Вербное Воскресение - Кирилл Туровский
Привожу слово выдающегося древнерусского книжника Кирилла Туровского (XII в.) на Вербное Воскресение по публикации Института русской литературы (http://lib.pushkinskijdom.ru/Default.aspx?tabid=4936)
В НЕДѢЛЮ ЦВѢТНУЮ О СКАЗАНИИ ЕВАНГЕЛЬСТѢМЬ СВЯТАГО КИРИЛА
Велика и ветха скровища, дивно и радостьно откровение, добра и силна богатьства, нескудно ближним даемии дарове, славна и зѣло честьна дому искуснии строители, обилны и преполнены царское трапезы мнози отстатци, от нихже нищии препитаеми бывають, - не гиблющею ядью, но пребывающею в живот вѣчьный! Словеса бо евангельская пища суть душам нашим, яже Христос многообразно глагола человѣческаго ради спасения. Его же славьный и честный дом - Церкви имѣеть искусны строителя: патриархы и епископы, ерѣя же и игумены, и вся церковныя учителя, иже вѣрою и чистотою ближнии Богу створишася и приемлють Святаго Духа благодатью различныя дары ученью и цѣлению по мѣрѣ дара Христова. Тѣм же и мы, убозии, тоя же тряпезы останков крупицѣ въземлющеи, насыщаемься, киждо бо раб своего господина хвалить.
Радость же нам, братье, днесь и веселье всему миру пришедшаго ради праздника, о немьже пророческая писанья сбытье прияша, творимаго ради в онь Христомь знаменья. Днесь Христос от Вифанья в Ерусалим въходить, всѣд на жребя осля, да пророчьство Захарьино сверьшиться, иже рече о нем: «Радуйся зѣло, дщи Сионова: се бо цесарь твой грядеть кроток, всѣд на жребець ун!». Се убо пророчество разумѣюще, веселимся.
Душа бо святых дщери горняго Ерусалима нарицаются; жребя же - иже от язык вѣровавше в Онь людье, ихже, послав апостолы, и отрѣши от льсти дьяволя.
Днесь народи противу Исусу изидоша вайя в руках держаща и тѣмь почесть творяще, егда «Лазоря из гроба возва и от мертвых въскреси и́». Предобро народа послушьство, емуже языци и вѣровавъше, Сына Божия познаша и. В жидѣх бо чюдеса створи, а языком спасение и благодать дарова. Они его не познаша, а языци прияша и. Израиль отречеся позвавшаго его в вѣчную жизнь, а языци вѣровавъшая в небесное царство въведе. Овѣм паденье, соблазн, а странам вѣра, въстанье.
Днесь апостоли на жребя своя ризы възложиша, и Христос верху их сѣдя. Оле преславныя тайны явленье! Хрьстьяньския бо добродѣтели апостольския суть ризы, иже своим ученьем благовѣрныя люди престол Богови и вмѣстилище Святому Духу створиша: «Вселю бо ся, - рече, - в ня и похожю, и буду им Бог, и ти будуть мнѣ люди».
Днесь народи постилають по пути ризы своя, друзии же от древа рѣзаху вѣтвѣ постилаша.[124] Добр убо и прав миродержителем и всѣм вельможам Христос бысть, егоже милостынею и безлобьем постлавше, нетрудьно входять в небесное царство. Ломящеи же от древа вѣтви рядници суть и грѣшьници, иже скрушеным сердцемь и умилениемь душа, постом же и молитвами свой путь равняюще, к Богови приходять: «Аз бо, - рече, - есмь путь, истина и живот».
Днесь предъидущии и въслѣдующеи въсклицають, глаголюще: «Осана сыну Давыдову! Благословен грядый во имя Господне!» Предъидущеи же суть пророци и апостоли: они же преже прорицавше о Христовѣ пришествии, а си проповѣдавъше во всем мирѣ Бога пришедша и во имя его крестящеи народы. А въслѣдующеи святители суть с мученики: ови с еретики крѣпко по Христѣ борющеся и тѣх яко враги от церкве издрѣюще, си же до крове за имя Христово пострадавша и вся уметы створиша, въслѣд его текоша, да причастници будуть страсти его. Вси же «осана» възываху, рекуще: «Ты еси Сын Божий, въплотивыйся на земли, да Адама преступленьем падша въздвигнеши; благословенья дѣля и мы потщимъся добрая творити дѣла во имя Господне».
Днесь весь Иеросалим подвижеся въшествия ради Господня: старци быстро шествоваху, да Исусу яко Богу поклоняться; отроци скоро течаху, да и прославять о чюдеси Лазорева въскресения; младеньци, яко крилати окрест Исуса паряще, вопияху: «Осана сыну Давыдову! Благословен грядый во имя Господне! Бог Господь и явися нам!» Оле тайн откровение и пророческих писаний раздрѣшение! Старца бо язычьския намѣнуеть люди: преже бо Аврама и Израиля языци суть; тогда, прельщени, от Бога уклонивъшеся, нынѣ же Сыну Божию вѣрою покланяються. Образ же отрок всьчестьный, дѣвство любящий, отческый чин нарече, беспрестани славящим Христа и чюдеса Божиею благодатию сътворяющим. Младеньци же вся хрестьяны прообрази, иже ничтоже пытають о Христе, но о томь живуще и за того умирающе, и тому обѣты и молитвы въздающе.
Днесь Аньна и Каияфа негодуеть. Всѣм радость и вселье, сима же - скорбь и смущенье. Подобаше иерѣйску чину расудну быти и пророки пытати, егда се есть Христос, о немже заповѣда Ияков сыном своим, глаголя: «От племене твоего, Июдо, изидеть владыка небеси и земли, и тъ упование языком, привязая лозѣ жребя свое»; ни помянуша Давыда, о немже пророчьствова, глаголя: «Из уст младенець съсущих свершил еси хвалу», ни разумѣша Софонья чтуща, писавша тако: «Веселися, Еросалиме, и уравнай путь Богу твоему, яко придеть в церковь свою, творяй чюдеса и дая знамения», нъ свѣт творяху на благодателя, да не токмо Исуса, но и Лазоря погубять, и не хотѣша с народы глаголати тако: «Велий еси, Господи! Глас твой потрясе адова скровища и исторже от внутрениих душю умершаго, и изиде Лазарь паки на бытье спасен!»
Днесь тварь веселиться, свобожаема от работы вражья, и адьская врата и верея потрясошася и бѣсовьския силы ужасошася. Днесь горы и холми точать сладость, удолья и поля плоды Богови приносять, горнии въспѣвають и преисподняя рыдають, ангели ивяться, видящи на земьли невидимаго на небесѣх и на жребяти сѣдяща сущаго на престолѣ хѣрувимьстѣ, обиступаема народы неприступнаго небесным силам. Ныня младеньци радостно хвалим бываеть егоже серафими в вышних страхом славять. Ныне путь съшествуеть в Еросалим измѣривый пядью небо и землю дланью, в церковь входить невъмѣстимый в небеса.
Днесь старѣйшина жречьский гнѣваеться на творящаго великая чюдеса, книжници и фарисии дѣтем завидять, с вѣтми на срѣтенье Христу текущим и зовущим: «Осана сыну Давыдову!» Чудны вещи! Како забыша пророк, писавъших о Христѣ всяко нашего ради язычнаго спасения! «Уже бо, - рече, - нѣсть ми хотѣнья в сынѣх Израилевых, явѣ бых не ищющим мене и рку не людем моим: “Людье мои вы есте”».
Тѣмьже, братье, подобаеть нам, яжо Божиим сущим людем, възлюбившаго нас Христа прославити. Придѣте, поклонимъся ему и припадем, яко блудница, мыслено того пречистѣи лобызающе нозѣ; останем же ся, яко она, от злых дѣл; излѣем, якоже мюро на главу его, вѣру и любовь нашю; изыдем любовью, яко народи, в срѣтение ему и сломим гнѣводержание, яко и вѣтви; постелем ему, яко и ризы, добрыя дѣтели; въскликнем молитвами и безлобьем, яко младеньци, предъидем милостынями к нищим, вслѣдуем смирением, постом и бьдѣньем - и не погубим труда четырьдесятьдньвьняго поста, в няже подвизахомъся, очищающеся от всякоя скверны, да в нашь Иеросалим внидеть ныня Христос. Нашего бо телесе ставленье Иеросалим речеться, якоже Исая глаголеть: «На руку своею написах стѣны твоя, Иеросалиме, и вселюся посреде тебе».
Уготоваем, яко и горъницю, смѣрением душа наша, да причастием внидеть в ны Сын Божий и Пасху с ученики своими створить. Поидем с идущим на страсть волную, възмем крест свой претерпѣнием всякоя обиды, распьнѣмъся браньми к грѣху, умертвим похоти телесныя, въскликнем: «Осана в вышних! Благословен еси пришедый на муку волную, еюже ада попра и смѣрть побѣди!», доздѣ же слово окративше, пѣсньми, яко цвѣты, святую церковь вѣньчаем и праздник украсим; Богови хвалословление въслѣм и Христа, Спасителя нашего, възъвеличим, благодатью Святаго Духа осѣняеми, да радостьно праздновавше, в мирѣ достигнем тридневнаго въскресения Господа нашего Исуса Христа, емуже подобаеть всяка слава, честь, держава и покланяние с Отцемь и с пресвятымь и благымь и живоворящим Духомь всегда и ныня и присно и в вѣки.