Семён Жуйков, удмурт кылтодосчи
Семён Прокопьевич Жуйков - удмурт кылтодосэз кылдытӥсьёс пӧлысь нырысетӥез тодмо тодосчи - доцент, удмурт но ӟуч кылъёслы дышетскон книгаослэн, удмурт-ӟуч но удмурт орфографи нырысетӥ кыллюкамъёслэн, шонер гожъяськон индылэтъёслэн (правилоослэн) авторзы, Удмурт педагоги институт удмурт кыл но литература капедралэн нырысетӥез кивалтӥсез.
С.П. Жуйков вордӥськиз 1891-тӥ арын тулыспал толэзьлэн 2-тӥ нуналаз азьло Вятка губерниысь Глазов уездысь Ягошур волостьысь Пусошур гуртын куанер удмурт му ужбурчиослэн семьяязы. Тодмо тодосчи но дышетӥсь луэмезлэсь азьло со трос шуг-секытъёсыз адӟем: узыръёс дортӥ батракаса но ветлэм, Волгаын бурлак но вылэм, извозын Сибыр сюрес кузя но уно пол ортчылэм, вуылэм Украинае но Польшае. Отын монастырьын медо но луыса ужам. Гожтэтлы кызьы но озьы дышетскемез бере, 1912-1917-тӥ аръёсы, Кизнер ёросысь Асинер гуртысь земской школаын дышетӥсь луыса ужам. Бугырес ожмаськон аръёсы армиын вылэм. 1919-1921-тӥ аръёсы дышетскем Вяткаысь Ленин нимо педагоги институтын. Отын дышетскыкуз, огдыре ужам Вяткаысь калыкез дышетон ёзэтлэн инструкторез луыса. Педагоги институтэз йылпумъямез бере сое Глазовысь педагоги текникуме ужаны ыстӥллям (1921-1925 аръёс), нош 1925-1929-тӥ аръёсы сое Ижкарысь педагоги текникуме выжтӥллям. 1929-тӥ арын со дышетскыны пыре КСРО (СССР)-лэн тодос академиезлэн Ленинградысь Кыл но малпаськон институтэзлэн аспирантураяз. Солэн тодос кивалтӥсез вылэм со вакытэ туж тодмо но сӥё-дано тодосчи-академик Н.Я. Марр.
Аслаз дышетскисьёсыз пӧлысь С. жуйковез со нимысьтыз висъяса вера вылэм, одӥгез визьмоез аспирант луэ шуыса. Соин но, оло, С. жуйков Н. Маррлэн кылъёсты дышетон антитодос методологиезлэсь ӧз куштӥськы - удмурт кыл удысын вань ужъёссэ кылдытъяз дышетӥсезлэн ӵектэм "Кыл сярысь выль дышетон" шуон методэзъя, кудӥз 1950-тӥ аръёсы тодосысь палэнтэмын вал.
Семён Жуйков трос кылъёсты тодэ вылэм: поляк, немеч, англи, удмурт, коми, фин, бигер, башкорт, казах, узбек но ӟуч.
Аспирантураез йылпумъямез бере сое ужаны ыстӥллям соку гинэ кылдытэм Удмурт педагоги институтэ, удмурт кыл но литература капедралы кивалтӥсь карыса. Огдыре ик со ужам на 1931-тӥ арын кылдытэм Удмурт тодос-эскерон институтын (УдНИИ-ын) но. Удмуртиын 6 ар ужатозяз, со 47 тодос ужъёс, школаослы, педагоги институтлы но техникумъёслы пӧртэм программаос но методика валэктӥсь книгаос (пособиос), дышэтэтъёс гожтэм, удмурт-ӟуч но удмурт орфографи кыллюкамъёс, шонер гожъяськон индылэтъёс дасям но соосты печатласа поттэм, студентъёслэн юрттэменызы печатлам удмурт диалектологи, калыктодос но Удмуртилэн экономикаезлы сӥзем мутусъёс, трос пол потам тодос экспедициосы.
КСРО-ысь (СССР-ысь) кивалтӥсьёслэн калыкъёсты юнме шорысь янгыше уськытон политика нуэменызы, С. Жуйковлэн туж азинлыко мынӥсь ужез уриськем. Иосиф Сталинлэн йӧспӧртэм инмаръян вакытэ йыр вадьсаз сьӧд пилемъёс вотсаськыны кутскемез шӧдыса, Семён Жуйков Удмуртиысь лушкемак гинэ воксёлы кошконо луэм. Нырысь-валысь со ужам Шор Азиысь вылӥ дышетсконниосын: Алма-атаысь Казах кун университетысь, Семипалатинскысь кун педагоги институтын, бӧрысьгес - Ульяновск улосысь Мелеккес педагоги институтын но Воронеж улосысь Россошанск дышетӥсьёслэн институтазы. Элькунысьтымы кошкемез бере удмурт кыл пумысен тодос ужъёсыз ӧз ни поталэ, тросгес дырзэ висъяз, вылды, ӟуч кылэз но солэсь пӧртэм вераськетъёссэ дышетонлы. Л. С. Христолюбовалэн гожъямезъя, со пыр-поч эскерем Ульяновск улосысь Николо-Черемшанск ёросысь ӟучъёслэсь вераськетъёссэс но донысь диалектъёсты.
Та вакчи гожъям Таракановлэсь гожъямзэ уже кутыса гожтэмын
http://uralistica.ning.com/profiles/blogs/semion-zhujkov-udmurt