ПРЕОБРАЖЕНИЕ ГОСПОДНЕ. ВСЕНОЩНОЕ БДЕНИЕ. УТРЕНЯ. Служба мирским чином. ЯБЛОЧНЫЙ СПАС.
19 áвгуста 2022 гóда. Преображéнiе Госпóда Спáса нáшего Iисýса Хрїстá. Слýжба прáздника для домáшнего (келéйнаго) совершéнiя. Воскрéсная прáздничная слýжба для домáшнего (келéйнаго) совершéнiя. (Яблочный Спас)
УТРЕНЯ
Начáло зри здесь ( великая вечерня)
ШЕСТОПСАЛМИЕ
Слáва в вы́шних Бóгу, и на землѝ мир, в человéцех благоволéнiе. (трúжды) Гóсподи, устнé моѝ отвéрзеши, и устá моя́ возвестя́т хвалý Твою́. (двáжды)
Псалом 3
Гóсподи, что ся умнóжиша стужáющiи ми? Мнóзи востаю́т на мя, мнóзи глагóлют душѝ моéй: несть спасéнiя eмý в Бóзе eгó. Ты же, Гóсподи, Застýпник мой есѝ, слáва моя́ и вознося́й главý мою́. Глáсом мои́м ко Гóсподу воззвáх, и услы́ша мя от горы́ святы́я Своея́. Аз уснýх, и спах, востáх, я́ко Госпóдь застýпит мя. Не убою́ся от тем людéй, óкрест напáдающих на мя. Воскреснѝ, Гóсподи, спасѝ мя, Бóже мой, я́ко Ты порази́л есѝ вся враждýющыя ми всýе: зýбы грéшников сокруши́л есѝ. Госпóдне есть спасéнiе, и на лю́дех Твои́х благословéнiе Твоé.
Аз уснýх, и спах, востáх, я́ко Госпóдь застýпит мя.
Псалом 37
Гóсподи, да не я́ростiю Твоéю обличи́ши менé, нижé гнéвом Твои́м накáжеши менé. Яко стрéлы Твоя́ унзóша во мне, и утверди́л есѝ на мне рýку Твою́. Несть исцелéнiя в плóти моéй от лицá гнéва Твоегó, несть ми́ра в костéх мои́х от лицá грех мои́х. Яко беззакóнiя моя́ превзыдóша главý мою́, я́ко брéмя тя́жкое отяготéша на мне. Возсмердéша и согни́ша рáны моя́ от лицá безýмiя моегó. Пострадáх и слякóхся до концá, весь день сéтуя хождáх. Яко ля́двiя моя́ напóлнишася поругáнiй, и несть исцелéнiя в плóти моéй. Озлóблен бых и смири́хся до зелá, рыкáх от воздыхáнiя сéрдца моегó. Гóсподи, пред Тобóю все желáнiе моé и воздыхáнiе моé от Тебé не утаи́ся. Сéрдце моé смятéся, остáви мя си́ла моя́, и свет óчiю моéю, и той несть со мнóю. Дрýзи моѝ и и҆́скреннiи моѝ пря́мо мне прибли́жишася и стáша, и бли́жнiи моѝ отдалéче менé стáша и нуждáхуся и҆́щущiи дýшу мою́, и и҆́щущiи злáя мне глагóлаху сýетная и льсти́вным весь день поучáхуся. Аз же я́ко глух не слы́шах и я́ко нем не отверзáяй уст свои́х. И бых я́ко человéк не слы́шай и не имы́й во устéх свои́х обличéнiя. Яко на Тя, Гóсподи, уповáх, Ты услы́шиши, Гóсподи Бóже мой. Яко рех: да не когдá порáдуют ми ся вразѝ моѝ: и внегдá подвижáтися ногáм мои́м, на мя велерéчеваша. Яко аз на рáны готóв, и болéзнь моя́ предо мнóю есть вы́ну. Яко беззакóнiе моé аз возвещý и попекýся о гресé моéм. Вразѝ же моѝ живýт и укрепи́шася пáче менé, и умнóжишася ненави́дящiи мя без прáвды. Воздаю́щiи ми злáя возблагáя оболгáху мя, занé гоня́х благосты́ню. Не остáви менé, Гóсподи Бóже мой, не отступѝ от менé. Вонмѝ в пóмощь мою́, Гóсподи спасéнiя моегó.
Не остáви менé, Гóсподи Бóже мой, не отступѝ от менé. Вонмѝ в пóмощь мою́, Гóсподи спасéнiя моегó.
Псалом 62
Бóже, Бóже мой, к Тебé ýтренюю, возжадá Тебé душá моя́, коль мнóжицею Тебé плоть моя́, в земли́ пýсте и непрохóдне, и безвóдне. Тáко во святéм яви́хся Тебé, ви́дети си́лу Твою́ и слáву Твою́. Я́ко лýчши ми́лость Твоя́ пáче живóт, устнé мои́ похвали́те Тя. Тáко благословлю́ Тя в животé моéм, о и҆́мени Твоéм воздежý рýце моѝ. Я́ко от тýка и мáсти да испóлнится душá моя́, и устнáма рáдости восхвáлят Тя устá моя́. Áще поминáх Тя на постéли моéй, на ýтренних поучáхся в Тя. Я́ко был есѝ Помóщник мой, и в крóве крилý Твоéю возрáдуюся. Прильпé душá моя́ по Тебé, менé же прiя́т десни́ца Твоя́. Тíи же всýе искáша дýшу мою́, вни́дут в преиспóдняя землѝ, предадя́тся в рýки орýжiя, чáсти ли́совом бýдут. Царь же возвесели́тся о Бóзе, похвáлится всяк клены́йся Им, я́ко загради́шася устá глагóлющих непрáведная.
На ýтренних поучáхся в Тя. Яко был есѝ Помóщник мой, и в крóве крилý Твоéю возрáдуюся. Прильпé душá моя́ по Тебé, менé же прiя́т десни́ца Твоя́.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýiа, аллилýiа, аллилýiа, слáва Тебé Бóже. (3 раза)
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Псалом 87
Гóсподи Бóже спасéнiя моегó, во дни воззвáх, и в нощи́ пред Тобóю. Да вни́дет пред Тя моли́тва моя́: приклони́ ýхо Твоé к молéнiю моемý, я́ко испóлнися зол душá моя́, и живóт мой аду прибли́жися. Привменéн бых с низходя́щими в ров, бых я́ко человéк без пóмощи, в мéртвых свобóдь, я́ко я́звеннiи спя́щiи во грóбе, и҆́хже не помянýл еси́ ктомý, и тíи от руки́ Твоея́ отриновéни бы́ша. Положи́ша мя в рóве преиспóднем, в тéмных и сéни смéртней. На мне утверди́ся я́рость Твоя́, и вся вóлны Твоя́ навéл еси́ на мя. Удáлил еси́ знáемых мои́х от менé, положи́ша мя мéрзость себé: прéдан бых и не исхождáх. Очи мои́ изнемогóсте от нищеты́, воззвáх к Тебé, Гóсподи, весь день, воздéх к Тебé рýце мои́. Едá мéртвыми твори́ши чудесá? Или́ врáчеве воскреся́т, и исповéдятся Тебé? Едá повéсть кто во грóбе ми́лость Твою́, и и҆́стину Твою́ в поги́бели? Едá познáна бýдут во тьме чудесá Твоя́, и прáвда Твоя́ в земли́ забвéнней? И аз к Тебé, Гóсподи, воззвáх и ýтро моли́тва моя́ предвари́т Тя. Вскýю, Гóсподи, отрéеши дýшу мою́, отвращáеши лицé Твоé от менé? Нищ есмь аз, и в трудéх от ю́ности моея́; вознéс же ся, смири́хся, и изнемогóх. На мне преидóша гнéви Твои́, устрашéнiя Твоя́ возмути́ша мя, обыдóша мя я́ко водá, весь день одержáша мя вкýпе. Удáлил еси́ от менé дрýга и и҆́скренняго, и знáемых моих от страстéй.
Гóсподи Бóже спасéнiя моегó, во дни воззвáх, и в нощи́ пред Тобóю. Да вни́дет пред Тя моли́тва моя́: приклони́ ýхо Твоé к молéнiю моемý.
Псалом 102
Благословѝ, душé моя, Гóспода, и вся внýтренняя моя и҆́мя святóе Егó. Благословѝ, душé моя, Гóспода, и не забывáй всех воздая́нїй Егó, очищáющаго вся беззакóнїя твоя́, исцеля́ющаго вся недýги твоя́, избавля́ющаго от истлéнiя живóт твой, венчáющаго тя ми́лостїю и щедрóтами, исполня́ющаго во благи́х желáнїе твоé: обновится я́ко óрля юность твоя́. Творя́й ми́лостыни Госпóдь, и судьбý всем оби́димым. Сказá путѝ Своя́ Моисéови, сыновóм Iзрáилевым хотéнїя Своя́: Щедр и Ми́лостив Госпóдь, Долготерпели́в и Многоми́лостив. Не до концá прогнéвается, нижé во век враждýет, не по беззакóнїем нáшим сотвори́л есть нам, нижé по грехóм нáшым воздáл есть нам. Я́ко по высотé небéсней от землѝ, утверди́л есть Госпóдь ми́лость Свою́ на боя́щихся Егó. Ели́ко отстоят востóцы от зáпад, удáлил есть от нас беззакóнїя нáша. Я́коже щéдрит отéц сы́ны, ущéдри Госпóдь боя́щихся Егó. Я́ко Той познá создáнїе нáше, помянý, яко персть есмы́. Человéк, яко травá днíе eгó, яко цвет сéльный, тáко оцветéт, яко дух прóйде в нем, и не бýдет, и не познáет ктомý мéста своегó. Ми́лость же Госпóдня от вéка и до вéка на боя́щихся Егó, и прáвда Егó на сынéх сынóв, храня́щих завéт Егó, и пóмнящих зáповеди Егó твори́ти я. Госпóдь на Небесѝ уготóва Престóл Свой, и Цáрство Егó всéми обладáет. Благослови́те Гóспода вси Áнгели Егó, си́льнїи крéпостїю, творя́щїи слóво Егó, услышати глас словéс Егó. Благослови́те Гóспода вся Си́лы Егó, слýги Егó, творя́щїи вóлю Егó. Благослови́те Гóспода вся делá Егó, на вся́ком мéсте влады́чества Егó, благослови́, душé моя́, Гóспода.
На вся́ком мéсте влады́чества Егó, благослови́, душé моя́, Гóспода.
Псалом 142
Гóсподи, услы́ши моли́тву мою́, внуши́ молéнiе моé во и҆́стине Твоéй, услы́ши мя в прáвде Твоéй и не вни́ди в суд с рабóм Твои́м, я́ко не оправди́тся пред Тобóю всяк живы́й. Яко погнá враг дýшу мою́, смири́л есть в зéмлю живóт мой, посади́л мя есть в тéмных, я́ко мéртвыя вéка. И҆ уны́ во мне дух мой, во мне смятéся сéрдце моé. Помянýх дни дрéвнiя, поучи́хся во всех дéлех Твои́х, в творéнiих рукý Твоéю поучáхся. Воздéх к Тебé рýце мои́, душá моя́, я́ко земля́ безвóдная Тебé. Скóро услы́ши мя, Гóсподи, исчезé дух мой, не отврати́ лицá Твоегó от менé, и уподóблюся низходя́щым в ров. Слы́шану сотвори́ мне заýтра ми́лость Твою́, я́ко на Тя уповáх. Скажи́ мне, Гóсподи, путь вóньже пойдý, я́ко к Тебé взях дýшу мою́. И҆зми́ мя от враг мои́х, Гóсподи, к Тебé прибегóх. Научи́ мя твори́ти вóлю Твою́, я́ко Ты еси́ Бог мой. Дух Твой Благíй настáвит мя на зéмлю прáву. И҆́мене Твоегó рáди, Гóсподи, живи́ши мя, прáвдою Твоéю изведéши от печáли дýшу мою́. И҆ ми́лостiю Твоéю потреби́ши враги́ моя́ и погуби́ши вся стужáющыя души́ моéй, я́ко аз раб Твой есмь.
Услы́ши мя, Гóсподи, в прáвде Твоéй и не вни́ди в суд с рабóм Твои́м. Услы́ши мя, Гóсподи, в прáвде Твоéй и не вни́ди в суд с рабóм Твои́м.
Дух Твой Благíй настáвит мя на зéмлю прáву.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýiа, аллилýiа, аллилýiа, слáва Тебé Бóже. (3 раза)
Гóсподи, поми́луй. (12 раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
БОГ ГОСПОДЬ, глас 7
Чтец: Бог Госпóдь, и яви́ся нам, благословéн Гряды́й во И҆́мя Госпóдне.(Пс.117:27А,26А)
Чтец: И҆сповéдайтеся Гóсподеви, я́ко благ, я́ко в век ми́лость Егó.(Пс.135:1/106:1)
Хор: Бог Госпóдь, и явúся нам, благословéн Гряды́й во И҆́мя Госпóдне.
Чтец: Обышéдше обыдóша мя и и҆́менем Госпóдним противля́хся и҆м.(Пс.117:11)
Хор: Бог Госпóдь, и явúся нам, благословéн Гряды́й во И҆́мя Госпóдне.
Чтец: Не умрý, но жив бýду и повéм делá Госпóдня.(Пс.117:17)
Хор: Бог Госпóдь, и явúся нам, благословéн Гряды́й во И҆́мя Госпóдне.
Чтец: Кáмень, Егóже небрегóша зи́ждущiи, Сей бысть во главý ýгла, от Гóспода бысть Сей, и есть ди́вен во очесéх нáших. (Пс.117:22-23)
Хор: Бог Госпóдь, и явúся нам, благословéн Гряды́й во И҆́мя Госпóдне.
ТРОПАРИ
Тропáрь Преображéнiя, глас 7: Преобрази́лся еси́ на горé, Хрїстé Бóже,/ показáвый ученикóм Твои́м слáву Твою́,/ я́коже можáху,/ да возсiя́ет и нам, грéшным,/ Свет Твой присносýщный/ моли́твами Богорóдицы,// Светодáвче, слáва Тебé. (Двáжды)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Тропáрь Преображéнiя, глас 7: Преобрази́лся еси́ на горé, Хрїстé Бóже,/ показáвый ученикóм Твои́м слáву Твою́,/ я́коже можáху,/ да возсiя́ет и нам, грéшным,/ Свет Твой присносýщный/ моли́твами Богорóдицы,// Светодáвче, слáва Тебé.
Гóсподи, помúлуй. (трúжды)
Слáва Ѻтцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
КАФИЗМЫ И СЕДАЛЬНЫ
Кафизма девятнадцатая
И чтем кафíсму 19-ю ( или одúн псалóм, или до 1-й Слáвы)
[Псалом 134]Хвали́те и҆́мя Госпóдне, хвали́те, раби́ Гóспода, стоя́щiи во хрáме Госпóдни, во двóрех дóму Бóга нáшего. Хвали́те Гóспода, я́ко Благ Госпóдь, пóйте и҆́мени Егó, я́ко добрó: я́ко Iáкова избрá Себé Госпóдь, Iзрáиля в достоя́нiе Себé. Я́ко аз познáх, я́ко Вéлiй Госпóдь, и Госпóдь наш над всéми бóги. Вся ели́ка восхотé Госпóдь, сотвори́ на небеси́ и на земли́, в моря́х и во всех бéзднах. Возводя́ óблаки от послéдних земли́, мóлнiи в дождь сотвори́, изводя́й вéтры от сокрóвищ Свои́х. И҆́же порази́ пéрвенцы Еги́петскiя, от человéка до скотá. Послá знáменiя и чудесá посредé Тебé, Еги́пте, на фараóна и на вся рабы́ eгó. И҆́же порази́ язы́ки мнóги и изби́ цари́ крéпки: Сióна, царя́ Аморрéйска, и Óга, царя́ Васáнска, и вся цáрствiя Ханаáнска, и дадé зéмлю их достоя́нiе, достоя́нiе Iзрáилю, лю́дем Свои́м. Гóсподи, и҆́мя Твоé в век и пáмять Твоя́ в род и род: я́ко суди́ти и҆́мать Госпóдь лю́дем Свои́м, и о рабéх Свои́х умóлится. И҆́доли язы́к, сребрó и злáто, делá рук человéческих. Устá и҆́мут, и не возлагóлют, óчи и҆́мут, и не ýзрят, ýши и҆́мут, и не услы́шат, нижé бо есть дух во устéх их. Подóбни им да бýдут творя́щiи я́, и вси надéющiися на ня. Дóме Iзрáилев, благослови́те Гóспода, дóме Аарóнь, благослови́те Гóспода, дóме Леви́ин, благослови́те Гóспода. Боя́щiися Гóспода, благослови́те Гóспода. Благословéн Госпóдь от Сióна, живы́й во Iерусали́ме.
[Псалом 135]Исповéдайтеся Гóсподеви, я́ко благ, я́ко в век ми́лость Егó. Исповéдайтеся Бóгу богóв, я́ко в век ми́лость Егó. Исповéдайтеся Гóсподеви господéй, я́ко в век ми́лость Егó. Сотвóршему чудесá вéлiя еди́ному, я́ко в век ми́лость Егó. Сотвóршему небесá рáзумом, я́ко в век ми́лость Егó. Утверди́вшему зéмлю на водáх, я́ко в век ми́лость Егó. Сотвóршему свети́ла вéлiя еди́ному, я́ко в век ми́лость Егó. Сóлнце во óбласть дне, я́ко в век ми́лость Егó. Лунý и звéзды во óбласть нóщи, я́ко в век ми́лость Егó. Порази́вшему Еги́пта с пéрвенцы eгó, я́ко в век ми́лость Егó, и извéдшему Iзрáиля от среды́ их, я́ко в век ми́лость Егó. Рукóю крéпкою и мы́шцею высóкою, я́ко в век ми́лость Егó. Раздéльшему Чермнóе мóре в разделéнiя, я́ко в век ми́лость Егó. И провéдшему Iзрáиля посредé eгó, я́ко в век ми́лость Егó. И истря́сшему фараóна и си́лу eгó в мóре Чермнóе, я́ко в век ми́лость Егó. Провéдшему лю́ди Своя́ в пусты́ни, я́ко в век ми́лость Егó. Порази́вшему цари́ вéлiя, я́ко в век ми́лость Егó, и уби́вшему цари́ крéпкiя, я́ко в век ми́лость Егó: Сióна, царя́ Аморрéйска, я́ко в век ми́лость Егó, и Óга, царя́ Васáнска, я́ко в век ми́лость Егó. И дáвшему зéмлю их достоя́нiе, я́ко в век ми́лость Егó. Достоя́нiе Iзрáилю, рабý Своемý, я́ко в век ми́лость Егó. Я́ко во смирéнiи нáшем помянý ны Госпóдь, я́ко в век ми́лость Егó. И избáвил ны есть от врагóв нáших, я́ко в век ми́лость Егó. Дая́й пи́щу вся́кой плóти, я́ко в век ми́лость Егó. Исповéдайтеся Бóгу Небéсному, я́ко в век ми́лость Егó.
[Псалом 136]На рекáх Вавилóнских, тáмо седóхом и плáкахом, внегдá помянýти нам Сióна. На вéрбiих посредé eгó обéсихом оргáны нáша. Я́ко тáмо вопроси́ша ны плéншiи нас о словесéх пéсней и вéдшiи нас о пéнiи: воспóйте нам от пéсней Сióнских. Кáко воспоéм песнь Госпóдню на земли́ чуждéй? Áще забýду тебé, Iерусали́ме, забвéна бýди десни́ца моя́. Прильпни́ язы́к мой гортáни моемý, áще не помянý тебé, áще не предложý Iерусали́ма, я́ко в начáле весéлiя моегó. Помяни́, Гóсподи, сы́ны Едóмскiя, в день Iерусали́мль глагóлющыя: истощáйте, истощáйте до основáнiй eгó. Дщи Вавилóня окая́нная, блажéн и҆́же воздáст тебé воздая́нiе твоé, éже воздалá еси́ нам. Блажéн и҆́же имéт и разбiéт младéнцы твоя́ о кáмень.
Чтец: Слáва Ѻтцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýiа, аллилýiа, аллилýiа, слáва Тебé Бóже. (3 рáза)
Гóсподи, помúлуй. (3 рáза)
Слáва Ѻтцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
[Псалом 137]Исповéмся Тебé, Гóсподи, всем сéрдцем мои́м, и пред Áнгелы воспою́ Тебé, я́ко услы́шал еси́ вся глагóлы уст мои́х. Поклоню́ся ко хрáму святóму Твоемý и исповéмся и҆́мени Твоемý о ми́лости Твоéй и и҆́стине Твоéй, я́ко возвели́чил еси́ над всем и҆́мя Твоé святóе. Вóньже áще день призовý Тя, скóро услы́ши мя: умнóжиши мя в души́ моéй си́лою Твоéю. Да исповéдятся Тебé, Гóсподи, вси цáрiе зéмстiи, я́ко услы́шаша вся глагóлы уст Твои́х, и да воспою́т в путéх Госпóдних, я́ко вéлiя слáва Госпóдня, я́ко Высóк Госпóдь, и смирéнныя призирáет, и высóкая издалéча весть. Áще пойдý посредé скóрби, живи́ши мя, на гнев враг мои́х простéрл еси́ рукý Твою́, и спасé мя десни́ца Твоя́. Госпóдь воздáст за мя. Гóсподи, ми́лость Твоя́ во век, дел рукý Твоéю не прéзри.
[Псалом 138]Гóсподи, искуси́л мя еси́ и познáл мя еси́. Ты познáл еси́ седáнiе моé и востáнiе моé. Ты разумéл еси́ помышлéнiя моя́ издалéча: стезю́ мою́ и ýже моé Ты еси́ изслéдовал, и вся пути́ моя́ прови́дел еси́. Я́ко несть льсти в язы́це моéм: се, Гóсподи, Ты познáл еси́. Вся послéдняя и дрéвняя: Ты создáл еси́ мя, и положи́л еси́ на мне рýку Твою́. Удиви́ся рáзум Твой от менé, утверди́ся, не возмогý к немý. Кáмо пойдý от Дýха Твоегó? И от лицá Твоегó кáмо бежý? Áще взы́ду на нéбо - Ты тáмо еси́, áще сни́ду во ад - тáмо еси́. Áще возмý крилé мои́ рáно и вселю́ся в послéдних мóря - и тáмо бо рукá Твоя́ настáвит мя и удержи́т мя десни́ца Твоя́. И рех: едá тма поперéт мя, и нощь просвещéнiе в слáдости моéй? Я́ко тма не помрачи́тся от Тебé, и нощь, я́ко день, просвети́тся, я́ко тма ея́, тáко и свет ея́. Я́ко Ты создáл еси́ утрóбы моя́, воспрiя́л мя еси́ из чрéва мáтере моея́. Исповéмся Тебé, я́ко стрáшно удиви́лся еси́: чýдна делá Твоя́, и душá моя́ знáет зелó. Не утаи́ся кость моя́ от Тебé, ю́же сотвори́л еси́ в тáйне, и состáв мой в преиспóдних земли́. Несодéланное моé ви́десте óчи Твои́, и в кни́зе Твоéй вси напи́шутся, во днех сози́ждутся и никтóже в них. Мне же зелó чéстни бы́ша дрýзи Твои́, Бóже, зелó утверди́шася влады́чествiя их. Изочтý их, и пáче пескá умнóжатся; востáх, и ещé есмь с Тобóю. Áще избiéши грéшники, Бóже, мýжiе кровéй, уклони́теся от менé. Я́ко ревни́ви естé в помышлéнiих, прiи́мут в суетý грáды Твоя́. Не ненави́дящыя ли Тя, Гóсподи, возненави́дех, и о вразéх Твои́х истáях? Совершéнною нéнавистiю возненави́дех я́, во враги́ бы́ша ми. Искуси́ мя, Бóже, и увéждь сéрдце моé, истяжи́ мя и разумéй стези́ моя́, и виждь, áще путь беззакóнiя во мне, и настáви мя на путь вéчен.
[Псалом 139]Изми́ мя, Гóсподи, от человéка лукáва, от мýжа непрáведна избáви мя, и҆́же помы́слиша непрáвду в сéрдце, весь день ополчáху брáни, изостри́ша язы́к свой, я́ко змiи́н, яд áспидов под устнáми их. Сохрани́ мя, Гóсподи, из руки́ грéшничи, от человéк непрáведных изми́ мя, и҆́же помы́слиша запя́ти стопы́ моя́. Скры́ша гóрдiи сеть мне, и у́жы препя́ша сеть ногáма мои́ма. При стези́ соблáзны положи́ша ми. Рех Гóсподеви: Бог мой еси́ Ты, внуши́, Гóсподи, глас молéнiя моегó. Гóсподи, Гóсподи, си́ло спасéнiя моегó, осени́л еси́ над главóю моéю в день брáни. Не предáждь менé, Гóсподи, от желáнiя моегó грéшнику: помы́слиша на мя, не остáви менé, да не когдá вознесýтся. Главá окружéнiя их, труд устéн их покры́ет я́. Падýт на них ýглiя óгненная, низложи́ши я́ в страстéх, и не постоя́т. Муж язы́чен не испрáвится на земли́: мýжа непрáведна злáя уловя́т во истлéнiе. Познáх, я́ко сотвори́т Госпóдь суд ни́щым и месть убóгим. Обáче прáведнiи исповéдятся и҆́мени Твоемý, и вселя́тся прáвiи с лицéм Твои́м.
Чтец: Слáва Ѻтцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýiа, аллилýiа, аллилýiа, слáва Тебé Бóже. (3 рáза)
Гóсподи, помúлуй. (3 рáза)
Слáва Ѻтцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
[Псалом 140]Гóсподи, воззвáх к Тебé, услы́ши мя: вонми́ глáсу молéнiя моегó, внегдá воззвáти ми к Тебé. Да испрáвится моли́тва моя́, я́ко кади́ло пред Тобóю, воздея́нiе рукý моéю - жéртва вечéрняя. Положи́, Гóсподи, хранéнiе устóм мои́м, и дверь ограждéнiя о устнáх мои́х. Не уклони́ сéрдце моé в словесá лукáвствiя, непщевáти вины́ о гресéх, с человéки дéлающими беззакóнiе, и не сочтýся со избрáнными их. Накáжет мя прáведник ми́лостiю и обличи́т мя, елéй же грéшнаго да не намáстит главы́ моея́, я́ко ещé и моли́тва моя́ во благоволéнiих их. Пожéрты бы́ша при кáмени судiи́ их: услы́шатся глагóли мои́, я́ко возмогóша. Я́ко тóлща земли́ просéдеся на земли́, расточи́шася кóсти их при áде. Я́ко к Тебé, Гóсподи, Гóсподи, óчи мои́: на Тя уповáх, не отыми́ дýшу мою́. Сохрани́ мя от сéти, ю́же состáвиша ми, и от соблáзн дéлающих беззакóнiе. Падýт во мрéжу свою́ грéшницы: еди́н есмь аз, дóндеже прейдý.
[Псалом 141]Глáсом мои́м ко Гóсподу воззвáх, глáсом мои́м ко Гóсподу помоли́хся. Пролiю́ пред Ним молéнiе моé, печáль мою́ пред Ним возвещý. Внегдá исчезáти от менé дýху моемý: и Ты познáл еси́ стези́ моя́: на пути́ сем, по немýже хождáх, скры́ша сеть мне. Смотря́х одеснýю и возгля́дах, и не бе знáяй менé: поги́бе бéгство от менé, и несть взыскáяй дýшу мою́. Воззвáх к Тебé, Гóсподи, рех: Ты еси́ уповáнiе моé, часть моя́ еси́ на земли́ живы́х. Вонми́ молéнiю моемý, я́ко смири́хся зелó, избáви мя от гоня́щих мя, я́ко укрепи́шася пáче менé. Изведи́ из темни́цы дýшу мою́, исповéдатися и҆́мени Твоемý. Менé ждут прáведницы, дóндеже воздáси мне.
[Псалом 142]Гóсподи, услы́ши моли́тву мою́, внуши́ молéнiе моé во и҆́стине Твоéй, услы́ши мя в прáвде Твоéй и не вни́ди в суд с рабóм Твои́м, я́ко не оправди́тся пред Тобóю всяк живы́й. Яко погнá враг дýшу мою́, смири́л есть в зéмлю живóт мой, посади́л мя есть в тéмных, я́ко мéртвыя вéка. И҆ уны́ во мне дух мой, во мне смятéся сéрдце моé. Помянýх дни дрéвнiя, поучи́хся во всех дéлех Твои́х, в творéнiих рукý Твоéю поучáхся. Воздéх к Тебé рýце мои́, душá моя́, я́ко земля́ безвóдная Тебé. Скóро услы́ши мя, Гóсподи, исчезé дух мой, не отврати́ лицá Твоегó от менé, и уподóблюся низходя́щым в ров. Слы́шану сотвори́ мне заýтра ми́лость Твою́, я́ко на Тя уповáх. Скажи́ мне, Гóсподи, путь вóньже пойдý, я́ко к Тебé взях дýшу мою́. И҆зми́ мя от враг мои́х, Гóсподи, к Тебé прибегóх. Научи́ мя твори́ти вóлю Твою́, я́ко Ты еси́ Бог мой. Дух Твой Благíй настáвит мя на зéмлю прáву. И҆́мене Твоегó рáди, Гóсподи, живи́ши мя, прáвдою Твоéю изведéши от печáли дýшу мою́. И҆ ми́лостiю Твоéю потреби́ши враги́ моя́ и погуби́ши вся стужáющыя души́ моéй, я́ко аз раб Твой есмь.
Чтец: Слáва Ѻтцý и Сы́ну и Святóму Дýху, и ны́не и при́сно и во вéки векóв, ами́нь.
Аллилýiа, аллилýiа, аллилýiа, слáва Тебé Бóже. (3 раза)
Гóсподи, поми́луй. (12 раз)
СЕДАЛЕН ПРАЗДНИКА
Хор (по кафíсме седáльны Преображéнiя, глас 4): Человéческое изменéнiе, éже со слáвою Твоéю, Спáсе,/ вторóе и стрáшное Твоегó пришéствiя показýя,/ на горé Фавóрстей преобрази́лся еси́./ Iлiя́ и Моисéй глагóлаху с Тобóю,/ и трiéх от учени́к спризвáв,/ и҆́же, ви́девше, Влады́ко, слáву Твою́, блистáнiю Твоемý удиви́шася.// И҆́же тогдá сим Свет Твой возсiя́вый, просвети́ дýши нáша.
Слáва Ѻтцý и Сы́ну и Святóму Дýху и ны́не и прúсно и во вéки векóв. Амúнь.
Человéческое изменéнiе, éже со слáвою Твоéю, Спáсе,/ вторóе и стрáшное Твоегó пришéствiя показýя,/ на горé Фавóрстей преобрази́лся еси́./ Iлiя́ и Моисéй глагóлаху с Тобóю,/ и трiéх от учени́к спризвáв,/ и҆́же, ви́девше, Влады́ко, слáву Твою́, блистáнiю Твоемý удиви́шася.// И҆́же тогдá сим Свет Твой возсiя́вый, просвети́ дýши нáша.
Кафизма двадцатая
И чтем кафíсму 20-ю ( или одúн псалóм, или до 1-й Слáвы)
[Псалом 143]Благословéн Госпóдь Бог мой, научáяй рýце мои́ на ополчéнiе, пéрсты моя́ на брань. Ми́лость моя́ и прибéжище моé, Застýпник мой и Избáвитель мой, Защи́титель мой, и на Негó уповáх: повинýяй лю́ди моя́ под мя. Гóсподи, что есть человéк, я́ко познáлся еси́ eмý? Или́ сын человéчь, я́ко вменя́еши eгó? Человéк суетé уподóбися: днíе eгó я́ко сень прехóдят. Гóсподи, приклони́ небесá, и сни́ди, косни́ся горáм, и воздымя́тся. Блесни́ мóлнiю, и разженéши я́, посли́ стрéлы Твоя́, и смятéши я́. Посли́ рýку Твою́ с высоты́, изми́ мя и избáви мя от вод мнóгих, из руки́ сынóв чужди́х, и҆́хже устá глагóлаша суетý, и десни́ца их - десни́ца непрáвды. Бóже, песнь нóву воспою́ Тебé, во псалти́ри десятострýннем пою́ Тебé, даю́щему спасéнiе царéм, избавля́юшему Давíда, рабá Своегó, от мечá лю́та. Избáви мя, и изми́ мя из рýки сынóв чужди́х, и҆́хже устá глагóлаша суетý, и десни́ца их - десни́ца непрáвды. И҆́хже сы́нове их я́ко новосаждéнiя водружéнная в ю́ности своéй. Дщéри их удóбрены, преукрáшены, я́ко подóбiе хрáма. Храни́лища их испóлнена, отрыгáющая от сегó в сié, óвцы их многоплóдны, мнóжащыяся во исхóдищах свои́х, волóве их тóлсти. Несть падéнiя оплóту, нижé прохóда, нижé вóпля в стóгнах их. Ублажи́ша лю́ди, и҆́мже сiя́ суть. Блажéни лю́дiе, и҆́мже Госпóдь Бог их.
[Псалом 144]Вознесý Тя, Бóже мой, Царю́ мой, и благословлю́ и҆́мя Твоé в век и в век вéка. На всяк день благословлю́ Тя и восхвалю́ и҆́мя Твоé в век и в век вéка. Вéлiй Госпóдь и хвáлен зелó, и вели́чiю Егó несть концá. Род и род восхвáлят делá Твоя́ и си́лу Твою́ возвестя́т. Великолéпiе слáвы святы́ни Твоея́ возглагóлют и чудесá Твоя́ повéдят. И си́лу стрáшных Твои́х рекýт и вели́чiе Твоé повéдят. Пáмять мнóжества блáгости Твоея́ отры́гнут и прáвдою Твоéю возрáдуются. Щедр и Ми́лостив Госпóдь, Долготерпели́в и Многоми́лостив. Благ Госпóдь вся́ческим, и щедрóты Егó на всех дéлех Егó. Да исповéдятся Тебé, Гóсподи, вся делá Твоя́, и преподóбнiи Твои́ да благословя́т Тя. Слáву Цáрствiя Твоегó рекýт, и силу Твою́ возглагóлют, сказáти сыновóм человéческим си́лу Твою́, и слáву великолéпiя Цáрствiя Твоегó. Цáрство Твоé, Цáрство всех векóв, и влады́чество Твоé во вся́ком рóде и рóде. Вéрен Госпóдь во всех словесéх Свои́х и Преподóбен во всех дéлех Свои́х. Утверждáет Госпóдь вся низпáдающыя и возставля́ет вся низвéрженныя. Óчи всех на Тя уповáют, и Ты даéши им пи́щу во благоврéменiи. Отверзáеши Ты рýку Твою́ и исполня́еши вся́кое живóтно благоволéнiя. Прáведен Госпóдь во всех путéх Свои́х и Преподóбен во всех дéлех Свои́х. Близ Госпóдь всем призывáющым Егó, всем призывáющым Егó во и҆́стине. Вóлю боя́щихся Егó сотвори́т и моли́тву их услы́шит и спасéт я́. Храни́т Госпóдь вся лю́бящыя Егó и вся грéшники потреби́т. Хвалý Госпóдню возглагóлют устá моя́, и да благослови́т вся́ка плоть и҆́мя святóе Егó в век и в век вéка.
Чтец: Слáва Ѻтцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýiа, аллилýiа, аллилýiа, слáва Тебé Бóже. (3 рáза)
Гóсподи, помúлуй. (3 рáза)
Слáва Ѻтцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
[Псалом 145]Хвали́, душé моя́, Гóспода. Восхвалю́ Гóспода в животé моéм, пою́ Бóгу моемý, дóндеже есмь. Не надéйтеся на кня́зи, на сы́ны человéческiя, в ни́хже несть спасéнiя. Изы́дет дух eгó и возврати́тся в зéмлю свою́. В той день поги́бнут вся помышлéния eгó. Блажéн, eмýже Бог Iáковль Помóщник егó, уповáнiе eгó на Гóспода Бóга своегó, сотвóршаго нéбо и зéмлю, мóре и вся, я́же в них, храня́щаго и҆́стину в век, творя́щаго суд оби́димым, даю́щаго пи́щу áлчушым. Госпóдь реши́т оковáнныя. Госпóдь умудря́ет слепцы́. Госпóдь возвóдит низвéрженныя. Госпóдь лю́бит прáведники. Госпóдь храни́т пришéльцы, си́ра и вдовý прiи́мет и путь грéшных погуби́т. Воцари́тся Госпóдь во век, Бог твой, Сióне, в род и род.
[Псалом 146]Хвали́те Гóспода, я́ко благ псалóм. Бóгови нáшему да услади́тся хвалéнiе. Зи́ждай Iерусали́ма Госпóдь, разсéянiя Iзрáилева соберéт. Исцеля́яй сокрушéнныя сéрдцем и обязýяй сокрушéнiя их. Исчитáяй мнóжество звезд и всем им именá нарицáяй. Вéлiй Госпóдь наш, и вéлiя крéпость Егó, и рáзума Егó несть числá, Прiéмляй крóткiя Госпóдь, смиря́яй же грéшники до земли́. Начни́те Гóсподеви во исповéданiи, пóйте Бóгови нáшему в гýслех. Одевáющему нéбо óблаки, уготовля́ющему земли́ дождь, прозябáющему на горáх травý и злак на слýжбу человéком, даю́щему скотóм пи́щу их, и птенцéм врáновым призывáющым Егó. Не в си́ле кóнстей восхóщет, нижé в лы́стех мýжеских благоволи́т. Благоволи́т Госпóдь в боя́щихся Егó и во уповáющих на ми́лость Егó.
[Псалом 147]Похвали́, Iерусали́ме, Гóспода, хвали́ Бóга Твоегó, Сióне, я́ко укрепи́ вереи́ врат Твои́х, благослови́ сы́ны твоя́ в тебé. Полагáяй предéлы Твоя́ мир, и тýка пшени́чна насыщáяй тя. Посылáяй слóво Своé земли́, до скóрости течéт слóво Егó, даю́щаго снег Свой, я́ко вóлну, мглу, я́ко пéпел, посыпáющаго, метáющаго гóлоть Свой, я́ко хлéбы. Проти́ву лицá мрáза Егó кто постои́т? Пóслет слóво Своé, и истáет я́, дхнет дух Егó, и потекýт вóды. Возвещáяй слóво Своé Iáкову, оправдáнiя и судьбы́ Своя́ Iзрáилеви. Не сотвори́ тáко вся́кому язы́ку, и судьбы́ Своя́ не яви́ им.
Чтец: Слáва Ѻтцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýiа, аллилýiа, аллилýiа, слáва Тебé Бóже. (3 рáза)
Гóсподи, помúлуй. (3 рáза)
Слáва Ѻтцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
[Псалом 148]Хвали́те Гóспода с небéс, хвали́те Егó в вы́шних. Хвали́те Егó, вси Áнгели Егó, хвали́те Егó, вся си́лы Егó. Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речé, и бы́ша, Той повелé, и создáшася. Постáви я́ в век и в век вéка, повелéнiе положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
[Псалом 149]Воспóйте Гóсподеви песнь нóву, хвалéнiе Егó в цéркви преподóбных. Да возвесели́тся Iзрáиль о Сотвóршем eгó, и сы́нове Сióни возрáдуются о Царé своéм. Да восхвáлят и҆́мя Егó в ли́це, в тимпáне и псалти́ри да пою́т Емý. Я́ко благоволи́т Госпóдь в лю́дех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остры́ в рукáх их: сотвори́ти отмщéнiе во язы́цех, обличéнiя в лю́дех, связáти цари́ их пýты, и слáвныя их ручны́ми окóвы желéзными, сотвори́ти в них суд напи́сан. Слáва сiя́ бýдет всем преподóбным Егó.
[Псалом 150]Хвали́те Бóга во святы́х Егó, хвали́те Егó во утвержéнiи си́лы Егó. Хвали́те Егó на си́лах Егó, хвали́те Егó по мнóжеству вели́чествiя Егó. Хвали́те Егó во глáсе трýбнем, хвали́те Егó во псалти́ри и гýслех. Хвали́те Егó в тимпáне и ли́це, хвали́те Егó во стрýнах и оргáне. Хвали́те Егó в кимвáлех доброглáсных, хвали́те Егó в кимвáлех восклицáнiя. Вся́кое дыхáнiе да хвáлит Гóспода.
Чтец: Слáва Ѻтцý и Сы́ну и Святóму Дýху, и ны́не и при́сно и во вéки векóв, ами́нь.
Аллилýiа, аллилýiа, аллилýiа, слáва Тебé Бóже. (3 раза)
Гóсподи, поми́луй. (12 раз)
Хор (по кафíсме седáльны Преображéнiя, глас 4): На горé Фавóрстей преобрази́лся еси́, Iисýсе,/ и óблак свéтел, протязáющся, я́ко сень, апóстолы слáвою покры́,/ тéмже и на зéмлю ниц пáдаху,/ не терпя́ще зрéти свéтлости непристýпныя слáвы лицá Твоегó,/ Безначáльне Спáсе, Хрiстé Бóже.// И҆́же тогдá сим Свет Твой возсiя́вый, просвети́ дýши нáша.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
На горé Фавóрстей преобрази́лся еси́, Iисýсе,/ и óблак свéтел, протязáющся, я́ко сень, апóстолы слáвою покры́,/ тéмже и на зéмлю ниц пáдаху,/ не терпя́ще зрéти свéтлости непристýпныя слáвы лицá Твоегó,/ Безначáльне Спáсе, Хрiстé Бóже.// И҆́же тогдá сим Свет Твой возсiя́вый, просвети́ дýши нáша.
ПОЛИЕЛЕЙ
Хор: Хвали́те И҆́мя Госпóдне, хвали́те, раби́ Гóспода.
Аллилýiа (трúжды)
Благословéн Госпóдь от Сióна, живы́й во Iерусали́ме.
Аллилýiа (трúжды)
Исповéдайтеся Гóсподеви, я́ко Благ, я́ко в век ми́лость Егó.
Аллилýiа (трúжды)
Исповéдайтеся Бóгу Небéсному, я́ко в век ми́лость Егó.
Аллилýiа (трúжды)
ВЕЛИЧАНИЕ ПРАЗДНИКА
Величáем Тя,/ Живодáвче Хрiстé,/ и почитáем пречúстыя плóти Твоея́// преслáвное преображéнiе.
(И далее хор продолжает чередовать стихи Избранного псалма и Величание)
ПСАЛОМ ИЗБРАННЫЙ
Вéлiй Госпóдь и хвáлен зелó, во грáде Бóга нáшего, в горé святéй Егó. Прiéмля крóткiя Госпóдь, смирéнныя же вознóсит./ Кто взы́дет на гóру Госпóдню, или́ кто стáнет на мéсте святéм Егó?/ Гóсподи, кто обитáет в жили́щи Твоéм?/ Или́ кто всели́тся в горé святéй Твоéй?/ Посли́ свет Твой и и҆́стину Твою́./ Просвеща́еши Ты ди́вно от гор вéчных./ Вселéнную, и исполнéнiе ея́ Ты основáл еси́./ Фавóр и Ермóн о и҆́мени Твоéм возрáдуетася./ Гóсподи, во свéте лицá Твоегó пóйдут./ И о и҆́мени Твоéм возрáдуются весь день.// И бýди свéтлость Гóспода Бóга нáшего на нас, от ны́не и до вéка.
Чтец: Слáва Отцý и Сыну и Святóму Дýху.
Хор: И ны́не и прúсно и во вéки векóв. Амúнь.
Аллилýiа, аллилýiа, аллилýiа, слáва Тебé Бóже. (Трúжды)
Хор: Величáем Тя,/ Живодáвче Хрiстé,/ и почитáем пречúстыя плóти Твоея́// преслáвное преображéнiе.
Гóсподи, поми́луй. (12 раз)
Седáльны прáздника по полiелéе, глас 4: Возшéд со ученики́ на гóру и во слáве Ѻ́тчи облистáв,/ с Моисéом Iлiя́ Тебé предстоя́т,/ закóн и прорóцы бо я́ко Бóгу слýжат./ Емýже и сыновствó естéственное Роди́тель исповéдая, нарицáше Сы́на,// Егóже воспевáем с Тобóю и Дýхом.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Сокровéнную мóлнiю под плóтiю существá Твоегó, Хрiстé,/ и Божéственнаго благолéпiя на святéй показáл еси горé, Благодéтелю,/ просiя́в сýщим с Тобóю ученикóм,/ и, разумéвше нестерпи́му сýщу слáву Твою́, - Свят еси́, - возопи́ша,/ я́ко, непристýпен сый, ви́ден был еси́ плóтiю мíрови,// Еди́не Человеколю́бче.
(продолжение зри здесь)