+ Молитва за воина
Боже милостив буди мне, грешному! (3 раза)
Молитвами святых отец наших, Господи Иисусе Христе, Сыне Божий, помилуй нас! Аминь. Царю Небесный, Утешителю, Душе истины, Иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.
Святый Боже, Святый Крепкий, Святый Безсмертный, помилуй нас. (3 раза)
Слава Отцу, и Сыну, и Святому Духу, и ныне и присно, и во веки веков. Аминь. Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.
Господи, помилуй! (3 раза)
Слава Отцу, и Сыну, и Святому Духу, и ныне и присно, и во веки веков. Аминь. Отче наш, Иже еси на Небесех, да святится имя Твое, да приидет Царствие Твое; да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
Господи, помилуй! (12 раз) Слава Отцу, и Сыну, и Святому Духу, и ныне и присно, и во веки веков. Аминь.
Приидите, поклонимся Цареви нашему Богу! (Поклон)
Приидите, поклонимся и припадем Христу, Цареви нашему Богу! (Поклон)
Приидите, поклонимся и припадем Самому Христу, Цареви и Богу нашему! (Поклон).
(Псалом 90) Живый в помощи Вышняго, в крове Бога Небеснаго водворится. Речет Господеви: Заступник мой еси и Прибежище мое, Бог мой, и уповаю на Него. Яко Той избавит тя от сети ловчи и от словесе мятежна, плещма Своима осенит тя, и под криле Его надеешися: оружием обыдет тя истина Его. Не убоишися от страха нощнаго, от стрелы летящия во дни, от вещи во тме преходящия, от сряща, и беса полуденнаго.
Падет от страны твоея тысяща, и тма одесную тебе, к тебе же не приближится, обаче очима твоима смотриши и воздаяние грешников узриши. Яко Ты, Господи, упование мое, Вышняго положил еси прибежище твое. Не приидет к тебе зло, и рана не приближится телеси твоему, яко Ангелом Своим заповесть о тебе, сохранити тя во всех путех твоих. На руках возмут тя, да не когда преткнеши о камень ногу твою, на аспида и василиска наступиши и попереши льва и змия. Яко на Мя упова, и избавлю и: покрыю и, яко позна имя Мое. Воззовет ко Мне, и услышу eго: с ним есмь в скорби, изму eго и прославлю eго, долготою дний исполню eго и явлю eму спасение Мое.
(Тропари) Помилуй нас, Господи, помилуй нас; всякаго бо ответа недоумеюще, сиюТи молитву яко Владыце грешнии приносим: помилуй нас.
Слава Отцу, и Сыну, и Святому Духу … Господи, помилуй нас, на Тя бо уповахом; не прогневайся на ны зело, ниже помяни беззаконий наших, но призри и нын яко благоутробен, и избави ны враг наших: Ты бо еси Бог наш, и мы людие Твои, вси дела руку Твоею, и имя Твое призываем.
И ныне и присно, и во веки веков. Аминь. Милосердия двери отверзи нам, благословенная Богородице, надеющиеся на Тя да не погибнем, но да избавимся Тобою бед: Ты бо вси спасение рода христианскаго.
(Псалом 50) Помилуй мя, Боже, по велицей милости твоей, и по множеству щедрот твоих очисти беззаконие мое. Наипаче омый мя от беззакония моего и от греха моего очисти мя; яко беззаконие мое аз знаю, и грех мой предо мною eсть выну. Тебе eдиному согреших и лукавое пред тобою сотворих; яко да оправдишися во словесех твоих и победиши, внегда судити ти.
Се бо, в беззакониих зачат eсмь, и во гресех роди мя мати моя. Се бо, истину возлюбил eси, безвестная и тайная премудрости твоея явил ми eси. Окропиши мя иссопом, и очищуся; омыеши мя, и паче снега убелюся. Слуху моему даси радость и веселие; возрадуются кости смирeнныя. Отврати лице твое от грех моих и вся беззакония моя очисти. Сердце чисто созижди во мне, Боже, и дух прав обнови во утробе моей. Не отвержи менe от лица твоего и Духа твоего Святаго не отими от менe. Воздаждь ми радость спасения твоего и духом владычним утверди мя.
Научу беззаконныя путeм твоим, и нечестивии к тебе обратятся. Избави мя от кровей, Боже, Боже спасения моего; возрадуется язык мой правде твоей. Господи, устне мои отверзеши, и уста моя возвестят хвалу твою. Яко аще бы восхотел eси жертвы, дал бых убо; всесожжeния не благоволиши. Жертва Богу дух сокрушен; сердце сокрушенно и смиренно Бог не уничижит. Ублажи, Господи, благоволением твоим Сиона, и да созиждутся стены Иерусалимския; тогда благоволиши жертву правды, возношение и всесожегаeмая; тогда возложат на алтарь твой телцы.
(Канон. Песнь 1) Помилуй нас, Боже, помилуй нас! Общий плач составим, братие, возраст весь же, чин, род и племя, и горце воздохнем вкупе, и всех Творца милостива сотворим.
Помилуй нас, Боже, помилуй нас! Благоутробия ради милости привед, не сущих, Владыко, естество древле тленных, и обетшавшее спасл еси тления, погибающих, и ныне нас помилуй.
Слава Отцу, и Сыну, и Святому Духу … Священствовав Свою кровь, Слово Божие, и умираеши яко человек, Бог Сый, нас ради. Но мы, благодати страшныя Твоея отступающе, зле ныне отриновени быхом.
И ныне и присно, и во веки веков. Аминь. Ужаса и колебания, и страха вся исполнь, праведный зрящи Владыки гнев но Сего милостива нам, яко Сына Своего и Бога, соделай, Владычице.
(Песнь 3) Помилуй нас, Боже, помилуй нас! Адам первую заповедь Твою древле преслушав, Рая изгнан бысть, и жизни, и Бога. Мы же всех вкупе отступльше, ныне умерщвляемся.
Помилуй нас, Боже, помилуй нас! Столп прежде явися лукав, Каин зависти злыя, брата убив. Ему же ревнующе ныне мы, стенати и трястися зле якоже он, вси осуждени быхом.
Слава Отцу, и Сыну, и Святому Духу …Скрыся, Владыко Христе, солнечная светлость, удержеся течение обычных дождев, суша и тма держит, Ты же, Славы Солнце, отвратися.
И ныне и присно, и во веки веков. Аминь. Крепость несть в нас, всякаго же дерзновения обнажени быхом, вси делы скверными. Ты же, яко Мати Чистая, премееши Владыку всем.
(Катавасия) Избави от бед рабы Твоя, Многомилостиве, яко мы усердно к тебе прибегаем, милостивому избавителю, всех Владыце, Господу Иисусу!
Господи, помилуй! (3 раза)
Слава Отцу, и Сыну, и Святому Духу, и ныне и присно, и во веки веков. Аминь.
(Глас 4): Всякия скверны, всемилостивый Спасе, аз бых делатель, / и во отчаяния ров падся, / но стеню от сердца, и вопию к Тебе, Слове, / ускори, Щедрый, и потщися на помощь нашу, // яко Милостив.
(Песнь 4) Помилуй нас, Боже, помилуй нас! День, Владыко, гнева и скорби, и не бе день сей, ниже нощь. Иже ныне постиже всех нас пророчески, и несть избавляющаго.
Помилуй нас, Боже, помилуй нас! Содомляном первее зле разверзе небеса, вопль умножися. Сих же затворят согрешений множество, ныне нам в правду, Владыко.
Слава Отцу, и Сыну, и Святому Духу … Видя, Владыко, виждь озлобление людей Твоих, и вонми стенанием. Манием устави бурю, и духовом сопротивным запрети.
И ныне и присно, и во веки веков. Аминь. Утаившися первее болезней, родила еси всех Владыку паче естества. Его же ради болезнь разреши, Чистая, Своих людей.
(Песнь 5)
Помилуй нас, Боже, помилуй нас! Утеснена мя всюду, Давид зря грядущ гнев Божий, возопи. Мы же что сотворим, окаянии, пространными обретше, тесно обителище.
Помилуй нас, Боже, помилуй нас! Руки якоже избавль фараони древле люди Своя, Благий, разверз напрасно бездну, и нас поганских рук исхити, и море утишив, ветры укроти.
Слава Отцу, и Сыну, и Святому Духу …Быстротам нужди, и злых востаний, волнам и духовом сопротивным запрети, и во утишие да приидут Твоим повелением, и дерзость да уставится всяка, Человеколюбче.
И ныне и присно, и во веки веков. Аминь. Иже древле, Владычице, Тобою избавльшиися смерти и тли, поганския нужды и скорби, и ныне сия разреши, молимся, людие бо Твои, и достояние мы есмы изрядное.
(Песнь 6) Помилуй нас, Боже, помилуй нас! Плоти первее послужившии, предани быша скверно, потоплению безумнии, имже мы поревновавше ныне зле, плоти бывше тление возвратне подъяхом.
Помилуй нас, Боже, помилуй нас! Пути отвратившеся праваго, развращенным путем ходим, отступльше безумне Твоих заповедей, егоже ради и во глубины искушений многоплетенных впадаем.
Слава Отцу, и Сыну, и Святому Духу …Призри свыше яко щедр, Боже, стенание услыши, и слезам вонми Твоих людей. Отрочат поющих Ти гласа не презри, Многомилостиве.
И ныне и присно, и во веки веков. Аминь. Божия Мати Владычице бывши, держиши всю светло тварь, изряднее же мы стяжание Твое: егоже ради предваривши, избави глада и поганых Твое стадо.
(Катавасия) Избави от бед рабы Твоя, Многомилостиве, яко мы усердно к тебе прибегаем, милостивому избавителю, всех Владыце, Господу Иисусу!
Господи, помилуй! (3 раза) Слава Отцу, и Сыну, и Святому Духу, и ныне и присно, и во веки веков. Аминь.
(Кондак, глас 6): Болезни адовы обыдоша нас, и покры нас сень смертная, и яко воск от огня, дние наши тают от лица гнева Твоего, Господи: но яко Щедр, во гневе милости помяни и пощади людей Твоих, да живи суще в покаянии славим Тя, единаго Человеколюбца.
(Песнь 7) Помилуй нас, Боже, помилуй нас! Якоже вдовицы глад, древле разрешил еси послав Илию, Владыко, пророка Своего, сице разреши словом, и нам сушу и глад, яко благ, напитав обычне Своих людей, иже отцем Боже благословен еси.
Помилуй нас, Боже, помилуй нас! Множеством благости долготерпе, всех прегрешения презрев ныне, Своя грады напитай и люди, молитвами Пречистыя Творя Матере, обдержащих напастей, разреши в напрасных нам.
Слава Отцу, и Сыну, и Святому Духу … Гордый нрав ныне смирим, грабления и льсти вси отбежим, клятвы души со лжу возненавидим, яко да Владыку милостива вси обрящем.
И ныне и присно, и во веки веков. Аминь. В напастех явися, молимся, Избавительнице вкупе и Предстательнице, чтущим Тя, напастей и скорбей злых, и дерзости безбожных и нечестивых врагов избавляющи, державною Твоею рукою, Владычице.
(Песнь 8) Помилуй нас, Боже, помилуй нас! Словесни бывшу, безсловесни явихомся, образ божественный и сан, делы скверными неподобне обезчестивше. Спаси, яко Щедр, молитвами святых Твоих.
Помилуй нас, Боже, помилуй нас! Яко блудницу, Христу мой, прежде и блуднаго, яко разбойники и мытари многи спасе, якоже Манассию помольшася спасл еси, всех нас спаси, молитвами святых Твоих.
Слава Отцу, и Сыну, и Святому Духу … Младенствующии языцы, юнии и старцы, иноцы, и спряжении, вси молимся, разреши гнев, войне запрети, мир подаждь людям, Христе, жаждущим.
И ныне и присно, и во веки веков. Аминь. Душею и телом уязвлени вси, делы скверными, язвами первыми, притецем вкупе, Владычице припадем, яко да пременит нам, всех Зиждителя.
(Песнь 9) Помилуй нас, Боже, помилуй нас! Создал еси сих, Сыне, руками, и воздвигл еси умерших, и препитал еси Своим Телом. Матерь же Тя сих паче естества содела праведну. Его же ради приими ми, Слове, мольбу.
Помилуй нас, Боже, помилуй нас! Паче слова, Слове, вся Твоя, воплощение и страдание, и обожение страшное. Богатство великое, общаго покаяния, ихже ради поклоняемся Сыну, славе Твоей.
Слава Отцу, и Сыну, и Святому Духу … Приими мольбы яко Блага, к Тебе прибегающих, и ходатаица нам буди. Предстани, Госпоже, и болезни разреши, яко Мати, можеши бо вся, Владычице.
И ныне и присно, и во веки веков. Аминь. Должное творя, Мати, ныне просиши милости. Некиим спешиши еже мене, недостойни си человеколюбия всякаго, Божественному милосердию солгавшу.
Достойно есть яко воистину блажити Тя, Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем.
Святый Боже, Святый Крепкий, Святый Безсмертный, помилуй нас. (3 раза с поклоном)
Слава Отцу, и Сыну, и Святому Духу, и ныне и присно, и во веки веков. Аминь. Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.
Господи, помилуй! (3 раза)
Слава Отцу, и Сыну, и Святому Духу, и ныне и присно, и во веки веков. Аминь. Отче наш, Иже еси на Небесех, да святится имя Твое, да приидет Царствие Твое; да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
С вышних призирая, убогия приемля, посети нас, озлобленныя грехи, Владыко Всемилостиве, молитвами Богородицы даруй душам нашим велию милость.
Господи, помилуй! (12 раз) (Молитва):
Владыко Господи Боже отец наших, Тя просим, Тебе ся мили деем, яко же бе изволил еси Сам взыти со угодником Твоим Моисеом, возводя люди Твоя Израильтяны из Египта в землю обетования, такоже и ныне Сам иди с рабом Твоим сим (имя), храня его день и нощь.
Якоже бе укрепил Исуса Навина образом Крестным, и молитвою Моисеовою на Амалика, и царства ханаанска секущася с ними. Якоже бе помогл Гедеону с тремя сты, прогонящу мадиамско множество, и секущу Зива и Зевея и Салмона, и вся князи их, такоже и сему помози.
Якоже бе пособил по Константине первом царе христианом, явлением небесных победити противныя сопостаты Твоя, победу им дая на ня, знаменая одесную и ошуюю, спреди и созади, защищением Креста Честнаго, во Имя Тебе Бога и Отца, и Господа нашего Иисуса Христа, и Пречестнаго и Животворящаго Духа Твоего, ныне и присно и во веки веков. Аминь.
Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Слава Отцу, и Сыну, и Святому Духу, и ныне и присно, и во веки веков. Аминь.
Господи, помилуй! (3 раза)
Молитвами святых отец наших, Господи Иисусе Христе, Сыне Божий, помилуй нас!
Боже милостив буди мне, грешному! (3 раза)