,/ очи́сти моли́тв Твои́х Божéственными водáми,// подаю́щи, Чи́стая, вéлiю ми́лость.
ПЕСНЬ 4
Iрмóс: Хрiстóс моя́ си́ла,/ Бог и Госпóдь,/ честнáя Цéрковь/ боголéпно поéт, взывáющи,// от смы́сла чи́ста, о Гóсподе прáзднующи.
Хор: Слáва, Гóсподи, Святóму Воскресéнiю Твоемý.
Чтец: Дрéво процвелó есть, Хрiстé, и҆́стинныя жи́зни:/ крест бо водрузи́ся,/ и напоéн быв крóвiю и водóю от нетлéннаго Твоегó ребрá,// живóт нам прозябé.
Хор: Слáва, Гóсподи, Святóму Воскресéнiю Твоемý.
Чтец: Не ктомý змiй мне лóжне обожéнiе подлагáет:/ Хрiстóс бо богодéлатель человéческаго естествá,// ны́не невозбрáнно стезю́ животá мне отвéрзе.
Хор: Пресвятáя Богорóдице, спасú нас.
Богорóдичен: Я́ко вои́стинну неизвещáнна и непостижи́ма,/ я́же Твоегó боголéпнаго, Богорóдице, суть рождествá,// сýщим на земли́ и на небеси́, Приснодéво, тáинства.
Глас 6
Хор: Пресвятáя Богорóдице, спасú нас.
Чтец: Поéм, Пречи́стая, Тебé Всенепорóчную,/ и҆́же Тобóю спáсшiися,/ и благочéстно пою́ще взывáем:// благословéнна, я́же Бóга, Приснодéво, рóждшая.
Хор: Пресвятáя Богорóдице, спасú нас.
Чтец: Свет незаходи́мый, Дéво, родилá еси́,/ сýщим во тьме житiя́,/ плóтiю светя́щ, Всеблажéнная, и пою́щим Тя,// рáдость, Приснодéво, источи́ла еси́.
Глас 8
Хор: Святíи мýченицы, молúте Бóга о нас.
Чтец: Заря́ми Божéственных пóдвиг, всебогáтiи, вселéнныя вся концы́ просвещáете преслáвно/ и неви́димых врагóв тьму отгóните.// Тем благочестномýдренно вáше совершáем светонóсное и Божéственное торжествó.
Хор: Святíи мýченицы, молúте Бóга о нас.
Чтец: Равномýдрiи вси, пóдвиг соверши́вше, и пóчести рáвно сподóбистеся,/ дáвше крóви своя́ за Пострадáвшаго и Божéственную Кровь Источи́вшаго на Дрéве вóлею за нáше спасéнiе.// Сегó рáди вы ублажáем.
Хор: Святíи мýченицы, молúте Бóга о нас.
Чтец: Ны́не мýдрыя восхвáлим мýченики,/ Феогéна и Мáманта, Iéрона, Клавдiáна, Нíкона кýпно и Нiкáндра,/ Лóнгiна, и Иси́хiа, и Варáхiа, Каллiнíка вели́каго// и Ксанфíа Божéственнаго, Феóфiла и Уаллéрiа.
Хор: Пресвятáя Богорóдице, спасú нас.
Богорóдичен: Закóна сéни и прорóческая гадáнiя/ Тя Мáтерь провозвести́ша дрéвле бы́вшу Избáвителя./ И҆́мже ны́не совершéнiе мы, зря́ще, Всенепорóчная, соглáсно Тя поéм,// страстотéрпцев слáво и мýченик святы́х держáва.
Глас 2
Хор: Преподóбне óтче Лáзаре, молú Бóга о нас.
Чтец: Я́ко всех врéменных, преподóбне, пристрáстiя же и любвé отбежáв,/ всю к Бóгу твою́ надéжду стяжáв всегдá.// И éже стяжáл еси́, ни́щих рýки прiя́ша.
Хор: Преподóбне óтче Лáзаре, молú Бóга о нас.
Чтец: Дéмонское злодéйство, преподóбне, отрази́в,/ приражéнiи звери́ными некосновéн от сегó отню́д пребы́л еси́, блажéнне,/ Божéственною благодáтiю покрывáемь// тя при́сно во всех Заступáющаго.
Слáва Ѻтцý и Сы́ну и Святóму Дýху.
Тропáрь: Разслáбити твою́ крéпость, преподóбне, вселукáвый тщáшеся,/ éже к Бóгу зря твою́ любóвь и благодарéнiе;// тем на тя псы пусти́, но во тщетý егó ухищрéнiе обличи́ся.
И҆ ны́не и прúсно и во вéки векóв. Амúнь.
Богорóдичен: Пою́ Тя, Богорóдице Влады́чице, и вопiю́ Ти:/ Твоéю моли́твою освяти́, соблюдáющи,/ и настáви ко спасéнiю мнóгими грехи́ пáдающаго// и прилóги дéмонскими колéблема.
Катавáсiя (глас 4): Седя́й в Слáве/ на Престóле Божествá/ во óблаце лéгце,/ прiи́ди Iисýс Пребожéственный,/ Нетлéнною Длáнiю/ и спасé зовýщiя:// слáва, Хрiстé, си́ле Твоéй.
ПЕСНЬ 5
Iрмóс: Бóжiим свéтом Твои́м, Блáже,/ ýтренюющих Ти дýши любóвiю озари́, молю́ся,/ Тя вéдети, Слóве Бóжiй,/ и҆́стиннаго Бóга,// от мрáка грехóвнаго взывáюща.
Хор: Слáва, Гóсподи, Святóму Воскресéнiю Твоемý.
Чтец: Уступáют мне херувíми ны́не,/ и плáменное орýжiе, Влады́ко, плещи́ мне даéт,/ Тя ви́девше, Слóве Бóжiй, и҆́стиннаго Бóга,// разбóйнику путь сотвóршаго в рай.
Хор: Слáва, Гóсподи, Святóму Воскресéнiю Твоемý.
Чтец: Не ктомý бою́ся, éже в зéмлю, Влады́ко Хрiстé, возвращéнiя:/ Ты бо от земли́ мя возвéл еси́ забвéнна,/ благоутрóбiя рáди мнóгаго,// к высотé нетлéнiя воскресéнiем Твои́м.
Хор: Пресвятáя Богорóдице, спасú нас.
Богорóдичен: И҆́же Богорóдицу Тя от души́, Влады́чице мíра благáя,/ исповéдающих спаси́:/ Тебé бо предстáтельство непобори́мое и҆́мамы,// и҆́стинную Богороди́тельницу.
Глас 6
Хор: Пресвятáя Богорóдице, спасú нас.
Чтец: Чистотóю возсiя́вши свéтло,/ Божéственное пребывáнiе Влады́ки, Всепéтая, былá еси́./ Ты бо еди́на Мáти Бóжiя яви́лася еси́,// во объя́тiих, я́ко младéнца, Сегó носи́вши.
Хор: Пресвятáя Богорóдице, спасú нас.
Чтец: Нося́щи добрóту ýмную, краснéйшiя Твоея́ души́,/ Невéста Бóжiя былá еси́,/ запечáтствована дéвством, Чи́стая,// и свéтом чистоты́ мiр просвещáющи.
Глас 8
Хор: Святíи мýченицы, молúте Бóга о нас.
Чтец: Мýдрых страстотéрпец, Максiмiáна и Божéственнаго Евгéнiа с Феóдором, Дукíтia чтýще,/ Каллiмáха, кýпно Феодýла и Дорофéа похвáлим,// мýжески пóдвиг соверши́вшiя.
Хор: Святíи мýченицы, молúте Бóга о нас.
Чтец: Дóблiи орýжницы, вóлею умерщвля́еми и сокрушáеми,/ безсмéртiе вéчно наслéдоваша и в рáйстей ликýют ны́не широтé,// блажéнныя надéжды прiи́мше.
Хор: Святíи мýченицы, молúте Бóга о нас.
Чтец: Дремáнiе небрежéнiя отрази́вше всехвáльнiи,/ во врéмя пóдвиг кýпно бóдростiю Божéственною потекóсте течéнiе Божéственныя вéры мучéнiя// и к пристáнищу Небéсному ны́не прiидóсте.
Хор: Пресвятáя Богорóдице, спасú нас.
Богорóдичен: Свя́зана плени́цами мя прегрешéнiй, всепéтая Влады́чице,/ ýзы áдовы разреши́вшая Божéственыым Твои́м Рождествóм,// разреши́, молю́ся Тебé, и пути́, вводя́щiя к жи́зни, ступáти поспеши́.
Глас 2
Хор: Преподóбне óтче Лáзаре, молú Бóга о нас.
Чтец: Души́ твоея́ твéрдое и рáзума Богостоя́нное, преподóбне,/ лукáвый, низложи́ти надéявся, во пса себé преложи́в,// тáко прiи́де искуси́ти тя.
Хор: Преподóбне óтче Лáзаре, молú Бóга о нас.
Чтец: В скýдости мнóзей недоумéнiя враг быв, отступи́,/ ничтóже отню́д стужи́вша тя, блажéнне, зря,// пáче же благодáрственно скýдость нося́ща.
Слáва Ѻтцý и Сы́ну и Святóму Дýху.
Тропáрь: Жезл си́лы, я́коже орýжiе, крест, преподóбне, в рукáх всегдá нося́,// все врáжiе кóзней дéйство, я́ко прах, истни́л еси́.
И҆ ны́не и прúсно и во вéки векóв. Амúнь.
Богорóдичен: Отчáявшихся Надéжда и Предстáтельнице вéрных, спаси́ мя, Мáти Бóжiя,// от вся́каго наси́лiя врагóв неви́димых и ви́димых, Всепéтая.
Катавáсiя (глас 4): Ужасóшася вся́ческая/ о Божéственней слáве Твоéй:/ Ты бо, Неискусобрáчная Дéво,/ имéла еси́ во утрóбе над всéми Бóга/ и родилá еси́ Безлéтнаго Сы́на,/ всем, воспевáющим Тя,// мир подавáющая.
ПЕСНЬ 6
Iрмóс: Житéйское мóре,/ воздвизáемое зря напáстей бýрею,/ к ти́хому пристáнищу Твоемý притéк, вопiю́ Ти:/ возведи́ от тли живóт мой,// Многоми́лостиве.
Хор: Слáва, Гóсподи, Святóму Воскресéнiю Твоемý.
Чтец: Распинáемь, Влады́ко, гвоздьми́ ýбо,/ кля́тву ю́же на нас потреби́л еси́:/ копiéм же прободáемь в ребрó,// адáмово рукописáнiе растерзáв, мíр свободи́л еси́.
Хор: Слáва, Гóсподи, Святóму Воскресéнiю Твоемý.
Чтец: Адáм низведéся, лéстiю запя́т быв, ко áдове прóпасти:/ но и҆́же естествóм Бог же и ми́лостив,/ сшел еси́ на взыскáнiе,// и на рáму понéс, совоскреси́л еси́.
Хор: Пресвятáя Богорóдице, спасú нас.
Богорóдичен: Пречи́стая Влады́чице,/ рóждшая человéком кóрмчiю Гóспода,/ страстéй мои́х непостоя́нное и лю́тое утоли́ смущéнiе,// и тишинý подáждь сéрдцу моемý.
Глас 6
Хор: Пресвятáя Богорóдице, спасú нас.
Чтец: Вели́кiй преднаписá во прорóцех Моисéй Тя,/ ковчéг, и трапéзу, и свéщник, и рýчку,/ обрáзно назнáменуя воплощéнiе,// éже из Тебé Вы́шняго, Мáти Дéво.
Хор: Пресвятáя Богорóдице, спасú нас.
Чтец: Умерщвля́ется смерть, и тлéнiе упражня́ется/ Адáмова осуждéнiя, о Влады́чице!/ Плодý Твоемý прирази́вшееся:/ Жизнь бо родилá еси́,// от истлéнiя избавля́ющую пою́щих Тя.
Глас 8
Хор: Святíи мýченицы, молúте Бóга о нас.
Чтец: В пéснех страдáльца Феодóта, Iларióна, Гiгáнтiя мýдраго,// и Афанáсiа, и Божéственнаго Евти́хiа со Епiфáнiем по дóлгу ублажи́м.
Хор: Святíи мýченицы, молúте Бóга о нас.
Чтец: Да ублажáтся вéрно Iéрон и Дiодóт,/ Кастрíкiй мýдрый и Божéственный Острíхiй,// вели́кiй Фемéлiй со Амонíтом, Хрiстóвы дóблiи мýченицы.
Хор: Святíи мýченицы, молúте Бóга о нас.
Чтец: Кровéй ваших течéнiем/ фараóна неви́димаго потопи́вше со всем вóинством, добропобéднiи мýченицы,// Небесá постигóсте и перворождéнных Цéрковь украси́сте.
Хор: Пресвятáя Богорóдице, спасú нас.
Богорóдичен: Орýжiя врáжiя, Богороди́тельнице, оскудéша,/ отнéлеже копiéм прободéся Хрiстóс, Егóже родилá еси́,// Крóвiю и водóю обетшáвшiя человéки назидáя.
Глас 2
Хор: Преподóбне óтче Лáзаре, молú Бóга о нас.
Чтец: Храм Бóгу твоé сéрдце хотя́ яви́ти, преподóбне,/ Цéркви обхождáл еси́ святы́х,/ от ни́хже прiя́л еси́ благодáть оби́льно Святáго Дýха// мнóгим человéком на утверждéнiе.
Хор: Преподóбне óтче Лáзаре, молú Бóга о нас.
Чтец: Твоé отéчество, я́ко богáтство, тя, Богомýдре, многоцéнное, пáки прiя́т Божéственным судóм./ Тем стрáнна мя отéчества Едéмскаго, преподóбне,// сýща наслéдника семý содéлай.
Слáва Ѻтцý и Сы́ну и Святóму Дýху.
Тропáрь: Цéрковь тя Марíны дéвы мýченицы пéрво прiят всéльника,/ в нéйже, я́ко незаходи́ма, возсiя́л еси́,// звездá, озаря́я, преподóбне, во тьме невéденiя спя́щiя.
И҆ ны́не и прúсно и во вéки векóв. Амúнь.
Богорóдичен: Умоли́ Сы́на Твоегó и Гóспода, Дéво, о рабéх Твои́х,/ вéрою честнóму óбразу зрáка Твоегó, Всенепорóчная, покланя́ющихся при́сно,// и҆́бо мóжеши.
Катавáсiя (глас 4): Божéственное сié и всечестнóе/ совершáюще прáзднество,/ Богомýдрiи, Богомáтере,/ прiиди́те, рукáми восплéщим,// от Нея́ рóждшагося Бóга слáвим.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк воскрéсный, глас 6: Живоначáльною длáнiю/ умéршiя от мрáчных удóлiй,/ Жизнодáвец воскреси́в всех Хрiстóс Бог,/ воскресéнiе подадé человéческому рóду:/ есть бо всех Спаси́тель,// Воскресéнiе и Живóт, и Бог всех.
И҆́кос: Крест и погребéнiе Твоé, Жизнодáвче, воспевáем вéрнiи, и покланя́емся,/ я́ко ад связáл еси́, Безсмéртне, я́ко Бог всеси́льный:/ и мéртвыя совоскреси́л еси́, и вратá смéртная сокруши́л еси́,/ и держáву áдову низложи́л еси́, я́ко Бог./ Тéмже земнорóднiи славослóвим Тя любóвiю, воскрéсшаго,/ и низложи́вшаго врáжiю держáву всепáгубную,/ и всех воскреси́вшаго в Тя вéровавших,/ и мiр избáвльшаго от стрел змiи́ных,// и от прéлести врáжiя, я́ко Бог всех.
ПЕСНЬ 7
Iрмóс: Росодáтельну ýбо пещь/ содéла Áнгел/ преподóбным отрокóм,/ халдéи же опаля́ющее/ велéнiе Бóжiе мучи́теля увещá вопи́ти:// благословéн еси́, Бóже отéц нáших.
Хор: Слáва, Гóсподи, Святóму Воскресéнiю Твоемý.
Чтец: Рыдáющее во стрáсти Твоéй сóлнце, во мрак облечéся,/ и во дни по всей, Влады́ко, земли́ свет помéрче, вопiя́:// благословéн еси́ Бóже отéц нáших.
Хор: Слáва, Гóсподи, Святóму Воскресéнiю Твоемý.
Чтец: Облекóшася Хрiстé схождéнiем Твои́м во свет преиспóдняя,/ прáотец же весéлiя испóлнь, яви́ся ликовствýя, взыгрáся, вопiя́:// благословéн еси́, Бóже отéц нáших.
Хор: Пресвятáя Богорóдице, спасú нас.
Богорóдичен: Тобóю, Мáти Дéво,/ свет возсiя́ всей вселéнней свéтлый:/ Зижди́теля бо Ты всех родилá еси́ Бóга,/ Егóже проси́, Всечи́стая,// нам низпослáти вéрным вéлiю ми́лость.
Глас 6
Хор: Пресвятáя Богорóдице, спасú нас.
Чтец: Ю́нош трiéх пещь не опали́, рождествó прообразýющих Твоé:/ божéственный бо огнь Тебé не опали́в, всели́ся в Тя,/ и вся научи́ вопи́ти:// благословéн еси́, Бóже отéц нáших.
Хор: Пресвятáя Богорóдице, спасú нас.
Чтец: Блажáт концы́ Тя, Всечи́стая Мáти, я́коже прореклá еси́,/ просвещáеми светолýчными сiя́ньми Твои́ми,/ и благодáтiю пою́ще, вопiю́т:// благословéн еси́, Бóже отéц нáших.
Глас 8
Хор: Святíи мýченицы, молúте Бóга о нас.
Чтец: Честнýю твою́ рýку за и҆́стину, Iéроне слáвне, отсéчену зря,/ благодáрственныя пéсни Всеви́дцу поя́, взывáл еси́:// отéц нáших Бóже, благословéн еси́.
Хор: Святíи мýченицы, молúте Бóга о нас.
Чтец: Высóким смы́слом прообрáзiе сострадáльцем был еси́, слáвне Iéроне,/ и с ни́ми вы́шняго Цáрствiя жрéбiй прiя́л еси́, поя́:// отéц нáших Бóже, благословéн еси́.
Хор: Святíи мýченицы, молúте Бóга о нас.
Чтец: Вóини дóблiи Царя́ я́вльшеся вéчнующаго,/ мýжества вáшего мечéм полки́ лестцá погуби́ли естé, пою́ще:// отéц нáших Бóже, благословéн еси́.
Хор: Пресвятáя Богорóдице, спасú нас.
Богорóдичен: Врачá порóждши, Дéво, сéрдца моегó стрáсти уврачи́, Чи́стая,/ и вéчнующаго мя мучéнiя избáви, в пéснех зовýща:// отéц нáших Бóже, благословéн еси́.
Глас 2
Хор: Преподóбне óтче Лáзаре, молú Бóга о нас.
Чтец: Трапéзу оби́льну уготóва, испóлнену благи́х добродéтелей ти Божéственных,/ и҆́миже вся питáя, и пéти научáше:// отéц нáших Бóже, благословéн еси́.
Хор: Преподóбне óтче Лáзаре, молú Бóга о нас.
Чтец: Глагóлом учéнiй твои́х премýдрых послéдующе, лю́дiе,/ маловрéменных всех любóвь вои́стинну усéрдно отложи́вше,// и жи́тельство с тóбою я́ко блáго, всеблажéнне, произвóлиша.
Слáва Ѻтцý и Сы́ну и Святóму Дýху.
Тропáрь: Ѻ́браз стяжáв житiя́ ты Сiмеóна ди́внаго,/ я́ко кáмень адамáнт, на столпé без покрóва стоя́л еси́, зовы́й, веселя́ся:// пребожéственный отцéв и наш Бóже, благословéн еси́.
И҆ ны́не и прúсно и во вéки векóв. Амúнь.
Богорóдичен: Спаси́ мя от сéтей врáжiих ходáтайством Твои́м, Чи́стая,/ и любви́ конéчней благáго Сы́на Твоегó привяжи́,// удаля́ема всегдá от Негó сластьми́ безмéстными.
Катавáсiя (глас 4): Не послужи́ша твáри Богомýдрiи,/ пáче Создáвшаго,/ но, óгненное прещéнiе мýжески попрáвше,/ рáдовахуся, пою́ще:// препéтый отцéв Госпóдь и Бог, благословéн еси́.
ПЕСНЬ 8
Iрмóс: Из плáмене преподóбным рóсу источи́л еси́/ и прáведнаго жéртву водóю попали́л еси́:/ вся бо твори́ши, Хрiстé, тóкмо éже хотéти.// Тя превознóсим во вся вéки.
Хор: Слáва, Гóсподи, Святóму Воскресéнiю Твоемý.
Чтец: Iудéйскiя дрéвле пророкоубíйцы лю́ди,/ богоубíйцы зáвисть ны́не содéла,/ Тебé на крест вознéсшiя, Слóве Бóжiй:// Егóже превознóсим во вся вéки.
Хор: Слáва, Гóсподи, Святóму Воскресéнiю Твоемý.
Чтец: Небéснаго крýга не остáвил еси́,/ и во ад сошéд, всегó совоздви́гл еси́/ лежáщаго во гнóищи, Хрiстé, человéка,// Тя превознося́ща во вся вéки.
Хор: Пресвятáя Богорóдице, спасú нас.
Богорóдичен: От Свéта Светодáвца Слóва зачалá еси́,/ и рóждши неизречéнно Сегó, прослáвилася еси́:/ Дух бо в Тя, Отрокови́це, Бóжiй всели́ся.// Тéмже Тя поéм во вся вéки.
Глас 6
Хор: Пресвятáя Богорóдице, спасú нас.
Чтец: Позлащéною ри́зою, я́коже Цари́цу, Сын Твой просвети́в зарéю Дýха,/ Тебé одеснýю Себé постáви, Пречи́стая:// Егóже превознóсим во вся вéки.
Хор: Пресвятáя Богорóдице, спасú нас.
Чтец: И҆́же хотéнiем еди́ным мир водрузи́вый,/ от пречи́стыя Твоея́ утрóбы плоть взéмлет,/ свы́ше сiю́ наздáти хотя́:// Егóже превознóсим во вся вéки.
Продолжение здесь