ВОЗНЕСЕНИЕ ГОСПОДНЕ. Служба мирским чином. ОБЕДНИЦА (изобразительные)
2 июня 2022 гóда. Вознесéнiе Госпóдне. Послéдованiе часóв и изобразúтельных для домáшнего (келéйнаго) совершéнiя. Воскрéсная слýжба прáздника (по Трióди).
Прéжде глагóли часы. Аще имаши произволение то чти утреню с каноном и первым часом, аще же ни, токмо часы.
ЧИН ОБЕДНИЦЫ
Первый антифон (Пс.46)
Хор, стих 1: Вси язы́цы восплещúте рукáми,/ восклúкните Бóгу глáсом рáдованiя.
Хор: Моли́твами Богорóдицы, Спáсе, спасѝ нас.
Стих 2: Я́ко Госпóдь Вы́шнiй стрáшен,/ Царь вéлiй по всей землú.
Хор: Моли́твами Богорóдицы, Спáсе, спасѝ нас.
Стих 3: Покорú лю́ди нам/ и язы́ки под нóги нáша.
Хор: Моли́твами Богорóдицы, Спáсе, спасѝ нас.
Стих 4: Взы́де Бог в воскликновéнiи,/ Госпóдь во глáсе трýбне.
Хор: Моли́твами Богорóдицы, Спáсе, спасѝ нас.
Слáва Отцý и Сыну и Святóму Дýху, и ныне и прúсно и во вéки векóв. Аминь.
Хор: Моли́твами Богорóдицы, Спáсе, спасѝ нас.
Второй антифон (Пс.47)
Хор, стих 1: Вéлiй Госпóдь и хвáлен зелó,/ во грáде Бóга нáшего, в горé святéй Егó.
Хор: Спасѝ ны Сы́не Бóжiй,/ вознесы́йся во слáве, пою́щiя Ти:/ аллилýїа.
Стих 2: Гóры Сióнскiя, рéбра Сéверова,/ град Царя́ велúкаго.
Хор: Спасѝ ны Сы́не Бóжiй,/ вознесы́йся во слáве, пою́щiя Ти:/ аллилýїа.
Стих 3: Бог в тя́жестех Егó знáемь есть,/ егдá заступáет ú.
Хор: Спасѝ ны Сы́не Бóжiй,/ вознесы́йся во слáве, пою́щiя Ти:/ аллилýїа.
Стих 4: Я́ко се цáрiе зéмстiи собрáшася,/ снидóшася вкýпе:
Хор: Спасѝ ны Сы́не Бóжiй,/ вознесы́йся во слáве, пою́щiя Ти:/ аллилýїа.
Слáва Отцý и Сыну и Святóму Дýху, и ныне и прúсно и во вéки векóв. Амúнь.
ЕДИНОРОДНЫЙ СЫНЕ
Единорóдный Сы́не и Слóве Бóжiй, Безсмéртен Сый/ и извóливый спасéнїя нáшего рáди/ воплоти́тися от Святы́я Богорóдицы и Приснодéвы Марíи,/ непрелóжно вочеловéчивыйся,/ распны́йся же, Хрiстé Бóже, смéртїю смерть попрáвый,/ Еди́н Сый Святы́я Трóицы,/ спрославля́емый Отцý и Святóму Дýху, спасѝ нас.
Третий антифон праздника (Пс.48)
Хор, стих 1: Услы́шите сiя́ вси язы́цы,/ внушúте вси живýщiи по вселéнней.
Тропáрь прáздника, глас 4: Вознéслся есѝ во слáве, Хрiстé Бóже наш,/ рáдость сотвори́вый ученикóм,/ обетовáнiем Святáго Дýха,/ извещéнным им бы́вшим благословéнiем,// я́ко Ты есѝ Сын Бóжiй, Избáвитель мíра.
Стих 2: Земнорóднiи же и сы́нове человéчестiи,/ вкýпе богáт и убóг.
Тропáрь прáздника, глас 4: Вознéслся есѝ во слáве, Хрiстé Бóже наш,/ рáдость сотвори́вый ученикóм,/ обетовáнiем Святáго Дýха,/ извещéнным им бы́вшим благословéнiем,// я́ко Ты есѝ Сын Бóжiй, Избáвитель мíра.
Стих 3: Устá моя́ возглагóлют премýдрость,/ и поучéнiе сéрдца моегó рáзум.
Тропáрь прáздника, глас 4: Вознéслся есѝ во слáве, Хрiстé Бóже наш,/ рáдость сотвори́вый ученикóм,/ обетовáнiем Святáго Дýха,/ извещéнным им бы́вшим благословéнiем,// я́ко Ты есѝ Сын Бóжiй, Избáвитель мíра.
Стих 4: Приклоню́ в прúтчу ýхо моé,/ отвéрзу во псалтúри ганáнiе моé.
Тропáрь прáздника, глас 4: Вознéслся есѝ во слáве, Хрiстé Бóже наш,/ рáдость сотвори́вый ученикóм,/ обетовáнiем Святáго Дýха,/ извещéнным им бы́вшим благословéнiем,// я́ко Ты есѝ Сын Бóжiй, Избáвитель мíра.
Тропари и кондаки
Тропáрь Вознесéнiя, глас 4: Вознéслся есѝ во слáве, Хрiстé Бóже наш,/ рáдость сотвори́вый ученикóм,/ обетовáнiем Святáго Дýха,/ извещéнным им бы́вшим благословéнiем,// я́ко Ты есѝ Сын Бóжiй, Избáвитель мíра.
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Кондáк Вознесéнiя, глас 6: Éже о нас испóлнив смотрéнiе,/ и я́же на землѝ соедини́в Небéсным,/ вознéслся есѝ во слáве, Хрiстé Бóже наш,/ никáкоже отлучáяся,/ но пребывáя неотстýпный,/ и вопiя́ лю́бящим Тя:// Аз есмь с вáми, и никтóже на вы.
Трисвятое
Хор: Святы́й Бóже,/ Святы́й Крéпкїй,/ Святы́й Безсмéртный, поми́луй нас. (3 раза)
Хор: Слáва Отцý и Сы́ну и Святóму Дýху, и ны́не и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкїй,/ Святы́й Безсмéртный, поми́луй нас.
Прокимен Вознесения, глас 7
Чтец: Прокíмен, глас седьмы́й, псалóм Дави́дов: Вознеси́ся на небесá Бóже, и по всей земли́ слáва Твоя́. (Пс.56:6)
Хор: Вознесúся на небесá Бóже,/ и по всей землú слáва Твоя́.
Чтец: Готóво сéрдце моé Бóже, готóво сéрдце моé: воспою́ и пою́ во слáве моéй. (Пс.107:1)
Хор: Вознесúся на небесá Бóже,/ и по всей землú слáва Твоя́.
Чтец: Вознеси́ся на небесá Бóже.
Хор: И по всей землú слáва Твоя́.
АПОСТОЛ
Чтец: Дея́нiй святы́х апóстол чтéнiе.
(Деян.зач.1Б): Пéрвое ýбо слóво сотвори́х о всех, о Феóфiле, я́же начáт Iисýс твори́ти же и учи́ти. Дáже до дне, вóньже, заповéдав Апóстолом Дýхом Святы́м, и́хже избрá, вознесéся. Пред ни́миже и постáви Себé жи́ва по страдáнiи Своéм, во мнóзех и́стинных знáменiих, дéньми четы́редесятьми явля́яся им, и глагóля я́же о Цáрствiи Бóжiи: С ни́миже и яды́й, повелé им от Iерусали́ма не отлучáтися, но ждáти обетовáнiя Ѻ́тча, éже слы́шасте от Менé: яко Iоáнн ýбо крести́л есть водóю, вы же и́мате крести́тися Дýхом Святы́м, не по мнóзех сих днех. Онѝ же ýбо сошéдшеся, вопрошáху Егó, глагóлюще: Гóсподи, áще в лéто сié устроя́еши цáрствiе Iзрáилево? Речé же к ним: несть вáше разумéти временá и лéта, я́же Отéц положѝ во Своéй влáсти: Но прiи́мете силу, нашéдшу Святóму Дýху на вы, и бýдете Ми свидéтели во Iерусали́ме же и во всей Iудéи и Самарíи, и дáже до послéдних землѝ. И сiя́ рек, зря́щим им, взя́тся, и óблак подъя́т Егó от óчiю их. И я́ко взирáюще бя́ху на нéбо, идýщу Емý, и се мýжа два стáста пред ни́ми во одéжди белé. Я́же и рекóста: мýжiе Галилéйстiи, что стоитé зря́ще на нéбо? Сей Iисýс, вознесы́йся от вас на нéбо, тáкожде прiи́дет, и́мже óбразом ви́десте Егó идýща на нéбо. Тогдá возврати́шася во Iерусали́м от горы́ нарицáемыя Елеóн, я́же есть близ Iерусали́ма, суббóты имýщiя путь.
[Русский синодальный перевод](Первую книгу, Феофил, составил я о всем, что с самого начала делал и чему учил Иисус, до того дня, когда Он был вознесен, дав Духом Святым повеления Апостолам, которых Он избрал, которым Он и показал Себя живым, по страдании Своём, со многими доказательствами, сорок дней являясь им и говоря о Царстве Божием. И за трапезою, Он повелел им не отлучаться из Иерусалима, но ждать обещанного Отцом, «о чем вы слышали от Меня. Ибо Иоанн крестил водою, вы же будете крещены Духом Святым, по истечении немногих этих дней». Итак, собравшись вместе, они спрашивали Его: «Господи, не в это ли время восстанавливаешь Ты Царство Израилю?» И Он сказал им: «Не вам знать времена и сроки, которые Отец установил Своею властью. Но вы примете силу, когда найдет Святой Дух на вас, и вы будете Моими свидетелями и в Иерусалиме, и во всей Иудее и Самарии, и до предела земли». И, сказав это, - пока они смотрели - Он был поднят, и облако скрыло Его из глаз их. И как взоры их были устремлены к небу, во время Его отшествия, вот два мужа предстали им в одеяниях белых, и сказали: «Мужи Галилейские, что вы стоите, глядя на небо? Этот Иисус, вознесенный от вас на небо, придет таким же образом, как вы видели Его, отходящим на небо». Тогда возвратились они в Иерусалим с горы, называемой Елеон, которая находится близ Иерусалима в расстоянии субботнего пути. (Деян.1.1-12)
Аллилуиарий, глас 2
Чтец: Аллилýіа, аллилýіа, аллилýіа, глас вторы́й.
Хор: Аллилýіа, аллилýіа, аллилýіа.
Чтец: Взы́де Бог в воскликновéнiи, Госпóдь во глáсе трýбне. (Пс.46:6)
Хор: Аллилýіа, аллилýіа, аллилýіа.
Чтец: Вси язы́цы восплещи́те рукáми, воскли́кните Бóгу глáсом рáдованiя. (Пс.46:2)
Хор: Аллилýіа, аллилýіа, аллилýіа.
ЕВАНГЕЛИЕ
Чтец: От Луки́ Святáго Евáнгелiя чтéнiе.
Хор: Слáва Тебé, Гóсподи, слáва Тебé.
(Лк.зач.114): Во врéмя óно, воскрéс Iисýс от мéртвых, ста посредé учени́к свои́х, и глагóла им: мир вам. Убоя́вшеся же и пристрáшни бы́вше, мня́ху дух ви́дети. И речé им: что смущéни естé? И почтó помышлéнiя вхóдят в сердцá вáша? Ви́дите рýце Моѝ и нóзе Моѝ, я́ко Сам Аз есмь: осяжи́те Мя и ви́дите: я́ко дух плóти и кóсти не и́мать, я́коже Менé ви́дите имýща. И сié рек, показá им рýце и нóзе. Ещé же не вéрующим им от рáдости и чудя́щимся, речé им: и́мате ли что снéдно зде? Онѝ же дáша Емý ры́бы печены́ часть и от пчел сот. И взем пред ни́ми ядé. Речé же им: сiя́ суть словесá, я́же глагóлах к вам ещé сый с вáми, я́ко подобáет скончáтися всем напи́санным в закóне Моисéове и прорóцех и псалмéх о Мне. Тогдá отвéрзе им ум разумéти Писáнiя. И речé им, я́ко тáко пи́сано есть, и тáко подобáше пострадáти Хрiстý, и воскрéснути от мéртвых в трéтiй день, и проповéдатися во и́мя Егó покая́нiю и отпущéнiю грехóв во всех язы́цех, начéнше от Iерусали́ма. Вы же естé свидéтелiе сим. И се Аз послю́ обетовáнiе Отцá Моегó на вы: вы же седи́те во грáде Iерусали́мсте, дóндеже облечéтеся си́лою свы́ше. Извéд же их вон до Вифáнiи, и воздви́г рýце Своѝ, и благословѝ их. И бысть егдá благословля́ше их, отступѝ от них, и возношáшеся на нéбо. И тíи поклони́шася Емý, и возврати́шася во Iерусали́м с рáдостiю вели́кою: и бя́ху вы́ну в цéркви, хвáляще и благословя́ще Бóга. Ами́нь.
[русский синодальный перевод]Когда они говорили о сем, Сам Иисус стал посреди них и сказал им: мир вам. Они, смутившись и испугавшись, подумали, что видят духа. Но Он сказал им: что смущаетесь, и для чего такие мысли входят в сердца ваши? Посмотрите на руки Мои и на ноги Мои; это Я Сам; осяжите Меня и рассмотри́те; ибо дух плоти и костей не имеет, как видите у Меня. И, сказав это, показал им руки и ноги. Когда же они от радости еще не верили и дивились, Он сказал им: есть ли у вас здесь какая пища? Они подали Ему часть печеной рыбы и сотового меда. И, взяв, ел пред ними. И сказал им: вот то, о чем Я вам говорил, еще быв с вами, что надлежит исполниться всему, написанному о Мне в законе Моисеевом и в пророках и псалмах. Тогда отверз им ум к уразумению Писаний. И сказал им: так написано, и так надлежало пострадать Христу, и воскреснуть из мертвых в третий день, и проповедану быть во имя Его покаянию и прощению грехов во всех народах, начиная с Иерусалима. Вы же свидетели сему. И Я пошлю обетование Отца Моего на вас; вы же оставайтесь в городе Иерусалиме, доколе не облечетесь силою свыше. И вывел их вон из города до Вифании и, подняв руки Свои, благословил их. И, когда благословлял их, стал отдаляться от них и возноситься на небо. Они поклонились Ему и возвратились в Иерусалим с великою радостью. И пребывали всегда в храме, прославляя и благословляя Бога. Аминь.(Лк.24:36-53)
Хор: Слáва Тебé, Гóсподи, слáва Тебé.
Помяни́ нас, Гóсподи, егдá прїи́деши во Цáрствiи Твоéм.
Помяни́ нас, Влады́ко, егдá прїи́деши во Цáрствiи Твоéм.
Помяни́ нас, Святы́й, егдá прїи́деши во Цáрствiи Твоéм.
Лик небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
Стих: Приступи́те к Немý и просвети́теся, и лицá вáша не постыдя́тся.
Лик Небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
Слáва Отцý и Сы́ну и Святóму Дýху.
Лик святы́х Áнгел и Архáнгел со всéми Небéсными си́лами поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
И ны́не и прúсно и во вéки векóв. Амúнь.
Символ веры
Вéрую во Еди́наго Бóга Отцá, Вседержителя, Творцá нéбу и земли, ви́димым же всем и неви́димым. И во Еди́наго Гóспода Iисýса Хрiста, Сы́на Бóжiя, Единорóднаго, И҆́же от Отцá Рождéннаго прéжде всех век; Свéта от Свéта, Бóга И҆́стинна от Бóга И҆́стинна, рождéнна, несотворéнна, единосýщна Отцý, И҆́мже вся бы́ша. Нас рáди человéк и нáшего рáди спасéнiя сшéдшаго с небéс и воплоти́вшагося от Дýха Свята и Марíи Дéвы и вочеловéчшася. Распя́таго же за ны при Понтíйстем Пилáте, и страдáвша и погребéнна. И воскрéсшаго в трéтiй день по Писáнiем, и возшéдшаго на небесá и седя́ща одеснýю Отцá. И пáки грядýщаго со слáвою суди́ти живы́м и мéртвым, Егóже Цáрствiю не бýдет концá. И в Дýха Святáго, Гóспода, Животворя́щаго, И҆́же от Отцá исходя́щаго, И҆́же со Отцéм и Сы́ном спокланя́ема и сслáвима, Глагóлавшего прорóки. Во еди́ну Святýю, Собóрную и Апóстольскую Цéрковь. Исповéдую еди́но крещéнiе во оставлéнiе грехóв. Чáю воскресéнiя мéртвых, и жи́зни бýдущаго вéка. Аминь.
Ослáби, остáви, прости Бóже, прегрешéнiя нáша, вóльная, и невóльная, я́же в слóве и в дéле, я́же в вéденiи и не в вéденiи, я́же во дни и в нощѝ, я́же во умé и помышлéнiи, вся нам простѝ, я́ко Благ и Человеколю́бец.
Ѻ́тче наш, И҆́же есѝ на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрiстé, Сы́не Бóжiй, поми́луй нас. Ами́нь.
КОНДАК
Кондáк Вознесéнiя, глас 6: Éже о нас испóлнив смотрéнiе,/ и я́же на землѝ соедини́в Небéсным,/ вознéслся есѝ во слáве, Хрiстé Бóже наш,/ никáкоже отлучáяся,/ но пребывáя неотстýпный,/ и вопiя́ лю́бящим Тя:// Аз есмь с вáми, и никтóже на вы.
Гóсподи, поми́луй. (12 раз)
И молитву: Всесвятáя Трóице, Единосýщная Держáво, Нераздéльное Цáрство, всех благи́х Винá, благоволи́ же и о мне грéшнем, утвердѝ, вразумѝ сéрдце моé, и всю мою отымѝ сквéрну, просветѝ мою мысль, да вы́ну слáвлю, пою, покланя́юся и глагóлю: Еди́н Свят, Един Госпóдь, Iисýс Хрiстóс, во слáву Бóга Отцá, ами́нь.
Бýди и́мя Госпóдне благословéно от ны́не и до вéка. (3 раза)
Слáва Отцý и Сыну и Святóму Дýху, и ны́не и при́сно и во вéки векóв, аминь.
Псалом 33
Благословлю́ Гóспода на вся́кое врéмя,/ вы́ну хвалá Его во устéх мои́х./ О Гóсподе похвáлится душá моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм имя Егó вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицá вáша не постыдя́тся./ Сей ни́щiй воззвá, и Госпóдь услы́ша ѝ,/ и от всех скорбéй егó спасé ѝ./ Ополчи́тся Áнгел Госпóдень óкрест боя́щихся Егó,/ и избáвит их./ Вкуси́те и ви́дите, я́ко благ Госпóдь;/ блажéн муж, иже уповáет нань./ Бóйтеся Гóспода, вси святíи Егó,/ яко несть лишéнiя боя́щымся Его./ Богáтiи обнищáша и взалкáша,/ взыскáющiи же Гóспода не лишáтся вся́каго блáга./Прiиди́те, чáда, послýшайте менé,/ стрáху Госпóдню научý вас./ Кто есть человéк хотя́й живóт,/ любя́й дни ви́дети блáги;/ Удержѝ язык твой от зла,/ и устнé твоѝ, éже не глагóлати льсти./ Уклони́ся от зла и сотворѝ блáго,/ взыщѝ ми́ра, и поженѝ ѝ./ Ѻ́чи Госпóдни на прáведныя,/ и ýши Егó в моли́тву их./ Лицé же Госпóдне на творя́щiя злáя,/ еже потреби́ти от землѝ пáмять их./ Воззвáша прáведнiи, и Госпóдь услы́ша их,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я Госпóдь./ Храни́т Госпóдь вся кóсти их,/ ни еди́на от них сокруши́тся./ Смерть грéшников лютá,/ и ненави́дящiи прáведнаго прегрешáт./ Избáвит Госпóдь дýши раб Свои́х,/ и не прегрешáт вси уповáющiи на Негó.
Вместо Достойно есть (Задостóйник)
Припéв: Величáй душé моя́,// вознéсшагося от землѝ на нéбо, Хрiстá Жизнодáвца.
Iрмóс: Тя пáче умá и словесé Мáтерь Бóжiю,/ в лéто Безлéтнаго неизречéнно рóждшую,// вéрнiи, единомýдренно величáем.
Слáва Отцý и Сыну и Святóму Дýху, и ны́не и при́сно и во вéки векóв, аминь.
Гóсподи, поми́луй. (3 раза)
Гóсподи, благословѝ.
ОТПУСТ
И҆́же во слáве вознесы́йся от нас на Нéбо и одеснýю сéдый Бóга и Отцá, Хрiстóс, И҆́стинный Бог наш, моли́твами Пречи́стыя Своея́ Мáтере, преподóбных и богонóсных отéц наших и всех святых, поми́луй и спасѝ нас, яко Благ и Человеколю́бец. Аминь.