Вушацкія пацеркі. 6
Сьвятая вада Вушаччыны цячэ з крыніцы Ільлінка, што ля вёскі Стайкі. Вядома, ёсьць яшчэ крыніцы, што народ вызнае за сьвятыя, і ваду якіх лічыць за цудадзейную, але менавіта на Ільлінцы вушацкі люд - ад малых да старых - зьбіраецца 2 жніўня, каб засьведчыць сваю самасьць і прысутнасьць на гэтым сьвеце. Я шмат разоў быў на гэтай крыніцы, і магу распавесьці табе пра яе куды больш, чым асобна ўзятая бабулька са Старынак, Царкавішча ці Вушачаў. Напрыклад пра тое, што ў гэтым лясным урочышчы няма ніводнага сьляпня, авадня і камара. Але за кожным разам здымаць і запісваць хочацца ўсё меней. Быць, пачувацца сваім сярод сваіх, змываць твар сьцюдзёнай вадой... Без пытаньняў, апытаньняў, дыктафонных запісаў. Ля сьвятой вады такімі штучнымі здаюцца словы...