Молитвословия новопреподобномученику Дионисию (Петушкову)
Выкладываю в «Уставные заметки» молитвословия (тропарь, кондак, икос и молитву) святому преподобномученику Дионисию (Петушкову), подвижнику Нило-Столобенской пустыни (†1931). Тексты написаны по просьбе комиссии Тверской епархии по богослужению и канонизации святых.
Ме́сяца ма́ия в 28-й день
Свята́го преподобному́ченика Диони́сия [иеро*]схимона́ха, Столобе́нскаго
Тропа́рь, глас 3:Ми́ра су́етная и пре́лестная оста́вив, / в кров преподо́бнаго Ни́ла / я́ко в ти́хую при́стань спасе́ния / всели́лся еси́, о́тче Диони́сие, / егда́ же прии́де на тя час испыта́ния неча́яннаго, / кро́ви своя́ я́ко же́ртву чи́сту / Го́сподеви прине́сл еси́, страда́льче. / Ны́не же, Пресвяте́й Тро́ице предстоя́, / помина́й нас, чту́щих па́мять твою́, // преподобному́чениче присносла́вне.
Конда́к, глас то́йже:Днесь Нил преподо́бный / срета́ет во Ца́рствии Небе́снем / еди́наго от и́стовых учени́к свои́х / и та́ко ему́ глаго́лет: / о ча́до Диони́сие! / до́бре подвиза́лся еси́ / и до́бре увенча́лся еси́, / и ны́не вни́ди в ра́дость Го́спода на́шего, / да ку́пно с тобо́ю / моли́твы на́ша принесе́м // о и́же на земли́ любо́вию нас почита́ющих.
И́косЛику́ет днесь первопресто́льный град Москва́, мо́щи сокрыва́ющи в не́дрех свои́х преподо́бнаго страда́льца Диони́сия, ра́дуется и́же на е́зере Столо́бнем оби́тель и́ноческая, по́двиги его́ преподо́бническими освяще́нная, вся же земля́ Ру́сская лику́ет, пе́сненными хвалы́ увенча́ющи но́ваго преподобному́ченика, ка́плями крове́й свои́х я́ко драги́ми ка́меньми и многоце́нными би́серы украси́вшаго ду́шу свою́, сме́ртию за Христа́ житие́ по́стническое увенча́вшаго и ны́не непреста́нно моля́щагося о и́же на земли́ любо́вию его́ почита́ющих.
Моли́тваО добропобе́дне му́чениче Диони́сие, оби́тели Столобе́нския похвало́, [ве́си Схо́дненския** ра́дование,] град Москву́ мощьми́ свои́ми освяти́вый! Ты, о́тче преподо́бне, я́же в ми́ре тле́нная и скоропреходя́щая отри́нув, под кров преподо́бнаго чудотво́рца Ни́ла во оби́тель Столобе́нскую прите́кл еси́, иде́же до́бре во и́ночестем зва́нии, последи́ же и во святе́й схи́ме подвиза́лся еси́. Егда́ же обита́лище и́ноческое разоре́но бысть гони́тели безбо́жными, тогда́, не восхоте́в обе́тов свои́х отреши́тися, житию́ по́стническому и де́ланию моли́твенному в ма́лей хра́мине на селе́ христолю́бца не́коего преда́лся еси́ и та́ко по́двиги своя́ преподо́бническия, а́ще и оби́тели твое́й разоре́нней бы́вшей, па́ки я́коже пре́жде проходи́л еси́. Зли́и же челове́цы, и́же в сердца́х свои́х глаго́лаша, я́ко несть Бог, и в де́лех сие́ безбо́жие пока́зоваша, па́ки гоне́ние возвиго́ша на тя, я́ко и во узи́лище вверго́ша тя и сме́рти потае́нно преда́ша тя. Но не возмого́ша ти́и сокры́ти свет Христо́в, и́мже сам осия́нный, ты пре́жде осиява́л еси́ приходя́щия к тебе́ и ста́рческаго окормле́ния ча́ющия, ны́не же и на ны, моли́твенно взыва́ющия к тебе́, низпосыла́еши. Си́ми по́двиги и са́мою му́ченическою сме́ртию дерзнове́ние стяжа́вый пред Влады́кою Христо́м, И́же отве́рзе тебе́ врата́ ра́йския, и ны́не предста́тельствуй пред Ним о призыва́ющих тя и святы́я по́мощи твоея́ ча́ющия. Не оста́ви, святы́й ста́рче Диони́сие, нас, во мра́це грехо́внем пребыва́ющих, оба́че изы́ти к пачеесте́ственному све́ту Бо́жию жела́ющих, и бу́ди нам до́брый путево́ждь, е́же и нам доити́ до све́тлых о́ных оби́телей, иде́же ты ку́пно со преподо́бным отце́м на́шим Ни́лом и все́ми про́чими святы́ми уго́дники Столобе́нскими пребыва́еши и неумо́лчно хода́тайствуеши о прося́щих заступле́ния твоего́, да и мы со све́тлым сим ли́ком богоугоди́вших муже́й воспое́м и просла́вим Пресвяту́ю и Живонача́льную Тро́ицу, Отца́ и Сы́на и Свята́го Ду́ха, в безконе́чныя ве́ки веко́в. Ами́нь.
* В следственном деле (ГАРФ, ф. 10035, оп. 1, д. П-60406) прпмч. Дионисий именуется схимником, иеромонахом или иеросхимонахом, однако документальных подтверждений его хиротонии не найдено.
** Прпмч. Дионисий был расстрелян по делу «Сходненского филиала нелегальной к/р церковно-монархической организации “Истинных Христиан”», поскольку непоминающие жители Сходни обращались к нему за старческим окормлением. Поэтому в Химкинском округе (на территории которого находится Сходня) св. Дионисий почитается как один из Небесных покровителей, хотя сам он в земной жизни в Сходне не бывал.