ЗИНДОН МЫНИ ӘКЫШТНИ!
ЗИНДОН МЫНИ ӘКЫШТНИ!
Ризван Шыхызодә
(Бә Толыши ғырјәтинә зоә Мушфиг Аббасови һәср)
Чанд соре ки, дылым бәмә кәмоне,
Зиндонәдә инсон марде, беҹоне!
Ғәрибәти дард һәммәјсә веј гоне,
Ым дард мыни бәкыште,
зиндон мыни әкыштни!
Зиндон егниш, дуст, авлод ду бедә,
Шинә моәм бәме-бәме ку бедә!
Дечмы дарди, чәшә арсон ру бедә,
Ым дард мыни бәкыште,
зиндон мыни әкыштни!
Шинә һовон бәчымы һан дәшедән,
Ғасбу омәјм? - Рә-рә бә со бешедән!
Чанд соре ки, чымы дарди кәшедән,
Ым дард мыни бәкыште,
зиндон мыни әкыштни!
Рәсе нызнәјм бәштә быјә һај-һәрај,
Бәмә доғ жәше быјәзо аһы-вај!
Пештым сијәј, ҹывонә быјәм гиным кај,
Ым дард мыни бәкыште,
зиндон мыни әкыштни!
Гәдә тифлон бәме-бәме сутедән,
Дыво-сәно кардән, нијәт гәтедән!
Ысәт боме, лади боме вотедән,
Ым дард мыни бәкыште,
зиндон мыни әкыштни!
Ысәт чоки веј инсони чәшдә ни,
Дустым винде, ымруж һесте, маштә ни!
Ҹон вотә зоә бә һәвардәј бешдәни,
Ым дард мыни бәкыште,
зиндон мыни әкыштни!
Һәхи роәдә ғыбоним аз, фидом аз,
Мушфигим, ыштә хәлғи бә сәдом аз!
Бо Толыши ыштә ҹони бәдом аз!
Чәмә хәлғи дард мыни бәкыште,
зиндон мыни әкыштни!
ВИДЕО : Ризван Шыхызодә де Мубариз Ашури: ЗИНДОН МЫНИ ӘКЫШТНИ!