Неделя 27 по Пятидесятнице. Иконы Божией Матери "Знамение", глас 2 ВСЕНОЩНОЕ БДЕНИЕ ВЕЛИКАЯ ВЕЧЕРНЯ
10 декабря́ 2023 гóда. Недéля 27 по Пятидеся́тнице. Iкóны Бóжiей Мáтери, именýемой «Знáменiе». Вмч. Iáкова Пéрсянина. Глас 2. Всeнóщное бдéнiе для домáшнего (келéйнаго) совершéнiя состоúт из Велúкой вечéрни, ýтрени, тáже канóна и пéрвого чáса. Слýжба мiрскúм чúном.
ВЕЛИКАЯ ВЕЧЕРНЯ
Моли́твами святы́х отéц нáших, Гóсподи Iисýсе Хрїстè, Бóже наш, поми́луй нас, ами́нь.
Слáва Тебè, Бóже наш, слáва Тебè.
Царю́ Небéсный, Утéшителю, Дýше И҆́стины, И҆́же вездè сый и вся исполня́яй, Сокрóвище благи́х и жи́зни Подáтелю, прiидѝ и всели́ся в ны, и очи́сти ны от вся́кiя сквéрны, и спасѝ, Блáже, Дýши нáша.
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжїй, поми́луй нас. Ами́нь.
Гóсподи, поми́луй, (12 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Пріиди́те, поклони́мся Царéви нáшему Бóгу.
Пріиди́те, поклони́мся и припадéм Хрїстý, Царéви нáшему Бóгу.
Пріиди́те, поклони́мся и припадéм Самомý Хрїстý, Царéви и Бóгу нáшему.
Псалом 103, предначинaтельный
Стiхù избрáннiи: Благословѝ, душè моя́, Гóспода./ Благословéн есѝ, Гóсподи./ Гóсподи, Бóже мой, возвели́чился есѝ зелó./ Благословéн есѝ, Гóсподи./ Во исповéданiе и в велелéпоту/ облéклся есѝ. Благословéн есѝ, Гóсподи./ Посредè гор прóйдут вóды./ Ди́вна делá Твоя́, Гóсподи./ Вся премýдростiю сотвори́л есѝ./ Слáва Ти, Гóсподи, сотвори́вшему вся.
[Псалом полностью]Благословѝ, душè моя, Гóспода. Гóсподи, Бóже мой, возвеличился есѝ зелó. Во исповéданiе и в велелéпоту облéклся есѝ. Одея́йся свéтом, яко ри́зою, простирáяй нéбо, яко кóжу. Покрывáяй водáми превы́спренняя Своя́, полагáяй óблаки на восхождéнiе Своè, ходя́й на крилý вéтреню. Творя́й Áнгелы Своя дýхи и слугѝ Своя плáмень óгненный. Основáяй зéмлю на твéрди ея́, не преклони́тся в век вéка. Бéздна, яко ри́за, одея́нiе ея́, на горáх стáнут вóды, от запрещéнiя Твоегó побéгнут, от глáса грóма Твоегó убоя́тся. Восхóдят гóры и нисхóдят поля́ в мéсто, éже основáл есѝ им. Предéл положи́л есѝ, eгóже не прéйдут, нижè обратя́тся покры́ти зéмлю. Посылáяй истóчники в дéбрех, посредè гор прóйдут вóды. Напая́ют вся звéри сéльныя, ждут онáгри в жáжду свою. На тых пти́цы небéсныя привитáют, от среды́ кáменiя дадя́т глас. Напая́яй гóры от превы́спренних Свои́х, от плодá дел Твоих насы́тится земля́. Прозябáяй травý скотóм, и злак на слýжбу человéком, известѝ хлеб от землѝ. И винó весели́т сéрдце человéка, умáстити лицè елéем, и хлеб сéрдце человéка укрепи́т. Насы́тятся древá польскáя, кéдри Лiвáнстiи, и҆́хже еси насади́л. Тáмо пти́цы вогнездя́тся, еродíево жили́ще предводи́тельствует и҆́ми. Гóры высóкiя елéнем, кáмень прибéжище зáяцем. Сотвори́л есть лунý во временá, сóлнце познá зáпад свой. Положи́л есѝ тму, и бысть нощь, в нéйже прóйдут вси звéрiе дубрáвнiи. Ски́мни рыкáющiи, восхи́тити и взыскáти от Бóга пи́щу себè. Возсiя́ сóлнце и собрáшася и в лóжах свои́х ля́гут. Изы́дет человéк на дéло своè и на дéланiе своè до вéчера. Яко возвели́чишася делá Твоя, Гóсподи, вся премýдростiю сотвори́л есѝ, испóлнися земля́ твáри Твоея́. Сié мóре вели́кое и прострáнное, тáмо гáди, и҆́мже несть числá, живóтная мáлая с вели́кими, тáмо кораблѝ преплáвают, змiй сей, eгóже создáл есѝ ругáтися eмý. Вся к Тебè чáют, дáти пи́щу им во блáго врéмя. Дáвшу Тебè им соберýт, отвéрзшу Тебè рýку вся́ческая испóлнятся блáгости, отврáщшу же Тебè лицè, возмятýтся, отъи́меши дух их, и исчéзнут, и в персть свою возвратя́тся. Пóслеши Дýха Твоегó, и сози́ждутся, и обнови́ши лицè землѝ. Бýди слáва Госпóдня во вéки, возвесели́тся Госпóдь о дéлех Свои́х, призирáяй на зéмлю, и творя́й ю́ трясти́ся, прикасáяйся горáм, и дымя́тся. Воспою́ Гóсподеви в животè моéм, пою́ Бóгу моемý, дóндеже есмь, да услади́тся Емý бесéда моя, аз же возвеселю́ся о Гóсподе. Да исчéзнут грéшницы от землѝ, и беззакóнницы, я́коже не бы́ти им. Благословѝ, душè моя́, Гóспода. Сóлнце познá зáпад свой. Положи́л еси тму, и бысть нощь. Яко возвели́чишася делá Твоя, Гóсподи, вся премýдростiю сотвори́л есѝ.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (12 раз)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Первая кафизма
Читáем кафíсму 1-ю лúбо 1-ю cтатiю(«Блажéн муж» - 1-й антiфóн.)
[Псалом 1]Блажéн муж, и҆́же не и҆́де на совéт нечести́вых и на путѝ грéшных не ста, и на седáлищи губи́телей не сéде, но в закóне Госпóдни вóля eгó, и в закóне Егó поучи́тся день и нощь. И бýдет яко дрéво насаждéнное при исхóдищих вод, éже плод свой даст во врéмя своè, и лист eгó не отпадéт, и вся, ели́ка áще твори́т, успéет. Не тáко нечести́вiи, не тáко, но яко прах, eгóже возметáет ветр от лицá землѝ. Сегó рáди не воскрéснут нечести́вiи на суд, нижè грéшницы в совéт прáведных. Яко весть Госпóдь путь прáведных, и путь нечести́вых поги́бнет.
[Псалом 2]Вскýю шатáшася язы́цы, и лю́дiе поучи́шася тщéтным? Предстáша цáрiе зéмстiи, и кня́зи собрáшася вкýпе на Гóспода и на Хрїстá Егó. Растóргнем ýзы их и отвéржем от нас и҆́го их. Живы́й на Небесéх посмеéтся им, и Госпóдь поругáется им. Тогдá возглагóлет к ним гнéвом свои́м и я́ростiю Своéю смятéт я́. Аз же постáвлен есмь Царь от Негó над Сióном, горóю святóю Егó, возвещáяй повелéнiе Госпóдне. Госпóдь речè ко Мне: Сын Мой еси Ты, Аз днесь роди́х Тя. Просѝ от Менè, и дам Ти язы́ки достоя́нiе Твоè, и одержáнiе Твоè концы́ землѝ. Упасéши я́ жезлóм желéзным, я́ко сосýды скудéльничи сокруши́ши я́. И ны́не, цáрiе, разумéйте, накажи́теся вси судя́щiи землѝ. Рабóтайте Гóсподеви со стрáхом и рáдуйтеся Емý с трéпетом. Прiими́те наказáнiе, да не когдá прогнéвается Госпóдь и поги́бнете от путѝ прáведнаго, егдá возгори́тся вскóре я́рость Егó. Блажéни вси надéющiися Нань.
[Псалом 3]Гóсподи, что ся умнóжиша стужáющiи ми? Мнóзи востаю́т на мя, мнóзи глагóлют душѝ моéй: несть спасéнiя eмý в Бóзе eгó. Ты же, Гóсподи, Застýпник мой есѝ, слáва моя́ и вознося́й главý мою́. Глáсом мои́м ко Гóсподу воззвáх, и услы́ша мя от горы́ святы́я Своея́. Аз уснýх, и спах, востáх, я́ко Госпóдь застýпит мя. Не убою́ся от тем людéй, óкрест напáдающих на мя. Воскреснѝ, Гóсподи, спасѝ мя, Бóже мой, я́ко Ты порази́л есѝ вся враждýющыя ми всýе: зýбы грéшников сокруши́л есѝ. Госпóдне есть спасéнiе, и на лю́дех Твои́х благословéнiе Твоè.
Лúбо поéм стiхù избрáннiи
БЛАЖЕН МУЖ
Чтец (или хор): Блажéн муж, и҆́же не и҆́де на совéт нечести́вых.
Хор: Аллилýїа, аллилýїа, аллилýїа.
Чтец (или хор): Яко весть Госпóдь путь прáведных, и путь нечести́вых поги́бнет.
Хор: Аллилýїа, аллилýїа, аллилýїа.
Чтец (или хор): Рабóтайте Гóсподеви со стрáхом и рáдуйтеся Емý с трéпетом.
Хор: Аллилýїа, аллилýїа, аллилýїа.
Чтец (или хор): Блажéни вси надéющiися Нань.
Хор: Аллилýїа, аллилýїа, аллилýїа.
Чтец (или хор): Воскреснѝ, Гóсподи, спасѝ мя, Бóже мой.
Хор: Аллилýїа, аллилýїа, аллилýїа.
Чтец (или хор): Госпóдне есть спасéнiе, и на лю́дех Твои́х благословéнiе Твоè.
Хор: Аллилýїа, аллилýїа, аллилýїа.
Чтец: Слáва Ѻтцý и Сы́ну и Святóму Дýху.
Хор: Аллилýїа, аллилýїа, аллилýїа.
Хор: И ны́не и при́сно и во вéки векóв, ами́нь.
Хор: Аллилýїа, аллилýїа, аллилýїа.
Аллилýїа, аллилýїа, аллилýїа, слáва Тебè Бóже. (трúжды)
Гóсподи, поми́луй. (3 рáза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
ГОСПОДИ ВОЗЗВАХ, ГЛАС 2
Хор: Гóсподи, воззвáх к Тебè, услы́ши мя./ Услы́ши мя, Гóсподи./ Гóсподи, воззвáх к Тебè, услы́ши мя:/ вонмѝ глáсу молéнія моегó,/ внегдá воззвáти ми к Тебè./ Услы́ши мя, Гóсподи.
Хор: Да испрáвится моли́тва моя́,/ я́ко кади́ло пред Тобóю,/ воздея́ніе рукý моéю/ - жéртва вечéрняя./ Услы́ши мя, Гóсподи.
[В приходской практике пропускается до стихир]Положѝ, Гóсподи, хранéнiе устóм мои́м, и дверь ограждéнiя о устнáх мои́х. Не уклонѝ сéрдце моè в словесá лукáвствiя, непщевáти вины́ о гресéх, с человéки дéлающими беззакóнiе, и не сочтýся со избрáнными их. Накáжет мя прáведник ми́лостiю и обличи́т мя, елéй же грéшнаго да не намáстит главы́ моея́, я́ко ещè и моли́тва моя́ во благоволéнiих их. Пожéрты бы́ша при кáмени судiѝ их: услы́шатся глагóли моѝ, я́ко возмогóша. Я́ко тóлща землѝ просéдеся на землѝ, расточи́шася кóсти и҆́х при áде. Я́ко к Тебè, Гóсподи, Гóсподи, óчи моѝ: на Тя уповáх, не отымѝ дýшу мою́. Сохранѝ мя от сéти, ю́же состáвиша ми, и от соблáзн дéлающих беззакóнiе. Падýт во мрéжу свою́ грéшницы: еди́н есмь аз, дóндеже прейдý.
[В приходской практике пропускается до стихир]Глáсом мои́м ко Гóсподу воззвáх, глáсом мои́м ко Гóсподу помоли́хся. Пролiю́ пред Ним молéнiе моè, печáль мою́ пред Ним возвещý. Внегдá исчезáти от менè дýху моемý: и Ты познáл есѝ стезѝ моя́: на путѝ сем, по немýже хождáх, скры́ша сеть мне. Смотря́х одеснýю и возгля́дах, и не бе знáяй менè: поги́бе бéгство от менè, и несть взыскáяй дýшу мою́. Воззвáх к Тебè, Гóсподи, рех: Ты есѝ уповáнiе моè, часть моя́ есѝ на землѝ живы́х. Вонмѝ молéнiю моемý, я́ко смири́хся зелó, избáви мя от гоня́щих мя, я́ко укрепи́шася пáче менè.
На 10 Чтец: Изведù из темнúцы дýшу мою́,// исповéдатися úмени Твоемý.
Стiхúры воскрéсные, глас 2: Прéжде век от Ѻтцà Рóждшемуся Бóжiю Слóву,/ Воплóщшемуся от Дéвы Марíи,/ прiиди́те, поклони́мся: крест бо претерпéв,/ погребéнiю предадéся, яко Сам восхотè:/ и воскрéсе из мéртвых,// спасè мя заблуждáющаго человéка.
Менè ждут прáведницы,// дóндеже воздáси мне.
Стiхúра: Хрїстóс Спас наш,/ éже на ны рукописáнiе пригвозди́в на Крестè заглáди,/ и смéртную держáву упразднѝ:// поклоня́емся Егò Триднéвному Воскресéнiю.
На 8. Стiх: Из глубины́ воззвáх к Тебè, Гóсподи,// Гóсподи, услы́ши глас мой.
Стiхúра: Со Архáнгелы воспои́м Хрїстóво Воскресéнiе: Той бо есть Избáвитель и Спас душ нáших, и в слáве стрáшней и крéпцей си́ле, пáки грядéт суди́ти мíру, егóже создà.
Да бýдут ýши Твоù// внéмлюще глáсу молéнiя моегó.
И҆́ны стiхúры анатóлiевы: Тебè Распéншагося и Погребéннаго,/ Áнгел проповéда Влады́ку, и глагóлаше женáм:/ прiиди́те ви́дите, идéже лежáше Госпóдь:/ воскрéсе бо, я́коже речè, я́ко Всеси́лен./ Тéмже Тебè поклоня́емся, Еди́ному Безсмéртному:// Жизнодáвче Хрїстè, поми́луй нас.
На 6. Стiх: Áще беззакóнiя нáзриши, Гóсподи, Гóсподи, кто постоúт?// Яко у Тебè очищéнiе есть.
Стiхúры Богорóдицы, глас 8: Гóрдостiю зáвисти распали́вшеся/ и неи́стовством одержи́ми,/ иногдà ненакáзаннiи,/ начéнше проти́вная на град Твой, Пречи́стая,/ но обáче сáми спя́ти бы́ша и падóша// псалóмски при áде, Богороди́тельнице.
И҆́мене рáди Твоегó потерпéх Тя, Гóсподи, потерпè душá моя́ в слóво Твоè,// уповá душá моя на Гóспода.
Стiхúра: Внегдá ýбо мýжiе вели́каго Новагрáда,/ ви́девше себè проти́вными обстои́мы,/ ни откýду же пóмощи надéющеся,/ тóкмо Тебè, Пречи́стая, моля́щеся, глагóлаху:/ виждь, Богорóдице, беды̀ раб Твои́х/ и не отри́ни молéнiя нáшего в конéц,/ да разумéют сопроти́внiи,// я́ко Ты есѝ, Пречи́стая, заступлéнiе душáм нáшим.
На 4. Стiх: От стрáжи ýтреннiя до нóщи, от стрáжи ýтреннiя,// да уповáет Iзрáиль на Гóспода.
Стiхúра: Ди́вную грáду Твоемý побéду даровáла есѝ,/ Дéво Пречи́стая,/ Ты бо есѝ томý твéрдое ограждéнiе,/ на врагѝ укрепля́ющи/ и держáвно непокори́выя покаря́ющи при́сно./ Тéмже чи́стою вéрою слáвим Тя/ и Сы́ну Твоемý любéзно вопiéм:// Iисýсе всеси́льне, спасѝ всех, я́ко милосéрд.
Яко у Гóспода мúлость, и мнóгое у Негó избавлéнiе,// и Той избáвит Iзрáиля от всех беззакóнiй eгó.
Стiхúры великомýченика, глас 2: Мíра крáсная остáвив,/ рóда свéтлость, богáтство и красотý,/ все же чýвство отвéрг,/ и, тéлом раздробля́емь,/ страстéй подражáнiем, рáдуяся, послéдовал есѝ Хрїстý, Iáкове,/ я́ко ýбо óбщник страдáньми слáвы был есѝ вои́стинну// и Цáрствiя ны́не сопричáстник.
На 2. Стiх: Хвалúте Гóспода вси язы́цы, похвалúте Егó вси лю́дiе.
Стiхúра: У́ды пожинáемь плóти,/ и нестерпи́мыя болéзни и рáны терпя́,/ мýчениче Хрїстóв, достослáвне Iáкове,/ и мучи́телей суровствó попрáв мýжественно,/ побéды многоцéнный венéц прiя́л есѝ;/ и́мже ны́не украшáемь, блажéнне,/ Божéственному Влады́ки твоегò Престóлу// с пострадáвшими с тобóю предстои́ши.
Яко утвердúся мúлость Егó на нас,// и и҆́стина Госпóдня пребывáет во век.
Стiхúра: Имéя дерзновéнiе ко Хрїстý,/ о всех, вéрою совершáющих честны́й твой прáздник,/ мýчениче приснопáмятне, тéпле предстои́ши,/ от бед избавля́я и страстéй свобождáя,/ вся́каго обстоя́нiя лю́тых изымáя,/ подавáя душáм спасéнiе/ Божéственными твои́ми моли́твами,// я́ко да свéтлыя твоя́ пóдвиги прослáвим.
Слáва Отцý и Сыну и Святóму Дýху.
Стiхúра Богорóдицы, глас 6: Весели́теся, лю́дiе/ и вси правослáвнiи собóри вели́каго Новагрáда, днесь,/ и рукáми восплещи́те, язы́цы, с весéлiем,/ се бо Цари́ца, Царя́ Хрїстá рóждшая,/ святи́телю яви́ся чýдным óбразом,/ дерзáти нарóдом повелевáя,/ я́коже нéкiй воевóда,/ в печáли сýщим тогдá рáдость сотворѝ,/ сопроти́вных победи́вши,/ и Тебè, рáдость рóждшей всем, любóвiю вопiéм:// Дéво пречи́стая, молѝ спасти́ся душáм нáшим.
И ны́не и прúсно и во вéки векóв, амúнь.
Догмáтик. Глас 2: Прéйде сень закóнная,/ благодáти пришéдши:/ я́коже бо купинà не сгарáше опаля́ема,/ тáко Дéво родилà есѝ,/ и Дéва пребылà есѝ./ Вмéсто столпà óгненнаго, прáведное возсія Сóлнце:/ вмéсто Моисéя, Хрїстóс,// спасéніе душ нáших.
СВЕТЕ ТИХИЙ
Хор: Свéте Ти́хiй святы́я слáвы Безсмéртнаго Ѻтцà Небéснаго, Святáго, Блажéннаго, Iисýсе Хрїстè! Пришéдше на зáпад сóлнца, ви́девше свет вечéрнiй, поéм Ѻтцà, Сы́на и Святáго Дýха, Бóга. Достóин есѝ во вся временà пет бы́ти глáсы преподóбными, Сы́не Бóжiй, живóт дая́й; тéмже мiр Тя слáвит.
ПРОКИМЕН ВОСКРЕСНЫЙ
Чтец: Прокíмен, глас шесты́й: Госпóдь воцари́ся, в лéпоту облечéся.
Хор: Госпóдь воцарúся,/ в лéпоту облечéся. (Пс.92:1А)
Чтец: Облечéся Госпóдь в си́лу и препоя́сася. (Пс.92:1Б)
Хор: Госпóдь воцарúся,/ в лéпоту облечéся.
Чтец: И҆́бо утвердѝ вселéнную, я́же не подви́жится. (Пс.92:1В)
Хор: Госпóдь воцарúся,/ в лéпоту облечéся.
Чтец: Дóму Твоемý подобáет святы́ня, Гóсподи, в долготý днiй.(Пс.92:2Б)
Хор: Госпóдь воцарúся,/ в лéпоту облечéся.
Чтец: Госпóдь воцари́ся.
Хор: В лéпоту облечéся.
ПАРИМИИ
Чтец: Бытiя́ чтéнiе.
(Из главы 28) Изы́де Iáков от студенцà кля́твеннаго и и҆́де в Харрáнь. И обрéте мéсто, и спа тáмо: зáйде бо сóлнце, и взят от кáменiя мéста тогò, и положѝ возглáвше себè, и спа на мéсте óном. И сон ви́де. И се лéствица, утверждéна на землѝ, eя́же главá досязáше до небéс, и Áнгели Бóжiи восхождáху и низхождáху по ней. Госпóдь же утверждáшеся на ней, и речè: Аз Бог Авраáмов, отцá твоегó, и Бог Iсаáков, не бóйся: земля́, идéже ты спи́ши на ней, тебè дам ю и сéмени твоемý. И бýдет сéмя твоè, я́ко песóк земны́й, и распространи́тся на мóре, и ли́ву, и сéвер, и на востóки; и возблагословя́тся о тебè вся колéна земнáя и о сéмени твоéм. И се Аз с тобóю, сохраня́яй тя на вся́ком путѝ, áможе áще пóйдеши. И возвращý тя в зéмлю сiю́, яко не и҆́мам тебè остáвити, дóндеже сотвори́ти Ми вся, ели́ка глагóлах тебè. И востá Iáков от сна своегò, и речè: яко eсть Госпóдь на мéсте сем, аз же не вéдех. И убоя́ся, и речè: я́ко стрáшно мéсто сiè; несть сiè, но дом Бóжiй и сiя́ вратà Небéсная.
[Синодальный перевод]Иаков же вышел из Вирсавии и пошел в Харран, и пришел на одно место, и остался там ночевать, потому что зашло солнце. И взял один из камней того места, и положил себе изголовьем, и лег на том месте. И увидел во сне: вот, лестница стоит на земле, а верх ее касается неба; и вот, Ангелы Божии восходят и нисходят по ней. И вот, Господь стоит на ней и говорит: Я Господь, Бог Авраама, отца твоего, и Бог Исаака; [не бойся]. Землю, на которой ты лежишь, Я дам тебе и потомству твоему; и будет потомство твое, как песок земной; и распространишься к морю и к востоку, и к северу и к полудню; и благословятся в тебе и в семени твоем все племена земные; и вот Я с тобою, и сохраню тебя везде, куда ты ни пойдешь; и возвращу тебя в сию землю, ибо Я не оставлю тебя, доколе не исполню того, что Я сказал тебе. Иаков пробудился от сна своего и сказал: истинно Господь присутствует на месте сем; а я не знал! И убоялся и сказал: как страшно сие место! это не иное что, как дом Божий, это врата небесные.(Быт.28:10-17)
Чтец: Прорóчества Iезекíилева чтéнiе.
(Из глав 43 и 44) Тáко глагóлет Госпóдь: бýдет от дне осмáго и прóчее, сотворя́т iерéи на олтарѝ всесожжéнiя вáшего и я́же спасéнiя вáшего, и прiимý вы, глагóлет Адонаѝ Госпóдь. И обратѝ мя на путь врат святы́х внéшних, зря́щих на востóки, и сiя́ бя́ху затворéна. И речè Госпóдь ко мне: вратá сiя́ затворéна бýдут и не отвéрзутся, и никтóже прóйдет сквозè их; я́ко Госпóдь Бог Iзрáилев прóйдет и҆́ми, и бýдут затворéна. Я́ко Игýмен ся́дет в них снéсти хлеб, по путѝ Елáмских врат вни́дет и по путѝ егó изы́дет. И введè мя по путѝ врат святы́х, сýщих к сéверу, пря́мо хрáму, и ви́дех, и се испóлнь слáвы храм Госпóдень.
[Синодальный перевод]Так говорит Господь: по окончании сих дней, в восьмой день и далее, священники будут возносить на жертвеннике ваши всесожжения и благодарственные жертвы; и Я буду милостив к вам, говорит Господь Бог. И привел он меня обратно ко внешним воротам святилища, обращенным лицом на восток, и они были затворены. И сказал мне Господь: ворота сии будут затворены, не отворятся, и никакой человек не войдет ими, ибо Господь, Бог Израилев, вошел ими, и они будут затворены. Что до князя, он, как князь, сядет в них, чтобы есть хлеб пред Господом; войдет путем притвора этих ворот, и тем же путем выйдет. Потом привел меня путем ворот северных перед лицо храма, и я видел, и вот, слава Господа наполняла дом Господень.(Иез.43:27;44:1-4)
Чтец: При́тчей чтéнiе.
(Из главы 9): Премýдрость создà Себè дом и утвердѝ столпóв седмь. Заклà Своя́ жéртвенная, и растворѝ в чáши Своéй винò, и уготóва Свою́ трапéзу. Послà Своя́ рабы̀, созывáющи с высóким проповéданiем на чáшу, глагóлющи: И҆́же есть безýмен, да уклони́тся ко Мне. И трéбующим умà речè: Прiиди́те, яди́те Мой хлеб, и пíйте винò, éже раствори́х вам. Остáвите безýмiе и жи́ви бýдете, и взыщи́те рáзума, да поживетè, и испрáвите рáзум в вéденiи. Наказýяй злы́я прiи́мет себè безчéстiе, обличáяй же нечести́ваго опорóчит себè: обличéнiя бо нечести́вому рáны емý. Не обличáй злых, да не возненави́дят тебè. Обличáй премýдра, и возлю́бит тя. Даждь премýдрому винý, и премýдршiй бýдет. Сказýй прáведному, и приложи́т прiимáти. Начáло премýдрости страх Госпóдень и совéт святы́х рáзум: разумéти бо закóн пóмысла есть благáго. Сим бо óбразом мнóгое поживéши врéмя, и приложáтся тебè лéта животà.
[Синодальный перевод]Премудрость построила себе дом, вытесала семь столбов его, заколола жертву, растворила вино свое и приготовила у себя трапезу; послала слуг своих провозгласить с возвышенностей городских: «кто неразумен, обратись сюда!» И скудоумному она сказала: «идите, ешьте хлеб мой и пейте вино, мною растворенное; оставьте неразумие, и живите, и ходите путем разума». Поучающий кощунника наживет себе бесславие, и обличающий нечестивого - пятно себе. Не обличай кощунника, чтобы он не возненавидел тебя; обличай мудрого, и он возлюбит тебя; дай наставление мудрому, и он будет еще мудрее; научи правдивого, и он приумножит знание. Начало мудрости - страх Господень, и познание Святаго - разум; потому что чрез меня умножатся дни твои, и прибавится тебе лет жизни.(Притч.9:1-11)
Гóсподи, поми́луй. (40 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
СПОДОБИ ГОСПОДИ
Хор: Сподóби, Гóсподи, в вéчер сей без грехà сохрани́тися нам./ Благословéн есѝ, Гóсподи Бóже ѻтéц нáших,/ и хвáльно и прослáвлено и҆́мя Твоè во вéки, ами́нь.
Бýди, Гóсподи, ми́лость Твоя́ на нас, я́коже уповáхом на Тя./ Благословéн есѝ, Гóсподи, научѝ мя оправдáнiем Твои́м./ Благословéн есѝ, Влады́ко, вразумѝ мя оправдáнiем Твои́м./ Благословéн есѝ, Святы́й, просветѝ мя оправдáнiи Твои́ми.
Гóсподи, ми́лость Твоя́ во век, дел рукý Твоéю не прéзри./ Тебè подобáет хвалà. Тебè подобáет пéнiе,/ Тебè слáва подобáет, Ѻтцý и Сы́ну и Святóму Дýху, ны́не и при́сно и во вéки векóв. Ами́нь.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
ЛИТИЯ
Стiхúры Богорóдицы, глас 6: Рóги грéшных сотрóшася,/ и лýцы их сокруши́шася,/ грехóвною бо тьмóю очи помрачи́вше,/ и, друг дрýга я́ко сопроти́вна зря́ще,/ орýжiем неми́лостивно себè уязвля́ху,/ нарóди же, ви́девше пóмощь Твою́, Влады́чице,/ на сопроти́вныя устреми́шася,// Тебè на пóмощь призывáюще.
Я́коже иногдá крéпкiй Давíд/ сопроти́вящагося гóрдаго Голiáфа,/ си́лою Сы́на Твоегó препоя́сався, низложѝ,/ тáкожде и лю́дiе Твоѝ, Пречи́стая,/ имýще óбраз Твой честны́й,// преслáвно одолéнiе показáша.
Чýдная побéда и ди́вное одолéнiе/ честны́я iкóны Твоея́, пречи́стая Мáти Слóва,/ удивля́ет ум и ужасáет пóмысл,/ безорýжнiи бо орýжныя побеждáху/ си́лою Твоéю, Дéво всепéтая,/ и посóбiем Божéственнаго зрáка Твоегó// во спасéнiе душáм нáшим.
Слáва Ѻтцý и Сы́ну и Святóму Дýху.
Стiхúра великомýченика, глас 2, Студíтово: Удиви́л есѝ, о Iáкове,/ в мýках всех долготерпéв,/ пéрстом бо и рукáм, и мы́шцам отсéченым твои́м бы́вшим,/ подóбне и ногáм и лы́стом твои́м/ дáже до бедрý, претерпéл есѝ/ прóчее, моля́щуся тебè,/ и честнýю главý твою́ отсекóша./ Мýчениче многострадáльне,/ о нас не престáй Хрїстý моля́ся// поми́ловатися душáм нáшим.
И ны́не и прúсно и во вéки векóв, амúнь.
Богорóдичен из Минéи, глас 6: Се день избавлéнiя нáшего настá/ и смéрти пременéнiе,/ рáдуйтеся, собóри днесь вели́каго Новагрáда,/ и, веселя́щеся, торжествýйте,/ и́же бо на нас подви́гшiися/ конéчне Богорáнными я́звами уязви́шася./ Тéмже Пречи́стей и из Нея́ нетлéнно воплощéнному Слóву вопiéм:/ Iисýсе всеси́льне,/ моли́твами рóждшiя Тя// спасѝ всех нас, я́ко милосéрд.
Гóсподи, поми́луй. (40 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
СТИХИРЫ НА СТИХОВНЕ
Чтец (Стiхúры воскрéсные, глас 2): Воскресéніе Твоè, Хрїстè Спáсе,/ всю просветѝ вселéнную,/ и призвáл есѝ Твоè создáніе,// Всеси́льне Гóсподи, слáва Тебè.
Стiх: Госпóдь воцарúся, в лéпоту облечéся.
И҆́ны по алфавúту, глас 2: Дрéвом, Спáсе, упраздни́л есѝ,/ ю́же от дрéва кля́тву,/ держáву смéрти погребéнiем Твои́м умертви́л есѝ,/ просвети́л же есѝ род наш востáнiем Твои́м./ Тéмже вопiéм Тебè:// Животодáвче Хрїстè Бóже наш, слáва Тебè.
Стiх: И҆́бо утвердù вселéнную,/ я́же не подвúжется.
На крестè я́влься, Хрїстè, пригвождáемь,/ измени́л есѝ добрóту здáнiй:/ и безчеловéчiе ýбо вóини показýюще,/ копiéм рéбра Твоя́ прободóша,/ еврéи же печáтати грóба проси́ша,/ Твоея́ влáсти не вéдуще./ Но за милосéрдiе утрóб Твои́х,/ прiéмый погребéнiе, и триднéвен воскресы́й// Гóсподи, слáва Тебè.
Стiх: Дóму Твоемý подобáет святы́ня, Гóсподи,/ в долготý днiй.
Животодáвче Хрїстè, вóлею страсть претерпéвый смéртных рáди,/ во ад же снизшéд я́ко си́лен,/ тáмо Твоегó пришéствiя ожидáющiя,/ исхи́тив я́ко от звéря крéпкаго,/ рай вмéсто áда жи́ти даровáл есѝ./ Тéмже и нам слáвящим триднéвное Твоè востáнiе,/ дáруй очищéнiе грехóв,// и вéлiю ми́лость.
Слáва Ѻтцý и Сы́ну и Святóму Дýху.
Стихúра великомýченика, глас 8, Геóргiя Сикéлла: Вéрно сошéдшеся днесь, любозри́теле,/ ви́дите борьбý стрáнную и разменéнную/ Iáкова, сýщаго от Перси́ды,/ нам облистáвшаго, я́ко звездý, волхвóм я́вльшуюся/ и ко и́стинному познáнiю настáвльшую./ Той бо, дóблественный,/ внегдá пáдати, рáтователи отражáше,/ и внегдá состáвом удóв рéзаным бы́ти,/ мýчащыя нéмощны творя́ше,/ вы́шним Прóмыслом укрепля́емь, вопiя́:/ áще и ýды моя́ чýвственныя сýщыя сечéте,/ но и́мам Хрїстá разýмно ми вся бывáюща./ Тéмже прови́дя бýдущую жизнь,/ предлежáщiя рáди всех смéрти,/ ко óной тщáшеся прейтѝ,/ в нéйже и водворя́яся, прóсит нам от венцедáтеля Бóга/ очищéнiе, просвещéнiе и вéлiю ми́лость,// совершáющим пáмять егó.
И ны́не и прúсно и во вéки векóв, амúнь.
Богорóдичен из Минéи, глас 8: Мня́щеся непокори́вiи/ от основáнiя разори́ти град Твой, Пречи́стая,/ не разумéвше пóмощь Твою́, Влады́чице,/ но си́лою Твоéю низложéни бы́ша,/ на бежáнiе устремля́хуся,/ и, я́коже ю́зами желéзными, слепотóю свя́зани бы́вше/ и мрáком, я́коже дрéвле Еги́пет, объя́ти не разумéвше,/ дóндеже и конéчне побеждéни бы́ша./ Тéмже чи́стою вéрою слáвим Тя/ и Сы́ну Твоемý любéзно вопiéм:/ моли́твами рóждшiя Тя,/ Iисýсе всеси́льне, неизречéнная рáдосте,/ сохраня́й град Твой невреди́м,// я́ко милосéрд и Человеколю́бец.
Молитва святаго Симеона Богоприимца
Ны́не отпущáеши рабà Твоегò, Влады́ко,/ по глагóлу Твоемý, с ми́ром;/ я́ко ви́деста óчи моѝ спасéнiе Твоè,/ éже есѝ уготóвал пред лицéм всех людéй,/ свет во откровéнiе язы́ков,// и слáву людéй Твои́х Iзрáиля.
Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 рáза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегò рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжiй, поми́луй нас. Ами́нь.
Тропáрь Богорóдицы «Знáменiе», глас 4: Я́ко необори́мую стéну и истóчник чудéс/ стяжáвше Тя рабѝ Твоѝ,/ Богорóдице пречи́стая,/ сопроти́вных ополчéнiя низлагáем./ Тéмже мóлим Тя:/ мир грáду Твоемý дáруй// и душáм нáшим вéлiю ми́лость.(Трúжды)
Бýди и҆́мя Госпóдне благословéно от ны́не и до вéка. (Трúжды)
Псалом 33
Благословлю́ Гóспода на вся́кое врéмя,/ вы́ну хвалà Егó во устéх мои́х./ О Гóсподе похвáлится душá моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм и҆́мя Егó вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицá вáша не постыдя́тся./ Сей ни́щiй воззвá, и Госпóдь услы́ша и҆̀,/ и от всех скорбéй егó спасé и҆̀./ Ополчи́тся Áнгел Госпóдень óкрест боя́щихся Егò,/ и избáвит их./ Вкуси́те и ви́дите, я́ко благ Госпóдь;/ блажéн муж, и҆́же уповáет нань./ Бóйтеся Гóспода, вси святíи Егò,/ яко несть лишéнiя боя́щымся Егò./ Богáтiи обнищáша и взалкáша,/ взыскáющiи же Гóспода не лишáтся вся́каго блáга.[В приходской практике пропускается]/ Прiиди́те, чáда, послýшайте менè,/ стрáху Госпóдню научý вас./ Кто есть человéк хотя́й живóт,/ любя́й дни ви́дети блáги;/ Удержѝ язык твой от зла,/ и устнè твоѝ, éже не глагóлати льсти./ Уклони́ся от зла и сотворѝ блáго,/ взыщѝ ми́ра, и поженѝ и҆̀./ Óчи Госпóдни на прáведныя,/ и ýши Егó в моли́тву их./ Лицè же Госпóдне на творя́щiя злáя,/ еже потреби́ти от землѝ пáмять их./ Воззвáша прáведнiи, и Госпóдь услы́ша и҆́х,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я Госпóдь./ Храни́т Госпóдь вся кóсти их,/ ни еди́на от них сокруши́тся./ Смерть грéшников лютá,/ и ненави́дящiи прáведнаго прегрешáт./ Избáвит Госпóдь дýши раб Свои́х,/ и не прегрешáт вси уповáющiи на Негò.
И глаголи ýтреню