Акафисты архиепископа Никона (Петина).
АКАФИСТ ВОЗНЕСШЕМУСЯ ОТ ЗЕМЛИ НА НЕБО ХРИСТУ БОГУ
Кондак 1
Восшедый на небеса и нас не разлучивыйся, по множеству Твоих щедрот услыши нас, вопиющих радостно: Пойте Богу нашему, пойте, пойте Цареви нашему, пойте!
Икос 1
Ангели ужасошася, егда пришел еси на гору Елеонскую, Господи, ученицы же предсташа Ти и трепетно возгласиша: Пойте людие, Сына ко Отцу восходящего. Пойте Его, человечество в небо возводящего. Пойте Его, радость мирови принесшего. Пойте Пастыря, заблудшее овча нашедшего. Пойте Богу нашему, пойте, пойте Цареви нашему, пойте!
Кондак 2
Видя, яко земля ныне ликует и небесная веселия исполняются о Вознесении Господа, победную песнь Ему поим: Яко прославися!
Икос 2
Разумом дивимся, смотряще Тя, Христе, носяща бо тело земное и восшедша на облак к небесным восходяща и вопием: Пойте, Христа, крест претерпевшаго, Пойте Его, из мертвых воскресшаго. Пойте Его, наше естество вознесшего, Пойте Его, в дар Отцу нас принесшего. Пойте Богу нашему, пойте, пойте Цареви нашему, пойте!
Кондак 3
Силою Божественною возродивый Апостолы, воззвал их на гору Масличную и тии, узрев со славою Твое Вознесение, веселием возопиша: Яко прославися!
Икос 3
Священное торжество приносит вся тварь Вознесению Твоему, Иисусе Спасе наш, и светло вопиет: Пойте, на облацех, яко на херувимех седящего. Пойте Его, яко солнце, славою светящего. Пойте Его, смерть умертвившего. Пойте Его, нас освятившего. Пойте Богу нашему, пойте, пойте Цареви нашему, пойте!
Кондак 4
Мир учеником Твоим даровавый, той и нам богато ниспосли, Иисусе, яко да согласно поем песнь: Яко прославися!
Икос 4
Свет от Света сущий, облак светел подъят Тя, ученицы же зряще Тя со славою возносящегося, радостно восхвалиша Тя: Пойте Господа, небеса прошедшего. Пойте Его, к нам человеколюбно снизшедшего. Пойте Его, утешение пославшего. Пойте Его, от гроба восставшего. Пойте Богу нашему, пойте, пойте Цареви нашему, пойте!
Кондак 5
Всяк язык да вопиет днесь в воскликновении: Христос взыде на небеса, отонуду же и сошел еси, Яко прославися!
Икос 5
Всяческая ныне славою исполняются, яко Господь возсел одесную Отца, сего ради неизменно поем: Пойте Иисуса, Пастыря чудного. Пойте Его, Премудрого. Пойте Его, мир обновившего. Пойте Его, Божество и человечество в Ипостаси Своей Соединившего. Пойте Богу нашему, пойте, пойте Цареви нашему, пойте!
Кондак 6
Мир весь видимый и невидимый, Ангели и человецы непрестанно славят Вознесение Твое с песнию: Яко прославися!
Икос 6
Апостоли взыграшася, зряще на высоту Спасителя вземлема и скорбь оставиша, со страхом и веселием взываху: Пойте Господа, с плотию восходящего. Пойте поклонение приявшего. Пойте от скорби нас избавившего. Пойте вере нас наставившего. Пойте Богу нашему, пойте, пойте Цареви нашему, пойте!
Кондак 7
Согласно восшумим песнь Христу Богу, яко взыде Ходатаем за нас от земли на небо. Ангели, архангели, возопите с нами: Яко прославися!
Икос 7
Ангельски в мире торжествуем, яко солнцу Иисусу восходящу светло воспоем: Пойте Его, светом невечерним сияющего. Пойте Его, дущу озаряющего. Пойте Его, скорбь в радость претворяющего. Пойте Его, в обители райския нас вселяющего. Пойте Богу нашему, пойте, пойте Цареви нашему, пойте!
Кондак 8
Да каплет свыше облако веселие вечное и напояет жаждущую душу водами благочестия с верою взывающих: Яко прославися!
Икос 8
Услышавше, яко рай отверзеся нам чрез Вознесение Твое, вопием: Пойте Господа, нас искавшего. Пойте Его, нас всех спасшего. Пойте Его, нас в други Себе принявшего. Пойте Его, бессмертие даровавшего. Пойте Богу нашему, пойте, пойте Цареви нашему, пойте!
Кондак 9
Горнии силы естество наше зряще на небеси, дивящеся страннаго образа восходу, видяще же своего Владыку и Господа, возопиша: Яко прославися!
Икос 9
Ходатая нашего, с плотию в вышних видяще, согласно вопием: Пойте Его снисхождение. Пойте Его долготерпение. Пойте Его Воскресение. Пойте Его Вознесение. Пойте Богу нашему, пойте, пойте Цареви нашему, пойте!
Кондак 10
Воспоим вси людие со славою Вознесшагося Господа и одесную Отца нас спосадившего, победную песнь: Яко прославися!
Икос 10
Видя своего Владыку и Господа на облацех носима, Апостоли возопиша: не остави нас сирых, Господи! Но Божьего Сына познавше и обещание Духа Святаго приявше, возгласиша: Пойте Господа, Отцу Единосущна. Пойте Его, присно Суща. Пойте Его, Бога неизменнаго. Пойте Его, Человека совершеннаго. Пойте Богу нашему, пойте, пойте Цареви нашему, пойте!
Кондак 11
Зряще Твое Вознесение, Христе, воспеваем Твой светообразный Лица зрак и, славяще Тя, песнь победную вопием: Яко прославися!
Икос 11
Почто червлены ризы Твоя, Господи? - Бесплотнии силы трепетно вопрошаху, дело же милосердия Божьего познавающе, радостно взываху: возьмите врата, прииде бо Христос, Тело земное нося, страстию Своею тварь на земли спасе, тем же и человеков звати приглашаху: Пойте Господа до смерти нас возлюбившего. Пойте Его, от мучения вечнаго исхитившего. Пойте Его, за грехи мира не погубившего. Пойте Его, небесных и земных воедино соединившего. Пойте Богу нашему, пойте, пойте Цареви нашему, пойте!
Кондак 12
Предсташа Ангели Апостолом, зрящим Вознесение Иисуса, рекоста: Что стоите, зряще на небо? Им же образом видите Христа восходяща с плотию, паки приидет судити мир, Яко прославися!
Икос 12
Приидите, воспрянем вси и в горняя очи и мысли возведем, на Елеонскую гору востечем, тамо бо Господь, Апостолы утешая, рече: не разлучаюся с вами, но всегда пребываю; Аз есмь с вами и никто же на вы. Они же воспеша: Пойте смерти Победителя. Пойте нашего Искупителя. Пойте возлюбленнаго Учителя. Пойте всех человеков Спасителя. Пойте Богу нашему, пойте, пойте Цареви нашему, пойте!
Кондак 13
О, великая тайна, о, чудо преславное! Всеми владычествуяй, Господь сил и Учитель наш, от земли к небесным отходя, Духа Святаго послати учеником обеща, и тии с радостию возвратишася во Иерусалим, пребывая всегда в храме и радостно поя песнь победную: Яко прославися!