Святые новомученики Петр и Прохор Гнездовские
К приближающейся памяти (6 / 19 апреля) святых мучеников Петра (Жукова) и Прохора (Михайлова) Гнездовских (†1918) выкладываю в «Уставные заметки» тропарь, кондак и молитву им, написанные по просьбе комиссии Тверской епархии по богослужению и канонизации святых.
Апри́ллиа в 6-й день
Святы́х му́чеников Петра́ и Про́хора Гнездо́вских
Тропа́рь, глас 4:Я́рость мучи́тельская возгоре́ся на вас, / му́ченицы добропобе́днии, / егда́ лю́дие обезу́мевшии, / Бо́га в сердца́х свои́х отве́ргшия, / ру́ки своя́ подъя́ша на вас, / не терпя́ще слове́с ва́ших обличи́тельных, / на злы́я святота́тцы изрече́нных. / Те́мже кро́ви своя́ пролия́ша / ра́ди А́гнца Бо́жия, за ны закла́ннаго, / и ко избра́нным Его́ причто́шася, / Пе́тре и Про́хоре приснопа́мятнии, / мы же те́пле мо́лим вас: / предста́тельствуйте о нас пред Го́сподем, / да ре́вности ва́шей подража́ем / и до́бре Го́сподеви послу́жим, // я́ко да с ва́ми ку́пно Престо́лу Бо́жию предста́ти.
Конда́к, глас 5:Житие́ свое́ до́бре провожда́я, / примета́тися к до́му Госпо́дню изво́лили есте́, / доброслове́снии Пе́тре и Про́хоре, / и вре́мени прише́дшу гони́тельну, / глас свой возвы́сиша е́же обличи́ти разори́тели хра́мов Бо́жиих. / Те́мже и страда́ньми да́же до сме́рти / венцы́ нетле́нныя приобрето́ша, му́ченицы сла́внии, // и о нас у Престо́ла Вседержи́телева предста́тельствуете.
Моли́тваО всехва́льнии му́ченицы, сла́во и красото́ Це́ркве Ру́сския, страда́льцы добропобе́днии Пе́тре и Про́хоре! Ублажа́ем ре́вность ва́шу о До́ме Госпо́дни, воспева́ем кре́пость ва́шу и му́жество, почита́ем терпе́ние мук и до сме́рти стоя́ние, восхожде́нию в Небе́сный Град удивля́емся. Вы, лю́дие про́стии и некни́жнии, оба́че усе́рдие ко Олтарю́ Госпо́дню иму́щии, гла́сы своя́ возвы́сиша проти́ву разори́телей хра́мов Бо́жиих, о зако́не Боже́ственнем и челове́честем свиде́тельствуя пред но́выми беззако́нники. Мо́лим вас ны́не усе́рдно: укрепи́те нас в век сей лука́вый и развраще́нный, е́же не отлуча́тися нам от двора́ Госпо́дня, но притека́ти к же́ртвенником Госпо́дним на всяк день, е́же бы́ти нам ве́рными ча́дами Па́стыря овца́м Вели́каго, Го́спода на́шего Иису́са Христа́, ре́кшаго, я́ко врата́ а́дова не одоле́ют Це́ркве Его́, Им зи́ждемыя и от Него́ иму́щия си́лу и кре́пость. И я́коже вы, святи́и му́ченицы, Сло́вом Госпо́дним ду́ши своя́ напита́вшии и от Святы́я Евхари́стии к ве́чности насы́щеннии, та́ко да пребу́дем и мы зде на земли́ неизме́нно во огра́де церко́вней, по исхо́де же от жи́зни вре́менныя предста́тельством ва́шим о десну́ю страну́ ку́пно с ва́ми да ста́нем и единогла́сно с челове́ки святы́ми и беспло́тными А́нгелы воспое́м трисвято́ю хвало́ю Присносу́щнаго Бо́га, Отца́ и Сы́на и Свята́го Ду́ха, в бесконе́чныя ве́ки веко́в. Ами́нь.