Служба прп. Паисию Святогорцу г-на Харлампия М. Бусиа (Редактировано 26. 01. 2017).
(Как разместить вариант славянским шрифтом - не вем.)
Господина Харлампия М. Бусиа,
великаго песнописца Александрийския Церкве.
Служба
Новоявле́нно на Святей Горе Просиявшему
преподобному и богоносному отцу нашему
Паисию Новому,
егоже память совершается 29 иуния (+ 1994)
На малей вечерни, на Господи воззвах, стихиры, глас 1:
Подобен: Небесных чинов:
Новоявле́нно подвигом суровым на Святей Горе просиявшаго/ и отеческими наставлении своими многия просвещщаго/ восхвалим, взывающе:/ о нас умилостиви Избавителя,/ подвижниче мудре, Паисие.
Каппадокии славу,/ безбрачных похвалу,/ монашествующих предстателя,/ и верных ко обоже́нию путеводителя/ песньми сладкозвучными восхвалим Паисия,/ яко добродетелей осияние// и веры маргарит многоценный.
От юности мира красная вся, яко отре́би,/ прах и пар помышлявшаго,/ Паисия новаго в подвижницех богоносных вси почтим, возглашающе:/ твоими молитвами сподоби// любити нам непреходящая.
Уя́звлен Христовою любовию от младенства, преподобне,/ любве сосуд явился еси сияяй,/ до кончины облегчавая притекающих благоговейно к келлии твоей,/ и отраду даруяй// стенящим во мрачней сени многоразличных скорбе́й.
Слава, глас 8.
Преподобнолюбцев множества/ и на Афоне подвизающихся сонм,/ сойдемся днесь в память Паисия,/ новоявле́ннаго веры светильника,/ достойно того восхвалити подвиги:/ Той бо яко светоч заблуждшим,/ единонравным наставник, обуреваемым спаситель,/ мрак уныния всем расточил еси/ благодатию Светодавца Христа и Спаса рода нашего:/ и ныне с лики ангельскими/ и с чинми преподобных радуяся,/ Всецарю славы молится/ дати нам, его память почитающим// здравие купно и мир неколеблемый.
И ныне, Богородичен.
Владычице, приими молитвы раб Твоих и избави нас от всякия нужды и печали.
На стиховне стихиры, глас 2:
Подобен: Доме Евфрафов:
Приидите, Афонитов сонми, сошедшеся, в песнех достойно восхвалим память Паисия блаженнаго.
Честна пред Господем смерть преподобных Его.
Просияв новоявле́нно, яко звезда светолучная, просветил еси сердца помраченная, отче богоносне Паисие.
Святым, иже суть на земли Его, удиви Господь вся хотения своя в них.
Гроб твой честный, яко источник исцелений, обитель Богослова и́мать, якоже дух твой небеса, Паисие.
Слава, Троичен:
Спаси от всякаго зла поющих Тя, Божество Трисвятое, моленьми Паисия, срадовавшаго Ти ся.
И ныне, Богородичен:
Разреши христиан от прелести вражия, вкупе с Паисием, на пажити твоей подвизавшимся, Богоневесто.
Ныне отпущаеши: Трисвятое. Тропарь с великия вечерни и отпуст.
На велицей вечерни, стихиры, глас 1:
Подобен: Всехвальнии мученицы:
Пребываяй в послушании и хранении чувств/ и молитве от юности, / плоти долувлекущия страсти отринул еси/ и к высоте несказанней возшел еси/ безстрастия и трезвения, отче Паисие./ Отонюду вси твоя почитаем// ко обоже́нию неусыпныя подвиги.
Храм светел себе сама́го творяй Святаго Духа,/ и благоухание Христово быв, Паисие,/ к твоей келлии приходящих радовал еси/ всех освящаяй, преподобне,/ ищущих благословения твоего,// да жития про́йдут море многобурное .
Подражатель быв добродетели мудраго Арсения,/ во отечествии твоем просиявшаго/ и бранем древних старцев, подвижников афонских желая подражати ,/по лествице славных подвиго́в совершенства о Христе возшел еси, всечестне,// и яко звезда днесь возсиял еси.
Верных лицы/ от Кареи благоговейно притекаху,/ по вся дни во твою келлию, Паисие,/ да бремени скорбей свободятся/ твоим боголюбивым преподобием/ и восприимут дерзновение / во еже врага силу сокрушити// твоими непрестанными ко Господу молитвами.
Благодать неоскудно на тя излиявшися, преподобне,/ святаго Духа,/ мудрости ,/ показа тя столпописание одушевленное/ светильник предзрения светел/ и рассуждения путеводный огнь :/ сего ради озарял еси верою приходящих к тебе// помраченная сердца, Паисие.
Обитель Богослова честная, /иногда насладившися твоих мудрых увещаний,/ ликует и радуется,/ ныне в недрех яко богатство божественное имущи,/ гроб всеблаженнаго Паисия,/ верным источающий/ неистощимыя токи всегда// к нему притекающим.
Паисие, благодать обильную с небесе восприял еси/ помогати всем страждущим и в нуждех сущим:/ отонюду по кончине призирал еси, преподобне, недугующия/ и скорое исцеление Божией благодатию даровал еси,// являяй дерзновение, еже имаши ко Господу.
Карки́на скорый целитель/ и разрешитель неплодия/ в последняя времена явился еси, Паисие,/чудес половодное стремление :/ еще же и отвергающим твое теплое заступление/ подаеши своим изволением скоро потребное,/ течение же жизненное твоими молитвами прелагаеши// призывающим тя.
Слава, глас 6.
Подвижническою украшен светлостию,/ Церковь всю в последняя времена осиял еси,/ Паисие, Святогорче духоносный./ Разумно бо на Афоне жительствовав,/ безстрастия и мудрости ме́рило явился еси известнейшее / и верных ученьми твоими озарил еси,/ превыше плоти быв,/ благодать обрел еси/ молитися непрестанно о любовию чтущих тя// и воспевающих всечестную память твою.
И ныне, Богородичен: Кто тебе не ублажит:
На литии Стихиры самогласны:
Глас 1.
От юности Христу себе сама́го возложивый/ терпением, молитвою и смирением,/ благих помысло́в некра́домо вместилище бысть, Паисие,/просияв бо любовию ко ближнему совершенною,/ безбрачных собрание возрадовал еси/ и верных чины возвеселил еси:/ и ныне, плоть перстную отринувый,/ с невещественными чинми и преподобными/ Господа славословиши,/ моля непрестанно о чтущих тя.
Глас 2.
Арсения преподобнаго, на Фарасах просиявшаго/ стезям последовав,/ добродетельных деяний образ / и всякия добродетели правило вернейшее явился еси, Паисие/ на страсти подвизавыйся/ и от всего вещественнаго ум очистивый,/ своими мудрыми речами верных наставлял еси/ нравов благолепоте и стяжанию страха Божия:/ и ныне, афоните божественный,/ молися Христу Церковь умирити// и нас подражати трудом твоим сподоби.
Глас 3.
Никакоже не отвратил еси благочестия кормила,/ дондеже достигл еси в пристанище победы безсмертныя,/ древняго Елеазара подражая,/ богоносне Паисие,/ помыслы благими своя страсти победивый/ и многия наставивый помыслы благочестия имети/ на лоне Авраамове упокоился еси/ и молишися о душах наших.
Глас 4.
Радуется днесь святоименитая Гора Афонская/ строгому подвигу твоему,/ имже ты древних отцев добродетели явил еси,/ Паисие богосла́внеший,/ изрядно же празднуют монашествующих лицы/ треблаженныя ограды Богослова,/ имущи источник освящения,/ всесвященный гроб твой:/ темже убо с небесе одожди всем молитвами твоими обильно/ струи Божия благодати/ и спаси от смертныя тли / души чтущих тя, всеславне.
Слава, глас тойже.
Во страсе Божии совершаяй освящение/ очистил еси себе от всякия скверны/ плотския и душевныя, Паисие,/ храм себе соделавый Бога живаго:/ единонравных и земнородных всех лики освящаеши/ свыше данною тебе благодатию:/ и ныне вечныя жизни почесть приявый,/ непрестанно молишися о чтущих священную память твою.
И ныне, Богородичен:
От всех бед рабы Твоя сохраняй,/ благословенная Богородице,/ да Тя славим,/ надежду душ наших.
На стиховне стихиры, глас 5.
Подобен: Радуйся, постников:
Радуйся, любве огнесияние,/ пламенем своих подвиго́в честных/ путеводивый в последняя времена/ лики иже на Афоне единонравных,/ подвижников светлосте и правило. /Христу бо моляся,/ недугующаго на себе перенял еси болезни/ и недуг того преболезненный до кончины сего носил еси, честне Паисие,/ яко богатство многоценное,/ радуяся, яко ближняго своего облегчил еси/ и подъял еси стражбу́ его// яко, грехи наша Господь.
Стих: Честна пред Господем смерть преподобных Его:
Радуйся, Фарас новая о́трасле ,/ горы Афонския благоцветнейшая розго,/ горы Синайския крине/ и обители Стомийския цвете многоцветный и сладкоуханный/: Паисие преподобне,/ путевождю непрелестнейший ко спасению,/ исполнения паствы благочестивыя похвало/ обители Богослова бысть:/ Сия бо, яко твердыню имать непоколебиму/ множество советов твоих/ и гроб твой, егоже ныне указа Господь,/ егда восхоте прославити тя// яко купель исцелений
Стих: Блажен муж бояйся Господа:
Радуйся, многодетныя матере плод святый,/ Паисие преподобне,/ рождей себе сама́го постом и молитвою,/ да напитаеши Божиею благодатию,/ мир, желающий веры познати всю истину/ и направиши на путь спасения притекающих/ советами твоими всемудрыми:/ сеяй бо любве Божия се́мена,/ пожал еси плод многоплодный жизни нестареемыя/: еяже сподоби всех воспевающих тя// и предстательства просящих твоего ко Господу.
Слава, глас 8.
Наставления и рассуждения талант приял еси,/ яко мзду постнических трудов твоих/от Христа, Паисие тревеликий,/ ты бо предзрети грядущая сподобился еси/и напаяти бразды душ благочестивых/ нектаром богомудрых речей твоих:/ возсиявый, яко новый Церкве путеводный огнь ,/ к Солнцу мысленному востекл еси./ Егоже моли сподобити и нас// вышния светлости.
И ныне, Богородичен:
Владычице, приими молитвы раб Твоих/ и избави нас// от всякия нужды и печали.
Тропарь, Глас 5:
Подобен: Собезначальное Слово:
Иже во Святей Горе днесь просиявшаго/ непрестанным подвигом и умною молитвою,/ восхвалим, вернии, честнаго Паисия:/ яко ши́пок убо благоцветный ду́ши облагоухал есть/ словесы богозвучными:/ и ныне подает благая// к его молитвам притекающим.
Слава, и ныне, Богородичен:
Радуйся, Двере Господня непроходимая; / радуйся, стено и покрове притекающим к Тебе. / Радуйся, необуреваемое пристанище и неискусобрачная, / рождшая плотию Творца Твоего и Бога. / Молящи не оскудевай о воспевающих / и кланяющихся рождеству Твоему.
По 1 стихословии седален, гл. 1.
Подобен: Гроб Твой, Спасе:
Божественными помышленьми сердце исполнив, и зарями безстрастия себе просветив, всю подсолнечную светом путеводил еси и наставил еси верныя любовию взывати ти: Радуйся, жилище всеразличных дарований, Паисие преподобне.
Слава, тойже.
И ныне, Богородичен:
Дубравы и окраины святаго луга Твоего ныне богомудро освятил есть токами слез своих, Матеродево, Паисий, иже Тя узре преестественно в видении, моляся в своей убозей келлии, Всепетая.
По 2 стихословии седален, глас 4:
Подобен: Скоро предвари:
Фарас святыню, Горы Святыя явление, и славу преславную обители Богослова верою восхвалим, вопиюще: не престай выну приснодвижно молитися, подати верным мир и здравие, любовию совершающим твою память, Паисие.
Слава, тойже.
И ныне, Богородичен:
Всенепорочная Владычице, по рождестве, якоже и прежде рождества пребывши чистая: от страстей мою душу очисти и подаждь слезы покаяния моему смирению, да воспою освященным сердцем и очище́нныма устнама Твое многое ко мне сострадание .
По полиелеи седален, глас 3.
Подобен: Красоте девства:
Благодати Божия обиталище, верных ко обоже́нию преложение и подвижников Христу новоявле́нно благоугодивших оттисновение, цветами песен сладкозвучных увенчаим, яко сосуд многоценен помысло́в благих, зовуще: светлый Афона знаменоносче , радуйся, Паисие богомудре.
Слава, тойже.
И ныне, Богородичен:
Омраченную мою душу озари светом благодати божественнаго рождества Твоего, Дево Чистая, Мариам, отчаянных надеждо, мрак отжени безмерных прегрешений моих, яко да обрету милость в день судный и любовию немолчно вопию Ти: Радуйся, Благодатная!
Прокимен:
Честна пред Господем смерть преподобных Его.
Стих: Блажен муж, бояйся Господа:
Евангелие от Луки, зачало 24.
50 псалом.
Слава:
Молитвами преподобнаго Твоего :
И ныне:
Молитвами Богородицы:
Самогласен. Гл. 6:
Стих: Милостиве , помилуй мя, Боже, по велицей милости Твоей/ и по множеству щедрот твоих очисти беззаконие мое.
Вся вещественная изде́тска отринувый/ и подвигом суровым на высоту безстрастия возшедый,/ Паисие всеблаженне,/услыши нас, молящихся тебе,/ впери ум притекающих к тебе/ во еже вожделети лучшая,/ яко да и мы вечныя жизни улучим,/ чтущии память твою,// афонских отцев крине новосажде́нный.
Спаси, Боже, люди Твоя:
Таже каноны преподобному.
Канон первый. Егоже краегранесие: Добродетели звезду новосветлую, Паисия пою. Х. Глас 4.
Песнь 1.
Ирмос: Отверзу уста моя, / и наполнятся Духа, / и слово отрыгну Царице Матери, / и явлюся, светло торжествуя, // и воспою, радуяся, Тоя чудеса.
Ныне, Паисие, в горе афонстей просиял еси лучами жительства твоего честнаго и мудрых словес, имиже мглу уныния расторгл еси коемуждо из смертных, притекающих к тебе.
Ши́пок всеблагоуханный душа твоя показася, израстивши мудрости, послушания и молитвы цве́ты всеутешныя, веселящия яже с любовию тщащихся приходити к тебе всегда, отче Паисие.
Отребил еси вся советы лукаваго, Паисие блаженне, благими помыслы, яже носил еси, подобно же́злам любве несказанныя ко всем в сердце твоем.
Правду Божию, якоже рекл еси, Паисие, храняй в житии твоем, кротких явился еси правило и умиряеши верных безмятежно. Темже сподобился еси божественныя светлости.
Богородичен: Едина неискусобрачная и пренепорочная Владычице, от скверны мя очисти прегрешений многих и сподоби мя честнаго Паисия нравом подражати, яко да спасуся.
Ин канон, глас 8.
Ирмос: Колесницегонителя фараона погрузи/ чудотворяй иногда/ Моисейский жезл, крестообразно поразив/ и разделив море:/ Исраиля же беглеца пешеходца спасе,// песнь Богови воспевающа.
Всесличными ныне песньми и пеньми медоточными светло восхваляем всесвященную твою память, Паисие треблаженне, иже на Афоне ныне просиявый, яко светило всесветлое огнесияньми богозарных добродетелей твоих.
Афонитов новосветлое облистание, чистым твоим житием, подвигом, не яве творимым, богатством любве, ко ближнему и ко Господу, и теплыми молитвами твоими весь мир просветил еси, светло тя чтущий, Паисие.
Испра́витель явился еси нелестный, Паисие, и путевождь незаблудный к жизни нестареемей притекающим к тебе и верою взыскующим советов твоих всемудрых, о еже како всенаследовати добродетель и ангелов Божиих житию поревновати.
Богородичен: тесноты́ житейския испроси избавления, чистая Марие, притекающим к Тебе и прегрешений оставления, Дево Богопочтенная, Паисия молитвами, на пажити Твоей святей ныне богоугодно пожившаго.
Песнь 3.
Ирмос: Твоя песнословцы, Богородице, / живый и независтный Источниче, / лик себе совокупльшия, духовно утверди, / в Божественней Твоей славе // венцев славы сподоби.
Гимн любве вострубивый, волю свою отсекал еси, всегда иский творити волю другаго, якоже глагола Павел тревеликий, Паисие духоносне.
Фарас огнесияние новосветлое, Арсения имел еси путевождя ко свету вечному, от негоже приял еси божественное крещение, Паисие, добродетелей жилище.
В горе Афонстей мед премудрости подвижническия собирал еси, яко пчела неусыпная: сего ради и нектар источал еси от чистых устен твоих непрестанно, отче Паисие.
Богородичен: Плоти моея хотения долувлекущая, Всенепорочная, укроти скоро и души моея очи устреми к нетленным, яже на небесех, Владычице, яко да выну ублажаю Тя.
Ин:
Ирмос: Небеснаго круга Верхотворче, Господи,/ и Церкве Зиждителю,/ Ты мене утверди в любви Твоей,/ желаний краю, верных утверждение,// едине Человеколюбче.
Исаака советы и увещания, преподобне, сирийскаго подвижника божественнаго имея, Паисие, яко светозарнаго путевождя добродетельнаго твоего жития, пришел еси к высоте обоже́ния неудобовосходней.
Свещу преподобия на Афоне новоявле́нно возжегл еси и мир весь осветил еси лучами советов твоих насущных, о еже како народом разным в мире жити , отче Паисие.
Денными и нощными молитвами твоими и моленьми пременил еси стремление бедственных вещей рода человеческаго ради; и ныне благоутробному Богу о нас предстоиши моляся, Паисие, яко сострадательнейший
Богородичен: Богородице Дево, горы Афонския преславное святилище, всея твари величание и похвало, Паисия молитвами, служителя Твоего преподобнаго, всех от напастей избави и скорбей.
Седален, глас 3: Удивися Иосиф:
Вселися в тя, подвижниче, святаго и богоначальнаго Уте́шителя благодать и предоброе показа тя Премудрости Божия приятелище; ты бо монашествующих соборы возвеселил еси всеблагоговейно к тебе притекающия и ищущия молитв твоих святых и советов твоих всемудрых: сего ради вси тя достодолжно восхваляем, Паисие.
Слава и ныне, Богородичен:
Луга Твоего, Чистая, святаго и благоуханнаго на Афоне, Мариам, ныне, Мати Божия, шипок божественный Паисия богодухновеннаго воспевающе, верою ублажаем Тя, яко благую землю и плодоносную, преестественно израстившую Господа и Творца всея твари, злосмрадие наших прегрешений лютых очистившаго .
Песнь 4
Ирмос: Седяй в славе на Престоле Божества, / во облаце легце, / прииде Иисус Пребожественный, / нетленною дланию, и спасе зовущия: // слава, Христе, силе Твоей.
Носяй любовию твоею безмерною Спасителев, Паисие, крест на ра́мену, путь свой свершил еси яко равноангелен жития твоего земнаго и упокоился еси во обителех безстрастия и трезвения.
Яко финикс пышный в пустыни, блаженне Паисие, гору Синайскую, подвижниче, богомудро украси́л еси, и яко сладкоуханный крин облагоухал еси гору Афонскую ароматы честных подвиго́в твоих.
Троицы явился еси светозарнейшее зерцало, смиренномудрия живое столпописание, преподобне, и отцев Афонских божественная слава: отонюду вси тя воспеваем, Паисие.
Богородичен: Вся содержай горстию , Единый Господь и Спаситель мира, от всенепорочных ложесн Твоих прият плоть перстную и вознесе на небеса род человеческий.
Ин:
Ирмос: Ты моя крепость, Господи,/ Ты моя и сила,/ Ты мой Бог, Ты мое радование/, не оставль недра Отча/, и нашу нищету посетив./ Тем с пророком Аввакумом зову Ти:// силе Твоей слава, Человеколюбче.
На горах присенных Афона, богоносне подвижниче Паисие, вселься боголюбиво, явился еси древних отцев ныне соревнователь: сего ради и действы чудесными достойно прославился еси, равноангельне человече.
Крепость прияв с небесе богатно, блаженне Паисие, яко друг истинный Вседержителя и Бога, и хотящая быти яко настоящая ведал еси и вся козни льстиваго отгоняти ясно твоя молитвенники насталял еси.
Всецело в тебе божественная благодать вселившися, мироположницу многоценную показа тя дарований ея честных: темже обремененных к тебе прибегающих души упокоевал еси, духоносне, наставляя их рассуждением твоим многим, отче Паисие.
Богородичен: Храме Божий, преиспещреный , всепетая Богородице, Паисием чтимая, иже на Афоне новоявле́нно просиявшим, моли Сына Своего и Всецаря молитвами преподобнаго дождь мне одождити душевнаго здравия и телеснаго.
Песнь 5
Ирмос: Ужасошася всяческая / о Божественней славе Твоей: / Ты бо, Неискусобрачная Дево, / имела еси во утробе над всеми Бога / и родила еси Безлетнаго Сына, / всем, воспевающим Тя, // мир подавающая.
Умертвивый мудрование плотское всено́щными стоянии, слезами, молитвою и смирением, храм был еси Параклита светел, верныя освящаяй, со тщанием приходящия к тебе, треблаженне Паисие.
Возшел еси на лествицу добродетелей, Паисие, волю свою отсекая, и послушли́в был еси советом старца своего, всечудне, якоже железо в пещи ковачу, во еже благоугодну быти.
Мудрости чертог златокова́нный был еси, купно и любве мироположница; сего ради к тебе вси земнородных лицы притекаху и советы послушаху твоя божественныя коемуждо, Паисие.
Богородичен: Велие таинство Рождества Твоего уясниша всех пророков лицы, Дево; Тя бо свещник, гору приосененную , ковчег и стамну нарекоша златую, жезл, купину неопальную, скрижаль и божественную трапе́зу.
Ин:
Ирмос: Вскую мя отринул еси/ от лица Твоего, Свете незаходимый,/ и покрыла мя есть чуждая тьма окаяннаго,/ но обрати мя, и к свету заповедей Твоих// пути моя направи, молюся.
Единонравных светлосте, Афона украси́телю, и славо, и похвало, живый и по кончине, назираеши любовию чтущих тя и единовременне всех упреждаеши, призывающих тя верно на помощь, Паисие.
Уте́шнейший отче, благодать с небесе неоскудно приял еси, яко подвиго́в твоих воздаяние, темже притекающия к тебе невредимы сохрани от стрел вражиих, сострадательный Афона жителю, Паисие.
Едину Жизнодавца добро́ту, отче, непостижную и неизреченную взыскуя, с юношеских лет, Паисие, мира вся сладкая презрел еси, яко прах и пепел, духоносный человече, равноангельный.
Богородичен: Ангелов радосте, человеческаго рода безценная святыне, Благодатная Богородице Дево всенепорочная, избави мя страстей и души́ моей неду́гующей, взываю, здравие подаждь.
Песнь 6
Ирмос: Божественное сие и всечестное / совершающе празднество, / богомудрии, Богоматере, / приидите, руками восплещим, // от Нея рождшагося Бога славим.
Преходящих всех превыше явился еси в последняя времена, Паисие, помышляя себе яко комара последняго: сего ради и непреходящия радости сподобился еси.
Стези показал еси яже ко Господу, якоже руковождь незаблудный лико́м монашеским и миряном, люте обуреваемым житейскими волненьми.
Недугующия скоро врачевал еси, спешащих к божественней твоей благодати, иныя же от бед спасал еси, Паисие, твоими ко Спасу нашему молитвами.
Богородичен: Предстательница еси неусыпная призывающим Тя, Владычице, и отрада яже в бурях скорбей люте болезнующим, Богородительнице.
Ин.
Ирмос: Молитву пролию ко Господу/ и Тому возвещу печали моя/ яко зол душа моя исполнися/ и живот мой аду приближися/, и молюся, яко Иона:/ от тли, Боже, возведи мя.
Во одежды черныя и ветхия облекся, подвижничества делание поревновал еси чистильщика творити, Паисие блаженне, и прибегающих к тебе представити Христу убеленными и полными помысло́в душепитательных и дел.
Вражию упразднил еси силу неустанными твоими, Паисие, труды и превыше естества честными твоими подвиги: сего радии благодать обильно восприял еси от лютаго навета местника всех избавити.
Ныне воспевающе тя, святых совсельниче, яко единоревностна тем тя почтим, своима бо очима сподобился еси зрети святых сонм, с нимиже Лукиллиана и славянина, Паисие, Власия.
Богородичен: Неискусомужная Пресвятая Владычице, сущим во обстояниих скорая спасительнице, не презри точения слез моих, но в поток преложи радости несказанныя, Благая, Паисия святаго молитвами.
Кондак. Глас 8:
Подобен: Взбранной:
От Фарас яко солнце возсиявшаго и горе Афонстей в наша дни зарями явльшагося жития боголюбиваго, в песнех вси восхвалим, яко безбрачных правило и всесветлый свещник высшия любве, рачением зовуще: Радуйся, отче Паисие.
Икос:
Ангел любве ныне миру явился еси, Паисие, безбрачных светлосте. Возшед бо добродетелей всех на высоту, целитель в скорбех был еси людем благочестивым и воздвигл еси их вопити ти:
Радуйся, подвига божественная лиро: радуйся, рассуждения кини́ро .
Радуйся, помысло́в благих столпописание: радуйся, благославных браней облистание.
Радуйся, звездо новосветлая Афонским дубравам: радуйся, основание смирения и молитвы неустанныя.
Радуйся, яко показался еси рог предведения: радуйся, яко явился еси бдения увенчание.
Радуйся, подвижничества огню всесветлый: радуйся, светоче мудрости и трезвения.
Радуйся, егоже ради афониты ликуют: радуйся, к немуже благочестивии взывают.
Радуйся, отче Паисие.
И чтется Минологий дне (т.е. Синаксарий), иже 12 иулия. По сих глаголем:
В тойже день память новоявле́нно на Святей Горе просиявшаго преподобнаго и богоноснаго отца нашего Паисия:
Стихи:
Радуйся, Паисие, достойно возглашаем, мудрости светило Афона нововосветлое. Ангел на Афоне свтетосияннен явился еси, смертное превозшедый, Паисие, естество.
Синаксарь.
Новоявле́нный светильник Христовы Церкве Паисий Афонский: <…>
…Егоже святыми молитвами, Христе Боже, помилуй и спаси нас. Аминь.
Песнь 7.
Ирмос: Не послужиша твари богомудрии, / паче Создавшаго, / но, огненное прещение мужески поправше, / радовахуся, поюще: // препетый отцев Господь и Бог, благословен еси.
Противится гордым Господь и благодать дает смиренным, Паисие подвижниче, всем рекл еси, яко Иаков божественный глаголет, преподобне, смирения писчая дщице.
Ведая, священнейше, яко воистинну разделяют от Творца лукавы помыслы, к Тому приближа́лся еси в житии твоем, блаженне, благими помыслы и богоугодными.
Столп явился еси ныне мудрости Божией несокрушимый, Паисие, и лучезарный образ рассуждения: сего ради упокоевал еси притекающих всеблагоговейно к келлии твоей, ищущих молитвы твоея.
Богородичен: Крепчайшее на враждебника оружие, Богородительнице Дево, во бранех имамы, предстательство Твое ко всечестному Сыну Твоему и Богочеловеку, Егоже зачала еси неизреченно.
Ин.
Ирмос: Отроцы еврейстии в пещи/ попраша пламень дерзновенно/ и на росу огнь преложиша, вопиюще:// благословен еси, Господи Боже, во веки.
Ликует Афонская Гора, юже освятил еси, Паисие, подвигом, и обитель наперсника Христова, яко богатство божественное имущи всесвященный гроб твой.
Да предвариши на помощь прося́щим скораго твоего заступления, во единем мгновении в различных ме́стех являлся еси, преподобне, молитвенники твоя ограждая.
Явился еси ныне, исполнь божественнаго желания, Паисие треблаженне, и житие твое бысть славословие приснотекущее, преподобне, к Богу Всевидцу.
Богородичен: Нощь страстей моих неудобь носимых расточи светом благодати твоея, Богородице чистая, и день спасения возсияй ми, молюся, Паисия молитвами.
Песнь 8.
Ирмос: Отроки благочестивыя в пещи / Рождество Богородичо спасло есть, твоего
Дом молитвы непрестанныя быв, сподобился еси Господа Бога зрети своима очима, Пресвятую Владычицу, святаго ангела твоего, Лукиллиана мужественнаго и Евфимию божественную, Паисие.
Ум твой очистив неустанною молитвою, плоть твою бореньми богоизрядными , преподобне, и душу любовию твоею ненасытною, отгнал еси лютыя страсти, яко одежды своя совлекая, Паисие, души́ отеческая светлосте.
Велий Паисие ныне явился еси наставник и врач скорейший, лечбами своих учений исцеляяй немощствующих, преподобне, елицы к тебе сердца простираху на Горе Святей, молитвы твоея ко Творцу взыскующе.
Богородичен: Благоглаголиву птицу явила еси, Всенепорочная Богомати в саду Твоем, мудраго Паисия, егоже божественная речения во своих сердцах, Владычице, нося́ще, яко богатство священное, Тя поем в безконечныя веки, радующеся.
Ин.
Ирмос: На горе святей прославльшася / и в купине огнем Приснодевы Моисеови тайну явльшаго, / Господа пойте // и превозносите во вся веки.
Подобник бранем Георгия, иже на Афоне светло подвизавшагося ныне и Арсения новаго всеблаженнаго явился еси, богоносне, ревнителю преподобным, Паисие, светоносным.
Облеклся еси во многоценную ризу нетления, мудре, яко не яве подвизавыйся и возлюбивый сызмальства, преподобне, всех святых, ихже, Паисие, житие подражал еси.
Помыслом, подвижниче, невозвратным, от мира удалился еси, афоните славне, и крест Господень взем, преподобне, возсиял еси в мире своею премирною, Паисие, любовию.
Богородичен: Девства добро́тою преукраше́на и просиявши паче солнечнаго блистания, правды Солнце наше зачала еси, Дево, разрешившаго мглу страстей наших долувлекущих.
Песнь 9.
Ирмос: Всяк земнородный / да взыграется, Духом просвещаем, / да торжествует же Безплотных умов естество, / почитающе священное торжество Богоматере, / и да вопиет: / радуйся, Всеблаженная Богородице, // Чистая Приснодево.
Возсиявый яко светильник ныне всем, озарил еси монашествующих паству, Паисие, твоих подвиго́в ясными светлостьми, и верных чины, притекающих к тебе. Темже вси яко златозарнейшее светило тя почитаем новосветлое.
Отче святый, непорочно житие твое на земли свершил еси и светильник неугасаемый быв, подвигом вся страны́ души твоея сохранил еси, сего ради и притекл еси радуяся к небесному граду, идеже восприим мзду трудов твоих, радуешися.
Яко орга́н Живоначальнаго Духа, честный Паисие, любовию славим тя, святоименныя горы похвало, и гроб твой чудоточный лобызающе, во ограде Богослова, преподобне, молитв твоих просим ко Творцу.
Богородичен: Роса Тебе чистая промышления о всех человецех даровася, яко Богоматери чистейшей и источнику благодати: сего ради к покрову предстательства Твоего прибегающе на всяк день приемлем, вернии, реки даров приснотекущих Твоих.
Ин.
Ирмос: Ужасеся о сем небо,/ и земли удивишася концы:/ яко Бог явися человеком плотски,/ и чрево Твое бысть пространнейшее небес./ Тем Тя Богородицу// Ангелов и человек чиноначалия величают.
Яко ангел пожив на земли, Михаила Чиноначальника видел еси своима очима, Анну с праведным Иоакимом, Екатерину Всемудрую, Пантелеи́мона славнаго, Варвару, Евфимию, Паисие богомудре, и множество возлюбленных святых твоих.
Горлица благостыни и славий воздержания, молитвы и подвига, боголюбивых всех усладил еси ныне советами, блаженне, о всемирных и о коегождо потребе , Паисие: и о яже между различны народы нестроениих , коих разрешитель явился еси скорейший.
Не престай умоляя Всецаря, подражателю Исаака, отца всем подвижником , преподобне Паисие, розго воистинну Божественныя любве, иже яко на небеснем и всесветлем крузе подвизашеся , о чтущих тя медоточными песньми всегда.
Богородичен: Поминай прилежно, Всенепорочная, верно притекающих к покрову Твоему и Сына Твоего ныне славословящих светло песньми и память всесветлую Паисия, подвижника мудраго, осветившаго Афон, ныне совершающих, богоблагодатная Всецарице.
Светилен:
Подобен: жены услышите:
Озареньми подвига во Святей Горе ныне просиявшаго и благодати Божией сиянием верных озарившаго почтим Паисия, вопиюще: расточи мглу грехов нам, совершающим твою память.
Слава и ныне, Богородичен:
Святыя Горы назирательнице и управительнице неусыпная, Богородительнице Дево, Паисия молитвами, цвета с луга Твоего мироточнаго, спаси от бед всех величающих любовию тя во веки веков.
На Хвалитех поставим стихов 4 и поем Стихиры, глас 1:
Подобен: Что вас наречем, святии:
Что тя нареку, Паисие;/ Смирения писчую дщицу,/ монашествующим Божественный глас,/ бдения приятелище,/ воду мудрости всем наипрозрачнейшую,/ светозарную и чистую/ немудрым без меры источаемую всегда,/ людем жаждущим словес твоих благонапояющих улучити:/ темже ти зовем:// Радуйся, Афона святыне.
Что тя нареку, Паисие;/ воздержания мироположницу, постничества исполнение,/ безстрастия божественный столп,/ непрестанныя молитвы богомудраго рачителя/ и всяческих добродетелей жилище:/ сего ради тя выну яко равноангельна человека почитая,/ вопию ти, божественне:// моли спастися душам нашим.
Что тя нареку, Паисие, Афона благоглаголиву гусль ,/ обители Богослова сокровище/ и лиру божественную уединеннаго жительства,/ самви́ку сладкозвучную божественнаго ве́дения/ и лучшаго жития арфу благострунную, ты бо яко светоч нововозженный еже о Христе совершенства,// моли спастися душам нашим.
Что тя нареку, Паисие,/ келлии Панагуды горняго жителя,/ Горы Святыя славу,/ стражи пяти дверей ума неусыпнаго хранителя,/ сосуд Параклита златоиспещренный:/ ты бо хотящая быти предзрел еси/ и к жизни нестареемей направлял еси// верою к тебе притекающих.
Силою Параклита, Паисие,/ явился еси по кончине чудес самоделатель/ и неоскудное воистинну верным врачевание:/ на одре бо узрел еси, дивне, люте болящаго,/ и от беды и от смерти спасл еси его/ теплыми твоими молитвами// ко Господу Спасу твари.
Всем чтущим память твою/ святый предстатель еси, богоносне подвижниче,/ и не сподобившимся зрети твое житие преподобное,/ обретаешися поборник и изба́витель/ и спаситель божественный:/ многи бо уврачевал еси скоро по кончине твоей, Паисие,// содействием Духа.
Слава, глас 5.
Преподобне отче,/ к горним от младенства устремляяйся,/ равноангельным жительством и подвигом неустанным/ свершил еси житие твое:/ сподобился еси быти/ жилище златокованное Всесвятаго Духа,/ покрываяй благодатию благочествующих собрания:/ и ныне, Паисие всемудре,/ Христу срадуяся,/ ниспосли нам молитвы твоя всечестныя// и спаси моленьми твоими к тебе прибегающих.
И ныне, Богородичен:
Блажим Тя, Богородице Дево,/ и славим Тя, вернии, по долгу,/ град непоколебимый, стену необоримую,/ твердую предстательницу// и прибежище душ наших.
На Литургии
Прокимен: Честна пред Господем смерть преподобных Его.
Стих: Что воздам Господеви о всех, яже воздаде ми.
Ап.: Гал 5:22 - 6:2.
Ев.: Лк. 13:10-17.
Причастен: В память вечную:
Стихира.
Радуйся, столпниче послушания, чистейшия любве, воздержания и молитвы: радуйся, подвизающихся на Афоне благоле́пото, ныне подвигом просиявый Паисие.
Двустишие:
Идеже хощет, дышит, Паисие, рекл ми еси, Божий Дух,
тебе тщащуся, Харлампию.
Конец и слава истинному Богу нашему.
Господина Харлампия М. Бусиа,
великаго песнописца Александрийския Церкве.
Служба
Новоявле́нно на Святей Горе Просиявшему
преподобному и богоносному отцу нашему
Паисию Новому,
егоже память совершается 29 иуния (+ 1994)
На малей вечерни, на Господи воззвах, стихиры, глас 1:
Подобен: Небесных чинов:
Новоявле́нно подвигом суровым на Святей Горе просиявшаго/ и отеческими наставлении своими многия просвещщаго/ восхвалим, взывающе:/ о нас умилостиви Избавителя,/ подвижниче мудре, Паисие.
Каппадокии славу,/ безбрачных похвалу,/ монашествующих предстателя,/ и верных ко обоже́нию путеводителя/ песньми сладкозвучными восхвалим Паисия,/ яко добродетелей осияние// и веры маргарит многоценный.
От юности мира красная вся, яко отре́би,/ прах и пар помышлявшаго,/ Паисия новаго в подвижницех богоносных вси почтим, возглашающе:/ твоими молитвами сподоби// любити нам непреходящая.
Уя́звлен Христовою любовию от младенства, преподобне,/ любве сосуд явился еси сияяй,/ до кончины облегчавая притекающих благоговейно к келлии твоей,/ и отраду даруяй// стенящим во мрачней сени многоразличных скорбе́й.
Слава, глас 8.
Преподобнолюбцев множества/ и на Афоне подвизающихся сонм,/ сойдемся днесь в память Паисия,/ новоявле́ннаго веры светильника,/ достойно того восхвалити подвиги:/ Той бо яко светоч заблуждшим,/ единонравным наставник, обуреваемым спаситель,/ мрак уныния всем расточил еси/ благодатию Светодавца Христа и Спаса рода нашего:/ и ныне с лики ангельскими/ и с чинми преподобных радуяся,/ Всецарю славы молится/ дати нам, его память почитающим// здравие купно и мир неколеблемый.
И ныне, Богородичен.
Владычице, приими молитвы раб Твоих и избави нас от всякия нужды и печали.
На стиховне стихиры, глас 2:
Подобен: Доме Евфрафов:
Приидите, Афонитов сонми, сошедшеся, в песнех достойно восхвалим память Паисия блаженнаго.
Честна пред Господем смерть преподобных Его.
Просияв новоявле́нно, яко звезда светолучная, просветил еси сердца помраченная, отче богоносне Паисие.
Святым, иже суть на земли Его, удиви Господь вся хотения своя в них.
Гроб твой честный, яко источник исцелений, обитель Богослова и́мать, якоже дух твой небеса, Паисие.
Слава, Троичен:
Спаси от всякаго зла поющих Тя, Божество Трисвятое, моленьми Паисия, срадовавшаго Ти ся.
И ныне, Богородичен:
Разреши христиан от прелести вражия, вкупе с Паисием, на пажити твоей подвизавшимся, Богоневесто.
Ныне отпущаеши: Трисвятое. Тропарь с великия вечерни и отпуст.
На велицей вечерни, стихиры, глас 1:
Подобен: Всехвальнии мученицы:
Пребываяй в послушании и хранении чувств/ и молитве от юности, / плоти долувлекущия страсти отринул еси/ и к высоте несказанней возшел еси/ безстрастия и трезвения, отче Паисие./ Отонюду вси твоя почитаем// ко обоже́нию неусыпныя подвиги.
Храм светел себе сама́го творяй Святаго Духа,/ и благоухание Христово быв, Паисие,/ к твоей келлии приходящих радовал еси/ всех освящаяй, преподобне,/ ищущих благословения твоего,// да жития про́йдут море многобурное .
Подражатель быв добродетели мудраго Арсения,/ во отечествии твоем просиявшаго/ и бранем древних старцев, подвижников афонских желая подражати ,/по лествице славных подвиго́в совершенства о Христе возшел еси, всечестне,// и яко звезда днесь возсиял еси.
Верных лицы/ от Кареи благоговейно притекаху,/ по вся дни во твою келлию, Паисие,/ да бремени скорбей свободятся/ твоим боголюбивым преподобием/ и восприимут дерзновение / во еже врага силу сокрушити// твоими непрестанными ко Господу молитвами.
Благодать неоскудно на тя излиявшися, преподобне,/ святаго Духа,/ мудрости ,/ показа тя столпописание одушевленное/ светильник предзрения светел/ и рассуждения путеводный огнь :/ сего ради озарял еси верою приходящих к тебе// помраченная сердца, Паисие.
Обитель Богослова честная, /иногда насладившися твоих мудрых увещаний,/ ликует и радуется,/ ныне в недрех яко богатство божественное имущи,/ гроб всеблаженнаго Паисия,/ верным источающий/ неистощимыя токи всегда// к нему притекающим.
Паисие, благодать обильную с небесе восприял еси/ помогати всем страждущим и в нуждех сущим:/ отонюду по кончине призирал еси, преподобне, недугующия/ и скорое исцеление Божией благодатию даровал еси,// являяй дерзновение, еже имаши ко Господу.
Карки́на скорый целитель/ и разрешитель неплодия/ в последняя времена явился еси, Паисие,/чудес половодное стремление :/ еще же и отвергающим твое теплое заступление/ подаеши своим изволением скоро потребное,/ течение же жизненное твоими молитвами прелагаеши// призывающим тя.
Слава, глас 6.
Подвижническою украшен светлостию,/ Церковь всю в последняя времена осиял еси,/ Паисие, Святогорче духоносный./ Разумно бо на Афоне жительствовав,/ безстрастия и мудрости ме́рило явился еси известнейшее / и верных ученьми твоими озарил еси,/ превыше плоти быв,/ благодать обрел еси/ молитися непрестанно о любовию чтущих тя// и воспевающих всечестную память твою.
И ныне, Богородичен: Кто тебе не ублажит:
На литии Стихиры самогласны:
Глас 1.
От юности Христу себе сама́го возложивый/ терпением, молитвою и смирением,/ благих помысло́в некра́домо вместилище бысть, Паисие,/просияв бо любовию ко ближнему совершенною,/ безбрачных собрание возрадовал еси/ и верных чины возвеселил еси:/ и ныне, плоть перстную отринувый,/ с невещественными чинми и преподобными/ Господа славословиши,/ моля непрестанно о чтущих тя.
Глас 2.
Арсения преподобнаго, на Фарасах просиявшаго/ стезям последовав,/ добродетельных деяний образ / и всякия добродетели правило вернейшее явился еси, Паисие/ на страсти подвизавыйся/ и от всего вещественнаго ум очистивый,/ своими мудрыми речами верных наставлял еси/ нравов благолепоте и стяжанию страха Божия:/ и ныне, афоните божественный,/ молися Христу Церковь умирити// и нас подражати трудом твоим сподоби.
Глас 3.
Никакоже не отвратил еси благочестия кормила,/ дондеже достигл еси в пристанище победы безсмертныя,/ древняго Елеазара подражая,/ богоносне Паисие,/ помыслы благими своя страсти победивый/ и многия наставивый помыслы благочестия имети/ на лоне Авраамове упокоился еси/ и молишися о душах наших.
Глас 4.
Радуется днесь святоименитая Гора Афонская/ строгому подвигу твоему,/ имже ты древних отцев добродетели явил еси,/ Паисие богосла́внеший,/ изрядно же празднуют монашествующих лицы/ треблаженныя ограды Богослова,/ имущи источник освящения,/ всесвященный гроб твой:/ темже убо с небесе одожди всем молитвами твоими обильно/ струи Божия благодати/ и спаси от смертныя тли / души чтущих тя, всеславне.
Слава, глас тойже.
Во страсе Божии совершаяй освящение/ очистил еси себе от всякия скверны/ плотския и душевныя, Паисие,/ храм себе соделавый Бога живаго:/ единонравных и земнородных всех лики освящаеши/ свыше данною тебе благодатию:/ и ныне вечныя жизни почесть приявый,/ непрестанно молишися о чтущих священную память твою.
И ныне, Богородичен:
От всех бед рабы Твоя сохраняй,/ благословенная Богородице,/ да Тя славим,/ надежду душ наших.
На стиховне стихиры, глас 5.
Подобен: Радуйся, постников:
Радуйся, любве огнесияние,/ пламенем своих подвиго́в честных/ путеводивый в последняя времена/ лики иже на Афоне единонравных,/ подвижников светлосте и правило. /Христу бо моляся,/ недугующаго на себе перенял еси болезни/ и недуг того преболезненный до кончины сего носил еси, честне Паисие,/ яко богатство многоценное,/ радуяся, яко ближняго своего облегчил еси/ и подъял еси стражбу́ его// яко, грехи наша Господь.
Стих: Честна пред Господем смерть преподобных Его:
Радуйся, Фарас новая о́трасле ,/ горы Афонския благоцветнейшая розго,/ горы Синайския крине/ и обители Стомийския цвете многоцветный и сладкоуханный/: Паисие преподобне,/ путевождю непрелестнейший ко спасению,/ исполнения паствы благочестивыя похвало/ обители Богослова бысть:/ Сия бо, яко твердыню имать непоколебиму/ множество советов твоих/ и гроб твой, егоже ныне указа Господь,/ егда восхоте прославити тя// яко купель исцелений
Стих: Блажен муж бояйся Господа:
Радуйся, многодетныя матере плод святый,/ Паисие преподобне,/ рождей себе сама́го постом и молитвою,/ да напитаеши Божиею благодатию,/ мир, желающий веры познати всю истину/ и направиши на путь спасения притекающих/ советами твоими всемудрыми:/ сеяй бо любве Божия се́мена,/ пожал еси плод многоплодный жизни нестареемыя/: еяже сподоби всех воспевающих тя// и предстательства просящих твоего ко Господу.
Слава, глас 8.
Наставления и рассуждения талант приял еси,/ яко мзду постнических трудов твоих/от Христа, Паисие тревеликий,/ ты бо предзрети грядущая сподобился еси/и напаяти бразды душ благочестивых/ нектаром богомудрых речей твоих:/ возсиявый, яко новый Церкве путеводный огнь ,/ к Солнцу мысленному востекл еси./ Егоже моли сподобити и нас// вышния светлости.
И ныне, Богородичен:
Владычице, приими молитвы раб Твоих/ и избави нас// от всякия нужды и печали.
Тропарь, Глас 5:
Подобен: Собезначальное Слово:
Иже во Святей Горе днесь просиявшаго/ непрестанным подвигом и умною молитвою,/ восхвалим, вернии, честнаго Паисия:/ яко ши́пок убо благоцветный ду́ши облагоухал есть/ словесы богозвучными:/ и ныне подает благая// к его молитвам притекающим.
Слава, и ныне, Богородичен:
Радуйся, Двере Господня непроходимая; / радуйся, стено и покрове притекающим к Тебе. / Радуйся, необуреваемое пристанище и неискусобрачная, / рождшая плотию Творца Твоего и Бога. / Молящи не оскудевай о воспевающих / и кланяющихся рождеству Твоему.
По 1 стихословии седален, гл. 1.
Подобен: Гроб Твой, Спасе:
Божественными помышленьми сердце исполнив, и зарями безстрастия себе просветив, всю подсолнечную светом путеводил еси и наставил еси верныя любовию взывати ти: Радуйся, жилище всеразличных дарований, Паисие преподобне.
Слава, тойже.
И ныне, Богородичен:
Дубравы и окраины святаго луга Твоего ныне богомудро освятил есть токами слез своих, Матеродево, Паисий, иже Тя узре преестественно в видении, моляся в своей убозей келлии, Всепетая.
По 2 стихословии седален, глас 4:
Подобен: Скоро предвари:
Фарас святыню, Горы Святыя явление, и славу преславную обители Богослова верою восхвалим, вопиюще: не престай выну приснодвижно молитися, подати верным мир и здравие, любовию совершающим твою память, Паисие.
Слава, тойже.
И ныне, Богородичен:
Всенепорочная Владычице, по рождестве, якоже и прежде рождества пребывши чистая: от страстей мою душу очисти и подаждь слезы покаяния моему смирению, да воспою освященным сердцем и очище́нныма устнама Твое многое ко мне сострадание .
По полиелеи седален, глас 3.
Подобен: Красоте девства:
Благодати Божия обиталище, верных ко обоже́нию преложение и подвижников Христу новоявле́нно благоугодивших оттисновение, цветами песен сладкозвучных увенчаим, яко сосуд многоценен помысло́в благих, зовуще: светлый Афона знаменоносче , радуйся, Паисие богомудре.
Слава, тойже.
И ныне, Богородичен:
Омраченную мою душу озари светом благодати божественнаго рождества Твоего, Дево Чистая, Мариам, отчаянных надеждо, мрак отжени безмерных прегрешений моих, яко да обрету милость в день судный и любовию немолчно вопию Ти: Радуйся, Благодатная!
Прокимен:
Честна пред Господем смерть преподобных Его.
Стих: Блажен муж, бояйся Господа:
Евангелие от Луки, зачало 24.
50 псалом.
Слава:
Молитвами преподобнаго Твоего :
И ныне:
Молитвами Богородицы:
Самогласен. Гл. 6:
Стих: Милостиве , помилуй мя, Боже, по велицей милости Твоей/ и по множеству щедрот твоих очисти беззаконие мое.
Вся вещественная изде́тска отринувый/ и подвигом суровым на высоту безстрастия возшедый,/ Паисие всеблаженне,/услыши нас, молящихся тебе,/ впери ум притекающих к тебе/ во еже вожделети лучшая,/ яко да и мы вечныя жизни улучим,/ чтущии память твою,// афонских отцев крине новосажде́нный.
Спаси, Боже, люди Твоя:
Таже каноны преподобному.
Канон первый. Егоже краегранесие: Добродетели звезду новосветлую, Паисия пою. Х. Глас 4.
Песнь 1.
Ирмос: Отверзу уста моя, / и наполнятся Духа, / и слово отрыгну Царице Матери, / и явлюся, светло торжествуя, // и воспою, радуяся, Тоя чудеса.
Ныне, Паисие, в горе афонстей просиял еси лучами жительства твоего честнаго и мудрых словес, имиже мглу уныния расторгл еси коемуждо из смертных, притекающих к тебе.
Ши́пок всеблагоуханный душа твоя показася, израстивши мудрости, послушания и молитвы цве́ты всеутешныя, веселящия яже с любовию тщащихся приходити к тебе всегда, отче Паисие.
Отребил еси вся советы лукаваго, Паисие блаженне, благими помыслы, яже носил еси, подобно же́злам любве несказанныя ко всем в сердце твоем.
Правду Божию, якоже рекл еси, Паисие, храняй в житии твоем, кротких явился еси правило и умиряеши верных безмятежно. Темже сподобился еси божественныя светлости.
Богородичен: Едина неискусобрачная и пренепорочная Владычице, от скверны мя очисти прегрешений многих и сподоби мя честнаго Паисия нравом подражати, яко да спасуся.
Ин канон, глас 8.
Ирмос: Колесницегонителя фараона погрузи/ чудотворяй иногда/ Моисейский жезл, крестообразно поразив/ и разделив море:/ Исраиля же беглеца пешеходца спасе,// песнь Богови воспевающа.
Всесличными ныне песньми и пеньми медоточными светло восхваляем всесвященную твою память, Паисие треблаженне, иже на Афоне ныне просиявый, яко светило всесветлое огнесияньми богозарных добродетелей твоих.
Афонитов новосветлое облистание, чистым твоим житием, подвигом, не яве творимым, богатством любве, ко ближнему и ко Господу, и теплыми молитвами твоими весь мир просветил еси, светло тя чтущий, Паисие.
Испра́витель явился еси нелестный, Паисие, и путевождь незаблудный к жизни нестареемей притекающим к тебе и верою взыскующим советов твоих всемудрых, о еже како всенаследовати добродетель и ангелов Божиих житию поревновати.
Богородичен: тесноты́ житейския испроси избавления, чистая Марие, притекающим к Тебе и прегрешений оставления, Дево Богопочтенная, Паисия молитвами, на пажити Твоей святей ныне богоугодно пожившаго.
Песнь 3.
Ирмос: Твоя песнословцы, Богородице, / живый и независтный Источниче, / лик себе совокупльшия, духовно утверди, / в Божественней Твоей славе // венцев славы сподоби.
Гимн любве вострубивый, волю свою отсекал еси, всегда иский творити волю другаго, якоже глагола Павел тревеликий, Паисие духоносне.
Фарас огнесияние новосветлое, Арсения имел еси путевождя ко свету вечному, от негоже приял еси божественное крещение, Паисие, добродетелей жилище.
В горе Афонстей мед премудрости подвижническия собирал еси, яко пчела неусыпная: сего ради и нектар источал еси от чистых устен твоих непрестанно, отче Паисие.
Богородичен: Плоти моея хотения долувлекущая, Всенепорочная, укроти скоро и души моея очи устреми к нетленным, яже на небесех, Владычице, яко да выну ублажаю Тя.
Ин:
Ирмос: Небеснаго круга Верхотворче, Господи,/ и Церкве Зиждителю,/ Ты мене утверди в любви Твоей,/ желаний краю, верных утверждение,// едине Человеколюбче.
Исаака советы и увещания, преподобне, сирийскаго подвижника божественнаго имея, Паисие, яко светозарнаго путевождя добродетельнаго твоего жития, пришел еси к высоте обоже́ния неудобовосходней.
Свещу преподобия на Афоне новоявле́нно возжегл еси и мир весь осветил еси лучами советов твоих насущных, о еже како народом разным в мире жити , отче Паисие.
Денными и нощными молитвами твоими и моленьми пременил еси стремление бедственных вещей рода человеческаго ради; и ныне благоутробному Богу о нас предстоиши моляся, Паисие, яко сострадательнейший
Богородичен: Богородице Дево, горы Афонския преславное святилище, всея твари величание и похвало, Паисия молитвами, служителя Твоего преподобнаго, всех от напастей избави и скорбей.
Седален, глас 3: Удивися Иосиф:
Вселися в тя, подвижниче, святаго и богоначальнаго Уте́шителя благодать и предоброе показа тя Премудрости Божия приятелище; ты бо монашествующих соборы возвеселил еси всеблагоговейно к тебе притекающия и ищущия молитв твоих святых и советов твоих всемудрых: сего ради вси тя достодолжно восхваляем, Паисие.
Слава и ныне, Богородичен:
Луга Твоего, Чистая, святаго и благоуханнаго на Афоне, Мариам, ныне, Мати Божия, шипок божественный Паисия богодухновеннаго воспевающе, верою ублажаем Тя, яко благую землю и плодоносную, преестественно израстившую Господа и Творца всея твари, злосмрадие наших прегрешений лютых очистившаго .
Песнь 4
Ирмос: Седяй в славе на Престоле Божества, / во облаце легце, / прииде Иисус Пребожественный, / нетленною дланию, и спасе зовущия: // слава, Христе, силе Твоей.
Носяй любовию твоею безмерною Спасителев, Паисие, крест на ра́мену, путь свой свершил еси яко равноангелен жития твоего земнаго и упокоился еси во обителех безстрастия и трезвения.
Яко финикс пышный в пустыни, блаженне Паисие, гору Синайскую, подвижниче, богомудро украси́л еси, и яко сладкоуханный крин облагоухал еси гору Афонскую ароматы честных подвиго́в твоих.
Троицы явился еси светозарнейшее зерцало, смиренномудрия живое столпописание, преподобне, и отцев Афонских божественная слава: отонюду вси тя воспеваем, Паисие.
Богородичен: Вся содержай горстию , Единый Господь и Спаситель мира, от всенепорочных ложесн Твоих прият плоть перстную и вознесе на небеса род человеческий.
Ин:
Ирмос: Ты моя крепость, Господи,/ Ты моя и сила,/ Ты мой Бог, Ты мое радование/, не оставль недра Отча/, и нашу нищету посетив./ Тем с пророком Аввакумом зову Ти:// силе Твоей слава, Человеколюбче.
На горах присенных Афона, богоносне подвижниче Паисие, вселься боголюбиво, явился еси древних отцев ныне соревнователь: сего ради и действы чудесными достойно прославился еси, равноангельне человече.
Крепость прияв с небесе богатно, блаженне Паисие, яко друг истинный Вседержителя и Бога, и хотящая быти яко настоящая ведал еси и вся козни льстиваго отгоняти ясно твоя молитвенники насталял еси.
Всецело в тебе божественная благодать вселившися, мироположницу многоценную показа тя дарований ея честных: темже обремененных к тебе прибегающих души упокоевал еси, духоносне, наставляя их рассуждением твоим многим, отче Паисие.
Богородичен: Храме Божий, преиспещреный , всепетая Богородице, Паисием чтимая, иже на Афоне новоявле́нно просиявшим, моли Сына Своего и Всецаря молитвами преподобнаго дождь мне одождити душевнаго здравия и телеснаго.
Песнь 5
Ирмос: Ужасошася всяческая / о Божественней славе Твоей: / Ты бо, Неискусобрачная Дево, / имела еси во утробе над всеми Бога / и родила еси Безлетнаго Сына, / всем, воспевающим Тя, // мир подавающая.
Умертвивый мудрование плотское всено́щными стоянии, слезами, молитвою и смирением, храм был еси Параклита светел, верныя освящаяй, со тщанием приходящия к тебе, треблаженне Паисие.
Возшел еси на лествицу добродетелей, Паисие, волю свою отсекая, и послушли́в был еси советом старца своего, всечудне, якоже железо в пещи ковачу, во еже благоугодну быти.
Мудрости чертог златокова́нный был еси, купно и любве мироположница; сего ради к тебе вси земнородных лицы притекаху и советы послушаху твоя божественныя коемуждо, Паисие.
Богородичен: Велие таинство Рождества Твоего уясниша всех пророков лицы, Дево; Тя бо свещник, гору приосененную , ковчег и стамну нарекоша златую, жезл, купину неопальную, скрижаль и божественную трапе́зу.
Ин:
Ирмос: Вскую мя отринул еси/ от лица Твоего, Свете незаходимый,/ и покрыла мя есть чуждая тьма окаяннаго,/ но обрати мя, и к свету заповедей Твоих// пути моя направи, молюся.
Единонравных светлосте, Афона украси́телю, и славо, и похвало, живый и по кончине, назираеши любовию чтущих тя и единовременне всех упреждаеши, призывающих тя верно на помощь, Паисие.
Уте́шнейший отче, благодать с небесе неоскудно приял еси, яко подвиго́в твоих воздаяние, темже притекающия к тебе невредимы сохрани от стрел вражиих, сострадательный Афона жителю, Паисие.
Едину Жизнодавца добро́ту, отче, непостижную и неизреченную взыскуя, с юношеских лет, Паисие, мира вся сладкая презрел еси, яко прах и пепел, духоносный человече, равноангельный.
Богородичен: Ангелов радосте, человеческаго рода безценная святыне, Благодатная Богородице Дево всенепорочная, избави мя страстей и души́ моей неду́гующей, взываю, здравие подаждь.
Песнь 6
Ирмос: Божественное сие и всечестное / совершающе празднество, / богомудрии, Богоматере, / приидите, руками восплещим, // от Нея рождшагося Бога славим.
Преходящих всех превыше явился еси в последняя времена, Паисие, помышляя себе яко комара последняго: сего ради и непреходящия радости сподобился еси.
Стези показал еси яже ко Господу, якоже руковождь незаблудный лико́м монашеским и миряном, люте обуреваемым житейскими волненьми.
Недугующия скоро врачевал еси, спешащих к божественней твоей благодати, иныя же от бед спасал еси, Паисие, твоими ко Спасу нашему молитвами.
Богородичен: Предстательница еси неусыпная призывающим Тя, Владычице, и отрада яже в бурях скорбей люте болезнующим, Богородительнице.
Ин.
Ирмос: Молитву пролию ко Господу/ и Тому возвещу печали моя/ яко зол душа моя исполнися/ и живот мой аду приближися/, и молюся, яко Иона:/ от тли, Боже, возведи мя.
Во одежды черныя и ветхия облекся, подвижничества делание поревновал еси чистильщика творити, Паисие блаженне, и прибегающих к тебе представити Христу убеленными и полными помысло́в душепитательных и дел.
Вражию упразднил еси силу неустанными твоими, Паисие, труды и превыше естества честными твоими подвиги: сего радии благодать обильно восприял еси от лютаго навета местника всех избавити.
Ныне воспевающе тя, святых совсельниче, яко единоревностна тем тя почтим, своима бо очима сподобился еси зрети святых сонм, с нимиже Лукиллиана и славянина, Паисие, Власия.
Богородичен: Неискусомужная Пресвятая Владычице, сущим во обстояниих скорая спасительнице, не презри точения слез моих, но в поток преложи радости несказанныя, Благая, Паисия святаго молитвами.
Кондак. Глас 8:
Подобен: Взбранной:
От Фарас яко солнце возсиявшаго и горе Афонстей в наша дни зарями явльшагося жития боголюбиваго, в песнех вси восхвалим, яко безбрачных правило и всесветлый свещник высшия любве, рачением зовуще: Радуйся, отче Паисие.
Икос:
Ангел любве ныне миру явился еси, Паисие, безбрачных светлосте. Возшед бо добродетелей всех на высоту, целитель в скорбех был еси людем благочестивым и воздвигл еси их вопити ти:
Радуйся, подвига божественная лиро: радуйся, рассуждения кини́ро .
Радуйся, помысло́в благих столпописание: радуйся, благославных браней облистание.
Радуйся, звездо новосветлая Афонским дубравам: радуйся, основание смирения и молитвы неустанныя.
Радуйся, яко показался еси рог предведения: радуйся, яко явился еси бдения увенчание.
Радуйся, подвижничества огню всесветлый: радуйся, светоче мудрости и трезвения.
Радуйся, егоже ради афониты ликуют: радуйся, к немуже благочестивии взывают.
Радуйся, отче Паисие.
И чтется Минологий дне (т.е. Синаксарий), иже 12 иулия. По сих глаголем:
В тойже день память новоявле́нно на Святей Горе просиявшаго преподобнаго и богоноснаго отца нашего Паисия:
Стихи:
Радуйся, Паисие, достойно возглашаем, мудрости светило Афона нововосветлое. Ангел на Афоне свтетосияннен явился еси, смертное превозшедый, Паисие, естество.
Синаксарь.
Новоявле́нный светильник Христовы Церкве Паисий Афонский: <…>
…Егоже святыми молитвами, Христе Боже, помилуй и спаси нас. Аминь.
Песнь 7.
Ирмос: Не послужиша твари богомудрии, / паче Создавшаго, / но, огненное прещение мужески поправше, / радовахуся, поюще: // препетый отцев Господь и Бог, благословен еси.
Противится гордым Господь и благодать дает смиренным, Паисие подвижниче, всем рекл еси, яко Иаков божественный глаголет, преподобне, смирения писчая дщице.
Ведая, священнейше, яко воистинну разделяют от Творца лукавы помыслы, к Тому приближа́лся еси в житии твоем, блаженне, благими помыслы и богоугодными.
Столп явился еси ныне мудрости Божией несокрушимый, Паисие, и лучезарный образ рассуждения: сего ради упокоевал еси притекающих всеблагоговейно к келлии твоей, ищущих молитвы твоея.
Богородичен: Крепчайшее на враждебника оружие, Богородительнице Дево, во бранех имамы, предстательство Твое ко всечестному Сыну Твоему и Богочеловеку, Егоже зачала еси неизреченно.
Ин.
Ирмос: Отроцы еврейстии в пещи/ попраша пламень дерзновенно/ и на росу огнь преложиша, вопиюще:// благословен еси, Господи Боже, во веки.
Ликует Афонская Гора, юже освятил еси, Паисие, подвигом, и обитель наперсника Христова, яко богатство божественное имущи всесвященный гроб твой.
Да предвариши на помощь прося́щим скораго твоего заступления, во единем мгновении в различных ме́стех являлся еси, преподобне, молитвенники твоя ограждая.
Явился еси ныне, исполнь божественнаго желания, Паисие треблаженне, и житие твое бысть славословие приснотекущее, преподобне, к Богу Всевидцу.
Богородичен: Нощь страстей моих неудобь носимых расточи светом благодати твоея, Богородице чистая, и день спасения возсияй ми, молюся, Паисия молитвами.
Песнь 8.
Ирмос: Отроки благочестивыя в пещи / Рождество Богородичо спасло есть, твоего
Дом молитвы непрестанныя быв, сподобился еси Господа Бога зрети своима очима, Пресвятую Владычицу, святаго ангела твоего, Лукиллиана мужественнаго и Евфимию божественную, Паисие.
Ум твой очистив неустанною молитвою, плоть твою бореньми богоизрядными , преподобне, и душу любовию твоею ненасытною, отгнал еси лютыя страсти, яко одежды своя совлекая, Паисие, души́ отеческая светлосте.
Велий Паисие ныне явился еси наставник и врач скорейший, лечбами своих учений исцеляяй немощствующих, преподобне, елицы к тебе сердца простираху на Горе Святей, молитвы твоея ко Творцу взыскующе.
Богородичен: Благоглаголиву птицу явила еси, Всенепорочная Богомати в саду Твоем, мудраго Паисия, егоже божественная речения во своих сердцах, Владычице, нося́ще, яко богатство священное, Тя поем в безконечныя веки, радующеся.
Ин.
Ирмос: На горе святей прославльшася / и в купине огнем Приснодевы Моисеови тайну явльшаго, / Господа пойте // и превозносите во вся веки.
Подобник бранем Георгия, иже на Афоне светло подвизавшагося ныне и Арсения новаго всеблаженнаго явился еси, богоносне, ревнителю преподобным, Паисие, светоносным.
Облеклся еси во многоценную ризу нетления, мудре, яко не яве подвизавыйся и возлюбивый сызмальства, преподобне, всех святых, ихже, Паисие, житие подражал еси.
Помыслом, подвижниче, невозвратным, от мира удалился еси, афоните славне, и крест Господень взем, преподобне, возсиял еси в мире своею премирною, Паисие, любовию.
Богородичен: Девства добро́тою преукраше́на и просиявши паче солнечнаго блистания, правды Солнце наше зачала еси, Дево, разрешившаго мглу страстей наших долувлекущих.
Песнь 9.
Ирмос: Всяк земнородный / да взыграется, Духом просвещаем, / да торжествует же Безплотных умов естество, / почитающе священное торжество Богоматере, / и да вопиет: / радуйся, Всеблаженная Богородице, // Чистая Приснодево.
Возсиявый яко светильник ныне всем, озарил еси монашествующих паству, Паисие, твоих подвиго́в ясными светлостьми, и верных чины, притекающих к тебе. Темже вси яко златозарнейшее светило тя почитаем новосветлое.
Отче святый, непорочно житие твое на земли свершил еси и светильник неугасаемый быв, подвигом вся страны́ души твоея сохранил еси, сего ради и притекл еси радуяся к небесному граду, идеже восприим мзду трудов твоих, радуешися.
Яко орга́н Живоначальнаго Духа, честный Паисие, любовию славим тя, святоименныя горы похвало, и гроб твой чудоточный лобызающе, во ограде Богослова, преподобне, молитв твоих просим ко Творцу.
Богородичен: Роса Тебе чистая промышления о всех человецех даровася, яко Богоматери чистейшей и источнику благодати: сего ради к покрову предстательства Твоего прибегающе на всяк день приемлем, вернии, реки даров приснотекущих Твоих.
Ин.
Ирмос: Ужасеся о сем небо,/ и земли удивишася концы:/ яко Бог явися человеком плотски,/ и чрево Твое бысть пространнейшее небес./ Тем Тя Богородицу// Ангелов и человек чиноначалия величают.
Яко ангел пожив на земли, Михаила Чиноначальника видел еси своима очима, Анну с праведным Иоакимом, Екатерину Всемудрую, Пантелеи́мона славнаго, Варвару, Евфимию, Паисие богомудре, и множество возлюбленных святых твоих.
Горлица благостыни и славий воздержания, молитвы и подвига, боголюбивых всех усладил еси ныне советами, блаженне, о всемирных и о коегождо потребе , Паисие: и о яже между различны народы нестроениих , коих разрешитель явился еси скорейший.
Не престай умоляя Всецаря, подражателю Исаака, отца всем подвижником , преподобне Паисие, розго воистинну Божественныя любве, иже яко на небеснем и всесветлем крузе подвизашеся , о чтущих тя медоточными песньми всегда.
Богородичен: Поминай прилежно, Всенепорочная, верно притекающих к покрову Твоему и Сына Твоего ныне славословящих светло песньми и память всесветлую Паисия, подвижника мудраго, осветившаго Афон, ныне совершающих, богоблагодатная Всецарице.
Светилен:
Подобен: жены услышите:
Озареньми подвига во Святей Горе ныне просиявшаго и благодати Божией сиянием верных озарившаго почтим Паисия, вопиюще: расточи мглу грехов нам, совершающим твою память.
Слава и ныне, Богородичен:
Святыя Горы назирательнице и управительнице неусыпная, Богородительнице Дево, Паисия молитвами, цвета с луга Твоего мироточнаго, спаси от бед всех величающих любовию тя во веки веков.
На Хвалитех поставим стихов 4 и поем Стихиры, глас 1:
Подобен: Что вас наречем, святии:
Что тя нареку, Паисие;/ Смирения писчую дщицу,/ монашествующим Божественный глас,/ бдения приятелище,/ воду мудрости всем наипрозрачнейшую,/ светозарную и чистую/ немудрым без меры источаемую всегда,/ людем жаждущим словес твоих благонапояющих улучити:/ темже ти зовем:// Радуйся, Афона святыне.
Что тя нареку, Паисие;/ воздержания мироположницу, постничества исполнение,/ безстрастия божественный столп,/ непрестанныя молитвы богомудраго рачителя/ и всяческих добродетелей жилище:/ сего ради тя выну яко равноангельна человека почитая,/ вопию ти, божественне:// моли спастися душам нашим.
Что тя нареку, Паисие, Афона благоглаголиву гусль ,/ обители Богослова сокровище/ и лиру божественную уединеннаго жительства,/ самви́ку сладкозвучную божественнаго ве́дения/ и лучшаго жития арфу благострунную, ты бо яко светоч нововозженный еже о Христе совершенства,// моли спастися душам нашим.
Что тя нареку, Паисие,/ келлии Панагуды горняго жителя,/ Горы Святыя славу,/ стражи пяти дверей ума неусыпнаго хранителя,/ сосуд Параклита златоиспещренный:/ ты бо хотящая быти предзрел еси/ и к жизни нестареемей направлял еси// верою к тебе притекающих.
Силою Параклита, Паисие,/ явился еси по кончине чудес самоделатель/ и неоскудное воистинну верным врачевание:/ на одре бо узрел еси, дивне, люте болящаго,/ и от беды и от смерти спасл еси его/ теплыми твоими молитвами// ко Господу Спасу твари.
Всем чтущим память твою/ святый предстатель еси, богоносне подвижниче,/ и не сподобившимся зрети твое житие преподобное,/ обретаешися поборник и изба́витель/ и спаситель божественный:/ многи бо уврачевал еси скоро по кончине твоей, Паисие,// содействием Духа.
Слава, глас 5.
Преподобне отче,/ к горним от младенства устремляяйся,/ равноангельным жительством и подвигом неустанным/ свершил еси житие твое:/ сподобился еси быти/ жилище златокованное Всесвятаго Духа,/ покрываяй благодатию благочествующих собрания:/ и ныне, Паисие всемудре,/ Христу срадуяся,/ ниспосли нам молитвы твоя всечестныя// и спаси моленьми твоими к тебе прибегающих.
И ныне, Богородичен:
Блажим Тя, Богородице Дево,/ и славим Тя, вернии, по долгу,/ град непоколебимый, стену необоримую,/ твердую предстательницу// и прибежище душ наших.
На Литургии
Прокимен: Честна пред Господем смерть преподобных Его.
Стих: Что воздам Господеви о всех, яже воздаде ми.
Ап.: Гал 5:22 - 6:2.
Ев.: Лк. 13:10-17.
Причастен: В память вечную:
Стихира.
Радуйся, столпниче послушания, чистейшия любве, воздержания и молитвы: радуйся, подвизающихся на Афоне благоле́пото, ныне подвигом просиявый Паисие.
Двустишие:
Идеже хощет, дышит, Паисие, рекл ми еси, Божий Дух,
тебе тщащуся, Харлампию.
Конец и слава истинному Богу нашему.