ТОРЖЕСТВО ПРАВОСЛАВИЯ. Неделя первая Великого поста. ВСЕНОЩНОЕ БДЕНИЕ. Глас 5. Великая вечерня
5 мáрта 2023 гóда. Недéля пéрвая Велúкaго постá. Торжествó Правослáвiя. Глас 5. Всeнóщное бдéнiе для домáшнего (келéйнаго) совершéнiя состоúт из Велúкой вечéрни, ýтрени, тáже канóна и пéрвого чáса. Слýжба мiрскúм чúном.
ВЕЛИКАЯ ВЕЧЕРНЯ
Моли́твами святы́х отéц нáших, Гóсподи Iисýсе Хрїстé, Бóже наш, поми́луй нас, ами́нь.
Слáва Тебé, Бóже наш, слáва Тебé.
Царю́ Небéсный, Утéшителю, Дýше И҆́стины, И҆́же вездé сый и вся исполня́яй, Сокрóвище благи́х и жи́зни Подáтелю, прiиди́ и всели́ся в ны, и очи́сти ны от вся́кiя сквéрны, и спаси́, Блáже, Дýши нáша.
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстé, Сы́не Бóжїй, поми́луй нас. Ами́нь.
Гóсподи, поми́луй, (12 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Прїиди́те, поклони́мся Царéви нáшему Бóгу.
Прїиди́те, поклони́мся и припадéм Хрїстý, Царéви нáшему Бóгу.
Прїиди́те, поклони́мся и припадéм Самомý Хрїстý, Царéви и Бóгу нáшему.
Псалом 103, предначинáтельный
Стiхú избрáннiи: Благословѝ, душé моя́, Гóспода./ Благословéн есѝ, Гóсподи./ Гóсподи, Бóже мой, возвели́чился еси́ зелó./ Благословéн есѝ, Гóсподи./ Во исповéданiе и в велелéпоту/ облéклся есѝ. Благословéн есѝ, Гóсподи./ Посредé гор прóйдут вóды./ Ди́вна делá Твоя́, Гóсподи./ Вся премýдростiю сотвори́л есѝ./ Слáва Ти, Гóсподи, сотвори́вшему вся.
[Псалом полностью]Благослови, душé моя, Гóспода, Бóже мой, возвеличился есѝ зелó. Во исповéданiе и в велелéпоту облéклся есѝ. Одея́йся свéтом, яко ри́зою, простирáяй нéбо, яко кóжу. Покрывáяй водáми превы́спренняя Своя́, полагáяй óблаки на восхождéнiе Своé, ходя́й на крилý вéтреню. Творя́й Áнгелы Своя дýхи и слугѝ Своя плáмень óгненный. Основáяй зéмлю на твéрди ея́, не преклони́тся в век вéка. Бéздна, яко ри́за, одея́нiе ея́, на горáх стáнут вóды, от запрещéнiя Твоегó побéгнут, от глáса грóма Твоегó убоя́тся. Восхóдят гóры и нисхóдят поля́ в мéсто, éже основáл есѝ им. Предéл положи́л есѝ, eгóже не прéйдут, нижé обратя́тся покры́ти зéмлю. Посылáяй истóчники в дéбрех, посредé гор прóйдут вóды. Напая́ют вся звéри сéльныя, ждут онáгри в жáжду свою. На тых пти́цы небéсныя привитáют, от среды́ кáменiя дадя́т глас. Напая́яй гóры от превы́спренних Свои́х, от плодá дел Твоих насы́тится земля́. Прозябáяй травý скотóм, и злак на слýжбу человéком, известѝ хлеб от землѝ. И винó весели́т сéрдце человéка, умáстити лицé елéем, и хлеб сéрдце человéка укрепи́т. Насы́тятся древá польскáя, кéдри Ливáнстiи, и҆́хже еси насади́л. Тáмо пти́цы вогнездя́тся, еродíево жили́ще предводи́тельствует и҆́ми. Гóры высóкiя елéнем, кáмень прибéжище зáяцем. Сотвори́л есть лунý во временá, сóлнце познá зáпад свой. Положи́л есѝ тму, и бысть нощь, в нéйже прóйдут вси звéрiе дубрáвнiи. Ски́мни рыкáющiи, восхи́тити и взыскáти от Бóга пи́щу себé. Возсiя́ сóлнце и собрáшася и в лóжах свои́х ля́гут. Изы́дет человéк на дéло своé и на дéланiе своé до вéчера. Яко возвели́чишася делá Твоя, Гóсподи, вся премýдростiю сотвори́л есѝ, испóлнися земля́ твáри Твоея́. Сié мóре вели́кое и прострáнное, тáмо гáди, и҆́мже несть числá, живóтная мáлая с вели́кими, тáмо кораблѝ преплáвают, змiй сей, eгóже создáл есѝ ругáтися eмý. Вся к Тебé чáют, дáти пи́щу им во блáго врéмя. Дáвшу Тебé им соберýт, отвéрзшу Тебé рýку вся́ческая испóлнятся блáгости, отврáщшу же Тебé лицé, возмятýтся, отъи́меши дух их, и исчéзнут, и в персть свою возвратя́тся. Пóслеши Дýха Твоегó, и сози́ждутся, и обнови́ши лицé землѝ. Бýди слáва Госпóдня во вéки, возвесели́тся Госпóдь о дéлех Свои́х, призирáяй на зéмлю, и творя́й ю́ трясти́ся, прикасáяйся горáм, и дымя́тся. Воспою́ Гóсподеви в животé моéм, пою́ Бóгу моемý, дóндеже есмь, да услади́тся Емý бесéда моя, аз же возвеселю́ся о Гóсподе. Да исчéзнут грéшницы от землѝ, и беззакóнницы, я́коже не бы́ти им. Благословѝ, душé моя́, Гóспода. Сóлнце познá зáпад свой. Положи́л еси тму, и бысть нощь. Яко возвели́чишася делá Твоя, Гóсподи, вся премýдростiю сотвори́л есѝ.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебé Бóже. (3 раза)
Гóсподи, поми́луй. (12 раз)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Первая кафизма
Читáем лúбо кафíсму 1-ю (1-ю cтатiю(«Блажéн муж» - 1-й антiфóн.)
[Псалом 1]Блажéн муж, и҆́же не и҆́де на совéт нечести́вых и на путѝ грéшных не ста, и на седáлищи губи́телей не сéде, но в закóне Госпóдни вóля eгó, и в закóне Егó поучи́тся день и нощь. И бýдет яко дрéво насаждéнное при исхóдищих вод, éже плод свой даст во врéмя своé, и лист eгó не отпадéт, и вся, ели́ка áще твори́т, успéет. Не тáко нечести́вiи, не тáко, но яко прах, eгóже возметáет ветр от лицá землѝ. Сегó рáди не воскрéснут нечести́вiи на суд, нижé грéшницы в совéт прáведных. Яко весть Госпóдь путь прáведных, и путь нечести́вых поги́бнет.
[Псалом 2]Вскýю шатáшася язы́цы, и лю́дiе поучи́шася тщéтным? Предстáша цáрiе зéмстiи, и кня́зи собрáшася вкýпе на Гóспода и на Хрїстá Егó. Растóргнем ýзы их и отвéржем от нас и҆́го их. Живы́й на Небесéх посмеéтся им, и Госпóдь поругáется им. Тогдá возглагóлет к ним гнéвом свои́м и я́ростiю Своéю смятéт я́. Аз же постáвлен есмь Царь от Негó над Сióном, горóю святóю Егó, возвещáяй повелéнiе Госпóдне. Госпóдь речé ко Мне: Сын Мой еси Ты, Аз днесь роди́х Тя. Просѝ от Менé, и дам Ти язы́ки достоя́нiе Твоé, и одержáнiе Твоé концы́ землѝ. Упасéши я́ жезлóм желéзным, я́ко сосýды скудéльничи сокруши́ши я́. И ны́не, цáрiе, разумéйте, накажи́теся вси судя́щiи землѝ. Рабóтайте Гóсподеви со стрáхом и рáдуйтеся Емý с трéпетом. Прiими́те наказáнiе, да не когдá прогнéвается Госпóдь и поги́бнете от путѝ прáведнаго, егдá возгори́тся вскóре я́рость Егó. Блажéни вси надéющiися Нань.
[Псалом 3]Гóсподи, что ся умнóжиша стужáющiи ми? Мнóзи востаю́т на мя, мнóзи глагóлют душѝ моéй: несть спасéнiя eмý в Бóзе eгó. Ты же, Гóсподи, Застýпник мой есѝ, слáва моя́ и вознося́й главý мою́. Глáсом мои́м ко Гóсподу воззвáх, и услы́ша мя от горы́ святы́я Своея́. Аз уснýх, и спах, востáх, я́ко Госпóдь застýпит мя. Не убою́ся от тем людéй, óкрест напáдающих на мя. Воскреснѝ, Гóсподи, спасѝ мя, Бóже мой, я́ко Ты порази́л есѝ вся враждýющыя ми всýе: зýбы грéшников сокруши́л есѝ. Госпóдне есть спасéнiе, и на лю́дех Твои́х благословéнiе Твоé.
Лúбо поéм стiхú избрáннiи
БЛАЖЕН МУЖ
Чтец (или хор): Блажéн муж, и҆́же не и҆́де на совéт нечести́вых.
Хор: Аллилýїа, аллилýїа, аллилýїа.
Чтец (или хор): Яко весть Госпóдь путь прáведных, и путь нечести́вых поги́бнет.
Хор: Аллилýїа, аллилýїа, аллилýїа.
Чтец (или хор): Рабóтайте Гóсподеви со стрáхом и рáдуйтеся Емý с трéпетом.
Хор: Аллилýїа, аллилýїа, аллилýїа.
Чтец (или хор): Блажéни вси надéющiися Нань.
Хор: Аллилýїа, аллилýїа, аллилýїа.
Чтец (или хор): Воскреснѝ, Гóсподи, спасѝ мя, Бóже мой.
Хор: Аллилýїа, аллилýїа, аллилýїа.
Чтец (или хор): Госпóдне есть спасéнiе, и на лю́дех Твои́х благословéнiе Твоé.
Хор: Аллилýїа, аллилýїа, аллилýїа.
Чтец: Слáва Ѻтцý и Сы́ну и Святóму Дýху.
Хор: Аллилýїа, аллилýїа, аллилýїа.
Хор: И ны́не и при́сно и во вéки векóв, ами́нь.
Хор: Аллилýїа, аллилýїа, аллилýїа.
Аллилýїа, аллилýїа, аллилýїа, слáва Тебé Бóже. (трúжды)
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
ГОСПОДИ ВОЗЗВАХ, ГЛАС 5
Хор: Гóсподи, воззвáх к Тебé, услы́ши мя./ Услы́ши мя, Гóсподи./ Гóсподи, воззвáх к Тебé, услы́ши мя:/ вонми́ глáсу молéнія моегó,/ внегдá воззвáти ми к Тебé./ Услы́ши мя, Гóсподи.
Хор: Да испрáвится моли́тва моя́,/ я́ко кади́ло пред Тобóю,/ воздея́ніе рукý моéю/ - жéртва вечéрняя./ Услы́ши мя, Гóсподи.
[В приходской практике пропускается до стихир]Положѝ, Гóсподи, хранéнiе устóм мои́м, и дверь ограждéнiя о устнáх мои́х. Не уклонѝ сéрдце моé в словесá лукáвствiя, непщевáти вины́ о гресéх, с человéки дéлающими беззакóнiе, и не сочтýся со избрáнными их. Накáжет мя прáведник ми́лостiю и обличи́т мя, елéй же грéшнаго да не намáстит главы́ моея́, я́ко ещé и моли́тва моя́ во благоволéнiих их. Пожéрты бы́ша при кáмени судiѝ их: услы́шатся глагóли моѝ, я́ко возмогóша. Я́ко тóлща землѝ просéдеся на землѝ, расточи́шася кóсти и҆́х при áде. Я́ко к Тебé, Гóсподи, Гóсподи, óчи моѝ: на Тя уповáх, не отымѝ дýшу мою́. Сохранѝ мя от сéти, ю́же состáвиша ми, и от соблáзн дéлающих беззакóнiе. Падýт во мрéжу свою́ грéшницы: еди́н есмь аз, дóндеже прейдý.
[В приходской практике пропускается до стихир]Глáсом мои́м ко Гóсподу воззвáх, глáсом мои́м ко Гóсподу помоли́хся. Пролiю́ пред Ним молéнiе моé, печáль мою́ пред Ним возвещý. Внегдá исчезáти от менé дýху моемý: и Ты познáл есѝ стезѝ моя́: на путѝ сем, по немýже хождáх, скры́ша сеть мне. Смотря́х одеснýю и возгля́дах, и не бе знáяй менé: поги́бе бéгство от менé, и несть взыскáяй дýшу мою́. Воззвáх к Тебé, Гóсподи, рех: Ты есѝ уповáнiе моé, часть моя́ есѝ на землѝ живы́х. Вонмѝ молéнiю моемý, я́ко смири́хся зелó, избáви мя от гоня́щих мя, я́ко укрепи́шася пáче менé.
На 10 Чтец: Изведú из темнúцы дýшу мою́,// исповéдатися и҆́мени Твоемý.
Стiхúры воскрéсные, глас 5: Честны́м Твои́м Крестóм, Хрїстé,/ дiáвола посрами́л есѝ,/ и Воскресéнiем Твои́м жало грехóвное притупи́л есѝ,/ и спасл еси́ ны от врат смéртных:// слáвим Тя, Единорóдне.
Менé ждут прáведницы,// дóндеже воздáси мне.
Стiхúра: Воскресéнiе дая́й рóду человéческому,/ я́ко овчá на заколéнiе ведéся,/ устраши́шася сегó кня́зи áдстiи,/ и взя́шася вратá плачéвная./ Вни́де бо Царь слáвы Хрїстóс,/ глагóля сýщим во ýзах, изыди́те:// и сýщим во тьме, откры́йтеся.
На 8. Стiх: Из глубины́ воззвáх к Тебé, Гóсподи,// Гóсподи, услы́ши глас мой.
Стiхúра: Вéлiе чýдо,/ неви́димых Содéтель, за человеколю́бiе плóтiю пострадáв,/ воскрéсе Безсмéртный./ Прiиди́те отéчествiя язы́к, Томý поклони́мся:/ благоутрóбiем бо Егó от прéлести избáвльшеся,// в Трiéх Ипостáсех Еди́наго Бóга пéти навыкóхом.
Да бýдут ýши Твоú// внéмлюще глáсу молéнiя моегó.
И҆́ны стiхúры анатóлiевы: Вечéрнее поклонéнiе/ принóсим Тебé, Невечéрнему Свéту,/ на конéц векóв, я́ко в зерцáле плóтiю возсiя́вшему мíрови,/ и дáже до áда низшéдшему,/ и тáмо сýщую тьму разруши́вшему,/ и свет Воскресéнiя язы́ком показáвшему:// Светодáвче Гóсподи, слáва Тебé.
На 6. Стiх: Áще беззакóнiя нáзриши, Гóсподи, Гóсподи, кто постоúт?// Яко у Тебé очищéнiе есть.
Стiхúра: Начáльника спасéнiя нáшего,/ Хрїстá славослóвим:/ Томý бо из мéртвых воскрéсшу,/ мiр от прéлести спасéн бысть./ Рáдуется лик Áнгельский,/ бéгает дéмонов прéлесть,/ Адáм пады́й востá,// дiáвол упраздни́ся.
И҆́мене рáди Твоегó потерпéх Тя, Гóсподи, потерпé душá моя́ в слóво Твоé,// уповá душá моя на Гóспода.
Стiхúра: И҆́же от кустодíи научéни бывáху от беззакóнник,/ покры́йте Хрїстóво Востáнiе,/ и прiими́те срéбреники, и рцы́те/ я́ко нам спя́щим, из грóба укрáден бысть Мéртвый./ Кто ви́де, кто слы́ша, мертвецá укрáдена когдá,/ пáче же помáзана и нáга,/ остáвльша и во грóбе погребáльная Своя́?/ Не прельщáйтеся iудéе,/ навы́кните речéнiем прорóческим, и уразумéйте,// я́ко Той есть вои́стинну Избáвитель мíра, и Всеси́льный.
На 4. Стiх: От стрáжи ýтреннiя до нóщи, от стрáжи ýтреннiя,// да уповáет Iзрáиль на Гóспода.
Стiхúры Трióди, глас 6: Тя, Непостижи́маго,/ прéжде денни́цы безначáльно из Невещéственнаго возсiя́вшаго,/ безплóтнаго же чрéва Роди́телева,/ прорóцы Гóсподи, Твои́м Дýхом вдохновéни,/ прорекóша Отрочá бы́ти,/ из Неискусобрáчныя воплощáема,/ человéком совокупля́ема,/ и сýщими на земли́ зри́ма,/ и́миже я́ко Щéдрый/ просвещéнiя сподóби Твоегó,/ воспевáющих неизречéнное,// и честнóе Твоé Воскресéнiе.
Яко у Гóспода мúлость, и мнóгое у Негó избавлéнiе,// и Той избáвит Iзрáиля от всех беззакóнiй eгó.
Стiхúра: Слóвом Тя проповéдавшiи/ богоглагóливiи прорóцы,/ и дéлы почéтшiи,/ безконéчную жизнь приплоди́ша,/ твáри бо Влады́ко, пáче Тебé Содéтеля,/ служи́ти не претерпéвше,/ мíра всегó евáнгельски отврати́шася,/ и сообрáзни бы́ша стрáсти Твоéй,/ ю́же провозвести́ша,/ и́хже моли́твами,/ сподóби непорóчно прейти́/ воздержáнiя пóприще,// еди́не Многоми́лостиве.
На 2. Стiх: Хвалúте Гóспода вси язы́цы, похвалúте Егó вси лю́дiе.
Стiхúра: Естествóм неопи́санный Божéственным Твои́м сый,/ на послéдняя Влады́ко воплóщься,/ извóлил еси́ описовáтися,/ плóти бо прiя́тiем, и свóйства вся сея́ взял еси́./ Тéмже вид Твой образовáнiя описýющiи/ любéзно целýем,/ к Твоéй любви́ возвышáеми,/ и исцелéнiй благодáть почерпáем из негó,/ апóстольским послéдующе// Божéственным предáнiем.
Яко утвердúся мúлость Егó на нас,// и и҆́стина Госпóдня пребывáет во век.
Стiхúра: Пречестнóе украшéнiе Хрїстóва Цéрковь,/ честны́х прiя́т и святы́х iкóн,/ Спáса Хрїстá и Богомáтере,/ и всех святы́х светлéйшее возставлéнiе,/ и́мже просвещáется, и красýется благодáтiю,/ и сóнмище отлагáет ерети́ческое изгоня́щи,/ и рáдующися слáвит Человеколю́бца Бóга,// ея́ рáди претерпéвша стрáсти вóльныя.
Слáва Ѻтцý и Сы́ну и Святóму Дýху.
Стiхúра, глас 2: Благодáть возсiя́ и́стины,/ прообразýемая дрéвле сенóвно,/ ны́не явлéнно скончáся:/ се бо Цéрковь воплощéнным óбразом Хрїстóвым,/ я́ко прекрáсною ýтварiю облачи́тся,/ ски́нiи свидéнiя óбраз пронаписýющи,/ и правослáвную вéру содержáщи,/ да Егóже почитáем,/ Сегó и óбраз держáще, не прельщáемся,/ да облекýтся в студ си́це невéрующiи,/ нам бо слáва зрак Воплоти́вшагося/ благочéстно покланя́емый, не боготвори́мый./ Той облобызáюще вéрнiи возопiи́м:// Бóже, спаси́ лю́ди Твоя́, и благослови́ достоя́нiе Твоé.
И ны́не и прúсно и во вéки векóв, амúнь.
Догмáтик. Глас 5: В Чермнéм мóри,/ Неискусобрáчныя Невéсты óбраз написáся иногдá:/ тáмо Моисéй, раздели́тель воды́:/ зде же Гаврiи́л, служи́тель чудесé./ Тогдá глубинý шéствова немóкренно Iзрáиль;/ ны́не же Хрїстá родѝ безсéменно Дéва./ Мóре по прошéствiи Iзрáилеве пребы́сть непрохóдно;/ Непорóчная по Рождествé Эмманýилеве пребы́сть Нетлéнна./ Сый, и прéжде Сый,/ явлéйся, я́ко Человéк,// Бóже поми́луй нас.
СВЕТЕ ТИХИЙ
Хор: Свéте Ти́хiй святы́я слáвы Безсмéртнаго Ѻтцá Небéснаго, Святáго, Блажéннаго, Iисýсе Хрїстé! Пришéдше на зáпад сóлнца, ви́девше свет вечéрнiй, поéм Ѻтцá, Сы́на и Святáго Дýха, Бóга. Достóин есѝ во вся временá пет бы́ти глáсы преподóбными, Сы́не Бóжiй, живóт дая́й; тéмже мiр Тя слáвит.
ПРОКИМЕН ВОСКРЕСНЫЙ
Чтец: Прокíмен, глас шесты́й: Госпóдь воцари́ся, в лéпоту облечéся.
Хор: Госпóдь воцарúся,/ в лéпоту облечéся. (Пс.92:1А)
Чтец: Облечéся Госпóдь в си́лу и препоя́сася. (Пс.92:1Б)
Хор: Госпóдь воцарúся,/ в лéпоту облечéся.
Чтец: И҆́бо утверди́ вселéнную, я́же не подви́жится. (Пс.92:1В)
Хор: Госпóдь воцарúся,/ в лéпоту облечéся.
Чтец: Дóму Твоемý подобáет святы́ня, Гóсподи, в долготý днiй.(Пс.92:2Б)
Хор: Госпóдь воцарúся,/ в лéпоту облечéся.
Чтец: Госпóдь воцари́ся.
Хор: В лéпоту облечéся.
Гóсподи, поми́луй. (40 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
СПОДОБИ ГОСПОДИ
Хор: Сподóби, Гóсподи, в вéчер сей без грехá сохрани́тися нам./ Благословéн есѝ, Гóсподи Бóже ѻтéц нáших,/ и хвáльно и прослáвлено и҆́мя Твоé во вéки, ами́нь.
Бýди, Гóсподи, ми́лость Твоя́ на нас, я́коже уповáхом на Тя./ Благословéн есѝ, Гóсподи, научѝ мя оправдáнiем Твои́м./ Благословéн есѝ, Влады́ко, вразумѝ мя оправдáнiем Твои́м./ Благословéн есѝ, Святы́й, просветѝ мя оправдáнiи Твои́ми.
Гóсподи, ми́лость Твоя́ во век, дел рукý Твоéю не прéзри./ Тебé подобáет хвалá. Тебé подобáет пéнiе,/ Тебé слáва подобáет, Ѻтцý и Сы́ну и Святóму Дýху, ны́не и при́сно и во вéки векóв. Ами́нь.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
ЛИТИЯ
Слáва Отцý и Сыну и Святóму Дýху.
Стiхúра Трióди, глас 2: Рáдуйтеся прорóцы честнíи,/ закóн Госпóдень дóбре учини́вшiи,/ и вéрою я́вльшiися необори́мiи столпи́ неуклóннiи:/ вы бо и ходáтаи яви́стеся Нóваго Завéта Хрїстóва,/ и престáвившеся на небесá./ Тогó моли́те,// умири́ти мíр, и спасти́ дýши нáша.
И ныне и прúсно и во вéки векóв. Амúнь.
Богорóдичен, Трióди, глас тóйже: Все уповáнiе моé/ на Тя возлагáю, Мáти Бóжiя,// сохрани́ мя под покрóвом Твои́м.
Гóсподи, поми́луй. (40 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
СТИХИРЫ НА СТИХОВНЕ
Чтец (Стiхúры воскрéсные, глас 5): Тебé, Воплощéннаго Спáса Хрїстá,/ и Небéс неразлучи́вшася,/ во глáсех пéнiй величáем,/ я́ко Крест и смерть прiя́л еси́ за род наш,/ я́ко Человеколю́бец Госпóдь,/ испровéргiй áдова вратá,/ триднéвно воскрéсл еси́,// спасáя дýши нáша.
Стiх: Госпóдь воцарúся, в лéпоту облечéся.
И҆́ны по алфавúту, глас 5: Прободéным Твои́м рéбром, Жизнодáвче,/ тóки оставлéнiя всем источи́л еси́,/ жи́зни и спасéнiя:/ плóтiю же смерть воспрiя́л еси́,/ безсмéртiе нам дáруя./ Всели́в же ся во гроб нас свободи́л еси́,/ совоскреси́в с Собóю слáвно, я́ко Бог./ Сегó рáди вопiéм:// Человеколю́бче Гóсподи, слáва Тебé.
Стiх: И҆́бо утвердú вселéнную,/ я́же не подвúжется.
Стрáнно Твоé распя́тiе,/ и éже во ад сошéствiе, Человеколю́бче, есть:/ плени́в бо егó, и дрéвнiя ю́зники совоскреси́в с Собóю слáвно, я́ко Бог,/ рай отвéрз, воспрiя́ти сегó сподóбил еси́./ Тéмже и нам, слáвящим Твоé триднéвное Востáнiе,/ дáруй очищéнiе грехóв:/ рая́ жи́тели сподобля́я,// я́ко Еди́н Благоутрóбен.
Стiх: Дóму Твоемý подобáет святы́ня, Гóсподи,/ в долготý днiй.
Нас рáди плóтiю страсть прiи́мый,/ и триднéвен из мéртвых воскресы́й,/ плотскíя нáша стрáсти исцели́,/ и возстáви от прегрешéнiй лю́тых,// Человеколю́бче, и спаси́ нас.
Слáва Ѻтцý и Сы́ну и Святóму Дýху.
Стiхúра Трióди, глас 2: Из нечéстiя во благочéстiе прешéдше,/ и свéтом рáзума просвети́вшеся,/ псалóмски рукáми восплéщим,/ благодáрственно хвалý Бóгу принося́ще,/ и на стенáх, и дсках, и на свящéнных сосýдех,/ начертáнным свящéнным образóм Хрїстóвым,/ и Пречи́стыя, и всех святы́х,/ чéстно поклони́мся, отлагáюще злочéстную злослáвных вéру,/ [честь бо óбраза, я́коже глагóлет Васíлiй, на первообрáзное прехóдит,]/ прося́ще моли́твами Пречи́стыя Твоея́ Мáтере, Хрїстé Бóже наш, и всех святы́х,// даровáти нам вéлiю ми́лость.
И ны́не и прúсно и во вéки векóв, амúнь.
Богорóдичен воскрéсен, глас 2 (по глáсу «Слáвы»): О чудесé нóваго всех дрéвних чудéс!/ Кто бо познá мáтерь без мýжа рóждшую,/ и на рукý нося́щую,/ всю тварь Содержáщаго?/ Бóжiе есть изволéнiе, Рóждшееся./ Егóже я́ко Младéнца, Пречи́стая,/ Твои́ма рукáма носи́вшая,/ и Мáтерне дерзновéнiе к Немý имýщая,/ не престáй моля́щи о чтýщих Тя,// ущéдрити и спасти́ дýши нáша.
Молитва святаго Симеона Богоприимца
Ны́не отпущáеши рабá Твоегó, Влады́ко,/ по глагóлу Твоемý, с ми́ром;/ я́ко ви́деста óчи моѝ спасéнiе Твоé,/ éже есѝ уготóвал пред лицéм всех людéй,/ свет во откровéнiе язы́ков,// и слáву людéй Твои́х Iзрáиля.
Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстé, Сы́не Бóжiй, поми́луй нас. Ами́нь.
Тропáрь, глас 4: Богорóдице Дéво, рáдуйся,/ Благодáтная Марíе, Госпóдь с Тобóю:/ благословéна Ты в женáх/ и благословéн Плод чрéва Твоегó,// яко Спáса родилá есѝ душ нáших. (Двáжды)
Тропáрь торжествá Правослáвiя, глас 2: Пречи́стому óбразу Твоемý покланя́емся, Благíй,/ прося́ще прощéнiя прегрешéнiй нáших, Хрїстé Бóже,/ вóлею бо благоволи́л еси плóтiю взы́ти на Крест,/ да избáвиши, я́же создáл еси, от рабóты врáжiя./ Тем благодáрственно вопiéм Ти:/ рáдости испóлнил еси вся, Спáсе наш,// пришéдый спасти́ мiр.
Бýди и҆́мя Госпóдне благословéно от ны́не и до вéка. (Трúжды)
Псалом 33
Благословлю́ Гóспода на вся́кое врéмя,/ вы́ну хвалá Егó во устéх мои́х./ О Гóсподе похвáлится душá моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм и҆́мя Егó вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицá вáша не постыдя́тся./ Сей ни́щiй воззвá, и Госпóдь услы́ша и҆̀,/ и от всех скорбéй егó спасé и҆̀./ Ополчи́тся Áнгел Госпóдень óкрест боя́щихся Егó,/ и избáвит их./ Вкуси́те и ви́дите, я́ко благ Госпóдь;/ блажéн муж, и҆́же уповáет нань./ Бóйтеся Гóспода, вси святíи Егó,/ яко несть лишéнiя боя́щымся Егó./ Богáтiи обнищáша и взалкáша,/ взыскáющiи же Гóспода не лишáтся вся́каго блáга.[B приходской практитке пропускается]/ Прiиди́те, чáда, послýшайте менé,/ стрáху Госпóдню научý вас./ Кто есть человéк хотя́й живóт,/ любя́й дни ви́дети блáги;/ Удержѝ язык твой от зла,/ и устнé твоѝ, éже не глагóлати льсти./ Уклони́ся от зла и сотворѝ блáго,/ взыщѝ ми́ра, и поженѝ и҆̀./ Ѻ́чи Госпóдни на прáведныя,/ и ýши Егó в моли́тву их./ Лицé же Госпóдне на творя́щiя злáя,/ еже потреби́ти от землѝ пáмять их./ Воззвáша прáведнiи, и Госпóдь услы́ша их,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я́ Госпóдь./ Храни́т Госпóдь вся кóсти их,/ ни еди́на от них сокруши́тся./ Смерть грéшников лютá,/ и ненави́дящiи прáведнаго прегрешáт./ Избáвит Госпóдь дýши раб Своих,/ и не прегрешáт вси уповáющiи на Негó.
И глаголи ýтреню