Златоустъ: вся́къ ли человѣ́къ о́тъ Бога обогаща́ется ?
Аще кто́ отъ ра́ти, или́ отъ разбо́я, и отъ татьбы́ и отъ непра́вды и грабле́нія, мзды́, и рѣзоима́нія, и отъ наси́лія собра́ бога́тство, ка́ко мо́жетъ рещи́, я́ко о́тъ Бога прія́хъ? Но то́ лука́вое собра́ніе е́сть на па́губу души́.
Но а́ще кто́ отъ пра́выя жи́зни обогатѣ́лъ е́сть, я́коже Іовъ, и Авра́амъ, и про́чіи отъ своего́ труда́, мо́гутъ со Іовомъ рещи́: Госпо́дь да́лъ е́сть.
Все́ бо имѣ́ніе непра́вое извѣ́ется, собира́яй бо о́ное, ины́мъ собира́етъ, а не себѣ́. Добро́ е́сть бога́тство, въ не́мъ же грѣха́ нѣ́сть. Рече́ Госпо́дь: Азъ е́смь любя́й пра́вду, и ненави́дяй грабле́нія и непра́вды (Ис.61,8). Аще ли Бо́гъ пра́вда, то не имѣ́йте непра́вды, и да не бу́детъ ти́ отъ чужди́хъ имѣ́ніе.
Аще ти́ нѣ́сть отъ сле́зъ бога́тство, и а́ще нѣ́сть никто́ при твое́й сы́тости взалка́лъ, а́ще нѣ́сть никто́ при твое́мъ оби́ліи постона́лъ, то́ Бо́жій е́сть хлѣ́бъ, таковы́й пра́веденъ е́сть пло́дъ и ми́ренъ кла́съ. Аще кто́ пра́вое раздае́тъ имѣ́ніе не иму́щимъ, то́й пріи́метъ стокра́тное воздая́ніе о́тъ Бога.
Аще же оста́витъ за собо́ю, то́ въ му́ку осу́дится. Ему́ же отъ того́ нѣ́сть ничто́ же бла́га, я́вѣ о нѣ́мъ спасе́нію вину́, своя́ труды́ оста́вивъ, а са́мъ себѣ́ окая́нный ничто́ же помо́же. До́брѣ Соломо́нъ рече́: я́ко непра́вдою имѣ́ніе собира́яй, и не ми́лующій убо́гія, себѣ́ му́ку вѣ́чную наси́лія ра́ди собира́етъ. Не ми́луя убо́гія, себѣ́ му́ку, а ино́му отда́ніе.
Въ четверто́къ 1-я недѣ́ли поста́, на слова́ изъ кни́ги проро́ка Агге́я: «Мое́ зла́то, и Мое́ е́сть сребро́»