Введение (вход) во храм Пресвятой Владычицы нашей Богородицы. ВСЕНОЩНОЕ БДЕНИЕ. ВЕЛИКАЯ ВЕЧЕРНЯ
4 декабря́ 2023 гóда. Понедéльник 27-й седмúцы по Пятидеся́тнице. Введéнiе (Вход) во храм Пресвяты́я Влады́чицы нáшея Богорóдицы и Приснодéвы Марíи. Глас 1. Всeнóщное бдéнiе для домáшнего (келéйнаго) совершéнiя состоúт из Велúкой вечéрни, ýтрени, тáже канóна и пéрвого чáса. Вся слýжба прáздника по Минéе. Слýжба мiрскúм чúном.
ВЕЛИКАЯ ВЕЧЕРНЯ
Моли́твами святы́х отéц нáших, Гóсподи Iисýсе Хрїстè, Бóже наш, поми́луй нас, ами́нь.
Слáва Тебè, Бóже наш, слáва Тебè.
Царю́ Небéсный, Утéшителю, Дýше И҆́стины, И҆́же вездè сый и вся исполня́яй, Сокрóвище благи́х и жи́зни Подáтелю, прiидѝ и всели́ся в ны, и очи́сти ны от вся́кiя сквéрны, и спасѝ, Блáже, Дýши нáша.
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжїй, поми́луй нас. Ами́нь.
Гóсподи, поми́луй, (12 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Пріиди́те, поклони́мся Царéви нáшему Бóгу.
Пріиди́те, поклони́мся и припадéм Хрїстý, Царéви нáшему Бóгу.
Пріиди́те, поклони́мся и припадéм Самомý Хрїстý, Царéви и Бóгу нáшему.
Псалом 103, предначинaтельный
Стiхù избрáннiи: Благословѝ, душè моя́, Гóспода./ Благословéн есѝ, Гóсподи./ Гóсподи, Бóже мой, возвели́чился есѝ зелó./ Благословéн есѝ, Гóсподи./ Во исповéданiе и в велелéпоту/ облéклся есѝ. Благословéн есѝ, Гóсподи./ Посредè гор прóйдут вóды./ Ди́вна делá Твоя́, Гóсподи./ Вся премýдростiю сотвори́л есѝ./ Слáва Ти, Гóсподи, сотвори́вшему вся.
[Псалом полностью]Благословѝ, душè моя, Гóспода. Гóсподи, Бóже мой, возвеличился есѝ зелó. Во исповéданiе и в велелéпоту облéклся есѝ. Одея́йся свéтом, яко ри́зою, простирáяй нéбо, яко кóжу. Покрывáяй водáми превы́спренняя Своя́, полагáяй óблаки на восхождéнiе Своè, ходя́й на крилý вéтреню. Творя́й Áнгелы Своя дýхи и слугѝ Своя плáмень óгненный. Основáяй зéмлю на твéрди ея́, не преклони́тся в век вéка. Бéздна, яко ри́за, одея́нiе ея́, на горáх стáнут вóды, от запрещéнiя Твоегó побéгнут, от глáса грóма Твоегó убоя́тся. Восхóдят гóры и нисхóдят поля́ в мéсто, éже основáл есѝ им. Предéл положи́л есѝ, eгóже не прéйдут, нижè обратя́тся покры́ти зéмлю. Посылáяй истóчники в дéбрех, посредè гор прóйдут вóды. Напая́ют вся звéри сéльныя, ждут онáгри в жáжду свою. На тых пти́цы небéсныя привитáют, от среды́ кáменiя дадя́т глас. Напая́яй гóры от превы́спренних Свои́х, от плодá дел Твоих насы́тится земля́. Прозябáяй травý скотóм, и злак на слýжбу человéком, известѝ хлеб от землѝ. И винó весели́т сéрдце человéка, умáстити лицè елéем, и хлеб сéрдце человéка укрепи́т. Насы́тятся древá польскáя, кéдри Лiвáнстiи, и҆́хже еси насади́л. Тáмо пти́цы вогнездя́тся, еродíево жили́ще предводи́тельствует и҆́ми. Гóры высóкiя елéнем, кáмень прибéжище зáяцем. Сотвори́л есть лунý во временá, сóлнце познá зáпад свой. Положи́л есѝ тму, и бысть нощь, в нéйже прóйдут вси звéрiе дубрáвнiи. Ски́мни рыкáющiи, восхи́тити и взыскáти от Бóга пи́щу себè. Возсiя́ сóлнце и собрáшася и в лóжах свои́х ля́гут. Изы́дет человéк на дéло своè и на дéланiе своè до вéчера. Яко возвели́чишася делá Твоя, Гóсподи, вся премýдростiю сотвори́л есѝ, испóлнися земля́ твáри Твоея́. Сié мóре вели́кое и прострáнное, тáмо гáди, и҆́мже несть числá, живóтная мáлая с вели́кими, тáмо кораблѝ преплáвают, змiй сей, eгóже создáл есѝ ругáтися eмý. Вся к Тебè чáют, дáти пи́щу им во блáго врéмя. Дáвшу Тебè им соберýт, отвéрзшу Тебè рýку вся́ческая испóлнятся блáгости, отврáщшу же Тебè лицè, возмятýтся, отъи́меши дух их, и исчéзнут, и в персть свою возвратя́тся. Пóслеши Дýха Твоегó, и сози́ждутся, и обнови́ши лицè землѝ. Бýди слáва Госпóдня во вéки, возвесели́тся Госпóдь о дéлех Свои́х, призирáяй на зéмлю, и творя́й ю́ трясти́ся, прикасáяйся горáм, и дымя́тся. Воспою́ Гóсподеви в животè моéм, пою́ Бóгу моемý, дóндеже есмь, да услади́тся Емý бесéда моя, аз же возвеселю́ся о Гóсподе. Да исчéзнут грéшницы от землѝ, и беззакóнницы, я́коже не бы́ти им. Благословѝ, душè моя́, Гóспода. Сóлнце познá зáпад свой. Положи́л еси тму, и бысть нощь. Яко возвели́чишася делá Твоя, Гóсподи, вся премýдростiю сотвори́л есѝ.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (12 раз)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Первая кафизма
(«Блажéн муж» - 1-й антiфóн.)
[Псалом 1]Блажéн муж, и҆́же не и҆́де на совéт нечести́вых и на путѝ грéшных не ста, и на седáлищи губи́телей не сéде, но в закóне Госпóдни вóля eгó, и в закóне Егó поучи́тся день и нощь. И бýдет яко дрéво насаждéнное при исхóдищих вод, éже плод свой даст во врéмя своè, и лист eгó не отпадéт, и вся, ели́ка áще твори́т, успéет. Не тáко нечести́вiи, не тáко, но яко прах, eгóже возметáет ветр от лицá землѝ. Сегó рáди не воскрéснут нечести́вiи на суд, нижè грéшницы в совéт прáведных. Яко весть Госпóдь путь прáведных, и путь нечести́вых поги́бнет.
[Псалом 2]Вскýю шатáшася язы́цы, и лю́дiе поучи́шася тщéтным? Предстáша цáрiе зéмстiи, и кня́зи собрáшася вкýпе на Гóспода и на Хрїстá Егó. Растóргнем ýзы их и отвéржем от нас и҆́го их. Живы́й на Небесéх посмеéтся им, и Госпóдь поругáется им. Тогдá возглагóлет к ним гнéвом свои́м и я́ростiю Своéю смятéт я́. Аз же постáвлен есмь Царь от Негó над Сióном, горóю святóю Егó, возвещáяй повелéнiе Госпóдне. Госпóдь речè ко Мне: Сын Мой еси Ты, Аз днесь роди́х Тя. Просѝ от Менè, и дам Ти язы́ки достоя́нiе Твоè, и одержáнiе Твоè концы́ землѝ. Упасéши я́ жезлóм желéзным, я́ко сосýды скудéльничи сокруши́ши я́. И ны́не, цáрiе, разумéйте, накажи́теся вси судя́щiи землѝ. Рабóтайте Гóсподеви со стрáхом и рáдуйтеся Емý с трéпетом. Прiими́те наказáнiе, да не когдá прогнéвается Госпóдь и поги́бнете от путѝ прáведнаго, егдá возгори́тся вскóре я́рость Егó. Блажéни вси надéющiися Нань.
[Псалом 3]Гóсподи, что ся умнóжиша стужáющiи ми? Мнóзи востаю́т на мя, мнóзи глагóлют душѝ моéй: несть спасéнiя eмý в Бóзе eгó. Ты же, Гóсподи, Застýпник мой есѝ, слáва моя́ и вознося́й главý мою́. Глáсом мои́м ко Гóсподу воззвáх, и услы́ша мя от горы́ святы́я Своея́. Аз уснýх, и спах, востáх, я́ко Госпóдь застýпит мя. Не убою́ся от тем людéй, óкрест напáдающих на мя. Воскреснѝ, Гóсподи, спасѝ мя, Бóже мой, я́ко Ты порази́л есѝ вся враждýющыя ми всýе: зýбы грéшников сокруши́л есѝ. Госпóдне есть спасéнiе, и на лю́дех Твои́х благословéнiе Твоè.
Лúбо поéм стiхù избрáннiи
БЛАЖЕН МУЖ
Чтец (или хор): Блажéн муж, и҆́же не и҆́де на совéт нечести́вых.
Хор: Аллилýїа, аллилýїа, аллилýїа.
Чтец (или хор): Яко весть Госпóдь путь прáведных, и путь нечести́вых поги́бнет.
Хор: Аллилýїа, аллилýїа, аллилýїа.
Чтец (или хор): Рабóтайте Гóсподеви со стрáхом и рáдуйтеся Емý с трéпетом.
Хор: Аллилýїа, аллилýїа, аллилýїа.
Чтец (или хор): Блажéни вси надéющiися Нань.
Хор: Аллилýїа, аллилýїа, аллилýїа.
Чтец (или хор): Воскреснѝ, Гóсподи, спасѝ мя, Бóже мой.
Хор: Аллилýїа, аллилýїа, аллилýїа.
Чтец (или хор): Госпóдне есть спасéнiе, и на лю́дех Твои́х благословéнiе Твоè.
Хор: Аллилýїа, аллилýїа, аллилýїа.
Чтец: Слáва Ѻтцý и Сы́ну и Святóму Дýху.
Хор: Аллилýїа, аллилýїа, аллилýїа.
Хор: И ны́не и при́сно и во вéки векóв, ами́нь.
Хор: Аллилýїа, аллилýїа, аллилýїа.
Аллилýїа, аллилýїа, аллилýїа, слáва Тебè Бóже. (трúжды)
Гóсподи, поми́луй. (3 рáза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
ГОСПОДИ ВОЗЗВАХ, ГЛАС 1
Хор: Гóсподи, воззвáх к Тебè, услы́ши мя./ Услы́ши мя, Гóсподи./ Гóсподи, воззвáх к Тебè, услы́ши мя:/ вонмѝ глáсу молéнія моегó,/ внегдá воззвáти ми к Тебè./ Услы́ши мя, Гóсподи.
Хор: Да испрáвится моли́тва моя́,/ я́ко кади́ло пред Тобóю,/ воздея́ніе рукý моéю/ - жéртва вечéрняя./ Услы́ши мя, Гóсподи.
[В приходской практике пропускается до стихир]Положѝ, Гóсподи, хранéнiе устóм мои́м, и дверь ограждéнiя о устнáх мои́х. Не уклонѝ сéрдце моè в словесá лукáвствiя, непщевáти вины́ о гресéх, с человéки дéлающими беззакóнiе, и не сочтýся со избрáнными их. Накáжет мя прáведник ми́лостiю и обличи́т мя, елéй же грéшнаго да не намáстит главы́ моея́, я́ко ещè и моли́тва моя́ во благоволéнiих их. Пожéрты бы́ша при кáмени судiѝ их: услы́шатся глагóли моѝ, я́ко возмогóша. Я́ко тóлща землѝ просéдеся на землѝ, расточи́шася кóсти и҆́х при áде. Я́ко к Тебè, Гóсподи, Гóсподи, óчи моѝ: на Тя уповáх, не отымѝ дýшу мою́. Сохранѝ мя от сéти, ю́же состáвиша ми, и от соблáзн дéлающих беззакóнiе. Падýт во мрéжу свою́ грéшницы: еди́н есмь аз, дóндеже прейдý.
[В приходской практике пропускается до стихир]Глáсом мои́м ко Гóсподу воззвáх, глáсом мои́м ко Гóсподу помоли́хся. Пролiю́ пред Ним молéнiе моè, печáль мою́ пред Ним возвещý. Внегдá исчезáти от менè дýху моемý: и Ты познáл есѝ стезѝ моя́: на путѝ сем, по немýже хождáх, скры́ша сеть мне. Смотря́х одеснýю и возгля́дах, и не бе знáяй менè: поги́бе бéгство от менè, и несть взыскáяй дýшу мою́. Воззвáх к Тебè, Гóсподи, рех: Ты есѝ уповáнiе моè, часть моя́ есѝ на землѝ живы́х. Вонмѝ молéнiю моемý, я́ко смири́хся зелó, избáви мя от гоня́щих мя, я́ко укрепи́шася пáче менè.
[Пропускается до стихир]Изведи́ из темни́цы дýшу мою́, исповéдатися и҆́мени Твоемý. Менè ждут прáведницы, дóндеже воздáси мне.
На 8. Стiх: Из глубины́ воззвáх к Тебè, Гóсподи,// Гóсподи, услы́ши глас мой.
Стiхúры Введéнiя, глас 1: Днесь, вéрнiи, ликовствýим,/ во псалмéх и пéснех Гóсподеви пою́ще/ и чтýще Тогó свящéнную Сень,/ одушевлéнный Кiвóт, невмести́мое Слóво вмести́вшую:/ привóдится бо Гóсподеви,/ пáче eстествá плóтiю младéнствующи,/ и святи́тель вели́кiй Захáрiя/ прiéмлет с весéлiем Сiю́,// я́ко Бóжiе Жили́ще.
Да бýдут ýши Твоù// внéмлюще глáсу молéнiя моегó.
Стiхúра: Днесь, вéрнiи, ликовствýим,/ во псалмéх и пéснех Гóсподеви пою́ще/ и чтýще Тогó свящéнную Сень,/ одушевлéнный Кiвóт, невмести́мое Слóво вмести́вшую:/ привóдится бо Гóсподеви,/ пáче eстествá плóтiю младéнствующи,/ и святи́тель вели́кiй Захáрiя/ прiéмлет с весéлiем Сiю́,// я́ко Бóжiе Жили́ще.
На 6. Стiх: Áще беззакóнiя нáзриши, Гóсподи, Гóсподи, кто постоúт?// Яко у Тебè очищéнiе есть.
Стiхúра: Днесь храм одушевлéнный святы́я слáвы/ Хрїстá Бóга нáшего,/ eди́на в женáх Благословéнная Чи́стая,/ привóдится в храм закóнный жи́ти во святы́х;/ и рáдуются с Нéю Iоакíм и Áнна дýхом,/ и дéвственнiи ли́цы Гóсподеви пою́т,// псалóмски воспевáюще и чтýще Мáтерь Eгó.
И҆́мене рáди Твоегó потерпéх Тя, Гóсподи, потерпè душá моя́ в слóво Твоè,// уповá душá моя на Гóспода.
Стiхúра: Ты - прорóков проповéданiе,/ апóстолов слáва, и мýчеников похвалá,/ и всех земнорóдных обновлéнiе,/ Дéво Мáти Бóжiя:/ Тобóю бо Бóгу примири́хомся./ Тéмже чтим Твоè в храм Госпóдень вхождéнiе/ и со Áнгелом вси пéсненно,/ рáдуйся, Тебè, Пречи́стая, вопiéм,// Твои́ми моли́твами спасáемiи.
На 4. Стiх: От стрáжи ýтреннiя до нóщи, от стрáжи ýтреннiя,// да уповáет Iзрáиль на Гóспода.
И҆́ны стiхúры Введéнiя, глас 4: Во святы́х святáя, Святáя и Непорóчная, Святы́м Дýхом ввóдится/ и святы́м Áнгелом питáется,/ сýщи святéйшiй храм Святáго Бóга нáшего,/ вся́чeская освяти́вшаго вхóдом Eя́// и обожи́вшаго eстествó земны́х попóлзшееся.
Яко у Гóспода мúлость, и мнóгое у Негó избавлéнiе,// и Той избáвит Iзрáиля от всех беззакóнiй eгó.
Стiхúра: Во святы́х святáя, Святáя и Непорóчная, Святы́м Дýхом ввóдится/ и святы́м Áнгелом питáется,/ сýщи святéйшiй храм Святáго Бóга нáшего,/ вся́чeская освяти́вшаго вхóдом Eя́// и обожи́вшаго eстествó земны́х попóлзшееся.
На 2. Стiх: Хвалúте Гóспода вси язы́цы, похвалúте Егó вси лю́дiе.
Стiхúра: Oтрокови́цы, рáдующеся и свещы̀ имýще,/ Свещи́ днесь предхóдят разýмней/ и ввóдят Сiю́ во святáя святы́х свящéнно,/ проявля́юще хотя́щую Зарю́ неизречéнно из Нея́ возсiя́ти// и просвети́ти во тьме седя́щыя невéденiя Дýхом.
Яко утвердúся мúлость Егó на нас,// и и҆́стина Госпóдня пребывáет во век.
Стiхúра: Веселя́ся, прiими́, Захáрiе,/ возопи́ Áнна всехвáльная,/ Ю́же проповéдаша Бóжiи прорóцы Дýхом,/ и Сiю́ введи́ во святы́й храм свящéнно воспитáтися,/ я́ко да бýдет Влады́ки всех Божéственный престóл,// и палáта, и oдр, и светозáрное оби́телище.
Слáва Отцý и Сы́ну и Святóму Дýху и ны́не и прúсно и во вéки векóв, амúнь.
Глас 8: По рождествè Твоéм, Богоневéсто Влады́чице,/ пришлá eси́ в храм Госпóдень/ воспитáтися во святáя святы́х, я́ко освящéнна;/ тогдá и Гаврiи́л пóслан бысть к Тебè, Всенепорóчней,/ пи́щу Тебè принося́./ Небéсная вся удиви́шася,/ зря́ще Дýха Святáго, в Тя всéльшася./ Тéмже, Пречи́стая и Несквéрная,/ я́же на Небеси́ и на земли́ слáвима,// Мáти Бóжiя, спаси́ род наш.
СВЕТЕ ТИХИЙ
Хор: Свéте Ти́хiй святы́я слáвы Безсмéртнаго Ѻтцá Небéснаго, Святáго, Блажéннаго, Iисýсе Хрїстè! Пришéдше на зáпад сóлнца, ви́девше свет вечéрнiй, поéм Ѻтцá, Сы́на и Святáго Дýха, Бóга. Достóин есѝ во вся временá пет бы́ти глáсы преподóбными, Сы́не Бóжiй, живóт дая́й; тéмже мiр Тя слáвит.
ПРОКИМЕН В НЕДЕЛЮ ВЕЧЕРА
Чтец: Прокíмен, глас осмы́й: Се ны́не благослови́те Гóспода, вси рабѝ Госпóдни. (Пс.133:1А)
Хор: Се ны́не благословúте Гóспода,/ вси рабù Госпóдни.
Чтец: Стоя́щiи во хрáме Госпóдни, во двóрех дóму Бóга нáшего. (Пс.133:1Б)
Хор: Се ны́не благословúте Гóспода,/ вси рабù Госпóдни.
Чтец: Се ны́не благослови́те Гóспода.
Хор: Вси рабù Госпóдни.
ПАРИМИИ
Чтец: Исхóда чтéнiе.
(Из главы 40) Глагóла Госпóдь к Моисéю, глагóля: в день еди́н мéсяца пéрваго постáвиши ски́нiю свидéнiя, и вложи́ши кiвóт, и покры́еши егó завéсою. И внесéши трапéзу и свети́льник ея́, и положи́ши кади́льницу златýю, воéже кади́ти пред кiвóтом свидéнiя. И положи́ши покрóв завéсы над двéрьми ски́нiи свидéнiя. И вóзмеши елéй помáзанiя и помáжеши ски́нiю и вся, я́же в ней. И освяти́ши ю и вся сосýды ея́, и бýдет святá. И освяти́ши жéртвенник, и бýдет жéртвенник святáя святы́х. И сотворѝ Моисéй вся, ели́ка заповéда емý Госпóдь Бог Святы́й Iзрáилев. И покры̀ óблак ски́нiю свидéнiя, и слáвы Госпóдни испóлнися ски́нiя. И не можáше Моисéй вни́ти в ски́нiю свидéнiя, я́ко осеня́ше над нéю óблак, и слáвы Госпóдни испóлнися ски́нiя.
[Синодальный перевод]И сказал Господь Моисею, говоря: в первый месяц, в первый день месяца поставь скинию собрания, и поставь в ней ковчег откровения, и закрой ковчег завесою; и внеси стол и расставь на нём все вещи его, и внеси светильник и поставь на нём лампады его; и поставь золотой жертвенник для курения пред ковчегом откровения и повесь завесу у входа в скинию собрания. И возьми елея помазания, и помажь скинию и всё, что в ней, и освяти её и все принадлежности её, и будет свята; помажь жертвенник всесожжения и все принадлежности его, и освяти жертвенник, и будет жертвенник святыня великая. И сделал Моисей всё, как повелел ему Господь, так и сделал. И покрыло облако скинию собрания, и слава Господня наполнила скинию; и не мог Моисей войти в скинию собрания, потому что осеняло её облако, и слава Господня наполняла скинию. (Исх.40:1-5,9-10,16,34-35)
Чтец: Царств трéтiих чтéнiе.
(Из главы 8) Бысть, я́ко совершѝ Соломóн éже создáти дом Госпóдень. И собрá вся стáрцы Iзрáилевы в Сióн вознестѝ кiвóт завéта Госпóдня из грáда Давíдова, сей есть Сióн. И взя́ша свящéнницы кiвóт завéта Госпóдня, и ски́нiю свидéнiя, и вся сосýды святы́я, я́же в ски́нiи свидéнiя. И царь, и весь Iзрáиль пред кiвóтом. И внесóша свящéнницы кiвóт завéта Госпóдня на мéсто егó, в давíр хрáма, во святáя святы́х, под кри́ла Херувíмов. Я́ко Херувíми бя́ху распростéрты крилáми над мéстом кiвóта,/ и покрывáху Херувíми над кiвóтом/ и над святáя его свы́шше. И не бе в кiвóте, кромè двух скрижáлей завéта, я́же положи́ тáмо Моисéй в Хори́ве, я́же завещá Госпóдь. И бысть, я́ко изыдóша свящéнницы от святáго, и óблак испóлни дом. И не возмогóша свящéнницы стáти служи́ти от лицá óблака,/ я́ко испóлнися слáвы дом Гóспода Бóга Вседержи́теля.
[Синодальный перевод]Так была совершена вся работа, которую производил царь Соломон для храма Господа. Тогда созвал Соломон старейшин Израилевых и всех начальников колен, глав поколений сынов Израилевых, чтобы перенести ковчег завета Господня из города Давидова, то есть Сиона. И подняли священники ковчег, и понесли ковчег Господень и скинию собрания и все священные вещи, которые были в скинии. А царь Соломон и с ним всё общество Израилево, собравшееся к нему, шли пред ковчегом. И внесли священники ковчег завета Господня на место его, в давир храма, во Святое Святых, под крылья херувимов. Ибо херувимы простирали крылья над местом ковчега, и покрывали херувимы сверху ковчег и шесты его. В ковчеге ничего не было, кроме двух каменных скрижалей, которые положил туда Моисей на Хориве, когда Господь заключил завет с сынами Израилевыми. Когда священники вышли из святилища, облако наполнило дом Господень; и не могли священники стоять на служении, по причине облака, ибо слава Господня наполнила храм Господень.(3Цар.7:51А;8:1,3-7,9-11)
Чтец: Прорóчества Iезекíилева чтéнiе.
(Из глав 43 и 44) Тáко глагóлет Госпóдь: бýдет от дне осмáго и прóчее, сотворя́т iерéи на олтарѝ всесожжéнiя вáшего и я́же спасéнiя вáшего, и прiимý вы, глагóлет Адонаѝ Госпóдь. И обратѝ мя на путь врат святы́х внéшних, зря́щих на востóки, и сiя́ бя́ху затворéна. И речè Госпóдь ко мне: вратá сiя́ затворéна бýдут и не отвéрзутся, и никтóже прóйдет сквозè их; я́ко Госпóдь Бог Iзрáилев прóйдет и́ми, и бýдут затворéна. Я́ко Игýмен ся́дет в них снéсти хлеб, по путѝ Елáмских врат вни́дет и по путѝ егó изы́дет. И введè мя по путѝ врат святы́х, сýщих к сéверу, пря́мо хрáму, и ви́дех, и се испóлнь слáвы храм Госпóдень.
[Синодальный перевод]Так говорит Господь: по окончании сих дней, в восьмой день и далее, священники будут возносить на жертвеннике ваши всесожжения и благодарственные жертвы; и Я буду милостив к вам, говорит Господь Бог. И привел он меня обратно ко внешним воротам святилища, обращенным лицом на восток, и они были затворены. И сказал мне Господь: ворота сии будут затворены, не отворятся, и никакой человек не войдет ими, ибо Господь, Бог Израилев, вошел ими, и они будут затворены. Что до князя, он, как князь, сядет в них, чтобы есть хлеб пред Господом; войдет путем притвора этих ворот, и тем же путем выйдет. Потом привел меня путем ворот северных перед лицо храма, и я видел, и вот, слава Господа наполняла дом Господень.(Иез.43:27;44:1-4)
Гóсподи, поми́луй. (40 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
СПОДОБИ ГОСПОДИ
Хор: Сподóби, Гóсподи, в вéчер сей без грехá сохрани́тися нам./ Благословéн есѝ, Гóсподи Бóже ѻтéц нáших,/ и хвáльно и прослáвлено и҆́мя Твоè во вéки, ами́нь.
Бýди, Гóсподи, ми́лость Твоя́ на нас, я́коже уповáхом на Тя./ Благословéн есѝ, Гóсподи, научѝ мя оправдáнiем Твои́м./ Благословéн есѝ, Влады́ко, вразумѝ мя оправдáнiем Твои́м./ Благословéн есѝ, Святы́й, просветѝ мя оправдáнiи Твои́ми.
Гóсподи, ми́лость Твоя́ во век, дел рукý Твоéю не прéзри./ Тебè подобáет хвалá. Тебè подобáет пéнiе,/ Тебè слáва подобáет, Ѻтцý и Сы́ну и Святóму Дýху, ны́не и при́сно и во вéки векóв. Ами́нь.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
ЛИТИЯ
Стiхира Введéнiя, глас 1, самоглáсна, Геóргiя Никомiдíйскаго: Да рáдуется днесь Нéбо свы́ше,/ и óблацы весéлiе да кропя́т/ о зелó преслáвных вели́чiих Бóга нáшего:/ се бо Дверь, на востóки зря́щая,/ рóждшися от неплóдове безплóдныя по обетовáнiю/ и Бóгу освящéна бы́вши в жили́ще,/ днесь в храм я́ко непорóчное приношéнiе привóдится,/ да рáдуется Давíд, бряцáя в гýсли:/ приведýтся, речè, Царю́ дéвы в след Eя́,/ бли́жнiя Eя́ приведýтся внутрь ски́нiи Бóжiя,/ внутрь очисти́лища Eгó,/ воспитáтися в жили́ще/ прéжде век от Oтцá нетлéнно Рóждшагося// во спасéнiе душ нáших.
Стiхиры Введéнiя, глас 4, самоглáсны: Днесь Боговмести́мый храм, Богорóдица,/ в храм Госпóдень привóдится,/ и Захáрiя Сiю́ прiéмлет:/ днесь святáя святы́х рáдуются,/ и лик Áнгельскiй тáинственно торжествýет./ С ни́миже и мы, прáзднующе днесь, с Гаврiи́лом возопiи́м:/ рáдуйся, Благодáтная, Госпóдь с Тобóю,// имéяй вéлiю ми́лость.
Прiиди́те, вси вéрнiи,/ еди́ну Непорóчную восхвáлим,/ от прорóк проповéданную и в храм приведéнную,/ прéжде век пронаречéнную Мáтерь/ и в послéдняя лéта я́вльшуюся Богорóдицу./ Гóсподи, моли́твами Ея́// мир Твой подáждь нам и вéлiю ми́лость.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Глас 5, Леóнта маúстра: Возсiя́ день рáдостен/ и прáздник всечéстен:/ днесь бо я́же прéжде Рождествá и по Рождествè Дéва пребы́вши,/ в храм Госпóдень привóдится,/ и рáдуется Захáрiя стáрец, роди́тель Предтéчев,/ и вопiéт вéсело:/ прибли́жися, Предстáтельница скорбя́щих,/ в храм святы́й, я́ко Святá,/ освяти́тися во оби́телище Всецаря́./ Да весели́тся Iоакíм прáoтец, и Áнна да рáдуется,/ я́ко принесóша Бóгу я́ко трилéтствующую Ю́ницу/ непорóчную Влады́чицу./ Мáтeри, срáдуйтеся, дéвы, взыгрáйте,/ и неплóды, сликовствýйте,/ я́ко отвéрзе нам Небéсное Цáрство пронаречéнная Всецари́ца,// рáдуйтеся, лю́дiе, и весели́теся.
Гóсподи, поми́луй. (40 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
СТИХИРЫ НА СТИХОВНЕ
Стiхиры Введéнiя, глас 5: Рáдуйся, Нéбо и земля́,/ Нéбо У́мное грядýщее зря́ще,/ в Божéственный дом воспитáтися чéстно,/ Дéву eди́ну и непорóчную,/ к Нéйже, дивя́ся, Захáрiя вопiя́ше:/ Двéре Госпóдня, хрáма отверзáю Тебè двéри,/ рáдующися, в нем ликовствýй,/ познáх бо и вéровах,/ я́ко ужè избавлéнiе прiи́дет проявлéнно Iзрáилево/ и роди́тся из Тебè Бог Слóво,// дáруяй мíрови вéлiю ми́лость.
Приведýтся Царю́ дéвы в след Ея́,/ úскреннiя Ея́ приведýтся Тебè. (Пс.44:15)
Стiхúра: Áнна Божéственная благодáть я́ве,/ от благодáти дáнную, чи́стую Приснодéву/ привóдит с весéлiем в храм Бóжiй,/ призвáвши итѝ пред Нéю oтрокови́цам,/ свещи́ нося́щим, и глагóлющи:/ пойдѝ, Чáдо,/ Дáвшему Тя бýди возложéнiе и благовóнный фимiáм./ Вни́ди в незаходи́мая, и увéждь тáйны,/ и уготóвися бы́ти Iисýсово вмести́лище, весéлое и крáсное,// подаю́щаго мíру вéлiю ми́лость.
Приведýтся в весéлiи и рáдованiи,/ введýтся в храм Царéв.(Пс.44:16)
Стiхúра: Внутрь в храм Бóжiй/ Боговмести́мый храм возлагáется, Дéва Всесвятáя,/ и oтрокови́цы Eй ны́не, свещы̀ нося́ще, предхóдят./ Игрáет роди́телей сопряжéнiе изря́дное,/ Iоакíм же и Áнна, ликовствýюще,/ я́ко роди́ша Творцá рóждшую,/ Я́же ликовствýющи в Божéственных ски́нiих/ и питáема рукóю Áнгеловою, Всенепорóчная,/ Хрїстá яви́ся Мáти,// Подаю́щаго мíру вéлiю ми́лость.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Стiхира Введéнiя, глас 6: Днесь собóри вéрных, сошéдшеся,/ духóвне да торжествýим/ и Богоoтрокови́цу Дéву и Богорóдицу,/ в храм Госпóдень приводи́му,/ благочéстно восхвáлим,/ предъизбрáнну от всех родóв,/ во оби́телище всех Царя́ Хрїстá и Бóга:/ дéвы, свещы̀ нося́ще, предъиди́те,/ Приснодéвы чтýще честнóе происхождéнiе,/ мáтeри, печáль всю отложи́вше,/ рáдостно спослéдствуйте Мáтери Бóга бывáющей/ и рáдости мíра Ходáтаице./ Вси ýбо рáдостно,/ éже рáдуйся, со Áнгелом возопiи́м Обрáдованней,// при́сно моля́щейся о душáх нáших.
Молитва святаго Симеона Богоприимца
Ны́не отпущáеши рабá Твоегó, Влады́ко,/ по глагóлу Твоемý, с ми́ром;/ я́ко ви́деста óчи моѝ спасéнiе Твоè,/ éже есѝ уготóвал пред лицéм всех людéй,/ свет во откровéнiе язы́ков,// и слáву людéй Твои́х Iзрáиля.
Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжiй, поми́луй нас. Ами́нь.
Тропáрь, глас 4: Днесь благоволéнiя Бóжiя предображéнiе/ и человéков спасéнiя проповéданiе/ в хрáме Бóжiи я́сно Дéва явля́ется/ и Хрїстá всем предвозвещáет./ Той и мы велеглáсно возопiúм:// рáдуйся, смотрéнiя Зиждúтелева исполнéнiе. (Трúжды)
Бýди и҆́мя Госпóдне благословéно от ны́не и до вéка. (Трúжды)
Псалом 33
Благословлю́ Гóспода на вся́кое врéмя,/ вы́ну хвалá Егó во устéх мои́х./ О Гóсподе похвáлится душá моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм и҆́мя Егó вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицá вáша не постыдя́тся./ Сей ни́щiй воззвá, и Госпóдь услы́ша и҆̀,/ и от всех скорбéй егó спасè и҆̀./ Ополчи́тся Áнгел Госпóдень óкрест боя́щихся Егó,/ и избáвит их./ Вкуси́те и ви́дите, я́ко благ Госпóдь;/ блажéн муж, и҆́же уповáет нань./ Бóйтеся Гóспода, вси святíи Егó,/ яко несть лишéнiя боя́щымся Егó./ Богáтiи обнищáша и взалкáша,/ взыскáющiи же Гóспода не лишáтся вся́каго блáга.[В приходской практитке пропускается]/ Прiиди́те, чáда, послýшайте менé,/ стрáху Госпóдню научý вас./ Кто есть человéк хотя́й живóт,/ любя́й дни ви́дети блáги;/ Удержѝ язык твой от зла,/ и устнé твоѝ, éже не глагóлати льсти./ Уклони́ся от зла и сотворѝ блáго,/ взыщѝ ми́ра, и поженѝ и҆̀./ Óчи Госпóдни на прáведныя,/ и ýши Егó в моли́тву их./ Лицé же Госпóдне на творя́щiя злáя,/ еже потреби́ти от землѝ пáмять их./ Воззвáша прáведнiи, и Госпóдь услы́ша их,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я́ Госпóдь./ Храни́т Госпóдь вся кóсти их,/ ни еди́на от них сокруши́тся./ Смерть грéшников лютá,/ и ненави́дящiи прáведнаго прегрешáт./ Избáвит Госпóдь дýши раб Своих,/ и не прегрешáт вси уповáющiи на Негó.
И глаголи ýтреню