Неделя 3 по Пятидесятнице, прп.Онуфрия Великого,прп.Петра Афонского,глас 2 УТРЕНЯ (ок-ние)ЧАС ПЕРВЫЙ
25 iю́ня 2023 гóда. Недéля 3 по Пятидеся́тнице, преподóбнаго Онýфрiя Велúкаго, преподóбнаго Петрá Афóнскаго. Глас 2. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (окончáнiе). Пéрвый час.
Окончáнiе всенóщного бдéнiя. Начáло здесь ( великая вечéрня), здесь ( ýтреня) здесь ( продолжéнiе ýтрени с канóном)
Хор: Слáва, Гóсподи, Святóму Воскресéнiю Твоемý.
Чтец: Крóвiю Твоéю, Хрїстé,/ очервлéно плóти Твоея́ зря́ще одея́нiе,/ трéпетом ужасáхуся мнóгому Твоемý долготерпéнiю áнгельстiи чи́ни, зовýще:// благослови́те вся делá Госпóдня, Гóспода.
Хор: Слáва, Гóсподи, Святóму Воскресéнiю Твоемý.
Чтец: Ты моé смéртное одéял еси́, Щéдре,/ в безсмéртiе востáнiем Твои́м./ Тéмже веселя́щеся благодáрственно воспевáют Тя/ избрáннiи лю́дiе, Хрїстé, зовýще Тебé:// пожéрта бысть вои́стинну смерть побéдою.
Хор: Пресвятáя Богорóдице, спасù нас.
Богорóдичен: Ты, И҆́же Отцý неразлýчнаго,/ во утрóбе богомýжно пожи́вша безсéменно зачалá еси́,/ и неизречéнно родилá еси́, Богороди́тельнице Пречи́стая:// тéмже Тя спасéнiе всех нас свéмы.
Глас 2
Хор: Пресвятáя Богорóдице, спасù нас.
Чтец: Ви́ден бысть на земли́ Тобóю, и с человéки поживé,/ И҆́же блáгостiю несравнéнный и си́лою,/ Емýже пою́ще вси вéрнiи зовéм:/ осуществовáнная да поéт Гóспода вся тварь,// и превознóсит во вся вéки.
Хор: Пресвятáя Богорóдице, спасù нас.
Чтец: Вои́стинну Тя, Чи́стую проповéдающе, слáвим Богорóдицу:/ Ты бо еди́на родилá еси́ от Трóицы воплощéнна,/ Емýже со Отцéм и Дýхом вси поéм:/ да поéт Гóспода вся тварь,// и превознóсит во вся вéки.
Глас 4
Хор: Преподóбне óтче Онýфрiе, молù Бóга о нас.
Чтец: Зéмлю дóльную премину́в, Небéсную стяжа́л еси́ жизнь,/ и Безплóтных ликóм счи́слился еси́, нося́ плоть, Онýфрiе блажéнне,// и зéмлю крóтких наслéдовал еси́, ю́же тебé подадé Хрїстóс во вéки.
Хор: Преподóбне óтче Онýфрiе, молù Бóга о нас.
Чтец: Слéзныя кáпли гаси́ло стяжáл еси́ вои́стинну страстны́м разгорéнiем/ и любóвiю огня́ Божéственнаго росé совокупи́лся еси́ безстрáстiя,/ Хрїстý Бóгу нáшему,// тéмже тя чтим, Онýфрiе Богомýдре.
Хор: Преподóбне óтче Онýфрiе, молù Бóга о нас.
Чтец: Áнгельскому житiю́ поревновáвша непрестáнными моли́твами,/ рукóю Áнгела Свои́м тáйнам причáстника, óтче, Хрїстóс тя показá,// Вели́каго Совéта вои́стинну Áнгел, Егóже превознóсим во вéки.
Хор: Пресвятáя Богорóдице, спасù нас.
Богорóдичен: Землé святáя, из Нея́же Хрїстóс прозябé, клас жи́зни,/ и истáявшее глáдом наздá человéческое естествó дрéвнiя злóбы, Богомáти Всенепорóчная,// тéмже Тя поéм во вéки.
Глас 2
Хор: Преподóбне óтче Пéтре, молù Бóга о нас.
Чтец: Блажéнства Божéственнаго сподóбился еси́ вои́стинну, Пéтре Богомýдре, вóлею обнищáв/ и всегдá, мýдре, плáкав, и, крóток быв,// наслéдил еси́ зéмлю крóтких.
Хор: Преподóбне óтче Пéтре, молù Бóга о нас.
Чтец: Бодр имéя пóмысл, успи́л еси́ страстéй востáнiя/ и, уснýв, сон дóлжный ны́не прáведным, всем, пребогáте, неусыпáющ яви́лся еси́,// тя чтýщим моли́твенник.
Благословúм Отцá, и Сы́на, и Святáго Дýха, Гóспода.
Тропáрь: Зимóю и вáром, мýдре, победи́в зи́му дéмонскую,/ духóвною теплотóю потребля́еши я́ве// и стрáсти умерщвля́еши телéсныя, безстрáстiя облистáя сiя́нiем.
И ны́не и прúсно и во вéки векóв. Амúнь.
Богорóдичен: Уны́л имéя пóмысл и дýшу, сластьми́ отягчéну,/ к Тебé прибегáя, Богороди́тельнице Чи́стая, вопiю́ Ти:// воздви́гни и спаси́ мя, отчáяннаго и осуждéннаго.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя (глас 4): Óтроки благочести́выя в пéщи/ Рождествó Богорóдичо спаслó есть;/ тогдá ýбо образýемое,/ ны́не же дéйствуемое,/ вселéнную всю воздвизáет пéти Тебé:/ Гóспода пóйте, делá,// и превозноси́те Егó во вся вéки.
Вóзглас: Богорóдицу и Мáтерь Свéта в пéснех возвелúчим.
Хор: Вели́чит душá Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На каждый стiх)
Я́ко призрé на смирéнiе рабы́ Своея́,/ се бо от ны́не ублажáт Мя вси рóди.
Я́ко сотвори́ Мне вели́чiе Си́льный,/ и свя́то И҆́мя Егó, и ми́лость Егó в рóды родóв боя́щимся Егó.
Сотвори́ держáву мы́шцею Своéю,/ расточи́ гóрдыя мы́слiю сéрдца их.
Низложи́ си́льныя со престóл, и вознесé смирéнныя;/ áлчущiя испóлни благ, и богатя́щiяся отпусти́ тщи.
Воспрiя́т Iзрáиля óтрока Своегó, помянýти ми́лости,/ я́коже глагóла ко отцéм нáшим, Авраáму и сéмени егó, дáже до вéка.
ПЕСНЬ 9
Iрмóс: Безначáльна Родúтеля Сын, Бог и Госпóдь,/ воплóщься от Дéвы, нам явúся,/ омрачéнная просветúти,/ собрáти расточéнная,// тем Всепéтую Богорóдицу величáем.
Хор: Слáва, Гóсподи, Святóму Воскресéнiю Твоемý.
Чтец: Я́ко в раи́ насаждéно на лóбнем, Спáсе,/ требогáтое дрéво Твоегó пречи́стаго Крестá,/ крóвiю и водóю Божéственною,/ я́ко от истóчника Божéственнаго,/ ребрá Твоегó, Хрїстé, напоя́емо,// живóт нам прозяблó есть.
Хор: Слáва, Гóсподи, Святóму Воскресéнiю Твоемý.
Чтец: Низложи́л еси́ си́льныя, распны́йся, Всеси́льне,/ и éже ни́зу лежáщее во áдове тверды́ни,/ естествó человéческое вознéс,/ на Ѻ́тчем посади́л еси́ престóле.// С Ни́мже Тебé грядýщу покланя́ющеся, величáем.
Хор: Пресвятáя Трóице, Бóже наш, слáва Тебé.
Трóичен: Еди́ницу Тричи́сленную, Трóицу Единосýщную/ правослáвно пою́ще вéрнiи, слáвим:/ непресекóмо Пребожéственное Естествó,/ трисвéтлую, невечéрнюю зарю́,// Еди́ну нетлéнную нам свет возсiя́вшую.
Глас 2
Хор: Пресвятáя Богорóдице, спасù нас.
Чтец: Жезл крéпости дадéся естествý тлéнному,/ Слóво Бóжiе во утрóбе Твоéй, Чи́стая:/ и сié воскреси́, до áда попóлзшееся.// Тéмже Тя, Всечи́стая, я́ко Богорóдицу, величáем.
Хор: Пресвятáя Богорóдице, спасù нас.
Чтец: Ю́же извóлил еси́, Влады́ко,/ прiими́ ми́лостивно Моли́твенницу,/ Мáтерь Твою́, о нас,/ и Твоея́ блáгости вся́ческая испóлняется:// да Тя вси, я́ко Благодéтеля, величáем.
Глас 4
Хор: Преподóбне óтче Онýфрiе, молù Бóга о нас.
Чтец: Взирáнiи непрестáнными, я́же к Бóгу, óтче Богомýдре, обожáемь,/ причáстiем Егó был еси́ бог// и, со Áнгелы служá, Сегó слáвиши при́сно.
Хор: Преподóбне óтче Онýфрiе, молù Бóга о нас.
Чтец: Умертви́в плоть, победи́л еси́ врагá,/ престáвился еси́ к невечéрней зари́,// Небéсных благ ты наслéдник быв, óтче Онýфрiе.
Хор: Преподóбне óтче Онýфрiе, молù Бóга о нас.
Чтец: Любóвiю творя́щих святы́й твой прáздник/ от вся́каго треволнéнiя страстéй мольбáми твои́ми избавля́й при́сно,// я́ко дерзновéнiе обрéт у Спáса, Онýфрiе.
Хор: Пресвятáя Богорóдице, спасù нас.
Богорóдичен: Надéжду Тя и стéну стяжáвше, Пречи́стая,/ уповáем улучи́ти благáя моли́твами Твои́ми, Чи́стая,// я́же обещá Хрїстóс, воплоти́выйся из Тебé нас рáди.
Глас 2
Хор: Преподóбне óтче Пéтре, молù Бóга о нас.
Чтец: Крéпостiю и держáвою Хрїстóс Бог тя препоя́сав,/ укрепи́ победи́ти хи́трости дéмонскiя, пребогáте,/ я́ко возлю́бльша Сегó от всегó сéрдца и души́.// Сегó рáди тя вéрою ублажáем и любóвiю.
Хор: Преподóбне óтче Пéтре, молù Бóга о нас.
Чтец: Яви́лся еси́ в домý Госпóдни, я́ко мáслина, Богомýдре,/ елéем пóтов твои́х нáша умащáя ли́ца,/ творя́щих твой сей слáвный и Божéственный прáздник,// монáхов украшéнiе, преподóбных верхóвник.
Слáва Ѻтцý и Сы́ну и Святóму Дýху.
Тропáрь: Твоé преслáвное, источи́вшее, всеслáвный Пéтре, тéло/ благовóнно и краснó ми́ро, вéрныя благовóнiя испóлни,/ благовóнiе бо Бóгу и жив, и по кончи́не я́ве показáлся еси́.// Тéмже тя достóйно ублажáем.
И ны́не и прúсно и во вéки векóв. Амúнь.
Богорóдичен: Пощади́ мя, Гóсподи, пощади́, егдá хóщеши ми суди́ти,/ и не осуди́ менé во огнь, нижé я́ростiю обличи́ши менé,/ мóлит Тя Дéва, Тебé рóждшая, Хрїстé,// и áнгельстiи собóри, и преподóбных совокуплéнiя.
Катавáсiя (глас 4): Всяк земнорóдный/ да взыгрáется, Дýхом просвещáемь,/ да торжествýет же Безплóтных умóв естествó,/ почитáющее свящéнное торжествó Богомáтере,/ и да вопiéт:/ рáдуйся, Всеблажéнная,// Богорóдице, Чи́стая Приснодéво.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьми́ Бог наш.
Хор: Свят Госпóдь Бог наш
Ексапостилáрiй воскрéсный трéтiй: Я́ко Хрїстóс воскрéсе, никтóже да не вéрует:/ яви́ся бо Марíи, потóм же ви́ден бысть на селó идýщима,/ таи́нником же пáки яви́ся возлежáщим единонáдесятим,/ и́хже крещáти послáв,/ на небесá вознесéся, отню́дуже и сни́де,// утверждáя проповéданiе мнóжествы знáменiй.
Светúлен прп. Онýфрiя: Áнгельстiи удиви́шася чи́ни твои́м подвигóм,/ я́же в пусты́ни твори́л еси́, Онýфрiе Богонóсе:/ три бо к шести́десятим лéта, óтче, пости́лся еси́.// И ны́не, всеблажéнне преподóбне, со Хрїстóм цáрствуеши в непроходи́мыя вéки.
Слáва Ѻтцý и Сы́ну и Святóму Дýху.
Светúлен прп. Петрá: Петрý тезоимени́таго верхóвному вси пóстников похвалý/ и преподóбных слáву, столпá Небéснаго, цвéта афóнскаго/ велеглáсно пéсньми почти́м по дóлгу,// я́ко моли́твенника нам всем.
И ны́не и прúсно и во вéки векóв. Амúнь.
Богорóдичен воскрéснаго Ексапостiлáрiя: Возсiя́вшее Сóлнце, я́ко от чертóга жени́х, из грóба днесь,/ и ад плени́в, и смерть упраздни́в,/ Тебé Рóждшiя моли́твами, свет нам низпосли́:/ свет, просвещáющ сердцá и дýши:/ свет, ходи́ти всех наставля́ющ// на стези́ повелéнiй Твои́х, и на путь ми́ра.
ХВАЛИТНЫ
Хор, глас 2: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.
[В приходской практике пропускается до стихир]Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речé, и бы́ша, Той повелé, и создáшася. Постáви я́ в век и в век вéка, повелéнiе положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
[В приходской практике пропускается до стихир]Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сы́нове Сióни возрáдуются о Царé своéм. Да восхвáлят и҆́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остри́ в рукáх их: сотвори́ти отмщéнiе во языцех, обличéнiя в лю́дех, связáти цари́ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егó.
Стiхúры воскрéсные, глас 2: Вся́кое дыхáнiе и вся тварь,/ Тя слáвит, Гóсподи,/ я́ко Крестóм смерть упраздни́л есѝ,/ да покáжеши лю́дем, éже из мéртвых Твоé Воскресéнiе,// я́ко еди́н Человеколю́бец.
Хвалúте Бóга во святых Егó,/ хвалúте Егó в утвержéнiи сúлы Егó.
Стiхúра: Да рекýт iудéе, кáко вóини погуби́ша стрегýщiи Царя́; почтó бо кáмень не сохрани́ кáмене жи́зни; или́ погребéннаго да дадя́т, или́ воскрéсшему да поклóнятся, глагóлюще с нáми: слáва мнóжеству щедрóт твои́х, Спáсе наш, слáва тебѣ́.
На 6: Хвалúте Егó на сúлах Егó, хвалúте Егó по мнóжеству велúчествiя Егó.
Стiхúра: Рáдуйтеся лю́дiе и весели́теся, áнгел сѣдя́й на кáмени грóбнѣм, той нам благовѣсти́, рек: Хрїстóс воскрéсе из мéртвых, Спас мíра, и испóлни вся́ческая благоухáнiя: рáдуйтеся лю́дiе и весели́теся.
Хвалúте Егó во глáсе трýбнем, хвалúте Егó во псалтúри и гýслех.
Стiхúра: Áнгел ýбо éже рáдуйся, прéжде твоего зачáтiя Гóсподи, благодáтнѣй принесé: áнгел же кáмень слáвнаго твоегó грóба въ твоé воскресéнiе отвалѝ: ѻ́в ýбо в печáли мѣ́сто, весéлiя óбразы возвѣщáя: сей же въ смéрти мѣ́сто, Влады́ку жизнодáвца проповѣ́дуя нам, тѣ́мже вопiéм ти: благодѣ́телю всѣх, Гóсподи слáва тебѣ́.
На 4. Хвалúте Егó в тимпáне и лúце, хвалúте Егó во стрýнах и оргáне.
И҆́ны стiхúры анатóлiевы: Возлiя́ша ми́ра со слезáми на гроб Твой жены́,/ и испóлнишася рáдости устá их,// внегдá глагóлати: воскрéсе Госпóдь.
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Стiхúра: Да похвáлят язы́цы/ и лю́дiе Хрїстá Бóга нáшего,/ вóлею нас рáди Крест претерпéвшаго,/ и во áде триднéвновавшаго:/ и да поклóнятся Егó из мéртвых Воскресéнiю,// И́мже просвети́шася всегó мíра концы́.
Воскреснú, Гóсподи Бóже мой, да вознесéтся рукá Твоя́,// не забýди убóгих Твоúх до концá.
Стiхúра: Рáспят и погребéн был еси́, Хрїстé,/ я́коже извóлил еси́,/ испровéргл еси́ смерть,/ и воскрéсл еси́ во слáве, я́ко Бог и Влады́ка,// дáруя мíрови жизнь вéчную и вéлiю ми́лость.
Исповéмся Тебé Гóсподи всем сéрдцем мoúм,/ повéм вся чудесá Твоя́.
Стiхúра: О вои́стинну беззакóннiи,/ печáтавше кáмень, бóльших нас чудéс сподóбисте/ И́мут рáзум стрáжiе,/ днесь прóйде из грóба, и глагóлаху:/ рцы́те, я́ко нам спя́щим,/ прiидóша ученицы́, и украдóша Егó./ И кто крáдет мертвецá, пáче же и нáга;/ Сам воскрéсе самовлáстно, я́ко Бог,/ остáвль во грóбе и погребáтельная Своя́:/ прiиди́те, ви́дите, iудéе,/ кáко не растóрже печáти, смерть попрáвый/ и рóду человéческому безконéчную жизнь дáруяй,// и вéлiю ми́лость.
Слáва Отцý и Сыну и Святóму Дýху.
Стiхúра евáнгельская третiя, глас 3: Магдали́не Марíи/ Спáсово благовествýющей из мéртвых Воскресéнiе и явлéнiе,/ не вéрующе же ученицы́, поноси́ми бы́ша о жестосéрдiи:/ но знáменьми воорýжшеся и чудесы́,/ ко проповéданiю посылáхуся,/ и Ты ýбо, Гóсподи, к начáльному свéту вознéслся еси́ Отцý,/ они́ же проповéдаша всю́ду слóво, чудесы́ уверя́юще./ Тéмже просвети́вшеся тéми,/ слáвим Твоé éже из мéртвых воскресéнiе,// человеколю́бче Гóсподи.
И ныне и прúсно и во вéки векóв, амúнь.
Глас 2: Преблагословéнна еси́, Богорóдице Дéво,/ Воплóщшим бо ся из Тебé ад плени́ся,/ Адáм воззвáся,/ кля́тва потреби́ся,/ Éва свободи́ся,/ смерть умертви́ся, и мы ожи́хом./ Тем воспевáюще вопiéм:/ благословéн Хрїстóс Бог,// благоволи́вый тáко, слáва Тебé.
Вóзглас: Слáва Тебé, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрїстé, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцá, поми́луй нас. Яко Ты есѝ Един Свят; Ты есѝ Един Госпóдь, Iисýс Хрїстóс, в слáву Бóга Отцá, ами́нь.
На всяк день благословлю́ Тя и восхвалю́ и҆́мя Твоé во вéки, и в век вéка.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоé во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был еси нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебé. Гóсподи, к Тебé прибегóх, научѝ мя твори́ти вóлю Твою́, яко Ты есѝ Бог мой, яко у Тебé истóчник животá, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, поми́луй нас. (3 раза)
Хор: Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помилуй нас.
Тропáрь воскрéсный, глас 2: Воскрéс из грóба и ýзы растерзáл еси áда,/ разруши́л еси осуждéнiе смéрти, Гóсподи,/ вся от сетéй врагá избáвивый;/ яви́вый же Себé апóстолом Твоим,/ послáл еси я на прóповедь,/ и тéми мир Твой пóдал еси вселéнней,// Еди́не Многоми́лостиве.
Гóсподи поми́луй (40 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Гóсподи поми́луй (12раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Утвердѝ, Бóже, святýю правослáвную вéру, правослáвных хрїстiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 рáза)
Гóсподи, благословѝ.
ОТПУСТ
Гóсподи, Iисýсе Хрїстé, Сыне Бóжій, моли́твами Пречи́стыя Своея́ Мáтере, святы́х слáвных и всехвáльных Апóстол, святы́х и прáведных богоотéц Iоакíма и Áнны, и всех святы́х, поми́лует и спасéт нас, яко Благ и Человеколю́бец. Ами́нь.
МНОГОЛЕТИЕ
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрїстý, Царéви нáшему Бóгу.
Прiиди́те, поклони́мся и припадéм Самомý Хрїстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моé. Вонмѝ глáсу молéнiя моегó, Царю́ мой и Бóже мой, яко к Тебé помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебé лукáвнуяй, нижé пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебé лю́бящiи имя Твоé. Яко Ты благослови́ши прáведника, Гóсподи: яко орýжiем благоволéнiя венчáл еси нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты еси. Не отвратѝ человéка во смирéнiе, и рекл еси: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травá мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л еси беззакóнiя нáша пред Тобóю: век наш в просвещéнiе лицá Твоегó. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегó, и от стрáха Твоегó, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы́ Твоя. Испóлнихомся заýтра ми́лости Твоея, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны еси, лéта в ня́же ви́дехом злáя. И при́зри на рабы́ Твоя́, и на делá Твоя, и настáви сы́ны их. И бýди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебé, Гóсподи. Пою́ и разумéю в путѝ непорóчне, когдá прiи́деши ко мне? Прехождáх в незлóбiи сéрдца моегó посредé дóму моегó. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпé мне сéрдце стропти́во, уклоня́ющагося от менé лукáваго не познáх. Оклеветáющаго тай и҆́скренняго своегó, сегó изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредé дóму моегó творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебé Бóже. (3 раза)
Гóсподи, помúлуй. (3 раза)
Тропáрь воскрéсный, глас 2: Егдá снизшéл еси́ к смéрти, Животé Безсмéртный,/ тогдá ад умертви́л еси́ блистáнiем Божествá./ Егдá же и умéршыя от преиспóдних воскреси́л еси́,/ вся Си́лы Небéсныя взывáху:// Жизнодáвче, Хрїстé Бóже наш, слáва Тебé.
Слáва Отцý и Сы́ну и Святóму Дýху.
Тропáрь преподóбных, глас 4: Бóже отéц нáших,/ творя́й при́сно с нáми по Твоéй крóтости,/ не отстáви ми́лость Твою́ от нас/ но моли́твами их// в ми́ре упрáви живóт наш.
И ны́не и прúсно и во вéки векóв. Амúнь.
Богорóдичен: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблá есѝ цвет нетлéнiя. Дéву, я́ко пребылá есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогó молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы́ человéческiя, и сохраню́ зáповеди Твоя́. Лицé Твоé просветѝ на рабá Твоегó и научѝ мя оправдáнiем Твои́м.
Да испóлнятся устá моя хвалéнiя Твоегó, Гóсподи, я́ко да воспою́ слáву Твою́, весь день великолéпiе Твоé.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 раза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстé, Сыне Бóжїй, поми́луй нас. Ами́нь.
КОНДАК
Кондáк воскрéсный, глас 2: Воскрéсл еси́ от грóба, Всеси́льне Спáсе,/ и ад, ви́дев чýдо, ужасéся,/ и мéртвiи востáша;/ тварь же ви́дящи срáдуется Тебé,/ и Адáм свесели́тся,// и мiр, Спáсе мой, воспевáет Тя при́сно.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрїстé Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесá очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрїстè, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицá Твоегó, да в нем ýзрим Свет Непристýпный: и испрáви стопы́ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 8: Взбрáнной Воевóде победи́тельная,/ я́ко избáвльшеся от злы́х,/ благодáрственная восписýем Ти́ раби́ Твои́, Богорóдице;/ но я́ко имýщая держáву непобеди́мую,/ от вся́ких нас бед свободи́, да зовéм Ти́:// рáдуйся, Невéсто Неневéстная.
Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.
Гóсподи, поми́луй. (3 раза)
Гóсподи, благословᴎ́.
Гóсподи, Iисýсе Хрїстé, Сыне Бóжій, моли́твами Пречи́стыя Своея́ Мáтере, святы́х слáвных и всехвáльных Апóстол, святы́х и прáведных богоотéц Iоакíма и Áнны, и всех святы́х, поми́лует и спасéт нас, яко Благ и Человеколю́бец. Ами́нь.
С утрá чти часы и обéдницу