Димитриевская родительская суббота. Прп. Евфимия Нового, Солунского, глас 3. Вседневная вечерня

[mirskim]

28 октября́ 2023 гóда. Суббóта 21-й седмúцы по Пятидеся́тнице. Димúтрiевская родúтельская суббóта. Преподóбнаго Евфúмiа Нóваго, Солýнскаго. Глас 3. Заупокóйная слýжба для домáшнего (келéйнаго) совершéнiя состоúт из вседнéвной вечéрни, ýтрени, тáже канóна и пéрвого чáса. Слýжба мiрскúм чúном.

ВСЕДНЕВНАЯ ВЕЧЕРНЯ

Моли́твами святы́х отéц нáших, Гóсподи Iисýсе Хрїстè, Бóже наш, поми́луй нас, ами́нь.

Слáва Тебè, Бóже наш, слáва Тебè.

Царю́ Небéсный, Утéшителю, Дýше И҆́стины, И҆́же вездè сый и вся исполня́яй, Сокрóвище благи́х и жи́зни Подáтелю, прiидѝ и всели́ся в ны, и очи́сти ны от вся́кiя сквéрны, и спасѝ, Блáже, Дýши нáша.

Святы́й Бóже, Святый Крéпкiй, Святый Безсмéртный, поми́луй нас.(3 раза)

Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.

Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.

Гóсподи, поми́луй. (трúжды)

Слáва Ѻтцý и Сы́ну и Святóму Дýху, и ны́не и присно и во вéки векóв, аминь.

Ѻ́тче наш, И҆́же есѝ на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.



Гóсподи, Iисýсе Хрїстè, Сы́не Бóжїй, поми́луй нас. Ами́нь.

Гóсподи, поми́луй, (12 раз)

Слáва Ѻтцý и Сыну и Святóму Дýху, и ны́не и при́сно и во вéки векóв, аминь.

Пріиди́те, поклони́мся Царéви нáшему Бóгу.

Пріиди́те, поклони́мся и припадéм Хрїстý, Царéви нáшему Бóгу.

Пріиди́те, поклони́мся и припадéм Самомý Хрїстý, Царéви и Бóгу нáшему.

Псалом 103, предначинaтельный

Благословѝ, душè моя, Гóспода. Гóсподи, Бóже мой, возвеличился есѝ зелó. Во исповéданiе и в велелéпоту облéклся есѝ. Одея́йся свéтом, яко ри́зою, простирáяй нéбо, яко кóжу. Покрывáяй водáми превы́спренняя Своя́, полагáяй óблаки на восхождéнiе Своè, ходя́й на крилý вéтреню. Творя́й Áнгелы Своя дýхи и слугѝ Своя плáмень óгненный. Основáяй зéмлю на твéрди ея́, не преклони́тся в век вéка. Бéздна, яко ри́за, одея́нiе ея́, на горáх стáнут вóды, от запрещéнiя Твоегó побéгнут, от глáса грóма Твоегó убоя́тся. Восхóдят гóры и нисхóдят поля́ в мéсто, éже основáл есѝ им. Предéл положи́л есѝ, eгóже не прéйдут, нижè обратя́тся покры́ти зéмлю. Посылáяй истóчники в дéбрех, посредè гор прóйдут вóды. Напая́ют вся звéри сéльныя, ждут онáгри в жáжду свою. На тых пти́цы небéсныя привитáют, от среды́ кáменiя дадя́т глас. Напая́яй гóры от превы́спренних Свои́х, от плодá дел Твоих насы́тится земля́. Прозябáяй травý скотóм, и злак на слýжбу человéком, известѝ хлеб от землѝ. И винó весели́т сéрдце человéка, умáстити лицè елéем, и хлеб сéрдце человéка укрепи́т. Насы́тятся древá польскáя, кéдри Лiвáнстiи, и҆́хже еси насади́л. Тáмо пти́цы вогнездя́тся, еродíево жили́ще предводи́тельствует и҆́ми. Гóры высóкiя елéнем, кáмень прибéжище зáяцем. Сотвори́л есть лунý во временá, сóлнце познá зáпад свой. Положи́л есѝ тму, и бысть нощь, в нéйже прóйдут вси звéрiе дубрáвнiи. Ски́мни рыкáющiи, восхи́тити и взыскáти от Бóга пи́щу себè. Возсiя́ сóлнце и собрáшася и в лóжах свои́х ля́гут. Изы́дет человéк на дéло своè и на дéланiе своè до вéчера. Яко возвели́чишася делá Твоя, Гóсподи, вся премýдростiю сотвори́л есѝ, испóлнися земля́ твáри Твоея́. Сié мóре вели́кое и прострáнное, тáмо гáди, и҆́мже несть числá, живóтная мáлая с вели́кими, тáмо кораблѝ преплáвают, змiй сей, eгóже создáл есѝ ругáтися eмý. Вся к Тебè чáют, дáти пи́щу им во блáго врéмя. Дáвшу Тебè им соберýт, отвéрзшу Тебè рýку вся́ческая испóлнятся блáгости, отврáщшу же Тебè лицè, возмятýтся, отъи́меши дух их, и исчéзнут, и в персть свою возвратя́тся. Пóслеши Дýха Твоегó, и сози́ждутся, и обнови́ши лицè землѝ. Бýди слáва Госпóдня во вéки, возвесели́тся Госпóдь о дéлех Свои́х, призирáяй на зéмлю, и творя́й ю́ трясти́ся, прикасáяйся горáм, и дымя́тся. Воспою́ Гóсподеви в животè моéм, пою́ Бóгу моемý, дóндеже есмь, да услади́тся Емý бесéда моя, аз же возвеселю́ся о Гóсподе. Да исчéзнут грéшницы от землѝ, и беззакóнницы, я́коже не бы́ти им. Благословѝ, душè моя́, Гóспода.

Сóлнце познá зáпад свой. Положи́л еси тму, и бысть нощь.

Яко возвели́чишася делá Твоя, Гóсподи, вся премýдростiю сотвори́л есѝ.

Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.

Аллилýїа, аллилýїа, аллилýїа, слáва Тебè Бóже. (3 раза)

Гóсподи, поми́луй. (12 раз)

Слáва Отцý и Сы́ну и Святóму Дýху, и ны́не и присно и во вéки векóв, аминь.

Восемнадцатая кафисма

[Псалом 119]Ко Гóсподу, внегдá скорбéти ми, воззвáх, и услы́ша мя. Гóсподи, избáви дýшу мою́ от устéн непрáведных и от язы́ка льсти́ва. Что дáстся тебé, или́ что приложи́тся тебé к язы́ку льсти́ву? Стрéлы си́льнаго изощрéны, со ýгльми пусты́нными. Увы́ мне, я́ко пришéльствiе моé продолжи́ся, всели́хся с селéнiи Кидáрскими. Мнóго пришéльствова душá моя́, с ненави́дящими ми́ра бех ми́рен: егдá глагóлах им, боря́ху мя тýне.

[Псалом 120]Возведóх óчи мои́ в гóры, отню́дуже прiи́дет пóмощь моя́. Пóмощь моя́ от Гóспода, сотвóршаго нéбо и зéмлю. Не даждь во смятéнiе ноги́ твоея́, нижé воздрéмлет храня́й тя, се не воздрéмлет, нижé ýснет храня́й Iзрáиля. Госпóдь сохрани́т тя, Госпóдь покрóв твой на рýку деснýю твою́. Во дни сóлнце не ожжéт тебé, нижé лунá нóщiю. Госпóдь сохрани́т тя от вся́каго зла, сохрани́т дýшу твою́ Госпóдь. Госпóдь сохрани́т вхождéнiе твоé и исхождéнiе твоé, отны́не и до вéка.

[Псалом 121]Возвесели́хся о рéкших мне: в дом Госпóдень пóйдем. Стоя́ще бя́ху нóги нáша во двóрех твои́х, Iерусали́ме. Iерусали́м зи́ждемый я́ко град, eмýже причáстiе eгó вкýпе. Тáмо бо взыдóша колéна, колéна Госпóдня, свидéнiе Iзрáилево, исповéдатися и҆́мени Госпóдню, я́ко тáмо седóша престóли на суд, престóли в домý Давíдове. Вопроси́те же я́же о ми́ре Iерусали́ма: и оби́лiе лю́бящим тя. Бýди же мир в си́ле твоéй и оби́лiе в столпостенáх твои́х. Рáди брáтiй мои́х и бли́жних мои́х глагóлах ýбо мир о тебé. Дóму рáди Гóспода Бóга нáшего взыскáх благáя тебé.

[Псалом 122]К Тебé возведóх óчи мои́, живýщему на Небеси́. Се я́ко óчи раб в рукý госпóдiй свои́х, я́ко óчи рабы́ни в рукý госпожи́ своея́, тáко óчи нáши ко Гóсподу Бóгу нáшему, дóндеже ущéдрит ны. Поми́луй нас, Гóсподи, поми́луй нас, я́ко по мнóгу испóлнихомся уничижéнiя, наипáче напóлнися душá нáша поношéнiя гобзýющих и уничижéнiя гóрдых.

[Псалом 123]Я́ко áще не Госпóдь бы был в нас, да речéт ýбо Iзрáиль, я́ко áще не Госпóдь бы был в нас, внегдá востáти человéком на ны, ýбо живы́х пожéрли бы́ша нас, внегдá прогнéватися я́рости их на ны, ýбо водá потопи́ла бы нас. Потóк прéйде душá нáша, ýбо прéйде душá нáша вóду непостоя́нную. Благословéн Госпóдь, И҆́же не дадé нас в лови́тву зубóм их. Душá нáша, я́ко пти́ца избáвися от сéти ловя́щих: сеть сокруши́ся, и мы избáвлени бы́хом. Пóмощь нáша во и҆́мя Гóспода, сотвóршаго нéбо и зéмлю.

Чтец: Слáва Отцý и Сы́ну и Святóму Дýху.

Хор: И ны́не и прúсно и во вéки векóв, амúнь.

Аллилýїа, аллилýїа, аллилýїа, слáва Тебè Бóже. (3 рáза)

Гóсподи, помúлуй. (3 рáза)

Слáва Отцý и Сы́ну и Святóму Дýху.

Чтец: И ны́не и при́сно и во вéки векóв. Ами́нь.

[Псалом 124]Надéющiися на Гóспода, я́ко горá Сióн: не подви́жится в век живы́й во Iерусали́ме. Гóры óкрест eгó, и Госпóдь óкрест людéй Свои́х отны́не и до вéка. Я́ко не остáвит Госпóдь жезлá грéшных на жрéбiй прáведных, я́ко да не прóструт прáведнiи в беззакóнiя рук свои́х. Ублажи́, Гóсподи, благíя и прáвыя сéрдцем. Уклоня́ющiяся же в развращéнiя отведéт Госпóдь с дéлающими беззакóнiе. Мир на Iзрáиля.

[Псалом 125]Всегдá возврати́ти Гóсподу плен Сióнь, бы́хом я́ко утéшени. Тогдá испóлнишася рáдости устá нáша и язы́к наш весéлiя, тогдá рекýт во язы́цех: возвели́чил есть Госпóдь сотвори́ти с ни́ми. Возвели́чил есть Госпóдь сотвори́ти с нáми: бы́хом веселя́щеся. Возврати́, Гóсподи, пленéнiе нáше, я́ко потóки ю́гом. Сéющiи слезáми, рáдостiю пóжнут. Ходя́щiи хождáху и плáкахуся, метáюще сéмена своя́, грядýще же прiи́дут рáдостiю, взéмлюще рукоя́ти своя́.

[Псалом 126]Áще не Госпóдь сози́ждет дом, всýе труди́шася зи́ждущiи. Áще не Госпóдь сохрани́т град, всýе бде стрегíй. Всýе вам есть ýтреневати, востáнете по седéнiи, ядýщiи хлеб болéзни, егдá даст возлю́бленным Свои́м сон. Се достоя́нiе Госпóдне сы́нове, мзда плодá чрéвняго. Я́ко стрéлы в руцé си́льнаго, тáко сы́нове оттрясéнных. Блажéн, и҆́же испóлнит желáнiе своé от них. Не постыдя́тся, егдá глагóлют врагóм свои́м во вратéх.

[Псалом 127]Блажéни вси боя́щiися Гóспода, ходя́щiи в путéх Eгó. Труды́ плодóв Твои́х снéси: блажéн еси́, и добрó тебé бýдет. Женá твоя́, я́ко лозá, плодови́та в странáх дóму твоегó, сы́нове твои́, я́ко новосаждéнiя мáсличная, óкрест трапéзы твоея́. Се тáко благослови́тся человéк боя́йся Гóспода. Благослови́т тя Госпóдь от Сióна, и ýзриши благáя Iерусали́ма вся дни живóта твоегó, и ýзриши сы́ны сынóв твои́х. Мир на Iзрáиля.

[Псалом 128]Мнóжицею брáшася со мнóю от ю́ности моея́, да речéт ýбо Iзрáиль: мнóжицею брáшася со мнóю от ю́ности моея́, и҆́бо не премогóша мя. На хребтé моéм дéлаша грéшницы, продолжи́ша беззакóнiе своé. Госпóдь Прáведен ссечé вы́я грéшников. Да постыдя́тся и возвратя́тся вспять вси ненави́дящии Сióна. Да бýдут, я́ко травá на здех, я́же прéжде восторжéнiя и҆́зсше, éюже не испóлни руки́ своея́ жняй, и нéдра своегó рукоя́ти собирáяй, и не рéша мимоходя́щiи: благословéнiе Госпóдне на вы, благослови́хом вы во и҆́мя Госпóдне.

Чтец: Слáва Отцý и Сы́ну и Святóму Дýху.

Хор: И ны́не и прúсно и во вéки векóв, амúнь.

Аллилýїа, аллилýїа, аллилýїа, слáва Тебè Бóже. (3 рáза)

Гóсподи, помúлуй. (3 рáза)

Слáва Отцý и Сы́ну и Святóму Дýху.

Чтец: И ны́не и при́сно и во вéки векóв. Ами́нь.

[Псалом 129]Из глубины́ воззвáх к Тебé, Гóсподи, Гóсподи, услы́ши глас мой. Да бýдут ýши Твои́ внéмлюще глáсу молéнiя моегó. Áще беззакóнiя нáзриши, Гóсподи, Гóсподи, кто постои́т? Я́ко у Тебé очищéнiе есть. И҆́мене рáди Твоегó потерпéх Тя, Гóсподи, потерпé душá моя́ в слóво Твоé, уповá душá моя́ на Гóспода. От стрáжи ýтреннiя до нóщи, от стрáжи ýтреннiя да уповáет Iзрáиль на Гóспода. Я́ко у Гóспода ми́лость, и мнóгое у Негó избавлéнiе, и Той избáвит Iзрáиля от всех беззакóнiй eгó.

[Псалом 130]Гóсподи, не вознесéся сéрдце моé, нижé вознесóстеся óчи мои́, нижé ходи́х в вели́ких, нижé в ди́вных пáче менé. Áще не смиреномýдрствовах, но вознесóх дýшу мою́, я́ко отдоéное на мáтерь свою́, тáко воздáси на дýшу мою́. Да уповáет Iзрáиль на Гóспода, отны́не и до вéка.

[Псалом 131]Помяни́, Гóсподи, Давíда и всю крóтость eгó: я́ко кля́тся Гóсподеви, обещáся Бóгу Iáковлю: áще вни́ду в селéнiе дóму моегó, или́ взы́ду на одр постéли моея́, áще дам сон очи́ма мои́ма и вéждома мои́ма дремáнiе, и покóй скранiáма мои́ма, дóндеже обря́щу мéсто Гóсподеви, селéнiе Бóгу Iáковлю. Се слы́шахом я́ во Евфрáфе, обретóхом я́ в поля́х дубрáвы. Вни́дем в селéнiя Егó, поклони́мся на мéсто, идéже стоя́сте нóзе Егó. Воскресни́, Гóсподи, в покóй Твой, Ты и кiвóт святы́ни Твоея́. Свящéнницы Твои́ облекýтся прáвдою, и преподóбнiи Твои́ возрáдуются. Давíда рáди рабá Твоегó не отврати́ лицé помáзаннаго Твоегó. Кля́тся Госпóдь Давíду и҆́стиною и не отвéржется ея́: от плодá чрéва твоегó посаждý на престóле твоéм. Áще сохраня́т сы́нове твои́ завéт Мой, и свидéнiя Моя́ сiя́, и҆́мже научý я́, и сы́нове их до вéка ся́дут на престóле твоéм. Я́ко избрá Госпóдь Сióна, извóли и҆̀ в жили́ще Себé. Сей покóй Мой во век вéка, зде вселю́ся, я́ко извóлих и҆̀. Лови́тву eгó благословля́яй благословлю́, ни́щiя eгó насы́щу хлéбы, свящéнники eгó облекý во спасéнiе, и преподóбнiи eгó рáдостiю возрáдуются. Тáмо возращý рог Давíдови, уготóвах свети́льник помáзанному Моемý. Враги́ eгó облекý студóм, на нéмже процветéт святы́ня Моя́.

[Псалом 132]Се чтó добрó, или́ что краснó? Но éже жи́ти брáтiи вкýпе. Я́ко ми́ро на главé, сходя́щее на брадý, брадý Аарóню, сходя́щее на омéты одéжды eгó, я́ко росá Аермóнская сходя́щая на гóры Сióнскiя, я́ко тáмо заповéда Госпóдь благословéнiе и живóт до вéка.

[Псалом 133]Се ны́не благослови́те Гóспода вси раби́ Госпóдни, стоя́щiи в хрáме Госпóдни, во двóрех дóму Бóга нáшего, В нóщех воздежи́те рýки вáша во святáя, и благослови́те Гóспода. Благослови́т тя Госпóдь от Сióна, сотвори́вый нéбо и зéмлю.

Чтец: Слáва Отцý и Сы́ну и Святóму Дýху и ны́не и при́сно и во вéки векóв. Ами́нь.

Аллилýїа, аллилýїа, аллилýїа, слáва Тебè Бóже. (трúжды)

Гóсподи, поми́луй. (3 раза)

Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.

ГОСПОДИ ВОЗЗВАХ, ГЛАС 4

Хор: Гóсподи, воззвáх к Тебè, услы́ши мя./ Услы́ши мя, Гóсподи./ Гóсподи, воззвáх к Тебè, услы́ши мя:/ вонмѝ глáсу молéнія моегó,/ внегдá воззвáти ми к Тебè./ Услы́ши мя, Гóсподи.

Чтец или хор: Да испрáвится моли́тва моя́,/ я́ко кади́ло пред Тобóю,/ воздея́ніе рукý моéю/ - жéртва вечéрняя./ Услы́ши мя, Гóсподи.

Положѝ, Гóсподи, хранéнiе устóм мои́м,/ и дверь ограждéнiя о устнáх мои́х.

Не уклонѝ сéрдце моè в словесá лукáвствiя,/ непщевáти вины́ о гресéх,

С человéки дéлающими беззакóнiе,/ и не сочтýся со избрáнными их.

Накáжет мя прáведник ми́лостiю и обличи́т мя,/ елéй же грéшнаго да не намáстит главы́ моея́,

Я́ко ещè и моли́тва моя́ во благоволéнiих их./ Пожéрты бы́ша при кáмени судiѝ их:

Услы́шатся глагóли моѝ, я́ко возмогóша./ Я́ко тóлща землѝ просéдеся на землѝ, расточи́шася кóсти и҆́х при áде.

Я́ко к Тебè, Гóсподи, Гóсподи, óчи моѝ:/ на Тя уповáх, не отымѝ дýшу мою́.

Сохранѝ мя от сéти, ю́же состáвиша ми,/ и от соблáзн дéлающих беззакóнiе.

Падýт во мрéжу свою́ грéшницы:/ еди́н есмь аз, дóндеже прейдý.

Глáсом мои́м ко Гóсподу воззвáх,/ глáсом мои́м ко Гóсподу помоли́хся.

Пролiю́ пред Ним молéнiе моè,/ печáль мою́ пред Ним возвещý.

Внегдá исчезáти от менè дýху моемý:/ и Ты познáл есѝ стезѝ моя́:

На путѝ сем, по немýже хождáх,/ скры́ша сеть мне.

Смотря́х одеснýю и возгля́дах,/ и не бе знáяй менè:

Поги́бе бéгство от менè,/ и несть взыскáяй дýшу мою́.

Воззвáх к Тебè, Гóсподи, рех:/ Ты есѝ уповáнiе моè, часть моя́ есѝ на землѝ живы́х.

Вонмѝ молéнiю моемý,/ я́ко смири́хся зелó,

Избáви мя от гоня́щих мя,/ я́ко укрепи́шася пáче менè.

Изведи́ из темни́цы дýшу мою́,/ исповéдатися и҆́мени Твоемý.

Менè ждут прáведницы,/ дóндеже воздáси мне.

Из глубины́ воззвáх к Тебè, Гóсподи,/ Гóсподи, услы́ши глас мой.

Да бýдут ýши Твоѝ/ внéмлюще глáсу молéнiя моегó.

На 6. Стiх: Áще беззакóнiя нáзриши, Гóсподи, Гóсподи, кто постоúт?// Яко у Тебè очищéнiе есть.

Стiхúры прп. Евфúмiа, глас 4: Те́сный путь ше́ствовал еси́,/ нево́лненным ду́хом/ к жи́зни веду́щим препла́вая:/ по́стников бо ты был еси́ хвала́, Евфи́мие,/ терпели́вно низложи́в де́монская ловле́ния,/ тем получи́л еси́ Небе́снаго Ца́рствия насле́дник бы́ти// и не престаю́щия наслажда́ешися красоты́.

И҆́мене рáди Твоегó потерпéх Тя, Гóсподи, потерпè душá моя́ в слóво Твоè,// уповá душá моя на Гóспода.

Стiхúра: Пресве́тлое житие́ твое́ А́нгелы удиви́/ и де́монская свире́пства я́ве устраши́,/ ве́рных же собра́ния све́тло украси́,/ к Небе́сному Христо́ву жили́щу/ повелева́я ше́ствовати всегда́./ Его́же моли́ от тли и бед изба́витися// ве́рою творя́щим всечестну́ю па́мять твою́.

На 4. Стiх: От стрáжи ýтреннiя до нóщи, от стрáжи ýтреннiя,// да уповáет Iзрáиль на Гóспода.

Стiхúра: Песнопе́нiе и хвалу́/ Хрiсту́ приноси́л еси́ на всяк день, о́тче,/ в пусты́ни жи́тельствуя,/ Еди́ному Бо́гу возложи́в ду́шу и помышле́ние,/ я́ко вели́кий Моисе́й, в нехо́дная вшел еси́:/ тем победи́в неви́димаго врага́,/ и был еси́ чи́стое прия́телище// и Боже́ственнаго Ду́ха орга́н.

Яко у Гóспода мúлость, и мнóгое у Негó избавлéнiе,// и Той избáвит Iзрáиля от всех беззакóнiй eгó.

Mýченичны из Октóиха, глас 3: Ве́лiя Креста́ Твоего́, Го́споди, си́ла:/ водрузи́ся бо на ме́сте,/ и де́йствует в ми́ре, и показа́ от ры́барей апо́столы,/ и от язы́к му́ченики,// да мо́лятся о душа́х на́ших.

На 2. Стiх: Хвалúте Гóспода вси язы́цы, похвалúте Егó вси лю́дiе.

Стiхúра: Ве́лiя му́ченик Твои́х, Хрiсте́, си́ла:/ во гробе́х бо лежа́ще ду́хи прого́нят:/ и упраздни́ша вра́жию вла́сть,// ве́рою тро́ическою подви́гшеся по благоче́стiи.

Яко утвердúся мúлость Егó на нас,// и и҆́стина Госпóдня пребывáет во век.

Стiхúра: Проро́цы, и апо́столи Хрiсто́вы, и му́ченицы,/ научи́ша ны́ пе́ти Тро́ицу единосу́щную,/ и просвети́ша язы́ки прельще́ныя,// и прича́стники, а́нгелом сотвори́ша сы́ны челове́ческiя.

Слáва Ѻтцý и Сы́ну и Святóму Дýху.

Стiхúра прп. Евфúмiа, глас 6: Преподо́бне о́тче,/ во всю зе́млю изы́де веща́ние исправле́ний твои́х;/ тем на Небесе́х обре́л еси мзду трудо́в твои́х,/ де́монския погуби́л еси́ полки́,/ А́нгельския же пости́гл еси́ чи́ны,/ и́хже житию́ непоро́чно подража́л еси́,/ дерзнове́ние име́я ко Христу́ Бо́гу,// мир испроси́ душа́м на́шим.

И ны́не и прúсно и во вéки векóв, амúнь.

Догмáтик. Глас 3: Кáко не диви́мся/ Богомýжному Рождествý Твоемý, Пречестнáя?/ Искушéнiя бо мýжескаго не прiéмши, Всенепорóчная,/ родилá бо есѝ без Ѻтцá Сы́на плóтiю./ Прéжде век от Ѻтцá рождéннаго без мáтере,/ никáкоже претерпéвшаго изменéнiя,/ илѝ смешéнiя, илѝ разделéнiя,/ но обою́ существý свóйство цéло сохрáншаго./ Тéмже, Мáти Дéво Влады́чице,/ Тогó молѝ спасти́ся душáм,// правослáвно Богорóдицу исповéдающих Тя.

СВЕТЕ ТИХИЙ

Хор: Свéте Ти́хiй святы́я слáвы Безсмéртнаго Ѻтцá Небéснаго, Святáго, Блажéннаго, Iисýсе Хрїстè! Пришéдше на зáпад сóлнца, ви́девше свет вечéрнiй, поéм Ѻтцá, Сы́на и Святáго Дýха, Бóга. Достóин есѝ во вся временá пет бы́ти глáсы преподóбными, Сы́не Бóжiй, живóт дая́й; тéмже мiр Тя слáвит.

ПРОКИМЕН ВЕЧЕРА ПЯТНИЦЫ

Чтец: Прокíмен, глас седьмы́й, псалóм Давíдов. Бóже, застýпник мой есѝ Ты, и ми́лость Твоя́ предвари́т мя. (Пс.58:10Б-11А)

Хор: Бóже, застýпник мой есù Ты,/ и мúлость Твоя́ предварúт мя.

Чтец: Измѝ мя от враг мои́х, Бóже, и от востаю́щих на мя избáви мя. (Пс.58:2)

Хор: Бóже, застýпник мой есù Ты,/ и мúлость Твоя́ предварúт мя.

Чтец: Бóже, застýпник мой есѝ Ты.

Хор: И мúлость Твоя́ предварúт мя.

СПОДОБИ ГОСПОДИ

Хор: Сподóби, Гóсподи, в вéчер сей без грехá сохрани́тися нам./ Благословéн есѝ, Гóсподи Бóже ѻтéц нáших,/ и хвáльно и прослáвлено и҆́мя Твоé во вéки, ами́нь.

Бýди, Гóсподи, ми́лость Твоя́ на нас, я́коже уповáхом на Тя./ Благословéн есѝ, Гóсподи, научѝ мя оправдáнiем Твои́м./ Благословéн есѝ, Влады́ко, вразумѝ мя оправдáнiем Твои́м./ Благословéн есѝ, Святы́й, просветѝ мя оправдáнiи Твои́ми.

Гóсподи, ми́лость Твоя́ во век, дел рукý Твоéю не прéзри./ Тебè подобáет хвалá. Тебè подобáет пéнiе,/ Тебè слáва подобáет, Ѻтцý и Сы́ну и Святóму Дýху, ны́не и при́сно и во вéки векóв. Ами́нь.

Гóсподи, поми́луй. (40 раз)

Слáва Ѻтцý и Сыну и Святóму Дýху, и ны́не и при́сно и во вéки векóв, аминь.

СТИХИРЫ НА СТИХОВНЕ

Чтец (Стiхúры Октóиха, глас 3): Мýченицы Твоѝ, Гóсподи,/ вéрою утверди́вшеся,/ и надéждею укрéпльшеся,/ любóвiю Крестá Твоегó душéвне соедини́вшеся,/ врáжiе мучи́тельство разруши́ша,/ и улучи́ша венцы́:// со безплóтными мóлятся о душáх нáших.

Стiх: Блажéни, я́же избрáл и прiя́л есù Гóсподи.

Мéртвен: Все сýетiе человéческое,/ ели́ко не пребýдет по смéрти:/ не пребýдет богáтство, ни сни́дет слáва:/ нашéдши бо смерть, вся сiя́ погуби́т./ Тéмже Хрiстý безсмéртному Царю́ возопiи́м:/ престáвленныя от нас упокóй,// идéже всех есть веселя́щихся жили́ще у тебè.

Стiх: Дýши их во благúх водворя́тся.

Мéртвен: Человéцы, что всýе мятéмся?/ Путь крáток есть, и́мже течéм, дым есть житiè,/ пáра и персть и пéпел:/ вмáле явля́ется, и вскóре погибáет./ Тéмже Хрiстý безсмéртному Царю́ возопiи́м:/ престáвленныя от нас упокóй,// идéже всех есть веселя́щихся жили́ще у тебè.

Слáва Ѻтцý и Сы́ну и Святóму Дýху.

Стiхúра прп. Евфúмiа, глас 5: Преподóбне óтче,/ не дал есѝ сна твои́м очесéм,/ ни вéждом твои́м дремáнiя,/ дóндеже дýшу и тéло от страстéй свободи́л есѝ/ и себé уготóвал есѝ Дýха жили́ще;/ пришéд бо Хрiстóс со Отцéм, оби́телище в тебé сотворѝ,/ и Единосýщней Трóице угóдник был есѝ,// великопроповéдниче Евфи́мiе, моли́ся о душáх нáших.

И ны́не и прúсно и во вéки векóв, амúнь.

Богорóдичен вечéра пяткá, глас 5 (по глáсу «Слáвы»): Тебè мóлимся, я́ко Бóжiи Мáтери:/ Благословéнная, молѝ// о спасéнiи душ нáших.

Молитва святаго Симеона Богоприимца

Ны́не отпущáеши рабá Твоегó, Влады́ко,/ по глагóлу Твоемý, с ми́ром;/ я́ко ви́деста óчи моѝ спасéнiе Твоè,/ éже есѝ уготóвал пред лицéм всех людéй,/ свет во откровéнiе язы́ков,// и слáву людéй Твои́х Iзрáиля.

Трисвятое по Отче наш

Святы́й Бóже, Святый Крéпкiй, Святый Безсмéртный, поми́луй нас.(3 раза)

Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.

Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.

Гóсподи, поми́луй. (трúжды)

Слáва Ѻтцý и Сы́ну и Святóму Дýху, и ны́не и присно и во вéки векóв, аминь.

Ѻ́тче наш, И҆́же есѝ на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.

Гóсподи, Iисýсе Хрїстè, Сы́не Бóжiй, поми́луй нас. Ами́нь.

Тропáрь, глас 2: Апóстоли, мýченицы и прорóцы,/ святи́телiе, преподóбнiи и прáведнiи,/ дóбре пóдвиг соверши́вшiи и вéру соблю́дшiи,/ дерзновéнiе имýще ко Спáсу,/ о нас Тогó, я́ко Блáга, моли́те// спасти́ся, мóлимся, душáм нáшим.

Слáва Отцý и Сы́ну и Святóму Дýху.

Тропáрь, глас 2: Помянѝ, Гóсподи, я́ко Благ, рабы́ Твоя́,/ и ели́ка в житiѝ согреши́ша, простѝ:/ никтóже бо безгрéшен, тóкмо Ты,// могíй и престáвленным дáти покóй.

И ны́не и при́сно и во вéки векóв, ами́нь.

Богорóдичен, глас 2: Мáти Святáя Неизречéннаго Свéта,/ áнгельскими Тя пéсньми почитáюще,// благочéстно величáем.

Гóсподи поми́луй (40 раз)

Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.

Утвердѝ, Бóже, святýю правослáвную вéру, правослáвных хрїстiáн во век вéка.

Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.

Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.

Гóсподи, поми́луй. (3 рáза)

Гóсподи, благословѝ.

Гóсподи, Iисýсе Хрїстè, Сыне Бóжїй, моли́твами пречи́стыя Своея́ Мáтере, святы́х слáвных и всехвáльных Апóстол, святы́х и прáведных богоотéц Iоакíма и Áнны, и всех святы́х, поми́лует и спасéт нас, я́ко Благ и Человеколю́бец.

И глагóли ýтреню