Усекновение главы Пророка, Предтечи и Крестителя Господня Иоанна. ВСЕНОЩНОЕ БДЕНИЕ. ВЕЛИКАЯ ВЕЧЕРНЯ
11 сентября́ 2023 гóда. Понедéльник 15-й седмúцы по Пятидеся́тнице. Усекновéнiе честны́я главы́ честнáго слáвнаго Прорóка, Предтéчи и Крестúтеля Госпóдня Iоáнна. Глас 5. Всeнóщное бдéнiе для домáшнего (келéйнаго) совершéнiя состоúт из Велúкой вечéрни, ýтрени, тáже канóна и пéрвого чáса. Слýжба мiрскúм чúном.
ВЕЛИКАЯ ВЕЧЕРНЯ
Моли́твами святы́х отéц нáших, Гóсподи Iисýсе Хрїстè, Бóже наш, поми́луй нас, ами́нь.
Слáва Тебè, Бóже наш, слáва Тебè.
Царю́ Небéсный, Утéшителю, Дýше И҆́стины, И҆́же вездé сый и вся исполня́яй, Сокрóвище благи́х и жи́зни Подáтелю, прiиди́ и всели́ся в ны, и очи́сти ны от вся́кiя сквéрны, и спаси́, Блáже, Дýши нáша.
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжїй, поми́луй нас. Ами́нь.
Гóсподи, поми́луй, (12 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Пріиди́те, поклони́мся Царéви нáшему Бóгу.
Пріиди́те, поклони́мся и припадéм Хрїстý, Царéви нáшему Бóгу.
Пріиди́те, поклони́мся и припадéм Самомý Хрїстý, Царéви и Бóгу нáшему.
Псалом 103, предначинaтельный
Стiхù избрáннiи: Благословѝ, душé моя́, Гóспода./ Благословéн есѝ, Гóсподи./ Гóсподи, Бóже мой, возвели́чился еси́ зелó./ Благословéн есѝ, Гóсподи./ Во исповéданiе и в велелéпоту/ облéклся есѝ. Благословéн есѝ, Гóсподи./ Посредé гор прóйдут вóды./ Ди́вна делá Твоя́, Гóсподи./ Вся премýдростiю сотвори́л есѝ./ Слáва Ти, Гóсподи, сотвори́вшему вся.
[Псалом полностью]Благословѝ, душé моя, Гóспода. Гóсподи, Бóже мой, возвеличился есѝ зелó. Во исповéданiе и в велелéпоту облéклся есѝ. Одея́йся свéтом, яко ри́зою, простирáяй нéбо, яко кóжу. Покрывáяй водáми превы́спренняя Своя́, полагáяй óблаки на восхождéнiе Своé, ходя́й на крилý вéтреню. Творя́й Áнгелы Своя дýхи и слугѝ Своя плáмень óгненный. Основáяй зéмлю на твéрди ея́, не преклони́тся в век вéка. Бéздна, яко ри́за, одея́нiе ея́, на горáх стáнут вóды, от запрещéнiя Твоегó побéгнут, от глáса грóма Твоегó убоя́тся. Восхóдят гóры и нисхóдят поля́ в мéсто, éже основáл есѝ им. Предéл положи́л есѝ, eгóже не прéйдут, нижé обратя́тся покры́ти зéмлю. Посылáяй истóчники в дéбрех, посредé гор прóйдут вóды. Напая́ют вся звéри сéльныя, ждут онáгри в жáжду свою. На тых пти́цы небéсныя привитáют, от среды́ кáменiя дадя́т глас. Напая́яй гóры от превы́спренних Свои́х, от плодá дел Твоих насы́тится земля́. Прозябáяй травý скотóм, и злак на слýжбу человéком, известѝ хлеб от землѝ. И винó весели́т сéрдце человéка, умáстити лицé елéем, и хлеб сéрдце человéка укрепи́т. Насы́тятся древá польскáя, кéдри Лiвáнстiи, и҆́хже еси насади́л. Тáмо пти́цы вогнездя́тся, еродíево жили́ще предводи́тельствует и҆́ми. Гóры высóкiя елéнем, кáмень прибéжище зáяцем. Сотвори́л есть лунý во временá, сóлнце познá зáпад свой. Положи́л есѝ тму, и бысть нощь, в нéйже прóйдут вси звéрiе дубрáвнiи. Ски́мни рыкáющiи, восхи́тити и взыскáти от Бóга пи́щу себé. Возсiя́ сóлнце и собрáшася и в лóжах свои́х ля́гут. Изы́дет человéк на дéло своé и на дéланiе своé до вéчера. Яко возвели́чишася делá Твоя, Гóсподи, вся премýдростiю сотвори́л есѝ, испóлнися земля́ твáри Твоея́. Сié мóре вели́кое и прострáнное, тáмо гáди, и҆́мже несть числá, живóтная мáлая с вели́кими, тáмо кораблѝ преплáвают, змiй сей, eгóже создáл есѝ ругáтися eмý. Вся к Тебé чáют, дáти пи́щу им во блáго врéмя. Дáвшу Тебé им соберýт, отвéрзшу Тебé рýку вся́ческая испóлнятся блáгости, отврáщшу же Тебé лицé, возмятýтся, отъи́меши дух их, и исчéзнут, и в персть свою возвратя́тся. Пóслеши Дýха Твоегó, и сози́ждутся, и обнови́ши лицé землѝ. Бýди слáва Госпóдня во вéки, возвесели́тся Госпóдь о дéлех Свои́х, призирáяй на зéмлю, и творя́й ю́ трясти́ся, прикасáяйся горáм, и дымя́тся. Воспою́ Гóсподеви в животé моéм, пою́ Бóгу моемý, дóндеже есмь, да услади́тся Емý бесéда моя, аз же возвеселю́ся о Гóсподе. Да исчéзнут грéшницы от землѝ, и беззакóнницы, я́коже не бы́ти им. Благословѝ, душé моя́, Гóспода. Сóлнце познá зáпад свой. Положи́л еси тму, и бысть нощь. Яко возвели́чишася делá Твоя, Гóсподи, вся премýдростiю сотвори́л есѝ.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 раза)
Гóсподи, поми́луй. (12 раз)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Первая кафизма
(«Блажéн муж» - 1-й антiфóн.)
[Псалом 1]Блажéн муж, и҆́же не и҆́де на совéт нечести́вых и на путѝ грéшных не ста, и на седáлищи губи́телей не сéде, но в закóне Госпóдни вóля eгó, и в закóне Егó поучи́тся день и нощь. И бýдет яко дрéво насаждéнное при исхóдищих вод, éже плод свой даст во врéмя своé, и лист eгó не отпадéт, и вся, ели́ка áще твори́т, успéет. Не тáко нечести́вiи, не тáко, но яко прах, eгóже возметáет ветр от лицá землѝ. Сегó рáди не воскрéснут нечести́вiи на суд, нижé грéшницы в совéт прáведных. Яко весть Госпóдь путь прáведных, и путь нечести́вых поги́бнет.
[Псалом 2]Вскýю шатáшася язы́цы, и лю́дiе поучи́шася тщéтным? Предстáша цáрiе зéмстiи, и кня́зи собрáшася вкýпе на Гóспода и на Хрїстá Егó. Растóргнем ýзы их и отвéржем от нас и҆́го их. Живы́й на Небесéх посмеéтся им, и Госпóдь поругáется им. Тогдá возглагóлет к ним гнéвом свои́м и я́ростiю Своéю смятéт я́. Аз же постáвлен есмь Царь от Негó над Сióном, горóю святóю Егó, возвещáяй повелéнiе Госпóдне. Госпóдь речé ко Мне: Сын Мой еси Ты, Аз днесь роди́х Тя. Просѝ от Менé, и дам Ти язы́ки достоя́нiе Твоé, и одержáнiе Твоé концы́ землѝ. Упасéши я́ жезлóм желéзным, я́ко сосýды скудéльничи сокруши́ши я́. И ны́не, цáрiе, разумéйте, накажи́теся вси судя́щiи землѝ. Рабóтайте Гóсподеви со стрáхом и рáдуйтеся Емý с трéпетом. Прiими́те наказáнiе, да не когдá прогнéвается Госпóдь и поги́бнете от путѝ прáведнаго, егдá возгори́тся вскóре я́рость Егó. Блажéни вси надéющiися Нань.
[Псалом 3]Гóсподи, что ся умнóжиша стужáющiи ми? Мнóзи востаю́т на мя, мнóзи глагóлют душѝ моéй: несть спасéнiя eмý в Бóзе eгó. Ты же, Гóсподи, Застýпник мой есѝ, слáва моя́ и вознося́й главý мою́. Глáсом мои́м ко Гóсподу воззвáх, и услы́ша мя от горы́ святы́я Своея́. Аз уснýх, и спах, востáх, я́ко Госпóдь застýпит мя. Не убою́ся от тем людéй, óкрест напáдающих на мя. Воскреснѝ, Гóсподи, спасѝ мя, Бóже мой, я́ко Ты порази́л есѝ вся враждýющыя ми всýе: зýбы грéшников сокруши́л есѝ. Госпóдне есть спасéнiе, и на лю́дех Твои́х благословéнiе Твоé.
Лúбо поéм стiхù избрáннiи
БЛАЖЕН МУЖ
Чтец (или хор): Блажéн муж, и҆́же не и҆́де на совéт нечести́вых.
Хор: Аллилýїа, аллилýїа, аллилýїа.
Чтец (или хор): Яко весть Госпóдь путь прáведных, и путь нечести́вых поги́бнет.
Хор: Аллилýїа, аллилýїа, аллилýїа.
Чтец (или хор): Рабóтайте Гóсподеви со стрáхом и рáдуйтеся Емý с трéпетом.
Хор: Аллилýїа, аллилýїа, аллилýїа.
Чтец (или хор): Блажéни вси надéющiися Нань.
Хор: Аллилýїа, аллилýїа, аллилýїа.
Чтец (или хор): Воскреснѝ, Гóсподи, спасѝ мя, Бóже мой.
Хор: Аллилýїа, аллилýїа, аллилýїа.
Чтец (или хор): Госпóдне есть спасéнiе, и на лю́дех Твои́х благословéнiе Твоé.
Хор: Аллилýїа, аллилýїа, аллилýїа.
Чтец: Слáва Ѻтцý и Сы́ну и Святóму Дýху.
Хор: Аллилýїа, аллилýїа, аллилýїа.
Хор: И ны́не и при́сно и во вéки векóв, ами́нь.
Хор: Аллилýїа, аллилýїа, аллилýїа.
Аллилýїа, аллилýїа, аллилýїа, слáва Тебé Бóже. (трúжды)
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
ГОСПОДИ ВОЗЗВАХ, ГЛАС 6
Хор: Гóсподи, воззвáх к Тебé, услы́ши мя./ Услы́ши мя, Гóсподи./ Гóсподи, воззвáх к Тебé, услы́ши мя:/ вонми́ глáсу молéнія моегó,/ внегдá воззвáти ми к Тебé./ Услы́ши мя, Гóсподи.
Хор: Да испрáвится моли́тва моя́,/ я́ко кади́ло пред Тобóю,/ воздея́ніе рукý моéю/ - жéртва вечéрняя./ Услы́ши мя, Гóсподи.
[В приходской практике пропускается до стихир]Положѝ, Гóсподи, хранéнiе устóм мои́м, и дверь ограждéнiя о устнáх мои́х. Не уклонѝ сéрдце моé в словесá лукáвствiя, непщевáти вины́ о гресéх, с человéки дéлающими беззакóнiе, и не сочтýся со избрáнными их. Накáжет мя прáведник ми́лостiю и обличи́т мя, елéй же грéшнаго да не намáстит главы́ моея́, я́ко ещé и моли́тва моя́ во благоволéнiих их. Пожéрты бы́ша при кáмени судiѝ их: услы́шатся глагóли моѝ, я́ко возмогóша. Я́ко тóлща землѝ просéдеся на землѝ, расточи́шася кóсти и҆́х при áде. Я́ко к Тебé, Гóсподи, Гóсподи, óчи моѝ: на Тя уповáх, не отымѝ дýшу мою́. Сохранѝ мя от сéти, ю́же состáвиша ми, и от соблáзн дéлающих беззакóнiе. Падýт во мрéжу свою́ грéшницы: еди́н есмь аз, дóндеже прейдý.
[В приходской практике пропускается до стихир]Глáсом мои́м ко Гóсподу воззвáх, глáсом мои́м ко Гóсподу помоли́хся. Пролiю́ пред Ним молéнiе моé, печáль мою́ пред Ним возвещý. Внегдá исчезáти от менé дýху моемý: и Ты познáл есѝ стезѝ моя́: на путѝ сем, по немýже хождáх, скры́ша сеть мне. Смотря́х одеснýю и возгля́дах, и не бе знáяй менé: поги́бе бéгство от менé, и несть взыскáяй дýшу мою́. Воззвáх к Тебé, Гóсподи, рех: Ты есѝ уповáнiе моé, часть моя́ есѝ на землѝ живы́х. Вонмѝ молéнiю моемý, я́ко смири́хся зелó, избáви мя от гоня́щих мя, я́ко укрепи́шася пáче менé.
[Пропускается до стихир]Изведи́ из темни́цы дýшу мою́,// исповéдатися и҆́мени Твоемý. Менè ждут прáведницы,// дóндеже воздáси мне.
На 8. Стiх: Из глубины́ воззвáх к Тебè, Гóсподи,// Гóсподи, услы́ши глас мой.
Стiхúры Предтéчи, самоглáсны, глас 6 (Iоáнна монáха): Рождествý сотворя́ему безстýднаго И҆́рода,/ сквéрныя плясáвицы исполня́шеся сложéнiе кля́твы:/ Предтéчева бо главá, отсéкшися,/ я́ко снедь, ношáшеся на блю́де возлежáщим./ О, пи́ра мéрзка,/ непреподóбна дея́нiя/ и убíйства испóлнена!/ Но мы Крести́теля, я́ко в рождéнных женáми бóльша,// достóйно чтýще, ублажáем.
Да бýдут ýши Твоù// внéмлюще глáсу молéнiя моегó.
Стiхúра: Рождествý сотворя́ему безстýднаго И҆́рода,/ сквéрныя плясáвицы исполня́шеся сложéнiе кля́твы:/ Предтéчева бо главá, отсéкшися,/ я́ко снедь, ношáшеся на блю́де возлежáщим./ О, пи́ра мéрзка,/ непреподóбна дея́нiя/ и убíйства испóлнена!/ Но мы Крести́теля, я́ко в рождéнных женáми бóльша,// достóйно чтýще, ублажáем.
На 6. Стiх: Áще беззакóнiя нáзриши, Гóсподи, Гóсподи, кто постоúт?// Яко у Тебè очищéнiе есть.
Стiхúра: Плясá учени́ца вселукáваго дiáвола/ и главý твою́, Предтéче, мзду взят./ О, пи́ра, испóлнена кровéй!/ Лýчше бе не кля́тися, И҆́роде беззакóнне, лжи внýче./ Áще ли же и кля́лся еси́,/ но не о добрé кля́лся:/ лýчше бе солгáвшу жизнь получи́ти,/ нéже и҆́стинствовавшу главý Предтéчеву усéкнути./ Но мы Крести́теля, я́ко в рождéнных женáми бóльша,// достóйно чтýще, ублажáем.
И҆́мене рáди Твоегó потерпéх Тя, Гóсподи, потерпè душá моя́ в слóво Твоè,// уповá душá моя на Гóспода.
Стiхúра: Плясá учени́ца вселукáваго дiáвола/ и главý твою́, Предтéче, мзду взят./ О, пи́ра, испóлнена кровéй!/ Лýчше бе не кля́тися, И҆́роде беззакóнне, лжи внýче./ Áще ли же и кля́лся еси́,/ но не о добрé кля́лся:/ лýчше бе солгáвшу жизнь получи́ти,/ нéже и҆́стинствовавшу главý Предтéчеву усéкнути./ Но мы Крести́теля, я́ко в рождéнных женáми бóльша,// достóйно чтýще, ублажáем.
На 4. Стiх: От стрáжи ýтреннiя до нóщи, от стрáжи ýтреннiя,// да уповáет Iзрáиль на Гóспода.
Стiхúра: Не подобáше ти, о И҆́роде,/ прелюбодея́нiю обличи́теля,/ рáди рачéнiя сатани́нска/ и разжжéнiя неи́стовнаго блудá/ смéртiю осуди́ти./ Не подобáше ти тогó всечестнýю главý/ пребеззакóнней женé рáди кля́твы плясáнiя предáти бéдне./ О, кáко дерзнýл еси́ таковó убíйство соверши́ти!/ Кáко же не опали́ся сквéрная плясáвица,/ посреди́ пи́ра на блю́де нося́щи сiю́?/ Но мы Крести́теля, я́ко в рождéнных женáми бóльша,// достóйно чтýще, ублажáем.
Яко у Гóспода мúлость, и мнóгое у Негó избавлéнiе,// и Той избáвит Iзрáиля от всех беззакóнiй eгó.
Стiхúра: Не подобáше ти, о И҆́роде,/ прелюбодея́нiю обличи́теля,/ рáди рачéнiя сатани́нска/ и разжжéнiя неи́стовнаго блудá/ смéртiю осуди́ти./ Не подобáше ти тогó всечестнýю главý/ пребеззакóнней женé рáди кля́твы плясáнiя предáти бéдне./ О, кáко дерзнýл еси́ таковó убíйство соверши́ти!/ Кáко же не опали́ся сквéрная плясáвица,/ посреди́ пи́ра на блю́де нося́щи сiю́?/ Но мы Крести́теля, я́ко в рождéнных женáми бóльша,// достóйно чтýще, ублажáем.
На 2. Стiх: Хвалúте Гóспода вси язы́цы, похвалúте Егó вси лю́дiе.
Стiхúра: Пáки Иродíя бéсится,/ пáки смущáется./ О, плясáнiя льсти́вна и пи́ра с лéстiю!/ Крести́тель усекáшеся,/ и И҆́род смущáшеся./ Моли́твами, Гóсподи, Твоегó Предтéчи// мир подáждь душáм нáшим.
Яко утвердúся мúлость Егó на нас,// и и҆́стина Госпóдня пребывáет во век.
Стiхúра: Пáки Иродíя бéсится,/ пáки смущáется./ О, плясáнiя льсти́вна и пи́ра с лéстiю!/ Крести́тель усекáшеся,/ и И҆́род смущáшеся./ Моли́твами, Гóсподи, Твоегó Предтéчи// мир подáждь душáм нáшим.
Слáва Отцý и Сыну и Святóму Дýху.
Стiхúра Предтéчи, глас 6: Рождествý сотворя́ему безстýднаго И҆́рода,/ сквéрныя плясáвицы исполня́шеся сложéнiе кля́твы:/ Предтéчева бо главá, отсéкшися,/ я́ко снедь, ношáшеся на блю́де возлежáщим./ О, пи́ра мéрзка,/ непреподóбна дея́нiя/ и убíйства испóлнена!/ Но мы Крести́теля, я́ко в рождéнных женáми бóльша,// достóйно чтýще, ублажáем.
И ныне и прúсно и во вéки векóв, амúнь.
Догмáтик. Глас 6: Кто Тебé не ублажи́т, Пресвятáя Дéво?/ Кто ли не воспоéт Твоегó Пречи́стаго Рождествá?/ Безлéтно бо от Отцá возсiя́вый Сын Единорóдный,/ Тóйже от Тебé Чи́стыя прóйде,/ неизречéнно воплóщься,/ естествóм Бог сый,/ и естествóм быв Человéк нас рáди,/ не во двою́ лицý разделя́емый,/ но во двою́ естествý/ несли́тно познавáемый./ Тогó моли́ Чи́стая Всеблажéнная,// поми́ловатися душáм нáшим.
СВЕТЕ ТИХИЙ
Хор: Свéте Ти́хiй святы́я слáвы Безсмéртнаго Ѻтцá Небéснаго, Святáго, Блажéннаго, Iисýсе Хрїстé! Пришéдше на зáпад сóлнца, ви́девше свет вечéрнiй, поéм Ѻтцá, Сы́на и Святáго Дýха, Бóга. Достóин есѝ во вся временá пет бы́ти глáсы преподóбными, Сы́не Бóжiй, живóт дая́й; тéмже мiр Тя слáвит.
ПРОКИМЕН В НЕДЕЛЮ ВЕЧЕРА
Чтец: Прокíмен, глас осмы́й: Се ны́не благослови́те Гóспода, вси раби́ Госпóдни. (Пс.133:1А)
Хор: Се ны́не благословúте Гóспода,/ вси рабù Госпóдни.
Чтец: Стоя́щiи во хрáме Госпóдни, во двóрех дóму Бóга нáшего. (Пс.133:1Б)
Хор: Се ны́не благословúте Гóспода,/ вси рабù Госпóдни.
Чтец: Се ны́не благослови́те Гóспода.
Хор: Вси рабù Госпóдни.
ПАРИМИИ
Чтец: Прорóчества Исáiина чтéнiе.
(Из глав 40,41,45,48 и 54): Тáко глагóлет Госпóдь: утешáйте, утешáйте лю́ди Моя́, глагóлет Бог. Свяще́нницы, глагóлите в сéрдцы Iерусали́му, умоли́те егó, я́ко умнóжися смирéнiе егó, разреши́ся бо грех егó, я́ко прiя́т из руки́ Госпóдни сугýба согрешéнiя своя́. Глас вопiю́щаго в пусты́ни: уготóвайте путь Госпóдень, прáвы твори́те стези́ Бóгу нáшему. На гóру высóку взы́ди, благовествýй Сióну, возвышáй крéпостiю глас твой, благовествýй Iерусали́му, вознеси́те, не бóйтеся. Аз Госпóдь Бог, Аз услы́шу убóгих, Iзрáилев, и не остáвлю тех. Но отвéрзу от гор рéки и посредé пóля истóчники, сотворю́ пусты́ню в луг и жáждущую зéмлю во истóчники водны́я. Да возвесели́тся нéбо свы́ше, и óблацы да кропя́т прáвду, да возсiя́ет земля́, и да прозя́бнет ми́лость, и прáвда да возсiя́ет вкýпе. Глас весéлiя возвести́те, и услы́шано да бýдет, возвести́те дáже до конéц земли́. Глагóлите, я́ко избáви Госпóдь рабá Своегó Iáкова, и áще вжáждут в пусты́ни, источи́т им вóду из кáмене. Возвесели́ся, неплóды нераждáющая, растóргни и возопíй, неболéвшая, я́ко мнóга чáда пусты́я пáче, нéжели имýщiя мýжа.
[Русский синодальный перевод]Утешайте, утешайте народ Мой, говорит Бог ваш; говорите к сердцу Иерусалима и возвещайте ему, что исполнилось время борьбы его, что за неправды его сделано удовлетворение, ибо он от руки Господней принял вдвое за все грехи свои. Глас вопиющего в пустыне: приготовьте путь Господу, прямыми сделайте в степи стези Богу нашему; Взойди на высокую гору, благовествующий Сион! возвысь с силою голос твой, благовествующий Иерусалим! возвысь, не бойся; скажи городам Иудиным: вот Бог ваш! Бедные и нищие ищут воды, и нет ее; язык их сохнет от жажды: Я, Господь, услышу их, Я, Бог Израилев, не оставлю их. Открою на горах реки и среди долин источники; пустыню сделаю озером и сухую землю - источниками воды; Кропите, небеса, свыше, и облака да проливают правду; да раскроется земля и приносит спасение, и да произрастает вместе правда. Я, Господь, творю это. Выходите из Вавилона, бегите от Халдеев, со гласом радости возвещайте и проповедуйте это, распространяйте эту весть до пределов земли; говорите: «Господь искупил раба Своего Иакова». И не жаждут они в пустынях, чрез которые Он ведет их: Он источает им воду из камня; рассекает скалу, и льются воды. Возвеселись, неплодная, нерождающая; воскликни и возгласи, немучившаяся родами; потому что у оставленной гораздо более детей, нежели у имеющей мужа, говорит Господь. (Ис.40:1-3, 9; 41:17-18; 45:8; 48:20-21; 54:1)
Чтец:Прорóчества Малахíина чтéнiе.
(Из главы 3): Тáко глагóлет Госпóдь Вседержи́тель: се Аз посылáю А́нгела Моегó пред лицéм Твои́м, и́же уготóвит путь Твой пред Тобóю. И прiи́дет во храм Свой Госпóдь, Егóже вы и҆́щете. И кто стерпи́т день вхóда Егó? Занéже Томý прiити́, я́ко огнь в горни́ле и я́коже бы́лiе перýщих, и очи́стит, поядáя и очищáя, я́ко сребрó и злáто. И прiи́дет к вам судóм, и бýдет Свидéтель скор на лукáвыя, и на прелюбодéйцы, и на кленýщiяся и҆́менем Мои́м во лжу, и на лишáющiя мзды наéмника, и на наси́льствующiя вдови́цы, и пхáющiя си́рыя, и на уклоня́ющiя суд пришéльца, и на не боя́щiяся Егó, глагóлет Госпóдь Вседержи́тель. Занé Аз Госпóдь Бог ваш и не изменю́ Себé. И вы, сы́нове Iáковли, уклони́стеся от закóна и не сохрани́сте. Сегó рáди обрати́теся ко Мне, и обращýся к вам, глагóлет Госпóдь Вседержи́тель, и ублажáт вас вси язы́цы. И разумéйте, я́ко Аз Госпóдь, смотря́яй посредé прáведнаго и посредé беззакóнника в день он, вóньже сотворю́ снабдéнiе лю́бящим Мя. Познáйте ýбо и помяни́те закóн Моисéов, рабá Моегó, я́коже заповéда вам в Хори́ве, ко всемý Iзрáилю повелéнiе и оправдáнiе. И се Аз послю́ вам Илiю́ Фесвíтянина, прéжде дáже не прiити́ дню Госпóдню вели́кому просвещéнному, и́же напрáвит сéрдце отцá к сы́ну и сéрдце человéка ко и́скреннему своемý, да не, пришéд, поражý зéмлю вскóре, глагóлет Госпóдь Вседержи́тель, Бог Святы́й Iзрáилев.
[Русский синодальный перевод]Вот, Я посылаю Ангела Моего, и он приготовит путь предо Мною, и внезапно придет в храм Свой Господь, Которого вы ищете, и Ангел завета, Которого вы желаете; вот, Он идет, говорит Господь Саваоф. И кто выдержит день пришествия Его, и кто устоит, когда Он явится? Ибо Он - как огонь расплавляющий и как щелок очищающий, и сядет переплавлять и очищать серебро, и очистит сынов Левия и переплавит их, как золото и как серебро, чтобы приносили жертву Господу в правде. И приду к вам для суда и буду скорым обличителем чародеев и прелюбодеев и тех, которые клянутся ложно и удерживают плату у наемника, притесняют вдову и сироту, и отталкивают пришельца, и Меня не боятся, говорит Господь Саваоф. Ибо Я - Господь, Я не изменяюсь; посему вы, сыны Иакова, не уничтожились. Со дней отцов ваших вы отступили от уставов Моих и не соблюдаете их; обратитесь ко Мне, и я обращусь к вам, говорит Господь Саваоф. Вы скажете: «как нам обратиться?» И блаженными называть будут вас все народы, потому что вы будете землею вожделенною, говорит Господь Саваоф. И они будут Моими, говорит Господь Саваоф, собственностью Моею в тот день, который Я соделаю, и буду миловать их, как милует человек сына своего, служащего ему. И тогда снова увидите различие между праведником и нечестивым, между служащим Богу и не служащим Ему. Помните закон Моисея, раба Моего, который Я заповедал ему на Хориве для всего Израиля, равно как и правила и уставы. Вот, Я пошлю к вам Илию пророка пред наступлением дня Господня, великого и страшного. И он обратит сердца отцов к детям и сердца детей к отцам их, чтобы Я, придя, не поразил земли проклятием. (Мал.3:1-3, 5-7, 12, 18, 17; 4:4-6)
Чтец: Премýдрости Соломóновы чтéнiе.
(Из глав 4 и 5) Прáведник, áще пости́гнет скончáтися, в покóи бýдет. Осýдит же прáведник умирáяй живýщiя нечести́выя. У́зрят бо кончи́ну прáведнаго и не разумéют, что совещáша о нем, я́ко повéржет Госпóдь нечести́выя безглáсны ниц и поколéблет их от основáнiй, и до послéдняго исчéзнут в болéзни, и пáмять их поги́бнет. Прiи́дут бо в помышлéнiе согрешéнiй свои́х ужáсни, и обличи́т их сопроти́в беззакóнiя их. Тогдá стáнет в дерзновéнiи мнóзе прáведник пред лицéм оскорби́вших егó и отметáющих труды́ егó. Ви́девше же егó, смятýтся стрáхом мнóгим и ужáснутся о преслáвнем спасéнiи егó. Рекýт бо в себé, кáющеся, и в теснотé дýха воздóхнут и рекýт: сей бе, егóже имéхом нéкогда в посмéх и в при́тчу поношéнiя, безýмнiи, житié егó вмени́хом неи́стово и кончи́ну егó безчéстну. Кáко вмени́ся в сынéх Бóжiих, и во святы́х жрéбiй егó есть? У́бо заблуди́хом от пути́ и҆́стиннаго, и прáвды свет не облистá нам, и сóлнце не возсiя́ нам. Беззакóнных испóлнихомся стезь и поги́бели, и ходи́хом стези́ непрохóдны, пути́ же Госпóдня не разумéхом.
[Русский синодальный перевод]Праведник, если и рановременно умрёт, будет в покое. Умирая же, он осудит живых нечестивых; ибо они увидят кончину мудрого и не поймут, что Господь определил о нём. Ибо Он повергнет их ниц безгласными и сдвинет их с оснований, и они вконец запустеют и будут в скорби, и память их погибнет; в сознании грехов своих они предстанут со страхом, и беззакония их осудят их в лицо их. Тогда праведник с великим дерзновением станет пред лицом тех, которые оскорбляли его и презирали подвиги его; они же, увидев, смутятся великим страхом и изумятся неожиданности спасения его и, раскаиваясь и воздыхая от стеснения духа, будут говорить сами в себе: "это тот самый, который был у нас некогда в посмеянии и притчею поругания. Безумные, мы почитали жизнь его сумасшествием и кончину его бесчестною! Как же он причислен к сынам Божиим, и жребий его - со святыми? Итак, мы заблудились от пути истины, и свет правды не светил нам, и солнце не озаряло нас. Мы преисполнились делами беззакония и погибели и ходили по непроходимым пустыням, а пути Господня не познали".(Прем.4:7, 16А, 17, 19-20; 5:1-7)
Гóсподи, поми́луй. (40 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
СПОДОБИ ГОСПОДИ
Хор: Сподóби, Гóсподи, в вéчер сей без грехá сохрани́тися нам./ Благословéн есѝ, Гóсподи Бóже ѻтéц нáших,/ и хвáльно и прослáвлено и҆́мя Твоé во вéки, ами́нь.
Бýди, Гóсподи, ми́лость Твоя́ на нас, я́коже уповáхом на Тя./ Благословéн есѝ, Гóсподи, научѝ мя оправдáнiем Твои́м./ Благословéн есѝ, Влады́ко, вразумѝ мя оправдáнiем Твои́м./ Благословéн есѝ, Святы́й, просветѝ мя оправдáнiи Твои́ми.
Гóсподи, ми́лость Твоя́ во век, дел рукý Твоéю не прéзри./ Тебé подобáет хвалá. Тебé подобáет пéнiе,/ Тебé слáва подобáет, Ѻтцý и Сы́ну и Святóму Дýху, ны́не и при́сно и во вéки векóв. Ами́нь.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
ЛИТИЯ
Стiхúры Предтéчи, самоглáсны, глас 1: Что тя наречéм, прорóче,/ Áнгела ли? Апóстола ли? Или́ мýченика?/ Áнгела, занé я́ко безплóтен пожи́л еси́;/ апóстола, я́ко научи́л еси́ язы́ки;/ мýченика же, я́ко твоя́ главá за Хрiстá усечéся.// Егóже моли́ поми́ловати дýши нáша.
Отсéченней главé Предтéчеве пáмять совершáем:/ тогдá ýбо на блю́де источáющи кровь,// ны́не же в концéх проливáющи исцелéнiя.
Днесь непреподобноделообрáзная мáти убíйства,/ éже от беззакóннаго сплетéнiя своегó всесквéрную дщерь/ над всех прорóк богоизя́щна бóльшаго,/ убiйственнообрáзным совéтом лукáвствова:/ враждéбному бо И҆́роду творя́щу пир своегó сквéрнаго рождествá,/ с кля́твою испроси́ти устрóи/ чудотóчную Богопроповéдника честнýю главý,/ éже и соверши́ пребезýмный,/ жéнскому плясáнiю дав ту возмéздiе, кля́твенный дар./ Обáче не престá таи́нник Хрiстóва пришéствiя/ богомéрзкое смешéнiе их и по кончи́не обличáти,/ но, обличáя, вопiя́ше:/ не подобáет ти, глагóля,/ прелюбодéйствовати брáта твоегó Фiлíппа женý./ О, рождéнiя пророкоубíйственна/ и кровéй напóлнена пи́ра!/ Мы же благочестномýдренне/ во усекновéнiи Предтéчеве,/ белообразýюще, прáзднуем,/ я́ко в благонарóчитый день рáдующеся,/ и умóлим сегó благосéрдствовати Трóицу/ от страстéй безчéстiя избáвити нас// и спасти́ дýши нáша.
Глас 4: Рождéнiе неподóбно/ и пир безстýднейшiй И҆́род соверши́л есть./ Любодéйством бо жéнским услаждáемь/ и нечести́вым женонеи́стовством подстрекáемь,/ отсечé главý Предтéчеву,/ но не отсечé язы́ка прорóческа,/ обличáющаго безýмiе егó./ Пролiя́ кровь непови́нну,/ покры́ти хотя́ грех беззакóнен,/ но ни о сем скры глáса,/ вопiю́щаго всем покая́нiе./ Он ýбо свеселя́шеся убíйством,/ мы же спрáзднуем любóвiю/ Крести́теля Iоáнна блажéнное заколéнiе./ Предвари́ бо во áде,/ жизнь проповéдати сýщим во тьме и сéни смéртней седя́щим,/ свы́ше востóк Хрiстá Бóга нáшего,// еди́наго Многоми́лостиваго.
Прорóка, и мýченика, и Крести́теля Спáсова,/ прiиди́те, лю́дiе, восхвáлим:/ сей бо во плóти Áнгел сый,/ И҆́рода изобличи́л есть,/ пребеззакóннаго любодея́нiя содéянiем осуди́в егó./ И беззакóннаго рáди плясáнiя/ честнáя главá отсекáется,/ сýщим во áде благовествýяй из мéртвых воскресéнiе,/ и мóлится прилéжно Гóсподеви// спасти́ся душáм нáшим.
Прорóка, и мýченика, и Крести́теля Спáсова,/ прiиди́те, лю́дiе, восхвáлим:/ я́ко бéгая, в пусты́ни водворя́шеся,/ мед ди́вiй и акрíды яды́й,/ царя́ беззакóннующа обличи́л есть;/ нáше же малодýшiе утешáше, глагóля:// покáйтеся, прибли́жи бо ся Цáрство Небéсное.
Слáва Ѻтцý и Сы́ну и Святóму Дýху.
Глас 5: Беззакóннаго дея́нiя обличéнiя/ убежáти И҆́род умы́слив,/ главý твою́, Предтéче,/ беззакóнней женé предадé пáкостно,/ не разумé бо окая́нный, обличáя себé,/ на блю́де обнося́ ю./ Но я́ко чистоты́ дéтельный учи́тель/ и покая́нiя настáвник спаси́тельный,/ моли́ся, Крести́телю Хрiстóв,// от страстéй безчéстiя избáвити нас.
И ны́не и прúсно и во вéки векóв, амúнь.
Богорóдичен минéи, глас 5: Воспóйте, лю́дiе, Мáтери Бóга нáшего, воспóйте:/ днесь бо всесвéтлую дýшу Свою́/ в пречи́стыя длáни/ из Нея́ воплóщшагося без сéмене предаéт,/ Егóже и мóлит непрестáнно// даровáти вселéнней мир и вéлiю ми́лость.
Гóсподи, поми́луй. (40 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
СТИХИРЫ НА СТИХОВНЕ
Чтец (Стiхúры Предтéчи, глас 2): Покая́нiя проповéдниче, Iоáнне Крести́телю,/ отсéчене бы́вшей твоéй главé,/ зéмлю освяти́л еси́,/ занé закóн Бóжiй вéрным уясни́л еси́/ и беззакóнiе потреби́л еси́,/ я́ко предстоя́ престóлу Небéснаго Царя́ Хрiстá,// Тогó моли́ поми́ловати дýши нáша.
Стiх: Прáведник, я́ко фíнiкс, процветéт, я́ко кедр, и҆́же в Лiвáне, умнóжится. (Пс.91:13)
Закóна рáди Госпóдня/ во главý усекновéн был еси́,/ о всесвяты́й Iоáнне!/ Обличи́л еси́ царя́ злочести́ва, беззакóнновавша/ дерзновéнiем непорóчным./ Тéмже дивя́тся тебé вóинства áнгельская,/ слáвят тя ли́цы апóстол и мýченик./ Чтим твою́ и мы лéтнюю пáмять, всеслáвне,/ слáвяще Святýю Трóицу,// тебé венчáвшую, Предтéче блажéнне.
Стiх: Возвеселúтся прáведник о Гóсподе/ и уповáет на негó.(Пс.63:11)
И́же от прорóка прорóк/ и бóлiй прорóков быв,/ из чрéва мáтерня освящéнный в служéнiе Госпóдне,/ днесь от беззакóнна царя́ в главý усекновéн бысть,/ и безчéстно плясáвшую отрокови́цу,/ я́сно и прéжде усекновéнiя и по усекновéнiи обличи́в,/ посрами́ грехá полк./ И сегó рáди возопiéм:/ Крести́телю Iоáнне,/ я́ко имéя дерзновéнiе,// прилéжно моли́ся о душáх нáших.
Слáва Отцý и Сыну и Святóму Дýху.
Стiхúра Предтéчи, глас 8: Предтéче Спáсов,/ ты царя́ изобличи́л еси́ беззакóнiя не дéлати./ Тéмже игрáнiе беззакóнный жены́/ повинý И҆́рода отсещи́ твою́ главý,/ и сегó рáди от востóк сóлнца дáже до зáпад хвáльно и҆́мя твоé./ Дерзновéнiе имéя ко Гóсподу,// прилéжно моли́ спасти́ся душáм нáшим.
И ны́не и прúсно и во вéки векóв, амúнь.
Богорóдичен воскрéсен, глас 8 (по глáсу «Слáвы»): Безневéстная Дéво,/ Я́же Бóга неизречéнно зачéнши плóтiю,/ Мáти Бóга Вы́шняго,/ Твои́х рабóв мольбы́ прiими́, Всенепорóчная,/ всем подаю́щи очищéнiе прегрешéнiй:/ ны́не нáша молéнiя прiéмлющи,// моли́ спасти́ся всем нам.
Молитва святаго Симеона Богоприимца
Ны́не отпущáеши рабá Твоегó, Влады́ко,/ по глагóлу Твоемý, с ми́ром;/ я́ко ви́деста óчи моѝ спасéнiе Твоé,/ éже есѝ уготóвал пред лицéм всех людéй,/ свет во откровéнiе язы́ков,// и слáву людéй Твои́х Iзрáиля.
Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 рáза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжiй, поми́луй нас. Ами́нь.
Тропáрь Предтéчи, глас 2: Пáмять прáведнаго с похвалáми,/ тебè же довлéет свидéтельство Госпóдне, Предтéче:/ показáл бо ся есѝ вои́стинну и прорóков честнéйшiй,/ я́ко и в струя́х крести́ти сподóбился есѝ Проповéданнаго./ Тéмже за и҆́стину пострадáв, рáдуяся,/ благовести́л есѝ и сýщим во áде Бóга, я́вльшагося плóтiю,/ взéмлющаго грех мíра// и подаю́щаго нам вéлiю ми́лость. (Двáжды)
Тропáрь, глас 4: Богорóдице Дéво, рáдуйся,/ Благодáтная Марíе, Госпóдь с Тобóю:/ благословéна Ты в женáх/ и благословéн Плод чрéва Твоегó,// яко Спáса родилá есѝ душ нáших.
Бýди и҆́мя Госпóдне благословéно от ны́не и до вéка. (Трúжды)
Псалом 33
Благословлю́ Гóспода на вся́кое врéмя,/ вы́ну хвалá Егó во устéх мои́х./ О Гóсподе похвáлится душá моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм и҆́мя Егó вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицá вáша не постыдя́тся./ Сей ни́щiй воззвá, и Госпóдь услы́ша и҆̀,/ и от всех скорбéй егó спасè и҆̀./ Ополчи́тся Áнгел Госпóдень óкрест боя́щихся Егó,/ и избáвит их./ Вкуси́те и ви́дите, я́ко благ Госпóдь;/ блажéн муж, и҆́же уповáет нань./ Бóйтеся Гóспода, вси святíи Егó,/ яко несть лишéнiя боя́щымся Егó./ Богáтiи обнищáша и взалкáша,/ взыскáющiи же Гóспода не лишáтся вся́каго блáга.
И глаголи ýтреню