Неделя пятая Великого поста, прп. Марии Египетской. Глас 1. ОБЕДНИЦА (Изобразительные)
2 апрéля 2023 гóда. Недéля пя́тая Велúкaго постá. Преподóбной Марíи Егúпетской. Глас 1. Воскрéсная прáздничная слýжба для домáшнего (келéйнаго) совершéнiя. Послéдованiе изобразúтельных.
Прежде глагóли часы. Аще имаши произволéнiе то чти ýтреню с канóном и пéрвым чáсом, áще же ни, тóкмо часы.
ЧИН ОБЕДНИЦЫ
Глагóли сúце: Благословѝ, душé моя́, Гóспода,/ благословéн есѝ Гóсподи.
Псалом 102
Благословѝ, душé моя́, Гóспода,/ и вся внýтренняя моя и҆́мя святóе Егó./ Благословѝ, душé моя, Гóспода,/ и не забывáй всех воздая́нїй Егó,/ очищáющаго вся беззакóнїя твоя́,/ исцеля́ющаго вся недýги твоя́,/ избавля́ющаго от истлéнiя живóт твой,/ венчáющаго тя ми́лостїю и щедрóтами,/ исполня́ющаго во благи́х желáнїе твоé:/ обновится я́ко óрля юность твоя́./ Творя́й ми́лостыни Госпóдь,/ и судьбý всем оби́димым./ Сказá путѝ Своя́ Моисéови,/ сыновóм Iзрáилевым хотéнїя Своя́:/ Щедр и Ми́лостив Госпóдь,/ Долготерпели́в и Многоми́лостив./ Не до концá прогнéвается,/ нижé во век враждýет,/ не по беззакóнїем нáшим сотвори́л есть нам,/ нижé по грехóм нáшым воздáл есть нам./ Я́ко по высотé небéсней от землѝ,/ утверди́л есть Госпóдь ми́лость Свою́ на боя́щихся Егó./ Ели́ко отстоят востóцы от зáпад,/ удáлил есть от нас беззакóнїя нáша./ Я́коже щéдрит отéц сы́ны,/ ущéдри Госпóдь боя́щихся Егó./ Я́ко Той познá создáнїе нáше,/ помянý, яко персть есмы́./ Человéк, яко травá днíе eгó,/ яко цвет сéльный, тáко оцветéт,/ яко дух прóйде в нем,/ и не бýдет, и не познáет ктомý мéста своегó./ Ми́лость же Госпóдня от вéка и до вéка на боя́щихся Егó,/ и прáвда Егó на сынéх сынóв, храня́щих завéт Егó, и пóмнящих зáповеди Егó твори́ти я./ Госпóдь на Небесѝ уготóва Престóл Свой,/ и Цáрство Егó всéми обладáет./ Благослови́те Гóспода вси Áнгели Егó,/ си́льнїи крéпостїю, творя́щїи слóво Егó, услышати глас словéс Егó./ Благослови́те Гóспода вся Си́лы Егó,/ слýги Егó, творя́щїи вóлю Егó./ Благослови́те Гóспода вся делá Егó,/ на всяком мéсте влады́чества Егó.
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Благослови́, душé моя, Гóспода,/ и вся внýтренняя моя и҆́мя святóе Егó./ Благословéн еси, Гóсподи.
Слáва Ѻтцý и Сы́ну и Святóму Дýху.
Псалом 145
Хвали́, душé моя, Гóспода./ Восхвалю́ Гóспода в животé моéм,/ пою Бóгу моемý, дóндеже есмь./ Не надéйтеся на кня́зи, на сы́ны человéческїя,/ в ни́хже несть спасéнїя./ Изы́дет дух eгó/ и возврати́тся в зéмлю свою́./ В той день поги́бнут вся помышлéнїя eгó./ Блажéн, eмýже Бог Iáковль Помóщник егó,/ уповáнiе eгó на Гóспода Бóга своегó,/ сотвóршаго нéбо и зéмлю,/ мóре и вся, я́же в них,/ храня́щаго и҆́стину в век,/ творя́щаго суд оби́димым,/ даю́щаго пи́щу áлчущим./ Госпóдь реши́т оковáнныя./ Госпóдь умудря́ет слепцы́./ Госпóдь возвóдит низвéрженныя./ Госпóдь лю́бит прáведники./ Госпóдь храни́т пришéльцы,/ си́ра и вдову прїи́мет/ и путь грéшных погуби́т./ Воцари́тся Госпóдь во век,/ Бог твой, Сióне, в род и род.
И ны́не и прúсно и во вéки векóв. Амúнь.
Единорóдный Сы́не и Слóве Бóжiй, Безсмéртен Сый/ и извóливый спасéнїя нáшего рáди/ воплоти́тися от Святы́я Богорóдицы и Приснодéвы Марíи,/ непрелóжно вочеловéчивыйся,/ распны́йся же, Хрїстé Бóже, смéртїю смерть попрáвый,/ Един Сый Святы́я Трóицы,/ спрославля́емый Отцý и Святóму Дýху, спасѝ нас.
И поем Блаженны с тропарями из Октоиха
Хор: Во Цáрствiи Твоéм помянú нас, Гóсподи,/ егдá прiúдеши, во Цáрствiи Твоéм.
На 12. Хор: Блажéни нúщiи дýхом,/ я́ко тех есть Цáрство Небéсное.
Хор: Блажéни плáчущiи,/ я́ко тíи утéшатся.
На 10. Хор: Блажéни крóтцыи,/ я́ко тíи наслéдят зéмлю.
Хор: Блажéни áлчущiи и жáждущiи прáвды,/ я́ко тíи насы́тятся.
На 8. Хор: Блажéни мúлостивiи,/ я́ко тíи помúловани бýдут.
Чтец (стiхúры воскрéсные, глас 1): Снéдiю изведé из рая́ враг Адáма:/ Крестóм же разбóйника введé Хрїстóс вонь,/ помяни́ мя, зовýща,// егдá прiи́деши во Цáрствiи Твоéм.
Хор: Блажéни чúстiи сéрдцем,/ я́ко тíи Бóга ýзрят.
Чтец: Покланя́юся страстéм Твои́м,/ славослóвлю и Воскресéнiе со Адáмом и разбóйником,/ со глáсом свéтлым вопiю́ Ти:/ помянѝ мя Гóсподи,// егдá прiи́деши во Цáрствiи Твоéм.
На 6. Хор: Блажéни миротвóрцы,/ яко тíи сы́нове Бóжiи нарекýтся.
Чтец: Распя́лся еси безгрéшне,/ и во грóбе положи́лся есѝ волею,/ но воскрéсл есѝ яко Бог,/ совоздви́гнувый Себé Адáма,/ помянѝ мя, зовýща,// егдá прiи́деши во Цáрствiи Твоéм.
Хор: Блажéни изгнáни прáвды рáди,/ я́ко тех есть Цáрство Небéсное.
Чтец: Храм Твой телéсный триднéвным Воскреси́вый погребéнiем,/ со Адáмом, и и҆́же от Адáма, воскреси́л есѝ Хрїстé Бóже:/ помяни́ нас зовýщих,// егдá прiи́деши во Цáрствiи Твоéм.
На 4. Хор: Блажéни естé, егдá понóсят вам,/ и изженýт, и рекýт всяк зол глагóл на вы лжýще Менé рáди.
Чтец: Мvронóсицы прiидóша плáчуща,/ на гроб Твой Хрїстé Бóже, зелó рáно:/ и в бéлых ризах обретóша Áнгела седя́ща,/ что и҆́щете; зовýща.// Воскрéсе Хрїстóс, не рыдáйте прóчее.
Хор: Рáдуйтеся и веселúтеся, я́ко мзда вáша мнóга на Небесéх.
Чтец: Апóстоли Твои Гóсподи/ на гóру, áможе повелéл еси им, пришéдше Спáсе,/ и Тя ви́девше поклони́шася.// И҆́хже и послáл еси во язы́ки учи́ти и крести́ти я.
Хор: Слáва Ѻтцý и Сы́ну и Святóму Дýху.
Чтец (Трóичен): Отцý поклони́мся,/ и Сы́на славослóвим,/ и Пресвятáго Дýха вкýпе воспои́м, зовýще и глагóлюще:// Всесвятáя Трóице, спаси́ всех нас.
Хор: И ны́не и прúсно и во вéки векóв. Амúнь.
Богорóдичен: Мáтерь Твою́ привóдят Ти в моли́тву, лю́дiе Твои́, Хрїстé:/ мольбáми Ея́ щедрóты Твоя́ даждь нам, Благíй,// да Тя прославля́ем, из грóба нам возсiя́вшаго.
Тропари и кондаки
Тропáрь воскрéсный, глас 1: Кáмени запечáтану от iудéй/ и вóином стрегýщим Пречи́стое Тéло Твоé,/ воскрéсл еси триднéвный, Спáсе,/ дáруяй мíрови жизнь./ Сегó рáди си́лы небéсныя вопiя́ху Ти, Жизнодáвче:/ слáва Воскресéнiю Твоемý, Хрїстé,/ слáва Цáрствiю Твоемý,// слáва смотрéнiю Твоемý, еди́не Человеколю́бче.
Тропáрь Трióди (прп. Марíи), глас 8: В тебé, мáти, извéстно спасéся éже по óбразу,/ прiи́мши бо крест, послéдовала еси́ Хрїстý,/ и дéющи учи́ла еси́ презирáти ýбо плоть, прехóдит бо,/ прилежáти же о души́, вéщи безсмéртней.// Тéмже и со Áнгелы срáдуется, преподóбная Марíе, дух твой.
Слáва Отцý и Сы́ну и Святóму Дýху.
Кондáк Трióди (прп. Марíи), глaс 3: Блудáми пéрвее преиспóлнена вся́ческими,/ Хрїстóва невéста днесь покая́нiем яви́ся,/ Áнгельское жи́тельство подражáющи,/ дéмоны Крестá орýжiем погубля́ет./ Сегó рáди Цáрствiя невéста яви́лася еси́,/ Марíе преслáвная.
И ны́не и прúсно и во вéки векóв. Амúнь.
Кондáк воскрéсный, глас 1: Воскрéсл еси́, я́ко Бог, из грóба во слáве,/ и мiр совоскреси́л есѝ;/ и естествó человéческое я́ко Бóга воспевáет Тя, и смерть исчезé;/ Адáм же ликýет, Влады́ко;/ Éва ны́не от уз избавля́ема рáдуется, зовýщи:// Ты есѝ, И҆́же всем подая́, Хрїстé, воскресéнiе.
Трисвятое
Хор: Святы́й Бóже,/ Святы́й Крéпкїй,/ Святы́й Безсмéртный, поми́луй нас. (3 раза)
Хор: Слáва Отцý и Сы́ну и Святóму Дýху, и ны́не и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкїй,/ Святы́й Безсмéртный, поми́луй нас.
Прокимен воскресный, глас 1
Чтец: Прокíмен, глас пéрвый, псалóм Давíдов: Бýди, Гóсподи, ми́лость Твоя́ на нас, я́коже уповáхом на Тя. (Пс.32:22)
Хор: Бýди, Гóсподи, мúлость Твоя́ на нас,/ я́коже уповáхом на Тя.
Чтец:Рáдуйтеся, прáведнiи, о Гóсподе, прáвым подобáет похвалá. (Пс.32:1)
Хор: Бýди, Гóсподи, мúлость Твоя́ на нас,/ я́коже уповáхом на Тя.
Прокимен новомучеников, глaс 7
Чтец: Прокíмен, глас четвéртый: Ди́вен Бог во святы́х Свои́х, Бог Iзрáилев.(Пс.67:36А)
Хор: Дúвен Бог во святы́х Своúх, Бог Iзрáилев.
АПОСТОЛ
Чтец: Ко Еврéем послáнiя святáго апóстола Пáвла чтéнiе.
(Евр.зач.321Б(от полý): Брáтiе, Хрїстóс пришéд Архiерéй грядýщих благ, бóльшею и совершéннейшею ски́нiею, нерукотворéнною, си́речь, не сея́ твáри, ни крóвiю кóзлею, ни тéльчею, но Своéю Крóвiю, вни́де eди́ною во святáя, вéчное искуплéнiе обреты́й. Áще бо кровь кóзлiя и тéльчая, и пéпел ю́нчiй кропя́щiй осквернéныя, освящáет к плóтней чистотé, кольми́ пáче Кровь Хрїстóва, И́же Дýхом Святы́м Себé принесé непорóчна Бóгу, очи́стит сóвесть нáшу от мéртвых дел, во éже служи́ти нам Бóгу жи́ву и и́стинну.
[Русский синодальный перевод]Братья, Христос, Первосвященник будущих благ, придя с большею и совершеннейшею скиниею, нерукотворенною, то есть не такового устроения, и не с кровью козлов и тельцов, но со Своею Кровию, однажды вошел во святилище и приобрел вечное искупление. Ибо если кровь тельцов и козлов и пепел телицы, через окропление, освящает оскверненных, дабы чисто было тело, то кольми паче Кровь Христа, Который Духом Святым принес Себя непорочного Богу, очистит совесть нашу от мертвых дел, для служения Богу живому и истинному!(Евр.9:11-14)
(Гал.зач.208А): Брáтiе, прéжде пришéствiя вéры, под закóном стрегóми бéхом, затворéни в хотя́щую вéру откры́тися. Тéмже закóн пéстун нам бысть во Хрїстá, да от вéры оправди́мся. Пришéдши же вéре, ужé не под пéстуном eсмы́. Вси бо вы сы́нове Бóжiи eстé вéрою о Хрїстé Iисýсе: eли́цы бо во Хрїстá крести́стеся, во Хрїстá облекóстеся. Несть Iудéй, ни éллин; несть раб, ни свобóдь; несть мýжескiй пол, ни жéнскiй; вси бо вы eди́но eстé о Хрїстé Iисýсе. Áще ли вы Хрїстóвы, ýбо Авраáмле сéмя eстé, и по обетовáнiю наслéдницы.
[Русский синодальный перевод]Братья, а до пришествия веры мы заключены были под стражею закона, до того времени, как надлежало открыться вере. Итак закон был для нас детоводителем ко Христу, дабы нам оправдаться верою; по пришествии же веры, мы уже не под руководством детоводителя. Ибо все вы сыны Божии по вере во Христа Иисуса; все вы, во Христа крестившиеся, во Христа облеклись. Нет уже Иудея, ни язычника; нет раба, ни свободного; нет мужеского пола, ни женского: ибо все вы одно во Христе Иисусе. Если же вы Христовы, то вы семя Авраамово и по обетованию наследники.(Гал.3:23-29)
Аллилуарий воскресный, глас 1
Чтец: Аллилýїа, аллилýїа, аллилýїа, глас пéрвый, псалóм Давíдов: Бог дая́й отмщéнiе мне, и покори́вый лю́ди под мя. (Пс.17:48)
Хор: Аллилýїа, аллилýїа, аллилýїа.
Чтец: Величáяй спасéнiя царéва и творя́й ми́лость хрiстý Своемý Давíду и сéмени егó до вéка. (Пс.17:51)
Хор: Аллилýїа, аллилýїа, аллилýїа.
Аллилуарий преподобным женам
Чтец: Аллилýїа, глас тóйже: Терпя́, потерпéх Гóспода, и внят ми, и услы́ша моли́тву мою.(Пс.39:2)
Хор: Аллилýїа, аллилýїа, аллилýїа.
ЕВАНГЕЛИЕ
От Мáрка Святáго Евáнгелiя чтéнiе.
Хор: Слáва Тебé, Гóсподи, слáва Тебé.
(Мк.зач.47): Во врéмя óно, поя́т Iисýс oбанáдесять, начáт им глагóлати, я́же хотя́ху Eмý бы́ти, я́ко, се, восхóдим во Iерусали́м, и Сын Человéческiй прéдан бýдет архiерéом и кни́жником, и осýдят Eгó на смерть, и предадя́т Eгó язы́ком. И поругáются Eмý, и уя́звят Eгó, и оплю́ют Eгó, и убiю́т Eгó, и в трéтiй день воскрéснет. И пред Ним прiидóста Iáков и Iоáнн, сы́на Зеведéeва, глагóлюща: Учи́телю, хóщева, да éже áще прóсива, сотвори́ши нáма. Oн же речé и́ма: что хóщета, да сотворю́ вáма? Óна же рéста Eмý: даждь нам, да eди́н одеснýю Тебé, и eди́н ошýюю Тебé ся́дева во слáве Твоéй. Iисýс же речé и́ма: не вéстася, чесó прóсита. Мóжета ли пи́ти чáшу, ю́же Аз пiю́, и крещéнiем, и́мже Аз крещáюся, крести́тися? Óна же рéста Eмý: мóжева. Iисýс же речé и́ма: чáшу ýбо, ю́же Аз пiю́, испiéта, и крещéнiем, и́мже Аз крещáюся, крести́тася. А éже сéсти одеснýю Менé и ошýюю, несть Мне дáти, но и́мже уготóвано eсть. И слы́шавше дéсять, начáша негодовáти о Iáкове и Iоáнне. Iисýс же призвáв их, глагóла им: вéсте, я́ко мня́щiися владéти язы́ки, соодолевáют им, и вели́цыи их обладáют и́ми. Не тáко же бýдет в вас, но и́же áще хóщет в вас вя́щшiй бы́ти, да бýдет вам слугá. И и́же áще хóщет в вас бы́ти стáрей, да бýдет всем раб. Ибо Сын Человéчь не прiи́де, да послýжат Eмý, но да послýжит, и дáти дýшу Свою́ избавлéнiе за мнóги.
[Русский синодальный перевод]В те дни, подозвав двенадцать, Иисус начал им говорить о том, что будет с Ним: вот, мы восходим в Иерусалим, и Сын Человеческий предан будет первосвященникам и книжникам, и осудят Его на смерть, и предадут Его язычникам, и поругаются над Ним, и будут бить Его, и оплюют Его, и убьют Его; и в третий день воскреснет. Тогда подошли к Нему сыновья Зеведеевы Иаков и Иоанн и сказали: Учитель! мы желаем, чтобы Ты сделал нам, о чем попросим. Он сказал им: что хотите, чтобы Я сделал вам? Они сказали Ему: дай нам сесть у Тебя, одному по правую сторону, а другому по левую в славе Твоей. Но Иисус сказал им: не знаете, чего просите. Можете ли пить чашу, которую Я пью, и креститься крещением, которым Я крещусь? Они отвечали: можем. Иисус же сказал им: чашу, которую Я пью, будете пить, и крещением, которым Я крещусь, будете креститься; а дать сесть у Меня по правую сторону и по левую - не от Меня зависит, но кому уготовано. И, услышав, десять начали негодовать на Иакова и Иоанна. Иисус же, подозвав их, сказал им: вы знаете, что почитающиеся князьями народов господствуют над ними, и вельможи их властвуют ими. Но между вами да не будет так: а кто хочет быть большим между вами, да будет вам слугою; и кто хочет быть первым между вами, да будет всем рабом. Ибо и Сын Человеческий не для того пришел, чтобы Ему служили, но чтобы послужить и отдать душу Свою для искупления многих.(10:32-45)
(Лк.зач.33): Во врéмя óно, моля́ше Iисýcа нéкiй от фарiсéй, да бы ял с ним: и вшед в дом фарiсéов, возлежé. И се женá во грáде, я́же бе грéшница, и увéдевши, я́ко возлежи́т во хрáмине фарiсéове, принéсши алавáстр ми́ра. И стáвши при ногý Eгó созади́, плáчущися, начáт умывáти нóзе Eгó слезáми, и власы́ главы́ своея́ отирáше, и облобызáше нóзе Eгó, и мáзаше ми́ром. Ви́дев же фарiсéй возвáвый Eгó, речé в себé, глагóля: Сей áще бы был прорóк, вéдел бы кто и каковá женá прикасáется Eмý, я́ко грéшница eсть. И отвещáв Iисýс речé к немý: Сíмоне, и҆́мам ти нéчто рещи́. Oн же речé: Учи́телю, рцы. Iисýс же речé: два должникá бéста заимодáвцу нéкоему, eди́н бе дóлжен пятiю́сот динáрiй, другíй же пятiю́десят. Не имýщема же и҆́ма воздáти, oбéма отдá. Котóрый ýбо eю́, рцы, пáче возлю́бит eгó? Отвещáв же Сíмон речé: мню, я́ко eмýже вя́щше отдá. Oн же речé eмý: прáво суди́л eси́. И обрáщься к женé, Сíмонови речé: ви́диши ли сiю́ женý? Внидóх в дом твой, воды́ на нóзе Мои́ не дадé, сiя́ же слезáми облiя́ Ми нóзе, и власы́ главы́ своея́ отрé. Лобзáнiя Ми не дадé, сiя́ же, отнéлиже внидóх, не престá облобызáющи Ми нóзе. Мáслом главы́ Моея́ не помáза: сiя́ же ми́ром помáза Ми нóзе. Егóже рáди, глагóлю ти: отпущáются греси́ eя́ мнóзи, я́ко возлюби́ мнóго, а eмýже мáло оставля́ется, мéньше лю́бит. Речé же eй: отпущáются тебé греси́. И начáша возлежáщiи с Ним глагóлати в себé: кто Сей eсть, и҆́же и грехи́ отпущáет? Речé же к женé: вéра твоя́ спасé тя, иди́ в ми́ре.
[Русский синодальный перевод]Во время оно, некто из фарисеев просил Его вкусить с ним пищи; и Он, войдя в дом фарисея, возлег. И вот, женщина того города, которая была грешница, узнав, что Он возлежит в доме фарисея, принесла алавастровый сосуд с миром и, став позади у ног Его и плача, начала обливать ноги Его слезами и отирать волосами головы своей, и целовала ноги Его, и мазала миром. Видя это, фарисей, пригласивший Его, сказал сам в себе: если бы Он был пророк, то знал бы, кто и какая женщина прикасается к Нему, ибо она грешница. Обратившись к нему, Иисус сказал: Симон! Я имею нечто сказать тебе. Он говорит: скажи, Учитель. Иисус сказал: у одного заимодавца было два должника: один должен был пятьсот динариев, а другой пятьдесят, но как они не имели чем заплатить, он простил обоим. Скажи же, который из них более возлюбит его? Симон отвечал: думаю, тот, которому более простил. Он сказал ему: правильно ты рассудил. И, обратившись к женщине, сказал Симону: видишь ли ты эту женщину? Я пришел в дом твой, и ты воды Мне на ноги не дал, а она слезами облила Мне ноги и волосами головы своей отёрла; ты целования Мне не дал, а она, с тех пор как Я пришел, не перестает целовать у Меня ноги; ты головы Мне маслом не помазал, а она миром помазала Мне ноги. А потому сказываю тебе: прощаются грехи её многие за то, что она возлюбила много, а кому мало прощается, тот мало любит. Ей же сказал: прощаются тебе грехи. И возлежавшие с Ним начали говорить про себя: кто это, что и грехи прощает? Он же сказал женщине: вера твоя спасла тебя, иди с миром. (7:36-50)
Хор: Слáва Тебé, Гóсподи, слáва Тебé.
Помяни́ нас, Гóсподи, егдá прїи́деши во Цáрствiи Твоéм.
Помяни́ нас, Влады́ко, егдá прїи́деши во Цáрствiи Твоéм.
Помяни́ нас, Святы́й, егдá прїи́деши во Цáрствiи Твоéм.
Лик небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
Стiх: Приступи́те к Немý и просвети́теся, и лицá вáша не постыдя́тся.
Лик Небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
Слáва Ѻтцý и Сы́ну и Святóму Дýху.
Лик святы́х Áнгел и Архáнгел со всéми Небéсными си́лами поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
И ны́не и прúсно и во вéки векóв. Амúнь.
Символ веры
Вéрую во Еди́наго Бóга Ѻтцá, Вседержи́теля, Творцá нéбу и землѝ, ви́димым же всем и неви́димым. И во Еди́наго Гóспода Iисýса Хрїстá, Сы́на Бóжiя, Единорóднаго, И҆́же от Ѻтцá Рождéннаго прéжде всех век; Свéта от Свéта, Бóга И҆́стинна от Бóга И҆́стинна, рождéнна, несотворéнна, единосýщна Ѻтцý, И҆́мже вся бы́ша. Нас рáди человéк и нáшего рáди спасéнiя сшéдшаго с небéс и воплоти́вшагося от Дýха Свята и Марíи Дéвы и вочеловéчшася. Распя́таго же за ны при Понтíйстем Пiлáте, и страдáвша и погребéнна. И воскрéсшаго в трéтiй день по Писáнiем, и возшéдшаго на небесá и седя́ща одеснýю Ѻтцá. И пáки грядýщаго со слáвою суди́ти живы́м и мéртвым, Егóже Цáрствiю не бýдет концá. И в Дýха Святáго, Гóспода, Животворя́щаго, И҆́же от Ѻтцá исходя́щаго, И҆́же со Ѻтцéм и Сы́ном спокланя́ема и сслáвима, Глагóлавшего прорóки. Во еди́ну Святýю, Собóрную и Апóстольскую Цéрковь. Исповéдую еди́но крещéнiе во оставлéнiе грехóв. Чáю воскресéнiя мéртвых, и жи́зни бýдущаго вéка. Аминь.
Ослáби, остáви, прости Бóже, прегрешéнiя нáша, вóльная, и невóльная, я́же в слóве и в дéле, я́же в вéденiи и не в вéденiи, я́же во дни и в нощѝ, я́же во умé и помышлéнiи, вся нам простѝ, я́ко Благ и Человеколю́бец.
Ѻ́тче наш, И҆́же есѝ на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстé, Сы́не Бóжiй, поми́луй нас. Ами́нь.
КОНДАК
Кондáк воскрéсный, глас 1: Воскрéсл еси́, я́ко Бог, из грóба во слáве,/ и мiр совоскреси́л есѝ;/ и естествó человéческое я́ко Бóга воспевáет Тя, и смерть исчезé;/ Адáм же ликýет, Влады́ко;/ Éва ны́не от уз избавля́ема рáдуется, зовýщи:// Ты есѝ, И҆́же всем подая́, Хрїстé, воскресéнiе.
Гóсподи, поми́луй. (12 раз)
И молитву: Всесвятáя Трóице, Единосýщная Держáво, Нераздéльное Цáрство, всех благи́х Винá, благоволи́ же и о мне грéшнем, утвердѝ, вразумѝ сéрдце моé, и всю мою отымѝ сквéрну, просветѝ мою мысль, да вы́ну слáвлю, пою, покланя́юся и глагóлю: Еди́н Свят, Един Госпóдь, Iисýс Хрїстóс, во слáву Бóга Ѻтцá, ами́нь.
Бýди и҆́мя Госпóдне благословéно от ны́не и до вéка. (3 раза)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Псалом 33
Благословлю́ Гóспода на вся́кое врéмя,/ вы́ну хвалá Его во устéх мои́х./ О Гóсподе похвáлится душá моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм и҆́мя Егó вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицá вáша не постыдя́тся./ Сей ни́щiй воззвá, и Госпóдь услы́ша и҆̀,/ и от всех скорбéй егó спасé и҆̀./ Ополчи́тся Áнгел Госпóдень óкрест боя́щихся Егó,/ и избáвит их./ Вкуси́те и ви́дите, я́ко благ Госпóдь;/ блажéн муж, и҆́же уповáет нань./ Бóйтеся Гóспода, вси святíи Егó,/ яко несть лишéнiя боя́щымся Его./ Богáтiи обнищáша и взалкáша,/ взыскáющiи же Гóспода не лишáтся вся́каго блáга./Прiиди́те, чáда, послýшайте менé,/ стрáху Госпóдню научý вас./ Кто есть человéк хотя́й живóт,/ любя́й дни ви́дети блáги;/ Удержѝ язык твой от зла,/ и устнé твоѝ, éже не глагóлати льсти./ Уклони́ся от зла и сотворѝ блáго,/ взыщѝ ми́ра, и поженѝ и҆̀./ Óчи Госпóдни на прáведныя,/ и ýши Егó в моли́тву их./ Лицé же Госпóдне на творя́щiя злáя,/ еже потреби́ти от землѝ пáмять их./ Воззвáша прáведнiи, и Госпóдь услы́ша и҆́х,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я Госпóдь./ Храни́т Госпóдь вся кóсти их,/ ни еди́на от них сокруши́тся./ Смерть грéшников лютá,/ и ненави́дящiи прáведнаго прегрешáт./ Избáвит Госпóдь дýши раб Свои́х,/ и не прегрешáт вси уповáющiи на Негó.
Вместо Достойно есть (задостойник)
Хор: О Тебé рáдуется, Благодáтная вся́кая тварь,/ Áнгельскiй собóр и человéческiй род,/ освящéнный хрáме и раю́ словéсный,/ дéвственная похвалó,/ из Нея́же Бог воплоти́ся,/ и Младéнец бысть, прéжде век Сый Бог наш:/ ложеснá бо Твоя престóл сотвори́/ и чрéво Твоé прострáннее Небéс содéла.// О Тебé рáдуется, Благодáтная, вся́кая тварь, слáва Тебé.
Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.
Гóсподи, поми́луй. (3 раза)
Гóсподи, благословᴎ́.
ОТПУСТ
Гóсподи, Iисýсе Хрїстé, Сыне Бóжiй, моли́твами пречи́стыя Своея́ Мáтере, святы́х слáвных и всехвáльных Апóстол, преподóбной Марíи Еги́петской, святы́х и прáведных богоотéц Iоакíма и Áнны, и всех святы́х, поми́лует и спасéт нас, я́ко Благ и Человеколю́бец.