Канон святым мученикам Амморейским 42-м (прп. Иосифа Песнописца 2-й)
Analecta Hymnica Graeca, том VII (Рим, 1971), канон XI
Песнь 1. Глас 4. Наста́вльшему дре́вле [Изра́иля,/ бежа́щаго от рабо́ты фарао́новы,/ и в пусты́ни пита́вшему,/ пои́м Изба́вителю Бо́гу на́шему,// я́ко просла́вися].
Но́вую пе́снь принесе́м согла́сно днесь/
всесла́вным страда́льцем, мучи́теля низложи́вшым,/ и Бо́гу возопии́м:/ Го́споди, поми́луй всех моли́твами их.
[От оте́чества своего́] [отведе́ни бы́вше][1]/ руко́ю ва́рварскою, я́ко благочести́вии,/ плени́сте, му́ченицы, лука́ваго мироде́ржца./ Потща́стеся ча́шу су́рову пи́ти/ и́стины боже́ственныя.
Земна́я оста́вльшии/ и к Бо́гу дости́гнути потща́вшиися,/ согла́сно да восхва́лятся му́ченицы два и четы́редесяте,/ и́же пред язы́ки[2] испове́давше,/ сла́ву стяжа́ша.
Богородичен:
Равноси́льное Сло́во ражда́еши преесте́ственно,/ Пренепоро́чная, Отцу́ и Ду́ху, Чи́стая,/ Его́же добропобе́днии му́ченицы,/ два и четы́редесяте,/ Христа́ испове́давше, сла́ву стяжа́ша.
Песнь 3. Да не хва́лится хваля́йся си́лою свое́ю,/ я́ко пи́сано,/ но ве́рою непоро́чною ко Христу́ присту́пим,/ неукло́нно зову́ще,// я́коже оте́честии гла́си пропове́дают.
Отве́рзеся вам черто́г нетле́нный,/ до́бре по́двиг сконча́вшым,/ и восплеска́ша а́нгельская во́инства,/ зря́ща вы венча́емы.
«Что неи́стовствуя, безу́мне,/ ну́диши нас отрещи́ся/ Христа́ боже́ственнаго и́мене?/ - рече́ Фео́дор. Не и́маши победи́ти, творя такова́я,/ венцы́ побе́дныя прия́ти тща́щихся».
Да воспою́тся сладкопе́ньми боже́ственный Васо́й/ и с Константи́ном Фео́дор ди́вный,/ и Фео́фил, и му́дрый Калли́ст,/ предначина́тели ли́ка му́ченическаго.
Богородичен:
Свяще́нный му́чеников собо́р, Девома́ти,/ мо́лится лицу́ Твоему́ непреста́нно./ С ни́миже моли́ о па́стве, приле́жно чту́щей Тя,/ спасти́ся от вся́ческих искуше́ний.
Седален. Глас 8. Премудрость и Слово:
Отведени юзницы…
Песнь 4. Услы́ша проро́к [прише́ствие Твое́, Го́споди, разуме́ дела́ Твоя́ и ужасе́ся. Сла́ва си́ле Твое́й, сла́ва, Христе́, снисхожде́нию Твоему́][3].
Во́инством боже́ственным я́ве ополчи́вшеся,/ тмы беззако́нник победи́сте,/ и по́чести побе́дныя прия́сте,/ четы́редесяте и два всехва́льнии.
Вонми́ моле́нию на́шему, Го́споди,/ и соверши́ тече́ние на́ше,/ вопия́ху умерщвля́еми,/ до́блии му́ченицы, ра́дующеся./ Тех моли́твами спаси́ нас, Влады́ко.
Пото́цы ре́чныя всех прия́ша,/ то́ки крове́й точа́ще,/ зари́, свы́ше просвеща́ющей[4],/ до́ндеже достиго́сте к приста́нищу живота́,/ к пото́ку сла́дости боже́ственныя.
Песнь 5. Возсия́й ми, Го́споди,/ [свет повеле́ний Твои́х,/ я́ко к Тебе́ дух мой у́тренюет, и пое́т Тя:/ Ты бо еси́ Бог наш,/ и к Тебе́ прибега́ю, Царю́ ми́ра.]
Му́дростию одоле́л еси́ мучи́теля, Фео́доре,/ окра́сти тя наде́ющася,/ и мечу́ подклони́в святу́ю главу́ твою́,/ я́ко а́гнец незло́бивый, прия́л еси́ закла́ние.
Любя́й Христа́, Фео́доре, поже́рлся еси́,/ и кровьми́ разреши́вся,/ восте́кл еси́ к небе́сному упокое́нию,/ иде́же пребыва́ют чи́ни у́мных сил/ и му́чеников ли́цы.
Во́льно вы́ю положи́л еси́ секу́щему мечу,/ богому́дре Константи́не,/ и ка́плями крове́й твои́х омы́вся,/ к преми́рным преста́вился еси́ ра́достно.
Богородичен:
Укре́пльшеся боже́ственною благода́тию/ и́же от чре́ва Твоего́ Просия́вшаго,/ со двема́ четы́редесяте/ до́блии страстоте́рпцы кре́пко пострада́ша./ С ни́ми Тя, Богоро́дице, благоче́стно сла́вим.
Песнь 6. Бу́ря мя [помышле́ний пости́гши,/ во глубину́ низвлачи́т мя безме́рных грехо́в;/ но Ты, Упра́вителю благи́й, /предвари́в упра́ви,// я́ко проро́ка, и спаси́ мя][5].
О, чудесе́!/ Ка́ко в во́ду ве́ржени, свы́ше изнесе́ни бы́сте,/ коего́ждо же глава́ усе́чена,/ Госпо́дним манове́нием исцеле́на бысть,/ му́ченицы сла́внии?
Мла́ди и ста́ри,/ от разли́чных устреми́вшеся градо́в,/ четы́редесяте два,/ еди́ную во́лю име́сте./ Сего́ ра́ди ра́вных по́честей уме́рше сподо́бистеся.
Хвала́ми увенча́им боже́ственными/ Васо́я, Фео́дора, Фео́фила,/ Константи́на с Калли́стом/ и все́ми про́чими святы́ми,/ пострада́вшими за Христа́ Бо́га на́шего.
Богородичен.
По́лный во утро́бе Твое́й истощава́ется[6],/ Своего́ естества́ отступи́в ника́коже, Де́во,/ Его́же ра́ди пострада́ша/ сла́внии страстоте́рпцы до́блии,/ с ни́миже ве́рно Тя сла́вим.
Кондак. Глас 4. Вознесыйся на Крест:
Иже на земли Христа ради деяньми…
Икос: Да уневестится светло:
Песнь 7. Образу златому [не поклони́вшеся о́троцы авраа́мстии,/ искуша́хуся я́ко зла́то в горни́ле,/ в пещи́ о́гненней я́ко в черто́зе све́тлем ликова́ху, пою́ще:/ благослове́н еси́, Бо́же оте́ц на́ших].
Зако́нами, му́ченицы, Христо́выми, святы́ми воспита́ни,/ беззако́нныя обы́чаи отри́нули есте́,/ и вку́пе по́двиг зако́нно сконча́вше, му́дрии,/ ра́вных по́честей от Бо́га улучи́сте, вопию́ще:/ «Благослове́н Бог оте́ц на́ших».
Вселе́нная[7] яви́стеся нам, зве́зды новоявле́нныя,/ в премíрная преста́вльшеся./ Те́мже мiр вы велича́ет/ и вся́чески предста́тели благи́я ко Спа́су предлага́ет вопию́щыя:/ «Благослове́н Бог оте́ц на́ших».
Пото́к живо́тный, Го́споди, Еди́н сый,/ крове́й пото́ки страстоте́рпец Твои́х прия́л еси́,/ и рая́ сих гра́жданы и пото́ки сла́дости соде́лал еси́ вся́чески,/ вопию́щыя и глаго́лющыя:/ Благослове́н Бог оте́ц на́ших».
И́же горе́ херуви́мы носи́мый, Отрокови́це,/ на Твои́х объя́тиих поко́ится,/ я́ко да изба́вит от рабо́ты грехо́вныя./ Его́же моли́ приле́жно спасти́ пою́щыя:/ «Благослове́н Бог оте́ц на́ших».
Песнь 8. Земля́, и вся, я́же на ней./ [мо́ре и вси исто́чницы,/ небеса́ небе́с, свет и тма, мраз и зной,/ сы́нове челове́честии,/ свяще́нницы благослови́те Го́спода,// и превозноси́те Его́ во ве́ки].
Что красе́н зрак твой, Фео́доре, пострада́вший кре́пко[8]./ Что вид твой ди́вен, благоро́днейший Константи́не./ Ка́ко просия́л еси́ с Васо́ем, всехва́льне Калли́сте,/ и с Фео́филом, тече́ние сконча́вшим.
Крове́й тече́ньми ва́рварский огнь угаси́вше/, пото́ком ре́чным предаю́тся вку́пе,/ и я́ко зве́зды зря́тся, во́ду препла́вающе,/ боже́ственным озаре́нием освеща́еми,/ я́ко Сло́ва свиде́тели.
Но́выя му́ченики Христо́с нам смире́нным показа́./ Да ра́дуется не́бо, о́блацы пра́вду да кропя́т[9],/ вси ро́ди челове́честии, взыгра́йте,/ свято́е торжество́ их соверши́ти.
Богородичен:
И́же всем бытие́ да́вый,/ из Тебе́ ражда́ется преесте́ственно, Богоблагода́тная Чи́стая,/ Его́же му́ченицы до́блии Бо́га пред беззако́нными свя́то исповедаша,/ с нимиже Тя воспеваем, Марие Богородице.
Песнь 9. Я́ко сотвори́ мне [вели́чия си́льный, и свя́то и́мя Его́, и ми́лость Его в род и род боя́щымся Его́].
Си́лою Спа́совою лука́ваго низложи́вше,/ вене́ц живота́ прия́сте,/ страстоте́рпцы ди́внии./ Те́мже вас вси согла́сно велича́ем.
Красны́ бы́вше язв ва́ших добро́тами,/ Престо́лу Бо́жию предста́сте,/ во оде́жду, страда́льцы, обагре́нную/ кровьми́ ва́шими, оде́яни.
Согла́сно Константи́на и Фео́дора сла́внаго,/ Васо́я и Фео́фила вку́пе,/ с Калли́стом му́дрым и про́чими сострада́льцы/ восхва́лим.
Весе́лия день творя́ще святу́ю па́мять ва́шу,/ мо́лимся, му́дрии,/ помяни́те нас,/ Царю́ небе́сному ны́не предстоя́ще.
Богородице:
Светороди́тельнице Де́во,/ световоди́ сердца́ на́ша,/ и моли́ улучи́ти Ца́рствия Небе́снаго,/ я́же му́чеников ли́ки преосия́вшая.
[1] ...χθέντες - совершенно очевидно, - ἀπαχθέντες - отведени. Что касается «εκτ...», то здесь, конечно, только предположение: «Ἐκ τῆς πατρίδος» - «От отечества» .
[2] Ср. Тов 13:3.
[3] Продолжение ирмоса этой песни, в отличие от остальных продолжение ирмосов, выделенных квадратными скобками, взято не из современного Ирмология, а из греч. Ирмология венецианского издания 1865 г., (любезно предоставленного мне о. Магсимом): Ακήκοεν ὁ προφήτης τῆν ἔλευσιν σοῦ, Κύριε καὶ ἐφοβήθη. Κατενόησε τὰ ἔργα σοῦ, καὶ ἐξέστη. Δόξα τᾑ δυνάμει σοῦ, δόξα Χριστὲ τᾑ συνκαταβάσει σοῦ. (Εἰρμολόγιον. Βενέτια. 1865. Ἔκδ. 3. P. 69.) Этот ирмос, кстати, использовал прп. Иосиф и во 2-м каноне на празднование чуда в Хонех, 26 снт. (Очевидно, поскольку канон 2-й, то ирмос и не пелся, и не был заменен).
[4] Ничего вразумительнее дат. самостоят. здесь не придумать, хотя он здесь и похож на генитив с русифицированным окончанием «-ей».
[5] Ирмосов «Буря мя…» имеется два (в нашем совр. Ирмологии). В греческом 1860 г. - только этот один. Я выбрала его, главным образом, потому, что он подходит по ритму и по кол-ву строф (см. Приложение).
[6] Ср. Канон Нед. Праотцев, п. 5 2-го канона, Богородичен.
[7] Здесь обыгрываются различные значения слова κόσμος - «вселенная», «мiр», «красота».
[8] Вопр. знака в оригинале нет.
[9] Ср. Ис 45:8.