Неделя 18 по Пятидесятнице. Сщмч. Дионисия Ареопагита, глас 1 ВСЕНОЩНОЕ БДЕНИЕ. УТРЕНЯ. КАНОН.
16 октября́ 2022 гóда. Недéля 18 по Пятидеся́тнице. Священномýченика Дiонúсiя Ареопагíта, епíскопа Афúнскаго. Глас 1. Воскрéсная прáздничная слýжба для домáшнего (келéйнаго) совершéнiя. Послéдованiе ýтрени.
Начало зри здесь ( великая вечéрня) и здесь ( ýтреня)
[НЕПОРОЧНЫ]Избраннiи стiхи из псалма 118: (глас 5 всегда): Блажéни непорóчнiи в путь, ходя́щiи в закóне Госпóдни. Блажéни испытáющiи свидéнiя Егó, всем сéрдцем взы́щут Егó, не дéлающiи бо беззакóнiя, в путéх Егó ходи́ша. Ты заповéдал еси зáповеди Твоя сохрани́ти зелó. Дабы́ испрáвилися путié мои, сохрани́ти оправдáнiя Твоя. Тогдá не постыжýся, внегдá призрéти ми на вся зáповеди Твоя. Исповéмся Тебé в прáвости сéрдца, внегдá научи́ти ми ся судьбáм прáвды Твоея́. Оправдáнiя Твоя сохраню́, не остáви менé до зелá. В чесóм испрáвит юнéйшiй путь свой? Внегдá сохрани́ти словесá Твоя. Всем сéрдцем мои́м взыскáх Тебé, не отри́ни менé от зáповедей Твои́х. В сéрдце моéм скрых словесá Твоя, яко да не согрешý Тебé. Благословéн еси, Гóсподи: научи́ мя оправдáнiем Твои́м.
ПОЛИЕЛЕЙ
Хор: Хвали́те И҆́мя Госпóдне, хвали́те, раби́ Гóспода.
Аллилýiа (трúжды)
Благословéн Госпóдь от Сióна, живы́й во Iерусали́ме.
Аллилýiа (трúжды)
Исповéдайтеся Гóсподеви, я́ко Благ, я́ко в век ми́лость Егó.
Аллилýiа (трúжды)
Исповéдайтеся Бóгу Небéсному, я́ко в век ми́лость Егó.
Аллилýiа (трúжды)
ТРОПАРИ ВОСКРЕСНЫ ПО НЕПОРОЧНАХ, ГЛАС 5
Благословéн есú, Гóсподи,/научú мя оправдáнiем Твоúм. (Пс.118:12)
Áнгельскiй собóр удиви́ся,/ зря Тебé в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Благословéн есú, Гóсподи,/научú мя оправдáнiем Твоúм.
Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел миронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Благословéн есú, Гóсподи,/научú мя оправдáнiем Твоúм.
Зелó рáно мvронóсицы течáху/ ко грóбу Твоему рыдáющiя,/ но предстá к ним Áнгел и речé:/ рыдáнiя врéмя престá, не плáчите,/ воскресéнiе же апóстолом рцы́те.
Благословéн есú, Гóсподи,/научú мя оправдáнiем Твоúм.
Мvронóсицы жены́ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речé, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егó Сы́нови, и Святóму Дýху,/ Святéй Трóице во еди́ном существé,/ с Серафíмы зовýще:/ Свят, Свят, Свят еси, Гóсподи.
И҆ ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехá, Дéво, Адáма избáвила еси,/ рáдость же Éве/ в печáли мéсто подалá еси,/ пáдшiя же от жи́зни/ к сей напрáви/ из Тебé воплоти́выйся Бог и Человéк.
Чтец: Аллилýiа, аллилýiа, аллилýiа, слáва Тебé Бóже. (3 раза)
Гóсподи, поми́луй. (3 раз)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоú воскрéсны, глас 1: Разбóйничо покая́нiе рай окрáде,/ плачь же мvронóсиц рáдость возвести́,/ я́ко воскрéсл еси́, Хрiстé Бóже,// подая́й мíрови вéлiю ми́лость.
СТЕПЕННА, ГЛАС 1
1 АНТИФОН
Хор: Внегдá скорбéти ми, услы́ши моя́ болéзни,// Гóсподи, Тебé зовý. (Двáжды)
Пусты́нным непрестáнное Божéственное желáнiе бывáет,// мíра сýщим сýетнаго кромé. (Двáжды)
Слáва Отцý и Сы́ну и Святóму Дýху.
Святóму Дýху честь и слáва,/ я́коже Отцý подобáет, кýпно же и Сы́ну,// сегó рáди да поéм Трóице Единодержáвiе.
И ны́не и прúсно и во вéки векóв. Амúнь.
Святóму Дýху честь и слáва,/ я́коже Отцý подобáет, кýпно же и Сы́ну,// сегó рáди да поéм Трóице Единодержáвiе.
2 АНТИФОН
На гóры Твоúх вознéсл есú мя закóнов,// добродéтельми просветú, Бóже, да пою́ Тя. (Двáжды)
Деснóю Твоéю рукóю прiи́м Ты, Слóве,/ сохрани́ мя, соблюди́,// да не огнь менé опали́т грехóвный. (Двáжды)
Слáва Отцý и Сы́ну и Святóму Дýху.
Святы́м Дýхом вся́кая тварь обновля́ется,/ пáки текýщи на пéрвое,// равномóщен бо есть Отцý и Слóву.
И ны́не и прúсно и во вéки векóв. Амúнь.
Святы́м Дýхом вся́кая тварь обновля́ется,/ пáки текýщи на пéрвое,// равномóщен бо есть Отцý и Слóву.
3 АНТИФОН
О рéкших мне, внúдем во дворы́ Госпóдни,// возвеселúся мой дух, срáдуется сéрдце. (Двáжды)
В домý Дави́дове страх вели́к:/ тáмо бо престóлом постáвленным,// сýдятся вся племенá земнáя, и язы́цы. (Двáжды)
Слáва Отцý и Сы́ну и Святóму Дýху.
Святóму Дýху, честь, поклонéнiе, слáву и держáву,/ я́коже Отцý достóит, и Сы́нови подобáет приноси́ти:// Еди́ница бо есть Трóица Естествóм, но не Ли́цы.
И ны́не и прúсно и во вéки векóв. Амúнь.
Святóму Дýху, честь, поклонéнiе, слáву и держáву,/ я́коже Отцý достóит, и Сы́нови подобáет приноси́ти:// Еди́ница бо есть Трóица Естествóм, но не Ли́цы.
ПРОКИМЕН
Чтец: Проки́мен, глас пéрвый. Ны́не воскреснý, глагóлет Госпóдь, положýся во Спасéнiе, не обиню́ся о нем. (Пс.11:6Б)
Хор: Ны́не воскреснý, глагóлет Госпóдь,/ положýся во Спасéнiе, не обиню́ся о нем.
Чтец: Словесá Госпóдня, словесá чи́ста.(Пс.11:7А)
Хор: Ны́не воскреснý, глагóлет Госпóдь,/ положýся во Спасéнiе, не обиню́ся о нем.
Чтец: Ны́не воскреснý, глагóлет Госпóдь.
Хор: Положýся во Спасéнiе, не обиню́ся о нем.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ныне и прúсно и во вéки векóв, амúнь.
Чтец: Вся́кое дыхáнiе да хвáлит Гóспода.
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Iоáнна Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Ин.зач.63): Во врéмя óно, во еди́ну от суббóт, Марíя Магдали́на прiи́де заýтра, ещé сýщи тме, на гроб, и ви́де кáмень взят от грóба. Течé ýбо и прiи́де к Сíмону Петрý, и к другóму ученикý, егóже любля́ше Iисýс, и глагóла и҆́ма: взя́ша Гóспода от грóба, и не вем, где положи́ша Егó. Изы́де же Петр и другíй учени́к, и идя́ста ко грóбу. Течáста же óба вкýпе: и другíй учени́к течé скорéе Петрá, и прiи́де прéжде ко грóбу. И прини́к ви́де ри́зы лежáща, обáче не вни́де. Прiи́де же Сíмон Петр в след егó, и вни́де во гроб, и ви́де ри́зы еди́ны лежáща. И судáрь, и҆́же бе на главé Егó, не с ри́зами лежáщь, но осóбь свит на еди́ном мéсте. Тогдá ýбо вни́де и другíй учени́к, пришéдый прéжде ко грóбу, и ви́де, и вéрова. Не у бо вéдяху Писáнiя, я́ко подобáет Емý из мéртвых воскрéснути. Идóста же пáки к себé ученикá.
[Русский синодальный перевод](В то время, в первый же день недели, Мария Магдалина приходит ко гробу рано, когда было еще темно, и видит, что камень отвален от гроба. Итак, бежит и приходит к Симону Петру и к другому ученику, которого любил Иисус, и говорит им: унесли Господа из гроба, и не знаем, где положили Его. Тотчас вышел Петр и другой ученик, и пошли ко гробу. Они побежали оба вместе; но другой ученик бежал скорее Петра, и пришел ко гробу первый. И, наклонившись, увидел лежащие пелены; но не вошел во гроб. Вслед за ним приходит Симон Петр, и входит во гроб, и видит одни пелены лежащие, и плат, который был на главе Его, не с пеленами лежащий, но особо свитый на другом месте. Тогда вошел и другой ученик, прежде пришедший ко гробу, и увидел, и уверовал. Ибо они еще не знали из Писания, что Ему надлежало воскреснуть из мертвых. Итак ученики опять возвратились к себе.(Ин.20:1-10)
Хор: Слáва Тебè, Гóсподи, слáва Тебè.
Воскресéнiе Хрiстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрiстé, и святóе Воскресéнiе Твоé поéм и слáвим: Ты бо еси́ Бог наш, рáзве Тебé инóго не знáем, и҆́мя Твоé именýем. Прiиди́те вси вéрнiи, поклони́мся Святóму Хрiстóву Воскресéнiю: се бо прiи́де Крестóм рáдость всемý мíру. Всегдá благословя́ще Гóспода, поéм Воскресéнiе Егó: распя́тiе бо претерпéв, смéртiю смерть разруши́.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моé. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх роди́ мя мáти моя. Се бо и҆́стину возлюби́л еси́, безвéстная и тáйная премýдрости Твоея яви́л ми еси́. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отврати́ лицé Твоé от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéнiя Твоегó, и Дýхом Влады́чним утверди́ мя. Научý беззакóнныя путéм Твоим, и нечести́вiи к Тебé обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажи́, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Слáва Ѻтцý и Сы́ну и Святóму Дýху.
глас 6: Моли́твами апóстолов,/ Ми́лостиве, очи́сти// мнóжество согрешéнiй нáших.
И҆ ны́не и прúсно и во вéки векóв. Амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моé. (Пс.50:3)
Стiхúра, глас 6: Воскрéс Iисýс от грóба,/ я́коже проречé,/ дадé нам живóт вéчный// и вéлiю ми́лость.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ВОСКРЕСНЫЙ, ГЛАС 1
(совмещенный с канóном крестовоскрéсным (глас 1), Борóдицы (глас 1) и канóном сщмч. Дiонúсiя, (глас 8)
ПЕСНЬ 1
Iрмóс: Твоя́ победи́тельная десни́ца/ Боголéпно в крéпости прослáвися:/ та бо, Безсмéртне,/ я́ко всемогýщая, проти́вныя сотрé,// Iзрáильтяном путь глубины́ новосодéлавшая.
Хор (припéв): Слáва, Гóсподи, Святóму Воскресéнiю Твоемý.
Чтец (тропáрь): И҆́же рукáма пречи́стыма от пéрсти/ богодéтельне испéрва создáв мя,/ рýце распростéрл еси́ на крестé,/ от земли́ взывáя тлéнное моé тéло,// éже от Дéвы прiя́л еси́.
Хор: Слáва, Гóсподи, Святóму Воскресéнiю Твоемý.
Чтец: Умерщвлéнiе подъя́л еси́ менé рáди,/ и дýшу смéрти прéдал еси́,/ И҆́же вдохновéнiем божéственным дýшу ми вложи́вый,/ и отреши́в вéчных уз, и совоскреси́в// нетлéнiем прослáвил еси́.
Хор: Пресвятáя Богорóдице, спасú нас.
Богорóдичен: Рáдуйся, благодáти истóчниче,/ рáдуйся лéствице, и двéре небéсная,/ рáдуйся свéщнице, и рýчко златáя, и горó несекóмая,// Я́же Жизнодáвца Хрiстá мíрови рóждшая.
Канон крестовоскресный, глас 1
Хор: Слáва, Гóсподи, Крестý Твоемý Честнóму и Воскресéнiю.
Чтец: Хрiстóс обожáет мя, воплощáяся,/ Хрiстóс мя вознóсит, смиря́яся,/ Хрiстóс безстрáстна мя содéловает,/ страждá Жизнодáвец естествóм плóти.// Тéмже воспевáю благодáрственную песнь: я́ко прослáвися.
Хор: Слáва, Гóсподи, Крестý Твоемý Честнóму и Воскресéнiю.
Чтец: Хрiстóс вознóсит мя, распинáемь,/ Хрiстóс совоскрешáет мя, умерщвля́емь,/ Хрiстóс жизнь мне дáрует./ Тéмже с весéлiем рукáма плещáя,// пою́ Спаси́телю побéдную песнь: я́ко прослáвися.
Канон Богородицы, глас 1
Хор: Пресвятáя Богорóдице, спасú нас.
Чтец: Кýю Ти достóйную песнь нáше принесéт неможéнiе?/ тóчiю обрáдовательную,/ éйже нас Гаврiи́л тáйно научи́л есть:// рáдуйся, Богорóдице Дéво, Мáти Неневéстная.
Хор: Пресвятáя Богорóдице, спасú нас.
Чтец: Приснодéве и Мáтери Царя́ вы́шних сил,/ от чистéйша сéрдца, вéрнiи, духóвне возопiи́м:// рáдуйся, Богорóдице Дéво, Мáти Неневéстная.
Канон священномученика Дионисия, глас 8
Хор: Священномýчениче Дiонúсiе, молúте Бóга о нас.
Чтец: Пáвлом Божéственным научéн, Небéсных, Дiони́сiе, ви́дцем,// Небéсный таи́нник áбiе и Боговещáтель был еси́. (Двáжды)
Хор: Священномýчениче Дiонúсiе, молúте Бóга о нас.
Чтец: И҆́же благодáтiю Бóжiею озари́вся,/ просвети́, блажéнне, пою́щих тя дýши// твоя́ разумéти Богодухновéнная учéнiя, Дiони́сiе. (Двáжды)
Слáва Отцý и Сы́ну и Святóму Дýху.
Тропáрь: Умóм преочищéнным и душéю/ Небéсных удобрéнiй сiя́нiя увéдети сподóбился еси́// и тех ликостоя́нiя, Дiони́сiе.
И ны́не и прúсно и во вéки векóв. Амúнь.
Богорóдичен: Чертóг светонóсный пáче умá воплощéнiя яви́лася еси́ всех Содéтеля:/ из Тебé бо плоть, Богомáти, нашу одéял есть.
Катавáсiя (глас 4): Отвéрзу устá моя́,/ и напóлнятся Дýха,/ и слóво отры́гну Цари́це Мáтери,/ и явлю́ся, свéтло торжествýя,/ и воспою́, рáдуяся, Тоя́ вхождéнiе.
ПЕСНЬ 3
Iрмóс: Еди́не вéдый человéческаго существá нéмощь/ и ми́лостивно в не вообрáжся,/ препоя́ши мя с высоты́ си́лою,/ éже вопи́ти Тебé, Святы́й,/ одушевлéнный хрáме// неизречéнныя слáвы Твоея́, Человеколю́бче.
Хор: Слáва, Гóсподи, Святóму Воскресéнiю Твоемý.
Чтец: Бог Сый мне, Блáже, пáдшаго ущéдрил еси́,/ и сни́ти ко мне благоволи́в, вознéсл мя еси́ распя́тiем,/ éже вопи́ти Тебé, Святы́й:// Хрáме одушевлéнный неизречéнныя Твоея́ слáвы, Человеколю́бче.
Хор: Слáва, Гóсподи, Святóму Воскресéнiю Твоемý.
Чтец: Живóт ипостáсный Хрiстé сый,/ в истлéвша мя, я́ко Милосéрдый Бог, обóлкся,/ в персть смéртную сошéд, Влады́ко,/ смéртную держáву разруши́л еси́,/ и мертв триднéвен воскрéс,// в нетлéнiе мя облéкл еси́.
Хор: Пресвятáя Богорóдице, спасú нас.
Богорóдичен: Бóга зачéнши во чрéве, Дéво, Дýхом Пресвяты́м,/ пребылá еси́ неопали́ма,/ понéже Тя купинá законополóжнику Моисéю,/ пали́мую нежегóмо, я́ве предвозвести́,// огнь нестерпи́мый прiéмшую.
Глас 1
Хор: Слáва, Гóсподи, Крестý Твоемý Честнóму и Воскресéнiю.
Чтец: И҆́же на своé рáмо заблуждáемое овчá взéмшему,/ и низложи́вшему дрéвом егó грех,/ Хрiстý Бóгу возопiи́м:// воздви́гнувый рог наш, свят еси́, Гóсподи.
Хор: Слáва, Гóсподи, Крестý Твоемý Честнóму и Воскресéнiю.
Чтец: Возвéдшему Пáстыря Вели́каго из áда Хрiстá,/ и священноначáлiем Егó апóстолы я́ве язы́ки упáсшему,// и҆́стиною и Божéственным вéрнiи Дýхом да послýжим.
Глас 1
Хор: Пресвятáя Богорóдице, спасú нас.
Чтец: Ѻ́блак Тя лéгкiй нелóжно, Дéво, именýем,/ прорóческим возслéдующе речéнiем:/ прiи́де бо на Тебé Госпóдь/ низложи́ти еги́петскiя прéлести рукотворéнiя,// и просвети́ти сим служáщiя.
Хор: Пресвятáя Богорóдице, спасú нас.
Чтец: Тя запечáтанный вои́стинну лик прорóческiй истóчник,/ и заключéнную дверь именовá, дéвства Твоегó, Всепéтая,/ я́вственне знáменiя нам пи́шуще:// éже сохрани́ла еси́ и по рождествé.
Глас 8
Хор: Священномýчениче Дiонúсiе, молúте Бóга о нас.
Чтец: Небéсных кругóв превозшéд, óтче, преми́рных чи́ны, и вóинства, и свéтлости,// высоковещáньми словéс и всемýдрыми учéнiи всем изъясни́л еси́. (Двáжды)
Хор: Священномýчениче Дiонúсiе, молúте Бóга о нас.
Чтец: Высóкаго видéнiя насы́щся, преподóбне,/ имéн Божéственных Божéственное разумéнiе Богослóвил еси́,// Трóичный Богослóв быв благодáтiю, Богоблажéнне Дiони́сiе. (Двáжды)
Слáва Отцý и Сы́ну и Святóму Дýху.
Тропáрь: Умертви́вся ны́нешним желáнiем, éже к Бóгу,/ и любомýдрiю крéпко научи́вся,// сýщим пáче умá животвóрным даровáнiем Богонóсный оргáн, óтче, был еси́.
И ны́не и прúсно и во вéки векóв. Амúнь.
Богорóдичен: Дея́нiем, Дéво, Вседéтельнаго Дýха,/ тéло Влады́це всех плодоноси́ла еси́,// в Нéмже осуди́ся мíра грех и Жизнь источи́ся вéчнующая.
Катавáсiя (глас 4): Твоя́ песнослóвцы, Богорóдице,/ живы́й и незави́стный Истóчниче,/ лик себé совокýпльшiя, духóвно утверди́,/ в честнéм вхождéнiи Твоéм// венцéв слáвы сподóби.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк сщмч. Дiонúсiя, глас 8: Небéсная вратá прошéд дýхом я́ко учени́к/ до трéтiяго Небесé дости́гшаго апóстола, Дiони́сiе,/ неизречéнных обогати́лся еси́ вся́ким рáзумом/ и озари́л еси́ во тьме невéденiя седя́щiя./ Тéмже зовéм:// рáдуйся, óтче всемíрный.
И҆́кос: Áнгел от человéков, добродéтельми быв вели́кiй Дiони́сiй,/ весь, я́ко крилáт, навы́че умóм Небéсныя рáзумы./ Тем пéсньми, я́ко Áнгела, почти́м, вопiю́ще к немý таковáя:/ рáдуйся, увéдевый Хрiстá Пáвлом;/ рáдуйся, мнóгiя ко Хрiстý обрати́вый;/ рáдуйся, многобóжiя храмóв губи́телю;/ рáдуйся, Богоразýмнаго совéта смотрéнiе;/ рáдуйся, кни́го Богоначертáнная тáйных сокрóвищ;/ рáдуйся, скрижáль Богозрáчная и зерцáло Небéсное;/ рáдуйся, я́ко Стрaсть Госпóдню ви́дел еси́;/ рáдуйся, я́ко усéрдно Тогó рáди закалáешися;/ рáдуйся, истóчниче, источáя рáзум;/ рáдуйся, кáпле, угашáющи безýмiе;/ рáдуйся, стезé нелéстная спасéнiя;/ рáдуйся, прегрáдо нечести́вых прехóда;// рáдуйся, óтче всеми́рный.
Седáлен сщмч. Дiонúсiя, глас 8: В пучи́не премýдрости учá, Дýха глубины́,/ Трóицы Еди́но Божествó проповéдал еси́, преподóбне,/ списáв вся Áнгельскiя чи́ны и тáйная тех сiя́нiя, Богомýдре./ Тем и ни́жнюю iерáрхiю счиня́я,/ ко еди́ному вся возвéл еси́ еди́нству, iерáрше Дiони́сiе./ Моли́ Хрiстá Бóга прегрешéнiй оставлéнiе даровáти// чествýющим любóвiю святýю пáмять твою́. (Двáжды)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Богорóдичен из Минéи, глас 8: Сóлнца óблаче разýмнаго,/ Божéственнаго Свéта свети́льниче златоковáнный,/ Несквéрная, Неблáзная, Всенепорóчная Влады́чице,/ омрачéнную дýшу мою́ ослеплéнiем страстéй/ безстрáстiя зарéю просвети́, молю́ся./ И осквернéнное моé сéрдце омы́й потóки умилéнiя, покая́нiя же слезáми,/ и от тимéнiя мя очи́сти дел мои́х, да любóвiю зовý Ти:/ Богорóдице Приснодéво, моли́ Хрiстá Бóга, прегрешéнiй оставлéнiе подáти ми,// Тебé бо имéю надéжду, раб Твой.
ПЕСНЬ 4
Iрмóс: Гóру Тя благодáтiю Бóжiею прiосенéнную,/ прозорли́выма Аввакýм/ усмотри́в очи́ма,/ из Тебе́ изы́ти Iзрáилеву провозглашáше Святóму,/ во Спасéнiе нáше// и обновлéнiе.
Хор: Слáва, Гóсподи, Святóму Воскресéнiю Твоемý.
Чтец: Кто сей Спас и҆́же из Едóма исходя́, венéц нося́ тернóвен,/ очервлéнну ри́зу имы́й, на дрéве ви́ся;/ Iзрáилев есть Сей Святы́й,// во Спасéнiе нáше и обновлéнiе.
Хор: Слáва, Гóсподи, Святóму Воскресéнiю Твоемý.
Чтец: Ви́дите лю́дiе непокори́вiи, и устыди́теся:/ Егóже бо я́ко злодéя вы вознести́ на крест у Пiлáта испроси́сте умоврéдне,// смéрти разруши́в си́лу, боголéпно воскрéс из грóба.
Хор: Пресвятáя Богорóдице, спасú нас.
Богорóдичен: Дрéво Тя, Дéво, жи́зни вéмы:/ не бо снéди плод смертонóсный человéком из Тебé прозябé,/ но животá присносýщнаго наслаждéнiе,// во Спасéнiе нас пою́щих Тя.
Глас 1
Хор: Слáва, Гóсподи, Крестý Твоемý Честнóму и Воскресéнiю.
Чтец: Кто Сей красéн из Едóма,/ и Сегó очервлéнiе ри́зное, от виногрáда восóрска,/ красéн я́ко Бог,/ я́ко человéк же, крóвiю плóти ри́зу очервлéну нося́;/ Емýже поéм вéрнiи:// слáва си́ле Твоéй, Гóсподи.
Хор: Слáва, Гóсподи, Крестý Твоемý Честнóму и Воскресéнiю.
Чтец: Хрiстóс бýдущих благ я́влься Архiерéй,/ грех наш разори́л есть:/ и показáв стрáнен путь Своéю крóвiю,/ в лýчшую и совершéннейшую вни́де ски́нiю,// Предтéча наш во святáя.
Глас 1
Хор: Пресвятáя Богорóдице, спасú нас.
Чтец: Слы́ши чудéс нéбо, и внушáй землé,/ я́ко Дщи пéрстнаго ýбо пáдшаго Адáма, Бóгу наречéна бысть,/ и Своемý Содéтелю Роди́тельница,// на Спасéнiе нáше и обновлéнiе.
Хор: Пресвятáя Богорóдице, спасú нас.
Чтец: Поéм вели́кое и стрáшное Твоé тáинство,/ преми́рных бо утаи́вся чиноначáлiй,/ на Тя И҆́же сый сни́де я́ко дождь на рунó, Всепéтая,// на Спасéнiе нас пою́щих Тя.
Глас 8
Хор: Священномýчениче Дiонúсiе, молúте Бóга о нас.
Чтец: Церкóвное благочи́нiе украси́л еси́:/ в них бо, óтче, живописáл еси́ зрáчныя óбразы/ я́вственно священнописáнiем Безoбрáзных сил;// и҆́миже тайновóдятся и просвещáются вся вéрных, Богому́дре, собóры. (Двáжды)
Хор: Священномýчениче Дiонúсiе, молúте Бóга о нас.
Чтец: Струи́ твоегó Богослóвiя, Богопрiя́тне, цветники́ напая́ют словéсныя,/ присноцветýщiя зелó и насаждéнныя на прáвости Богослóвiя:// еди́нство бо Существá в Трiéх Ли́цех, честнóе Единоначáлiе проповéдал еси́. (Двáжды)
Слáва Отцý и Сы́ну и Святóму Дýху.
Тропáрь: Áнгельскаго священноначáльства си́льное, святи́телю, желáнiе и рачéнiе, éже к Бóгу,/ и неуклóнное мáнiе к высотé Божéственней и непостижи́мей,/ научи́л еси́ Богомýдренно вéрою вопiю́щiя:// си́ле Твоéй слáва, Человеколю́бче.
И ны́не и прúсно и во вéки векóв. Амúнь.
Богорóдичен: Священнодéйствитель спасéнiя бы́сть Сын Твой всем пою́щим Тя,/ и Настáвник, и Просвети́тель, и Прáвда, Дéво, и избавлéнiе./ Тем Тя, Богорóдицу, и҆́стинно и госпóдьственно вéрнiи единомýдренно слáвим.
Катавáсiя (глас 4): Седя́й в Слáве/ на Престóле Божествá/ во óблаце лéгце,/ прiи́ди Iисýс Пребожéственный,/ Нетлéнною Длáнiю/ и спасé зовýщiя:// слáва, Хрiстé, си́ле Твоéй.
ПЕСНЬ 5
Iрмóс: Просвети́вый сiя́нiем пришéствiя Твоегó, Хрiстé,/ и освети́вый Крестóм Твои́м/ мíра концы́,/ сердцá просвети́/ свéтом Твоегó Богоразýмiя,// правослáвно пою́щих Тя.
Хор: Слáва, Гóсподи, Святóму Воскресéнiю Твоемý.
Чтец: Пáстыря овцáм вели́каго и Гóспода,/ iудéи дрéвом крéстным умертви́ша:/ но Той я́ко óвцы, мéртвыя, во áде погребéнныя,// держáвы смéртныя избáви.
Хор: Слáва, Гóсподи, Святóму Воскресéнiю Твоемý.
Чтец: Крестóм Твои́м мiр благовести́в,/ и проповéдав плéнным, Спáсе мой, оставлéнiе,/ держáву имýщаго посрами́л еси́, Хрiстé:// нáга, обнищáвша показáвый Божéственным востáнiем Твои́м.
Хор: Пресвятáя Богорóдице, спасú нас.
Богорóдичен: Прошéнiя вéрно прося́щих, Всепéтая, не прéзри:/ но прiими́, и сiя́ доношáй Сы́ну Твоемý, Пречи́стая,/ Бóгу Еди́ному Благодéтелю,// Тебé бо Предстáтельницу стяжáхом.
Глас 1
Хор: Слáва, Гóсподи, Крестý Твоемý Честнóму и Воскресéнiю.
Чтец: О богáтство, и глубинó премýдрости Бóжiя!/ Премýдрыя объéмляй Госпóдь,/ от сих ковáрства избáвил есть нас:/ пострадáв бо вóлею нéмощiю плотскóю,/ Своéю крéпостiю, животворя́й мéртвыя воскреси́л есть.
Хор: Слáва, Гóсподи, Крестý Твоемý Честнóму и Воскресéнiю.
Чтец: Бог сый соединя́ется плóти нас рáди:/ и распинáется, и умирáет: погребáется, и пáки воскресáет,/ и восхóдит свéтло с плóтiю Своéю Хрiстóс ко Отцý:// с нéюже прiи́дет, и спасéт благочéстно Томý служáщiя.
Глас 1
Хор: Пресвятáя Богорóдице, спасú нас.
Чтец: Веселя́тся небéсныя си́лы зря́ще Тя:/ рáдуются с ни́ми человéков собрáнiя:/ Рождествóм бо Твои́м совокупи́шася, Дéво Богорóдице,// éже достóйно слáвим.
Хор: Пресвятáя Богорóдице, спасú нас.
Чтец: Да дви́жатся вси язы́цы человéчестiи и мы́сли,/ к похвалé человéческаго вои́стинну удобрéнiя,/ Дéва предстои́т я́ве слáвящи,// вéрою Тоя́ пою́щих чудесá.
Глас 8
Хор: Священномýчениче Дiонúсiе, молúте Бóга о нас.
Чтец: Глагóл твои́х вещáнiе, я́ко нéкiй Небéсный шум носи́мь,/ безбóжныя рáзумы огроми́ слóвом благодáти// и велéнiй Божéственных заря́ми светлéйшими вéрных сердцá просвети́.(Двáжды)
Хор: Священномýчениче Дiонúсiе, молúте Бóга о нас.
Чтец: Уподóбился еси купцý, и҆́щущему дóбрыя би́серы, всебогáте,/ и обрéл еси́ еди́н би́сер, и́стинно многоцéнен,// и, уди́влься егó Боготвóрну световержéнiю, святи́телю, Бóга исповéдал еси́. (Двáжды)
Слáва Отцý и Сы́ну и Святóму Дýху.
Тропáрь: Истóчник мýдрости, любомýдрейше óтче, возлюби́л еси́,/ и, тоя́ рачéнiем и любóвiю одержи́мь, вели́к был еси́,// и рéки Божéственных велéнiй всегдá тóчиши, Богоглáсе.
И ны́не и прúсно и во вéки векóв. Амúнь.
Богорóдичен: Я́ко Обрáдованная, добротворя́щее прiя́ла еси́ благолéпiе,/ вся еди́нем хотéнiем Сотвóршаго,// и Божéственною добрóтою и просвещéнiем благовéрiя, Богомáти, нас Удобри́вшаго.
Катавáсiя (глас 4): Ужасóшася вся́ческая/ о Божéственней слáве Твоéй:/ Ты бо, Неискусобрáчная Дéво,/ имéла еси́ во утрóбе над всéми Бóга/ и родилá еси́ безлéтнаго Сы́на,/ всем воспевáющим Тя// мир подавáющая.
ПЕСНЬ 6
Iрмóс: Обы́де нас послéдняя бéздна,/ несть избавля́яй,/ вмени́хомся,/ я́ко óвцы заколéнiя,/ спаси́ лю́ди Твоя́, Бóже наш,// Ты бо крéпость немощствýющих и исправлéнiе.
Хор: Слáва, Гóсподи, Святóму Воскресéнiю Твоемý.
Чтец: Согрешéнiем первоздáннаго, Гóсподи, лю́те уязви́хомся,/ рáною же исцели́хомся Твоéю,/ éюже за ны уязви́лся еси́, Хрiстé:// Ты бо крéпость немощствýющих и исправлéнiе.
Хор: Слáва, Гóсподи, Святóму Воскресéнiю Твоемý.
Чтец: Возвéл ны еси́ из áда, Гóсподи,/ ки́та уби́в всея́дца, Всеси́льне,/ Твое́ю держáвою низложи́в тогó си́лу:// Ты бо Живóт, и Свет еси́, и Воскресéнiе.
Хор: Пресвятáя Богорóдице, спасú нас.
Богорóдичен: Веселя́тся о Тебé, Дéво Пречи́стая,/ рóда нáшего прáотцы, Едéм воспрiéмше Тобóю,/ егóже преступлéнiем погуби́ша:// Ты бо, Чи́стая, и прéжде Рождествá, и по Рождествé еси́.
Глас 1
Хор: Слáва, Гóсподи, Крестý Твоемý Честнóму и Воскресéнiю.
Чтец: Ум сый безстрáстен и невещéствен,/ примешáется Хрiстóс Бог человéческому умý,/ ходáтайствующему Божéственным естествóм, плóти же дебельствóм,/ и всемý мне непрелóжен весьмá соедини́ся:// да Спасéнiе всемý мне пáдшему подáст распинáемь.
Хор: Слáва, Гóсподи, Крестý Твоемý Честнóму и Воскресéнiю.
Чтец: Пáдает прельсти́вся Адáм, и запя́выйся сокрушáется,/ надéждою обóлган сый дрéвле обожéнiя:/ но востаéт соединéнiем Слóва обожáемь,/ и стрáстiю безстрáстiе прiéмлет,/ на престóле я́ко Сын слáвится,// седя́й со Отцéм же и Дýхом.
Глас 1
Хор: Пресвятáя Богорóдице, спасú нас.
Чтец: Предстоя́т раболéпне Рождествý Твоемý чи́ни небéснiи,/ дивя́щеся достóйно Твоемý безсéменному Рождествý, Приснодéво:// Ты бо, Чи́стая, и прéжде Рождествá, и по Рождествé еси́.
Хор: Пресвятáя Богорóдице, спасú нас.
Чтец: Воплоти́ся прéжде сый Безплóтен, Слóво из Тебé, Пречи́стая,/ вся́ческая вóлею творя́й,// безтелéсных вóинства приведы́й от небытiя́, я́ко Всеси́лен.
Глас 8
Хор: Священномýчениче Дiонúсiе, молúте Бóга о нас.
Чтец: Закóнно любомýдрствуя, мýдрости дар получи́л еси́,/ Божéственне Богослóвя Правослáвныя догмáты, всеблажéнне, остáвил еси́,// и́хже наслаждáющеся, вéрнiи, тя блажи́м. (Двáжды)
Хор: Священномýчениче Дiонúсiе, молúте Бóга о нас.
Чтец: Рáзумом Боголéпным, Богомýдре, удобря́ем,/ Божéственному учи́телю слух твой приклони́л еси́// и премíрную от Негó мýдрость навы́кл еси́, Дiони́сiе. (Двáжды)
Слáва Отцý и Сы́ну и Святóму Дýху.
Тропáрь: Житié твоé чýдно, слóво же ди́внейше,/ язы́к твой светозáрен, устá огнедухновéнна и духодви́жима,// ум же твой испы́тен, óтче, Богоблажéнне.
И ны́не и прúсно и во вéки векóв. Амúнь.
Богорóдичен: Глас Ти Гаврiи́лов рáдостно, Дéво, взывáем вéрнiи,/ из Тебé бо неизречéнно нам Живоначáльный Творéц изшéл есть// и примеси́ся человéком, Человеколю́бец.
Катавáсiя (глас 4): Божéственное сié и всечестнóе/ совершáюще прáзднество,/ Богомýдрiи, Богомáтере,/ прiиди́те, рукáми восплéщим,// от Нея́ рóждшагося Бóга слáвим.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк воскрéсный, глас 1: Воскрéсл еси́, я́ко Бог, из грóба во слáве,/ и мiр совоскреси́л еси́;/ и естествó человéческое я́ко Бóга воспевáет Тя, и смерть исчезé;/ Адáм же ликýет, Влады́ко;/ Éва ны́не от уз избавля́ема рáдуется, зовýщи:// Ты еси́, И҆́же всем подая́, Хрiстé, воскресéнiе.
И҆́кос: Воскрéсшаго триднéвно воспои́м я́ко Бóга Всеси́льна,/ и вратá áдова стéршаго,/ и я́же от вéка из грóба воздви́гшаго,/ миронóсицам я́вльшагося, я́коже благоизвóлил есть,/ прéжде сим éже рáдуйтеся, рекíй:/ и апóстолом рáдость возвещáя, я́ко Еди́н Жизнодáвец./ Тéмже вéрою жены́ ученикóм знáменiя побéды благовеству́ют,/ и ад стенéт, и смерть рыдáет:/ мiр же весели́тся, и вси с ним рáдуются.// Ты бо пóдал еси́, Хрiстé, всем Воскресéнiе.
ПЕСНЬ 7
Iрмóс: Тебé ýмную, Богорóдице, пещь/ разсмотря́ем, вéрнiи,/ я́коже бо óтроки спасé три Превозноси́мый,/ мiр обнови́,/ во чрéве Твоéм всецéл,// хвáльный отцéв Бог и препрослáвлен.
Хор: Слáва, Гóсподи, Святóму Воскресéнiю Твоемý.
Чтец: Убоя́ся земля́, сокры́ся сóлнце, и помéрче свет,/ раздрáся церкóвная божéственная завéса,/ кáменiе же разсéдеся:/ на крестé бо ви́сит Прáведный,// Хвáльный отцéв Бог, и препрослáвлен.
Хор: Слáва, Гóсподи, Святóму Воскресéнiю Твоемý.
Чтец: Ты быв áки безпомóщен,/ и уя́звен в мéртвых вóлею нас рáди/ превозноси́мый, вся свободи́л еси́,/ и держáвною рукóю совоскреси́л еси́,// хвáльный отцéв Бог, и препрослáвлен.
Хор: Пресвятáя Богорóдице, спасú нас.
Богорóдичен: Рáдуйся, истóчниче присноживы́я воды́./ Рáдуйся, раю́ пи́щный./ Рáдуйся, стенó вéрных./ Рáдуйся, Неискусобрáчная./ Рáдуйся, всемíрная Рáдосте,/ Éюже нам возсiя́// Хвáльный отцéв Бог, и препрослáвлен.
Глас 1
Хор: Слáва, Гóсподи, Крестý Твоемý Честнóму и Воскресéнiю.
Чтец: Дрéвле ýбо проклятá бысть земля́/ Áвелевою очервлени́вшися крóвiю, братоубíйственною рукóю:/ боготóчною же Твоéю крóвiю благослови́ся окроплéна,/ и взыгрáющи вопiéт:// отцéв Бóже, благословéн еси́.
Хор: Слáва, Гóсподи, Крестý Твоемý Честнóму и Воскресéнiю.
Чтец: Да рыдáют iудéйстiи богопроти́внiи лю́дiе,/ дéрзости убiéнiя Хрiстóва:/ язы́цы же да веселя́тся,/ и рукáми да восплéщут, и вопiю́т:// отцéв Бóже, благословéн еси́.
Глас 1
Хор: Пресвятáя Богорóдице, спасú нас.
Чтец: Тя, Богорóдице, лéствицу Iáков прорóчески разумевáет:/ Тобóю бо Превозноси́мый на земли́ яви́ся,/ и с человéки поживé, я́ко благоволи́,// Хвáльный отцéв Бог и Препрослáвлен.
Хор: Пресвятáя Богорóдице, спасú нас.
Чтец: Рáдуйся, Чи́стая, из Тебé прóйде Пáстырь,/ И́же во Адáмову кóжу обóлкся вои́стинну Превозноси́мый,/ во всегó мя человéка, за благоутрóбiе непости́жное:// Хвáльный отцéв Бог и Препрослáвлен.
Глас 8
Хор: Священномýчениче Дiонúсiе, молúте Бóга о нас.
Чтец: Я́ко тýча Небéсная зéмлю жáждущую,/ твоя́ учéнiя вéрных сердцá при́сно желáющая умащáют/ и несы́тно вопи́ти научáт:// отéц нáших Бóже, благословéн еси́. (Двáжды)
Хор: Священномýчениче Дiонúсiе, молúте Бóга о нас.
Чтец: Рáзумом Богомýдренным безплóтныя умы́: расписáл еси́/ и тех, преблажéнне, песнослóвiя, Божéствен быв, Цéрковь пéти наказáл еси́:// благословéн Бог отéц нáших. (Двáжды)
Слáва Отцý и Сы́ну и Святóму Дýху.
Тропáрь: Прiя́телище Дýха Всесвятáго яви́лся еси́ благоключи́мое/ и, Тогó вдохновéнiя и явлéнiя прорóчески провозглашáя, мýдре Дiони́сiе, вопiя́ше вéсело:// благословéн Бог отéц нáших.
И ны́не и прúсно и во вéки векóв. Амúнь.
Богорóдичен: Се ны́не испóлнися Исáiи Богоглагóливаго проречéнiе:/ Дéва бо во чрéве Бóга Слóва имé/ и породи́ла есть Жизнодáвца, Емýже вси зовéм:// благословéн Бог отéц нáших.
Катавáсiя (глас 4): Не послужи́ша твáри Богомýдрiи,/ пáче Создáвшаго,/ но, óгненное прещéнiе мýжески попрáвше,/ рáдовахуся, пою́ще:// препéтый отцéв Госпóдь и Бог, благословéн еси́.
Продолжение здесь