ЧӘМӘ ЈОЛ

[tolishpresxabon]

ЧӘМӘ ЈОЛ

Чанә охо дву бәбе, шәр бәбе?

Чанә хәлғи пијәкәсон хар бәбе?

Охој ки һәх ошко бәбе, ҹәр бәбе!

Бәты быһтон вотә гәвон бәбе лол,

Чәмә сиприш, чәмә рәһбәр, чәмә јол!

Беты һәни гиләвоән гындәни,

Хәзри омәј, инсоф, мурвәт зындәни,

Че Толыши былбылонән һандәни!

Тыни чәшин, кејнә бомеш бы мәһол?

Чәмә сиприш, чәмә рәһбәр, чәмә јол!

Ышты ноҹон, ышты чәшо гырд омәј,

Пијәмерд биш, Һәши пијәј, сард омәј,

Дардон сәпе ғәрибәти дард омәј!

Дешты дарди чәмә дылән бе чығыл,

Чәмә сиприш, чәмә рәһбәр, чәмә јол!

Ва војдә, бә Толышә банд емедә,

Фәхрәддини жимон шедә ғәмәдә,

Әли Насир кырди жәјдә, бәмедә!

Тале дардыш ечын гәтә бәмә бол,

Чәмә сиприш, чәмә рәһбәр, чәмә јол!

Дышмени жәј һәхи вотә гәвисә,

Оме нызнәјш ыштә инә ғәбисә,

Валлаһ, гонә дард әбыни чымисә!

Осмононән де бәмедән бәшты һол,

Чәмә сиприш, чәмә рәһбәр, чәмә јол!

Ысәт бызнән кије, коме Әләкрәм,

Хәлғи роәдә вәшә шаме Әләкрәм,

Толыш, ышты барзә номе Әләкрәм!

Че Зәрдушти, Атропати, Һәзи хол,

Чәмә сиприш, чәмә рәһбәр, чәмә јол!

Остороәдә Шиндон тыни бә чәше,

Лик, Масалон, Ланкон тыни бә чәше,

Һаләбыни бандән тыни бә чәше!

Толышстон - чәмә Вәтән, чәмә дыл,

Конҹо мандиш, чәмә рәһбәр, чәмә јол!