Вознесение Господне. ВСЕНОЩНОЕ БДЕНИЕ. УТРЕНЯ. КАНОН. Служба мирским чином
25 мáя 2023 гóда. Четвéрг 6-й седмúцы по Пáсхе. Вознесéнiе Госпóдне. Прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (канóн)
Начало зри здесь ( великая вечéрня) и здесь ( ýтреня)
ПРОКИМЕН
Чтец: Прокíмен, глас четвéртый, псалóм Давíдов: Взы́де Бог в воскликновéнiи,/ Госпóдь во глáсе трýбне.(Пс.46:6)
Хор: Взы́де Бог в воскликновéнiи,/ Госпóдь во глáсе трýбне.
Чтец: Вси язы́цы восплещи́те рукáми, воскли́кните Бóгу глáсом рáдованiя.(Пс.46:2)
Хор: Взы́де Бог в воскликновéнiи,/ Госпóдь во глáсе трýбне.
Чтец: Взы́де Бог в воскликновéнiи.
Хор: Госпóдь во глáсе трýбне.
Чтец: Гóсподу помóлимся.
Хор: Гóсподи, помúлуй.
Слáва Отцý и Сыну и Святóму Дýху, и ныне и прúсно и во вéки векóв, амúнь.
Чтец: Вся́кое дыхáнiе да хвáлит Гóспода.
Хор: Всякое дыхáние да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.
Хор: Всякое дыхáние да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Мáрка Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Мк.зач.71): Во врéмя óно воскрéс Iисýс заýтра, в пéрвую суббóту, яви́ся прéжде Марíи Магдали́ни, из нея́же изгнá седмь бесóв. Онá же шéдши возвестѝ с Ним бы́вшим, плáчущимся и рыдáющим. И онѝ слы́шавше, яко жив есть, и ви́ден бысть от нея́, не я́ша вéры. По сих же двемá от них грядýщема яви́ся инéм óбразом, идýщема на селó. И та шéдша возвести́ста прóчим: и ни тéма вéры я́ша. Последѝ же возлежáщим им единомунáдесяте яви́ся, и поносѝ невéрствiю их и жестосéрдiю, яко ви́девшим Егó востáвша не я́ша вéры. И речé им: шéдше в мiр весь, проповéдите Евáнгелiе всей твáри. Иже вéру имéт и крести́тся, спасéн бýдет, а и́же не имéт вéры, осуждéн бýдет. Знáменiя же вéровавшим сiя́ послéдуют: и́менем Мои́м бéсы ижденýт; язы́ки возглагóлют нóвы; змíя возмýт; áще и что смéртно испiю́т, не вреди́т их; на недýжныя рýки возложáт, и здрáви бýдут. Госпóдь же ýбо, по глагóланiи Егó к ним, вознесéся на нéбо, и сéде одеснýю Бóга. Онѝ же изшéдше проповéдаша всю́ду, Гóсподу поспéшствующу и слóво утвержáющу послéдствующими знáменьми. Ами́нь.
[Русский синодальный перевод]В то время воскреснув рано в первый день недели, Иисус явился сперва Марии Магдалине, из которой изгнал семь бесов. Она пошла и возвестила бывшим с Ним, плачущим и рыдающим; но они, услышав, что Он жив и она видела Его,- не поверили. После сего явился в ином образе двум из них на дороге, когда они шли в селение. И те, возвратившись, возвестили прочим; но и им не поверили. Наконец, явился самим одиннадцати, возлежавшим на вечери, и упрекал их за неверие и жестокосердие, что видевшим Его воскресшего не поверили. И сказал им: идите по всему миру и проповедуйте Евангелие всей твари. Кто будет веровать и креститься, спасен будет; а кто не будет веровать, осужден будет. Уверовавших же будут сопровождать сии знамения: именем Моим будут изгонять бесов; будут говорить новыми языками; будут брать змей; и если что́ смертоносное выпьют, не повредит им; возложат руки на больных, и они будут здоровы. И так Господь, после беседования с ними, вознесся на небо и воссел одесную Бога. А они пошли и проповедовали везде, при Господнем содействии и подкреплении слова последующими знамениями. Аминь.(Мк.16:9-20)
Хор: Слáва Тебé, Гóсподи, слáва Тебé.
Воскресéнiе Хрїстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрїстé, и святóе Воскресéнiе Твоé поéм и слáвим: Ты бо еси́ Бог наш, рáзве Тебé инóго не знáем, и҆́мя Твоé именýем. Прiиди́те вси вéрнiи, поклони́мся Святóму Хрїстóву Воскресéнiю: се бо прiи́де Крестóм рáдость всемý мíру. Всегдá благословя́ще Гóспода, поéм Воскресéнiе Егó: распя́тiе бо претерпéв, смéртiю смерть разруши́.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моé. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх роди́ мя мáти моя. Се бо и҆́стину возлюби́л еси́, безвéстная и тáйная премýдрости Твоея яви́л ми еси́. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отврати́ лицé Твоé от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéнiя Твоегó, и Дýхом Влады́чним утверди́ мя. Научý беззакóнныя путéм Твоим, и нечести́вiи к Тебé обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажи́, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Слáва Ѻтцý и Сы́ну и Святóму Дýху.
глас 6: Моли́твами апóстолов,/ Ми́лостиве, очи́сти// мнóжество согрешéнiй нáших.
И ны́не и прúсно и во вéки векóв. Амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моé. (Пс.50:3)
Стiхúра прáздника, глас 6: Днесь на небесéх гóрнiя си́лы нáше естествó зря́ще,/ дивя́щеся стрáннаго óбраза восхóду,/ недоумевáхуся друг ко дрýгу глагóлюще:/ кто Сей пришéдый?/ Ви́дяще же своегó Влады́ку,/ небéсная вратá взя́ти повелевáху:/ с ни́миже непрестáнно воспои́м/ с плóтiю отонýду пáки Грядýщаго,// я́ко Судiю́ всех и Бóга всеси́льна.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
ПЕРВЫЙ КАНОН ВОЗНЕСЕНИЯ, ГЛАС 5
(совмещенный со вторым каноном праздника, глас 4)
ПЕСНЬ 1
Iрмóс: Спасúтелю Бóгу,/ в мóри лю́ди немóкрыми ногáми настáвльшему,/ и фараóна со всевóинством потóпльшему,/ Томý едúному поúм,// я́ко прослáвися. (Двáжды)
Хор (припéв): Слáва Тебé, Бóже наш, слáва Тебé.
Чтец: Воспои́м вси лю́дiе,/ на рáмех херувíмских вознéсшуся со слáвою Хрiстý,/ и спосади́вшему нас одеснýю Отцá,// песнь побéдную: я́ко прослáвися.(Двáжды)
Хор: Слáва Тебé, Бóже наш, слáва Тебé.
Чтец: Ходáтая Бóгу и человéком Хрiстá,/ ли́цы áнгельстiи ви́девше, с плóтiю в вы́шних удивля́хуся,// соглáсно же воспевáху песнь побéдную: я́ко прослáвися.(Двáжды)
Хор: Слáва Тебé, Бóже наш, слáва Тебé.
Чтец: Я́вльшемуся Бóгу на горé Сiнáйстей,/ и закóн дáвшему богови́дцу Моисéю,/ от горы́ Елеóнскiя вознéсшемуся плóтiю,// Тому́ вси воспои́м: я́ко прослáвися.
Хор: Пресвятáя Богорóдице, спасù нас.
Богорóдичен: Пречи́стая Мáти Бóжiя,/ Воплощéннаго от Тебé, и от недр Роди́теля неотстýпльшаго Бóга/ непрестáнно моли́,// от вся́каго обстоя́нiя спасти́, я́же создá.
Канон вознесения глас 4 (второй)
Iрмóс: Отвéрзу устá моя́,/ и напóлнятся Дýха,/ и слóво отры́гну Царúце Мáтери,/ и явлю́ся, свéтло торжествýя,/ и воспою́, рáдуяся, Тоя́ вхождéнiе. (Двáжды)
Хор: Слáва Тебé, Бóже наш, слáва Тебé.
Чтец: Воскрéсл еси́ триднéвен, по естествý безсмéртный,/ и яви́лся еси́ единонáдесятим, и всем ученикóм,/ и востéкл еси́ Хрiстé ко Отцý,// óблаком носи́мь всех Твóрче.
Хор: Слáва Тебé, Бóже наш, слáва Тебé.
Чтец: Вопiéт я́вственно поя́ Давíд богодохновéнный,/ взы́де Госпóдь к небéсным, в воскликновéнiи и трубы́ шýме,// и к началосвéтному Отцý доспé.
Слáва Отцý и Сыну и Святóму Дýху.
Чтец: Состарéвшiйся, Гóсподи, мир мнóгими грехми́,/ обнови́в стрáстiю Твоéю и востáнiем Твои́м,/ возшéл еси́ носи́мь óблаком к пренебéсным:// слáва слáве Твоéй.
И ныне и прúсно и во вéки векóв. Аминь.
Богорóдичен: Влады́ку родилá еси́ всех, всенепорóчная Влады́чице,/ страсть вóльную прiи́мшаго,/ и возшéдша к Своемý Отцý,// Егóже не остáви, áще и плоть взят.
Катавáсiя Пятидеся́тницы (глас 4): Божéственным покровéн,/ медленоязы́чный мрáком,/ извитíйствова Богопи́санный закóн:/ ти́ну бо оттря́с очесé ýмнаго,/ ви́дит Сýщаго,/ и научáется Дýха рáзуму,// хваля́ Божéственными пéсньми.
ПЕСНЬ 3
Iрмóс: Сúлою Крестá Твоегó Хрiстé,/ утвердù моé помышлéнiе,/ во éже пéти и слáвити// спасúтельное Твоé Вознесéнiе. (Двáжды)
Хор: Слáва Тебé, Бóже наш, слáва Тебé.
Чтец: Возшéл еси́ Жизнодáвче Хрiстé ко Отцý,/ и вознéсл еси́ род наш Человеколю́бче,// неизречéнным благоутрóбiем Твои́м. (Двáжды)
Хор: Слáва Тебé, Бóже наш, слáва Тебé.
Чтец: Чи́ни áнгельстiи Спáсе,/ человéческое естествó ви́девше совосходя́щее Тебé,// непрестáнно удивля́еми воспевáху Тя.
Хор: Слáва Тебé, Бóже наш, слáва Тебé.
Чтец: Ужасáхуся áнгельстiи ли́цы Хрiстé,/ зря́ще Тя с телесéм вознéсшася,// и воспевáху святóе Твоé Вознесéнiе.
Хор: Слáва Тебé, Бóже наш, слáва Тебé.
Чтец: Естествó человéческое, Хрiстé,/ тлéнiем пáдшее возстáвил еси́,/ и восхóдом Твои́м вознéсл еси́,// и с Собóю нас прослáвил еси́.
Хор: Пресвятáя Богорóдице, спасù нас.
Богорóдичен: Моли́ непрестáнно Чи́стая,/ Произшéдшаго от ложéсн Твои́х,/ избáвитися прéлести дiáволи,// пою́щим Тя Мáтерь Бóжiю.
Глас 4
Iрмóс: Твоя́ песнослóвцы, Богорóдице,/ живы́й и незавúстный Истóчниче,/ лик себé совокýпльшiя, духóвно утвердù,/ в честнéм вхождéнiи Твоéм// венцéв слáвы сподóби. (Двáжды)
Хор: Слáва Тебé, Бóже наш, слáва Тебé.
Чтец: Возми́те вратá небéсная,/ се прiи́де Хрiстóс Царь твáри,/ в тéло обóлкся земнóе,// гóрнейшим глагóлаху си́лам дóльнейшiя.
Хор: Слáва Тебé, Бóже наш, слáва Тебé.
Чтец: Взыскáв Хрiстé, прельщéннаго прéлестiю змíевою Адáма,/ я́ко в сегó оболкíйся,/ возшéл еси́, и сел еси́ одеснýю, я́ко сопрестóлен Отцý,// пою́щим Áнгелом Тебé.
Слáва Отцý и Сыну и Святóму Дýху.
Чтец: Земля́ прáзднует и ликýет,/ рáдуется и нéбо, Вознесéнiем днесь Творцá твáри,// предъявлéнно соедини́вшаго разстоя́щаяся хотéнiем.
И ныне и прúсно и во вéки векóв. Аминь.
Богорóдичен: Смéрти роди́вши Разруши́теля,/ Еди́наго безсмéртнаго Бóга,/ Дéво Мáти Всечи́стая:/ Тогó при́сно умоли́,// умерщвля́ющiя моя́ стрáсти умори́ти, и спасти́ мя.
Катавáсiя Пятидеся́тницы (глас 4): Развéрзе утрóбы нечáдствовавшiя ýзы,/ досáду же неудоботерпи́му благочáдствующия,/ еди́на моли́тва прорóчицы дрéвле Áнны,/ нося́щiя дух сокрушéн,// к Си́льному, и Бóгу рáзумов.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Седáлен Вознесéнiя, глас 8: Всед на óблаки небéсныя,/ остáвив мир сýщим на земли́,/ возшéл и сел еси́ одеснýю Отцá,/ я́ко Единосýщен Семý сый и Дýху./ Áще бо и во плóти яви́лся еси́, но непрелóжен пребы́л еси́:/ тéмже чáеши совершéнiя конéц,/ суди́ти гряды́й на зéмлю мíру всемý./ Правосýде Гóсподи, пощади́ дýши нáша,/ прегрешéнiй оставлéнiе дáруя,// я́ко Бог ми́лостив, рабóм Твои́м.
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Всед на óблаки небéсныя,/ остáвив мир сýщим на земли́,/ возшéл и сел еси́ одеснýю Отцá,/ я́ко Единосýщен Семý сый и Дýху./ Áще бо и во плóти яви́лся еси́, но непрелóжен пребы́л еси́:/ тéмже чáеши совершéнiя конéц,/ суди́ти гряды́й на зéмлю мíру всемý./ Правосýде Гóсподи, пощади́ дýши нáша,/ прегрешéнiй оставлéнiе дáруя,// я́ко Бог ми́лостив, рабóм Твои́м.
ПЕСНЬ 4
Iрмóс: Услы́шах слух сúлы Крестá,/ я́ко рай отвéрзеся им,/ и возопúх:// слáва сúле Твоéй Гóсподи. (Двáжды)
Хор: Слáва Тебé, Бóже наш, слáва Тебé.
Чтец: Вознéслся еси́ во слáве, Áнгелов Царю́,/ Утéшителя нам от Отцá послáв./ Тéмже вопiéм:// слáва Хрiстé Вознесéнiю Твоемý. (Двáжды)
Хор: Слáва Тебé, Бóже наш, слáва Тебé.
Чтец: Я́ко взы́де Спас ко Отцý с плóтiю,/ удиви́шася Емý Áнгельская вóинства, и возопи́ша:// слáва Хрiстé Вознесéнiю Твоемý. (Двáжды)
Хор: Слáва Тебé, Бóже наш, слáва Тебé.
Чтец: Áнгельскiя си́лы гóрнейшим вопiя́ху:/ вратá возми́те, Хрiстý нáшему Царю́,// Егóже воспевáем вкýпе со Отцéм и Дýхом.
Хор: Пресвятáя Богорóдице, спасù нас.
Богорóдичен: Дéва роди́, и мáтерняя не познá,/ но Мáти ýбо есть, Дéвою же пребы́сть,// Ю́же воспевáюще, рáдуйся Богорóдице, взывáем.
Глас 4
Iрмóс: Седя́й в Слáве/ на Престóле Божествá/ во óблаце лéгце,/ прiúди Iисýс Пребожéственный,/ Нетлéнною Длáнiю/ и спасé зовýщiя:// слáва, Хрїстé, сúле Твоéй. (Двáжды)
Хор: Слáва Тебé, Бóже наш, слáва Тебé.
Чтец: Iисýс Жизнодáвец прiи́м, и́хже возлюби́,/ на Елеóнскую гóру восхóдит,/ и сих благослови́,/ и óблаком носи́мь О́тчая нéдра доспé,// я́же никáкоже остáвил.
Хор: Слáва Тебé, Бóже наш, слáва Тебé.
Чтец: Мир весь прáзднует ви́димый и неви́димый:/ в рáдости Áнгели ликýют,/ и человéцы славослóвяще непрестáнно Вознесéнiе,// плóтiю Соедини́вшагося нам блáгостiю.
Слáва Отцý и Сыну и Святóму Дýху.
Чтец: Разруши́вый держáву смéрти я́ко безсмéртный Гóсподи,/ безсмéртiе всем даровáл еси́ Человеколю́бче,/ и вознéслся еси́ во слáве,// зря́щим Тя честны́м ученикóм Iисýсе всеси́льне.
И ныне и прúсно и во вéки векóв. Аминь.
Богорóдичен: Блажéнно чрéво Твоé Всенепорóчная бысть:/ чрéво бо áдово преслáвно истощи́вшаго,/ несказáнно вмести́ти сподóбилася еси́,// Егóже моли́ спасти́ нас пою́щих Тя.
Катавáсiя Пятидеся́тницы (глас 4): Царю́ царéй,/ Яковы́й от Яковáго еди́н Слóве произшéдый,/ от Отцá безвинóвнаго,/ равномóщнаго Твоегó Дýха апóстолом и́стинно послáл еси́,/ я́ко Благодéтеля пою́щим:// слáва держáве Твоéй Гóсподи.
ПЕСНЬ 5
Iрмóс: У́тренююще вопiéм Ти/ Гóсподи, спасù ны:/ Ты бо есù Бог наш,// рáзве бо Тебé инóго не знáем. (Двáжды)
Хор: Слáва Тебé, Бóже наш, слáва Тебé.
Чтец: Испóлнив весéлiя вся́ческая Ми́лостиве,// к гóрним си́лам с плóтiю пришéл еси́. (Двáжды)
Хор: Слáва Тебé, Бóже наш, слáва Тебé.
Чтец: Áнгельскiя си́лы взéмлема Тебé ви́девше,// вратá, взывáху Царю́ нáшему, возми́те (Двáжды)
Хор: Слáва Тебé, Бóже наш, слáва Тебé.
Чтец: Апóстоли ви́девше возвышáема Спáса,// с трéпетом взывáху Царю́ нáшему: слáва Тебé.
Хор: Пресвятáя Богорóдице, спасú нас.
Богорóдичен: Дéву по рождествé поéм Тя Богорóдице,// Ты бо Бóга Слóва плóтiю мíрови родилá еси́.
Глас 4
Iрмóс: Ужасóшася вся́ческая/ о Божéственней слáве Твоéй:/ Ты бо, Неискусобрáчная Дéво,/ имéла есù во утрóбе над всéми Бóга/ и родилá есù Безлéтнаго Сы́на,/ всем, воспевáющим Тя,// мир подавáющая. (Двáжды)
Хор: Слáва Тебé, Бóже наш, слáва Тебé.
Чтец: Умертви́в смерть Твоéю смéртiю Гóсподи,/ взем и́хже возлюби́л еси́,/ возшéл еси́ на Мáсличную гóру святýю,// и оттýду востéкл еси́ Хрiстé к Твоемý Роди́телю, óблаком носи́мь.
Хор: Слáва Тебé, Бóже наш, слáва Тебé.
Чтец: Стрáнно Твоé рождествó, стрáнно Твоé воскресéнiе,/ стрáнно и стрáшно Твоé Жизнодáвче, éже от горы́ Божéственное Вознесéнiе,/ éже изобразýя Илiá четверокóнный восхождáше,// воспевáя Тя Человеколю́бче.
Слáва Отцý и Сыну и Святóму Дýху.
Тропáрь: Зря́щим апóстолом вещáху Áнгели:/ мýжiе галiлéйстiи, что чудитéся Вознесéнiю Жизнодáвца Хрiстá:/ Сей прiи́дет пáки на зéмлю// суди́ти ми́ру всемý, я́ко Судiя́ прáведнейшiй.
И ныне и прúсно и во вéки векóв. Аминь.
Богорóдичен: Дéву сохрани́в Тя по рождествé нетлéнну,/ восхóдит Хрiстóс ко Отцý Богороди́тельнице, Егóже не остáви,/ áще и плоть прiя́т из Тебé, мы́сленную же и одушевлéнную,// за ми́лость неизречéнную.
Катавáсiя Пятидеся́тницы (глас 4): Реши́тельное очищéнiе грехóв,/ огнедохновéнную прiими́те Дýха рóсу,/ о чáда светообрáзная церкóвная./ Ны́не от Сióна бо изы́де закóн,// языкоогнеобрáзная Дýха благодáть.
ПЕСНЬ 6
Iрмóс: Обы́де мя бéздна,/ гроб мне кит бысть,/ аз же возопúх к Тебé, Человеколю́бцу,// и спасé мя деснúца Твоя́, Гóсподи. (Двáжды)
Хор: Слáва Тебé, Бóже наш, слáва Тебé.
Чтец: Взыгрáшася апóстоли,/ зря́ще на высотý днесь Зижди́теля взéмлема,/ уповáнiем Дýха,// и стрáхом зовя́ху: слáва восхóду Твоемý. (Двáжды)
Хор: Слáва Тебé, Бóже наш, слáва Тебé.
Чтец: Предстáша Áнгели,/ вопiю́ще Хрiстé ученикóм Твои́м:/ и́мже óбразом ви́десте Хрiстá восходя́ща с плóтiю,// пáки прiи́дет Прáведный всех Судiя́. (Двáжды)
Хор: Слáва Тебé, Бóже наш, слáва Тебé.
Чтец: Я́ко ви́деша Тя Спáсе наш небéсныя си́лы,/ на высотý взéмлема с тéлом, взывáху, глагóлюще:// вели́ко Влады́ко, человеколю́бiе Твоé.
Хор: Пресвятáя Богорóдице, спасù нас.
Богорóдичен: Купинý Тя неопали́мую, и гóру,/ и лéствицу одушевлéнную, и дверь небéсную// достóйно слáвим Марíе слáвная, правослáвных похвалó.
Глас 4
Iрмóс: Божéственное сié и всечестнóе/ совершáюще прáзднество,/ Богомýдрiи, Богомáтере,/ прiидúте, рукáми восплéщим,// от Нея́ рóждшагося Бóга слáвим. (Двáжды)
Хор: Слáва Тебé, Бóже наш, слáва Тебé.
Чтец: Да кáплют нам свы́ше óблацы весéлiе вéчное,/ Хрiстóс бо, óблаком я́ко Херувíмы носи́мый,// к Своемý Отцý восхóдит днесь.
Хор: Слáва Тебé, Бóже наш, слáва Тебé.
Чтец: Плóти яви́вся подóбiем,/ прéжде разстоя́щаяся собрáл еси́ во еди́но Человеколю́бче,/ и вознéслся еси́ Щéдре в небéсная,// зря́щим Тя ученикóм Твои́м.
Слáва Отцý и Сыну и Святóму Дýху.
Чтец: Что червлéны ри́зы плóти соедини́вшагося дебельствý,/ святíи Áнгели Хрiстá зря́ще вещáху,// стрáсти честны́я Божéственныя нося́ща óбразы.
И ныне и прúсно и во вéки векóв. Аминь.
Богорóдичен: Поéм Отрокови́це зачáтiе,/ поéм Твоé неизречéнное рождествó,// и́мже избáвихомся Чи́стая тли и озлоблéнiя,// и мрáчнаго áдова затворéнiя.
Катавáсiя Пятидеся́тницы (глас 4): Очищéнiе нам Хрiстé/ и спасéнiе Влады́ко,/ возсiя́л еси́ от Дéвы,/ да я́ко прорóка/ от звéря морскáго пéрсей Ióну,// от тли исхити́ши, всегó Адáма всерóдна пáдшаго.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Кондáк Вознесéнiя, глас 6: Éже о нас испóлнив смотрéнiе,/ и я́же на землѝ соедини́в Небéсным,/ вознéслся есѝ во слáве, Хрiстé Бóже наш,/ никáкоже отлучáяся,/ но пребывáя неотстýпный,/ и вопiя́ лю́бящим Тя:// Аз есмь с вáми, и никтóже на вы.
Íкос: Я́же земли́ на земли́ остáвившiи,/ я́же пéпельная пéрсти уступáющiи, прiиди́те воспря́нем,/ и на высотý возведéм óчи и мы́сли,/ впери́м ви́ды, вкýпе и чýвства, на небéсная вратá смéртнiи,/ непщýим бы́ти в Мáсличной горé,/ и взирáти на Избавля́ющаго на óблацех носи́ма./ Отонýду бо Госпóдь на небесá востечé,/ и тáмо даролюбéзны дáры раздая́ апóстолом Свои́м,/ утéшив я́ я́ко Отéц, и утверди́в я́,/ настáвив я́ко сынóв, и речé к ним: не разлучáюся вас,// Аз есмь с вáми, и никтóже на вы.
ПЕСНЬ 7
Iрмóс: В пещù óгненней/ песнослóвцы спасы́й óтроки,// благословéн Бог отéц нáших. (Двáжды)
Хор: Слáва Тебé, Бóже наш, слáва Тебé.
Чтец: На óблацех свéта вознесы́йся, и спасы́й мiр,// благословéн Бог отéц нáших. (Двáжды)
Хор: Слáва Тебé, Бóже наш, слáва Тебé.
Чтец: На рáму Спáсе, заблýждшее взем естествó, вознéсся,// Бóгу и Отцý привéл еси́.
Хор: Слáва Тебé, Бóже наш, слáва Тебé.
Чтец: Возшéдый во плóти к безплóтному Отцý,// благословéн Бог отéц нáших.
Хор: Слáва Тебé, Бóже наш, слáва Тебé.
Чтец: Умерщвлéное нáше грехóм естествó взем,// Твоемý свóйственному Отцý, Спáсе, привéл еси́.
Хор: Пресвятáя Богорóдице, спасú нас.
Богорóдичен: От Дéвы рóждься, Ю́же Богорóдицу содéлал еси́,// благословéн Бог отéц нáших.
Глас 4
Iрмóс: Не послужúша твáри Богомýдрiи,/ пáче Создáвшаго,/ но, óгненное прещéнiе мýжески попрáвше,/ рáдовахуся, пою́ще:// препéтый отцéв Госпóдь и Бог, благословéн есù. (Двáжды)
Хор: Слáва Тебé, Бóже наш, слáва Тебé.
Чтец: Свéтлый Тя Свет сýща, подъя́т óблак Гóсподи,/ от земли́ пáче умá воспрiéмлема/ и небéснiи собóри восхвали́ша со апóстолы, глагóлюще:// Бóже благословéн еси́.
Хор: Слáва Тебé, Бóже наш, слáва Тебé.
Чтец: Рукáма вси рáдующеся восплéщим, Вознесéнiем Хрiстóвым, и воскли́кнем:/ взы́де Бог во глáсе трýбне, и сéде одеснýю,// я́ко сопрестóлен Отцý во вéки.
Слáва Отцý и Сыну и Святóму Дýху.
Чтец: Поя́ дрéвле Моисéй вели́кiй, взывáше:/ да поклóнятся восходя́щу Хрiстý небéснiи Áнгели, я́ко всех Царю́,// емýже зовéм: отцéв Гóсподи и Бóже благословéн еси́.
И ныне и прúсно и во вéки векóв. Аминь.
Богорóдичен: О чудéс преслáвных!/ Кáко вмести́ла еси́/ Бóга невмести́маго Богорáдованная, плóтiю обнищáвшаго,/ и со слáвою мнóгою в небéсная вознéсшагося днесь,// и оживи́вшаго человéки?
Катавáсiя Пятидеся́тницы (глас 4): Соглáсная возшумé оргáнская песнь,/ почитáти златосотворéнный бездýшный истукáн:/ Утéшителева же светонóсная благодáть почествýет,/ éже вопи́ти:// Трóице Еди́ная, равноси́льная, безначáльная, благословéна еси́.
ПЕСНЬ 8
Iрмóс: Из Отцá прéжде век рождéннаго Сы́на и Бóга,/ и в послéдняя лéта воплощéннаго от Дéвы Мáтере,/ свящéнницы пóйте,// лю́дiе превозносúте во вся вéки. (Двáжды)
Хор: Слáва Тебé, Бóже наш, слáва Тебé.
Чтец: Во двою́ существý возлетéвшаго Жизнодáвца Хрiстá на небесá со слáвою,/ и Отцу́ соседя́щаго,// свящéнницы пóйте, лю́дiе превозноси́те во вся вéки. (Двáжды)
Хор: Слáва Тебé, Бóже наш, слáва Тебé.
Чтец: От рабóты и́дольскiя тварь избáвившаго,/ и предстáвившаго ту свобóдну Твоемý Отцý,/ Тебé Спáсе поéм,// и Тебé превознóсим во вся вéки. (Двáжды)
Хор: Слáва Тебé, Бóже наш, слáва Тебé.
Чтец: Свои́м схождéнiем низложи́вшаго супостáта,/ и Свои́м возшéствiем вознéсшаго человéки,// свящéнницы пóйте, лю́дiе превозноси́те во вся вéки.
Хор: Пресвятáя Богорóдице, спасù нас.
Богорóдичен: Херуви́мов превы́шшая яви́лася еси́ Богорóдице Чи́стая,/ во чрéве Твоéм си́ми Носи́маго носи́вшая:// Егóже со безплóтными, человéцы славослóвим во вся вéки.
Глас 4
Iрмóс: Óтроки благочестúвыя в пéщи/ Рождествó Богорóдичо спаслó есть;/ тогдá ýбо образýемое,/ ны́не же дéйствуемое,/ вселéнную всю воздвизáет пéти Тебé:/ Гóспода пóйте, делá,// и превозносúте Егó во вся вéки. (Двáжды)
Хор: Слáва Тебé, Бóже наш, слáва Тебé.
Чтец: Яви́шася ýмове апóстолом в Вознесéнiи, и вещáху:/ что взирáюще стоитé дивя́щеся?/ Сей восходя́й в небéсная,/ прiи́дет и пáки суди́ти и́же на земли́ человéком,// Судiя́ сый Еди́н.
Хор: Слáва Тебé, Бóже наш, слáва Тебé.
Чтец: Дади́м Бóгу вели́чiе,/ хвалы́ соглáсiе воскли́кнем,/ воспои́м, ликýим, рукáми же восплéщим:/ взы́де Бог наш на небесá от земли́,/ Áнгелом, Архáнгелом пою́щим Сегó,// я́ко Влады́ку и Творцá всех.
Благословúм Отцá, и Сы́на, и Святáго Дýха, Гóспода.
Тропáрь: Взя́тся превы́ше Áнгел естествó нáше, дрéвле отпáдшее,/ и на престóле посаждéно бысть Божéственне, пáче смы́сла./ Прiиди́те, торжествýим и воззовéм:// Гóспода пóйте делá, и превозноси́те во вся вéки.
И ныне и прúсно и во вéки векóв. Аминь.
Богорóдичен: Се Сын Твой Богорóдице,/ плени́в Крестóм Свои́м смерть, воскрéсе триднéвен,/ и ученикóм Свои́м я́влься, востечé к небéсным:/ с ни́миже Тебé покланя́ющеся// поéм и славослóвим во вся вéки.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя Пятидеся́тницы (глас 4): Разрешáет ýзы,/ и орошáет плáмень,/ трисвéтлый Богоначáлiя Ѻ́браз:/ пою́т óтроцы,/ благослови́т же Еди́наго Спáса и Вседéтеля,/ я́ко Благодéтеля// сотворéнная вся́ческая тварь.
ПЕСНЬ 9
Iрмóс: Тя пáче умá и словесé, Мáтерь Бóжiю,/ в лéто Безлéтнаго неизречéнно рóждшую,// вéрнiи, единомýдренно величáем.
Хор: Величáй душé моя́,// вознéсшагося от землú на нéбо, Хрiстá Жизнодáвца.
Iрмóс: Тя пáче умá и словесé, Мáтерь Бóжiю,/ в лéто Безлéтнаго неизречéнно рóждшую,// вéрнiи, единомýдренно величáем.
Хор: Величáй душé моя́,// вознéсшагося от землù на нéбо, Хрiстá Жизнодáвца.
Чтец: Тебé Избáвителя ми́ра Хрiстá Бóга,/ апóстоли ви́дяще Божéственно возвышáема,// со стрáхом игрáюще величáху.
Хор: Величáй душé моя́,// вознéсшагося от землù на нéбо, Хрiстá Жизнодáвца.
Чтец: Тебé Избáвителя ми́ра Хрiстá Бóга,/ апóстоли ви́дяще Божéственно возвышáема,// со стрáхом игрáюще величáху.
Хор: Величáй душé моя́,// вознéсшагося от землù на нéбо, Хрiстá Жизнодáвца.
Чтец: Твою́ обожи́вшуюся плоть/ зря́ще Хрiстé, на высотé Áнгели,/ друг ко дрýгу глагóлаху:// вои́стинну Сей есть Бог наш.
Хор: Величáй душé моя́,// вознéсшагося от землù на нéбо, Хрiстá Жизнодáвца.
Чтец: Тебé безплóтных чи́нове Хрiстé Бóже,/ на óблацех взéмлема ви́дяще, взывáху:// слáвы Царю́, вратá возми́те.
Хор: Величáй душé моя́,// вознéсшагося от землù на нéбо, Хрiстá Жизнодáвца.
Чтец: Тебé сошéдшаго дáже до послéдних земли́,/ и человéка спáсшаго,// и восхождéнiем Твои́м возвы́сившаго, сегó величáем.
Хор: Величáй душé моя́,// вознéсшагося от землù на нéбо, Хрiстá Жизнодáвца.
Чтец: Рáдуйся, Богорóдице Мáти Хрiстá Бóга,/ Егóже родилá еси́,/ днесь от земли́ возноси́ма// со апóстолы зря́щи, возвеличáла еси́.
Глас 4
Хор: Áнгели восхождéнiе Влады́ки зря́ще, ужасáхуся,// кáко со слáвою взя́тся от землù на гóрняя.
Iрмóс: Всяк земнорóдный/ да взыгрáется, Дýхом просвещáемь,/ да торжествýет же Безплóтных умóв естествó,/ почитáющее свящéнное торжествó Богомáтере,/ и да вопiéт:/ рáдуйся, Всеблажéнная,// Богорóдице, Чи́стая Приснодéво.
Хор: Áнгели восхождéнiе Влады́ки зря́ще, ужасáхуся,// кáко со слáвою взя́тся от землù на гóрняя.
Iрмóс: Всяк земнорóдный/ да взыгрáется, Дýхом просвещáемь,/ да торжествýет же Безплóтных умóв естествó,/ почитáющее свящéнное торжествó Богомáтере,/ и да вопiéт:/ рáдуйся, Всеблажéнная,// Богорóдице, Чи́стая Приснодéво.
Хор: Áнгели восхождéнiе Влады́ки зря́ще, ужасáхуся,// кáко со слáвою взя́тся от землù на гóрняя.
Чтец: О дарóв пáче постижéнiя!/ О тáинства стрáшнаго!/ Всéми бо влады́чествуяй, от земли́ отходя́ к небéсным,/ ученикóм послá Дýха Святáго,/ просвети́вшаго сих смысл,// и óгненны сотвори́вшаго благодáтiю.
Хор: Áнгели восхождéнiе Влады́ки зря́ще, ужасáхуся,// кáко со слáвою взя́тся от землù на гóрняя.
Чтец: Полцы́ учени́честiи, Госпóдь речé, вы седи́те во Iерусали́ме,/ и Аз низпослю́ вам Утéшителя другáго,/ Отцý сопрестóльна, и Мне равночéстна,// Егóже ви́дите взимáема, и óблаком свéтлым носи́ма.
Хор: Áнгели восхождéнiе Влады́ки зря́ще, ужасáхуся,// кáко со слáвою взя́тся от землù на гóрняя.
Чтец: Взя́тся я́ве великолéпiе вы́ше небéс, плóтiю обнищáвшаго,/ и соседéнiем Отцá почтéся естествó нáше отпáдшее:/ торжествýим, и соглáсно вси воскли́кнем,// и восплéщим рукáми рáдующеся.
Хор: Áнгели восхождéнiе Влады́ки зря́ще, ужасáхуся,// кáко со слáвою взя́тся от землù на гóрняя.
Чтец: Свет от Свéта возсiя́вый, Всенепорóчная, из Тебé возсiя́,/ и чéрность безбóжiя всю разруши́,/ и в нощи́ спя́щих просвети́.// Сегó рáди вси по дóлгу Тя во вéки при́сно ублажáем.
Хор: Áнгели восхождéнiе Влады́ки зря́ще, ужасáхуся,// кáко со слáвою взя́тся от землù на гóрняя.
Катавáсiя Пятидеся́тницы (глас 4): Рáдуйся Цари́це,/ Матеродéвственная слáво:/ вся́ка бо удобообращáтельная благоглагóливая устá/ витíйствовати не мóгут,/ Тебé пéти достóйно:/ низумевáет же ум всяк, Твоé Рождествó разумéти.// Тéмже Тя соглáсно слáвим.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Ексапостiлáрiй (светилен прáздника) самоглáсен: Ученикóм зря́щим Тя,/ вознéслся еси́ Хрiстé ко Отцý соседя́,/ Áнгели предтекýще зовя́ху:/ возми́те вратá, возми́те,// Царь бо взы́де к начáльному Свéту слáвы.
Слáва Ѻтцý и Сы́ну и Святóму Дýху.
Ученикóм зря́щим Тя,/ вознéслся еси́ Хрiстé ко Отцý соседя́,/ Áнгели предтекýще зовя́ху:/ возми́те вратá, возми́те,// Царь бо взы́де к начáльному Свéту слáвы.
И ны́не и прúсно и во вéки векóв. Амúнь.
Ученикóм зря́щим Тя,/ вознéслся еси́ Хрiстé ко Отцý соседя́,/ Áнгели предтекýще зовя́ху:/ возми́те вратá, возми́те,// Царь бо взы́де к начáльному Свéту слáвы.
ХВАЛИТНЫ
Хор, глас 1: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.
[В приходской практике пропускается до стихир]Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речé, и бы́ша, Той повелé, и создáшася. Постáви я́ в век и в век вéка, повелéнiе положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
[В приходской практике пропускается до стихир]Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сы́нове Сióни возрáдуются о Царé своéм. Да восхвáлят и҆́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остри́ в рукáх их: сотвори́ти отмщéнiе во языцех, обличéнiя в лю́дех, связáти цари́ их пýты, и слáвныя их ручными окóвы желéзными,
[Пропускается до стихир]Сотвори́ти в них суд напи́сан: слáва сiя бýдет всем преподóбным Егó. Хвали́те Бóга во святы́х Егó, хвали́те Егó в утвержéнiи си́лы Егó.
На 6: Хвалúте Егó на сúлах Егó, хвалúте Егó по мнóжеству велúчествiя Егó.
Стiхúры Вознесéнiя, глас 1: Áнгельски и́же в ми́ре торжествýим,/ на престóле слáвы Бóгу носи́мому,/ взывáюще пéнiе:/ Свят еси́ Ѻ́тче небéсный,/ Соприсносýщный Слóве,// Свят еси́ и Дýше Всесвяты́й.
Хвалúте Егó во глáсе трýбнем, хвалúте Егó во псалтúри и гýслех.
Стiхúра: Áнгельски и́же в ми́ре торжествýим,/ на престóле слáвы Бóгу носи́мому,/ взывáюще пéнiе:/ Свят еси́ Ѻ́тче небéсный,/ Соприсносýщный Слóве,// Свят еси́ и Дýше Всесвяты́й.
На 4. Хвалúте Егó в тимпáне и лúце, хвалúте Егó во стрýнах и оргáне.
Стiхúра: Начáльницы Áнгелов смотря́юще, Спáсе, восхождéнiя стрáнное,/ недоумевáхуся друг ко дрýгу:/ что видéнiе сié?/ Человéк ýбо зрáком ви́димый,/ я́коже Бог, превы́ше небéс// с плóтiю восхóдит.
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Стiхúра: Галилéане зря́ще Тя вознесéнна,/ от Мáсличныя горы́ с тéлом, Слóве,/ слы́шаху Áнгелов вопiю́щих им:/ что стоитé зря́ще?/ Сей прiи́дет пáки с плóтiю,// и́мже óбразом ви́десте.
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Глас 2: Роди́лся еси́ я́ко Сам восхотéл еси́,/ яви́лся еси́ я́ко Сам извóлил еси́,/ пострадáл еси́ плóтiю Бóже наш,/ из мéртвых воскрéсл еси́ попрáв смерть./ Вознéслся еси́ во слáве, вся́ческая исполня́яй,/ и послáл еси́ нам Дýха Божéственнаго,// éже воспевáти и слáвити Твоé Божествó.
Вóзглас: Слáва Тебé, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрїстé, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцá, поми́луй нас. Яко Ты есѝ Един Свят; Ты есѝ Един Госпóдь, Iисýс Хрїстóс, в слáву Бóга Отцá, ами́нь.
Продолженiе здесь