Суббота мясопустная. Вселенская родительская суббота. ВСЕДНЕВНАЯ ВЕЧЕРНЯ. Служба мирским чином
9 мáрта 2024 гóда. Суббóта мясопýстная. Вселéнская родúтельская суббóта. Пáмять совершáем всех от вéка усóпших правослáвных хрїстiáн, отéц и брáтiй нáших. Заупокóйная слýжба для домáшнего (келéйнаго) совершéнiя состоúт из вседнéвной вечéрни, ýтрени, тáже канóна и пéрвого чáса. Вся слýжба для домáшнего (келéйнаго) совершéнiя по Октóиху и Трióди. Слýжба мiрскúм чúном.
ВСЕДНЕВНАЯ ВЕЧЕРНЯ
Моли́твами святы́х отéц нáших, Гóсподи Iисýсе Хрїстè, Бóже наш, поми́луй нас, ами́нь.
Слáва Тебè, Бóже наш, слáва Тебè.
Царю́ Небéсный, Утéшителю, Дýше И҆́стины, И҆́же вездè сый и вся исполня́яй, Сокрóвище благи́х и жи́зни Подáтелю, прiидѝ и всели́ся в ны, и очи́сти ны от вся́кiя сквéрны, и спасѝ, Блáже, Дýши нáша.
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегò рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжїй, поми́луй нас. Ами́нь.
Гóсподи, поми́луй, (12 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Пріиди́те, поклони́мся Царéви нáшему Бóгу.
Пріиди́те, поклони́мся и припадéм Хрїстý, Царéви нáшему Бóгу.
Пріиди́те, поклони́мся и припадéм Самомý Хрїстý, Царéви и Бóгу нáшему.
Псалом 103, предначинaтельный
Благословѝ, душè моя, Гóспода. Гóсподи, Бóже мой, возвеличился есѝ зелò. Во исповéданiе и в велелéпоту облéклся есѝ. Одея́йся свéтом, яко ри́зою, простирáяй нéбо, яко кóжу. Покрывáяй водáми превы́спренняя Своя́, полагáяй óблаки на восхождéнiе Своè, ходя́й на крилý вéтреню. Творя́й Áнгелы Своя дýхи и слугѝ Своя плáмень óгненный. Основáяй зéмлю на твéрди ея́, не преклони́тся в век вéка. Бéздна, яко ри́за, одея́нiе ея́, на горáх стáнут вóды, от запрещéнiя Твоегò побéгнут, от глáса грóма Твоегò убоя́тся. Восхóдят гóры и нисхóдят поля́ в мéсто, éже основáл есѝ им. Предéл положи́л есѝ, eгóже не прéйдут, нижè обратя́тся покры́ти зéмлю. Посылáяй истóчники в дéбрех, посредè гор прóйдут вóды. Напая́ют вся звéри сéльныя, ждут онáгри в жáжду свою. На тых пти́цы небéсныя привитáют, от среды̀ кáменiя дадя́т глас. Напая́яй гóры от превы́спренних Свои́х, от плодà дел Твоих насы́тится земля́. Прозябáяй травý скотóм, и злак на слýжбу человéком, известѝ хлеб от землѝ. И винò весели́т сéрдце человéка, умáстити лицè елéем, и хлеб сéрдце человéка укрепи́т. Насы́тятся древà польскáя, кéдри Лiвáнстiи, и҆́хже еси насади́л. Тáмо пти́цы вогнездя́тся, еродíево жили́ще предводи́тельствует и҆́ми. Гóры высóкiя елéнем, кáмень прибéжище зáяцем. Сотвори́л есть лунý во временà, сóлнце познà зáпад свой. Положи́л есѝ тму, и бысть нощь, в нéйже прóйдут вси звéрiе дубрáвнiи. Ски́мни рыкáющiи, восхи́тити и взыскáти от Бóга пи́щу себè. Возсiя́ сóлнце и собрáшася и в лóжах свои́х ля́гут. Изы́дет человéк на дéло своè и на дéланiе своè до вéчера. Яко возвели́чишася делà Твоя, Гóсподи, вся премýдростiю сотвори́л есѝ, испóлнися земля́ твáри Твоея́. Сiè мóре вели́кое и прострáнное, тáмо гáди, и҆́мже несть числà, живóтная мáлая с вели́кими, тáмо кораблѝ преплáвают, змiй сей, eгóже создáл есѝ ругáтися eмý. Вся к Тебè чáют, дáти пи́щу им во блáго врéмя. Дáвшу Тебè им соберýт, отвéрзшу Тебè рýку вся́ческая испóлнятся блáгости, отврáщшу же Тебè лицè, возмятýтся, отъи́меши дух их, и исчéзнут, и в персть свою возвратя́тся. Пóслеши Дýха Твоегò, и сози́ждутся, и обнови́ши лицè землѝ. Бýди слáва Госпóдня во вéки, возвесели́тся Госпóдь о дéлех Свои́х, призирáяй на зéмлю, и творя́й ю́ трясти́ся, прикасáяйся горáм, и дымя́тся. Воспою́ Гóсподеви в животè моéм, пою́ Бóгу моемý, дóндеже есмь, да услади́тся Емý бесéда моя, аз же возвеселю́ся о Гóсподе. Да исчéзнут грéшницы от землѝ, и беззакóнницы, я́коже не бы́ти им. Благословѝ, душè моя́, Гóспода. Сóлнце познà зáпад свой. Положи́л еси тму, и бысть нощь. Яко возвели́чишася делà Твоя, Гóсподи, вся премýдростiю сотвори́л есѝ.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (12 раз)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Восемнадцатая кафисма
Читáем кафíсму 18-ю (лúбо 1-ю cтатiю)
[Псалом 119]Ко Гóсподу, внегдà скорбéти ми, воззвáх, и услы́ша мя. Гóсподи, избáви дýшу мою́ от устéн непрáведных и от язы́ка льсти́ва. Что дáстся тебè, илѝ что приложи́тся тебè к язы́ку льсти́ву? Стрéлы си́льнаго изощрéны, со ýгльми пусты́нными. Увы̀ мне, я́ко пришéльствiе моè продолжи́ся, всели́хся с селéнiи Кидáрскими. Мнóго пришéльствова душà моя́, с ненави́дящими ми́ра бех ми́рен: егдà глагóлах им, боря́ху мя тýне.
[Псалом 120]Возведóх óчи моѝ в гóры, отню́дуже прiи́дет пóмощь моя́. Пóмощь моя́ от Гóспода, сотвóршаго нéбо и зéмлю. Не даждь во смятéнiе ногѝ твоея́, нижè воздрéмлет храня́й тя, се не воздрéмлет, нижè ýснет храня́й Iзрáиля. Госпóдь сохрани́т тя, Госпóдь покрóв твой на рýку деснýю твою́. Во дни сóлнце не ожжéт тебè, нижè лунà нóщiю. Госпóдь сохрани́т тя от вся́каго зла, сохрани́т дýшу твою́ Госпóдь. Госпóдь сохрани́т вхождéнiе твоè и исхождéнiе твоè, отны́не и до вéка.
[Псалом 121]Возвесели́хся о рéкших мне: в дом Госпóдень пóйдем. Стоя́ще бя́ху нóги нáша во двóрех твои́х, Iерусали́ме. Iерусали́м зи́ждемый я́ко град, eмýже причáстiе eгò вкýпе. Тáмо бо взыдóша колéна, колéна Госпóдня, свидéнiе Iзрáилево, исповéдатися и҆́мени Госпóдню, я́ко тáмо седóша престóли на суд, престóли в домý Давíдове. Вопроси́те же я́же о ми́ре Iерусали́ма: и оби́лiе лю́бящим тя. Бýди же мир в си́ле твоéй и оби́лiе в столпостенáх твои́х. Рáди брáтiй мои́х и бли́жних мои́х глагóлах ýбо мир о тебè. Дóму рáди Гóспода Бóга нáшего взыскáх благáя тебè.
[Псалом 122]К Тебè возведóх óчи моѝ, живýщему на Небесѝ. Се я́ко óчи раб в рукý госпóдiй свои́х, я́ко óчи рабы́ни в рукý госпожѝ своея́, тáко óчи нáши ко Гóсподу Бóгу нáшему, дóндеже ущéдрит ны. Поми́луй нас, Гóсподи, поми́луй нас, я́ко по мнóгу испóлнихомся уничижéнiя, наипáче напóлнися душà нáша поношéнiя гобзýющих и уничижéнiя гóрдых.
[Псалом 123]Я́ко áще не Госпóдь бы был в нас, да речéт ýбо Iзрáиль, я́ко áще не Госпóдь бы был в нас, внегдà востáти человéком на ны, ýбо живы́х пожéрли бы́ша нас, внегдà прогнéватися я́рости их на ны, ýбо водà потопи́ла бы нас. Потóк прéйде душà нáша, ýбо прéйде душà нáша вóду непостоя́нную. Благословéн Госпóдь, И҆́же не дадè нас в лови́тву зубóм их. Душà нáша, я́ко пти́ца избáвися от сéти ловя́щих: сеть сокруши́ся, и мы избáвлени бы́хом. Пóмощь нáша во и҆́мя Гóспода, сотвóршаго нéбо и зéмлю.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
[Псалом 124]Надéющiися на Гóспода, я́ко горà Сióн: не подви́жится в век живы́й во Iерусали́ме. Гóры óкрест eгò, и Госпóдь óкрест людéй Свои́х отны́не и до вéка. Я́ко не остáвит Госпóдь жезлà грéшных на жрéбiй прáведных, я́ко да не прóструт прáведнiи в беззакóнiя рук свои́х. Ублажѝ, Гóсподи, благíя и прáвыя сéрдцем. Уклоня́ющiяся же в развращéнiя отведéт Госпóдь с дéлающими беззакóнiе. Мир на Iзрáиля.
[Псалом 125]Внегдà возврати́ти Гóсподу плен Сióнь, бы́хом я́ко утéшени. Тогдà испóлнишася рáдости устà нáша и язы́к наш весéлiя, тогдà рекýт во язы́цех: возвели́чил есть Госпóдь сотвори́ти с ни́ми. Возвели́чил есть Госпóдь сотвори́ти с нáми: бы́хом веселя́щеся. Возвратѝ, Гóсподи, пленéнiе нáше, я́ко потóки ю́гом. Сéющiи слезáми, рáдостiю пóжнут. Ходя́щiи хождáху и плáкахуся, метáюще сéмена своя́, грядýще же прiи́дут рáдостiю, взéмлюще рукоя́ти своя́.
[Псалом 126]Áще не Госпóдь сози́ждет дом, всýе труди́шася зи́ждущiи. Áще не Госпóдь сохрани́т град, всýе бде стрегíй. Всýе вам есть ýтреневати, востáнете по седéнiи, ядýщiи хлеб болéзни, егдà даст возлю́бленным Свои́м сон. Се достоя́нiе Госпóдне сы́нове, мзда плодà чрéвняго. Я́ко стрéлы в руцè си́льнаго, тáко сы́нове оттрясéнных. Блажéн, и҆́же испóлнит желáнiе своè от них. Не постыдя́тся, егдà глагóлют врагóм свои́м во вратéх.
[Псалом 127]Блажéни вси боя́щiися Гóспода, ходя́щiи в путéх Eгò. Труды̀ плодóв Твои́х снéси: блажéн есѝ, и добрò тебè бýдет. Женà твоя́, я́ко лозà, плодови́та в странáх дóму твоегò, сы́нове твоѝ, я́ко новосаждéнiя мáсличная, óкрест трапéзы твоея́. Се тáко благослови́тся человéк боя́йся Гóспода. Благослови́т тя Госпóдь от Сióна, и ýзриши благáя Iерусали́ма вся дни животà твоегò, и ýзриши сы́ны сынóв твои́х. Мир на Iзрáиля.
[Псалом 128]Мнóжицею брáшася со мнóю от ю́ности моея́, да речéт ýбо Iзрáиль: мнóжицею брáшася со мнóю от ю́ности моея́, и҆́бо не премогóша мя. На хребтè моéм дéлаша грéшницы, продолжи́ша беззакóнiе своè. Госпóдь Прáведен ссечè вы́я грéшников. Да постыдя́тся и возвратя́тся вспять вси ненави́дящiи Сióна. Да бýдут, я́ко травà на здех, я́же прéжде восторжéнiя и҆́зсше, éюже не испóлни рукѝ своея́ жняй, и нéдра своегò рукоя́ти собирáяй, и не рéша мимоходя́щiи: благословéнiе Госпóдне на вы, благослови́хом вы во и҆́мя Госпóдне.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
[Псалом 129]Из глубины́ воззвáх к Тебé, Гóсподи, Гóсподи, услы́ши глас мой. Да бýдут ýши Твои́ внéмлюще глáсу молéнiя моегò. Áще беззакóнiя нáзриши, Гóсподи, Гóсподи, кто постои́т? Я́ко у Тебé очищéнiе есть. И҆́мене рáди Твоегò потерпéх Тя, Гóсподи, потерпé душá моя́ в слóво Твоé, уповá душá моя́ на Гóспода. От стрáжи ýтреннiя до нóщи, от стрáжи ýтреннiя да уповáет Iзрáиль на Гóспода. Я́ко у Гóспода ми́лость, и мнóгое у Негò избавлéнiе, и Той избáвит Iзрáиля от всех беззакóнiй eгò.
[Псалом 130]Гóсподи, не вознесéся сéрдце моé, нижé вознесóстеся óчи мои́, нижé ходи́х в вели́ких, нижé в ди́вных пáче менé. Áще не смиреномýдрствовах, но вознесóх дýшу мою́, я́ко отдоéное на мáтерь свою́, тáко воздáси на дýшу мою́. Да уповáет Iзрáиль на Гóспода, отны́не и до вéка.
[Псалом 131]Помяни́, Гóсподи, Давíда и всю крóтость eгó: я́ко кля́тся Гóсподеви, обещáся Бóгу Iáковлю: áще вни́ду в селéнiе дóму моегó, или́ взы́ду на одр постéли моея́, áще дам сон очи́ма мои́ма и вéждома мои́ма дремáнiе, и покóй скранiáма мои́ма, дóндеже обря́щу мéсто Гóсподеви, селéнiе Бóгу Iáковлю. Се слы́шахом я́ во Евфрáфе, обретóхом я́ в поля́х дубрáвы. Вни́дем в селéнiя Егó, поклони́мся на мéсто, идéже стоя́сте нóзе Егó. Воскресни́, Гóсподи, в покóй Твой, Ты и кiвóт святы́ни Твоея́. Свящéнницы Твои́ облекýтся прáвдою, и преподóбнiи Твои́ возрáдуются. Давíда рáди рабá Твоегó не отврати́ лицé помáзаннаго Твоегó. Кля́тся Госпóдь Давíду и҆́стиною и не отвéржется ея́: от плодá чрéва твоегó посаждý на престóле твоéм. Áще сохраня́т сы́нове твои́ завéт Мой, и свидéнiя Моя́ сiя́, и҆́мже научý я́, и сы́нове их до вéка ся́дут на престóле твоéм. Я́ко избрá Госпóдь Сióна, извóли и҆̀ в жили́ще Себé. Сей покóй Мой во век вéка, зде вселю́ся, я́ко извóлих и҆̀. Лови́тву eгó благословля́яй благословлю́, ни́щiя eгó насы́щу хлéбы, свящéнники eгó облекý во спасéнiе, и преподóбнiи eгó рáдостiю возрáдуются. Тáмо возращý рог Давíдови, уготóвах свети́льник помáзанному Моемý. Враги́ eгó облекý студóм, на нéмже процветéт святы́ня Моя́.
[Псалом 132]Се чтó добрó, или́ что краснó? Но éже жи́ти брáтiи вкýпе. Я́ко ми́ро на главé, сходя́щее на брадý, брадý Аарóню, сходя́щее на омéты одéжды eгó, я́ко росá Аермóнская сходя́щая на гóры Сióнскiя, я́ко тáмо заповéда Госпóдь благословéнiе и живóт до вéка.
[Псалом 133]Се ны́не благослови́те Гóспода вси раби́ Госпóдни, стоя́щiи в хрáме Госпóдни, во двóрех дóму Бóга нáшего, В нóщех воздежи́те рýки вáша во святáя, и благослови́те Гóспода. Благослови́т тя Госпóдь от Сióна, сотвори́вый нéбо и зéмлю.
Чтец: Слáва Отцý и Сы́ну и Святóму Дýху и ны́не и при́сно и во вéки векóв. Ами́нь.
Аллилýїа, аллилýїа, аллилýїа, слáва Тебè Бóже. (трúжды)
Гóсподи, поми́луй. (3 рáза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
ГОСПОДИ ВОЗЗВАХ, ГЛАС 6
Хор: Гóсподи, воззвáх к Тебè, услы́ши мя./ Услы́ши мя, Гóсподи./ Гóсподи, воззвáх к Тебè, услы́ши мя:/ вонмѝ глáсу молéнія моегò,/ внегдà воззвáти ми к Тебè./ Услы́ши мя, Гóсподи.
Хор: Да испрáвится моли́тва моя́,/ я́ко кади́ло пред Тобóю,/ воздея́ніе рукý моéю/ - жéртва вечéрняя./ Услы́ши мя, Гóсподи.
[в приходской практике пропускается до стихир]Положѝ, Гóсподи, хранéнiе устóм мои́м, и дверь ограждéнiя о устнáх мои́х. Не уклонѝ сéрдце моè в словесà лукáвствiя, непщевáти вины̀ о гресéх, с человéки дéлающими беззакóнiе, и не сочтýся со избрáнными их. Накáжет мя прáведник ми́лостiю и обличи́т мя, елéй же грéшнаго да не намáстит главы̀ моея́, я́ко ещè и моли́тва моя́ во благоволéнiих их. Пожéрты бы́ша при кáмени судiѝ их: услы́шатся глагóли моѝ, я́ко возмогóша. Я́ко тóлща землѝ просéдеся на землѝ, расточи́шася кóсти и҆́х при áде. Я́ко к Тебè, Гóсподи, Гóсподи, óчи моѝ: на Тя уповáх, не отымѝ дýшу мою́. Сохранѝ мя от сéти, ю́же состáвиша ми, и от соблáзн дéлающих беззакóнiе. Падýт во мрéжу свою́ грéшницы: еди́н есмь аз, дóндеже прейдý.
[в приходской практике пропускается до стихир]Глáсом мои́м ко Гóсподу воззвáх, глáсом мои́м ко Гóсподу помоли́хся. Пролiю́ пред Ним молéнiе моè, печáль мою́ пред Ним возвещý. Внегдà исчезáти от менè дýху моемý: и Ты познáл есѝ стезѝ моя́: на путѝ сем, по немýже хождáх, скры́ша сеть мне. Смотря́х одеснýю и возгля́дах, и не бе знáяй менè: поги́бе бéгство от менè, и несть взыскáяй дýшу мою́. Воззвáх к Тебè, Гóсподи, рех: Ты есѝ уповáнiе моè, часть моя́ есѝ на землѝ живы́х. Вонмѝ молéнiю моемý, я́ко смири́хся зелò, избáви мя от гоня́щих мя, я́ко укрепи́шася пáче менè.
[пропускается до стихир]Изведѝ из темни́цы дýшу мою́, исповéдатися и҆́мени Твоемý. Менè ждут прáведницы, дóндеже воздáси мне. Из глубины̀ воззвáх к Тебè, Гóсподи, Гóсподи, услы́ши глас мой. Да бýдут ýши Твоѝ внéмлюще глáсу молéнiя моегò.
На 6. Стiх: Áще беззакóнiя нáзриши, Гóсподи, Гóсподи, кто постоúт?// Яко у Тебè очищéнiе есть.
Стiхúры мýченичны из Октóиха, глас 6: Мýченицы Твоѝ, Гóсподи,/ не отвергóшася Тебè, ни отступи́ша от зáповедей Твои́х.// Тех моли́твами поми́луй нас.
И҆́мене рáди Твоегò потерпéх Тя, Гóсподи, потерпè душà моя́ в слóво Твоè,// уповà душà моя на Гóспода.
Стiхúра: Мýченицы Твоѝ, Гóсподи,/ не отвергóшася Тебè, ни отступи́ша от зáповедей Твои́х.// Тех моли́твами поми́луй нас.
На 4. Стiх: От стрáжи ýтреннiя до нóщи, от стрáжи ýтреннiя,// да уповáет Iзрáиль на Гóспода.
Стiхúры: Мýченицы Твоѝ, Гóсподи,/ не отвергóшася Тебè, ни отступи́ша от зáповедей Твои́х.// Тех моли́твами поми́луй нас.
Яко у Гóспода мúлость, и мнóгое у Негò избавлéнiе,// и Той избáвит Iзрáиля от всех беззакóнiй eгò.
Стiхúры Трióди, глас 8: От вéка мéртвых днесь/ всех по и҆́мени, вéрою пожи́вших благочéстно,/ пáмять сотворя́юще вéрнiи,/ Спáса и Гóспода воспои́м, прося́ще прилéжно/ сим в час судà отвéт благíй дáти,/ Томý Самомý Бóгу нáшему,/ всей судя́щему землѝ,/ деснáго Егò предстоя́нiя получи́ти в рáдости,/ в чáсти прáведных, и во святы́х жрéбiи свéтлем,// и достóйным бы́ти Небéснаго Цáрствiя Егò.
На 2. Стiх: Хвалúте Гóспода вси язы́цы, похвалúте Егò вси лю́дiе.
Стiхúра: Твоéю крóвiю человéки Спáсе искупи́вый,/ и смéртiю Твоéю от смéрти гóрькiя избáвивый нас,/ и жизнь вéчную подая́й нам Воскресéнiем Твои́м,/ вся упокóй Гóсподи, усóпшiя благочéстно,/ илѝ в пусты́нях, илѝ во градéх, илѝ в мóри,/ илѝ на землѝ, илѝ на вся́ком мéсте:/ царѝ же, свящéнники, архiерéи,/ монáхи, и бельцы́ в вóзрасте вся́ком всерóдном,// и сподóби я́ Небéснаго Цáрствiя Твоегò.
Яко утвердúся мúлость Егò на нас,// и и҆́стина Госпóдня пребывáет во век.
Стiхúра: Из мéртвых востáнiем Твои́м Хрїстè,/ не ктомý смерть обладáет умéршими благочéстно./ Тéмже мóлимся прилéжно:/ рабы́ Твоя́ упокóй во двóрех Твои́х,/ и в нéдрех Авраáма, от Адáма дáже до днесь,/ послужи́вшiя Тебè чи́сто,/ отцы́ и брáтiю нáшу,/ дрýги вкýпе и срóдники,/ вся́каго человéка, в житiи́ послужи́вша вéрно,/ и к Тебè престáвльшася многови́дно и многообрáзно, Бóже,// и сподóби я́ Небéснаго Цáрствiя Твоегò.
Слáва Отцý и Сы́ну и Святóму Дýху.
Стiхúра Трióди, глас тóйже: Плáчу и рыдáю,/ егдà помышля́ю смерть,/ и ви́жду во гробéх лежáщую/ по óбразу Бóжiю создáнную нáшу красотý,/ безобрáзну, и безслáвну,/ не имýщу ви́да./ Óле чудесè!/ Что éже о нас сiè бысть тáинство?/ Кáко предáхомся тлéнiю?/ Кáко припрягóхомся смéрти?/ Вои́стинну Бóжiим повелéнiем,/ я́коже есть пи́сано,// подаю́щаго престáвльшимся покóй.
И ны́не и прúсно и во вéки векóв, амúнь.
Догмáтик. Глас 6: Кто Тебè не ублажи́т, Пресвятáя Дéво?/ Кто ли не воспоéт Твоегò Пречи́стаго Рождествà?/ Безлéтно бо от Отцà возсiя́вый Сын Единорóдный,/ Тóйже от Тебè Чи́стыя прóйде,/ неизречéнно воплóщься,/ естествóм Бог сый,/ и естествóм быв Человéк нас рáди,/ не во двою́ лицý разделя́емый,/ но во двою́ естествý/ несли́тно познавáемый./ Тогò молѝ Чи́стая Всеблажéнная,// поми́ловатися душáм нáшим.
СВЕТЕ ТИХИЙ
Хор: Свéте Ти́хiй святы́я слáвы Безсмéртнаго Ѻтцà Небéснаго, Святáго, Блажéннаго, Iисýсе Хрїстè! Пришéдше на зáпад сóлнца, ви́девше свет вечéрнiй, поéм Ѻтцà, Сы́на и Святáго Дýха, Бóга. Достóин есѝ во вся временà пет бы́ти глáсы преподóбными, Сы́не Бóжiй, живóт дая́й; тéмже мiр Тя слáвит.
ВМЕСТО ПРОКИМНА АЛЛИЛУИА
Чтец: Аллилýїа, аллилýїа, аллилýїа, глас осьмый.
Хор: Аллилýїа, аллилýїа, аллилýїа.
Чтец: Блажéни, я́же избрáл и прiя́л еси́ Гóсподи, и пáмять их в род и род.
Хор: Аллилýїа, аллилýїа, аллилýїа.
Чтец: Дýши их во благи́х водворя́тся.
Хор: Аллилýїа, аллилýїа, аллилýїа.
СПОДОБИ ГОСПОДИ
Чтец: Сподóби, Гóсподи, в вéчер сей без грехà сохрани́тися нам./ Благословéн есѝ, Гóсподи Бóже ѻтéц нáших,/ и хвáльно и прослáвлено и҆́мя Твоè во вéки, ами́нь.
Бýди, Гóсподи, ми́лость Твоя́ на нас, я́коже уповáхом на Тя./ Благословéн есѝ, Гóсподи, научѝ мя оправдáнiем Твои́м./ Благословéн есѝ, Влады́ко, вразумѝ мя оправдáнiем Твои́м./ Благословéн есѝ, Святы́й, просветѝ мя оправдáнiи Твои́ми.
Гóсподи, ми́лость Твоя́ во век, дел рукý Твоéю не прéзри./ Тебè подобáет хвалà. Тебè подобáет пéнiе,/ Тебè слáва подобáет, Ѻтцý и Сы́ну и Святóму Дýху, ны́не и при́сно и во вéки векóв. Ами́нь.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
СТИХИРЫ НА СТИХОВНЕ
Чтец (Стiхúры Октóиха, глас 6): Страда́вшiи Тебе́ ра́ди, Хрiсте́,/ мно́гiя му́ки претерпе́ша,/ и соверше́нныя венцы́ прiя́ша на Небесе́х,// да мо́лятся о душа́х на́ших.
Стiх: Блажéни, я́же избрáл и прiя́л есù Гóсподи.
Мéртвен: Крест Твой, Го́споди,/ му́чеником бысть ору́жiе непобеди́мое:/ ви́дяху бо предлежа́щую смерть,/ и предзря́ще бу́дущую жизнь,/ упова́нiем е́же на Тя́ укрепля́хуся.// Тех моли́твами поми́луй нас.
Стiх: Дýши их во благúх водворя́тся.
Мéртвен: Начáток ми и состáв зижди́тельное Твоé бысть повелéнiе:/ восхотéв бо от неви́димаго и ви́димаго естествá жи́ва мя состáвити,/ от земли́ ýбо тéло создáв, дал же ми еси́ дýшу,/ Божéственным Твои́м и животворя́щим вдохновéнiем./ Тéмже Спáсе, рабы́ Твоя́ во странé живы́х,// и в крóвех прáведных упокóй.
Слáва Ѻтцý и Сы́ну и Святóму Дýху.
Стiхúра Трióди, глас 6: Начáток ми и состáв зижди́тельное Твоé бысть повелéнiе:/ восхотéв бо от неви́димаго и ви́димаго естествá жи́ва мя состáвити,/ от земли́ ýбо тéло создáв, дал же ми еси́ дýшу,/ Божéственным Твои́м и животворя́щим вдохновéнiем./ Тéмже Спáсе, рабы́ Твоя́ во странé живы́х,// и в крóвех прáведных упокóй.
И ны́не и прúсно и во вéки векóв, амúнь.
Богорóдичен Трióди, глас тóйже: Моли́твами Рóждшiя Тя Хрiстé,/ мýченик Твои́х и апóстол, и прорóк, и святи́телей,/ преподóбных, и прáведных, и всех святы́х,// усóпшiя рабы́ Твоя́ упокóй.
Молитва святаго Симеона Богоприимца
Ны́не отпущáеши рабà Твоегò, Влады́ко,/ по глагóлу Твоемý, с ми́ром;/ я́ко ви́деста óчи моѝ спасéнiе Твоè,/ éже есѝ уготóвал пред лицéм всех людéй,/ свет во откровéнiе язы́ков,// и слáву людéй Твои́х Iзрáиля.
Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 рáза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегò рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжiй, поми́луй нас. Ами́нь.
Тропáрь, глас 8: Глубинóю мýдрости человеколю́бно вся стрóяй,/ и полéзное всем подавáяй,/ еди́не Содéтелю, упокóй Гóсподи, дýши раб Твои́х:/ на Тя бо уповáнiе возложи́ша,// Творцá и Зижди́теля и Бóга нáшего.
Слáва Отцý и Сы́ну и Святóму Дýху, и ны́не и присно и во вéки векóв, аминь.
Богорóдичен, глас тóйже: Тебé и стéну, и пристáнище и҆́мамы,/ и моли́твенницу благопрiя́тну к Бóгу,// Егóже родилá еси́ Богорóдице безневéстная, вéрных спасéнiе.
Гóсподи поми́луй (40 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Утвердѝ, Бóже, святýю правослáвную вéру, правослáвных хрїстiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 рáза)
Гóсподи, благословѝ.
Гóсподи, Iисýсе Хрїстè, Сыне Бóжїй, моли́твами пречи́стыя Своея́ Мáтере, святы́х слáвных и всехвáльных Апóстол, святы́х и прáведных богоотéц Iоакíма и Áнны, и всех святы́х, поми́лует и спасéт нас, я́ко Благ и Человеколю́бец.
«По отпущéнiи же вечéрни творúм в притвóре панихíду за усóпших и поéм канóн рядовáго глáса мéртвым».
И глагóли ýтреню