Всемирное Воздвижение Честнаго и Животворящего Креста Господня. ВСЕНОЩНОЕ БДЕНИЕ. УТРЕНЯ. КАНОН
27 сентября́ 2022 гóда. Всемíрное Воздвúженiе Честнáго и Животворя́щего Крестá Госпóдня. Прáздничная слýжба для домáшнего (келéйнаго) совершéнiя. Послéдованiе ýтрени. Слýжба мiрскúм чúном.
Начало зри здесь ( великая вечéрня) и здесь ( ýтреня)
Седáлен прáздника по полiелéе, глас 8: В раи́ мя прéжде дрéво обнажи́,/ о вкушéнiи враг принося́ умерщвлéнiе,/ Крестá же Дрéво, животá одея́нiе человéком нося́,/ водрузи́ся на земли́, и мiр весь испóлнися вся́кiя рáдости./ Егóже зря́ще возвышáема,/ Бóгу вéрою, лю́дiе, соглáсно возопiи́м:// испóлнь слáвы дом Твой.
СТЕПЕННА, ГЛАС 4
1 АНТИФОН
Хор: От ю́ности моея́/ мнóзи бóрют мя стрáсти,/ но Сам мя заступú// и спасú, Спáсе мой. (Двáжды)
Ненави́дящiи Сióна,/ посрами́теся от Гóспода,/ я́ко травá бо огнéм// бýдете изсóхше. (Двáжды)
Слáва Ѻтцý и Сы́ну и Святóму Дýху.
Святы́м Дýхом/ вся́ка душá живи́тся,/ и чистотóю возвышáется,// светлéется Трóйческим еди́нством, священнотáйне.
И҆ ны́не и прúсно и во вéки векóв. Амúнь.
Святы́м Дýхом/ вся́ка душá живи́тся,/ и чистотóю возвышáется,// светлéется Трóйческим еди́нством, священнотáйне.
ПРОКИМЕН
Чтец: Прокíмен, глас четвéртый. Ви́деша вси концы́ земли́ спасéнiе Бóга нáшего. (Пс.97:1А)
Хор: Вúдеша вси концы́ землú/ спасéнiе Бóга нáшего.
Чтец: Воспóйте Гóсподеви песнь нóву, я́ко ди́вна сотвори́ Госпóдь. (Пс.97:3Б)
Хор: Вúдеша вси концы́ землú/ спасéнiе Бóга нáшего.
Чтец: Ви́деша вси концы́ земли́.
Хор: Спасéнiе Бóга нáшего.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода.(Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Iоáнна Святáго Евáнгелiя чтéнiе.
Хор: Слáва Тебé, Гóсподи, слáва Тебé.
(Ин.зач.42Б(от полý): Рече́ Госпо́дь: О́тче, просла́ви и́мя Твое́. Прии́де же глас с небесе́: и просла́вих, и па́ки просла́влю. Наро́д же стоя́й слы́шав, глаго́лаху: гром бысть, ини́и глаго́лаху: А́нгел глаго́ла Ему́. Отвеща́ Иису́с, и рече́: не Мене́ ра́ди гла́с се́й бы́сть, но наро́да ра́ди. Ны́не суд есть ми́ру сему́: ны́не кня́зь ми́ра сего́ изгна́н бу́дет вон. И а́ще Аз вознесе́н бу́ду от земли́, вся привлеку́ к Себе́. Сие́ же глаго́лаше, назна́менуя, ко́ею сме́ртию хотя́ше умре́ти. Отвеща́ Ему́ наро́д: мы слы́шахом от зако́на, я́ко Христо́с пребыва́ет во ве́ки: ка́ко Ты глаго́леши, вознести́ся подоба́ет Сы́ну Челове́ческому? Кто есть сей Сын Челове́ческий? Рече́ же им Иису́с: еще́ ма́ло вре́мя свет в вас есть. Ходи́те, до́ндеже свет и́мате, да тма вас не и́мет. И ходя́й во тме не весть, ка́мо и́дет. До́ндеже свет и́мате, ве́руйте во свет, да сы́нове све́та бу́дете.
[Русский синодальный перевод]Отче! прославь имя Твое. Тогда пришел с неба глас: и прославил и еще прославлю. Народ, стоявший и слышавший то, говорил: это гром; а другие говорили: Ангел говорил Ему. Иисус на это сказал: не для Меня был глас сей, но для народа. Ныне суд миру сему; ныне князь мира сего изгнан будет вон. И когда Я вознесен буду от земли, всех привлеку к Себе. Сие говорил Он, давая разуметь, какою смертью Он умрет. Народ отвечал Ему: мы слышали из закона, что Христос пребывает вовек; как же Ты говоришь, что должно вознесену быть Сыну Человеческому? кто Этот Сын Человеческий? Тогда Иисус сказал им: еще на малое время свет есть с вами; ходите, пока есть свет, чтобы не объяла вас тьма: а ходящий во тьме не знает, куда идет. Доколе свет с вами, веруйте в свет, да будете сынами света.
Хор: Слáва Тебé, Гóсподи, слáва Тебé.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моé. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх роди́ мя мáти моя. Се бо и҆́стину возлюби́л еси́, безвéстная и тáйная премýдрости Твоея яви́л ми еси́. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отврати́ лицé Твоé от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéнiя Твоегó, и Дýхом Влады́чним утверди́ мя. Научý беззакóнныя путéм Твоим, и нечести́вiи к Тебé обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажи́, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Слáва Ѻтцý и Сы́ну и Святóму Дýху.
глас 6: Моли́твами апóстолов,/ Ми́лостиве, очи́сти// мнóжество согрешéнiй нáших.
И҆ ны́не и прúсно и во вéки векóв. Амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моé. (Пс.50:3)
Стiхúра прáздника, глас 6: Кре́сте Хрiсто́в, хрiстiа́н упова́нiе,/ заблу́ждших наста́вниче,/ обурева́емых приста́нище,/ в бра́нех побе́да,/ вселе́нныя утвержде́нiе,/ неду́жных врачу́,/ ме́ртвых воскресе́нiе,// поми́луй нас.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
ПЕРВЫЙ КАНОН ПРАЗДНИКА, ГЛАС 8
(совмещенный со вторым каноном праздника, глас 8)
ПЕСНЬ 1
Iрмóс: Крест начертáв, Моисéй/ впря́мо жезлóм Чермнóе пресечé,/ Iзрáилю пешеходя́щу;/ тóже обрáтно фараóновым колесни́цам, удáрив, совокупи́,/ вопреки́ написáв непобеди́мое орýжiе.// Тем Хрiстý пои́м, Бóгу нáшему, я́ко прослáвися. (Двáжды)
Хор (припéв): Слáва, Гóсподи, Крестý Твоемý Честнóму.
Чтец (тропáрь): О́браз дре́вле Моисе́й пречи́стыя Стра́сти в себе́ само́м прообрази́,/ свяще́нных среде́ стоя́:/ Крест же вообрази́в,/ просте́ртыми побе́ду дла́ньми воздви́же,/ держа́ву погуби́в Амали́ка всегуби́теля.// Тем Христу́ поим, Бо́гу на́шему, я́ко просла́вися. (4 раза)
Хор: Слáва, Гóсподи, Крестý Твоемý Честнóму.
Чтец: Возложи́ Моисе́й на столпе́ врачевство́,/ тлетвори́ваго избавле́ние и ядови́таго угрызе́ния,/ и дре́ву о́бразом Креста́/ по земли́ пресмыка́ющагося зми́я привяза́,/ лука́вный в сем обличи́в вред.// Тем Христу́ пои́м, Бо́гу на́шему, я́ко просла́вися. (4 раза)
Хор: Слáва, Гóсподи, Крестý Твоемý Честнóму.
Чтец: Показа́ не́бо Креста́ побе́ду благоче́стия держа́телю и царю́ богому́дру,/ враго́в в не́мже злосе́рдных низложи́ся свире́пство,/ лесть же преврати́ся,/ и ве́ра распростре́ся земны́м конце́м Боже́ственная.// Тем Христу́ пои́м, Бо́гу на́шему, я́ко просла́вися. (Двáжды)
Слáва Ѻтцý и Сы́ну и Святóму Дýху.
Тропáрь: Показа́ не́бо Креста́ побе́ду благоче́стия держа́телю и царю́ богому́дру,/ враго́в в не́мже злосе́рдных низложи́ся свире́пство,/ лесть же преврати́ся,/ и ве́ра распростре́ся земны́м конце́м Боже́ственная.// Тем Христу́ пои́м, Бо́гу на́шему, я́ко просла́вися.
И҆ ны́не и прúсно и во вéки векóв. Амúнь.
Тропáрь: Показа́ не́бо Креста́ побе́ду благоче́стия держа́телю и царю́ богому́дру,/ враго́в в не́мже злосе́рдных низложи́ся свире́пство,/ лесть же преврати́ся,/ и ве́ра распростре́ся земны́м конце́м Боже́ственная.// Тем Христу́ пои́м, Бо́гу на́шему, я́ко просла́вися.
Катавáсiя (глас 8): Крест начертáв, Моисéй/ впря́мо жезлóм Чермнóе пресечé,/ Iзрáилю пешеходя́щу;/ тóже обрáтно фараóновым колесни́цам, удáрив, совокупи́,/ вопреки́ написáв непобеди́мое орýжiе.// Тем Хрiстý пои́м, Бóгу нáшему, я́ко прослáвися.
ПЕСНЬ 3
Iрмóс: Жезл во óбраз тáйны прiéмлется,/ прозябéнiем бо предразсуждáет свящéнника;/ неплодя́щей же прéжде Цéркви/ ны́не процветé Дрéво Крестá// в держáву и утверждéнiе. (Двáжды)
Хор: Слáва, Гóсподи, Крестý Твоемý Честнóму.
Чтец: Я́ко испусти́, ударя́емь, во́ду краесеко́мый/ непокори́вым лю́дем и жестосе́рдым,/ богозва́нныя проявля́ше Це́ркве та́инство,// ея́же Крест держа́ва и утвержде́ние. (6 раз)
Хор: Слáва, Гóсподи, Крестý Твоемý Честнóму.
Чтец: Ре́бром пречи́стым, копие́м прободе́нным,/ вода́ с Кро́вию истече́,/ обновля́ющая Заве́т и омыва́тельная греха́:// ве́рных бо Крест похвала́ и царе́й держа́ва и утвержде́ние. (4 раза)
Слáва Ѻтцý и Сы́ну и Святóму Дýху.
Чтец: Ре́бром пречи́стым, копие́м прободе́нным,/ вода́ с Кро́вию истече́,/ обновля́ющая Заве́т и омыва́тельная греха́:// ве́рных бо Крест похвала́ и царе́й держа́ва и утвержде́ние.
И҆ ны́не и прúсно и во вéки векóв. Амúнь.
Чтец: Ре́бром пречи́стым, копие́м прободе́нным,/ вода́ с Кро́вию истече́,/ обновля́ющая Заве́т и омыва́тельная греха́:// ве́рных бо Крест похвала́ и царе́й держа́ва и утвержде́ние.
Катавáсiя (глас 8): Жезл во óбраз тáйны прiéмлется,/ прозябéнiем бо предразсуждáет свящéнника;/ неплодя́щей же прéжде Цéркви/ ны́не процветé Дрéво Крестá// в держáву и утверждéнiе.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Седáлен прáздника, глас 4: В тебе́, треблаже́нне и жизнода́вче Кре́сте,/ лю́дие учрежда́ющеся, спра́зднуют с невеще́ственными ли́ки,/ чи́ни архиере́йстии благогове́йно воспева́ют,/ мно́жества же мона́шествующих и по́стников покланя́ются,// Христа́ же распе́ншагося вси сла́вим.
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
В тебе́, треблаже́нне и жизнода́вче Кре́сте,/ лю́дие учрежда́ющеся, спра́зднуют с невеще́ственными ли́ки,/ чи́ни архиере́йстии благогове́йно воспева́ют,/ мно́жества же мона́шествующих и по́стников покланя́ются,// Христа́ же распе́ншагося вси сла́вим.
ПЕСНЬ 4
Iрмóс:Услы́шах, Гóсподи,/ смотрéнiя Твоегó тáинство,/ разумéх делá Твоя́// и прослáвих Твоé Божествó. (Двáжды)
Хор: Слáва, Гóсподи, Крестý Твоемý Честнóму.
Чтец: Горькоро́дныя преложи́ дре́вом Моисе́й/ источники в пусты́ни дре́вле,/ Кресто́м ко благоче́стию язы́ков// проявля́я преложе́ние. (3 раза)
Хор: Слáва, Гóсподи, Крестý Твоемý Честнóму.
Чтец: Глубине́ вне́дривый секу́щую/ издаде́ Иорда́н дре́ву,/ Кресто́м и креще́нием// сече́ние ле́сти зна́менуя. (3 раза)
Хор: Слáва, Гóсподи, Крестý Твоемý Честнóму.
Чтец: Свяще́нно ополча́ются/ четвероча́стнии лю́дие, предходя́ще/ о́бразом свиде́тельства ски́нии,// крестообра́зными чи́нми прославля́еми. (3 раза)
Хор: Слáва, Гóсподи, Крестý Твоемý Честнóму.
Чтец: Чу́дно простира́емь,/ со́лнечныя лучи́ испуща́ше Крест,/ и пове́даша небеса́// сла́ву Бо́га на́шего.
Слáва Ѻтцý и Сы́ну и Святóму Дýху.
Чтец: Чу́дно простира́емь,/ со́лнечныя лучи́ испуща́ше Крест,/ и пове́даша небеса́// сла́ву Бо́га на́шего.
И҆ ны́не и прúсно и во вéки векóв. Амúнь.
Чтец: Чу́дно простира́емь,/ со́лнечныя лучи́ испуща́ше Крест,/ и пове́даша небеса́// сла́ву Бо́га на́шего.
Катавáсiя (глас 8): Услы́шах, Гóсподи,/ смотрéнiя Твоегó тáинство,/ разумéх делá Твоя́// и прослáвих Твоé Божествó.
ПЕСНЬ 5
Iрмóс: О треблажéнное Дрéво,/ на нéмже распя́ся Хрiстóс, Царь и Госпóдь!/ И҆́мже падé дрéвом прельсти́вый,/ тобóю прельсти́вся,/ Бóгу пригвозди́вшуся плóтiю,// подаю́щему мир душáм нáшим. (Двáжды)
Хор: Слáва, Гóсподи, Крестý Твоемý Честнóму.
Чтец: Тебе́, приснопе́тое Дре́во, на не́мже простре́ся Христо́с,/ Еде́м храня́щее обраща́ющееся ору́жие, Кре́сте, устыде́ся:/ стра́шный же Херуви́м уступи́ на тебе́ пригвожде́нному Христу́,// подаю́щему мир душа́м на́шим. (4 раза)
Хор: Слáва, Гóсподи, Крестý Твоемý Честнóму.
Чтец: Подзе́мных си́лы проти́вныя Креста́ страша́тся/ начерта́ема зна́мения на возду́се,/ по нему́же хо́дят Небе́сных и земноро́дных ро́ди,/ коле́на приклоня́юще Христу́,// подаю́щему мир душа́м на́шим. (4 раза)
Хор: Слáва, Гóсподи, Крестý Твоемý Честнóму.
Чтец: Заря́ми нетле́нными я́влься Боже́ственный Крест/ омраче́нным язы́ком, заблужде́нным в пре́лести,/ Боже́ственный свет облиста́в,/ усвоя́ет на нем пригвожде́нному Христу́,// подаю́щему мир душа́м на́шим. (Двáжды)
Слáва Ѻтцý и Сы́ну и Святóму Дýху.
Чтец: Заря́ми нетле́нными я́влься Боже́ственный Крест/ омраче́нным язы́ком, заблужде́нным в пре́лести,/ Боже́ственный свет облиста́в,/ усвоя́ет на нем пригвожде́нному Христу́,// подаю́щему мир душа́м на́шим.
И҆ ны́не и прúсно и во вéки векóв. Амúнь.
Чтец: Заря́ми нетле́нными я́влься Боже́ственный Крест/ омраче́нным язы́ком, заблужде́нным в пре́лести,/ Боже́ственный свет облиста́в,/ усвоя́ет на нем пригвожде́нному Христу́,// подаю́щему мир душа́м на́шим.
Катавáсiя (глас 8): О треблажéнное Дрéво,/ на нéмже распя́ся Хрiстóс, Царь и Госпóдь!/ И҆́мже падé дрéвом прельсти́вый,/ тобóю прельсти́вся,/ Бóгу пригвозди́вшуся плóтiю,// подаю́щему мир душáм нáшим.
ПЕСНЬ 6
Iрмóс: Вóднаго звéря во утрóбе/ длáни Ióна крестови́дно распростéр,/ спаси́тельную Страсть проображáше я́ве./ Тем, триднéвен изшéд,/ премíрное Воскресéнiе прописáше/ Плóтiю пригвождéннаго Хрiстá Бóга// и триднéвным Воскресéнiем мiр просвéщшаго. (Двáжды)
Хор: Слáва, Гóсподи, Крестý Твоемý Честнóму.
Чтец: Ста́ростию преклони́вся и неду́гом отягче́н, испра́вися Иа́ков, ру́це премени́в,/ де́йствие явля́я жизноно́снаго Креста́:/ и́бо ве́тхость зако́ннаго сено́внаго писа́ния новописа́ на сем Пло́тию пригвозди́выйся Бог// и душегуби́тельный неду́г ле́сти отгна́. (6 раз)
Хор: Слáва, Гóсподи, Крестý Твоемý Честнóму.
Чтец: На ю́ныя возложи́в дла́ни боже́ственный Изра́иль, крестови́дно главы́ явля́ше,/ я́ко старе́йшая сла́ва, законослужи́тели лю́дие./ Те́мже, подмне́вся та́ко испрельсти́тися, не измени́ жизноно́снаго о́браза:/ превзы́дут бо лю́дие Христо́вы Бо́жии новоутвержде́ннии,// вопия́ху, Кресто́м огражда́еми. (4 раза)
Слáва Ѻтцý и Сы́ну и Святóму Дýху.
Чтец: На ю́ныя возложи́в дла́ни боже́ственный Изра́иль, крестови́дно главы́ явля́ше,/ я́ко старе́йшая сла́ва, законослужи́тели лю́дие./ Те́мже, подмне́вся та́ко испрельсти́тися, не измени́ жизноно́снаго о́браза:/ превзы́дут бо лю́дие Христо́вы Бо́жии новоутвержде́ннии,// вопия́ху, Кресто́м огражда́еми.
И҆ ны́не и прúсно и во вéки векóв. Амúнь.
Чтец: На ю́ныя возложи́в дла́ни боже́ственный Изра́иль, крестови́дно главы́ явля́ше,/ я́ко старе́йшая сла́ва, законослужи́тели лю́дие./ Те́мже, подмне́вся та́ко испрельсти́тися, не измени́ жизноно́снаго о́браза:/ превзы́дут бо лю́дие Христо́вы Бо́жии новоутвержде́ннии,// вопия́ху, Кресто́м огражда́еми.
Катавáсiя (глас 8): Вóднаго звéря во утрóбе/ длáни Ióна крестови́дно распростéр,/ спаси́тельную Страсть проображáше я́ве./ Тем, триднéвен изшéд,/ премíрное Воскресéнiе прописáше/ Плóтiю пригвождéннаго Хрiстá Бóга// и триднéвным Воскресéнiем мiр просвéщшаго.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк прáздника, глас 4: Вознесы́йся на Крест вóлею,/ тезоимени́тому Твоемý нóвому жи́тельству/ щедрóты Твоя́ дáруй, Хрiстé Бóже,/ возвесели́ нас си́лою Твоéю,/ побéды дая́ нам на супостáты,/ посóбiе имýщим Твоé орýжiе ми́ра// непобеди́мую побéду.
И҆́кос: И́же до тре́тiяго Небесе́ восхище́н бысть в рай,/ и глаго́лы слы́шав неизрече́нныя и Боже́ственныя,/ и́хже не леть язы́ки челове́ческими глаго́лати,/ что гала́том пи́шет, я́ко рачи́телие писа́ний прочто́сте и позна́сте:/ мне, глаго́лет, хвали́тися да не бу́дет,/ то́кмо во еди́ном Кресте́ Госпо́дни, на не́мже страда́в, уби́ стра́сти./ Того́ у́бо и мы изве́стно да держи́м, Крест Госпо́день, хвалу́ вси:/ есть бо нам спаси́тельное сие́ Дре́во// ору́жие, ми́ра непобеди́мая побе́да.
ПЕСНЬ 7
Iрмóс: Безýмное велéнiе мучи́теля злочести́ваго лю́ди поколебá,/ ды́шущее прещéнiе и злохулéнiе богомéрзкое,/ обáче три óтроки не устраши́ я́рость звéрская,/ ни огнь снедáяй,/ но противоды́шущу росонóсному Дýху,/ со огнéм сýще, поя́ху:// препéтый отцéв и нас Бóже, благословéн еси́. (Двáжды)
Хор: Слáва, Гóсподи, Крестý Твоемý Честнóму.
Чтец: От дре́ва вкуси́в, пе́рвый в челове́цех в тле́ние всели́ся:/ отверже́нием бо жи́зни безче́стнейшим осуди́вся,/ всему́ ро́ду телотле́нен не́кий я́ко вред неду́га преподаде́;/ но, обре́тше, земноро́днии, воззва́ние кре́стным Дре́вом, зове́м:// препе́тый отце́в и нас Бо́же, благослове́н еси́. (4 раза)
Хор: Слáва, Гóсподи, Крестý Твоемý Честнóму.
Чтец: Разруши́ повеле́ние Бо́жие преслуша́ние,/ и дре́во принесе́ смерть челове́ком,/ еже неблаговре́менно прича́стно бы́вшее;/ во утвержде́ние же зело́ честна́го/ отту́ду жи́зни дре́во возбраня́емо бе,/ е́же разбо́йнику злоуме́ршу отве́рзе, благоразу́мно зову́щу:// препе́тый отце́в и нас Бо́же, благослове́н еси́. (4 раза)
Хор: Слáва, Гóсподи, Крестý Твоемý Честнóму.
Чтец: Жезла́ объе́млет край Ио́сифова,/ бу́дущая зря, Изра́иль,/ Ца́рствия держа́вное,/ яко возыму́ществит пресла́вный Крест, проявля́я:/ сей бо царе́й победоно́сная похвала́ и свет ве́рою зову́щим:// препе́тый отце́в и нас Бо́же, благослове́н еси. (Двáжды)
Слáва Ѻтцý и Сы́ну и Святóму Дýху.
Чтец: Жезла́ объе́млет край Ио́сифова,/ бу́дущая зря, Изра́иль,/ Ца́рствия держа́вное,/ яко возыму́ществит пресла́вный Крест, проявля́я:/ сей бо царе́й победоно́сная похвала́ и свет ве́рою зову́щим:// препе́тый отце́в и нас Бо́же, благослове́н еси.
И҆ ны́не и прúсно и во вéки векóв. Амúнь.
Чтец: Жезла́ объе́млет край Ио́сифова,/ бу́дущая зря, Изра́иль,/ Ца́рствия держа́вное,/ яко возыму́ществит пресла́вный Крест, проявля́я:/ сей бо царе́й победоно́сная похвала́ и свет ве́рою зову́щим:// препе́тый отце́в и нас Бо́же, благослове́н еси.
Катавáсiя (глас 8): Безýмное велéнiе мучи́теля злочести́ваго лю́ди поколебá,/ ды́шущее прещéнiе и злохулéнiе богомéрзкое,/ обáче три óтроки не устраши́ я́рость звéрская,/ ни огнь снедáяй,/ но противоды́шущу росонóсному Дýху,/ со огнéм сýще, поя́ху:// препéтый отцéв и нас Бóже, благословéн еси́.
ПЕСНЬ 8
Iрмóс: Благослови́те, óтроцы,/ Трóицы равночи́сленнiи,/ Содéтеля Отцá Бóга,/ пóйте снизшéдшее Слóво,/ и огнь в рóсу претвóршее,/ и превозноси́те всем жизнь подавáющаго// Дýха Всесвятáго во вéки. (Двáжды)
Хор: Слáва, Гóсподи, Крестý Твоемý Честнóму.
Чтец: Воздвиза́ему Дре́ву,/ окропле́ну Кро́вию вопло́щшагося Сло́ва Бо́га,/ по́йте, Небе́сныя Си́лы;/ земны́х воззва́ние пра́зднующе, лю́дие,/ поклони́теся Христо́ву Кресту́,// и́мже ми́ру воста́ние во ве́ки. (4 раза)
Хор: Слáва, Гóсподи, Крестý Твоемý Честнóму.
Чтец: Земноро́днии, дла́ньми, строи́телие благода́ти,/ Крест, на не́мже стоя́ше Христо́с Бог, возноси́те священноле́пно/ и копие, Бо́жия Сло́ва Те́ло пробо́дшее,/ да ви́дят язы́цы вси спасе́ние Бо́жие,// сла́вяще Его́ во ве́ки. (4 раза)
Хор: Слáва, Гóсподи, Крестý Твоемý Честнóму.
Чтец: Боже́ственным судо́м предызбра́ннии, весели́теся,/ христиа́нстии ве́рнии ца́рие,/ хвали́теся победоно́сным ору́жием,/ прие́мше от Бо́га Крест честны́й:/ в сем бо коле́на бра́ней, де́рзости и́щуще,// разсыпа́ются во ве́ки. (Двáжды)
Слáва Ѻтцý и Сы́ну и Святóму Дýху.
Чтец: Боже́ственным судо́м предызбра́ннии, весели́теся,/ христиа́нстии ве́рнии ца́рие,/ хвали́теся победоно́сным ору́жием,/ прие́мше от Бо́га Крест честны́й:/ в сем бо коле́на бра́ней, де́рзости и́щуще,// разсыпа́ются во ве́ки.
И҆ ны́не и прúсно и во вéки векóв. Амúнь.
Чтец: Боже́ственным судо́м предызбра́ннии, весели́теся,/ христиа́нстии ве́рнии ца́рие,/ хвали́теся победоно́сным ору́жием,/ прие́мше от Бо́га Крест честны́й:/ в сем бо коле́на бра́ней, де́рзости и́щуще,// разсыпа́ются во ве́ки.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя (глас 8): Благослови́те, óтроцы,/ Трóицы равночи́сленнiи,/ Содéтеля Отцá Бóга,/ пóйте снизшéдшее Слóво,/ и огнь в рóсу претвóршее,/ и превозноси́те всем жизнь подавáющаго// Дýха Всесвятáго во вéки.
Возглас: Величáй, душé моя́,/ пречестны́й Крест Госпóдень.
ПЕСНЬ 9
Iрмóс: Тáин еси́, Богорóдице, рай,/ невоздéланно возрасти́вшiй Хрiстá,/ И҆́мже крéстное живонóсное на земли́ насади́ся Дрéво./ Тем, ны́не возноси́му,// покланя́ющеся Емý, Тя величáем. (Двáжды)
Припéв: Величáй, душé моя́,/ пречестны́й Крест Госпóдень.
Тропáрь: Да возра́дуются древа́ дубра́вная вся, освяти́вшуся естеству́ их,/ от Него́же изнача́ла насади́шася,/ Христу́ распросте́ршуся на Дре́ве;/ тем, ны́не возноси́му,// покланя́ющеся Ему́, Тя велича́ем.(3 раза)
Припéв: Величáй, душé моя́,/ пречестны́й Крест Госпóдень.
Тропáрь: Свяще́нный воста́ рог/ и глава́ всем богому́дрым, Крест,/ и́мже гре́шных мы́сленно стира́ются ро́зи вси;// тем, ны́не возноси́му, покланя́ющеся ему́, Тя велича́ем. (3 раза)
Припéв: Величáй, душé моя́,/ пречестны́й Крест Госпóдень.
Iрмóс: Снéдию дрéва рóду прибы́вшая смерть/ Кресто́м упраздни́ся днесь,/ и́бо прама́терняя всеро́дная кля́тва разруши́ся/ прозябе́нием Чи́стыя Богома́тере,// Ю́же вся Си́лы Небе́сныя велича́ют. (Двáжды)
Припéв: Величáй, душé моя́,/ пречестны́й Крест Госпóдень.
Тропáрь: Го́рести уби́йственныя, я́же от дре́ва, не оста́вив, Го́споди,/ Кресто́м бо сию́ соверше́нно истреби́л еси́./ Сего́ ра́ди и дре́вом услади́ иногда́ го́ресть вод Ме́рры:/ прообразу́ющее Креста́ де́йство,// е́же вся Си́лы Небе́сныя велича́ют. (2 раза)
Припéв: Величáй, душé моя́,/ пречестны́й Крест Госпóдень.
Тропáрь: Непреста́нно гружа́емыя мра́ком пра́отца, Го́споди,/ Кресто́м возвы́сил еси́ днесь,/ я́ко бо ле́стию весьма́ неудержа́нно естество́ преднизведе́ся,/ всеро́дне ны па́ки испра́ви свет Креста́ Твоего́,// его́же, ве́рнии, велича́ем. (2 раза)
Припéв: Величáй, душé моя́,/ пречестны́й Крест Госпóдень.
Тропáрь: Да о́браз пока́жеши ми́ру покланя́емый, Го́споди, Креста́,/ во всех я́ко пресла́вный, на небесе́х изобрази́л еси,/ све́том безме́рным озаре́н,/ царю́ всеору́жие непобеди́мое.// Тем Тя вся Си́лы Небе́сныя велича́ют. (2 раза)
Припéв: Величáй, душé моя́,/ пречестны́й Крест Госпóдень.
Катавáсiя (глас 8): Тáин еси́, Богорóдице, рай,/ невоздéланно возрасти́вшiй Хрiстá,/ И҆́мже крéстное живонóсное на земли́ насади́ся Дрéво./ Тем, ны́не возноси́му,// покланя́ющеся Емý, Тя величáем.
Припéв: Величáй, душé моя́,/ пречестны́й Крест Госпóдень.
Iрмóс: Снéдию дрéва рóду прибы́вшая смерть/ Кресто́м упраздни́ся днесь,/ и́бо прама́терняя всеро́дная кля́тва разруши́ся/ прозябе́нием Чи́стыя Богома́тере,// Ю́же вся Си́лы Небе́сныя велича́ют.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Светúлен прáздника: Крест - храни́тель всея́ вселе́нныя,/ Крест - красота́ Це́ркве,/ Крест - царе́й держа́ва,/ Крест - ве́рных утвержде́ние,// Крест - А́нгелов сла́ва и де́монов я́зва. (Двáжды)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Ин светúлен прáздника: Крест воздвиза́ется днесь, и мир освяща́ется:/ И́же бо со Отце́м седя́й и Ду́хом Святы́м на сем ру́це распростре́,/ мир весь привлече́ к Твоему́, Христе́, позна́нию;/ и́же у́бо на Тя наде́ющияся// боже́ственныя сподо́би сла́вы.
ХВАЛИТНЫ
Хор, глас 1: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.
[В приходской практике пропускается до стихир]Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речé, и бы́ша, Той повелé, и создáшася. Постáви я́ в век и в век вéка, повелéние положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
[В приходской практике пропускается до стихир]Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сы́нове Сióни возрáдуются о Царé своéм. Да восхвáлят и҆́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остри́ в рукáх их: сотвори́ти отмщéнiе во языцех, обличéнiя в лю́дех, связáти цари́ их пýты, и слáвныя их ручными окóвы желéзными,
[пропускается до стихир]На 8.Чтец: Сотвори́ти в них суд напи́сан:/ слáва сiя бýдет всем преподóбным Егó. Хвалúте Бóга во святых Егó,/ хвали́те Егó в утвержéнiи си́лы Егó.
На 6: Хвалúте Егó на сúлах Егó, хвалúте Егó по мнóжеству велúчествiя Егó.
Стiхúры прáздника, глас 8: О, пресла́внаго чудесе́,/ живоно́сный сад,/ Крест пресвяты́й/ на высоту́ возноси́мь явля́ется днесь./ Славосло́вят вси концы́ земни́и,/ устраша́ются де́монския полки́./ О, каковы́й дар земны́м дарова́ся!/ И́мже, Христе́, спаси́ ду́ши на́ша,// я́ко Eди́н Благоутро́бен.
Хвалúте Егó во глáсе трýбнем, хвалúте Егó во псалтúри и гýслех.
Стихúра: О, пресла́внаго чудесе́,/ живоно́сный сад,/ Крест пресвяты́й/ на высоту́ возноси́мь явля́ется днесь./ Славосло́вят вси концы́ земни́и,/ устраша́ются де́монския полки́./ О, каковы́й дар земны́м дарова́ся!/ И́мже, Христе́, спаси́ ду́ши на́ша,// я́ко Eди́н Благоутро́бен.
На 4. Хвалúте Егó в тимпáне и лúце, хвалúте Егó во стрýнах и оргáне.
Стiхúра: О, пресла́внаго чудесе́,/ я́ко грозд, испо́лнен живота́,/ понесы́й Вы́шняго,/ от земли́ воздвиза́емь Крест ви́дится днесь,/ и́мже вси к Бо́гу привлеко́хомся,/ и поже́рта бысть до конца́ смерть./ О, Дре́во пречестно́е,/ и́мже восприя́хом во Eде́ме безсме́ртную пи́щу,// Христа́ сла́вяще!
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Стiхúра: О, пресла́внаго чудесе́,/ широта́ Креста́ и долгота́/ Небеси́ равна́ eсть,/ я́ко Боже́ственною благода́тию освяща́ет вся́чeская./ О сем язы́цы ва́рварстии побежда́ются,/ о сем ски́птры царе́й утвержда́ются./ О, боже́ственныя ле́ствицы,/ éюже восхо́дим на Небеса́,// вознося́ще в пе́снех Христа́ Го́спода.
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Глас 6: Днесь происхо́дит Крест Госпо́день,/ и ве́рнии прие́млют того́ жела́нием,/ и взе́млют исцелéния души́ же и те́ла/ и вся́кия боле́зни./ Сего́ целу́им ра́достию и стра́хом:/ стра́хом, греха́ ра́ди, я́ко недосто́йни су́ще;/ ра́достию же, спасе́ния ра́ди,/ éже подае́т ми́ру на том пригвозди́выйся Христо́с Бог,// име́яй ве́лию ми́лость.
Возглас: Слáва Тебé, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрiстé, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцá, поми́луй нас. Яко Ты есѝ Един Свят; Ты есѝ Един Госпóдь, Iисýс Хрiстóс, в слáву Бóга Отцá, ами́нь.
На всяк день благословлю́ Тя и восхвалю́ и҆́мя Твоé во вéки, и в век вéка.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоé во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был еси нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебé. Гóсподи, к Тебé прибегóх, научѝ мя твори́ти вóлю Твою́, яко Ты есѝ Бог мой, яко у Тебé истóчник животá, во свéте Твоéм ýзрим свет. Пробáви ми́лость Твою́ вéдущим Тя. (3 раза)
Хор: Святы́й Бóже, Святы́й Крéпкiй, Святы́й Безсмéртный, поми́луй нас. (3 раза)
Хор: Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помилуй нас.
Тропáрь Крестá, глас 1: Спаси́, Гóсподи, лю́ди Твоя́/ и благослови́ достоя́нiе Твоé,/ побéды правослáвным хрiстiáнам на сопроти́вныя дáруя// и Твоé сохраня́я Крестóм Твои́м жи́тельство. (Трúжды)
[Тропарь ц.ч.]Тропáрь Крестá, глас 1: Спаси́, Гóсподи, лю́ди Твоя́/ и благослови́ достоя́нiе Твоé,/ побéды грядýщему рýсскому Царю́ и правослáвным хрiстiáнам на сопроти́вныя дáруя// и Твоé сохраня́я Крестóм Твои́м жи́тельство.
Хор: Крестý Твоемý покланя́емся Влады́ко,/ и святóе Воскресéнiе Твоé слáвим. (Трúжды, после каждого раза один земной поклон)
Продолжение здесь