Недeля 18 по Пятидесятнице. Преставление прп. Сергия игумена Радонежского, глас 1 ВЕЛИКАЯ ВЕЧЕРНЯ
8 октября́ 2023 гóда. Недéля 18 по Пятидеся́тнице. Преставлéнiе прп. Сéргiя, игýмена Рáдонежского, всея́ Россíи чудотвóрца. Глас 1. Всeнóщное бдéнiе для домáшнего (келéйнаго) совершéнiя состоúт из Велúкой вечéрни, ýтрени, тáже канóна и пéрвого чáса. Слýжба мiрскúм чúном.
ВЕЛИКАЯ ВЕЧЕРНЯ
Моли́твами святы́х отéц нáших, Гóсподи Iисýсе Хрїстè, Бóже наш, поми́луй нас, ами́нь.
Слáва Тебè, Бóже наш, слáва Тебè.
Царю́ Небéсный, Утéшителю, Дýше И҆́стины, И҆́же вездé сый и вся исполня́яй, Сокрóвище благи́х и жи́зни Подáтелю, прiиди́ и всели́ся в ны, и очи́сти ны от вся́кiя сквéрны, и спаси́, Блáже, Дýши нáша.
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжїй, поми́луй нас. Ами́нь.
Гóсподи, поми́луй, (12 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Пріиди́те, поклони́мся Царéви нáшему Бóгу.
Пріиди́те, поклони́мся и припадéм Хрїстý, Царéви нáшему Бóгу.
Пріиди́те, поклони́мся и припадéм Самомý Хрїстý, Царéви и Бóгу нáшему.
Псалом 103, предначинaтельный
Стiхù избрáннiи: Благословѝ, душé моя́, Гóспода./ Благословéн есѝ, Гóсподи./ Гóсподи, Бóже мой, возвели́чился еси́ зелó./ Благословéн есѝ, Гóсподи./ Во исповéданiе и в велелéпоту/ облéклся есѝ. Благословéн есѝ, Гóсподи./ Посредé гор прóйдут вóды./ Ди́вна делá Твоя́, Гóсподи./ Вся премýдростiю сотвори́л есѝ./ Слáва Ти, Гóсподи, сотвори́вшему вся.
[Псалом полностью]Благословѝ, душé моя, Гóспода. Гóсподи, Бóже мой, возвеличился есѝ зелó. Во исповéданiе и в велелéпоту облéклся есѝ. Одея́йся свéтом, яко ри́зою, простирáяй нéбо, яко кóжу. Покрывáяй водáми превы́спренняя Своя́, полагáяй óблаки на восхождéнiе Своé, ходя́й на крилý вéтреню. Творя́й Áнгелы Своя дýхи и слугѝ Своя плáмень óгненный. Основáяй зéмлю на твéрди ея́, не преклони́тся в век вéка. Бéздна, яко ри́за, одея́нiе ея́, на горáх стáнут вóды, от запрещéнiя Твоегó побéгнут, от глáса грóма Твоегó убоя́тся. Восхóдят гóры и нисхóдят поля́ в мéсто, éже основáл есѝ им. Предéл положи́л есѝ, eгóже не прéйдут, нижé обратя́тся покры́ти зéмлю. Посылáяй истóчники в дéбрех, посредé гор прóйдут вóды. Напая́ют вся звéри сéльныя, ждут онáгри в жáжду свою. На тых пти́цы небéсныя привитáют, от среды́ кáменiя дадя́т глас. Напая́яй гóры от превы́спренних Свои́х, от плодá дел Твоих насы́тится земля́. Прозябáяй травý скотóм, и злак на слýжбу человéком, известѝ хлеб от землѝ. И винó весели́т сéрдце человéка, умáстити лицé елéем, и хлеб сéрдце человéка укрепи́т. Насы́тятся древá польскáя, кéдри Лiвáнстiи, и҆́хже еси насади́л. Тáмо пти́цы вогнездя́тся, еродíево жили́ще предводи́тельствует и҆́ми. Гóры высóкiя елéнем, кáмень прибéжище зáяцем. Сотвори́л есть лунý во временá, сóлнце познá зáпад свой. Положи́л есѝ тму, и бысть нощь, в нéйже прóйдут вси звéрiе дубрáвнiи. Ски́мни рыкáющiи, восхи́тити и взыскáти от Бóга пи́щу себé. Возсiя́ сóлнце и собрáшася и в лóжах свои́х ля́гут. Изы́дет человéк на дéло своé и на дéланiе своé до вéчера. Яко возвели́чишася делá Твоя, Гóсподи, вся премýдростiю сотвори́л есѝ, испóлнися земля́ твáри Твоея́. Сié мóре вели́кое и прострáнное, тáмо гáди, и҆́мже несть числá, живóтная мáлая с вели́кими, тáмо кораблѝ преплáвают, змiй сей, eгóже создáл есѝ ругáтися eмý. Вся к Тебé чáют, дáти пи́щу им во блáго врéмя. Дáвшу Тебé им соберýт, отвéрзшу Тебé рýку вся́ческая испóлнятся блáгости, отврáщшу же Тебé лицé, возмятýтся, отъи́меши дух их, и исчéзнут, и в персть свою возвратя́тся. Пóслеши Дýха Твоегó, и сози́ждутся, и обнови́ши лицé землѝ. Бýди слáва Госпóдня во вéки, возвесели́тся Госпóдь о дéлех Свои́х, призирáяй на зéмлю, и творя́й ю́ трясти́ся, прикасáяйся горáм, и дымя́тся. Воспою́ Гóсподеви в животé моéм, пою́ Бóгу моемý, дóндеже есмь, да услади́тся Емý бесéда моя, аз же возвеселю́ся о Гóсподе. Да исчéзнут грéшницы от землѝ, и беззакóнницы, я́коже не бы́ти им. Благословѝ, душé моя́, Гóспода. Сóлнце познá зáпад свой. Положи́л еси тму, и бысть нощь. Яко возвели́чишася делá Твоя, Гóсподи, вся премýдростiю сотвори́л есѝ.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (12 раз)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Первая кафизма
Читáем кафíсму 1-ю лúбо 1-ю cтатiю(«Блажéн муж» - 1-й антiфóн.)
[Псалом 1]Блажéн муж, и҆́же не и҆́де на совéт нечести́вых и на путѝ грéшных не ста, и на седáлищи губи́телей не сéде, но в закóне Госпóдни вóля eгó, и в закóне Егó поучи́тся день и нощь. И бýдет яко дрéво насаждéнное при исхóдищих вод, éже плод свой даст во врéмя своé, и лист eгó не отпадéт, и вся, ели́ка áще твори́т, успéет. Не тáко нечести́вiи, не тáко, но яко прах, eгóже возметáет ветр от лицá землѝ. Сегó рáди не воскрéснут нечести́вiи на суд, нижé грéшницы в совéт прáведных. Яко весть Госпóдь путь прáведных, и путь нечести́вых поги́бнет.
[Псалом 2]Вскýю шатáшася язы́цы, и лю́дiе поучи́шася тщéтным? Предстáша цáрiе зéмстiи, и кня́зи собрáшася вкýпе на Гóспода и на Хрїстá Егó. Растóргнем ýзы их и отвéржем от нас и҆́го их. Живы́й на Небесéх посмеéтся им, и Госпóдь поругáется им. Тогдá возглагóлет к ним гнéвом свои́м и я́ростiю Своéю смятéт я́. Аз же постáвлен есмь Царь от Негó над Сióном, горóю святóю Егó, возвещáяй повелéнiе Госпóдне. Госпóдь речé ко Мне: Сын Мой еси Ты, Аз днесь роди́х Тя. Просѝ от Менé, и дам Ти язы́ки достоя́нiе Твоé, и одержáнiе Твоé концы́ землѝ. Упасéши я́ жезлóм желéзным, я́ко сосýды скудéльничи сокруши́ши я́. И ны́не, цáрiе, разумéйте, накажи́теся вси судя́щiи землѝ. Рабóтайте Гóсподеви со стрáхом и рáдуйтеся Емý с трéпетом. Прiими́те наказáнiе, да не когдá прогнéвается Госпóдь и поги́бнете от путѝ прáведнаго, егдá возгори́тся вскóре я́рость Егó. Блажéни вси надéющiися Нань.
[Псалом 3]Гóсподи, что ся умнóжиша стужáющiи ми? Мнóзи востаю́т на мя, мнóзи глагóлют душѝ моéй: несть спасéнiя eмý в Бóзе eгó. Ты же, Гóсподи, Застýпник мой есѝ, слáва моя́ и вознося́й главý мою́. Глáсом мои́м ко Гóсподу воззвáх, и услы́ша мя от горы́ святы́я Своея́. Аз уснýх, и спах, востáх, я́ко Госпóдь застýпит мя. Не убою́ся от тем людéй, óкрест напáдающих на мя. Воскреснѝ, Гóсподи, спасѝ мя, Бóже мой, я́ко Ты порази́л есѝ вся враждýющыя ми всýе: зýбы грéшников сокруши́л есѝ. Госпóдне есть спасéнiе, и на лю́дех Твои́х благословéнiе Твоé.
Лúбо поéм стiхù избрáннiи
БЛАЖЕН МУЖ
Чтец (или хор): Блажéн муж, и҆́же не и҆́де на совéт нечести́вых.
Хор: Аллилýїа, аллилýїа, аллилýїа.
Чтец (или хор): Яко весть Госпóдь путь прáведных, и путь нечести́вых поги́бнет.
Хор: Аллилýїа, аллилýїа, аллилýїа.
Чтец (или хор): Рабóтайте Гóсподеви со стрáхом и рáдуйтеся Емý с трéпетом.
Хор: Аллилýїа, аллилýїа, аллилýїа.
Чтец (или хор): Блажéни вси надéющiися Нань.
Хор: Аллилýїа, аллилýїа, аллилýїа.
Чтец (или хор): Воскреснѝ, Гóсподи, спасѝ мя, Бóже мой.
Хор: Аллилýїа, аллилýїа, аллилýїа.
Чтец (или хор): Госпóдне есть спасéнiе, и на лю́дех Твои́х благословéнiе Твоé.
Хор: Аллилýїа, аллилýїа, аллилýїа.
Чтец: Слáва Ѻтцý и Сы́ну и Святóму Дýху.
Хор: Аллилýїа, аллилýїа, аллилýїа.
Хор: И ны́не и при́сно и во вéки векóв, ами́нь.
Хор: Аллилýїа, аллилýїа, аллилýїа.
Аллилýїа, аллилýїа, аллилýїа, слáва Тебé Бóже. (трúжды)
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
ГОСПОДИ ВОЗЗВАХ, ГЛАС 1
Хор: Гóсподи, воззвáх к Тебè, услы́ши мя./ Услы́ши мя, Гóсподи./ Гóсподи, воззвáх к Тебè, услы́ши мя:/ вонми́ глáсу молéнія моегó,/ внегдá воззвáти ми к Тебè./ Услы́ши мя, Гóсподи.
Хор: Да испрáвится моли́тва моя́,/ я́ко кади́ло пред Тобóю,/ воздея́ніе рукý моéю/ - жéртва вечéрняя./ Услы́ши мя, Гóсподи.
[В приходской практике пропускается до стихир]Положѝ, Гóсподи, хранéнiе устóм мои́м, и дверь ограждéнiя о устнáх мои́х. Не уклонѝ сéрдце моé в словесá лукáвствiя, непщевáти вины́ о гресéх, с человéки дéлающими беззакóнiе, и не сочтýся со избрáнными их. Накáжет мя прáведник ми́лостiю и обличи́т мя, елéй же грéшнаго да не намáстит главы́ моея́, я́ко ещè и моли́тва моя́ во благоволéнiих их. Пожéрты бы́ша при кáмени судiѝ их: услы́шатся глагóли моѝ, я́ко возмогóша. Я́ко тóлща землѝ просéдеся на землѝ, расточи́шася кóсти и҆́х при áде. Я́ко к Тебè, Гóсподи, Гóсподи, óчи моѝ: на Тя уповáх, не отымѝ дýшу мою́. Сохранѝ мя от сéти, ю́же состáвиша ми, и от соблáзн дéлающих беззакóнiе. Падýт во мрéжу свою́ грéшницы: еди́н есмь аз, дóндеже прейдý.
[В приходской практике пропускается до стихир]Глáсом мои́м ко Гóсподу воззвáх, глáсом мои́м ко Гóсподу помоли́хся. Пролiю́ пред Ним молéнiе моè, печáль мою́ пред Ним возвещý. Внегдá исчезáти от менè дýху моемý: и Ты познáл есѝ стезѝ моя́: на путѝ сем, по немýже хождáх, скры́ша сеть мне. Смотря́х одеснýю и возгля́дах, и не бе знáяй менè: поги́бе бéгство от менè, и несть взыскáяй дýшу мою́. Воззвáх к Тебè, Гóсподи, рех: Ты есѝ уповáнiе моè, часть моя́ есѝ на землѝ живы́х. Вонмѝ молéнiю моемý, я́ко смири́хся зелó, избáви мя от гоня́щих мя, я́ко укрепи́шася пáче менè.
На 10 Чтец: Изведù из темнúцы дýшу мою́,// исповéдатися úмени Твоемý.
Стiхúры воскрéсные, глас 1: Вечéрнiя нáша моли́твы/ прiими́, Святы́й Гóсподи,/ и подáждь нам оставлéнiе грехóв,/ я́ко Еди́н еси́// явлéй в мíре Воскресéнiе.
Менè ждут прáведницы,// дóндеже воздáси мне.
Стiхúра: Обыди́те лю́дiе Сióн,/ и обыми́те Егó,/ и дади́те слáву в нем Воскрéсшему из мéртвых:/ я́ко Той есть Бог наш,// Избавлéй нас от беззакóнiй нáших.
На 8. Стiх: Из глубины́ воззвáх к Тебè, Гóсподи,// Гóсподи, услы́ши глас мой.
Стiхúра: Прiиди́те лю́дiе,/ воспои́м, и поклони́мся Хрїстý,/ слáвяще Егó из мéртвых Воскресéнiе:/ я́ко Той есть Бог наш,// от прéлести врáжiя мiр избавлéй.
Да бýдут ýши Твоù// внéмлюще глáсу молéнiя моегó.
И҆́ны стiхúры анатóлiевы: Весели́теся Небесá,/ воструби́те основáнiя земли́,/ возопíйте гóры весéлiе:/ се бо Емманýил грехи́ нáша на Крестé пригвозди́,/ и живóт дая́й, смерть умертви́,// Адáма Воскреси́вый, я́ко Человеколю́бец.
На 6. Стiх: Áще беззакóнiя нáзриши, Гóсподи, Гóсподи, кто постоúт?// Яко у Тебè очищéнiе есть.
Стiхúры прп. Сéргiя, глас 6: Ми́ра мятéж, преподóбне, остáвив/ и взем крест твой,/ послéдовал еси́ Хрiстý/ невозврáтным пóмыслом,/ и в пусты́ню всели́лся еси́, преподóбне,/ душéвныя стрáсти из кóрене исторгáя/ и телéсная чýвства огорчевáя,/ и чáстыми бдéнiи и моли́твами/ благодáть воспрiя́л еси́, преподóбне,/ цели́ти разли́чныя недýги,/ Áнгелов собесéдниче и преподóбных сожи́телю;/ моли́ся Гóсподу, Сéргiе преподóбне,// поми́ловатися душáм нáшим.
И҆́мене рáди Твоегó потерпéх Тя, Гóсподи, потерпè душá моя́ в слóво Твоè,// уповá душá моя на Гóспода.
Стiхúра: Преподóбне óтче,/ кто исповéсть труды́ твоя́ и болéзни?/ Или́ кiй язык изречéт жестóкое твоé житié,/ бдéнiе же, и сухоядéнiе,/ и éже на земли́ легáнiе,/ чистотý душéвную и телéсную,/ устнáми и умóм совершéнное безмóлвiе,/ смирéнiе же нелицемéрное,/ моли́твы непрестáнныя и разсуждéнiе доброразсýдное,/ хýдость ри́зную и пáмять смéртную?/ Сéргiе, óтче наш,// моли́ спасти́ся душáм нáшим.
На 4. Стiх: От стрáжи ýтреннiя до нóщи, от стрáжи ýтреннiя,// да уповáет Iзрáиль на Гóспода.
Стiхúра: Преподóбне óтче Сéргiе,/ ты врач душ и телéс яви́лся еси́,/ источáя недýжным исцелéнiя струи́,/ дáром же прорóчествiя укрáшен,/ прорицáя, я́ко настоя́щая, бýдущая:/ моли́твою бо кня́зя вооружи́в вáрвары победи́ти,/ хвáлящияся отéчество егó разори́ти/ но самéх богопоражéнною я́звою/ трýпiя достóйно падóша// псалóмски при áде, преподóбне.
Яко у Гóспода мúлость, и мнóгое у Негó избавлéнiе,// и Той избáвит Iзрáиля от всех беззакóнiй eгó.
Стiхúра: Богомýдре Сéргiе,/ слáву маловрéменную остáвль,/ и в пусты́нях и горáх/ ты живы́й яви́лся еси́,/ и Трóицы чи́стый дом,/ блажéнне, был еси́,/ Ея́же си́лою пресвяты́я хрáмы воздви́г,/ и огрáды монáшествующим во спасéнiе создáл еси́;/ живя́ше же в тебé Хрiстóс Бог наш,/ Егóже от ю́ности возжелéл еси́./ Тогó моли́, Сéргiе преподóбне,// спасти́ся душáм нáшим.
На 2. Стiх: Хвалúте Гóспода вси язы́цы, похвалúте Егó вси лю́дiе.
Стiхúры прп. Сéргiя, глас 2: Терпя́ ны́нешняя мýжественно,/ веселя́ся бýдущими,/ ко всем глагóлал еси́, преподóбне Сéргiе:/ егдá ýбо тýне подвизáемся,/ но вéчнаго животá чáюще получи́ти?/ Лю́ты скóрби, но слáдок рай,/ болéзненны труды́, но присносýщно воспрiя́тiе./ Не облени́мся ýбо, о пóстницы! Мáло стерпи́м,/ да венцы́ нетлéнными увязéмся,// от Хрiстá, Бóга и Спáса душ нáших.
Яко утвердúся мúлость Егó на нас,// и и҆́стина Госпóдня пребывáет во век.
Стiхúра: Зря, я́ко наслаждéнiе, скóрби,/ шéствуя тéсным путéм,/ ко ученикóм твои́м глагóлал еси́, преблажéнне Сéргiе:/ не устраши́мся пóдвига пóстнаго,/ да стрáшнаго геéнскаго мучéнiя избéгнем,/ согбéнне бýдут рýце,/ да простирáются же к Бóгу,/ нóзе же утверждéны/ на моли́тве предстоя́ти,/ не пощади́м естествá тлéннаго, извóлим пóдвиг,/ да венцы́ побéдными увязéмся// от Хрiстá, Бóга и Спáса душ нáших.
Слáва Отцý и Сыну и Святóму Дýху.
Глас 2: Éже по óбразу соблю́д невреди́мо,/ ум влады́ку над страстьми́ пáгубными пóстнически постáвив,/ во éже по подóбiю, я́ко мóщно, возшéл еси́:/ мýжески бо естествó понýдив,/ потщáлся еси́ хýждшее покори́ти лýчшему/ и плоть порабóтити дýху;/ тéмже монáшествующих яви́лся еси́ верх,/ жи́тель пусты́нный, благотекýщих обучи́тель,/ прáвило добродéтели извéстнейшее;/ и ны́не на Небесéх, зерцáлом разрéшшимся,/ óтче наш Сéргiе,/ чи́сте зри́ши Святýю Трóицу,/ моля́ся несрéдственне// о и́же вéрою и любóвiю чтýщих тя.
И ны́не и прúсно и во вéки векóв, амúнь.
Догмáтик. Глас 1: Всемíрную слáву,/ от человéк Прозя́бшую,/ и Влады́ку Рóждшую,/ Небéсную Дверь,/ воспои́м Марíю Дéву,/ Безплóтных песнь, и вéрных удобрéнiе:/ Сiя́ бо яви́ся Нéбо, и Храм Божествá:/ Сiя́ преграждéнiе вражды́ разруши́вши,/ мiр введé, и Цáрствiе отвéрзе./ Сiю́ ýбо имýще вéры Утверждéнiе,/ Побóрника и́мамы из Нея́ Рóждшагося Гóспода./ Дерзáйте ýбо, дерзáйте лю́дiе Бóжiи:// и́бо Той победи́т враги́, я́ко Всеси́лен.
СВЕТЕ ТИХИЙ
Хор: Свéте Ти́хiй святы́я слáвы Безсмéртнаго Ѻтцá Небéснаго, Святáго, Блажéннаго, Iисýсе Хрїстè! Пришéдше на зáпад сóлнца, ви́девше свет вечéрнiй, поéм Ѻтцá, Сы́на и Святáго Дýха, Бóга. Достóин есѝ во вся временá пет бы́ти глáсы преподóбными, Сы́не Бóжiй, живóт дая́й; тéмже мiр Тя слáвит.
ПРОКИМЕН ВОСКРЕСНЫЙ
Чтец: Прокíмен, глас шесты́й: Госпóдь воцари́ся, в лéпоту облечéся.
Хор: Госпóдь воцарúся,/ в лéпоту облечéся. (Пс.92:1А)
Чтец: Облечéся Госпóдь в си́лу и препоя́сася. (Пс.92:1Б)
Хор: Госпóдь воцарúся,/ в лéпоту облечéся.
Чтец: И҆́бо утверди́ вселéнную, я́же не подви́жится. (Пс.92:1В)
Хор: Госпóдь воцарúся,/ в лéпоту облечéся.
Чтец: Дóму Твоемý подобáет святы́ня, Гóсподи, в долготý днiй.(Пс.92:2Б)
Хор: Госпóдь воцарúся,/ в лéпоту облечéся.
Чтец: Госпóдь воцари́ся.
Хор: В лéпоту облечéся.
ПАРЕМИИ
Чтец: При́тчей чтéнiе.
(Из глав 10, 3 и 8) Пáмять прáведнаго с похвалáми, и благословéнiе Госпóдне на главé егó. Блажéн человéк, и́же обрéте премýдрость, и смéртен, и́же увéде рáзум. Лýчше бо сiю́ куповáти, нéжели злáта и сребрá сокрóвища. Честнéйшая же есть кáменiй многоцéнных, все же честнóе недостóйно ея́ есть. Долготá бо дней и лéта животá в десни́це ея́, в шýйце же ея́ богáтство и слáва. От уст ея́ исхóдит прáвда, закóн же и ми́лость на язы́це нóсит. Послýшайте ýбо менé, о чáда, честнáя бо рекý, и блажéн человéк, и́же пути моя́ сохрани́т. Исхóди бо мои́ - исхóди животá, и уготовля́ется хотéнiе от Гóспода. Сегó рáди молю́ вас и предлагáю мой глас сыновóм человéческим: я́ко аз, премýдрость, устрóих совéт, и рáзум и смысл аз призвáх. Мой совéт и утверждéнiе, мой рáзум, моя́ же крéпость. Аз менé лю́бящiя люблю́, и́щущiи же менé обря́щут благодáть. Разумéйте ýбо, незлóбивiи, ковáрство, ненакáзаннiи же, прилагáйте сердцá. Послýшайте менé и пáки, честнáя бо рекý, и отвéрзу от устéн прáвая, я́ко и́стине поучи́тся гортáнь мой, мéрзки же предо мнóю устны́ лжи́выя. С прáвдою вси глагóлы уст мои́х, ничтóже в них стрóпотно, нижé развращéнно. Вся прáва суть разумевáющим и прóста обретáющим рáзум. Научáю бо вас и́стине, да бýдет о Гóсподе надéжда вáша, и испóлнитеся Дýха.
[Синодальный перевод]Память праведника пребудет благословенна, и благословения - на голове его. Блажен человек, который снискал мудрость, и человек, который приобрел разум, - потому что приобретение её лучше приобретения серебра, и прибыли от неё больше, нежели от золота: она дороже драгоценных камней, и ничто из желаемого тобою не сравнится с нею. Долгоденствие - в правой руке её, а в левой у неё - богатство и слава; из уст её выходит правда; закон и милость она на языке носит. Слушайте меня, дети, потому что я буду говорить важное: Блажен человек, который слушает меня, потому что, кто нашел меня, тот нашел жизнь, и получит благодать от Господа. К вам, люди, взываю я, и к сынам человеческим голос мой! Я, премудрость, обитаю с разумом и ищу рассудительного знания. У меня совет и правда; я разум, у меня сила. Любящих меня я люблю, и ищущие меня найдут меня. Научитесь, неразумные, благоразумию, и глупые - разуму. Слушайте, потому что я буду говорить важное, и изречение уст моих - правда; ибо истину произнесет язык мой, и нечестие - мерзость для уст моих; все слова уст моих справедливы; нет в них коварства и лукавства; все они ясны для разумного и справедливы для приобретших знание. Ибо я учу вас истинному, чтобы была в Господе надежда ваша, и вы исполнились Духа.(Притч.10:7А, 5 А; 3:13-16; 8:6, 34А, 35, 4, 12, 14, 17, 5-9)
Чтец: При́тчей чтéнiе.
(Из глав 10 и 11): Устá прáведнаго кáплют премýдрость, язы́к же непрáведнаго поги́бнет. Устнé мужéй прáведных кáплют благодáти, устá же нечести́вых развращáются. Мéрила льсти́вая - мéрзость пред Гóсподем, вес же прáведный прiя́тен Емý. Идéже áще вни́дет досаждéнiе, тáмо и безчéстiе, устá же смирéнных поучáются премýдрости. Совершéнiе прáвых настáвит их и поползновéнiе отрицáющихся упасéт их. Не пóльзуют имéнiя в день я́рости, прáвда же избáвит от смéрти. У́мер прáведный, остáви раскáянiе, нарýчна же бывáет и посмея́тельна нечести́вых пáгуба. Прáвда непорóчнаго исправля́ет пути́, в нечéстiе же пáдает непрáвда. Прáвда мужéй прáвых избáвит их, безсовéтiем же пленя́ются беззакóннiи. Скончáвшуся мýжу прáведну, не поги́бнет надéжда, похвалá же нечести́вых поги́бнет. Прáведник от лóва убéгнет, в негóже мéсто предаéтся нечести́вый. Во устéх нечести́вых сеть грáжданом, чýвство же прáведных благоспéшное. Во благи́х прáведных испрáвится град, и в поги́бели нечести́вых рáдованiе. Во благословéнiи прáвых возвы́сится град, усты́ же нечести́вых раскопáется. Ругáется грáжданом лишéнный рáзума, муж же мýдрый безмóлвiе вóдит.
[Синодальный перевод]Уста праведника источают мудрость, а язык зловредный отсечется. Уста праведного знают благоприятное, а уста нечестивых - развращенное. Неверные весы - мерзость пред Господом, но правильный вес угоден Ему. Придет гордость, придет и посрамление; но со смиренными - мудрость. [Праведник, умирая, оставляет сожаление; но внезапна и радостна бывает погибель нечестивых.] Непорочность прямодушных будет руководить их, а лукавство коварных погубит их. Не поможет богатство в день гнева, правда же спасет от смерти. Правда непорочного уравнивает путь его, а нечестивый падет от нечестия своего. Правда прямодушных спасет их, а беззаконники будут уловлены беззаконием своим. Со смертью человека нечестивого исчезает надежда, и ожидание беззаконных погибает. Праведник спасается от беды, а вместо него попадает в нее нечестивый. Устами лицемер губит ближнего своего, но праведники прозорливостью спасаются. При благоденствии праведников веселится город, и при погибели нечестивых бывает торжество. Благословением праведных возвышается город, а устами нечестивых разрушается. Скудоумный высказывает презрение к ближнему своему; но разумный человек молчит.(Притч.10:31-11:12)
Чтец: Премýдрости Соломóни чтéнiе.
(Из главы 3) Прáведных дýши в руцé Бóжiей, и не прикóснется их мýка. Непщевáни бы́ша во очесéх безýмных умрéти, и вмени́ся озлоблéнiе исхóд их. И éже от нас шéствiе сокрушéнiе, они́ же суть в ми́ре. И҆́бо пред лицéм человéческим, áще и мýку прiи́мут, уповáнiе их безсмéртiя испóлнено. И в мáле накáзани бы́вше, вели́кими благодéтельствовани бýдут: я́ко Бог искуси́ я́, и обрéте их достóйны Себé. Я́ко злáто в горни́ле искуси́ их: и я́ко всеплóдiе жéртвенное прiя́т я́. И во врéмя посещéнiя их возсiя́ют, и я́ко и́скры по стéблiю потекýт. Сýдят язы́ком и обладáют людьми́, и воцари́тся Госпóдь в них во вéки. Надéющiися Нань разумéют и҆́стину, и вéрнiи в любви́ пребýдут Емý. Я́ко благодáть и ми́лость в преподóбных Егó, и посещéнiе во избрáнных Егó.
[Синодальный перевод]Души праведных в руке Божией, и мучение не коснется их. В глазах неразумных они казались умершими, и исход их считался погибелью, и отшествие от нас - уничтожением; но они пребывают в мире. Ибо, хотя они в глазах людей и наказываются, но надежда их полна бессмертия. И немного наказанные, они будут много облагодетельствованы, потому что Бог испытал их и нашел их достойными Его. Он испытал их как золото в горниле и принял их как жертву всесовершенную. Во время воздаяния им они воссияют как искры, бегущие по стеблю. Будут судить племена и владычествовать над народами, а над ними будет Господь царствовать вовеки. Надеющиеся на Него познают истину, и верные в любви пребудут у Него; ибо благодать и милость со святыми Его и промышление об избранных Его. (Прем.3:1-9)
Гóсподи, поми́луй. (40 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
СПОДОБИ ГОСПОДИ
Хор: Сподóби, Гóсподи, в вéчер сей без грехá сохрани́тися нам./ Благословéн есѝ, Гóсподи Бóже ѻтéц нáших,/ и хвáльно и прослáвлено и҆́мя Твоé во вéки, ами́нь.
Бýди, Гóсподи, ми́лость Твоя́ на нас, я́коже уповáхом на Тя./ Благословéн есѝ, Гóсподи, научѝ мя оправдáнiем Твои́м./ Благословéн есѝ, Влады́ко, вразумѝ мя оправдáнiем Твои́м./ Благословéн есѝ, Святы́й, просветѝ мя оправдáнiи Твои́ми.
Гóсподи, ми́лость Твоя́ во век, дел рукý Твоéю не прéзри./ Тебé подобáет хвалá. Тебé подобáет пéнiе,/ Тебé слáва подобáет, Ѻтцý и Сы́ну и Святóму Дýху, ны́не и при́сно и во вéки векóв. Ами́нь.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
ЛИТИЯ
Стiхúры прп. Сéргiя, глас 6: Прiиди́те, празднолю́бцы/ и пóстников сослóвiе,/ ве́рою соше́дшеся,/ и́стиннаго пóстника почти́м днесь, Се́ргiя,/ с весе́лiем ше́ствовавшаго по стопáм Влады́ки своегó/ ýзкiй путь и безстрáстную жизнь,/ и ве́рою возопiи́м:/ о всеблаже́нне, преподóбных сожи́телю/ и пóстников похвалó!/ О нас моли́ся ко Гóсподу,// поми́ловатися душáм нáшим.
Преподóбне и богонóсе Се́ргiе,/ любве́ рáди Хрiстóвы вся остáвил еси́/ и, в пусты́ню вшед,/ никáкоже убоя́лся еси́ неви́димых врагóв ковáрствiя,/ áще бо и мнóгажды прiидóша на тя,/ скрежетáнiем зýбным я́рость показýюще,/ ты же моли́твами твои́ми,/ я́ко дым, без ве́сти сих сотвори́л еси́./ О непорóчныя твоея́ души́/ и кре́пкаго терпе́нiя твоегó!/ Хрiстá непрестáнно моли́,// спасти́ся душáм нáшим.
Росси́йская ýбо всеосвящéнная и вели́кая Цéрковь/ с правослáвными собóры, монáхи же и просты́ми,/ евáнгельских истóчников струя́ми напои́вшеся,/ духóвно весели́мся/ в нарóчитом прáзднице дóбраго пáстыря и учи́теля,/ и целéбныя егó мóщи, обстоя́ще, любéзно облобызáем,/ и сих, я́ко цвéты, пéсньми и хвалáми увязéм, рекýще:/ рáдуйся, Сéргiе блажéнне,/ Небéсный человéче, земны́й Áнгеле/ и Дýха Святáго оби́тель;/ рáдуйся, я́ко мнóгих ко спасéнному пути́ настáвил еси́;/ рáдуйся, правослáвному вóинству нáшему похвалá и утверждéнiе,/ преподóбне Сéргiе богопрiя́тне,/ Отéчеству твоемý пресвéтлый свети́льниче// и моли́твенниче о душáх нáших.
Слáва Ѻтцý и Сы́ну и Святóму Дýху.
Стiхúра прп. Сéргiя, глас 6: Прiиди́те, монáшествующих мнóжество, днесь,/ Сéргiя, благочéстiя подражáтеля,/ пéсньми и пéньми восхвáлим/ и честнýю егó и многоцелéбную рáку, обстоя́ще,/ любéзно облобызáем, глагóлюще:/ рáдуйся, преслáвне Сéргiе,/ Отéчеству твоемý пресвéтлый свети́льниче;/ рáдуйся, я́ко чи́сте чистéйшему Свéту совокупи́вся;/ рáдуйся, я́ко Трóице предстои́ши со Áнгелы,/ Ю́же непрестáнно моли́// даровáти душáм нáшим вéлiю ми́ лость.
И ны́не и прúсно и во вéки векóв, амúнь.
Богорóдичен воскрéсен, глас 6 (по глáсу «Слáвы»): Творéц и Избáвитель мой Пречи́стая,/ Хрїстóс Госпóдь из Твои́х ложéсн прошéд,/ в мя оболкíйся,/ пéрвыя кля́твы Адáма свободи́./ Тéмже Ти Всечи́стая,/ я́ко Бóжiи Мáтери же и Дéве,/ вои́стинну вопiéм немóлчно:/ рáдуйся áнгельски, рáдуйся Влады́чице,/ предстáтельство и покрóве,// и спасéнiе душ нáших.
Гóсподи, поми́луй. (40 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
СТИХИРЫ НА СТИХОВНЕ
Чтец (Стiхúры воскрéсные, глас 1): Стрáстiю Твоéю, Хрїстé,/ от страстéй свободи́хомся,/ и воскресéнiем Твои́м из истлéнiя избáвихомся,// Гóсподи, слáва Тебé.
Стiх: Госпóдь воцарúся, в лéпоту облечéся.
И҆́ны по алфавúту, глас 1: Да рáдуется тварь, небесá да веселя́тся,/ рукáми да восплéщут язы́цы с весéлiем:/ Хрїстóс бо Спас наш, на Крестé пригвозди́ грехи́ нáша:/ и смерть умертви́в, живóт нам даровá,/ пáдшаго Адáма всерóднаго Воскреси́вый,// я́ко Человеколю́бец.
Стiх: И҆́бо утвердù вселéнную,/ я́же не подвúжется.
Царь сый небесé и земли́ непостижи́ме,/ вóлею распя́лся еси́ за человеколю́бiе./ Егóже ад срет дóле, огорчи́ся,/ и прáведных дýши прiéмша, возрáдовашася:/ Адáм же, ви́дев Тя, Зижди́теля в преиспóдних, воскрéсе./ О чудесé! Кáко смéрти вкуси́ всех жизнь;/ но я́коже восхотé мiр просвети́ти зовýщiй и глагóлющiй:// Воскресы́й из мéртвых, Гóсподи, слáва Тебé.
Стiх: Дóму Твоемý подобáет святы́ня, Гóсподи,/ в долготý днiй.
Жены́ миронóсицы, ми́ра нося́ща,/ со тщáнiем и рыдáнiем грóба Твоегó достигóша,/ и не обрéтша Пречи́стаго Тéла Твоегó,/ от Áнгела же увéдевша нóвое и преслáвное чýдо,/ Апóстолом глагóлаху:/ воскрéсе Госпóдь,// подая́ мíрови вéлiю ми́лость.
Слáва Ѻтцý и Сы́ну и Святóму Дýху.
Стихúра прп. Сéргiя, глас 8: Монáхов мнóжества/ настáвника тя почитáем, óтче наш Сéргiе,/ твоéю бо стезéю вои́стину прáво ходи́ти познáхом./ Блажéн еси́, Хрiстý рабóтав,/ и врáжiю обличи́л еси́ си́лу,/ Áнгелов собесéдниче и преподóбных сопричáстниче и прáведных,/ с ни́миже моли́ся Гóсподеви,// поми́ловатися душáм нáшим.
И ны́не и прúсно и во вéки векóв, амúнь.
Богорóдичен воскрéсен, глас 8 (по глáсу «Слáвы»): Безневéстная Дéво,/ Я́же Бóга неизречéнно зачéнши плóтiю,/ Мáти Бóга Вы́шняго,/ Твои́х рабóв мольбы́ прiими́, Всенепорóчная,/ всем подаю́щи очищéнiе прегрешéнiй:/ ны́не нáша молéнiя прiéмлющи,// моли́ спасти́ся всем нам.
Молитва святаго Симеона Богоприимца
Ны́не отпущáеши рабá Твоегó, Влады́ко,/ по глагóлу Твоемý, с ми́ром;/ я́ко ви́деста óчи моѝ спасéнiе Твоè,/ éже есѝ уготóвал пред лицéм всех людéй,/ свет во откровéнiе язы́ков,// и слáву людéй Твои́х Iзрáиля.
Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжiй, поми́луй нас. Ами́нь.
Тропáрь, глас 4: Богорóдице Дéво, рáдуйся,/ Благодáтная Марíе, Госпóдь с Тобóю:/ благословéна Ты в женáх/ и благословéн Плод чрéва Твоегó,// яко Спáса родилá есѝ душ нáших. (Двáжды)
Тропáрь прп. Сéргiя, глас 4: И́же добродéтелей подви́жник,/ я́ко и́стинный вóин Хрiстá Бóга,/ на стрáсти вельми́ подвизáлся еси́ в жи́зни врéменней,/ в пéнiих, бдéнiих же и пощéнiих óбраз быв твои́м ученикóм,/ тéмже и всели́ся в тя Пресвяты́й Дух,/ Егóже дéйствiем свéтло укрáшен еси́;/ но, я́ко имéя дерзновéнiе ко Святéй Трóице,/ поминáй стáдо, éже собрáл еси́, мýдре,/ и не забýди, я́коже обещáлся еси́,/ посещáя чад твои́х,// Сéргiе, преподóбне óтче наш.
Бýди и҆́мя Госпóдне благословéно от ны́не и до вéка. (Трúжды)
Псалом 33
Благословлю́ Гóспода на вся́кое врéмя,/ вы́ну хвалá Егó во устéх мои́х./ О Гóсподе похвáлится душá моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм и҆́мя Егó вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицá вáша не постыдя́тся./ Сей ни́щiй воззвá, и Госпóдь услы́ша и҆̀,/ и от всех скорбéй егó спасè и҆̀./ Ополчи́тся Áнгел Госпóдень óкрест боя́щихся Егó,/ и избáвит их./ Вкуси́те и ви́дите, я́ко благ Госпóдь;/ блажéн муж, и҆́же уповáет нань./ Бóйтеся Гóспода, вси святíи Егó,/ яко несть лишéнiя боя́щымся Егó./ Богáтiи обнищáша и взалкáша,/ взыскáющiи же Гóспода не лишáтся вся́каго блáга.[В приходской практитке пропускается]/ Прiиди́те, чáда, послýшайте менé,/ стрáху Госпóдню научý вас./ Кто есть человéк хотя́й живóт,/ любя́й дни ви́дети блáги;/ Удержѝ язык твой от зла,/ и устнé твоѝ, éже не глагóлати льсти./ Уклони́ся от зла и сотворѝ блáго,/ взыщѝ ми́ра, и поженѝ и҆̀./ Óчи Госпóдни на прáведныя,/ и ýши Егó в моли́тву их./ Лицé же Госпóдне на творя́щiя злáя,/ еже потреби́ти от землѝ пáмять их./ Воззвáша прáведнiи, и Госпóдь услы́ша их,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я́ Госпóдь./ Храни́т Госпóдь вся кóсти их,/ ни еди́на от них сокруши́тся./ Смерть грéшников лютá,/ и ненави́дящiи прáведнаго прегрешáт./ Избáвит Госпóдь дýши раб Своих,/ и не прегрешáт вси уповáющiи на Негó.
И глаголи ýтреню