Неделя четвертая Великаго поста, прп. Иоанна лествичника, глас 8. ОБЕДНИЦА (Изобразительные)
26 мáрта 2023 гóда. Недéля четвéртая Велúкaго постá. Преподóбнаго Iоáнна Лéствичника. Глас 8. Воскрéсная прáздничная слýжба для домáшнего (келéйнаго) совершéнiя. Послéдованiе изобразúтельных.
Прежде глагóли часы. Аще имаши произволéнiе то чти ýтреню с канóном и пéрвым чáсом, áще же ни, тóкмо часы.
ЧИН ОБЕДНИЦЫ
Глагóли сúце: Благословѝ, душé моя́, Гóспода,/ благословéн есѝ Гóсподи.
Псалом 102
Благословѝ, душé моя́, Гóспода,/ и вся внýтренняя моя и҆́мя святóе Егó./ Благословѝ, душé моя, Гóспода,/ и не забывáй всех воздая́нїй Егó,/ очищáющаго вся беззакóнїя твоя́,/ исцеля́ющаго вся недýги твоя́,/ избавля́ющаго от истлéнiя живóт твой,/ венчáющаго тя ми́лостїю и щедрóтами,/ исполня́ющаго во благи́х желáнїе твоé:/ обновится я́ко óрля юность твоя́./ Творя́й ми́лостыни Госпóдь,/ и судьбý всем оби́димым./ Сказá путѝ Своя́ Моисéови,/ сыновóм Iзрáилевым хотéнїя Своя́:/ Щедр и Ми́лостив Госпóдь,/ Долготерпели́в и Многоми́лостив./ Не до концá прогнéвается,/ нижé во век враждýет,/ не по беззакóнїем нáшим сотвори́л есть нам,/ нижé по грехóм нáшым воздáл есть нам./ Я́ко по высотé небéсней от землѝ,/ утверди́л есть Госпóдь ми́лость Свою́ на боя́щихся Егó./ Ели́ко отстоят востóцы от зáпад,/ удáлил есть от нас беззакóнїя нáша./ Я́коже щéдрит отéц сы́ны,/ ущéдри Госпóдь боя́щихся Егó./ Я́ко Той познá создáнїе нáше,/ помянý, яко персть есмы́./ Человéк, яко травá днíе eгó,/ яко цвет сéльный, тáко оцветéт,/ яко дух прóйде в нем,/ и не бýдет, и не познáет ктомý мéста своегó./ Ми́лость же Госпóдня от вéка и до вéка на боя́щихся Егó,/ и прáвда Егó на сынéх сынóв, храня́щих завéт Егó, и пóмнящих зáповеди Егó твори́ти я./ Госпóдь на Небесѝ уготóва Престóл Свой,/ и Цáрство Егó всéми обладáет./ Благослови́те Гóспода вси Áнгели Егó,/ си́льнїи крéпостїю, творя́щїи слóво Егó, услышати глас словéс Егó./ Благослови́те Гóспода вся Си́лы Егó,/ слýги Егó, творя́щїи вóлю Егó./ Благослови́те Гóспода вся делá Егó,/ на всяком мéсте влады́чества Егó.
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Благослови́, душé моя, Гóспода,/ и вся внýтренняя моя и҆́мя святóе Егó./ Благословéн еси, Гóсподи.
Слáва Ѻтцý и Сы́ну и Святóму Дýху.
Псалом 145
Хвали́, душé моя, Гóспода./ Восхвалю́ Гóспода в животé моéм,/ пою Бóгу моемý, дóндеже есмь./ Не надéйтеся на кня́зи, на сы́ны человéческїя,/ в ни́хже несть спасéнїя./ Изы́дет дух eгó/ и возврати́тся в зéмлю свою́./ В той день поги́бнут вся помышлéнїя eгó./ Блажéн, eмýже Бог Iáковль Помóщник егó,/ уповáнiе eгó на Гóспода Бóга своегó,/ сотвóршаго нéбо и зéмлю,/ мóре и вся, я́же в них,/ храня́щаго и҆́стину в век,/ творя́щаго суд оби́димым,/ даю́щаго пи́щу áлчущим./ Госпóдь реши́т оковáнныя./ Госпóдь умудря́ет слепцы́./ Госпóдь возвóдит низвéрженныя./ Госпóдь лю́бит прáведники./ Госпóдь храни́т пришéльцы,/ си́ра и вдову прїи́мет/ и путь грéшных погуби́т./ Воцари́тся Госпóдь во век,/ Бог твой, Сióне, в род и род.
И ны́не и прúсно и во вéки векóв. Амúнь.
Единорóдный Сы́не и Слóве Бóжiй, Безсмéртен Сый/ и извóливый спасéнїя нáшего рáди/ воплоти́тися от Святы́я Богорóдицы и Приснодéвы Марíи,/ непрелóжно вочеловéчивыйся,/ распны́йся же, Хрїстé Бóже, смéртїю смерть попрáвый,/ Един Сый Святы́я Трóицы,/ спрославля́емый Отцý и Святóму Дýху, спасѝ нас.
И поем Блаженны с тропарями из Октоиха
Хор: Во Цáрствiи Твоéм помянú нас, Гóсподи,/ егдá прiúдеши, во Цáрствiи Твоéм.
На 12. Хор: Блажéни нúщiи дýхом,/ я́ко тех есть Цáрство Небéсное.
Хор: Блажéни плáчущiи,/ я́ко тíи утéшатся.
На 10. Хор: Блажéни крóтцыи,/ я́ко тíи наслéдят зéмлю.
Хор: Блажéни áлчущiи и жáждущiи прáвды,/ я́ко тíи насы́тятся.
На 8. Хор: Блажéни мúлостивiи,/ я́ко тíи помúловани бýдут.
Чтец (стiхúры воскрéсные, глас 8): Помяни́ нас, Хрїстé Спáсе мíра,/ я́коже разбóйника помянýл еси́ на дрéве:/ и сподóби всех, Еди́не Щéдре,// Небéсному Цáрствiю Твоемý.
Хор: Блажéни чúстiи сéрдцем,/ я́ко тíи Бóга ýзрят.
Чтец: Слы́ши, Адáме, и рáдуйся со Éвою:/ я́ко обнажи́вый прéжде обоя́,/ и прéлестiю взем вас плéнники,// Крестóм Хрїстóвым упраздни́ся.
На 6. Хор: Блажéни миротвóрцы,/ яко тíи сы́нове Бóжiи нарекýтся.
Чтец: На дрéве пригвождéн быв, Спáсе наш, вóлею,/ я́же от дрéва кля́твы Адáма избáвил еси́,// воздая́, я́ко Щедр, éже по óбразу, и рáйское селéнiе.
Хор: Блажéни изгнáни прáвды рáди,/ я́ко тех есть Цáрство Небéсное.
Чтец: Днесь Хрїстóс воскрéс от грóба,/ всем вéрным подая́ нетлéнiе,// и рáдость обновля́ет мvронóсицам по стрáсти и Воскресéнiи.
На 4. Хор: Блажéни естé, егдá понóсят вам,/ и изженýт, и рекýт всяк зол глагóл на вы лжýще Менé рáди.
Чтец: Рáдуйтеся мýдрыя жены́ мvронóсицы,/ пéрвыя Хрїстóво Воскресéнiе ви́девша,// и Егó возвести́вша апóстолом, всегó мíра воззвáнiе.
Хор: Рáдуйтеся и веселúтеся, я́ко мзда вáша мнóга на Небесéх.
Чтец: Дрýзи Хрїстóвы апóстоли я́вльшеся,/ сопрестóльни Егó слáве бы́ти имýще,/ со дерзновéнiем Томý нам предстáти,// я́ко ученицы́ Егó моли́теся.
Хор: Слáва Ѻтцý и Сы́ну и Святóму Дýху.
Чтец (Трóичен): Безначáльная Трóице, Нераздéльное Существó,/ Сопрестóльная Еди́нице, Единочéстная слáвою,/ Преначáльное Естествó и Цáрство,// спасáй, и҆́же вéрою воспевáющих Тя.
Хор: И ны́не и прúсно и во вéки векóв. Амúнь.
Богорóдичен: Рáдуйся, Бóжiе прострáнное Вмести́лище;/ рáдуйся, Ковчéже нóваго завéта;// рáдуйся, рýчко, из Нея́же мáнна всем дадéся небéсная.
Тропари и кондаки
Тропáрь воскрéсный, глас 8: С высоты́ снизшéл еси́, Благоутрóбне,/ погребéнiе прiя́л еси триднéвное,/ да нас свободи́ши страстéй,// Животé и Воскресéнiе нáше, Гóсподи, слáва Тебé!
Тропáрь Триóди (прп. Iоáнна), глас 1: Пусты́нный жи́тель и в телеси́ áнгел,/ и чудотвóрец яви́лся еси́ Богонóсе óтче наш Iоáнне:/ постóм, бдéнiем, моли́твою небéсная даровáнiя прiи́м,/ исцеля́еши недýжныя, и дýши вéрою притекáющих ти./ Слáва Дáвшему ти крéпость:/ слáва Венчáвшему тя:// слáва Дéйствующему тобóю всем исцелéнiя.
Слáва Отцý и Сы́ну и Святóму Дýху.
Кондáк Триóди (прп. Iоáнна), глaс 4: На высотé Госпóдь воздержáнiя и҆́стинна тя положи́,/ я́коже звездý нелéстную, световодя́щую концы́,// настáвниче Iоáнне óтче наш.
И ны́не и прúсно и во вéки векóв. Амúнь.
Кондáк воскрéсный, глас 8: Воскрéс из грóба, умéршыя воздви́гл еси́,/ и Адáма воскреси́л еси́,/ и Éва ликýет во Твоéм Воскресéнiи,/ и мiрстíи концы́ торжествýют// éже из мéртвых востáнiем Твои́м, Многоми́лостиве.
Трисвятое
Хор: Святы́й Бóже,/ Святы́й Крéпкїй,/ Святы́й Безсмéртный, поми́луй нас. (3 раза)
Хор: Слáва Отцý и Сы́ну и Святóму Дýху, и ны́не и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкїй,/ Святы́й Безсмéртный, поми́луй нас.
Прокимен недели второй Великого поста
Чтец: Прокíмен, глас осьмы́й: Помоли́теся и воздади́те Гóсподеви Бóгу нáшему.(Пс.75:12А)
Хор: Помолúтеся и воздадúте/ Гóсподеви Бóгу нáшему.
Чтец: Вéдом во Iудéи Бог, во Iзрáили вéлiе И҆́мя Егó.(Пс.75:2)
Хор: Помолúтеся и воздадúте/ Гóсподеви Бóгу нáшему.
Прокимен преподобнаго Иоанна
Чтец: Прокíмен, глас седьмы́й: Восхвáлятся преподóбнiи во слáве, и возрáдуются на лóжах свои́х.(Пс.149:5)
Хор: Восхвáлятся преподóбнiи во слáве,/ и возрáдуются на лóжах своúх.
АПОСТОЛ
Чтец: Ко Еврéем послáнiя святáго апóстола Пáвла чтéнiе.
(Евр.зач.314): Брáтiе, Авраáму обетовáя Бог, понéже ни eди́нем имя́ше бóльшим кля́тися, кля́тся Собóю, глагóля: вои́стинну благослóвствуя благословлю́ тя, и мнóжя умнóжу тя. И тáко долготерпéв, получи́ обетовáнiе. Человéцы ýбо бóльшим кленýтся, и вся́кому их прекослóвiю кончи́на во извещéнiе, кля́тва eсть. В нéмже ли́шше хотя́ Бог показáти наслéдником обетовáнiя непрелóжное совéта Своегó, ходáтайствова кля́твою. Я́ко да двемá вéщма непрелóжныма, в нéюже не возмóжно солгáти Бóгу, крéпкое утешéнiе и҆́мамы прибéгшiи, я́тися за предлежáщее уповáнiе. Éже áки кóтву и҆́мамы души́, твéрду же и извéстну, и входя́щую во внýтреннее завéсы. Идéже предтéча о нас вни́де Iисýс, по чи́ну Мелхiседéкову, Первосвящéнник быв во вéки.
[Русский синодальный перевод]Братия, Бог, давая обетование Аврааму, как не мог никем высшим клясться, клялся Самим Собою, говоря: истинно благословляя благословлю тебя и размножая размножу тебя. И так Авраам, долготерпев, получил обещанное. Люди клянутся высшим, и клятва во удостоверение оканчивает всякий спор их. Посему и Бог, желая преимущественнее показать наследникам обетования непреложность Своей воли, употребил в посредство клятву, дабы в двух непреложных вещах, в которых невозможно Богу солгать, твердое утешение имели мы, прибегшие взяться за предлежащую надежду, которая для души есть как бы якорь безопасный и крепкий, и входит во внутреннейшее за завесу, куда предтечею за нас вошел Иисус, сделавшись Первосвященником навек по чину Мелхиседека. 6:13-20)
(Еф.зач.229): Брáтiе, я́ко чáда свéта ходи́те, плод бо Духóвный eсть во вся́цей благосты́ни и прáвде и и҆́стине, искушáюще, что eсть благоугóдно Бóгови. И не приoбщáйтеся к делóм неплóдным тьмы, пáче же и обличáйте. Бывáeмая бо óтай от них, срáмно eсть и глагóлати. Вся же обличáeмая, от свéта явля́ются: все бо явля́емое свет eсть. Сегó рáди глагóлет: востáни, спяй, и воскреснѝ от мéртвых, и освети́т тя Хрїстóс. Блюди́те ýбо, кáко опáсно хóдите, не я́коже немýдри, но я́коже премýдри, искупýюще врéмя, я́ко днíе лукáви суть. Сегó рáди не бывáйте несмы́сленни, но разумевáйте, что eсть вóля Бóжiя. И не упивáйтеся винóм, в нéмже eсть блуд, но пáче исполня́йтеся Дýхом, глагóлюще себé во псалмéх и пéнiих, и пéснех духóвных, воспевáюще и пою́ще в сердцáх вáших Гóсподеви.
[Русский синодальный перевод]Братия, поступайте, как чада света, потому что плод Духа состоит во всякой благости, праведности и истине. Испытывайте, чтó благоугодно Богу, и не участвуйте в бесплодных делах тьмы, но и обличайте. Ибо о том, чтó они делают тайно, стыдно и говорить. Все же обнаруживаемое делается явным от света, ибо все, делающееся явным, свет есть. Посему сказано: «встань, спящий, и воскресни из мертвых, и осветит тебя Христос». Итак, смотри́те, поступайте осторожно, не как неразумные, но как мудрые, дорожа временем, потому что дни лукавы. Итак, не будьте нерассудительны, но познавайте, чтó есть воля Божия. И не упивайтесь вином, от которого бывает распутство; но исполняйтесь Духом, назидая самих себя псалмами и славословиями и песнопениями духовными, поя и воспевая в сердцах ваших Господу.(5:8-19)
Аллилуарий воскресный, глас 8
Чтец: Аллилýїа, аллилýїа, аллилýїа, глас осьмы́й, псалóм Давíдов:
Чтец: Прiиди́те, возрáдуемся Гóсподеви, воскли́кнем Бóгу Спаси́телю нáшему.(Пс.94:1)
Хор: Аллилýїа, аллилýїа, аллилýїа.
Чтец: Предвари́м лицé Егó во исповéданiи, и во псалмéх воскли́кнем Емý.(Пс.94:2)
Хор: Аллилýїа, аллилýїа, аллилýїа.
Аллилуарий прп. Иоанна
Чтец: Глас четвéртый: Насаждéни в домý Госпóдни, во двóрех Бóга нáшего процветýт. (Пс.88:6)
Хор: Аллилýїа, аллилýїа, аллилýїа.
ЕВАНГЕЛИЕ
От Мáрка Святáго Евáнгелiя чтéнiе.
Хор: Слáва Тебé, Гóсподи, слáва Тебé.
(Мк.зач.40): Во врéмя óно, человéк нéкiй прiи́де ко Iисýсови, клáняяся Емý, и глагóля: Учи́телю, приведóх сы́на моегó к Тебé, имýща дýха нéма. И идéже коли́ждо и́мет eгó, разбивáет eгó, и пéны тещи́т, и скрежéщет зубы́ свои́ми, и оцепеневáет, и рех ученикóм Твои́м, да изженýт eгó, и не возмогóша. Oн же отвещáв eмý, глагóла: о, рóде невéрен, докóле в вас бýду; докóле терплю́ вы? Приведи́те eгó ко Мне. И приведóша eгó к Немý. И ви́дев Eгó, áбiе дух стрясé eгó: и пад на земли́, валя́шеся, пéны тещá. И вопроси́ oтцá eгó: коли́ко лет eсть, отнéлеже сié бысть eмý? Oн же речé: издéтска. И мнóгажды во oгнь ввéрже eгó, и в вóды, да погуби́т eгó, но áще что мóжеши, помози́ нам, милосéрдовав о нас. Iисýс же речé eмý: éже áще что мóжеши вéровати, вся возмóжна вéрующему. И áбiе возопи́в oтéц oтрочáте со слезáми, глагóлаше: вéрую, Гóсподи, помози́ моемý невéрiю. Ви́дев же Iисýс, я́ко сри́щется нарóд, запрети́ дýху нечи́стому, глагóля eмý: дýше немы́й и глухíй, Аз ти повелевáю, изы́ди из негó, и ктомý не вни́де в негó. И возопи́в, и мнóго пружáвся, изы́де: и бысть я́ко мертв, я́коже мнóзем глагóлати, я́ко ýмре. Iисýс же eмь eгó за рýку, воздви́же eгó: и востá. И вшéдшу Eмý в дом, ученицы́ Eгó вопрошáху Eгó eди́наго: я́ко мы не возмогóхом изгнáти eгó? И речé им: сей род ничи́мже мóжет изы́ти, тóкмо моли́твою и постóм. И оттýду изшéдше, идя́ху сквозé Галiлéю: и не хотя́ше, да кто увéсть. Учáше бо ученики́ Своя́, и глагóлаше им, я́ко Сын Человéческий прéдан бýдет в рýце человéчeсте, и убiю́т Eгó: и убiéн быв, в трéтiй день воскрéснет.
[Русский синодальный перевод]В те дни человек некий пришел к Иисусу, кланяясь Ему и говоря: Учитель! я привел к Тебе сына моего, одержимого духом немым: где ни схватывает его, повергает его на землю, и он испускает пену, и скрежещет зубами своими, и цепенеет. Говорил я ученикам Твоим, чтобы изгнали его, и они не могли. Отвечая ему, Иисус сказал: о, род неверный! доколе буду с вами? доколе буду терпеть вас? Приведите его ко Мне. И привели его к Нему. Как скоро бесноватый увидел Его, дух сотряс его; он упал на землю и валялся, испуская пену. И спросил Иисус отца его: как давно это сделалось с ним? Он сказал: с детства; и многократно дух бросал его и в огонь и в воду, чтобы погубить его; но, если что можешь, сжалься над нами и помоги нам. Иисус сказал ему: если сколько-нибудь можешь веровать, всё возможно верующему. И тотчас отец отрока воскликнул со слезами: верую, Господи! помоги моему неверию. Иисус, видя, что сбегается народ, запретил духу нечистому, сказав ему: дух немой и глухой! Я повелеваю тебе, выйди из него и впредь не входи в него. И, вскрикнув и сильно сотрясши его, вышел; и он сделался, как мертвый, так что многие говорили, что он умер. Но Иисус, взяв его за руку, поднял его; и он встал. И как вошел Иисус в дом, ученики Его спрашивали Его наедине: почему мы не могли изгнать его? И сказал им: сей род не может выйти иначе, как от молитвы и поста. Выйдя оттуда, проходили через Галилею; и Он не хотел, чтобы кто узнал. Ибо учил Своих учеников и говорил им, что Сын Человеческий предан будет в руки человеческие и убьют Его, и, по убиении, в третий день воскреснет. (9:17-31)
(Мф.зач.10А): Во врéмя óно, по Iисýсе идóша нарóди мнóзи от Галiлéи и десяти́ град, и от Iерусали́ма и Iудéи, и со óнаго пóлу Ioрдáна. Узрéв же нарóды, взы́де на горý: и сéдшу Eмý, приступи́ша к Немý ученицы́ Eгó. И отверз устá Своя́, учáше их, глагóля: блажéни ни́щiи дýхом, я́ко тех eсть Цáрствiе Небéсное. Блажéни плáчущiи, я́ко тíи утéшатся. Блажéни крóтцiи, я́ко тíи наслéдят зéмлю. Блажéни áлчущiи и жáждущiи прáвды, я́ко тíи насы́тятся. Блажéни ми́лостивiи, я́ко тíи поми́ловани бýдут. Блажéни чи́стiи сéрдцем, я́ко тíи Бóга ýзрят. Блажéни миротвóрцы, я́ко тíи сы́нове Бóжiи нарекýтся. Блажéни изгнáни прáвды рáди, я́ко тех eсть Цáрствiе Небéсное. Блажéни eстé, eгдá понóсят вам, и ижденýт, и рекýт всяк зол глагóл на вы лжýще, Менé рáди. Рáдуйтеся и весели́теся, я́ко мзда вáша мнóга на небесéх.
[Русский синодальный перевод]В те дни следовало за Иисусом множество народа из Галилеи и Десятиградия, и Иерусалима, и Иудеи, и из-за Иордана. Увидев народ, Он взошел на гору; и, когда сел, приступили к Нему ученики Его. И Он, отверзши уста Свои, учил их, говоря: Блаженны нищие духом, ибо их есть Царство Небесное. Блаженны плачущие, ибо они утешатся. Блаженны кроткие, ибо они наследуют землю. Блаженны алчущие и жаждущие правды, ибо они насытятся. Блаженны милостивые, ибо они помилованы будут. Блаженны чистые сердцем, ибо они Бога узрят. Блаженны миротворцы, ибо они будут наречены сынами Божиими. Блаженны изгнанные за правду, ибо их есть Царство Небесное. Блаженны вы, когда будут поносить вас и гнать и всячески неправедно злословить за Меня. Радуйтесь и веселитесь, ибо велика ваша награда на небесах.(4:25-5:12А)
Хор: Слáва Тебé, Гóсподи, слáва Тебé.
Помяни́ нас, Гóсподи, егдá прїи́деши во Цáрствiи Твоéм.
Помяни́ нас, Влады́ко, егдá прїи́деши во Цáрствiи Твоéм.
Помяни́ нас, Святы́й, егдá прїи́деши во Цáрствiи Твоéм.
Лик небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
Стiх: Приступи́те к Немý и просвети́теся, и лицá вáша не постыдя́тся.
Лик Небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
Слáва Ѻтцý и Сы́ну и Святóму Дýху.
Лик святы́х Áнгел и Архáнгел со всéми Небéсными си́лами поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
И ны́не и прúсно и во вéки векóв. Амúнь.
Символ веры
Вéрую во Еди́наго Бóга Ѻтцá, Вседержи́теля, Творцá нéбу и землѝ, ви́димым же всем и неви́димым. И во Еди́наго Гóспода Iисýса Хрїстá, Сы́на Бóжiя, Единорóднаго, И҆́же от Ѻтцá Рождéннаго прéжде всех век; Свéта от Свéта, Бóга И҆́стинна от Бóга И҆́стинна, рождéнна, несотворéнна, единосýщна Ѻтцý, И҆́мже вся бы́ша. Нас рáди человéк и нáшего рáди спасéнiя сшéдшаго с небéс и воплоти́вшагося от Дýха Свята и Марíи Дéвы и вочеловéчшася. Распя́таго же за ны при Понтíйстем Пiлáте, и страдáвша и погребéнна. И воскрéсшаго в трéтiй день по Писáнiем, и возшéдшаго на небесá и седя́ща одеснýю Ѻтцá. И пáки грядýщаго со слáвою суди́ти живы́м и мéртвым, Егóже Цáрствiю не бýдет концá. И в Дýха Святáго, Гóспода, Животворя́щаго, И҆́же от Ѻтцá исходя́щаго, И҆́же со Ѻтцéм и Сы́ном спокланя́ема и сслáвима, Глагóлавшего прорóки. Во еди́ну Святýю, Собóрную и Апóстольскую Цéрковь. Исповéдую еди́но крещéнiе во оставлéнiе грехóв. Чáю воскресéнiя мéртвых, и жи́зни бýдущаго вéка. Аминь.
Ослáби, остáви, прости Бóже, прегрешéнiя нáша, вóльная, и невóльная, я́же в слóве и в дéле, я́же в вéденiи и не в вéденiи, я́же во дни и в нощѝ, я́же во умé и помышлéнiи, вся нам простѝ, я́ко Благ и Человеколю́бец.
Ѻ́тче наш, И҆́же есѝ на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстé, Сы́не Бóжiй, поми́луй нас. Ами́нь.
КОНДАК
Кондáк воскрéсный, глас 8: Воскрéс из грóба, умéршыя воздви́гл еси́,/ и Адáма воскреси́л еси́,/ и Éва ликýет во Твоéм Воскресéнiи,/ и мiрстíи концы́ торжествýют// éже из мéртвых востáнiем Твои́м, Многоми́лостиве.
Гóсподи, поми́луй. (12 раз)
И молитву: Всесвятáя Трóице, Единосýщная Держáво, Нераздéльное Цáрство, всех благи́х Винá, благоволи́ же и о мне грéшнем, утвердѝ, вразумѝ сéрдце моé, и всю мою отымѝ сквéрну, просветѝ мою мысль, да вы́ну слáвлю, пою, покланя́юся и глагóлю: Еди́н Свят, Един Госпóдь, Iисýс Хрїстóс, во слáву Бóга Ѻтцá, ами́нь.
Бýди и҆́мя Госпóдне благословéно от ны́не и до вéка. (3 раза)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Псалом 33
Благословлю́ Гóспода на вся́кое врéмя,/ вы́ну хвалá Его во устéх мои́х./ О Гóсподе похвáлится душá моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм и҆́мя Егó вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицá вáша не постыдя́тся./ Сей ни́щiй воззвá, и Госпóдь услы́ша и҆̀,/ и от всех скорбéй егó спасé и҆̀./ Ополчи́тся Áнгел Госпóдень óкрест боя́щихся Егó,/ и избáвит их./ Вкуси́те и ви́дите, я́ко благ Госпóдь;/ блажéн муж, и҆́же уповáет нань./ Бóйтеся Гóспода, вси святíи Егó,/ яко несть лишéнiя боя́щымся Его./ Богáтiи обнищáша и взалкáша,/ взыскáющiи же Гóспода не лишáтся вся́каго блáга./Прiиди́те, чáда, послýшайте менé,/ стрáху Госпóдню научý вас./ Кто есть человéк хотя́й живóт,/ любя́й дни ви́дети блáги;/ Удержѝ язык твой от зла,/ и устнé твоѝ, éже не глагóлати льсти./ Уклони́ся от зла и сотворѝ блáго,/ взыщѝ ми́ра, и поженѝ и҆̀./ Óчи Госпóдни на прáведныя,/ и ýши Егó в моли́тву их./ Лицé же Госпóдне на творя́щiя злáя,/ еже потреби́ти от землѝ пáмять их./ Воззвáша прáведнiи, и Госпóдь услы́ша и҆́х,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я Госпóдь./ Храни́т Госпóдь вся кóсти их,/ ни еди́на от них сокруши́тся./ Смерть грéшников лютá,/ и ненави́дящiи прáведнаго прегрешáт./ Избáвит Госпóдь дýши раб Свои́х,/ и не прегрешáт вси уповáющiи на Негó.
Вместо Достойно есть (задостойник)
Хор: О Тебé рáдуется, Благодáтная вся́кая тварь,/ Áнгельскiй собóр и человéческiй род,/ освящéнный хрáме и раю́ словéсный,/ дéвственная похвалó,/ из Нея́же Бог воплоти́ся,/ и Младéнец бысть, прéжде век Сый Бог наш:/ ложеснá бо Твоя престóл сотвори́/ и чрéво Твоé прострáннее Небéс содéла.// О Тебé рáдуется, Благодáтная, вся́кая тварь, слáва Тебé.
Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.
Гóсподи, поми́луй. (3 раза)
Гóсподи, благословᴎ́.
ОТПУСТ
Гóсподи, Iисýсе Хрїстé, Сыне Бóжiй, моли́твами пречи́стыя Своея́ Мáтере, святы́х слáвных и всехвáльных Апóстол, преподóбнаго Iоáнна Лéствичника, святы́х и прáведных богоотéц Iоакíма и Áнны, и всех святы́х, поми́лует и спасéт нас, я́ко Благ и Человеколю́бец.