Канон 42-м мученикам Амморейским
Канон святых мучеников четыредесяти двух , иже во Аммори́и: Фео́дора, Константи́на, Калли́ста, Фео́фила, Васо́я и дружины их.
(Канон из греческой Минеи 1-й https://glt.goarch.org/texts/Mar/Mar06.html)
Канон святых, егоже акростих: Страдания воспою добропобедных мучеников. Иосиф.
Песнь 1. Глас 6.
Я́ко по су́ху пешеше́ствовав Изра́иль,/
по бе́здне стопа́ми,/ гони́теля фарао́на/ ви́дя потопля́ема,/ Бо́гу// побе́дную пе́снь пои́м, вопия́ше.
Явле́ны высото́ю Христо́вы Це́ркве,/ я́ко зве́зды све́тлыя,/ ве́рных ду́ши просвеща́ете,/ омраче́ние пре́лести отгоня́юще.
Дерзнове́нием по́мысла ко врагу́ сопле́тшеся, му́ченицы,/ того́ низложи́сте./ И уме́рше, живо́т обрето́сте несконча́емый/ ку́пно, блаже́ннии.
Просвеще́ни добро́тою страда́ния/ светоза́рнаго и кре́пкаго,/ принесо́стеся Христу́, му́ченицы, пло́тию поже́ршемуся,/ и лико́м му́ченическим сопричто́стеся.
Четы́редясяте и два всесла́внии госпо́дни му́ченицы,/ тмочи́сленное мно́жество/ беззако́нных победи́вше,/ мно́жества благ на небесе́х сподо́бистеся.
Богородичен:
Пресвята́я Богоро́дице,/ страда́льцев боже́ственное удобре́ние,/ заче́ншая Христа́ кра́снаго;/ Того́ добро́тами[1] моли́ украси́тися души́ мое́й.
Песнь 3.
Не́сть свя́т,/ я́коже Ты́, Го́споди, Бо́же мо́й,/ вознесы́й ро́г ве́рных Твои́х, Бла́же,/ и утверди́вый на́с на ка́мени// испове́дания Твоего́.
Посреде́ три́знища став,/ спаси́тельное Сло́во,/ нас ра́ди вопло́щшееся,/ свобо́дным гла́сом возвести́л еси́,/ терпеливоду́шне[2] ве́лий Фео́доре.
Му́дренно ве́рою пострада́в,/ те́ла отве́рглся еси́,/ и посече́нию ме́чному себе́ подклони́в,/ я́ко а́гнец, поже́рлся еси́,/ Константи́не, му́чениче досточу́дный.
Ве́рнаго тя дру́га Бо́жия/ по́двига вре́мя всем яви́ло есть,/ от я́же ко пло́ти любве́/ по́мысл отврати́вшаго,/ крепча́йший Фео́филе[3].
Богородичен:
Святы́х страда́лец сонм/ четы́редесяте и два/ Тя, Бо́жию Ма́терь/ Всеи́стинную пропове́да я́ве,/ тех укре́пльшую предста́тельствы Твои́ми.
Песнь 4.
Христо́с моя́ си́ла,/ Бо́г и Госпо́дь,/ честна́я Це́рковь/ Боголе́пно пое́т взыва́ющи,// от смы́сла чи́ста о Го́споде пра́зднующи.
Кре́постию, му́ченицы,/ боже́ственнаго Ду́ха,/ низложи́сте всю вра́жию си́лу немощну́ю,/ умерщвле́ни бы́вше/ и живо́т ве́чный насле́довавше.
Ду́шу Ка́ллист[4] до́бре укрепи́в/ поуче́ньми боже́ственными кре́пко,/ ра́дуяся, прии́де/ к усече́нию ме́чному,/ насле́довав небе́сная.
Кра́сно поста́вил еси́ на ка́мени зна́ния/ основа́ния ума́ твоего́, Васо́е,/ и запну́л еси́,/ погна́в му́жески враги́ твоя́,/ всеблаже́нне.
Кровь излия́вше,/ све́тло дух преда́сте ку́пно, всепетии,/ и́же нас ра́ди/ бога́тством бла́гости[5]/ кровь Свою́ на Кресте́ излия́вшему.
Богородичен:
Чи́стую Ма́терь Тя/ боже́ственнии му́ченицы ве́дуще, Отрокови́це,/ и я́же о Тебе́ сла́ву возвеща́юще,/ безсме́ртная дарова́ния/ в вы́шних насле́доваша.
Песнь 5.
Бо́жиим/ све́том Твои́м, Бла́же,/ у́тренюющих Ти́ ду́шы/ любо́вию озари́, молю́ся,/ Тя́ ве́дети, Сло́ве Бо́жий,/ и́стиннаго Бо́га,// от мра́ка грехо́внаго взыва́юща.
Свети́льницы та́инственнии яви́стеся,/ све́том благоче́стия/ ду́ши благочести́вых просвеща́ющии,/ и неве́дения мрак разгоня́ющии,/ Госпо́дни страстоте́рпцы блаже́ннии.
Львов зия́ния[6] мы́сленных,/ му́ченицы Госпо́дни, избе́гше,/ бра́шно Влады́чне бы́сте,/ всех сладча́йшее,/ сла́дости непреходя́щия сподо́бившеся.
Моле́ние о нас, му́ченицы,/ Бо́гу принеси́те,/ и́же два и четы́редесяте,/ я́ко да изба́вимся вся́кия му́ки/ и находя́щих безме́рных скорбе́й.
Богородичен:
Ума́ моего́ двиза́ния,/ молю́ся, Пречи́стая,/ к Бо́гу испра́ви,/ и́же Путь живота́ сый/ и страстоте́рпец стези́ углажд́яй.
Песнь 6.
Жите́йское мо́ре/ воздвиза́емое зря́ напа́стей бу́рею,/ к ти́хому приста́нищу Твоему́ прите́к вопию́ Ти: /возведи́ от тли́ живо́т мо́й,// Многоми́лостиве.
Ве́трилом Креста́/ окриля́еми страда́льцы,/ беззако́ния мо́ре преплы́ша немо́кренно,/ и ти́хое приста́нище обрето́ша,/ благочести́вых окорми́тели бы́вше.
Госпо́дни му́ченики,/ Константи́на благоче́стно и сла́внаго Фео́дора,/ Калли́ста же и Васо́я,/ и с ни́ми ве́лия Фео́фила,/ и тех сподви́жники восхва́лим.
Я́ко цве́ты сладкоуха́ннии,/ на лу́зе страда́льчестем/ та́инственно процве́тшии,/ Це́рковь всю у́мно благоуха́ния испо́лнисте/, злосмра́дие пре́лести отгоня́юще.
Богородичен:
Зако́нов Тя есте́ственных кроме́/ преесте́ственно зача́т/ Богоро́дица Отрокови́ца,/ я́ко вои́стинну зако́нно/ му́ченики ве́рою подвиза́вшыяся венча́вшаго.
[В 6 день сего месяца…
Стихи…]
Песнь 7.
Росода́тельну у́бо пе́щь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие, мучи́теля увеща́ вопи́ти:// благослове́н еси́, Бо́же оте́ц на́ших.
По вре́менней темни́це,/ четыредесяте и два/ христо́вы му́ченицы,/ теле́сныя стра́жи разреши́вшеся,/ я́ко Того́ зако́ны и́стинныя сохра́ньше,/ стра́жи нам яви́стеся, живу́ще на небесе́х.
Пле́нником боже́ственным/ отроко́м уподо́бистеся трие́м,/ и́же в Вавило́не иногда́[7],/ я́ко пле́нницы отведе́ни бы́ша на страну́ дале́че[8],/ му́ченицы добропобе́днии,/ в не́йже многомяте́жнаго врага́ плени́сте.
Тече́ньми кро́ве ва́шея/ суеты́ пото́ки изсуши́ли есте́,/ в ре́чная же тече́ния/ вве́ржени, му́дрии,/ к воде́ живо́тней прешли́ есте́,/ нам принося́ще безсме́ртия то́ки.
Богородичен:
Сви́ток нове́йший,/ Пречи́стая, су́щи,/ Сло́во в Тебе́ впи́сано обрела́ еси́,/ и́же в кни́зе живы́х/ страда́льцы Своя́ боже́ственныя вписа́вшаго,/ напи́санная приле́жно испо́лнившыя.
Песнь 8.
Из пла́мене преподо́бным ро́су источи́л еси́,/ и пра́веднаго же́ртву водо́ю попали́л еси́:/ Ався́ бо твори́ши, Христе́, то́кмо е́же хоте́ти,// Тя́ превозно́сим во вся́ ве́ки.
На боже́ственное по́прище му́ченическое прише́дше,/ кре́пко по́двиги показа́сте,/ врага́ побежда́юще непобеди́мым стоя́нием./ Те́мже благохва́лим вы, Христо́вы ору́жницы.
Тве́рдо противоста́л еси́ суему́дренным,/ страда́льче Константи́не,/ ну́дящым тя Христо́вы любве́ отступи́ти,/ и му́ченическим стадо́м[9] приче́лся еси́.
Я́ко незло́бивии а́гнцы, ку́пно закала́еми,/ со двема́ страстоте́рпцы четы́редясете,/ страсть честну́ю я́ко овча́ Закла́вшагося,/ ра́дующеся, подража́ете со дерзнове́нием мно́гим.
Невестокраси́тель явле́йся Ти боже́ственный арха́нгел,/ ра́дуйся, о́гненный престо́ле Бо́жий, вопия́ше Ти,/ Нескве́рная, Чи́стая, страстоте́рпцев утвержде́ние,/ испове́дающих Бо́га, я́вльшагося пло́тию[10].
9 песнь.
Бо́га/ челове́ком не возмо́жно ви́дети,/ на Него́же не сме́ют чи́ни А́нгельстии взира́ти:/ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и// Тя́ ублажа́ем.
Го́спода зре́ти сподо́бистеся,/ вене́ц сла́вы нетле́нный вам дарова́вшаго,/ Константи́не, Васо́е,/ Фео́доре, Калли́сте доблему́дре,/ блаже́нне Фео́филе, с про́чими вку́пе,/ о нас всегда́ моли́теся.
Я́ко свет, я́ко у́тро, я́ко со́лнце ве́лие/ страда́льцев па́мять, возсия́вши днесь,/ ве́рных ду́ши просвети́./ Ю́же соверша́юще,/ ты́я восхва́лим,/ во удесе́х свои́х Христа́ Изба́вителя просла́вльшыя.
Во́инство му́чеников,/ боже́ственное сочета́ние,/ со двема́ четы́редесяте,/ благода́тию тьмам а́нгелов сопричта́ся,/ разреше́ние нам прегреше́ний ны́не испроша́я/ ме́рою поста́,/ дней четы́редесяти[11].
Земля́ кровь ва́шу прия́т,/ и река́ тела́ ве́рженная соедини́/ глава́м усе́ченным, всеблаже́ннии,/ свы́ше сходя́щей боже́ственней све́тлости/ и варя́ющей я́ве/ си́лою лу́чшею.
Богородичен:
Све́та прия́телище, Богоблагода́тная,/ све́тлыми заря́ми Твои́ми/ се́рдце мое́ просвети́,/ уны́ния о́блаки прогоня́ющи/ и мра́ка грехо́внаго изыма́ющи,/ безгре́шнаго Бо́га заче́ншая.
Светилен:
Четыредесяточи́сленный лик со единоду́шными двема́/ пострада́ крепча́йше до конца́,/ и вся ко́зни вра́жия низложи́,/ и пребыва́ет в небе́сных селе́ниих,/ вене́ц же сла́вный побе́ды прия́т/ от десни́цы Вы́шняго.
Богородичен:
Я́ко иму́щи сострада́ние и ми́лость ве́лию,/ при́зри, Всепе́тая Богоро́дице Де́во,/ на мое́ смире́ние/ и страсте́й молву́ и собла́знов жите́йских/ разори́, Отрокови́це,/ и огня́ гее́нскаго изба́ви мя/ Твои́ми моли́твами.
[1] Ср. Пс 44:3.
[2] Точнее было бы «терпеливомудренне», но слово отсутствует в корпусе цся.
[3] Θεόφιλος -друг Божий.
[4] Καλλιστος -краснейший - прекраснейший. Доброта - κάλλος.
[5] Ср. Рим 2:4 (здесь «благости» - не χρηστοτητος, а αγαθοπτητος)
[6] Ирм. 4 гл. «Руце распростер».
[7] См. Ирм. 7-го гл. «От Иудеи дошедше».
[8] См. Лк 19:12.
[9] Данное слово в контексте собрания мучеников или других чинов святых употреблено, по крайней мере, в 5-ти службах. Не хотелось бы заменять его.
[10] См. Тропарь св. прор. Иоанну Крестителю.
[11] Смысл: «будучи равночисленны дням поста».