Златоустъ прямо въ точку: иго другое нашу Россію душитъ какъ зверь!
Мно́гу печа́ль и́мамъ въ се́рдцѣ свое́мъ ва́съ ра́ди, ча́да моя́, поне́же ви́жу вы́ ника́коже премѣни́вшася отъ дѣ́лъ свои́хъ неподо́бныхъ...То́ ка́ко утѣ́шуся, ви́дя вы́ о́тъ Бога отлу́чьшася и удали́вшася отъ до́брыхъ дѣ́лъ? Ка́ко обра́дуюся, сѣ́явъ до́брое сѣ́мя въ сердца́ ва́ша, Боже́ственнаго Писа́нія словеса́, и николи́же ва́съ ви́жу прозя́бша и плода́ добра́ породи́вша?
Но молю́ вы́, бра́тіе и сы́нове, преста́ните отъ уны́нія, и обнови́теся до́брымъ обновле́ніемъ, преста́ните зла́я творя́ще, убо́йтеся Сотво́ршаго вы́, вострепещи́те суда́ стра́шнаго. Къ Кому́ гряде́мъ, и къ Кому́ приближа́емся отходя́ще свѣ́та сего́? Что́ рече́мъ и что́ отвѣща́емъ? Стра́шно бо е́сть, ча́да, впа́сти въ ру́цѣ Бо́га жи́ва!
Или́ не ви́димъ, что́ въ се́мъ житіи́ пріиде́ на ны́? И еще́ каковы́ о́тъ Бога на себе́ ка́зни не приведо́хомъ? Не плѣне́на ли бы́сть земля́ на́ша, и не взя́ти ли бы́ша гра́ды на́ша? Отцы́ же и бра́тія на́ша, не вско́рѣ ли тру́піемъ на́ землю падо́ша? Жены́ же и ча́да на́ша не веде́ны ли бы́ша въ плѣ́нъ, въ чужíя зе́мли? А оста́вшіяся, не порабоще́ни ли бы́хомъ отъ иноплеме́нникъ? Се́ уже́ ко сту́ лѣ́тъ приближа́емся, томле́нія, и му́ки, и да́ни тя́жки на ны́ не престаю́тъ; гла́ды же и мо́рове не то́кмо на́мъ, но и ското́мъ на́шимъ нахо́дятъ. Въ сла́дость хлѣ́ба своего́ изъя́сти не мо́жемъ, воздыха́ніе на́ше и печа́ль су́шитъ ко́сти на́ша.
Кто́ же ны́ до сего́ доведе́? Вѣ́сте и са́ми, что́ на́ше беззако́ніе и грѣси́, на́ше непослуша́ніе и непокоре́ніе. Молю́ вы, бра́тіе, вни́дите въ ра́зумы ва́ша ко́ждо ва́съ, и узри́те серде́чныма очи́ма дѣ́ла ва́ша зла́я, возненави́дите и отве́ржите и́хъ отъ себе́, и къ покая́нію притеци́те. Тогда́ и гнѣ́въ Бо́жій утоли́тся, и ми́лость Госпо́дня изліе́тся на ны́, и казни́ми бу́дутъ томя́щіи на́съ. Мы́ же въ ра́дости здѣ́ поживе́мъ, и по отше́ствіи сего́ свѣ́та въ весе́ліе пре́йдемъ, а́ки ча́да ко Отцу́ и Бо́гу своему́, и Ца́рствіе небе́сное наслѣ́димъ, его́ же ра́ди о́тъ Бога со́здани бы́хомъ...
Во вто́рникъ 1-я недѣ́ли поста́, поуче́ніе свята́го Іоа́нна Златоу́стаго «да преста́немъ отъ грѣ́хъ на́шихъ».
Click to view