НЕДЕЛЯ 4-я по ПАСХЕ, O РАССЛАБЛЕННОМ. ВСЕНОЩНОЕ БДЕНИЕ. ВЕЛИКАЯ ВЕЧЕРНЯ мирским чином. Глас 3.
23 мая 2021 года. Неделя 4 по Пасхе, о расслабленном. Св. ап. Симона Зилота. Глас 3. Всенощное бдение для домашнего (келейного) совершения состоит из Великой вечерни, утрени с чтением евангелия, также канона и первого часа. Вся служба праздника (по Триоди).
ВЕЛИКАЯ ВЕЧЕРНЯ
Молитвами святых отéц нáших, Гóсподи Иисусе Христé, Бóже наш, помилуй нас, аминь.
Христóс воскрéсе из мéртвых,/ смéртию смерть попрáв/ и сущим во гробéх живóт даровáв. (Трижды)
Святый Бóже, Святый Крéпкий, Святый Безсмéртный, помилуй нас. (3 раза)
Слáва Отцу и Сыну и Святóму Духу, и ныне и присно и во веки векóв, аминь.
Пресвятая Трóице, помилуй нас, Гóсподи, очисти грехи нáша, Владыко, прости беззакóния нáша, Святый, посети и исцели нéмощи нáша имене Твоегó рáди.
Гóсподи, помилуй. (3 раза)
Слáва Отцу и Сыну и Святóму Духу, и ныне и присно и во вéки векóв, аминь.
Отче наш, Иже еси на небесéх. Да святится Имя Твоé, да приидет Цáрствие Твоé, да будет вóля Твоя, яко на небеси и на земли. Хлеб наш насущный даждь нам днесь, и остáви нам дóлги нáша, якоже и мы оставляем должникóм нáшим. И не введи нас во искушéние, но избáви нас от лукáваго.
Гóсподи, Иисусе Христé, Сыне Бóжий, помилуй нас. Аминь.
Гóсподи, помилуй, (12 раз.)
Слáва Отцу и Сыну и Святóму Духу, и ныне и присно и во вéки векóв, аминь.
Христóс воскрéсе из мéртвых,/ смéртию смерть попрáв/ и сущим во гробéх живóт даровáв. (Трижды)
Псалом 103, предначинáтельный
Стихи избрáннии: Благослови, душé моя, Гóспода./ Благословéн еси, Гóсподи./ Гóсподи, Бóже мой, возвеличился еси зелó./ Благословéн еси, Гóсподи./ Во исповéдание и в велелéпоту/ облéклся еси. Благословéн еси, Гóсподи./ Посредé гор прóйдут вóды./ Дивна делá Твоя, Гóсподи./ Вся премудростию сотворил еси./ Слáва Ти, Гóсподи, сотворившему вся.
[Псалом полностью]Благослови, душé моя, Гóспода, Бóже мой, возвеличился еси зелó. Во исповéдание и в велелéпоту облéклся еси. Одеяйся свéтом, яко ризою, простирáяй нéбо, яко кóжу. Покрывáяй водáми превыспренняя Своя, полагáяй óблаки на восхождéние Своé, ходяй на крилу вéтреню. Творяй Ангелы Своя духи и слуги Своя плáмень óгненный. Основáяй зéмлю на твéрди ея, не преклонится в век вéка. Бéздна, яко риза, одеяние ея, на горáх стáнут вóды, от запрещéния Твоегó побéгнут, от глáса грóма Твоегó убоятся. Восхóдят гóры и нисхóдят поля в мéсто, éже основáл еси им. Предéл положил еси, eгóже не прéйдут, нижé обратятся покрыти зéмлю. Посылáяй истóчники в дéбрех, посредé гор прóйдут вóды. Напаяют вся звéри сéльныя, ждут онáгри в жáжду свою. На тых птицы небéсныя привитáют, от среды кáмения дадят глас. Напаяяй гóры от превыспренних Своих, от плодá дел Твоих насытится земля. Прозябáяй траву скотóм, и злак на службу человéком, извести хлеб от земли. И винó веселит сéрдце человéка, умáстити лицé елéем, и хлеб сéрдце человéка укрепит. Насытятся древá польскáя, кéдри Ливáнстии, ихже еси насадил. Тáмо птицы вогнездятся, еродиево жилище предводительствует ими. Гóры высóкия елéнем, кáмень прибéжище зáяцем. Сотворил есть луну во временá, сóлнце познá зáпад свой. Положил еси тму, и бысть нощь, в нéйже прóйдут вси звéрие дубрáвнии. Скимни рыкáющии, восхитити и взыскáти от Бóга пищу себé. Возсия сóлнце и собрáшася и в лóжах своих лягут. Изыдет человéк на дéло своé и на дéлание своé до вéчера. Яко возвеличишася делá Твоя, Гóсподи, вся премудростию сотворил еси, испóлнися земля твáри Твоея. Сиé мóре великое и прострáнное, тáмо гáди, имже несть числá, живóтная мáлая с великими, тáмо корабли преплáвают, змий сей, eгóже создáл еси ругáтися eму. Вся к Тебé чáют, дáти пищу им во блáго врéмя. Дáвшу Тебé им соберут, отвéрзшу Тебé руку всяческая испóлнятся блáгости, отврáщшу же Тебé лицé, возмятутся, отъимеши дух их, и исчéзнут, и в персть свою возвратятся. Пóслеши Духа Твоегó, и созиждутся, и обновиши лицé земли. Буди слáва Госпóдня во вéки, возвеселится Госпóдь о дéлех Своих, призирáяй на зéмлю, и творяй ю трястися, прикасáяйся горáм, и дымятся. Воспою Гóсподеви в животé моéм, пою Бóгу моему, дóндеже есмь, да усладится Ему бесéда моя, аз же возвеселюся о Гóсподе. Да исчéзнут грéшницы от земли, и беззакóнницы, якоже не быти им. Благослови, душé моя, Гóспода. Сóлнце познá зáпад свой. Положил еси тму, и бысть нощь. Яко возвеличишася делá Твоя, Гóсподи, вся премудростию сотворил еси.
Слáва Отцу и Сыну и Святóму Духу, и ныне и присно и во вéки векóв, аминь.
Аллилуиа, аллилуиа, аллилуиа, слáва Тебé Бóже. (3 раза)
Гóсподи, помилуй. (12 раз)
Слáва Отцу и Сыну и Святóму Духу, и ныне и присно и во вéки векóв, аминь.
Пе́рвая кафи́сма
Читаем либо кафисму 1-ю (1-ю cтатью)
[Псалом 1]Блажéн муж, иже не иде на совéт нечестивых и на пути грéшных не ста, и на седáлищи губителей не сéде, но в закóне Госпóдни вóля eгó, и в закóне Егó поучится день и нощь. И будет яко дрéво насаждéнное при исхóдищих вод, éже плод свой даст во врéмя своé, и лист eгó не отпадéт, и вся, елика áще творит, успéет. Не тáко нечестивии, не тáко, но яко прах, eгóже возметáет ветр от лицá земли. Сегó рáди не воскрéснут нечестивии на суд, нижé грéшницы в совéт прáведных. Яко весть Госпóдь путь прáведных, и путь нечестивых погибнет.
[Псалом 2]Вскую шатáшася языцы, и людие поучишася тщéтным? Предстáша цáрие зéмстии, и князи собрáшася вкупе на Гóспода и на Христá Егó. Растóргнем узы их и отвéржем от нас иго их. Живый на Небесéх посмеéтся им, и Госпóдь поругáется им. Тогдá возглагóлет к ним гнéвом своим и яростию Своéю смятéт я. Аз же постáвлен есмь Царь от Негó над Сиóном, горóю святóю Егó, возвещáяй повелéние Госпóдне. Госпóдь речé ко Мне: Сын Мой еси Ты, Аз днесь родих Тя. Проси от Менé, и дам Ти языки достояние Твоé, и одержáние Твоé концы земли. Упасéши я жезлóм желéзным, яко сосуды скудéльничи сокрушиши я. И ныне, цáрие, разумéйте, накажитеся вси судящии земли. Рабóтайте Гóсподеви со стрáхом и рáдуйтеся Ему с трéпетом. Приимите наказáние, да не когдá прогнéвается Госпóдь и погибнете от пути прáведнаго, егдá возгорится вскóре ярость Егó. Блажéни вси надéющиися Нань.
[Псалом 3]Гóсподи, что ся умнóжиша стужáющии ми? Мнóзи востают на мя, мнóзи глагóлют души моéй: несть спасéния eму в Бóзе eгó. Ты же, Гóсподи, Заступник мой еси, слáва моя и возносяй главу мою. Глáсом моим ко Гóсподу воззвáх, и услыша мя от горы святыя Своея. Аз уснух, и спах, востáх, яко Госпóдь заступит мя. Не убоюся от тем людéй, óкрест напáдающих на мя. Воскресни, Гóсподи, спаси мя, Бóже мой, яко Ты поразил еси вся враждующыя ми всуе: зубы грéшников сокрушил еси. Госпóдне есть спасéние, и на людех Твоих благословéние Твоé.
Либо поем стихи избрáннии
БЛАЖЕН МУЖ
Чтец (или хор): Блажéн муж, иже не иде на совéт нечестивых.
Хор: Аллилуиа, аллилуиа, аллилуиа.
Чтец (или хор): Яко весть Госпóдь путь прáведных, и путь нечестивых погибнет.
Хор: Аллилуиа, аллилуиа, аллилуиа.
Чтец (или хор): Рабóтайте Гóсподеви со стрáхом и рáдуйтеся Ему с трéпетом.
Хор: Аллилуиа, аллилуиа, аллилуиа.
Чтец (или хор): Блажéни вси надéющиися Нань.
Хор: Аллилуиа, аллилуиа, аллилуиа.
Чтец (или хор): Воскресни, Гóсподи, спаси мя, Бóже мой.
Хор: Аллилуиа, аллилуиа, аллилуиа.
Чтец (или хор): Госпóдне есть спасéние, и на людех Твоих благословéние Твоé.
Хор: Аллилуиа, аллилуиа, аллилуиа.
Чтец: Слáва Отцу и Сыну и Святóму Духу.
Хор: Аллилуиа, аллилуиа, аллилуиа.
Хор: И ныне и присно и во вéки векóв, аминь.
Хор: Аллилуиа, аллилуиа, аллилуиа.
Аллилуиа, аллилуиа, аллилуиа, слáва Тебé Бóже. (трижды)
Гóсподи, помилуй. (3 раза)
Слáва Отцу и Сыну и Святóму Духу, и ныне и присно и во вéки векóв, аминь.
ГОСПОДИ ВОЗЗВАХ, ГЛАС 3
Хор: Гóсподи, воззвáх к Тебé, услыши мя./ Услыши мя, Гóсподи./ Гóсподи, воззвáх к Тебé, услыши мя:/ вонми глáсу молéния моегó,/ внегдá воззвáти ми к Тебé./ Услыши мя, Гóсподи.
Хор: Да испрáвится молитва моя,/ яко кадило пред Тобóю,/ воздеяние руку моéю/ - жéртва вечéрняя./ Услыши мя, Гóсподи.
[В приходской практике пропускается до стихир](в приходской практике пропускается до стихир) : Положи́, Гóсподи, хранéние устóм мои́м, и дверь ограждéния о устнáх мои́х. Не уклони́ сéрдце моé в словесá лукáвствия, непщевáти вины́ о гресéх, с человéки дéлающими беззакóние, и не сочту́ся со избрáнными их. Накáжет мя прáведник ми́лостию и обличи́т мя, елéй же грéшнаго да не намáстит главы́ моея́, я́ко ещé и моли́тва моя́ во благоволéниих их. Пожéрты бы́ша при кáмени судии́ их: услы́шатся глагóли мои́, я́ко возмогóша. Я́ко тóлща земли́ просéдеся на земли́, расточи́шася кóсти их при áде. Я́ко к Тебé, Гóсподи, Гóсподи, óчи мои́: на Тя упова́х, не отыми́ ду́шу мою́. Сохрани́ мя от сéти, ю́же состáвиша ми, и от соблáзн дéлающих беззакóние. Паду́т во мрéжу свою́ грéшницы: еди́н есмь аз, дóндеже прейду́.
[в приходской практике пропускается до стихир]Глáсом мои́м ко Гóсподу воззвáх, глáсом мои́м ко Гóсподу помоли́хся. Пролию́ пред Ним молéние моé, печáль мою́ пред Ним возвещу́. Внегдá исчезáти от менé ду́ху моему́: и Ты познáл еси́ стези́ моя́: на пути́ сем, по нему́же хождáх, скры́ша сеть мне. Смотря́х одесну́ю и возгля́дах, и не бе знáяй менé: поги́бе бéгство от менé, и несть взыскáяй ду́шу мою́. Воззвáх к Тебé, Гóсподи, рех: Ты еси́ уповáние мое́, часть моя́ еси́ на земли́ живы́х. Вонми́ молéнию моему́, я́ко смири́хся зелó, избáви мя от гоня́щих мя, я́ко укрепи́шася пáче менé.
На 10 Чтец: Изведи из темницы душу мою,// исповéдатися имени Твоему.
Стихиры воскрéсные, глас 3: Твои́м Крестóм, Христé Спáсе, смéрти держáва разруши́ся, и диáволя прéлесть упраздни́ся, род же человéческий, вéрою спасáемый, песнь Тебé всегдá принóсит.
Менé ждут прáведницы,// дóндеже воздáси мне.
Стихира: Просвети́шася вся́ческая Воскресéнием Твои́м, Гóсподи, и рай пáки отвéрзеся, вся же тварь восхваля́ющи Тя, песнь Тебé всегдá принóсит.
На 8. Стих: Из глубины воззвáх к Тебе, Гóсподи,// Гóсподи, услыши глас мой.
Стихира: Слáвлю Отцá и Сы́на си́лу, и Святáго Ду́ха пою́ власть, нераздéльное, несоздáнное Божествó, Трóицу Единосу́щную, цáрствующую в век вéка.
Да будут уши Твои// внéмлюще глáсу молéния моегó.
Стихиры прáздника Триóди, глас 1, самоглáсны: Длáнию пречи́стою создáвый человéка, пришéл еси́, Благоутрóбне, неду́гующия исцели́ти, Христé, разслáбленнаго во О́вчей купéли, слóвом Твои́м возстáвил еси́: кровоточи́вой же болéзнь исцели́л еси́: хананéи отрокови́цу стужáемую поми́ловал еси́, и прошéния сóтника не презрéл еси́. Сегó рáди зовéм: всеси́льне Гóсподи, слáва Тебé.
На 6. Стих: Аще беззакония нáзриши, Гóсподи, Гóсподи, кто постоит?// Яко у Тебé очищéние есть.
Стихира: Длáнию пречи́стою создáвый человéка, пришéл еси́, Благоутрóбне, неду́гующия исцели́ти, Христé, разслáбленнаго во О́вчей купéли, слóвом Твои́м возстáвил еси́: кровоточи́вой же болéзнь исцели́л еси́: хананéи отрокови́цу стужáемую поми́ловал еси́, и прошéния сóтника не презрéл еси́. Сегó рáди зовéм: всеси́льне Гóсподи, слáва Тебé.
Имене рáди Твоегó потерпéх Тя, Гóсподи, потерпé душá моя в слóво Твоé,// уповá душá моя на Гóспода.
Стихира: Непогребéн мертвéц сый, разслáбленный ви́дев Тя, возопи́: поми́луй мя Гóсподи, я́ко одр мой гроб мне бысть. Что ми приобрéтение животá? Не трéбую О́вчия купéли, не и́мам бо никогóже влагáюща мя, возмуща́ющимся водáм: но к Тебé истóчнику прихожду́ исцелéний, да и аз со всéми зову́: всеси́льне Гóсподи, слáва Тебé.
На 4. Стих: От стрáжи утренния до нóщи, от стрáжи утренния,// да уповáет Изрáиль на Гóспода.
Стихиры ап. Си́мона Зилóта, глас 4: Си́мон чу́дный, апóстолов похвалá, я́ко лучá к блистáющая, прóйде концы́, отгоня́ мрак многобóжия спаси́тельными свои́ми и светолу́чными Божéственными учéнии, и всех просвети́ Еди́но слáвити Божествó в Трех Ипостáсех, нераздéльно и несекóмо.
Яко у Гóспода милость, и многое у Него избавление,// и Той избáвит Изрáиля от всех беззакóний eго.
Стихира: Си́мон апóстол, обтéк концы́, я́коже кóло, валя́яся, всю зéмлю попали́ идолонеи́стовства и, благочéстием просвети́в, свéтлы лучи́ возжжé вéрным благодáти: вся бо просвéти Еди́но слáвити Божествó в Трех Ипостáсех, нераздéльно и несекóмо.
На 2. Стих: Хвалите Гóспода вси языцы,// похвалите Егó вси людие.
Стихира: Си́мон апóстол, всесвéтлый и пречу́дный, язы́ков учи́тель, мрéжа Божéственная, из глубины́ поги́бельныя нас улови́вшая Богослóвием высóким, и́стинный пропове́дник, вся ко Христóву познáнию ны́не му́дре приведé и своя́ исправлéния предлóжь трапéзу красну́.
Яко утвердися милость Егó на нас,// и истина Госпóдня пребывáет во век.
Стихира: Рéвности тезоимени́т нарéклся еси́, Си́моне досточу́дне: ревну́я, поревновáл еси́ Бóгу Вседержи́телю, и, Божéственных тя чудéс испóлнь, показá, стрáнну бо рéвность имéя, тезоимени́т рéвности, блажéнне, назвáлся еси́ и нрáву звáние соглáсно стяжáл еси́. Тéмже в вы́шних сын, с вы́шними ли́ки вселя́емь, моли́лся, Богови́дче, Слóву, Христу́ Бóгу нáшему, даровáти нам вéлию ми́лость.
Слáва Отцу и Сыну и Святóму Духу.
Глас 5: Взы́де Иису́с во Иерусали́м на О́вчую купéль, глагóлемую иудéйски Вифесдá, пять притвóров иму́щую: в тех бо слежáше мнóжество немощству́ющих. А́нгел бо Бóжий по вся лéта сходя́, возмущáше ю́, и здрáвие подавáше приступáющим вéрою. И ви́дев Госпóдь многоврéменна человéка, глагóлет к нему́: хóщеши ли здрав бы́ти? Немощству́яй отвещавáше: Гóсподи, человéка не и́мам, да егдá возмути́тся водá, ввéржет мя в купéль: врачéм издáх все имéние моé, и ми́лости улучи́ти не сподóбихся. Но Врач душ и телéс глагóлет к нему́: возми́ твой одр и ходи́, проповéдуя Мою́ си́лу, и вéлию ми́лость в концéх.
И ныне и присно и во вéки векóв, аминь.
Богорóдичен, глас 3: Кáко не диви́мся Богому́жному Рождеству́ Твоему́, Пречестнáя? Искушéния бо му́жескаго не приéмши, Всенепорóчная, родилá бо еси́ без Отцá Сы́на плóтию. Прéжде век от Отцá рождéннаго без мáтере, никáкоже претерпе́вшаго измене́ния, или́ смешéния, или́ разделéния, но обою́ существу́ свóйство цéло сохрáншаго. Тéмже, Мáти Дéво Влады́чице, Тогó моли́ спасти́ся душáм, правослáвно Богорóдицу исповéдающих Тя.
СВЕТЕ ТИХИЙ
Хор: Свéте Тихий святыя слáвы Безсмéртнаго Отцá Небéснаго, Святáго, Блажéннаго, Иисусе Христé! Пришéдше на зáпад сóлнца, видевше свет вечéрний, поéм Отцá, Сына и Святáго Духа, Бóга. Достóин еси во вся временá пет быти глáсы преподóбными, Сыне Бóжий, живóт даяй; тéмже мир Тя слáвит.
ПРОКИМЕН, глас 6
Чтец: Прокимен, глас шестый: Госпóдь воцарися, в лéпоту облечéся.
Хор: Госпóдь воцарися,/ в лéпоту облечéся.
Чтец: Облечéся Госпóдь в силу и препоясася.
Хор: Госпóдь воцарися,/ в лéпоту облечéся.
Чтец: Ибо утверди вселéнную, яже не подвижится.
Хор: Госпóдь воцарися,/ в лéпоту облечéся.
Чтец: Дóму Твоему подобáет святыня, Гóсподи, в долготу дний.
Хор: Госпóдь воцарися,/ в лéпоту облечéся.
ПАРЕМИИ АПОСТОЛА
Чтец: Собóрнаго Послáния Иоáннова чтéние.
(Из глав 3,4) Возлю́бленнии, áще сéрдце нáше не зáзрит нам, дерзновéние и́мамы к Бóгу. И Егóже áще прóсим, приéмлем от Негó, я́ко зáповеди Егó соблюдáем и угóдная пред Ним твори́м. И сия́ есть зáповедь Егó: да вéруем во И́мя Сы́на Егó Иису́са Христá и лю́бим друг дру́га, я́коже дал есть зáповедь нам. И соблюдáяй зáповеди Егó, в Нем пребывáет, и Той в нем, и о сем разумéем, я́ко пребывáет в нас, от Ду́ха, Егóже дал есть нам. Возлю́бленнии, не вся́кому ду́ху вéруйте, но искушáйте ду́хи, áще от Бóга суть, я́ко мнóзи лжепрорóцы изыдóша в мир. О сем познавáйте Ду́ха Бóжия и ду́ха лéстча: всяк дух, и́же испове́дует Иису́са Христá, во плóти пришéдша, от Бóга есть. И всяк дух, и́же не исповéдует Иису́са Христá, во плóти пришéдша, от Бóга несть, и сей есть анти́христов, егóже слы́шасте, я́ко грядéт, и ны́не в ми́ре есть ужé. Вы от Бóга естé, чáдца, и победи́сте тех, я́ко бóлий есть, и́же в вас, нéжели и́же в ми́ре. Они́ от ми́ра суть, сегó рáди от ми́ра глагóлют, и мир тех послу́шает. Мы от Бóга есмы́: и́же знáет Бóга, послу́шает нас, и и́же несть от Бóга, не послу́шает нас.
Чтец: Собóрнаго Послáния Иоáннова чтéние.
(Из главы 4) Возлю́бленнии, áще си́це возлюби́л есть нас Бог, и мы дóлжны есмы́ друг дру́га люби́ти. Бóга никтóже нигдéже ви́де. Аще друг дру́га лю́бим, Бог в нас пребывáет, и любы́ Егó совершéнна есть в нас. О сем разумéем, я́ко в Нем пребывáем и Той в нас, я́ко от Ду́ха Своегó дал есть нам. И мы ви́дехом и свидéтельствуем, я́ко Отéц послá Сы́на Спаси́теля ми́ру. И́же áще исповéсть, я́ко Иису́с есть Сын Бóжий, Бог в нем пребывáет, и той в Бóзе. И мы познáхом и вéровахом любóвь, ю́же и́мать Бог в нас Бог любы́ есть, и пребывáяй в любви́ в Бóзе пребывáет, и Бог в нем пребывáет.
Чтец: Собóрнаго Послáния Иоáннова чтéние.
(Из глав 4,5) Возлю́бленнии, áще кто речéт, я́ко люблю́ Бóга, а брáта своегó ненави́дит, ложь есть: и́бо не любя́й брáта своегó, егóже ви́де, Бóга, Егóже не ви́де, кáко мóжет люби́ти? И сию́ зáповедь и́мамы от Негó, да любя́й Бóга лю́бит и брáта своегó. Всяк, вéруяй, я́ко Иису́с есть Христóс, от Бóга рождéн есть, и всяк, любя́й Рóждшаго, лю́бит и Рождéннаго от Негó. О сем вéмы, я́ко лю́бим чáда Бóжия, егдá Бóга лю́бим и зáповеди Егó соблюдáем. Сия́ бо есть любы́ Бóжия, да зáповеди Егó соблюдáем, и зáповеди Егó тя́жки не суть. Я́ко всяк, рождéнный от Бóга, побеждáет мир, и сия́ есть побéда, побéждшая мир, вéра нáша. Кто есть побеждáяй мир, тóкмо вéруяй, я́ко Иису́с, есть Сын Бóжий?
Гóсподи, помилуй. (40 раз)
Слáва Отцу и Сыну и Святóму Духу, и ныне и присно и во вéки векóв, аминь.
СПОДОБИ ГОСПОДИ
Хор: Сподóби, Гóсподи, в вéчер сей без грехá сохранитися нам./ Благословéн еси, Гóсподи Бóже отéц нáших,/ и хвáльно и прослáвлено имя Твоé во вéки, аминь.
Буди, Гóсподи, милость Твоя на нас, якоже уповáхом на Тя./ Благословéн еси, Гóсподи, научи мя оправдáнием Твоим./ Благословéн еси, Владыко, вразуми мя оправдáнием Твоим./ Благословéн еси, Святый, просвети мя оправдáнии Твоими.
Гóсподи, милость Твоя во век, дел руку Твоéю не прéзри./ Тебé подобáет хвалá. Тебé подобáет пéние,/ Тебé слáва подобáет, Отцу и Сыну и Святóму Духу, ныне и присно и во вéки векóв. Аминь.
Гóсподи, помилуй. (12 раз)
Слáва Отцу и Сыну и Святóму Духу, и ныне и присно и во вéки векóв, аминь.
ЛИТИЯ
Стихиры ап. Си́мона Зилóта, глас 1: Си́моне всеприснопáмятне,/ слáдости потóк испи́л еси́/ и богому́дренно напои́л Бóжия рáзума тéпле желáющия,/ Христá подражáя./ К Нему́же ны́не рáдостно прешéл еси́,/ слáвою обожáемь Трóицы пресвéтлою// и ми́ром неисчетноси́льным.
Си́моне пречу́дне,/ Бóжию созерцáя красоту́/ и я́ко дости́жно зряй,/ единéнием лу́чшим наслаждáяся сегó,/ и положéньми обожáемь,/ еди́наго, желáемаго и блажéннаго,/ рáдуяся, дости́гл еси́,/ христопроповéдниче всеприснопáмятне,// А́нгелом ны́не соводворя́емь
Си́моне всеблажéнне,/ Бóгу и человéком показáлся еси́ вéрен ходáтай/ и ны́не ми́лостива/ благодерзновéнными моли́твами/ сотвори́ нам Христá,/ не престáй Гóспода моля́ всегдá// даровáти душáм нáшим мир и вéлию ми́лость.
Слáва Отцу и Сыну и Святóму Духу.
Стихира ап. Си́мона Зилóта, глас 2: Остáвив земнáя, послéдовал еси́ Христу́/ и, знáменався дохновéнием Святáго Ду́ха,/ пóслан быв от Негó в язы́ки поги́бшия/ обращáти человéки во свет Богоразу́мия,/ апóстоле Си́моне,/ и, скончáв пóдвиги Божéственныя твоея́ стрáсти/ и мук разли́чных,/ ду́шу твою́ Христу́ прéдал еси́,/ Тогó моли́, всеблажéнне,// даровáти нам вéлию ми́лость.
И ныне и присно и во вéки векóв, аминь.
Стихира Триóди, глас 5: При óвчей купéли,/ человéк лежáше в нéмощи,/ и ви́дев Тя Гóсподи, вопия́ше:/ человéка не и́мам,/ да егдá возмути́тся водá, ввéржет мя в ню./ Егдá же прихожду́, ин предваря́ет мя, и приéмлет исцелéние:/ аз же немощству́яй лежу́./ И áбие умилосéрдився Спас, глагóлет к нему́:/ тебé рáди Человéк быв,/ тебé рáди в плоть облекóхся,/ и глагóлеши: человéка не и́мам:/ возми́ одр твой и ходи́./ Вся Тебé возмóжна, вся послу́шают, вся повину́ются:/ всех нас помяни́, и поми́луй Святы́й,// я́ко Человеколю́бец.
Гóсподи, помилуй. (40 раз)
Слáва Отцу и Сыну и Святóму Духу, и ныне и присно и во вéки векóв, аминь.
СТИХИРЫ НА СТИХОВНЕ
Стихира воскрéсная, глас 3: Стрáстию Твое́ю, Христé,/ омрачи́вый сóлнце/ и свéтом Твоегó Воскресéния,/ просвети́вый вся́ческая,// приими́ нáшу вечéрнюю песнь, Человеколю́бче.
Да воскрéснет Бог,/ и расточáтся врази Егó.
Пáсха/ свящéнная нам днесь показáся;/ Пáсха нóва святáя;/ Пáсха тáинственная;/ Пáсха всечестнáя./ Пáсха Христóс Избáвитель;/ Пáсха непорóчная;/ Пáсха великая;/ Пáсха вéрных./ Пáсха двéри рáйския нам отверзáющая.// Пáсха всех освящáющая вéрных.
Яко исчезáет дым,/ да исчéзнут.
Приидите/ от видéния жены благовéстницы,/ и Сиóну рцыте:/ приими/ от нас рáдости благовéщения, Воскресéния Христóва:/ красуйся, ликуй/ и рáдуйся, Иерусалиме,/ Царя Христá узрéв из грóба,/ яко женихá происходяща.
Тáко да погибнут грéшницы от Лицá Бóжия,/ а прáведницы да возвеселятся.
Миронóсицы жены,/ утру глубоку,/ предстáвша грóбу Живодáвца,/ обретóша Ангела/ на кáмени седяща,/ и той провещáв им,/ сице глагóлаше:/ что ищете Живáго с мéртвыми;/ что плáчете Нетлéннаго во тли?// Шéдше, проповéдите ученикóм Егó.
Сей день, егóже сотвори Госпóдь,/ возрáдуемся и возвеселимся вонь.
Пáсха крáсная,/ Пáсха, Госпóдня Пáсха!/ Пáсха всечестнáя/ нам возсия. Пáсха,/ рáдостию друг друга обымем./ О Пáсха!/ Избавлéние скóрби,/ ибо из грóба днесь,/ яко от чертóга/ возсияв Христóс,/ жены рáдости испóлни, глагóля:/ проповéдите апо́столом.
Слáва Отцу и Сыну и Святóму Духу.
Стихира ап. Си́мона Зилóта, глас 6: Тварь, я́ко орéл высокопáрный, прешéл еси́,/ Си́моне свящéннейший, ученичé Спáсов и апóстоле,/ и, лесть и́дольскую огневещáнными твои́ми догмáты,/ я́ко вещь, всю попали́в,/ язы́ки из глубины́ невéдения к Бо́жию познáнию привéл еси́./ И ны́не моли́ся Христу́,// я́ко да ми́лостив бу́дет нам в День су́дный.
И ныне и присно и во веки векóв. Аминь.
Стихиры прáздника Триóди, глас 8: В притвóре Соломóнове,/ тáмо слежáше мнóжество немощству́ющих,/ и преполови́вшуся прáзднику,/ обрéте Христóс три́десять осмь лет разслáблена лежáща,/ Влады́чним глáсом глагóлет к нему́:/ хóщеши ли здрав бы́ти?/ Немощству́яй отвещавáше:/ Гóсподи, человéка не и́мам,/ да егдá возмути́тся водá, ввéржет мя в купéль./ Он же глагóлет к нему́:/ возми́ одр твой, и ходи́:/ се здрав был еси́, ктому́ не согрешáй./ Богорóдицы моли́твами// низпосли́ нам вéлию ми́лость.
Молитва святаго Симеона Богоприимца
Ныне отпущáеши рабá Твоегó, Владыко,/ по глагóлу Твоему, с миром;/ яко видеста óчи мои спасéние Твоé,/ éже еси уготóвал пред лицéм всех людéй,/ свет во откровéние языков,// и слáву людéй Твоих Изрáиля.
Трисвятое по Отче наш
Святый Бóже, Святый Крéпкий, Святый Безсмéртный, помилуй нас. (3 раза)
Слáва Отцу и Сыну и Святóму Духу, и ныне и присно и во вéки векóв, аминь.
Пресвятая Трóице, помилуй нас, Гóсподи, очисти грехи нáша, Владыко, прости беззакóния нáша, Святый, посети и исцели нéмощи нáша имене Твоегó рáди.
Гóсподи, помилуй. (3 раза)
Слáва Отцу и Сыну и Святóму Духу, и ныне и присно и во вéки векóв, аминь.
Отче наш, Иже еси на небесéх. Да святится Имя Твоé, да приидет Цáрствие Твоé, да будет вóля Твоя, яко на небеси и на земли. Хлеб наш насущный даждь нам днесь, и остáви нам дóлги нáша, якоже и мы оставляем должникóм нáшим. И не введи нас во искушéние, но избáви нас от лукáваго.
Гóсподи, Иисусе Христé, Сыне Бóжий, помилуй нас. Аминь.
Тропáрь, глас 4: Богорóдице Дéво, рáдуйся,/ Благодáтная Марие, Госпóдь с Тобóю:/ благословéна Ты в женáх/ и благословéн Плод чрéва Твоегó,// яко Спáса родилá еси душ нáших. (Трижды)
Буди имя Госпóдне благословéно от ныне и до вéка. (3 раза)
Псалом 33
Благословлю Гóспода на всякое врéмя,/ выну хвалá Его во устéх моих./ О Гóсподе похвáлится душá моя,/ да услышат крóтцыи и возвеселятся./ Возвеличите Гóспода со мнóю,/ и вознесéм имя Егó вкупе./ Взыскáх Гóспода и услыша мя,/ и от всех скорбéй моих избáви мя./ Приступите к Нему и просветитеся,/ и лицá вáша не постыдятся./ Сей нищий воззвá, и Госпóдь услыша и,/ и от всех скорбéй его спасé и./ Ополчится Ангел Госпóдень óкрест боящихся Егó,/ и избáвит их./ Вкусите и видите, яко благ Госпóдь;/ блажéн муж, иже уповáет нань./ Бóйтеся Гóспода, вси святии Егó,/ яко несть лишéния боящымся Его./ Богáтии обнищáша и взалкáша,/ взыскáющии же Гóспода не лишáтся всякаго блáга./ Приидите, чáда, послушайте менé,/ стрáху Госпóдню научу вас./ Кто есть человéк хотяй живóт,/ любяй дни видети блáги;/ Удержи язык твой от зла,/ и устнé твои, éже не глагóлати льсти./ Уклонися от зла и сотвори блáго,/ взыщи мира, и пожени и./ Очи Госпóдни на прáведныя,/ и уши Егó в молитву их./ Лицé же Госпóдне на творящия злáя,/ еже потребити от земли пáмять их./ Воззвáша прáведнии, и Госпóдь услыша их,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя духом спасéт./ Мнóги скóрби прáведным,/ и от всех их избáвит я Госпóдь./ Хранит Госпóдь вся кóсти их,/ ни едина от них сокрушится./ Смерть грéшников лютá,/ и ненавидящии прáведнаго прегрешáт./ Избáвит Госпóдь души раб Своих,/ и не прегрешáт вси уповáющии на Негó.
Христóс воскрéсе из мéртвых,/ смéртию смерть попрáв/ и сущим во гробéх живóт даровáв. (Трижды)
И глаголи утреню