Недeля 15 по Пятидесятнице, перед Воздвижением. ВСЕНОЩНОЕ БДЕНИЕ. УТРЕНЯ. КАНОН. Глас 6
25 сентября́ 2022 гóда. Недéля 15 по Пятидеся́тнице, пéред Воздвúженiем. Отдáнiе прáздника Рождествá Пресвятóй Богорóдицы. Глас 6. Воскрéсная прáздничная слýжба для домáшнего (келéйнаго) совершéнiя. Послéдованiе ýтрени.
Начало зри здесь ( великая вечéрня) и здесь ( ýтреня)
ПОЛИЕЛЕЙ
Хор: Хвали́те И҆́мя Госпóдне, хвали́те, раби́ Гóспода.
Аллилýiа (трúжды)
Благословéн Госпóдь от Сióна, живы́й во Iерусали́ме.
Аллилýiа (трúжды)
Исповéдайтеся Гóсподеви, я́ко Благ, я́ко в век ми́лость Егó.
Аллилýiа (трúжды)
Исповéдайтеся Бóгу Небéсному, я́ко в век ми́лость Егó.
Аллилýiа (трúжды)
ТРОПАРИ ВОСКРЕСНЫ ПО НЕПОРОЧНАХ, ГЛАС 5
Благословéн есú, Гóсподи,/научú мя оправдáнiем Твоúм. (Пс.118:12)
Áнгельскiй собóр удиви́ся,/ зря Тебé в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Благословéн есú, Гóсподи,/научú мя оправдáнiем Твоúм.
Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел миронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Благословéн есú, Гóсподи,/научú мя оправдáнiем Твоúм.
Зелó рáно мvронóсицы течáху/ ко грóбу Твоему рыдáющiя,/ но предстá к ним Áнгел и речé:/ рыдáнiя врéмя престá, не плáчите,/ воскресéнiе же апóстолом рцы́те.
Благословéн есú, Гóсподи,/научú мя оправдáнiем Твоúм.
Мvронóсицы жены́ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речé, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егó Сы́нови, и Святóму Дýху,/ Святéй Трóице во еди́ном существé,/ с Серафíмы зовýще:/ Свят, Свят, Свят еси, Гóсподи.
И҆ ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехá, Дéво, Адáма избáвила еси,/ рáдость же Éве/ в печáли мéсто подалá еси,/ пáдшiя же от жи́зни/ к сей напрáви/ из Тебé воплоти́выйся Бог и Человéк.
Чтец: Аллилýiа, аллилýiа, аллилýiа, слáва Тебé Бóже. (3 раза)
Гóсподи, поми́луй. (3 раз)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоú воскрéсны, глас 6: Вóльною и животворя́щею Твоéю смéртiю, Хрiстé,/ вратá áдова сокруши́в, я́ко Бог,/ отвéрзл еси́ нам дрéвнiй рай, и воскрéс из мéртвых,// избáвил еси́ от тлéнiя живóт наш.
СТЕПЕННА, ГЛАС 6
1 АНТИФОН
Хор: На нéбо óчи мои́ возвожý, к Тебé, Слóве:// ущéдри мя, да живý Тебé. (Двáжды)
Поми́луй нас уничижéнных,// устроя́я благопотрéбныя Твоя́ сосýды, Слóве. (Двáжды)
Слáва Ѻтцý и Сы́ну и Святóму Дýху.
Святóму Дýху, вся́кая всеспаси́тельная винá,/ áще кóему сей по достоя́нiю дхнет,// скóро взéмлет от земны́х: восперя́ет, возращáет, устроя́ет горé.
И ны́не и прúсно и во вéки векóв. Амúнь.
Святóму Дýху, вся́кая всеспаси́тельная винá,/ áще кóему сей по достоя́нiю дхнет,// скóро взéмлет от земны́х: восперя́ет, возращáет, устроя́ет горé.
2 АНТИФОН
Áще не Госпóдь бы был в нас,/ никтóже от нас проти́ву возмóгл бы врáжiим брáнем одолéти:// побеждáющiи бо от зде вознóсятся. (Двáжды)
Зубы́ их да не я́та бýдет душá моя́ я́ко птенéц, Слóве:// увы́ мне, кáко и́мам от врагá избы́ти, грехолюби́в сый! (Двáжды)
Слáва Ѻтцý и Сы́ну и Святóму Дýху.
Святы́м Дýхом обожéнiе всем,/ благоволéнiе, рáзум, мир и благословéнiе:// равнодéтелен бо есть Отцý и Слóву.
И ныне и присно и во вéки векóв. Аминь.
Святы́м Дýхом обожéнiе всем,/ благоволéнiе, рáзум, мир и благословéнiе:// равнодéтелен бо есть Отцý и Слóву.
3 АНТИФОН
Надéющiися на Гóспода врагóм стрáшни, и всем ди́вни:// горé бо зрят. (Двáжды)
В беззакóнiя рук свои́х, прáведных жрéбiй,// помóщника Тя имéя Спáсе, не простирáет. (Двáжды)
Слáва Ѻтцý и Сы́ну и Святóму Дýху.
Святáго Дýха держáва на всех:/ Емýже Вы́шняя вóинства покланя́ются,// со вся́ким дыхáнiем дóльным.
И ныне и присно и во вéки векóв. Аминь.
Святáго Дýха держáва на всех:/ Емýже Вы́шняя вóинства покланя́ются,// со вся́ким дыхáнiем дóльным.
ПРОКИМЕН
Чтец: Прокíмен, глас шесты́й: Гóсподи, воздви́гни си́лу Твою́, и прiиди́ во éже спасти́ нас. (Пс.79:3Б)
Хор: Гóсподи, воздвúгни сúлу Твою́,/ и прiидú во éже спастú нас.
Чтец: Пасы́й Iзрáиля вонми́, наставля́яй я́ко овчá Ióсифа. (Пс.79:2А)
Хор: Гóсподи, воздвúгни сúлу Твою́,/ и прiидú во éже спастú нас.
Чтец: Гóсподи, воздви́гни си́лу Твою́.
Хор: И прiидú во éже спастú нас.
Чтец: Гóсподу помóлимся.
Хор: Гóсподи, поми́луй.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода.
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От От Луки́ Святáго Евáнгелiя чтéнiе.
Хор: Слáва Тебé, Гóсподи, слáва Тебé.
(Лк.зач.112): Во врéмя óно, во еди́ну от суббóт, зелó ра́но, прiидóша жены́ на гроб, нося́ще я́же уготóваша арома́ты, и другíя с ни́ми. Обретóша же ка́мень отвалéн от грóба, и вшéдше, не обретóша телесé Гóспода Iисýса. И бысть не домышля́ющимся им о сем, и се мýжа два ста́ста в них в ри́зах блеща́щихся. Пристра́шным же бы́вшим им, и поклóншим ли́ца на зéмлю, рекóста к ним: что и́щете жива́го с мéртвыми? Несть зде, но воста́. Помяни́те, я́коже глагóла вам, ещé сый в Галилéи, глагóля, я́ко подоба́ет Сы́ну Человéческому прéдану бы́ти в рýце человéк грéшник, и прóпяту бы́ти, и в трéтiй день воскрéснути. И помянýша глагóлы Егó. И возвра́щшася от грóба, возвести́ша вся сiя́ единомуна́десяте и всем прóчим. Бя́ше же Магдали́на Марíя, и Iоа́нна, и Марíя Iа́ковля, и прóчiя с ни́ми, я́же глагóлаху ко апóстолом сiя́. И яви́шася пред ни́ми я́ко лжа глагóлы их, и не вéроваху им. Петр же воста́в течé ко грóбу, и прини́к ви́де ри́зы еди́ны лежа́ща, и оты́де, в себé дивя́ся бы́вшему.
[Русский синодальный перевод]В то время, в первый же день недели, очень рано, неся приготовленные ароматы, пришли они ко гробу, и вместе с ними некоторые другие; но нашли камень отваленным от гроба. И, войдя, не нашли тела Господа Иисуса. Когда же недоумевали они о сем, вдруг предстали перед ними два мужа в одеждах блистающих. И когда они были в страхе и наклонили лица свои к земле, сказали им: что вы ищете живого между мертвыми? Его нет здесь: Он воскрес; вспомните, как Он говорил вам, когда был еще в Галилее, сказывая, что Сыну Человеческому надлежит быть предану в руки человеков грешников, и быть распяту, и в третий день воскреснуть. И вспомнили они слова Его; и, возвратившись от гроба, возвестили всё это одиннадцати и всем прочим. То были Магдалина Мария, и Иоанна, и Мария, мать Иакова, и другие с ними, которые сказали о сем Апостолам. И показались им слова их пустыми, и не поверили им. Но Петр, встав, побежал ко гробу и, наклонившись, увидел только пелены лежащие, и пошел назад, дивясь сам в себе происшедшему. (Лк 24:1-12).
Хор: Слáва Тебé, Гóсподи, слáва Тебé.
Воскресéнiе Хрiстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрiстé, и святóе Воскресéнiе Твоé поéм и слáвим: Ты бо еси́ Бог наш, рáзве Тебé инóго не знáем, и҆́мя Твоé именýем. Прiиди́те вси вéрнiи, поклони́мся Святóму Хрiстóву Воскресéнiю: се бо прiи́де Крестóм рáдость всемý мíру. Всегдá благословя́ще Гóспода, поéм Воскресéнiе Егó:/ распя́тiе бо претерпéв, смéртiю смерть разруши́.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моé. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх роди́ мя мáти моя. Се бо и҆́стину возлюби́л еси́, безвéстная и тáйная премýдрости Твоея яви́л ми еси́. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отврати́ лицé Твоé от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéнiя Твоегó, и Дýхом Влады́чним утверди́ мя. Научý беззакóнныя путéм Твоим, и нечести́вiи к Тебé обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажи́, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Слáва Отцý и Сыну и Святóму Дýху.
глас 6: Моли́твами апóстолов,/ Ми́лостиве, очи́сти// мнóжество согрешéнiй нáших.
И҆ ныне и прúсно и во вéки векóв, амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моé.
Стiхúра, глас 6: Воскрéс Iисýс от грóба,/ я́коже проречé,/ дадé нам живóт вéчный// и вéлiю ми́лость.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ВОСКРЕСНЫЙ, ГЛАС 6
(совмещенный с канóном Борóдицы (глас 6) и канóнами Рождествá Пресвятóй Богорóдицы, глас 2 и глас 8)
ПЕСНЬ 1
Iрмóс: Я́ко по сýху пешешéствовав Iзрáиль,/ по бéздне стопáми,/ гони́теля фараóна/ ви́дя потопля́ема,// Бóгу побéдную песнь пои́м, вопiя́ше.
Хор (припéв): Слáва, Гóсподи, Святóму Воскресéнiю Твоемý.
Чтец (тропáрь): Распростéртыма длáньма на крестé,/ отéческаго испóлнил еси́ благоволéнiя, благíй Iисýсе, вся́ческая.// тéмже побéдную песнь Тебé вси пои́м.
Хор: Слáва, Гóсподи, Святóму Воскресéнiю Твоемý.
Чтец: Стрáхом к Тебé, я́ко рабы́ня, смерть/ повелéна приступи́ Влады́це животá,// тóю подаю́щему нам безконéчный живóт и воскресéнiе.
Хор: Пресвятáя Богорóдице, спасú нас.
Богорóдичен: Своегó прiéмши Содéтеля, я́ко Сам восхотé,/ от безсéменнаго Твоегó чрéва, пáче умá воплощáема, Чи́стая,// твáрей вои́стинну яви́лася еси́, Влады́чица.
Канон Богородицы, глас 6
Хор: Пресвятáя Богорóдице, спасú нас.
Чтец: Причáщшися Éва садý, преслушáннаго брáшна, кля́тву введé:/ но сiю́ разреши́ла еси́, Чи́стая,// благословéнiя начáток Хрiстá рóждши.
Хор: Пресвятáя Богорóдице, спасú нас.
Чтец: Я́же би́сера от божéственныя мóлнiи Хрiстá рóждши,/ страстéй мои́х мглу, и прегрешéнiй смущéнiе, Чи́стая,// разжени́ свéтом Твоея́ свéтлости.
Канон первый Рождествa Богорoдицы, глас 2
Припéв: Пресвятáя Богорóдице, спасú нас.
Тропáрь: Гряди́те, вéрнiи, Дýхом Божéственным рáдующеся,/ Ю́же от неплóдове днесь пришéдшую человéков на спасéнiе// Приснодéву Отрокови́цу пéсньми почти́м. (Двáжды)
Припéв: Пресвятáя Богорóдице, спасú нас.
Тропáрь: Рáдуйся, Чи́стая, Мáти и Рабó Хрiстá Бóга,/ Я́же пéрвому Ходáтаица блажéнству,// человéческiй род, Тя вси достóйно пéсньми слáвим.
Припéв: Пресвятáя Богорóдице, спасú нас.
Тропáрь: Жи́зни раждáется днесь мост,/ и҆́мже человéцы, воззвáнiе падéнiя, еже от áда, обрéтшiи,// Хрiстá Живнодáвца пéсньми прославля́ют.
Второй канон Рождествa Богорoдицы, глас 8
Припéв: Пресвятáя Богорóдице, спасú нас.
Тропáрь: Да ликовствýет вся тварь, да весели́тся же и Давíд,/ я́ко от колéна и от сéмене егó произы́де жезл,// Цвет нося́щи, Гóспода, Творцá вся́ческих.
Припéв: Пресвятáя Богорóдице, спасú нас.
Тропáрь: Святáя Святы́х, во святéм святи́лищи Младéнец возлагáется/ воспитáтися от руки́ Áнгеловы.// Вси ýбо вéрно спрáзднуим в рождествé Ея́.
Слáва Ѻтцý и Сы́ну и Святóму Дýху.
Трóичен: Три Безначáльна слáвлю,/ Три Свя́та пою́,/ Три Соприсносýщна в Существé Еди́ном проповéдую:// Еди́н бо во Отцé, и Сы́не, и Дýсе славослóвится Бог.
И҆ ны́не и прúсно и во вéки векóв. Амúнь.
Богорóдичен: Кто ви́де Отрочá, Егóже не всéя Отéц, млекóм питáемое? Или́ где ви́дена бысть Дéва Мáти?// И҆́стинно пáче умá обоя́, Богороди́тельнице Чи́стая.
Катавáсiя (глас 8): Крест начертáв, Моисéй/ впря́мо жезлóм Чермнóе пресечé,/ Iзрáилю пешеходя́щу;/ тóже обрáтно фараóновым колесни́цам, удáрив, совокупи́,/ вопреки́ написáв непобеди́мое орýжiе.// Тем Хрiстý пои́м, Бóгу нáшему, я́ко прослáвися.
ПЕСНЬ 3
Iрмóс: Несть свят,/ я́коже Ты, Гóсподи Бóже мой,/ вознесы́й рог вéрных Твои́х, Блáже,/ и утверди́вый нас на кáмени// исповéданiя Твоегó.
Хор: Слáва, Гóсподи, Святóму Воскресéнiю Твоемý.
Чтец: Бóга распинáема плóтiю зря́щи тварь, растаявáшеся стрáхом:// но содержи́тельною длáнiю нас рáди Распя́таго, крéпко держи́ма бе.
Хор: Слáва, Гóсподи, Святóму Воскресéнiю Твоемý.
Чтец: Смéртiю смерть разорéна лежи́т окая́нная без дыхáнiя:/ Животá бо не терпя́щи божéственнаго приражéнiя,// умерщвля́ется крéпкiй, и дáруется всем воскресéнiе.
Хор: Пресвятáя Богорóдице, спасú нас.
Богорóдичен: Божéственнаго рождествá Твоегó, Чи́стая,/ вся́кiй естествá чин превосхóдит чýдо:/ Бóга бо преестéственне зачалá еси́ во чрéве,// и рóждши пребывáеши при́сно Дéва.
Глас 6
Хор: Пресвятáя Богорóдице, спасú нас.
Чтец: Тлéнную мою́ плоть и смéртную, Всечи́стая Богомáти,/ из чрéва Твоегó несказáнно прiéм Благíй,// и обезтлéнив сiю́, вéчне Себé связáл есть.
Хор: Пресвятáя Богорóдице, спасú нас.
Чтец: Бóга воплощáема из Тебé зря́ще, Дéво,/ ужасáхуся стрáхом ли́цы Áнгельстiи,// и я́ко Мáтерь Бóжiю немóлчными пéсньми Тя почитáют.
Глас 2
Припéв: Пресвятáя Богорóдице, спасú нас.
Тропáрь: Непорóчно Бóгу пожи́вшiи,/ всех роди́сте Спасéнiе,/ богомýдрiи роди́теле// Зижди́теля Рóждшiя и Бóга нáшего. (Двáжды)
Припéв: Пресвятáя Богорóдице, спасú нас.
Тропáрь: Всем жизнь источáяй Госпóдь/ от неплóдове произведé Дéву,/ в Ню́же всели́тися извóли,// и по Рождествé сохрани́в нетлéнну.
Припéв: Пресвятáя Богорóдице, спасú нас.
Тропáрь: Áннин плод, Марíю, днесь,/ Грозд рóждшую живонóсный,/ я́ко Богорóдицу воспои́м,// Предстáтельницу же всех, и Помóщницу.
Глас 8
Припéв: Пресвятáя Богорóдице, спасú нас.
Тропáрь: Воспитáвшися во Святáя Святы́х,/ Дéво Пречи́стая Богорóдице,/ вы́шши яви́лася еси́ твáри,// Зижди́теля плóтiю порóждши.
Припéв: Пресвятáя Богорóдице, спасú нас.
Тропáрь: Благословéнно чрéво твоé, целомýдренная Áнно,/ плод бо израсти́ла еси́ дéвства,/ Ю́же безсéменно Питáтеля твáри рóждшую// и Избáвителя Iисýса.
Слáва Ѻтцý и Сы́ну и Святóму Дýху.
Трóичен: Тебé покланя́емся, Ѻ́тче, Безначáльне Существóм,/ поéм Безлéтнаго Сына Твоегó/ и чтем Соприсносýщнаго Дýха Твоегó,// я́ко Еди́наго Трóе естествóм Бóга.
И҆ ны́не и прúсно и во вéки векóв. Амúнь.
Богорóдичен: Светодáвца и Начáльника жи́зни человéческiя рóждшая, Чи́стая Богорóдице,/ яви́лася еси́ сокрóвище жи́зни нáшея// и дверь непристýпнаго Свéта.
Катавáсiя (глас 8): Жезл во óбраз тáйны прiéмлется,/ прозябéнiем бо предразсуждáет свящéнника;/ неплодя́щей же прéжде Цéркви/ ны́не процветé Дрéво Крестá// в держáву и утверждéнiе.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк прáздника, глас 4: Iоакíм и Áнна поношéнiя безчáдства/ и Адáм и Éва от тли смéртныя свободи́стася, Пречи́стая,/ во святéм рождествé Твоéм./ То прáзднуют и лю́дiе Твои́,/ вины́ прегрешéнiй избáвльшеся,/ внегдá звáти Ти:// неплóды раждáет Богорóдицу и Питáтельницу Жи́зни нáшея.
И҆́кос: Моли́тва кýпно и воздыхáнiе неплóдства и безчáдства Iоакíма же и Áнны благопрiя́тное/ и во ýши Госпóдни вни́де, и прозябé плод живонóсен мíру./ Ов бо моли́тву на горé творя́ше, óва же в садé поношéнiе ношáше,// но с рáдостiю неплóды раждáет Богорóдицу и Питáтельницу Жи́зни нáшея.
Седáлен прáздника, глас 4: Дéва Марíя и Богорóдица и҆́стинно,/ я́ко óблак свéта, днесь возсiя́ нам/ и от прáведных предгрядéт в слáву нáшу./ Не ктомý Адáм осуждáется,/ и Éва от уз свободи́ся,/ и сегó рáди зовéм, вопiю́ще со дерзновéнiем еди́ней Чи́стей:// рáдость возвещáет рождествó Твоé всей вселéнней.
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Дéва Марíя и Богорóдица и҆́стинно,/ я́ко óблак свéта, днесь возсiя́ нам/ и от прáведных предгрядéт в слáву нáшу./ Не ктомý Адáм осуждáется,/ и Éва от уз свободи́ся,/ и сегó рáди зовéм, вопiю́ще со дерзновéнiем еди́ней Чи́стей:// рáдость возвещáет рождествó Твоé всей вселéнней.
ПЕСНЬ 4
Iрмóс: Хрiстóс моя́ си́ла,/ Бог и Госпóдь,/ честнáя Цéрковь/ боголéпно поéт, взывáющи,// от смы́сла чи́ста, о Гóсподе прáзднующи.
Хор: Слáва, Гóсподи, Святóму Воскресéнiю Твоемý.
Чтец: Дрéво процвелó есть, Хрiстé, и҆́стинныя жи́зни:/ крест бо водрузи́ся,/ и напоéн быв крóвiю и водóю от нетлéннаго Твоегó ребрá,// живóт нам прозябé.
Хор: Слáва, Гóсподи, Святóму Воскресéнiю Твоемý.
Чтец: Не ктомý змiй мне лóжне обожéнiе подлагáет:/ Хрiстóс бо богодéлатель человéческаго естествá,// ны́не невозбрáнно стезю́ животá мне отвéрзе.
Хор: Пресвятáя Богорóдице, спасú нас.
Богорóдичен: Я́ко вои́стинну неизвещáнна и непостижи́ма,/ я́же Твоегó боголéпнаго, Богорóдице, суть рождествá,// сýщим на земли́ и на небеси́, Приснодéво, тáинства.
Глас 6
Хор: Пресвятáя Богорóдице, спасú нас.
Чтец: Поéм, Пречи́стая, Тебé Всенепорóчную,/ и҆́же Тобóю спáсшiися,/ и благочéстно пою́ще взывáем:// благословéнна, я́же Бóга, Приснодéво, рóждшая.
Хор: Пресвятáя Богорóдице, спасú нас.
Чтец: Свет незаходи́мый, Дéво, родилá еси́,/ сýщим во тьме житiя́,/ плóтiю светя́щ, Всеблажéнная, и пою́щим Тя,// рáдость, Приснодéво, источи́ла еси́.
Глас 2
Припéв: Пресвятáя Богорóдице, спасú нас.
Тропáрь: Воспевáем Тя, Гóсподи,/ вéрным спаси́тельное пристáнище подáвшаго всем,// Тебé Рóждшую. (Двáжды)
Припéв: Пресвятáя Богорóдице, спасú нас.
Тропáрь: Тя, Богоневéсто,/ похвалý всем Хрiстóс яви́ и держáву// пою́щим вéрно Твоé тáинство.
Припéв: Пресвятáя Богорóдице, спасú нас.
Тропáрь: Неискусобрáчная Влады́чице,/ Твои́ми моли́твами избавля́еми прегрешéнiй,// благоразýмно вси Тя ублажáем.
Глас 8
Припéв: Пресвятáя Богорóдице, спасú нас.
Тропáрь: Патрiáрх Iáков, прови́дев, Спáсе, вели́чiя я́сно строéнiя Твоегó,/ вопiя́ше Дýхом, ко Iýде глагóля тáйно:/ от лéторасли возшéл еси́, Сы́не мой,// возвещáя Тя от Дéвы Бóга.
Припéв: Пресвятáя Богорóдице, спасú нас.
Тропáрь: Ны́не жезл Аарóнов, от кóрене Давíдова прозя́бшiй,/ ны́не Дéва Чи́стая происхóдит,/ и сликовствýет Нéбо и земля́, и вся отéчествiя язы́ков,// и Áнна и Iоакíм тáинственно.
Слáва Ѻтцý и Сы́ну и Святóму Дýху.
Трóичен: Слáвлю Безначáльна Бóга, Ѻтцá и Сы́на и Святáго Дýха,/ Единосýщную Трóицу Несоздáнную,/ Éйже предстоя́т Серафíми благоговéйно, зовýще:// Свят, Свят, Свят еси́, Бóже.
И҆ ны́не и прúсно и во вéки векóв. Амúнь.
Богорóдичен: Пребезначáльное Начáло начáло прiéмлет из Тебé, Богороди́тельнице, плотски́м врéменем/ и пребывáет собезначáльно и воплóщься Слóво Ѻ́тчее и Дýху соприсносýщное,// сохраня́я Божéственное достóинство.
Катавáсiя (глас 8): Услы́шах, Гóсподи,/ смотрéнiя Твоегó тáинство,/ разумéх делá Твоя́// и прослáвих Твоé Божествó.
ПЕСНЬ 5
Iрмóс: Бóжiим свéтом Твои́м, Блáже,/ ýтренюющих Ти дýши любóвiю озари́, молю́ся,/ Тя вéдети, Слóве Бóжiй,/ и҆́стиннаго Бóга,// от мрáка грехóвнаго взывáюща.
Хор: Слáва, Гóсподи, Святóму Воскресéнiю Твоемý.
Чтец: Уступáют мне херувíми ны́не,/ и плáменное орýжiе, Влады́ко, плещи́ мне даéт,/ Тя ви́девше, Слóве Бóжiй, и҆́стиннаго Бóга,// разбóйнику путь сотвóршаго в рай.
Хор: Слáва, Гóсподи, Святóму Воскресéнiю Твоемý.
Чтец: Не ктомý бою́ся, éже в зéмлю, Влады́ко Хрiстé, возвращéнiя:/ Ты бо от земли́ мя возвéл еси́ забвéнна,/ благоутрóбiя рáди мнóгаго,// к высотé нетлéнiя воскресéнiем Твои́м.
Хор: Пресвятáя Богорóдице, спасú нас.
Богорóдичен: И҆́же Богорóдицу Тя от души́, Влады́чице мíра благáя,/ исповéдающих спаси́:/ Тебé бо предстáтельство непобори́мое и҆́мамы,// и҆́стинную Богороди́тельницу.
Глас 6
Хор: Пресвятáя Богорóдице, спасú нас.
Чтец: Чистотóю возсiя́вши свéтло,/ Божéственное пребывáнiе Влады́ки, Всепéтая, былá еси́./ Ты бо еди́на Мáти Бóжiя яви́лася еси́,// во объя́тiих, я́ко младéнца, Сегó носи́вши.
Хор: Пресвятáя Богорóдице, спасú нас.
Чтец: Нося́щи добрóту ýмную, краснéйшiя Твоея́ души́,/ Невéста Бóжiя былá еси́,/ запечáтствована дéвством, Чи́стая,// и свéтом чистоты́ мiр просвещáющи.
Глас 2
Припéв: Пресвятáя Богорóдице, спасú нас.
Тропáрь: Воспои́м, лю́дiе, всех винý/ сýщаго по нам бы́ти Винóвнаго:/ Ея́же óбразу рáдовахуся сподобля́еми прорóцы,// явлéнное спасéнiе от Тоя́ плодя́ще. (Двáжды)
Припéв: Пресвятáя Богорóдице, спасú нас.
Тропáрь: От сýха прозябéнiе жезлá iерéева/ Iзрáилю показá проразсуждéнiе,/ и ны́не свéтлость прозя́бших преслáвно свéтит,// от неплóдове всеслáвное рождéнiе. (Двáжды)
Глас 8
Припéв: Пресвятáя Богорóдице, спасú нас.
Тропáрь: Пречи́стое Твоé рождествó, Дéва Непорóчная, несказáнное,/ и зачáтiе неизглагóланно, и рождéнiе Твоé,/ Невéсто неневéстная,// Бог бо бе, весь в мя облекíйся.
Припéв: Пресвятáя Богорóдице, спасú нас.
Тропáрь: Днесь да веселя́тся áнгельстiи чи́ни,/ пéсньми да ликýют сýщiи из Адáма:/ роди́ся бо жезл, Цвет возрасти́вшiй, Хрiста,// Еди́наго Избáвителя нáшего.
Слáва Ѻтцý и Сы́ну и Святóму Дýху.
Трóичен: Слáва Тебé, Ѻ́тче Святы́й, Бóже Нерождéнне;/ слáва Тебé, Сы́не Безлéтне, Единорóдне;/ слáва Тебé, Дýше Божéственный и Сопрестóльный,// от Ѻтцá происходя́й и в Сы́не пребывáяй.
И҆ ны́не и прúсно и во вéки векóв. Амúнь.
Богорóдичен: Бысть чрéво Твоé Сóлнца носи́ло,/ пребы́сть чистотá Твоя́, я́коже прéжде, невреди́ма, Дéво,/ Хрiстóс бо Сóлнце,// я́ко от чертóга жени́х, яви́ся из Тебé.
Катавáсiя (глас 8): О треблажéнное Дрéво,/ на нéмже распя́ся Хрiстóс, Царь и Госпóдь!/ И҆́мже падé дрéвом прельсти́вый,/ тобóю прельсти́вся,/ Бóгу пригвозди́вшуся плóтiю,// подаю́щему мир душáм нáшим.
ПЕСНЬ 6
Iрмóс: Житéйское мóре,/ воздвизáемое зря напáстей бýрею,/ к ти́хому пристáнищу Твоемý притéк, вопiю́ Ти:/ возведи́ от тли живóт мой,// Многоми́лостиве.
Хор: Слáва, Гóсподи, Святóму Воскресéнiю Твоемý.
Чтец: Распинáемь, Влады́ко, гвоздьми́ ýбо,/ кля́тву ю́же на нас потреби́л еси́:/ копiéм же прободáемь в ребрó,// адáмово рукописáнiе растерзáв, мíр свободи́л еси́.
Хор: Слáва, Гóсподи, Святóму Воскресéнiю Твоемý.
Чтец: Адáм низведéся, лéстiю запя́т быв, ко áдове прóпасти:/ но и҆́же естествóм Бог же и ми́лостив,/ сшел еси́ на взыскáнiе,// и на рáму понéс, совоскреси́л еси́.
Хор: Пресвятáя Богорóдице, спасú нас.
Богорóдичен: Пречи́стая Влады́чице,/ рóждшая человéком кóрмчiю Гóспода,/ страстéй мои́х непостоя́нное и лю́тое утоли́ смущéнiе,// и тишинý подáждь сéрдцу моемý.
Глас 6
Хор: Пресвятáя Богорóдице, спасú нас.
Чтец: Вели́кiй преднаписá во прорóцех Моисéй Тя,/ ковчéг, и трапéзу, и свéщник, и рýчку,/ обрáзно назнáменуя воплощéнiе,// éже из Тебé Вы́шняго, Мáти Дéво.
Хор: Пресвятáя Богорóдице, спасú нас.
Чтец: Умерщвля́ется смерть, и тлéнiе упражня́ется/ Адáмова осуждéнiя, о Влады́чице!/ Плодý Твоемý прирази́вшееся:/ Жизнь бо родилá еси́,// от истлéнiя избавля́ющую пою́щих Тя.
Глас 2
Припéв: Пресвятáя Богорóдице, спасú нас.
Тропáрь: Ко Гóсподу в скóрби неплóдства возопи́ша/ Богомáтере богомýдрiи роди́тели/ и Сiю́ в рóды родóв роди́ша,// на óбщее спасéнiе и похвалý. (Двáжды)
Припéв: Пресвятáя Богорóдице, спасú нас.
Тропáрь: Прiя́ша Небéсный дар от Бóга достóин/ Богомáтере богомýдрiи роди́тели,/ самéх Херувíмов превы́шшее носи́ло,// Слóва и Зижди́теля Роди́тельницу. (Двáжды)
Глас 8
Припéв: Пресвятáя Богорóдице, спасú нас.
Тропáрь: Святýю Святы́х сýщу,/ целомýдреннiи роди́тели Твои́, Чи́стая,/ возложи́ша Тя в хрáме Госпóдни воспитáтися чéстно// и уготóватися в Мáтерь Емý.
Припéв: Пресвятáя Богорóдице, спасú нас.
Тропáрь: Неплóды и мáтери, ликýйте,/ дерзáйте и игрáйте, безчáдныя:/ безчáдна бо неплóды Богорóдицу прозябáет,// Я́же избáвит от болéзней Éву и кля́твы Адáма.
Слáва Ѻтцý и Сы́ну и Святóму Дýху.
Трóичен:В Тебé Трóическое тáинство поéтся и слáвится, Чи́стая:/ Отéц бо благоволи́,/ и Слóво всели́ся в Тя,// и Божéственный Дух Тебé осени́.
И҆ ны́не и прúсно и во вéки векóв. Амúнь.
Богорóдичен: Златáя кади́льница былá еси́,/ Огнь бо во утрóбе Твоéй всели́ся, Слóво от Дýха Свя́та,/ и человéческим зрáком в Тебé ви́деся,// Богороди́тельнице Чи́стая.
Катавáсiя (глас 8): Вóднаго звéря во утрóбе/ длáни Ióна крестови́дно распростéр,/ спаси́тельную Страсть проображáше я́ве./ Тем, триднéвен изшéд,/ премíрное Воскресéнiе прописáше/ Плóтiю пригвождéннаго Хрiстá Бóга// и триднéвным Воскресéнiем мiр просвéщшаго.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк воскрéсный, глас 6: Живоначáльною длáнiю/ умéршiя от мрáчных удóлiй,/ Жизнодáвец воскреси́в всех Хрiстóс Бог,/ воскресéнiе подадé человéческому рóду:/ есть бо всех Спаси́тель,// Воскресéнiе и Живóт, и Бог всех.
И҆́кос: Крест и погребéнiе Твое́, Жизнодáвче, воспевáем вéрнiи, и покланя́емся,/ я́ко ад связáл еси́, Безсмéртне, я́ко Бог всеси́льный:/ и мéртвыя совоскреси́л еси́, и вратá смéртная сокруши́л еси́,/ и держáву áдову низложи́л еси́, я́ко Бог./ Тéмже земнорóднiи славослóвим Тя любóвiю, воскрéсшаго,/ и низложи́вшаго врáжiю держáву всепáгубную,/ и всех воскреси́вшаго в Тя вéровавших,/ и мiр избáвльшаго от стрел змiи́ных,// и от прéлести врáжiя, я́ко Бог всех.
ПЕСНЬ 7
Iрмóс: Росодáтельну ýбо пещь/ содéла Áнгел/ преподóбным отрокóм,/ халдéи же опаля́ющее/ велéнiе Бóжiе мучи́теля увещá вопи́ти:// благословéн еси́, Бóже отéц нáших.
Хор: Слáва, Гóсподи, Святóму Воскресéнiю Твоемý.
Чтец: Рыдáющее во стрáсти Твоéй сóлнце, во мрак облечéся,/ и во дни по всей, Влады́ко, земли́ свет помéрче, вопiя́:// благословéн еси́ Бóже отéц нáших.
Хор: Слáва, Гóсподи, Святóму Воскресéнiю Твоемý.
Чтец: Облекóшася Хрiстé схождéнiем Твои́м во свет преиспóдняя,/ прáотец же весéлiя испóлнь, яви́ся ликовствýя, взыгрáся, вопiя́:// благословéн еси́, Бóже отéц нáших.
Хор: Пресвятáя Богорóдице, спасú нас.
Богорóдичен: Тобóю, Мáти Дéво,/ свет возсiя́ всей вселéнней свéтлый:/ Зижди́теля бо Ты всех родилá еси́ Бóга,/ Егóже проси́, Всечи́стая,// нам низпослáти вéрным вéлiю ми́лость.
Глас 6
Хор: Пресвятáя Богорóдице, спасú нас.
Чтец: Ю́нош трiéх пещь не опали́, рождествó прообразýющих Твоé:/ божéственный бо огнь Тебé не опали́в, всели́ся в Тя,/ и вся научи́ вопи́ти:// благословéн еси́, Бóже отец нáших.
Хор: Пресвятáя Богорóдице, спасú нас.
Чтец: Блажáт концы́ Тя, Всечи́стая Мáти, я́коже прореклá еси́,/ просвещáеми светолýчными сiя́ньми Твои́ми,/ и благодáтiю пою́ще, вопiю́т:// благословéн еси́, Бóже отец нáших.
Глас 2
Припéв: Пресвятáя Богорóдице, спасú нас.
Тропáрь: Твоé в вещéственных явлéнiих/ законополóжник возбрани́ся разумéти/ и вели́кое, Пречи́стая, тáинство,/ не мýдрствовати земнорéвностная обрáзно наказýемь иногдá./ Тéмже, уди́влься чудеси́, глагóлаше:// благословéн Бог отéц нáших. (Двáжды)
Припéв: Пресвятáя Богорóдице, спасú нас.
Тропáрь: Гóру и дверь Небéсную и мы́сленную Тя лéствицу/ боголéпно лик божéственный пронаречé,/ от Тебé бо Кáмень отсечéся не рукáми мýжескими,// и дверь, Éюже прóйде Госпóдь, И҆́же чудéс Бог отéц нáших. (Двáжды)
Глас 8
Припéв: Пресвятáя Богорóдице, спасú нас.
Тропáрь: Прáзднуем, Чи́стая,/ и вéрно покланя́емся святóму Твоемý Рождествý,/ пою́ще Сы́на Твоегó,// И҆́мже избáвихомся дрéвняго Адáмова ны́не осуждéнiя.
Припéв: Пресвятáя Богорóдице, спасú нас.
Тропáрь: Ны́не Áнна весели́тся и вопiéт, хвáлящися:/ неплóды сýщи, роди́х Бóжiю Мáтерь,/ Ея́же рáди осуждéнiе Éвино разреши́ся// и я́же в печáлех болéзнь.
Слáва Ѻтцý и Сы́ну и Святóму Дýху.
Трóичен: Отцá прослáвим, Сы́на и Дýха,/ во Еди́нстве Божествá,/ Трóицу Пресвятýю, Нераздéльную, Несоздáнную,// и Соприсносýщную, и Единосýщную.
И҆ ны́не и прúсно и во вéки векóв. Амúнь.
Богорóдичен: Ты Бóга еди́на родилá еси́, Дéво, преслáвно,/ Ты естествó обнови́ла еси́ Рождествóм Твои́м, Мари́е,/ Ты Éву разреши́ла еси́ перворóдныя кля́твы,// Богороди́тельнице Чи́стая.
Катавáсiя (глас 8): Безýмное велéнiе мучи́теля злочести́ваго лю́ди поколебá,/ ды́шущее прещéнiе и злохулéнiе богомéрзкое,/ обáче три óтроки не устраши́ я́рость звéрская,/ ни огнь снедáяй,/ но противоды́шущу росонóсному Дýху,/ со огнéм сýще, поя́ху:// препéтый отцéв и нас Бóже, благословéн еси́.
ПЕСНЬ 8
Iрмóс: Из плáмене преподóбным рóсу источи́л еси́/ и прáведнаго жéртву водóю попали́л еси́:/ вся бо твори́ши, Хрiстé, тóкмо éже хотéти.// Тя превознóсим во вся вéки.
Хор: Слáва, Гóсподи, Святóму Воскресéнiю Твоемý.
Чтец: Iудéйскiя дрéвле пророкоубíйцы лю́ди,/ богоубíйцы зáвисть ны́не содéла,/ Тебé на крест вознéсшiя, Слóве Бóжiй:// Егóже превознóсим во вся вéки.
Хор: Слáва, Гóсподи, Святóму Воскресéнiю Твоемý.
Чтец: Небéснаго крýга не остáвил еси́,/ и во ад сошéд, всегó совоздви́гл еси́/ лежáщаго во гнóищи, Хрiстé, человéка,// Тя превознося́ща во вся вéки.
Хор: Пресвятáя Богорóдице, спасú нас.
Богорóдичен: От Свéта Светодáвца Слóва зачалá еси́,/ и рóждши неизречéнно Сегó, прослáвилася еси́:/ Дух бо в Тя, Отрокови́це, Бóжiй всели́ся.// Тéмже Тя поéм во вся вéки.
Глас 6
Хор: Пресвятáя Богорóдице, спасú нас.
Чтец: Позлащéною ри́зою, я́коже Цари́цу, Сын Твой просвети́в зарéю Дýха,/ Тебé одеснýю Себé постáви, Пречи́стая:// Егóже превознóсим во вся вéки.
Хор: Пресвятáя Богорóдице, спасú нас.
Чтец: И҆́же хотéнiем еди́ным мир водрузи́вый,/ от пречи́стыя Твоея́ утрóбы плоть взéмлет,/ свы́ше сiю́ наздáти хотя́:// Егóже превознóсим во вся вéки.
Глас 2
Припéв: Пресвятáя Богорóдице, спасú нас.
Тропáрь: Я́же к Бóгу нáшего примирéнiя предопределéнная ски́нiя/ éже бы́ти ны́не начинáет,/ имýщи роди́ти Слóва, нам дебельствóм Плóти я́вльшася,/ Егóже поéм, из не сýщих во éже бы́ти Тем прiéмшiи,// и превознóсим во вся вéки. (Двáжды)
Припéв: Пресвятáя Богорóдице, спасú нас.
Тропáрь: Неплóдства преложéнiе мирскóе благи́х разреши́ неплóдство/ и я́сно чýдо Хрiстá показá, к земны́м пришéдша,/ Егóже поéм, из не сýщих во éже бы́ти Тем прiéмшiи,// и превознóсим во вся вéки. (Двáжды)
Глас 8
Продолжение здесь