Неделя 20 по Пятидесятнице. Прор. Осии. Прмч. Андрея Критского, глас 3 УТРЕНЯ (ок-ние.) ЧАС ПЕРВЫЙ
30 октября́ 2022 гóда. Недéля 20 по Пятидеся́тнице. Прорóка Осíи. Прмч. Андрéя Крúтскаго. Глас 3. Воскрéсная прáздничная слýжба для домáшнего (келéйнаго) совершéнiя. Послéдованiе ýтрени.
Окончáнiе всенóщного бдéнiя. Начáло здесь ( великая вечéрня), здесь ( ýтреня) здесь ( продолжéнiе ýтрени с канóном)
Глас 1
Хор: Святы́й прорóче Осíе, молú Бóга о нас.
Чтец: Пáче естествá просвещéнiем, Осíе,/ ум просвети́в твой, бýдущих, блажéнне,/ знáнiем обогати́лся еси́,/ Влады́це зовы́й:// благословéн еси́, Бóже отéц нáших.
Хор: Святы́й прорóче Осíе, молú Бóга о нас.
Чтец: Ты в рукáх прорóков уподóбився,/ умнóжил еси́, Безсмéртне, видéнiя, Спáсе,/ разли́чно образýемь,/ Тебé вéрно вопiю́щим:// благословéн еси́, Бóже отéц нáших.
Хор: Святы́й прорóче Осíе, молú Бóга о нас.
Чтец: Iзрáилев ты истóчник, спасéнiя проливáющiй вóды,/ рекý ми́рную - Хрiстá проповéдая, Осíе,/ Емýже вопiéм:// благословéн еси́, Бóже отец нáших.
Богорóдичен: Пресвятáя Богорóдице, спасú нас.
Чтец: Из Безначáльнаго Отцá возсiя́в, из Тебé воплоти́ся, Богомáти Отрокови́це,/ за ми́лость неизречéнную,/ Емýже пою́ще, вопiéм:// благословéн еси́, Бóже отéц нáших.
Глас 2
Хор: Святы́й преподобномýчениче Андрéе, молú Бóга о нас.
Чтец: Возвышáемая волнéнiя лукáвствiя/ твоегó умá не поколебáша, Андрéе слáвне,/ на кáмени знáнiя Хрiстóва стоя́ща.// Тем небýрное пристáнище я́ве обуревáемым был еси́.
Хор: Святы́й преподобномýчениче Андрéе, молú Бóга о нас.
Чтец: Бýими взыскáньми лукавомýдрый, умóм омрачáемый, укрáсти окушáтися тя,/ Богослóвiя светлостьми́ удобря́ема,/ но яви́ся смéха достóин, мýдре,// испóлнився студá дерзновéнiем твои́м.
Слáва Ѻтцý и Сы́ну и Святóму Дýху.
Тропáрь: Ум твой мановéньми Божéственнейшими украшáемь, Андрéе досточýдне,/ звездá всесвéтлая всем показáся,// чудесы́ коегóждо вéрныя просвещáя, хвáлящiя тя.
И ны́не и прúсно и во вéки векóв. Амúнь.
Богорóдичен: Храм былá еси́ Живáго Бóга,/ в нéмже жили́ще неизглагóланно сотвори́, Дéво Всепéтая,/ на Небесéх Обитáяй,// и блáгости рáди мнóгiя Человéк бы́ти извóлив.
Катавáсiя (глас 4): Не послужи́ша твáри Богомýдрiи,/ пáче Создáвшаго,/ но, óгненное прещéнiе мýжески попрáвше,/ рáдовахуся, пою́ще:// препéтый отцéв Госпóдь и Бог, благословéн еси́.
ПЕСНЬ 8
Iрмóс: Нестерпи́мому огню́ соедини́вшеся,/ Богочéстiя предстоя́ще, ю́ноши,/ плáменем же невреждéни,/ Божéственную песнь поя́ху:/ благослови́те, вся делá Госпóдня, Гóспода// и превозноси́те во вся вéки.
Хор: Слáва, Гóсподи, Святóму Воскресéнiю Твоемý.
Чтец: Раздрáся церкóвная свéтлость,/ егдá крест Твой водрузи́ся на лóбнем,/ и тварь преклоня́шеся стрáхом, воспевáющи:/ благослови́те вся делá Госпóдня, Гóспода,// пóйте и превозноси́те Егó во вéки.
Хор: Слáва, Гóсподи, Святóму Воскресéнiю Твоемý.
Чтец: Воскрéсл еси́ Хрiстé из грóба,/ и пáдшаго прельщéнiем, дрéвом испрáвил еси́ Божéственною си́лою, зовýща и глагóлюща:/ благослови́те вся делá Госпóдня, Гóспода,// пóйте и превозноси́те Егó во век.
Хор: Пресвятáя Богорóдице, спасú нас.
Богорóдичен: Храм Бóжiй яви́лася еси́ Вмести́лище одушевлéнное, и Ковчéг:/ Творцá бо человéком, Богороди́тельнице Пречи́стая, примири́ла еси́,/ и достóйно вся делá поéм Тя,// и превознóсим во вся вéки.
Глас 3
Хор: Пресвятáя Богорóдице, спасú нас.
Чтец: Чи́ны ýмныя, я́ко Мáти, превозшлá еси́,/ и близ Бóга бы́вши:/ благослови́м, Благословéнная Дéво, рождествó Твоé,// и превознóсим во вся вéки.
Хор: Пресвятáя Богорóдице, спасú нас.
Чтец: Добрóту естéственную, краснéйшу/ показáла еси́, облиставáющую плоть Божествá./ Благослови́м, Благословéнная Дéво, рождествó Твоé,// и превознóсим во вся вéки.
Глас 1
Хор: Святы́й прорóче Осíе, молú Бóга о нас.
Чтец: Пáче постижéнiя прорóком дáнная от Божéственнаго дáра/ предзнáтельное дéйство и бýдущих знáнiе// пéти Гóспода и превозношáти Егó во вéки.
Хор: Святы́й прорóче Осíе, молú Бóга о нас.
Чтец: Устá Богодохновéнная стяжáв и язы́к Богоглагóлив, Осíе,/ Богочéстiя свет просвещáющь поéши:// пóйте Гóспода и превозноси́те Егó во вéки.
Хор: Святы́й прорóче Осíе, молú Бóга о нас.
Чтец: Словесы́ и дея́ньми прорóчествуя,/ обличáеши лю́ди блýдствовавшiя, обрáзно, пребогáте, научáя пéти:// пóйте Гóспода и превозноси́те Егó во вéки.
Богорóдичен: Пресвятáя Богорóдице, спасú нас.
Чтец: Соприсносýщное Бóжiе Бог Слóво,/ от Святы́я Дéвы воплóщся, яви́ся вéрою вопiю́щим:// пóйте Гóспода и превозноси́те Егó во вéки.
Глас 2
Хор: Святы́й преподобномýчениче Андрéе, молú Бóга о нас.
Чтец: Стрáсти плотскíя, мýдре, предумертви́в пóстническими пóдвиги,/ пострадáл еси́, крепчáйше,// Спáсово подóбiе и Приснодéвы, преподóбне, и святы́х чествовáтельно лобызáя.
Хор: Святы́й преподобномýчениче Андрéе, молú Бóга о нас.
Чтец: Я́ростно на Хрiстá неи́стовствующе,/ я́ко звéрiе свирéпiи, возложи́ша, óтче, умертви́ти тя./ Тем влекýще и бiю́ще, ввергóша в прóпасть,// свидéтеля И҆́стины тебé я́вственно содéловающе.
Благословúм Отцá, и Сы́на, и Святáго Дýха, Гóспода.
Тропáрь: Чудесы́ вéрныя, я́ко водáми, напая́еши,/ и отгóниши, всеблажéнне, лукáвствiя дýхи,/ и очищáеши недýги,// благодáть врачевáнiй свы́ше прiéм от Хрiстá Бóга нáшего.
И ны́не и прúсно и во вéки векóв. Амúнь.
Богорóдичен: Яви́лася еси́ небéс, Дéво, прострáннейши,/ Бóга во утрóбе Твоéй вмести́вшая, всéми Невмести́маго;/ егóже моли́ избáвити утеснéнiя, Чи́стая Влады́чице, душетлéннаго// благочéстно воспевáющiя Тя.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя (глас 4): Óтроки благочести́выя в пéщи/ Рождествó Богорóдичо спаслó есть;/ тогдá ýбо образýемое,/ ны́не же дéйствуемое,/ вселéнную всю воздвизáет пéти Тебé:/ Гóспода пóйте, делá,// и превозноси́те Егó во вся вéки.
Возглас: Богорóдицу и Мáтерь Свéта в пéснех возвелúчим.
Хор: Вели́чит душá Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На каждый стiх)
Я́ко призрé на смирéнiе рабы́ Своея́,/ се бо от ны́не ублажáт Мя вси рóди.
Я́ко сотвори́ Мне вели́чiе Си́льный,/ и свя́то И҆́мя Егó, и ми́лость Егó в рóды родóв боя́щимся Егó.
Сотвори́ держáву мы́шцею Своéю,/ расточи́ гóрдыя мы́слiю сéрдца их.
Низложи́ си́льныя со престóл, и вознесé смирéнныя;/ áлчущiя испóлни благ, и богатя́щiяся отпусти́ тщи.
Воспрiя́т Iзрáиля óтрока Своегó, помянýти ми́лости,/ я́коже глагóла ко отцéм нáшим, Авраáму и сéмени егó, дáже до вéка.
ПЕСНЬ 9
Iрмóс: Нóвое чýдо и Боголéпное:/ деви́ческую бо дверь затворéнную/ я́ве прохóдит Госпóдь,/ наг во вхóде,/ и плотонóсец яви́ся во исхóде Бог,/ и пребывáет дверь затворéна./ Сiю́ неизречéнно// я́ко Богомáтерь, величáем.
Хор: Слáва, Гóсподи, Святóму Воскресéнiю Твоемý.
Чтец: Стрáшно есть зрéти Тебé, Творцá/ на дрéве воздви́жена, Слóве Бóжiй,/ плóтски же стрáждуща Бóга за рабы́,/ и во грóбе бездыхáнна лежáща,/ мéртвыя же из áда разреши́вша:// тéмже Тя, Хрiстé, я́ко Всеси́льна, величáем.
Хор: Слáва, Гóсподи, Святóму Воскресéнiю Твоемý.
Чтец: Из тли смéртныя спасл еси́, Хрiстé, прáотцы,/ положéн быв во грóбе мертв,/ и живóт процвéл еси́, мéртвыя воскреси́в,/ руководи́в естествó человéческое ко свéту,/ и в Божéственное облéк нетлéнiе.// Тéмже истóчника Тя свéта при́сно живáго величáем.
Хор: Пресвятáя Богорóдице, спасú нас.
Богорóдичен: Храм и Престóл яви́лася еси́ Бóжiй,/ вóньже всели́ся И҆́же в вы́шних сый,/ рождéйся неискусомýжно, Всечи́стая,/ плóти Твоея́ не отвéрз вся́чески вратá./ Тéмже непрестáнными, Чи́стая, моли́твами Твои́ми,// язы́ки вáрварскiя скóро до концá покори́.
Глас 3
Хор: Пресвятáя Богорóдице, спасú нас.
Чтец:Сы́тость Твои́х похвáл, Дéво,/ благочести́вым вéрным отню́д не бывáет:/ желáнiем бо желáнiе при́сно Божéственное, и Духóвное прiéмлюще,// я́ко Мáтерь Бóжiю, величáем.
Хор: Пресвятáя Богорóдице, спасú нас.
Чтец: Положи́л еси́ нам непосты́дную Моли́твенницу,/ Тебé рóждшую, Хрiстé./ Тоя́ мольбáми Ми́лостива подаéши нам Дýха, Подáтеля блáгости,// от Отцá Тобóю происходя́ща.
Глас 1
Хор: Святы́й прорóче Осíе, молú Бóга о нас.
Чтец: Честь, я́ко прорóк, прiя́л еси́, Осíе,// прiéм венéц благолéпiя от Бóга, всеблажéнне.
Хор: Святы́й прорóче Осíе, молú Бóга о нас.
Чтец: Всем свéтом озаря́емь Хрiстóвым всеизря́дне,// даждь твои́ми моли́твами Сегó ми́лостива пою́щим тя.
Хор: Святы́й прорóче Осíе, молú Бóга о нас.
Чтец: Хвалáми с чи́нми Áнгельскими, Осíе,/ предстои́ши, Влады́ку хваля́,// пожи́в житié равноáнгельное.
Богорóдичен: Пресвятáя Богорóдице, спасú нас.
Чтец: Спасти́ восхотéв человека Спас и Госпóдь,// от Пречи́стыя Дéвы в плоть нáшу одéяся.
Глас 2
Хор: Святы́й преподобномýчениче Андрéе, молú Бóга о нас.
Чтец: Се, óтче преподóбне, течéнiе твоé соверши́в,/ Правослáвную вéру соблю́л еси́ непорóчну;/ ея́же рáди пострадáв закóнно,/ венéц же сугýб прiя́л еси́ свы́ше,// я́ко мýченик непобеди́м и пóстник непобóрен.
Хор: Святы́й преподобномýчениче Андрéе, молú Бóга о нас.
Чтец: Я́ко крин сладковóнный и я́ко шипóк, óтче,/ процвéл еси́ в цвéтнице Божéственнаго я́ве пощéнiя,/ и благовóнствуеши, я́ко кедр, мýченически просвещéн,/ Андрéе всехвáльне,// монáшествующих удобрéнiе.
Слáва Ѻтцý и Сы́ну и Святóму Дýху.
Тропáрь: День прáзднствен и весéлiя испóлнен,/ святýю твою́ пáмять творя́ще днесь,/ вéрою вопiéм тебé, óтче:/ к Бóгу святы́ми твои́ми моли́твами всех нас избáви житéйских обстоя́нiй.
И ны́не и прúсно и во вéки векóв. Амúнь.
Богорóдичен: Свéта селéнiе утрóба Твоя бысть,/ просвéщшаго мiр заря́ми Божествá/ и невéденiя тьму от земли́, Всенепорóчная Отрокови́це, совершéнно отгнáвшаго;/ Тогó рáди Тя слáвим.
Катавáсiя (глас 4): Всяк земнорóдный/ да взыгрáется, Дýхом просвещáемь,/ да торжествýет же Безплóтных умóв естествó,/ почитáющее свящéнное торжествó Богомáтере,/ и да вопiéт:/ рáдуйся, Всеблажéнная,// Богорóдице, Чи́стая Приснодéво.
Гóсподи, помилуй. (3 раза)
Слáва Отцý и Сыну и Святóму Дýху, и ныне и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьми́ Бог наш.
Хор: Свят Госпóдь Бог наш
Ексапостилáрiй воскрéсный девя́тый: Заключéнным Влады́ко двéрем, я́ко вшел еси́,/ Апóстолы испóлнил еси́ Дýха Пресвятáго, ми́рно дýнув,/ и҆́мже вязáти же и решáти грехи́ рекл еси́:/ и по осми́ днех Твоя́ рéбра Фомé показáл еси́, и рýце./ С ни́мже вопiéм:// Госпóдь и Бог Ты еси́.
Слáва Ѻтцý и Сы́ну и Святóму Дýху.
Светúлен прмч. Андрéя Крúтскаго: Андрéя добропобéдника похвáлим вси,/ Божéственно прáзднующе честнýю егó пáмять,/ я́ко да избáвимся от недýг;/ сей бо Спáсова честнáя воображéнiя/ и святы́х всех всеблагочéстно чествовáти проповéда./ Тем, венéц на Небесéх приéмь,// со Áнгелы рáдуется.
И ны́не и прúсно и во вéки векóв. Амúнь.
Богорóдичен воскрéснаго Ексапостiлáрiя: Твоегó Сы́на я́ко ви́дела еси́ от грóба воскрéсша триднéвна,/ Богоневéстная Пресвятáя Дéво,/ всю скорбь отложи́ла еси́, ю́же подъя́ла еси́, я́ко Мáти,/ егдá узрéла еси́ стрáждуща,/ и рáдости испóлншися,/ со ученики́ Егó почитáющи Тогó, поéши.// Тéмже и҆́же Богорóдицу Тя ны́не исповéдающих спасáй.
ХВАЛИТНЫ
Хор, глас 3: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.
[В приходской практике пропускается до стихир]Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речé, и бы́ша, Той повелé, и создáшася. Постáви я́ в век и в век вéка, повелéние положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
[В приходской практике пропускается до стихир]Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сы́нове Сióни возрáдуются о Царé своéм. Да восхвáлят и҆́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остри́ в рукáх их: сотвори́ти отмщéнiе во языцех, обличéнiя в лю́дех, связáти цари́ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егó.
Стiхúры воскрéсные, глас 3: Прiиди́те вси язы́цы,/ уразумéйте стрáшныя тáйны си́лу:/ Хрiстóс бо Спас наш, Éже в начáле Слóво,/ распя́тся нас рáди, и вóлею погребéся,/ и воскрéсе из мéртвых, éже спасти́ вся́ческая:// Томý поклони́мся.
Хвалúте Бóга во святых Егó,/ хвалúте Егó в утвержéнiи сúлы Егó.
Стiхúра: Повéдаша вся чудесá/ стрáжiе Твои́, Гóсподи,/ но собóр суеты́ испóлни мздóю десни́цу их,/ скры́ти мня́ше воскресéнiе Твоé,// éже мiр слáвит: поми́луй нас.
На 6: Хвалúте Егó на сúлах Егó, хвалúте Егó по мнóжеству велúчествiя Егó.
Стiхúра: Рáдости вся испóлнишася/ воскресéнiя искýс прiи́мша:/ Марíя бо Магдали́на ко грóбу прiи́де,/ обрéте Áнгела на кáмени седя́ща,/ ри́зами блистáющася и глагóлюща:/ что и҆́щете живáго с мéртвыми?/ Несть зде, но востá, я́коже речé,// предваря́я вы в Галiлéи.
Хвалúте Егó во глáсе трýбнем, хвалúте Егó во псалтúри и гýслех.
Стiхúра: Во свéте Твоéм, Влады́ко,/ ýзрим свет, Человеколю́бче:/ воскрéсл бо еси́ из мéртвых,/ Спасéнiе рóду человéческому дáруя:/ да Тя вся тварь славослóвит Еди́наго Безгрéшнаго,// поми́луй нас.
На 4. Хвалúте Егó в тимпáне и лúце, хвалúте Егó во стрýнах и оргáне.
И҆́ны стiхúры анатóлiевы: Песнь ýтреннюю мvронóсицы жены́/ со слезáми приношáху Тебé, Гóсподи,/ благоухáнiя бо аромáты имýща,/ грóба Твоегó достигóша,/ пречи́стое тéло Твоé помáзати тщáщася./ Áнгел седя́й на кáмени тем благовести́:/ что и҆́щете живáго с мéртвыми;/ смерть бо попрáвый воскрéсе я́ко Бог,// подая́ всем вéлiю ми́лость.
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Стiхúра: Блистáяся Áнгел на грóбе Твоéм животвóрном,/ мvронóсицам глагóлаше:/ истощи́вый грóбы Избáвитель, плени́ áда,/ и воскрéсе триднéвен,// я́ко Еди́н Бог и Всеси́лен.
Воскреснú, Гóсподи Бóже мой, да вознесéтся рукá Твоя́,/ не забýди убóгих Твоúх до концá. (Пс.9:33)
Во грóбе Тя искáше,/ пришéдши во еди́ну от суббóт Марíя Магдали́на,/ не обрéтши же рыдáше с плáчем вопiю́щи:/ увы́ мне, Спáсе мой!/ Укрáден был еси́, всех Цáрю./ Супрýг же живонóсных Áнгел внутрь грóба вопiя́ше:/ что плáчеши о жéно;/ плáчу, глагóлет, я́ко взя́ша Гóспода моегó от грóба,/ и не вем, где положи́ша Егó./ Сiя́ же обрати́вшися вспять,/ я́ко ви́де Тя, áбiе возопи́:// Госпóдь мой и Бог мой, слáва Тебé.
Исповéмся Тебé, Гóсподи, всем сéрдцем моúм,/ повéм вся чудесá Твоя́. (Пс.9:2)
Глас 6: Еврéи затвори́ша во грóбе Живóт,/ разбóйник же отвéрзе язы́ком наслаждéнiе,/ зовы́й и глагóля:/ со мнóю менé рáди распны́йся:/ сообéсися ми на дрéве,/ и яви́ся мне на престóле со Отцéм седя́:/ Той бо есть Хрiстóс Бог наш,// имéяй вéлiю ми́лость.
Слáва Ѻтцý и Сы́ну и Святóму Дýху.
Стiхúра евáнгельская девя́тая, глас 5: Я́ко в послéдняя лéта,/ сýщу пóзде от суббóт,/ предстáл еси́ другóм Хрiстé,/ и чудесéм чýдо извествýеши,/ заключéным вхóдом двéрным,/ éже из мéртвых Твоé воскресéнiе./ Но испóлнил еси́ рáдости ученики́,/ и Дýха Святáго преподáл еси́ им,/ и власть пóдал еси́ оставлéнiя грехóв/ и Фомы́ не остáвил еси́ в невéрствiя погружáтися бýри./ Тéмже подáждь и нам рáзум и҆́стинный и оставлéнiе прегрешéнiй,// благоутрóбне Гóсподи.
И҆ ны́не и прúсно и во вéки векóв. Амúнь.
Глас 2: Преблагословéнна еси́, Богорóдице Дéво,/ Воплóщшим бо ся из Тебé ад плени́ся,/ Адáм воззвáся,/ кля́тва потреби́ся,/ Éва свободи́ся,/ смерть умертви́ся, и мы ожи́хом./ Тем воспевáюще вопiéм:/ благословéн Хрiстóс Бог,// благоволи́вый тáко, слáва Тебé.
Возглас: Слáва Тебé, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Óтче Вседержи́телю, Гóсподи Сы́не Единорóдный, Iисýсе Хрiстé, и Святы́й Дýше. Гóсподи Бóже, Áгнче Бóжiй, Сы́не Отéчь, взéмляй грех мíра, помилуй нас. Взéмляй грехѝ мíра, прiимѝ молитву нáшу. Седя́й одеснýю Отцá, помилуй нас. Яко Ты есѝ Един Свят; Ты есѝ Един Госпóдь, Iисýс Хрiстóс, в слáву Бóга Отцá, ами́нь.
На всяк день благословлю́ Тя и восхвалю́ имя Твоé во вéки, и в век вéка.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено имя Твоé во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был еси нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебé. Гóсподи, к Тебé прибегóх, научѝ мя твори́ти вóлю Твою́, яко Ты есѝ Бог мой, яко у Тебé истóчник животá, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, поми́луй нас. (3 раза)
Хор: Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помилуй нас.
Тропáрь воскрéсный, глас 1: Днесь Спасéнiе мíру бысть,/ поéм Воскрéсшему из грóба,/ и Начáльнику жи́зни нáшея:/ разруши́в бо смéртiю смерть,// побéду дадé нам и вéлiю ми́лость.
Гóсподи поми́луй (40 раз)
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Гóсподи поми́луй (12раз)
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Утвердѝ, Бóже, святýю правослáвную вéру, правослáвных христiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 раза)
Гóсподи, благословѝ.
ОТПУСТ
Гóсподи, Iисýсе Хрiстé, Сыне Бóжiй, моли́твами пречи́стыя Своея́ Мáтере, святы́х слáвных и всехвáльных Апóстол, преподóбных и Богонóсных отéц нáших и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрiстý, Царéви нáшему Бóгу.
Прiиди́те, поклони́мся и припадéм Самомý Хрiстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моé. Вонмѝ глáсу молéнiя моегó, Царю́ мой и Бóже мой, яко к Тебé помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебé лукáвнуяй, нижé пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебé лю́бящiи имя Твоé. Яко Ты благослови́ши прáведника, Гóсподи: яко орýжiем благоволéнiя венчáл еси нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты еси. Не отвратѝ человéка во смирéнiе, и рекл еси: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травá мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л еси беззакóнiя нáша пред Тобóю: век наш в просвещéнiе лицá Твоегó. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегó, и от стрáха Твоегó, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы́ Твоя. Испóлнихомся заýтра ми́лости Твоея, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны еси, лéта в ня́же ви́дехом злáя. И при́зри на рабы́ Твоя́, и на делá Твоя, и настáви сы́ны их. И бýди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебé, Гóсподи. Пою́ и разумéю в путѝ непорóчне, когдá прiи́деши ко мне? Прехождáх в незлóбiи сéрдца моегó посредé дóму моегó. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпé мне сéрдце стропти́во, уклоня́ющагося от менé лукáваго не познáх. Оклеветáющаго тай и҆́скренняго своегó, сегó изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредé дóму моегó творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебé Бóже. (3 раза)
Гóсподи, помúлуй. (3 раза)
Тропáрь воскрéсный, глас 3: Да веселя́тся небéсная, да рáдуются земнáя; я́ко сотворѝ держáву мы́шцею Своéю Госпóдь, попрá смéртiю смерть,пéрвенец мéртвых бысть; из чрéва áдова избáви нас, и҆ подадé мíрови вéлiю ми́лость.
Слáва Ѻтцý и Сы́ну и Святóму Дýху.
Тропáрь Андрéя Крúтскаго, глас 4: Пóстнически предподвизáвся на горé, ýмная врагóв ополчéнiя всеорýжiем Крестá погуби́л еси, всеблажéнне. Пáки же ко страдáльчеству мýжески облéклся еси́, уби́в Копрони́ма мечéм вéры; и обои́х рáди венчáлся еси́ от Бóга, преподобномýчениче Андрéе, приснопáмятне.
И҆ ны́не и прúсно и во вéки векóв. Амúнь.
Богорóдичен: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблá есѝ цвет нетлéнiя. Дéву, я́ко пребылá есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогó молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы́ человéческiя, и сохраню́ зáповеди Твоя́. Лицé Твоé просветѝ на рабá Твоегó и научѝ мя оправдáнiем Твои́м.
Да испóлнятся устá моя хвалéнiя Твоегó, Гóсподи, я́ко да воспою́ слáву Твою́, весь день великолéпiе Твоé.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрiстé, Сыне Бóжiй, поми́луй нас. Ами́нь.
КОНДАК
Кондáк воскрéсный, глас 3: Воскрéсл еси́ днесь от грóба, Щéдре, и нас возвéл есѝ от врат смéртных; днесь Адáм ликýет, и҆ рáдуется Éва, вкýпе же и прорóцы с патрiáрхи воспевáют непрестáнно Божéственную держáву влáсти Твоея́.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрiстé Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесá очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрiстé, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицá Твоегó, да в нем ýзрим Свет Непристýпный: и испрáви стопы́ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 8: Взбрáнной Воевóде победи́тельная,/ я́ко избáвльшеся от злы́х,/ благодáрственная восписýем Ти́ раби́ Твои́, Богорóдице;/ но я́ко имýщая держáву непобеди́мую,/ от вся́ких нас бед свободи́, да зовéм Ти́:// рáдуйся, Невéсто Неневéстная.
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Гóсподи, поми́луй. (3 раза)
Гóсподи, благословѝ.
Гóсподи, Iисýсе Хрiстé, Сыне Бóжiй, моли́твами пречи́стыя Своея́ Мáтере, преподóбных и Богонóсных отéц нáших и всех святы́х, поми́лует и спасéт нас, я́ко Благ и Человеколю́бец.
С утрá чти часы и обéдницу