![](http://tolishpress.org/files.php?file=lankon_univer_251942834.jpg)
Мамулгани
on 22 Апрель, 2013
tolishpress.org “Криминал ијән һодисон”
ЛАНКОНИ ДОВЛӘТИ УНИВЕРСИТЕТӘДӘ ҺӘБС
Бы ружонәдә Ланкони Довләти университети проректор һәбс кардә быә. Мәтбуоти доә мәлумотонку жыго мәлум бејдә ки, университети ректор профессор Асәф Искәндәрови дасјор Горхмаз Әғәјев Озорбојҹони Сәр Прокурори тоно Де Коррупсијә мыборизә идорә әмәгдошон апрели 15-дә әмәлијот дәвонеәдә гәтәшоне әв. Бы барәдә Сәр Прокурори Мәтбуот хыдмәти рәһбәр Елдар Султанови мәлумотыш доә. Һәмон идорән де ын һәбси әлоғодор һалијәдә ҹинојәти кош окардә, истинтоғ бардејдә. Е. Султанови ымышән вотә ки, тәфәрруотон барәдә пешо мәлумот бәдон.
Ымијән бывотәмон ки, 2011-нә сори августә мангәдә ЛДУ ректори навконә дасјор Емин Шаһзодән де һәлләм-ғәлләмәти мышғол бе сәбәбо һәбс кардә быәбе. Бәвәдә мәлумот омәбе ки, мәвотбән, Е. Шаһзодә де мыхтәлифә одәмон һукмәти идоронәдә бә ко ној номи гыләј хонәхоку 16 һәзо мәнотыш сәјбән. Нәтиҹәдә ә хонәхо нә косојб быәни, нәән ки ыштә пулыш сәј зынәни.
Бә хосә һандәкәсон нәзә росније воҹиб зынејдәмон ки, Горхмаз Әғәјеви барәдә 2011-нә сори ружномә “Хурал”әдә “Горхмаз Әғәјеви хәтомандә коон” номәдә бешә мәғаләдә хәјли мәлумот доә быәбе. Ружномә бәвәдә нывыштејдәбе ки, һәмон ә Горхмаз де чандә ҹурә һилә ҹывон-ҹывонә кинон имтоһонәдә бырнејдә, чәјоән әвони де тарс-ларзи мәҹбур кардејдә ки, әвон деәј бышун бә һарды-һәш бә Ланкони русторанон, чәјоән Хыдо бәзне чуне... Мәғаләдә ҹо мәсәлон барәдән нывыштә быәбе. Әмма һәјф быбу ки, бәвәдә бы информасијон дығғәт доәкәс быәныбе.
Ымән чәј охој. Чокнә бәвотен, ови гулә овәдә баршије! Есә дијә быкәмон, Горхмаз ијән чәј пештәдә мандәкәсон чокнә бебәшен вәзјәто?