Служба святителю Георгию (Конисскому)
Расплачиваюсь, наконец, с одним из старых долгов. Понимаю, что невозможно затянул, но руки дошли только сейчас. Выходные данные оригинала здесь. В скан внесена лёгкая правка соответственно тексту, употребляемому сейчас в Белорусской Православной Церкви.
Служба святителя Георгия, архиепископа Могилевскаго и Белорусскаго
НА МАЛОЙ ВЕЧЕРНИ
На Господи, воззвах: стихиры на 4, глас 6:Весь освящен богоносец показася, помазание Божие святое, Святым Духом обложен и светло входя выну во святая святых, богоначальными светлостьми озаряемь, благодати причащаяся Святых Таин, яко истинный святитель преславен, со дерзновением моляся о душах наших.
Просветися житие твое добродетельными светлостьми, верныя просветил еси, лести тьму разгнал еси, истинное бо явился еси светозарное солнце, святителю преблаженне Георгие, и ныне вселился еси, идеже свет сияет невечерний, и сын дне благодатию Духа Святаго быв. Темже твою божественную память и светоносную честно совершающе, приснопамятне, любовию почитаем.
Ум твой мановением еже к Богу, богомудре, верою удобряемь, светел явися славне, в мертвеннем теле и тленнем, премудре, нетлению поучився, притяжал еси бесплотных светлости, и страстей вне быв, безстрастием украшаяся, Георгие, отче святителю премудре, светлый светильниче, и молитвенниче о чтущих любовию память твою.
Слава, глас 8:Доблести твоими, преподобне отче, плод просветил есть верных сердца: кто бы слыша безмерное твое смирение, терпению не удивился, еже к нищим тихости, к скорбящим утешению. Вся боголепно научил еси, святителю Георгие, и ныне неувядаемым венцем увязлся еси: молися о душах наших.
И ныне, Богородичен, глас тойже:Кров Твой, Богородице Дево, врачество есть духовное: вонь бо прибегающе, от душевных недуг избавляемся.
На стиховне стихиры, глас 8:Святителю Георгие, разумнаго света заре, церковное светило, святительская красото, иноческаго постнаго жития истое правило: нам же заступник явился еси, свобождая от губителя врага души наша.
Стих: Честна пред Господем смерть преподобных Его.
Святителю Георгие, великую власть от Бога приял еси, множество лукавых бесов молитвою твоею отгнал еси, и сих озлобления от всех верою к тебе прибегающих.
Стих: Что воздам Господеви о всех, яже воздаде ми.
Святителя великаго Георгия, како достойно воспоем, честнаго ума богозарнаго света, освящающаго нас, и божественный разум подающаго таин глубинных исповедателя, согласно вси рцем: радуйся, отче отцев Георгие.
Слава, глас 8:Ты еси пастырь добрый и учитель теплый, святителю Георгие, тя всегда похваляюще вопием: тобою Бог украси Церковь Свою, и тело твое многолетно покровенное в земли, нетленно яви людем Своим, темже не престай моляся о хвалящих тя, и чтущих память твою, проси оставление грехов и спасения душам нашим.
И ныне, Богородичен, глас тойже:Владычице, приими молитву раб твоих, и избави нас от всякия нужды и печали.
Тропарь, глас 3:Столп Православия и учитель благочестия был еси, святителю отче Георгие, многи скорби и гонения претерпел еси, богомудре, паству свою управляя. Ко спасению всех наставил еси. Церкве Белорусския похвало и града Могилева украшение, моли Христа Бога, да утвердит отечество наше в благочестии и спасет души наша.
Слава, и ныне, Богородичен, глас тойже:Тя ходатайствовавшую спасения рода нашего, воспеваем, Богородице Дево: плотию бо от Тебе восприятою Сын Твой и Бог наш, крестом восприим страсть, избави нас от тли, яко Человеколюбец.
НА ВЕЛИЦЕЙ ВЕЧЕРНИ
На Господи, воззвах: стихиры на 8, глас 8:Да возвеселится днесь земля Белорусская, наста бо пресветлый день прославления святителя и чудотворца Георгия: да радуются насельницы сея страны, имея славнаго угодника Божия. Да возрадуются горы и холми, дебри и долины, восхваляюще Господа, давшаго нам святаго покровителя, неперестанно молящагося о спасении душ наших.
Днесь светло красуется славный град Могилев на Днепре, святостию жития твоего, святителю Георгие, и паства твоя ликовствующи радуется, и вернии твоим просвещением, блаженне, хвалятся. Ты же, отче наш Георгие, моли человеколюбца Христа Бога нашего людем православным тишину даровати, и земли плодородие, и велию милость.
Приидите, православных собори, воспоим святителя Георгия, учением к богоразумию нас наставльшаго, источника чудес предивнаго, Церкве светильника пресветлаго, учителя премудраго, той бо избавляет нас от всяких искушений и бед и молится о душах наших.
Песньми священными восхвалим святителя Георгия, от Киево-Печерския лавры благословение Белой Руси принесшаго, и Православие в ней защитившаго, той бо со всеми святыми земли Белорусския молится Господеви спастися душам нашим.
Ты еси слава града Могилева, святителю Христов Георгие, ты еси украшение Белорусския земли, похвало Церкви Православныя, в ней же процвел еси яко крин благодатный, возсиял еси яко святитель пресвелый, со всеми святыми молися ко Господу спастися душам нашим.
Слава, глас 8:Да возвеселится днесь земля Белорусская, наста бо пресветлый день прославления святителя и чудотворца Георгия: да радуются насельницы сея страны, имея славнаго угодника Божия. Да возрадуются горы и холми, дебри и долины, восхваляюще Господа, давшаго нам святаго покровителя, неперестанно молящагося о спасении душ наших.
И ныне, Богородичен догматик, глас тойже:Царь Небесный за человеколюбие на земли явися, и с человеки поживе: от Девы бо чистыя плоть приемый, и из Нея прошедый с восприятием, един есть Сын, сугуб естеством, но не ипостасию. Тем же совершенна Того Бога, и совершенна человека воистинну проповедающе, исповедуем Христа Бога нашего. Его же моли, Мати безневестная, помиловатися душам нашим.
Вход. Прокимен дне. Чтения три.
Притчей чтение (главы 10, 3 и 8):Память праведнаго с похвалами, и благословение Господне на главе его. Блажен человек, иже обрете премудрость, и смертен, иже уведе разум. Лучше бо сию куповати, нежели злата и сребра сокровища. Честнейшая же есть камений многоценных, все же честное недостойно ея есть. Долгота бо дней и лета живота в деснице ея, в шуйце же ея богатство и слава; от уст ея исходит правда, закон же и милость на языце носит. Послушайте убо мене, о чада! честная бо реку, и блажен человек, иже пути моя сохранит, исходи бо мои - исходи живота, и уготовляется хотение от Господа. Сего ради молю вас и предлагаю мой глас сыновом человеческим, яко аз, премудрость, устроих совет, и разум и смысл аз призвах. Мой совет и утверждение, мой разум, моя же крепость. Аз мене любящия люблю, ищущии же мене обрящут благодать. Разумейте убо, незлобивии, коварство, ненаказаннии же, прилагайте сердца. Послушайте мене и паки, честная бо реку, и отверзу от устен правая, яко истине поучится гортань мой, мерзки же предо мною устны лживыя. С правдою вси глаголы уст моих, ничтоже в них стропотно, ниже развращенно. Вся права суть разумевающим, и проста обретающим разум. Научаю бо вас истине, да будет о Господе надежда ваша, и исполнитеся Духа.
Премудрости Соломоновы чтение (главы 10, 6, 8 и 9):Уста праведнаго каплют премудрость, устне же мужей мудрых ведят благодать. Уста мудрых поучатся премудрости, правда же избавляет их от смерти. Скончавшуюся мужу праведну, не погибнет надежда. Сын бо праведен раждается в живот: и во благих своих плод правды обымет. Свет праведным всегда, и от Господа обрящут благодать и славу. Язык мудрых добрая свесть, и в сердце их почиет мудрость. Любит Господь преподобная сердца, приятни же Ему вси непорочнии в пути. Мудрость Господня просвещает лице разумнаго. Постигает бо желающия ю, прежде даже разумети ю, и удобь узрится от любящих ю. Утреневавый к ней не утрудится: и бдяй ея ради, вскоре без печали будет. Яко достойных ея сама обходит, ищущи, и во стезях ея является им благоприемне. Мудрости никогда же одолеет злоба. Сих ради и рачитель бых доброты ея, и возлюбих ю, и поисках от юности моея. И взысках невесту привести себе, яко всех Владыка возлюби ю, таинница бо есть Божия хитрости и обретательница дел Его. Труды ея суть добродетели, целомудрию же и разуму та учит, правде и мужеству, ихже потребне ничтоже есть в житии человеком. Аще же и многаго искусства желает кто, весть древняя и быти хотящая разсмотрит. Свесть извития словес и разрешения гаданий, знамения и чудеса проразумеет и сбытия времен и лет, и всем советник есть благ, яко безсмертие есть в ней и благославие во общении словес ея. Сего ради беседовах ко Господу, и помолихся Ему, и рех от всего сердца моего: Боже отцев и Господи милости, сотворивый вся словом Твоим и мудростию Твоею устроивый человека, да владеет бывшими от Тебе тварьми и да управляет мир в преподобии и правде. Даждь ми Твоих престолов приседящую премудрость и не отлучи мене от отрок Твоих, яко аз раб Твой и сын рабыни Твоея. Посли ю с небес от святаго жилища Твоего и от престола славы Твоея, да, сущи со мною, научит мя, что благоугодно есть пред Тобою. И наставит мя в разум, и сохранит мя в славе своей. Помышления бо смертных вся боязлива и погрешительна умышления их.
Премудрости Соломоновы чтение (главы 4, 6, 7 и 2):Похваляемому праведнику возвеселятся людие: безсмертия бо есть память его, яко от Господа познавается и от человеков, и угодна Господу душа его. Возлюбите убо, о мужие, мудрость и поживете, восхощите Ея и наказани будете. Начало бо Ея любы, и соблюдение закона. Почтите Премудрость, да во веки царствуете. Возвещу вам и не скрыю от вас тайн Божиих. Яко Той мудрости Наставник есть, и мудрых Исправитель, и всякому смыслу и делу Хитрец. И всем смыслом научит Мудрость, есть бо в ней Дух разумен и свят, и сияние Света Присносущнаго, и Образ благости Божия. Тая други Божия и пророки устрояет. Благолепнейши же есть солнца и паче всякаго сотворения звезд, свету сосуждаема, обретается первейши. Тая угождающия Ей от болезни избави и настави на стези правыя. Даде им разум имети свят и сохрани я от ловящих, и подвиг крепок подаде им. Да разумеют вси, яко сильнейши всего есть благочестие, и никогдаже преможет злоба мудрости, ниже прейдет злыя, обличающи суд. Рекоша же в себе, помысливше неправедно: насильствуем праведному, не пощадим преподобства его, ни усрамимся седин старости многолетны. Будет бо нам крепость закон, и уловим праведнаго, яко неугоден нам есть, и противится делом нашим, и поносит нам отпадение закона, и обличает нам согрешения наказания нашего. Возвещает нам разум имети Божий и отрока Господня себе именует. Бысть нам на обличение помышлений наших, и тяжек нам есть, и видимь яко неподобно иным житие его и изменены стези его. В поругание вменихомся ему, и удаляется от путей наших, яко от нечистот, и блажит последняя праведных. Увидим убо, аще словеса его истинна суть, искусим, яже сбываются ему. Руганием и мукою истяжем его, да разумеем кротость его и искусим беззлобство его, смертию безобразною осудим его, будет бо посещение от словес его. Сия помыслиша и прельстишася, ослепи бо я злоба их, и не разумеша таин Божиих, и не разсудиша, яко Ты еси Бог Един, живота имеяй и смерти власть, и спасаяй во время скорби, и избавляяй от всякаго зла. Щедр, и милостив, и даяй преподобным Своим благодать, и Своею мышцею гордым противляяйся.
На литии стихиры, глас 6:Днесь наста солнца светлейший праздник прославления святителя Георгия, иже верныя к веселию созывает, и лучами радости всех просвещает. В нем бо явися слава Христова, слава Церкви Православныя, дивными сияющи чудесы. Темже, вернии, любовию вопием: молися о нас, святителю Христов, Георгие.
Слава и ныне, глас 8:Да радуются радостию божественною насельницы Белорусския страны, зряще теплую Заступницу, дивную победу дарующу на противныя, и да поют божественными песньми.
На стиховне стихиры, глас 8:Святителю Георгие, разумнаго света заре, церковное светило, святительская красото, иноческаго постнаго жития истое правило: нам же заступник явился еси, свобождая от губителя врага души наша.
Стих: Честна пред Господем смерть преподобных Его.
Святителя великаго Георгия, како достойно воспоем, честнаго ума богозарнаго света, освящающаго нас, и божественный разум подающаго таин глубинных исповедателя, согласно вси рцем: радуйся, отче отцев Георгие.
Стих: Что воздам Господеви о всех, яже воздаде ми.
Святителю Георгие, великую власть от Бога приял еси, множество лукавых бесов молитвою твоею отгнал еси, и сих озлобления от всех верою к тебе прибегающих.
Слава, глас 7:Приидите ублажим пастыря добраго земли нашея, за веру вся претерпевшаго, и за Православие и отечество душу свою полагавшаго, и ныне милостию Божию чудотворца, явленнаго во утверждение веры немощствующих и во упокоение озлобленных грехи многими, да вси возрадуемся и да поем ему: радуйся, любы, нас согревающая; радуйся, сило, нас исцеляющая; радуйся, разуме, всех просвещаяй; радуйся, страже, Православие наше охраняяй; радуйся, святителю Георгие.
И ныне, Богородичен, глас тойже:Под кров Твой, Владычице, вси земнороднии прибегающе, вопием Ти: Богородице упование наше, избави нас от безмерных прегрешений и спаси души наша.
Тропарь, глас 3:Столп Православия и учитель благочестия был еси, святителю отче Георгие, многи скорби и гонения претерпел еси, богомудре паству свою управляя. Ко спасению всех наставил еси. Церкве Белорусския похвало и града Могилева украшение, моли Христа Бога, да утвердит отечество наше в благочестии и спасет души наша.
НА УТРЕНИ
На Бог Господь: тропарь, глас 3.
Слава, тропарь, глас 4:Приспе день светлаго торжества, град Могилев радуется, и с ним вси людие православнии ликовствуют пеньми и песньми духовными: днесь бо священное торжество в прославлении святителя и чудотворца Георгия, якоже солнце незаходимое возсия светозарными лучами, разгоняя тьму искушений и бед от вопиющих верно: спасай нас, яко предстатель наш, великий Георгие.
И ныне, Богородичен, глас 4:Еже от века утаеное и Ангелом несведомое таинство, Тобою, Богородице, сущим на земли явися Бог, в неслитном соединении воплощаемь, и Крест волею нас ради восприим, имже воскресив первозданнаго, спасе от смерти души наша.
По 1-м стихословии седален:Приидите, вернии, ублажим учителя нашего, иже в жизни своей нас наставляя, по смерти же назирая, печется яко пастырь добрый о душах наших.
Слава, и ныне, Богородичен:Под Твое предстательство прибегаем, Богородице Дево, и на Тя все упование наше возложивше, молим ходатайствовати за нас у престола Сына Твоего теплыми Твоими молитвами.
По 2-м стихословии седален:Святителю Георгие, моли человеколюбца Бога, да избавит нас от всяких бед и напастей, и да дарует нам живот вечный.
Слава, и ныне, Богородичен:Богородице Дево, упование христиан, покрый и соблюди нас Твоими к Сыну Твоему и Богу молитвами, от всякой нужды и печали.
По полиелеи седален, глас 8:Твое заступление получивше, святителю Георгие, благодарни есмы душею и сердцем и молим тя усердно: подкрепи нашу веру к Богу и настави нас на стезю Его заповедей, да богоугодно поживше в веце сем, наследуем блаженство праведных.
Слава, и ныне, Богородичен:Владычице милостивая, моли Сына Твоего о нас грешных, да избавимся вечныя тли и всякия скорби, и да получим вечная благая: вся бо можеши, елика хощеши.
Степенна, 1-й антифон 4-го гласа.Прокимен, глас 1: Уста моя возглаголют премудрость, и поучение сердца моего разум. Стих: Услышите сия, вси языцы, внушите, вси живущии по вселенней.
Всякое дыхание: Евангелие от Иоанна, зачало 36.
По 50-м псалме стихира, глас 6:Предстатель теплейший народа православнаго показался еси, святителю Георгие, и инославная учения отвергая со дерзновением, правило показался еси всем Православия о всех моляся, последующих твоим божественным учением и наказанием.
Канон, глас 1, егоже краегранесие: Святителя Георгия любовию восхвалим.
Песнь 1Ирмос: Песнь победную поим вси Богу, сотворшему дивная чудеса мышцею высокою, и спасшему Израиля, яко прославися.
Слове Божий, помози нам достойно воспети нашего святителя Георгия светом Евангелия Христова и подвигом веры своея и благочестия паству научившаго пети Тебе победную песнь, яко прославися.
Всеблаженне Георгие, града Нежина доброплодное прозябение, Киево-Печерския лавры инок был еси, прошел еси сквозе огнь и воду, вдался на мечи и на колья, на челюсти зверей и змиев, вменился еси яко овца заколения, яко же сам о себе в юности твоей пророчески рекл еси, непрестанно воспевая Господеви песнь, яко прославися.
Яко овча на заколение в жертву Богу от юности принесл еси себе, святителю Георгие, архипастырское служение восприем, паству свою добре упасл еси, и научил еси всех пети песнь Богу, яко прославися.
Богородичен: Твою помощь, Владычице, даждь нам и избави нас от бед и скорбей и прегрешений наших, яже всех рождши избавление.
Песнь 3Ирмос: Да утвердится сердце мое в воли Твоей Христе Боже, иже над водами небо утверждей второе, и основавый на водах землю Всесильне.
Измлада воспитан в добрем научении, остроту ума твоего не на суемудренная умствования обратил еси, святителю Георгие, но на созидание и утверждение православных, на обличение же и обуздание еретиков: темже и явился еси достойный апостольскаго престола наместник.
Ты был еси строитель спасения нашего, отче Георгие, вопия всем, послушающим учения твоего: да утвердятся сердца в воли Твоей, Всесильне.
Еже жити ми Христос, и смерть приобретение, глаголал еси себе, Христов угодниче святителю Георгие, сего ради вся находящия ти скорби сладце терпел еси, разсуждая реченное: яко недостойны суть страсти века сего к хотящей явитися в нас славе.
Богородичен: Лютыми недуги, и болезненным страстьми истязаему, Дево, Ты ми помози, исцелений бо неоскудное Тя знаю сокровище, Пренепорочная, неиждиваемое.
Седален:Возшед на высоту небесную и божественными оттуду, отче, озарився сиянии чудес, пресветел воистину явился стране нашей пастырь, в напастех сый предстатель. Тем же преславно враги одолев, лжу инославия отгнал еси, нас же в Православии утвердил еси, святителю Георгие. Моли Христа Бога грехов оставление даровати чтущим любовию святую память твою.
Слава и ныне:Многими прегрешении ум помрачен имуще, вопием ко твоему крепкому заступлению, Богородице Дево: просвети очи душ наших и возсияй нам покаяния зарю, молитвами угодника Твоего святителя Георгия, Едина Чистая и Благословенная.
Песнь 4Ирмос: Духом провидя пророче Аввакуме, Словесе воплощение, проповедал еси вопия: внегда приближитися летом, познаешися, внегда приити времени, покажешися, слава силе Твоей Господи.
Язык твой - трость книжника скорописца, имже заградишася уста грешных и льстивых и усмирися мятеж нечестивых. Темже воспеваем вси: слава силе Твоей, Господи.
Гласу евангельскому последовал еси, святителю Георгию, и апостольскою ревностию к научению паствы твоея устремился еси, землю нашу подвигами своими освятил еси и всех научил еси пети: слава силе Твоей, Господи.
Его же возлюбил еси и Ему же ревностно поработал еси, и ныне предстоиши со дерзновением, яко поборник веры православныя научая всех пети: слава силе Твоей, Господи.
Богородичен: О, Богородительнице, радости Подательнице, верою славящия Тя и от души поющия, радости неизреченныя исполни и света невечерняго сподоби, Дево благодатная Владычице.
Песнь 5Ирмос: Светлый нам возсияй Свет Присносущный, утреннюющим о судьбах заповедей твоих, Владыко Человеколюбче Христе Боже наш.
Рекл еси, святителю Георгие, боящимся Господа: не бойся малое стадо, яко благоизволил есть Отец Небесный даровати нам одоление врагов веры православныя. Тако веровал еси и тако по вере восприял еси. И се святая Церковь радуется и благословляет Господа.
Град Могилев и с ним вся страна наша радуется, имущи покровителя святителя Георгия, Церковь Христову от волков расхищающих оградившаго.
Избран быв от юности Господеви служити, честному Евангелию последовал еси, блаженне Георгие, во благоразумии люди учении твоими премудрыми, отче, возрастил еси.
Богородичен: Яко божественное прибежище покров Твой, Владычице, вси стяжавше к Богу, в напастех и гонениях, и гресех к Тебе прибегаем и Тобою изменение приемлем, Богородице Пречистая.
Песнь 6Ирмос: Пророка Иону подражая вопию: живот мой Блаже свободи от тли, и спаси мя Спасе мира, зовуща: слава Тебе.
Любовию к пастве своей согреваяйся и реностию по вере паче огня разгораяйся, попалял еси, святителю Георгие, терния грехалюбиваго мятежа, обновляя и утверждая обветшавшее житие.
Юношескую бодрость в святительстем служении имел еси, отче Георгие, душевредных волков от Христовы ограды отгнал еси. Назирай и ныне, святителю Христов, да не како суемудреннии расколы и ереси возмутят тишину церковную, но вси восхвалим Спаса мира, зовуще: слава Тебе.
Буди нам добрый кормчий, святителю Георгие и не остави нас погибнути во грехах наших, но в них же сам, яко человек искушаем был, помози и нам, искушаемым спасения получити.
Богородичен: Обрадованная, ходатайствуй Твоими молитвами и испроси душам множество щедрот, и очищение многих прегрешений, молимся.
Кондак, глас 8:Яко трудника апостольска и Православия столпа непоколебима Церковь Христова приносит Ти, Господи, святителя Георгия, в той просиявшаго. Того молитвами даруй душам нашим мир и велию милость.
ИкосПриидите, православнии людие, песньми ублажим Пресветлаго светильника Церкве Русския, непоколебима столпа веры православныя, тепла молитвенника и предстателя за землю нашу, крепка стоятеля противу врагов, строгаго обличителя разорителей веры православныя, добраго пастыря, душу свою за овцы своя полагавшаго и сего ради венцем славы от Господа венчанна. К немуже припадаем, верою и любовию зовуще: святителю Георгие, моли Христа Бога, да подаст душам нашим мир и велию милость.
Песнь 7Ирмос: Пещь Спасе орошашеся, отроцы же ликующе пояху: отцев Боже благословен еси.
Велия радости исполняются днесь людие, яко звезды бо сияют святии угодницы. В них же и святитель Георгий прославляется, благодатию Божию хранимый в опасности смертней, да паству свою научит пети: Боже, благословен еси.
Истинен и верен страж Белорусския Церкве четыредесять лет был еси, святителю Георгие, попечение о всех имея, оплотом был еси Православию: немощныя в вере ограждал еси, и к попечению о защищении людей православных во Христе Иисусе царицу призывал еси, да в мире вси воспоют: Боже, благословен еси.
Церковь Христову от обуреваний благовествованием истин евангельских и святоотеческих ревностно ограждая, и паству белорусскую мудро управляя, вся находящия ти скорби сладце терпел еси, святителю Георгие, воспевая, Боже благословен еси.
Богородичен: Всельшемуся в чрево Святыя Девы и паче слова ветхаго Адама обновльшему Господу поем: благословен Бог отец наших.
Песнь 8Ирмос: Егоже ужасаются ангели, и вся воинства, яко Творца и Господа, пойте священницы, прославите отроцы, благословите людие, и превозносите во вся веки.
Отче всеблаженне Георгие, апостольских учений верный подражателю и евагельския истины в Белорусстей земли всеусерднейший глашатаю, пастыря Иисуса Христа верный служителю. Моли Его и нам милость даровати, превозносящим Господа во веки.
Смерть свою предвидя, святче Георгие, слезно увещавал еси паству твою достойно ходити звания своего и хранити веру православную. Благословение всем преподав, мирно почил еси о Господе на первей седмице Великаго поста. Промыслом Божиим тело твое тридесять дней пребысть непогребенно, да паства твоя, видящи его нетленным, со умилением взывает: безначальна Царя славы Христа Спаса поим и превозносим во вся веки.
Христова ради смирения, образ смирения явился еси святе Георгие, и по смерти Господь тело твое нетленно яви, да мы чада твоя хвалим и превозносим Господа во веки.
Богородичен: Высочайшаго рождши, Пресвятая Богоневесто, доле лежащее естество наше к небеси возведши. Тем же по долгу Тя славим во вся веки.
Песнь 9Ирмос: Живоприемный источник приснотекущий, светоносный светильник благодати, храм одушевленный, сень пречистую, небесе и земли пространнейшую, Богородицу вернии величаем.
Аще и на небеси пребываеши, обаче и земных не оставляеши, святителю Георгие; мы же чада твоя, любовию движими, венец похвалы тебе приносим и в день прославления твоего, Христа Бога и Пречистую Матерь Его величаем.
Любы николиже отпадает, глаголет Божественный Дух. Истины сия в чудесех любве твоея известися, святителю отче Георгие, яко болящим, и скорбящим утешение источаеши. Паствы могилевския украшение и белорусския земли хранителю, научая всех Христа Бога и Пречистую Матерь Его величати.
Испытаяй свидения Божия еси, святителю, в законе бо Христове поучался еси день и нощь благочестием украшаемь. За сие бо в селениях праведных всели тя Господь.
Богородичен: Милостивая, милостиваго рождши, виждь озлобление и вдыхание людей Твоих, ускори, Пречистая, ущедрити ны.
Светилен:Святитель Могилевский и молитвенник всея страны белорусския днесь Церковию прославляется, яко мудрый управитель церковный, яко милосердия образ, яко святителей украшение.
Слава и ныне:Храм Божий, Владычице, ведуще, во святем храме Твоем руки наша возносим на молитву, виждь скорби наша и подаждь нам помощь.
На хвалитех стихиры, глас 8
Подобен: О преславнаго чудесе:Вси помолимся Христу, творяще память днесь святителю Георгию. О коль велика милость Твоя к нам, в Троице хвалимый Боже, приими молитву святителя и подаждь нам в добрых делех утверждение во славу пресвятаго Твоего Имене.
О преславнаго чудесе! Во граде Могилеве святитель Георгий прославляется Господем. Белорусская Церковь торжествует, и вси единодушно вопиют: о, земли нашея покровителю, сохрани страну нашу, и всех нас от всякия нужды и печали.
О преславного чудесе! Светоносный и радостный праздник прославления святителя Георгия ныне нам возсия. Приидите, вернии, в память его веселящеся возопиим: святителю отче Георгие, путеводная наша звездо, путь к небеси показующая, о нас всегда молися ко Господу, да спасет души наша.
Слава, глас 8:Красуйся и веселися, граде Могилеве, радуйся и светло торжествуй Церковь Божия, прославляющи святителя своего Георгия, иже на небеси пребывает благодатию и милость чадам своим являет, с верою приходящим и чтущим любовию святую память его.
И ныне, Богородичен, глас тойже:Владычице, приими молитву раб Твоих и избави нас от всякия нужды и печали.
На ЛитургииБлаженны от канона песнь 1-я и 3-я на 6. По входе тропари и кондаки по уставу. Прокимен, глас 1: Уста моя возглаголют премудрость и поучение сердца моего разум. Апостол, Евреем, зачало 318. Евангелие от Иоанна, зачало 36. Причастен: В память вечную будет праведник, от слуха зла не убоится.
Молитва святителю ГеоргиюО великий угодниче Христов, святителю отче наш Георгие! К тебе, молитвеннику теплому и предстателю пред Богом непостыдному, усердно притекаем, в нуждах и скорбех наших утешения и помощи просяще.
В древнюю годину испытаний, внегда посетиша страну нашу беды и скорби, Господь яви тя Церкви Своей столпа непоколебима и людем православным пастыря добра, душу свою за овцы полагавшаго и лютыя волки далече отгнавшаго.
Ныне убо призри на ны, недостойная чада твоя, умиленною душею и сокрушенным сердцем тебе призывающа. Крепость бо наша в нас оскуде и вражия ловления и сети, ереси и расколы обыдоша нас.
Помози нам, заступниче наш! Буди щит несокрушим святей Церкви Православней и отечеству нашему.
Преосвященныя архиереи благолепием святительства и премудростию украси, пастырем в служении ревность даруй, монашествующия к подвигом добраго течения в послушании утверди, православным христианом веру святую непорочну соблюсти умоли, мир весь твоим предстательстом умири.
Осени горним благословением нас, чад твоих, и подаждь нам скорбящим утешение, болящим здравие, гонимым защищение.
Буди всем нам благосердый отец и за вся теплый молитвенник, яко да предстательством твоим ограждаеми, непрестанно воспеваем и прославляем всесвятое имя Живоночальныя Троицы, Отца и Сына и Святаго Духа, во веки веков. Аминь.
Служба святителя Георгия, архиепископа Могилевскаго и Белорусскаго
НА МАЛОЙ ВЕЧЕРНИ
На Господи, воззвах: стихиры на 4, глас 6:Весь освящен богоносец показася, помазание Божие святое, Святым Духом обложен и светло входя выну во святая святых, богоначальными светлостьми озаряемь, благодати причащаяся Святых Таин, яко истинный святитель преславен, со дерзновением моляся о душах наших.
Просветися житие твое добродетельными светлостьми, верныя просветил еси, лести тьму разгнал еси, истинное бо явился еси светозарное солнце, святителю преблаженне Георгие, и ныне вселился еси, идеже свет сияет невечерний, и сын дне благодатию Духа Святаго быв. Темже твою божественную память и светоносную честно совершающе, приснопамятне, любовию почитаем.
Ум твой мановением еже к Богу, богомудре, верою удобряемь, светел явися славне, в мертвеннем теле и тленнем, премудре, нетлению поучився, притяжал еси бесплотных светлости, и страстей вне быв, безстрастием украшаяся, Георгие, отче святителю премудре, светлый светильниче, и молитвенниче о чтущих любовию память твою.
Слава, глас 8:Доблести твоими, преподобне отче, плод просветил есть верных сердца: кто бы слыша безмерное твое смирение, терпению не удивился, еже к нищим тихости, к скорбящим утешению. Вся боголепно научил еси, святителю Георгие, и ныне неувядаемым венцем увязлся еси: молися о душах наших.
И ныне, Богородичен, глас тойже:Кров Твой, Богородице Дево, врачество есть духовное: вонь бо прибегающе, от душевных недуг избавляемся.
На стиховне стихиры, глас 8:Святителю Георгие, разумнаго света заре, церковное светило, святительская красото, иноческаго постнаго жития истое правило: нам же заступник явился еси, свобождая от губителя врага души наша.
Стих: Честна пред Господем смерть преподобных Его.
Святителю Георгие, великую власть от Бога приял еси, множество лукавых бесов молитвою твоею отгнал еси, и сих озлобления от всех верою к тебе прибегающих.
Стих: Что воздам Господеви о всех, яже воздаде ми.
Святителя великаго Георгия, како достойно воспоем, честнаго ума богозарнаго света, освящающаго нас, и божественный разум подающаго таин глубинных исповедателя, согласно вси рцем: радуйся, отче отцев Георгие.
Слава, глас 8:Ты еси пастырь добрый и учитель теплый, святителю Георгие, тя всегда похваляюще вопием: тобою Бог украси Церковь Свою, и тело твое многолетно покровенное в земли, нетленно яви людем Своим, темже не престай моляся о хвалящих тя, и чтущих память твою, проси оставление грехов и спасения душам нашим.
И ныне, Богородичен, глас тойже:Владычице, приими молитву раб твоих, и избави нас от всякия нужды и печали.
Тропарь, глас 3:Столп Православия и учитель благочестия был еси, святителю отче Георгие, многи скорби и гонения претерпел еси, богомудре, паству свою управляя. Ко спасению всех наставил еси. Церкве Белорусския похвало и града Могилева украшение, моли Христа Бога, да утвердит отечество наше в благочестии и спасет души наша.
Слава, и ныне, Богородичен, глас тойже:Тя ходатайствовавшую спасения рода нашего, воспеваем, Богородице Дево: плотию бо от Тебе восприятою Сын Твой и Бог наш, крестом восприим страсть, избави нас от тли, яко Человеколюбец.
НА ВЕЛИЦЕЙ ВЕЧЕРНИ
На Господи, воззвах: стихиры на 8, глас 8:Да возвеселится днесь земля Белорусская, наста бо пресветлый день прославления святителя и чудотворца Георгия: да радуются насельницы сея страны, имея славнаго угодника Божия. Да возрадуются горы и холми, дебри и долины, восхваляюще Господа, давшаго нам святаго покровителя, неперестанно молящагося о спасении душ наших.
Днесь светло красуется славный град Могилев на Днепре, святостию жития твоего, святителю Георгие, и паства твоя ликовствующи радуется, и вернии твоим просвещением, блаженне, хвалятся. Ты же, отче наш Георгие, моли человеколюбца Христа Бога нашего людем православным тишину даровати, и земли плодородие, и велию милость.
Приидите, православных собори, воспоим святителя Георгия, учением к богоразумию нас наставльшаго, источника чудес предивнаго, Церкве светильника пресветлаго, учителя премудраго, той бо избавляет нас от всяких искушений и бед и молится о душах наших.
Песньми священными восхвалим святителя Георгия, от Киево-Печерския лавры благословение Белой Руси принесшаго, и Православие в ней защитившаго, той бо со всеми святыми земли Белорусския молится Господеви спастися душам нашим.
Ты еси слава града Могилева, святителю Христов Георгие, ты еси украшение Белорусския земли, похвало Церкви Православныя, в ней же процвел еси яко крин благодатный, возсиял еси яко святитель пресвелый, со всеми святыми молися ко Господу спастися душам нашим.
Слава, глас 8:Да возвеселится днесь земля Белорусская, наста бо пресветлый день прославления святителя и чудотворца Георгия: да радуются насельницы сея страны, имея славнаго угодника Божия. Да возрадуются горы и холми, дебри и долины, восхваляюще Господа, давшаго нам святаго покровителя, неперестанно молящагося о спасении душ наших.
И ныне, Богородичен догматик, глас тойже:Царь Небесный за человеколюбие на земли явися, и с человеки поживе: от Девы бо чистыя плоть приемый, и из Нея прошедый с восприятием, един есть Сын, сугуб естеством, но не ипостасию. Тем же совершенна Того Бога, и совершенна человека воистинну проповедающе, исповедуем Христа Бога нашего. Его же моли, Мати безневестная, помиловатися душам нашим.
Вход. Прокимен дне. Чтения три.
Притчей чтение (главы 10, 3 и 8):Память праведнаго с похвалами, и благословение Господне на главе его. Блажен человек, иже обрете премудрость, и смертен, иже уведе разум. Лучше бо сию куповати, нежели злата и сребра сокровища. Честнейшая же есть камений многоценных, все же честное недостойно ея есть. Долгота бо дней и лета живота в деснице ея, в шуйце же ея богатство и слава; от уст ея исходит правда, закон же и милость на языце носит. Послушайте убо мене, о чада! честная бо реку, и блажен человек, иже пути моя сохранит, исходи бо мои - исходи живота, и уготовляется хотение от Господа. Сего ради молю вас и предлагаю мой глас сыновом человеческим, яко аз, премудрость, устроих совет, и разум и смысл аз призвах. Мой совет и утверждение, мой разум, моя же крепость. Аз мене любящия люблю, ищущии же мене обрящут благодать. Разумейте убо, незлобивии, коварство, ненаказаннии же, прилагайте сердца. Послушайте мене и паки, честная бо реку, и отверзу от устен правая, яко истине поучится гортань мой, мерзки же предо мною устны лживыя. С правдою вси глаголы уст моих, ничтоже в них стропотно, ниже развращенно. Вся права суть разумевающим, и проста обретающим разум. Научаю бо вас истине, да будет о Господе надежда ваша, и исполнитеся Духа.
Премудрости Соломоновы чтение (главы 10, 6, 8 и 9):Уста праведнаго каплют премудрость, устне же мужей мудрых ведят благодать. Уста мудрых поучатся премудрости, правда же избавляет их от смерти. Скончавшуюся мужу праведну, не погибнет надежда. Сын бо праведен раждается в живот: и во благих своих плод правды обымет. Свет праведным всегда, и от Господа обрящут благодать и славу. Язык мудрых добрая свесть, и в сердце их почиет мудрость. Любит Господь преподобная сердца, приятни же Ему вси непорочнии в пути. Мудрость Господня просвещает лице разумнаго. Постигает бо желающия ю, прежде даже разумети ю, и удобь узрится от любящих ю. Утреневавый к ней не утрудится: и бдяй ея ради, вскоре без печали будет. Яко достойных ея сама обходит, ищущи, и во стезях ея является им благоприемне. Мудрости никогда же одолеет злоба. Сих ради и рачитель бых доброты ея, и возлюбих ю, и поисках от юности моея. И взысках невесту привести себе, яко всех Владыка возлюби ю, таинница бо есть Божия хитрости и обретательница дел Его. Труды ея суть добродетели, целомудрию же и разуму та учит, правде и мужеству, ихже потребне ничтоже есть в житии человеком. Аще же и многаго искусства желает кто, весть древняя и быти хотящая разсмотрит. Свесть извития словес и разрешения гаданий, знамения и чудеса проразумеет и сбытия времен и лет, и всем советник есть благ, яко безсмертие есть в ней и благославие во общении словес ея. Сего ради беседовах ко Господу, и помолихся Ему, и рех от всего сердца моего: Боже отцев и Господи милости, сотворивый вся словом Твоим и мудростию Твоею устроивый человека, да владеет бывшими от Тебе тварьми и да управляет мир в преподобии и правде. Даждь ми Твоих престолов приседящую премудрость и не отлучи мене от отрок Твоих, яко аз раб Твой и сын рабыни Твоея. Посли ю с небес от святаго жилища Твоего и от престола славы Твоея, да, сущи со мною, научит мя, что благоугодно есть пред Тобою. И наставит мя в разум, и сохранит мя в славе своей. Помышления бо смертных вся боязлива и погрешительна умышления их.
Премудрости Соломоновы чтение (главы 4, 6, 7 и 2):Похваляемому праведнику возвеселятся людие: безсмертия бо есть память его, яко от Господа познавается и от человеков, и угодна Господу душа его. Возлюбите убо, о мужие, мудрость и поживете, восхощите Ея и наказани будете. Начало бо Ея любы, и соблюдение закона. Почтите Премудрость, да во веки царствуете. Возвещу вам и не скрыю от вас тайн Божиих. Яко Той мудрости Наставник есть, и мудрых Исправитель, и всякому смыслу и делу Хитрец. И всем смыслом научит Мудрость, есть бо в ней Дух разумен и свят, и сияние Света Присносущнаго, и Образ благости Божия. Тая други Божия и пророки устрояет. Благолепнейши же есть солнца и паче всякаго сотворения звезд, свету сосуждаема, обретается первейши. Тая угождающия Ей от болезни избави и настави на стези правыя. Даде им разум имети свят и сохрани я от ловящих, и подвиг крепок подаде им. Да разумеют вси, яко сильнейши всего есть благочестие, и никогдаже преможет злоба мудрости, ниже прейдет злыя, обличающи суд. Рекоша же в себе, помысливше неправедно: насильствуем праведному, не пощадим преподобства его, ни усрамимся седин старости многолетны. Будет бо нам крепость закон, и уловим праведнаго, яко неугоден нам есть, и противится делом нашим, и поносит нам отпадение закона, и обличает нам согрешения наказания нашего. Возвещает нам разум имети Божий и отрока Господня себе именует. Бысть нам на обличение помышлений наших, и тяжек нам есть, и видимь яко неподобно иным житие его и изменены стези его. В поругание вменихомся ему, и удаляется от путей наших, яко от нечистот, и блажит последняя праведных. Увидим убо, аще словеса его истинна суть, искусим, яже сбываются ему. Руганием и мукою истяжем его, да разумеем кротость его и искусим беззлобство его, смертию безобразною осудим его, будет бо посещение от словес его. Сия помыслиша и прельстишася, ослепи бо я злоба их, и не разумеша таин Божиих, и не разсудиша, яко Ты еси Бог Един, живота имеяй и смерти власть, и спасаяй во время скорби, и избавляяй от всякаго зла. Щедр, и милостив, и даяй преподобным Своим благодать, и Своею мышцею гордым противляяйся.
На литии стихиры, глас 6:Днесь наста солнца светлейший праздник прославления святителя Георгия, иже верныя к веселию созывает, и лучами радости всех просвещает. В нем бо явися слава Христова, слава Церкви Православныя, дивными сияющи чудесы. Темже, вернии, любовию вопием: молися о нас, святителю Христов, Георгие.
Слава и ныне, глас 8:Да радуются радостию божественною насельницы Белорусския страны, зряще теплую Заступницу, дивную победу дарующу на противныя, и да поют божественными песньми.
На стиховне стихиры, глас 8:Святителю Георгие, разумнаго света заре, церковное светило, святительская красото, иноческаго постнаго жития истое правило: нам же заступник явился еси, свобождая от губителя врага души наша.
Стих: Честна пред Господем смерть преподобных Его.
Святителя великаго Георгия, како достойно воспоем, честнаго ума богозарнаго света, освящающаго нас, и божественный разум подающаго таин глубинных исповедателя, согласно вси рцем: радуйся, отче отцев Георгие.
Стих: Что воздам Господеви о всех, яже воздаде ми.
Святителю Георгие, великую власть от Бога приял еси, множество лукавых бесов молитвою твоею отгнал еси, и сих озлобления от всех верою к тебе прибегающих.
Слава, глас 7:Приидите ублажим пастыря добраго земли нашея, за веру вся претерпевшаго, и за Православие и отечество душу свою полагавшаго, и ныне милостию Божию чудотворца, явленнаго во утверждение веры немощствующих и во упокоение озлобленных грехи многими, да вси возрадуемся и да поем ему: радуйся, любы, нас согревающая; радуйся, сило, нас исцеляющая; радуйся, разуме, всех просвещаяй; радуйся, страже, Православие наше охраняяй; радуйся, святителю Георгие.
И ныне, Богородичен, глас тойже:Под кров Твой, Владычице, вси земнороднии прибегающе, вопием Ти: Богородице упование наше, избави нас от безмерных прегрешений и спаси души наша.
Тропарь, глас 3:Столп Православия и учитель благочестия был еси, святителю отче Георгие, многи скорби и гонения претерпел еси, богомудре паству свою управляя. Ко спасению всех наставил еси. Церкве Белорусския похвало и града Могилева украшение, моли Христа Бога, да утвердит отечество наше в благочестии и спасет души наша.
НА УТРЕНИ
На Бог Господь: тропарь, глас 3.
Слава, тропарь, глас 4:Приспе день светлаго торжества, град Могилев радуется, и с ним вси людие православнии ликовствуют пеньми и песньми духовными: днесь бо священное торжество в прославлении святителя и чудотворца Георгия, якоже солнце незаходимое возсия светозарными лучами, разгоняя тьму искушений и бед от вопиющих верно: спасай нас, яко предстатель наш, великий Георгие.
И ныне, Богородичен, глас 4:Еже от века утаеное и Ангелом несведомое таинство, Тобою, Богородице, сущим на земли явися Бог, в неслитном соединении воплощаемь, и Крест волею нас ради восприим, имже воскресив первозданнаго, спасе от смерти души наша.
По 1-м стихословии седален:Приидите, вернии, ублажим учителя нашего, иже в жизни своей нас наставляя, по смерти же назирая, печется яко пастырь добрый о душах наших.
Слава, и ныне, Богородичен:Под Твое предстательство прибегаем, Богородице Дево, и на Тя все упование наше возложивше, молим ходатайствовати за нас у престола Сына Твоего теплыми Твоими молитвами.
По 2-м стихословии седален:Святителю Георгие, моли человеколюбца Бога, да избавит нас от всяких бед и напастей, и да дарует нам живот вечный.
Слава, и ныне, Богородичен:Богородице Дево, упование христиан, покрый и соблюди нас Твоими к Сыну Твоему и Богу молитвами, от всякой нужды и печали.
По полиелеи седален, глас 8:Твое заступление получивше, святителю Георгие, благодарни есмы душею и сердцем и молим тя усердно: подкрепи нашу веру к Богу и настави нас на стезю Его заповедей, да богоугодно поживше в веце сем, наследуем блаженство праведных.
Слава, и ныне, Богородичен:Владычице милостивая, моли Сына Твоего о нас грешных, да избавимся вечныя тли и всякия скорби, и да получим вечная благая: вся бо можеши, елика хощеши.
Степенна, 1-й антифон 4-го гласа.Прокимен, глас 1: Уста моя возглаголют премудрость, и поучение сердца моего разум. Стих: Услышите сия, вси языцы, внушите, вси живущии по вселенней.
Всякое дыхание: Евангелие от Иоанна, зачало 36.
По 50-м псалме стихира, глас 6:Предстатель теплейший народа православнаго показался еси, святителю Георгие, и инославная учения отвергая со дерзновением, правило показался еси всем Православия о всех моляся, последующих твоим божественным учением и наказанием.
Канон, глас 1, егоже краегранесие: Святителя Георгия любовию восхвалим.
Песнь 1Ирмос: Песнь победную поим вси Богу, сотворшему дивная чудеса мышцею высокою, и спасшему Израиля, яко прославися.
Слове Божий, помози нам достойно воспети нашего святителя Георгия светом Евангелия Христова и подвигом веры своея и благочестия паству научившаго пети Тебе победную песнь, яко прославися.
Всеблаженне Георгие, града Нежина доброплодное прозябение, Киево-Печерския лавры инок был еси, прошел еси сквозе огнь и воду, вдался на мечи и на колья, на челюсти зверей и змиев, вменился еси яко овца заколения, яко же сам о себе в юности твоей пророчески рекл еси, непрестанно воспевая Господеви песнь, яко прославися.
Яко овча на заколение в жертву Богу от юности принесл еси себе, святителю Георгие, архипастырское служение восприем, паству свою добре упасл еси, и научил еси всех пети песнь Богу, яко прославися.
Богородичен: Твою помощь, Владычице, даждь нам и избави нас от бед и скорбей и прегрешений наших, яже всех рождши избавление.
Песнь 3Ирмос: Да утвердится сердце мое в воли Твоей Христе Боже, иже над водами небо утверждей второе, и основавый на водах землю Всесильне.
Измлада воспитан в добрем научении, остроту ума твоего не на суемудренная умствования обратил еси, святителю Георгие, но на созидание и утверждение православных, на обличение же и обуздание еретиков: темже и явился еси достойный апостольскаго престола наместник.
Ты был еси строитель спасения нашего, отче Георгие, вопия всем, послушающим учения твоего: да утвердятся сердца в воли Твоей, Всесильне.
Еже жити ми Христос, и смерть приобретение, глаголал еси себе, Христов угодниче святителю Георгие, сего ради вся находящия ти скорби сладце терпел еси, разсуждая реченное: яко недостойны суть страсти века сего к хотящей явитися в нас славе.
Богородичен: Лютыми недуги, и болезненным страстьми истязаему, Дево, Ты ми помози, исцелений бо неоскудное Тя знаю сокровище, Пренепорочная, неиждиваемое.
Седален:Возшед на высоту небесную и божественными оттуду, отче, озарився сиянии чудес, пресветел воистину явился стране нашей пастырь, в напастех сый предстатель. Тем же преславно враги одолев, лжу инославия отгнал еси, нас же в Православии утвердил еси, святителю Георгие. Моли Христа Бога грехов оставление даровати чтущим любовию святую память твою.
Слава и ныне:Многими прегрешении ум помрачен имуще, вопием ко твоему крепкому заступлению, Богородице Дево: просвети очи душ наших и возсияй нам покаяния зарю, молитвами угодника Твоего святителя Георгия, Едина Чистая и Благословенная.
Песнь 4Ирмос: Духом провидя пророче Аввакуме, Словесе воплощение, проповедал еси вопия: внегда приближитися летом, познаешися, внегда приити времени, покажешися, слава силе Твоей Господи.
Язык твой - трость книжника скорописца, имже заградишася уста грешных и льстивых и усмирися мятеж нечестивых. Темже воспеваем вси: слава силе Твоей, Господи.
Гласу евангельскому последовал еси, святителю Георгию, и апостольскою ревностию к научению паствы твоея устремился еси, землю нашу подвигами своими освятил еси и всех научил еси пети: слава силе Твоей, Господи.
Его же возлюбил еси и Ему же ревностно поработал еси, и ныне предстоиши со дерзновением, яко поборник веры православныя научая всех пети: слава силе Твоей, Господи.
Богородичен: О, Богородительнице, радости Подательнице, верою славящия Тя и от души поющия, радости неизреченныя исполни и света невечерняго сподоби, Дево благодатная Владычице.
Песнь 5Ирмос: Светлый нам возсияй Свет Присносущный, утреннюющим о судьбах заповедей твоих, Владыко Человеколюбче Христе Боже наш.
Рекл еси, святителю Георгие, боящимся Господа: не бойся малое стадо, яко благоизволил есть Отец Небесный даровати нам одоление врагов веры православныя. Тако веровал еси и тако по вере восприял еси. И се святая Церковь радуется и благословляет Господа.
Град Могилев и с ним вся страна наша радуется, имущи покровителя святителя Георгия, Церковь Христову от волков расхищающих оградившаго.
Избран быв от юности Господеви служити, честному Евангелию последовал еси, блаженне Георгие, во благоразумии люди учении твоими премудрыми, отче, возрастил еси.
Богородичен: Яко божественное прибежище покров Твой, Владычице, вси стяжавше к Богу, в напастех и гонениях, и гресех к Тебе прибегаем и Тобою изменение приемлем, Богородице Пречистая.
Песнь 6Ирмос: Пророка Иону подражая вопию: живот мой Блаже свободи от тли, и спаси мя Спасе мира, зовуща: слава Тебе.
Любовию к пастве своей согреваяйся и реностию по вере паче огня разгораяйся, попалял еси, святителю Георгие, терния грехалюбиваго мятежа, обновляя и утверждая обветшавшее житие.
Юношескую бодрость в святительстем служении имел еси, отче Георгие, душевредных волков от Христовы ограды отгнал еси. Назирай и ныне, святителю Христов, да не како суемудреннии расколы и ереси возмутят тишину церковную, но вси восхвалим Спаса мира, зовуще: слава Тебе.
Буди нам добрый кормчий, святителю Георгие и не остави нас погибнути во грехах наших, но в них же сам, яко человек искушаем был, помози и нам, искушаемым спасения получити.
Богородичен: Обрадованная, ходатайствуй Твоими молитвами и испроси душам множество щедрот, и очищение многих прегрешений, молимся.
Кондак, глас 8:Яко трудника апостольска и Православия столпа непоколебима Церковь Христова приносит Ти, Господи, святителя Георгия, в той просиявшаго. Того молитвами даруй душам нашим мир и велию милость.
ИкосПриидите, православнии людие, песньми ублажим Пресветлаго светильника Церкве Русския, непоколебима столпа веры православныя, тепла молитвенника и предстателя за землю нашу, крепка стоятеля противу врагов, строгаго обличителя разорителей веры православныя, добраго пастыря, душу свою за овцы своя полагавшаго и сего ради венцем славы от Господа венчанна. К немуже припадаем, верою и любовию зовуще: святителю Георгие, моли Христа Бога, да подаст душам нашим мир и велию милость.
Песнь 7Ирмос: Пещь Спасе орошашеся, отроцы же ликующе пояху: отцев Боже благословен еси.
Велия радости исполняются днесь людие, яко звезды бо сияют святии угодницы. В них же и святитель Георгий прославляется, благодатию Божию хранимый в опасности смертней, да паству свою научит пети: Боже, благословен еси.
Истинен и верен страж Белорусския Церкве четыредесять лет был еси, святителю Георгие, попечение о всех имея, оплотом был еси Православию: немощныя в вере ограждал еси, и к попечению о защищении людей православных во Христе Иисусе царицу призывал еси, да в мире вси воспоют: Боже, благословен еси.
Церковь Христову от обуреваний благовествованием истин евангельских и святоотеческих ревностно ограждая, и паству белорусскую мудро управляя, вся находящия ти скорби сладце терпел еси, святителю Георгие, воспевая, Боже благословен еси.
Богородичен: Всельшемуся в чрево Святыя Девы и паче слова ветхаго Адама обновльшему Господу поем: благословен Бог отец наших.
Песнь 8Ирмос: Егоже ужасаются ангели, и вся воинства, яко Творца и Господа, пойте священницы, прославите отроцы, благословите людие, и превозносите во вся веки.
Отче всеблаженне Георгие, апостольских учений верный подражателю и евагельския истины в Белорусстей земли всеусерднейший глашатаю, пастыря Иисуса Христа верный служителю. Моли Его и нам милость даровати, превозносящим Господа во веки.
Смерть свою предвидя, святче Георгие, слезно увещавал еси паству твою достойно ходити звания своего и хранити веру православную. Благословение всем преподав, мирно почил еси о Господе на первей седмице Великаго поста. Промыслом Божиим тело твое тридесять дней пребысть непогребенно, да паства твоя, видящи его нетленным, со умилением взывает: безначальна Царя славы Христа Спаса поим и превозносим во вся веки.
Христова ради смирения, образ смирения явился еси святе Георгие, и по смерти Господь тело твое нетленно яви, да мы чада твоя хвалим и превозносим Господа во веки.
Богородичен: Высочайшаго рождши, Пресвятая Богоневесто, доле лежащее естество наше к небеси возведши. Тем же по долгу Тя славим во вся веки.
Песнь 9Ирмос: Живоприемный источник приснотекущий, светоносный светильник благодати, храм одушевленный, сень пречистую, небесе и земли пространнейшую, Богородицу вернии величаем.
Аще и на небеси пребываеши, обаче и земных не оставляеши, святителю Георгие; мы же чада твоя, любовию движими, венец похвалы тебе приносим и в день прославления твоего, Христа Бога и Пречистую Матерь Его величаем.
Любы николиже отпадает, глаголет Божественный Дух. Истины сия в чудесех любве твоея известися, святителю отче Георгие, яко болящим, и скорбящим утешение источаеши. Паствы могилевския украшение и белорусския земли хранителю, научая всех Христа Бога и Пречистую Матерь Его величати.
Испытаяй свидения Божия еси, святителю, в законе бо Христове поучался еси день и нощь благочестием украшаемь. За сие бо в селениях праведных всели тя Господь.
Богородичен: Милостивая, милостиваго рождши, виждь озлобление и вдыхание людей Твоих, ускори, Пречистая, ущедрити ны.
Светилен:Святитель Могилевский и молитвенник всея страны белорусския днесь Церковию прославляется, яко мудрый управитель церковный, яко милосердия образ, яко святителей украшение.
Слава и ныне:Храм Божий, Владычице, ведуще, во святем храме Твоем руки наша возносим на молитву, виждь скорби наша и подаждь нам помощь.
На хвалитех стихиры, глас 8
Подобен: О преславнаго чудесе:Вси помолимся Христу, творяще память днесь святителю Георгию. О коль велика милость Твоя к нам, в Троице хвалимый Боже, приими молитву святителя и подаждь нам в добрых делех утверждение во славу пресвятаго Твоего Имене.
О преславнаго чудесе! Во граде Могилеве святитель Георгий прославляется Господем. Белорусская Церковь торжествует, и вси единодушно вопиют: о, земли нашея покровителю, сохрани страну нашу, и всех нас от всякия нужды и печали.
О преславного чудесе! Светоносный и радостный праздник прославления святителя Георгия ныне нам возсия. Приидите, вернии, в память его веселящеся возопиим: святителю отче Георгие, путеводная наша звездо, путь к небеси показующая, о нас всегда молися ко Господу, да спасет души наша.
Слава, глас 8:Красуйся и веселися, граде Могилеве, радуйся и светло торжествуй Церковь Божия, прославляющи святителя своего Георгия, иже на небеси пребывает благодатию и милость чадам своим являет, с верою приходящим и чтущим любовию святую память его.
И ныне, Богородичен, глас тойже:Владычице, приими молитву раб Твоих и избави нас от всякия нужды и печали.
На ЛитургииБлаженны от канона песнь 1-я и 3-я на 6. По входе тропари и кондаки по уставу. Прокимен, глас 1: Уста моя возглаголют премудрость и поучение сердца моего разум. Апостол, Евреем, зачало 318. Евангелие от Иоанна, зачало 36. Причастен: В память вечную будет праведник, от слуха зла не убоится.
Молитва святителю ГеоргиюО великий угодниче Христов, святителю отче наш Георгие! К тебе, молитвеннику теплому и предстателю пред Богом непостыдному, усердно притекаем, в нуждах и скорбех наших утешения и помощи просяще.
В древнюю годину испытаний, внегда посетиша страну нашу беды и скорби, Господь яви тя Церкви Своей столпа непоколебима и людем православным пастыря добра, душу свою за овцы полагавшаго и лютыя волки далече отгнавшаго.
Ныне убо призри на ны, недостойная чада твоя, умиленною душею и сокрушенным сердцем тебе призывающа. Крепость бо наша в нас оскуде и вражия ловления и сети, ереси и расколы обыдоша нас.
Помози нам, заступниче наш! Буди щит несокрушим святей Церкви Православней и отечеству нашему.
Преосвященныя архиереи благолепием святительства и премудростию украси, пастырем в служении ревность даруй, монашествующия к подвигом добраго течения в послушании утверди, православным христианом веру святую непорочну соблюсти умоли, мир весь твоим предстательстом умири.
Осени горним благословением нас, чад твоих, и подаждь нам скорбящим утешение, болящим здравие, гонимым защищение.
Буди всем нам благосердый отец и за вся теплый молитвенник, яко да предстательством твоим ограждаеми, непрестанно воспеваем и прославляем всесвятое имя Живоночальныя Троицы, Отца и Сына и Святаго Духа, во веки веков. Аминь.