НЕДЕЛЯ О БЛУДНОМ СЫНЕ Собор трех святителей глас 2 УТРЕНЯ(окончание) ЧАС ПЕРВЫЙ Служба мирским чином
12 февраля́ 2023 г. Недéля о блýдном сы́не. Собóр вселéнских учúтелей и святúтелей Васíлiя Велúкаго, Григóрiя Богослóва и Iоáнна Златоýстаго. Глас 2. Воскрéсная прáздничная слýжба для домáшнего (келéйнаго) совершéнiя. Послéдованiе ýтрени (окончанiе). Пéрвый час.
Окончáнiе всенóщного бдéнiя. Начáло здесь ( великая вечéрня), здесь ( ýтреня) здесь ( продолжéнiе ýтрени с канóном)
Глас 2
Хор: Пресвятáя Богорóдице, спасù нас.
Чтец: Зря́ще в нощи́ ýбо Iáков,/ я́ко в гадáнiи Бóга воплощéнна,/ из Тебé же свéтлостiю яви́ся пою́щим:// Пребожéственный отцéв Бог, и Препрослáвлен.
Хор: Пресвятáя Богорóдице, спасù нас.
Чтец: Знáменiя я́же в Тебé, неизречéннаго проявля́я сня́тiя, со Iáковом бóрется:/ и҆́мже вóлею соедини́ся человéком, Чи́стая:// Пребожéственный отцéв Бог, и Препрослáвлен.
Глас 2
Хор: Помúлуй мя, Бóже, помúлуй мя.
Чтец: Сла́достем теле́сным приклони́хся всеокая́нно,/ и порабо́тихся весьма́ стра́стным изобре́тением,/ и стра́нен бых от Тебе́ Человеколю́бче./ Ны́не же зову́ блу́днаго гла́сом:// согреши́х Христе́, не пре́зри мене́, я́ко еди́н ми́лостив.
Хор: Помúлуй мя, Бóже, помúлуй мя.
Чтец: Взыва́ю, согреши́х, ника́коже воззре́ти дерза́я на высоту́ небе́сную, Всецарю́,/ я́ко в безу́мии еди́н Тя прогне́вах,/ отве́ргся Твои́х повеле́ний./ Те́мже я́ко еди́н Благи́й,// не отве́ржи мене́ от Твоего́ лица́.
Хор: Помúлуй мя, Бóже, помúлуй мя.
Чтец: Апо́стол, Го́споди, и проро́к, и преподо́бных,/ и честны́х му́ченик, и пра́ведных мольба́ми/ прости́ ми вся, я́же согреши́х,/ прогне́вав Христе́ бла́гость Твою́,// я́ко да песносло́влю Тя во вся ве́ки.
Хор: Пресвятáя Богорóдице, спасù нас.
Богорóдичен: Херуви́м я́вльшися, и серафи́м Богоро́дице,/ и всех светле́йшая небе́сных во́инств,/ с си́ми умоли́, Его́же воплоти́ла еси́ Боже́ственное Сло́во Всенепоро́чная, Безнача́льнаго Отца́,// я́ко да благ ве́чнующих вси сподо́бимся.
Глас 2
Хор: Святúтелiе Хрїстóвы, молúте Бóга о нас.
Чтец: Побежда́ется, блаже́ннии, и отбега́ет я́же пре́жде непостоя́нная де́рзость ересе́й:/ воск же, растаява́емый от лица́ огня́,/ любоде́ичное вся́кое уче́ние показу́ется,// ва́шим приража́ющееся огнедохнове́нным веща́нием. (Двáжды)
Слáва Ѻтцý и Сы́ну и Святóму Дýху.
Тропáрь: Лжи́вых у́бо уклони́шася е́ллинских буесло́вий,/ увеще́ние же томи́тельство, е́же в челове́цех, еди́но избра́ша,/ под ни́мже и́стину си́и трие́ утверди́вше,// си́це весь сонм ве́рных побежда́ют словесы́ и увещева́ют.
И ны́не и прúсно и во вéки векóв. Амúнь.
Богорóдичен: В Тебе́ вся́ко прорече́ние воспочи́/ и коне́ц прия́ше удивля́ющее глаго́лющия:/ из Тебе́ же светле́е и прорече́ний чудеса́ то́чат, Чи́стая,// му́дрыя явля́юща сказа́тели.
Катавáсiя Срéтенiя (глас 3): Тебé во огни́ ороси́вшаго óтроки богослóвившiя,/ и в Дéву Нетлéнну всéльшагося Бóга Слóва пои́м,/ благочéстно пою́ще:// благословéн Бог отéц нáших.
ПЕСНЬ 8
Iрмóс: Пещь иногдá óгненная в Вавилóне дéйства разделя́ше,/ Бóжiим велéнiем халдéи опаля́ющая,/ вéрныя же орошáющая, пою́щiя:// благослови́те вся делá Госпóдня, Гóспода.
Хор: Слáва, Гóсподи, Святóму Воскресéнiю Твоемý.
Чтец: Крóвiю Твоéю, Хрiстé,/ очервлéно плóти Твоея́ зря́ще одея́нiе,/ трéпетом ужасáхуся мнóгому Твоемý долготерпéнiю áнгельстiи чи́ни, зовýще:// благослови́те вся делá Госпóдня, Гóспода.
Хор: Слáва, Гóсподи, Святóму Воскресéнiю Твоемý.
Чтец: Ты моé смéртное одéял еси́, Щéдре,/ в безсмéртiе востáнiем Твои́м./ Тéмже веселя́щеся благодáрственно воспевáют Тя/ избрáннiи лю́дiе, Хрiстé, зовýще Тебé:// пожéрта бысть вои́стинну смерть побéдою.
Хор: Пресвятáя Богорóдице, спасú нас.
Богорóдичен: Ты, И҆́же Отцý неразлýчнаго,/ во утрóбе богомýжно пожи́вша безсéменно зачалá еси́,/ и неизречéнно родилá еси́, Богороди́тельнице Пречи́стая:// тéмже Тя спасéнiе всех нас свéмы.
Глас 2
Хор: Пресвятáя Богорóдице, спасú нас.
Чтец: Ви́ден бысть на земли́ Тобóю, и с человéки поживé,/ И҆́же блáгостiю несравнéнный и си́лою,/ Емýже пою́ще вси вéрнiи зовéм:/ осуществовáнная да поéт Гóспода вся тварь,// и превознóсит во вся вéки.
Хор: Пресвятáя Богорóдице, спасú нас.
Чтец: Вои́стинну Тя, Чи́стую проповéдающе, слáвим Богорóдицу:/ Ты бо еди́на родилá еси́ от Трóицы воплощéнна,/ Емýже со Отцéм и Дýхом вси поéм:/ да поéт Гóспода вся тварь,// и превознóсит во вся вéки.
Глас 2
Хор: Помúлуй мя, Бóже, помúлуй мя.
Чтец: Сше́дый на зе́млю спасти́ мир,/ во́льною нището́ю за милосе́рдие мно́гое,/ обнища́вшаго мя ны́не от вся́каго благодея́ния,// я́ко ми́лостивый, спаси́.
Хор: Помúлуй мя, Бóже, помúлуй мя.
Чтец: От Твои́х за́поведей удали́вся,/ порабо́тихся всеокая́нно лестцу́:/ обраща́ющагося же ны́не,/ я́ко блу́днаго дре́вле припа́дающа Тебе́,// приими́ Пренебе́сный О́тче.
Хор: Помúлуй мя, Бóже, помúлуй мя.
Чтец: Тлетво́рными помышле́ньми объе́мся омрачи́хся,/ и от Тебе́ удали́хся, весь вне себе́ быв Ще́дре.// Те́мже в покая́нии припа́дающа Тебе́ спаси́.
Хор: Пресвятáя Богорóдице, спасù нас.
Богорóдичен: Богороди́тельнице Чи́стая,/ низве́рженных исправле́ние еди́на, испра́ви и мене́// вся́кими греха́ми сокруше́ннаго всего́ и смире́ннаго.
Глас 2
Хор: Святúтелiе Хрїстóвы, молúте Бóга о нас.
Чтец: Разумева́ем благоче́стно и прославля́ем единоче́стно Еди́но Естество́,/ безмерномо́щную Еди́ницу же и Тро́ицу,/ вся сия́ словесы́ пра́вящую лу́чшими./ Та́ко бо сла́вити трие́ Богоно́снии преда́ша,// с ни́миже покланя́емся Ей во ве́ки. (Двáжды)
Благословúм Отцá, и Сы́на, и Святáго Дýха, Гóспода.
Тропáрь: Соедини́шася трiе́ Богопропове́дницы, соедини́вши Тро́ицу/ и Неразде́льное во всех соблю́дшии, Боже́ственным естество́м:/ едину от Тоя́ восприя́ша неразде́льную сла́ву,// в похвале́ние еди́но созыва́ющую превознося́щия Ю́ во ве́ки.
И ны́не и прúсно и во вéки векóв. Амúнь.
Богорóдичен: Прие́м, е́же по нам, возда́в же Свое́ Благоде́тель,/ соде́я то́кмо, не пострада́ же, Де́во:/ твори́т бо, но не в тле́ние устроя́ет,/ па́че же и стражда́ во́лею, стра́стию стра́сти реши́т,// я́коже трие́ отцы́ нас тайноуча́т.
Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя Срéтенiя (глас 3): Нестерпи́мому огню́ соедини́вшеся,/ Богочéстiя предстоя́ще, ю́ноши,/ плáменем же невреждéни,/ Божéственную песнь поя́ху:/ благослови́те, вся делá Госпóдня, Гóспода// и превозноси́те во вся вéки.
Возглас: Богорóдицу и Мáтерь Свéта в пéснех возвелúчим.
Хор: Вели́чит душá Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На каждый стiх)
Я́ко призрé на смирéнiе рабы́ Своея́,/ се бо от ны́не ублажáт Мя вси рóди.
Я́ко сотвори́ Мне вели́чiе Си́льный,/ и свя́то И҆́мя Егó, и ми́лость Егó в рóды родóв боя́щимся Егó.
Сотвори́ держáву мы́шцею Своéю,/ расточи́ гóрдыя мы́слiю сéрдца их.
Низложи́ си́льныя со престóл, и вознесé смирéнныя;/ áлчущiя испóлни благ, и богатя́щiяся отпусти́ тщи.
Воспрiя́т Iзрáиля óтрока Своегó, помянýти ми́лости,/ я́коже глагóла ко отцéм нáшим, Авраáму и сéмени егó, дáже до вéка.
ПЕСНЬ 9
Iрмóс: Безначáльна Роди́теля Сын, Бог и Госпóдь,/ воплóщься от Дéвы, нам яви́ся,/ омрачéнная просвети́ти,/ собрáти расточéнная,// тем Всепéтую Богорóдицу величáем.
Хор: Слáва, Гóсподи, Святóму Воскресéнiю Твоемý.
Чтец: Я́ко в раи́ насаждéно на лóбнем, Спáсе,/ требогáтое дрéво Твоегó пречи́стаго Крестá,/ крóвiю и водóю Божéственною,/ я́ко от истóчника Божéственнаго,/ ребрá Твоегó, Хрiстé, напоя́емо,// живóт нам прозяблó есть.
Хор: Слáва, Гóсподи, Святóму Воскресéнiю Твоемý.
Чтец: Низложи́л еси́ си́льныя, распны́йся, Всеси́льне,/ и éже ни́зу лежáщее во áдове тверды́ни,/ естествó человéческое вознéс,/ на Ѻ́тчем посади́л еси́ престóле.// С Ни́мже Тебé грядýщу покланя́ющеся, величáем.
Хор: Пресвятáя Трóице, Бóже наш, слáва Тебé.
Трóичен: Еди́ницу Тричи́сленную, Трóицу Единосýщную/ правослáвно пою́ще вéрнiи, слáвим:/ непресекóмо Пребожéственное Естествó,/ трисвéтлую, невечéрнюю зарю́,// Еди́ну нетлéнную нам свет возсiя́вшую.
Глас 2
Хор: Пресвятáя Богорóдице, спасú нас.
Чтец: Жезл крéпости дадéся естествý тлéнному,/ Слóво Бóжiе во утрóбе Твоéй, Чи́стая:/ и сié воскреси́, до áда попóлзшееся.// Тéмже Тя, Всечи́стая, я́ко Богорóдицу, величáем.
Хор: Пресвятáя Богорóдице, спасú нас.
Чтец: Ю́же извóлил еси́, Влады́ко,/ прiими́ ми́лостивно Моли́твенницу,/ Мáтерь Твою́, о нас,/ и Твоея́ блáгости вся́ческая испóлняется:// да Тя вси, я́ко Благодéтеля, величáем.
Глас 2
Хор: Помúлуй мя, Бóже, помúлуй мя.
Чтец: Виждь Хрiстé печа́ль сéрдца, виждь мое́ обращéнiе,/ виждь слéзы Спа́се, и не прéзри менé,/ но обыми́ па́ки благоутро́бiя ра́ди,/ мно́жеству спаса́емых Пречи́стая,// я́ко да пою́ благода́рно ми́лости Твоя́.
Хор: Помúлуй мя, Бóже, помúлуй мя.
Чтец: Я́ко разбо́йник вопiю́: помяни́ мя,/ я́ко мыта́рь умили́вся, бiю́ в пéрси, и зову́ ны́не: очи́сти,/ я́коже блу́днаго прiими́ мя Всещéдрый, от всех зол мои́х, Всецарю́:// я́ко да пою́ Твоé кра́йнее снизхождéнiе.
Хор: Помúлуй мя, Бóже, помúлуй мя.
Чтец: Е́же иногда́ содéлал еси́ весéлiе блу́днаго, Бла́же, обращéнiем во́льным,/ сié ны́не сотвори́ и на мне окая́нном,/ простира́я ми честна́я Твоя́ объя́тiя.// Да спа́сся песносло́влю кра́йнее Твоé снизхождéнiе.
Хор: Пресвятáя Богорóдице, спасù нас.
Богорóдичен: Свéтлыми моли́твами Твои́ми Дéво,/ мы́сленная моя́ очеса́ омрачéнная зло́бою, просвети́, молю́ся,/ и к путéм покая́нiя введи́ мя,/ я́ко да до́лжно Тя песносло́влю,// па́че сло́ва Сло́во воплоти́вшую.
Глас 2
Хор: Святúтелiе Хрїстóвы, молúте Бóга о нас.
Чтец: Се ва́ше дéланiе и па́ства,/ за ю́же велича́йшiя болéзни претерпéсте, во еди́но сошéдшеся,/ ку́пно же три вы сопрiéмше,// о́бщую и́мать похвалу́ ва́ше сладча́йшее соединéнiе.
Хор: Святúтелiе Хрїстóвы, молúте Бóга о нас.
Чтец: Не обоюдоо́стрый меч благода́ть,/ но трео́стрый на ра́тников тоя́ предлага́ет:/ еди́н небокова́нен меч, треми́ крепостьми́ изощрéн,/ при́сно побо́рствуяй по Трисiя́нном Еди́ном Божествé.
Слáва Ѻтцý и Сы́ну и Святóму Дýху.
Тропáрь: Ва́ше жи́тельство на Небесéх бя́ше, пресла́внiи,/ и плоть нося́щих во вéки несквéрну,/ в ни́хже всесовершéнне ны́не живу́ще,/ су́щим на земли́ нам пребыва́ющим// Вы́шняя моли́те и мы́слити, и дéяти.
И ны́не и прúсно и во вéки векóв. Амúнь.
Богорóдичен: Тесни́т мя широта́ Твои́х вели́чiй, Влады́чице,/ подавля́ющи сло́во от ча́стости,/ и пресла́вно ми случа́ется éже недоумева́тися от благомо́щества,// тéмже толи́ко Тя Возвели́чившаго сла́вим.
Катавáсiя Срéтенiя (глас 3): В закóне сéни и писáнiй/ óбраз ви́дим, вéрнiи:/ всяк мýжескiй пол, ложеснá разверзáя, свят Бóгу./ Тем перворождéнное Слóво,/ Отцá Безначáльна,/ Сы́на Первородя́щася Мáтерiю неискусомýжно,// величáем.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьми́ Бог наш.
Хор: Свят Госпóдь Бог наш
Ексапостiлáрiй воскрéсный вторы́й: Кáмень узрéвша отвалéн, миронóсицы рáдовахуся,/ ви́деша бо ю́ношу седя́ща во грóбе,/ и той тем речé: се Хрїстóс востáл есть,/ рцы́те с Петрóм ученикóм:/ на гóру приспéйте Галiлéйскую, тáмо вам яви́тся,// я́коже предречé другóм.
Слáва Ѻтцý и Сы́ну и Святóму Дýху.
Светúлен святúтелей: Три светоза́рныя свети́льники, па́че сóлнечных луч/ от Светонача́льныя Трóицы и Трисóлнечныя Еди́ницы,/ преестéственно смéшены,// Богонóсныя восхва́лим отцы́.
И ны́не и прúсно и во вéки векóв. Амúнь.
Светúлен Трióди, глас 2: Бога́тство, éже ми дал еси́, благода́ти, окая́нный отшéд,/ непотрéбно зле ижди́х, Спа́се, блу́дно пожи́в,/ дéмоном льсти́вно расточи́х./ Тéмже мя обраща́ющася,// я́коже блу́днаго прiими́, О́тче щéдрый, и спаси́.
ХВАЛИТНЫ
Хор, глас 2: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.
[В приходской практике пропускается до стихир]Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речé, и бы́ша, Той повелé, и создáшася. Постáви я́ в век и в век вéка, повелéние положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
[В приходской практике пропускается до стихир]Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сы́нове Сióни возрáдуются о Царé своéм. Да восхвáлят и҆́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остри́ в рукáх их: сотвори́ти отмщéнiе во языцех, обличéнiя в лю́дех, связáти цари́ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егó.
Стiхúры воскрéсные, глас 2: Вся́кое дыхáнiе и вся тварь,/ Тя слáвит, Гóсподи,/ я́ко Крестóм смерть упраздни́л есѝ,/ да покáжеши лю́дем, éже из мéртвых Твоé Воскресéнiе,// я́ко еди́н Человеколю́бец.
Хвалúте Бóга во святых Егó,/ хвалúте Егó в утвержéнiи сúлы Егó.
Стiхúра: Да рекýт iудéе,/ кáко вóини погуби́ша стрегýщiи Царя́;/ почтó бо кáмень не сохрани́ кáмене жи́зни;/ или́ погребéннаго да дадя́т,/ или́ воскрéсшему да поклóнятся,/ глагóлюще с нáми:// слáва мнóжеству щедрóт твои́х, Спáсе наш, слáва тебѣ́.
На 6: Хвалúте Егó на сúлах Егó, хвалúте Егó по мнóжеству велúчествiя Егó.
Стiхúра: Рáдуйтеся лю́дiе и весели́теся,/ áнгел сѣдя́й на кáмени грóбнѣм,/ той нам благовѣсти́, рек:/ Хрiстóс воскрéсе из мéртвых, Спас мíра,/ и испóлни вся́ческая благоухáнiя:// рáдуйтеся лю́дiе и весели́теся.
Хвалúте Егó во глáсе трýбнем, хвалúте Егó во псалтúри и гýслех.
Стiхúра: Áнгел ýбо éже рáдуйся,/ прéжде твоего зачáтiя Гóсподи, благодáтнѣй принесé:/ áнгел же кáмень слáвнаго твоегó грóба/ в твоé воскресéнiе отвалѝ:/ ѻ́в ýбо в печáли мѣ́сто,/ весéлiя óбразы возвѣщáя:/ сей же въ смéрти мѣ́сто,/ Влады́ку жизнодáвца проповѣ́дуя нам,/ тѣ́мже вопiéм ти:// благодѣ́телю всѣх, Гóсподи слáва тебѣ́.
На 4. Хвалúте Егó в тимпáне и лúце, хвалúте Егó во стрýнах и оргáне.
Стiхúры святúтелей, глас 5: Рáдуйся, святи́телей трóица,/ Цéркве вели́кая забрáла,/ столпи́ благочéстiя, вéрных утверждéнiе,/ ерети́чествующих низпадéнiе,/ Хрiстóвы упáсшiи лю́ди Божéственными учéнiи/ и разли́чными добродéтельми воспитáвшiи,/ благодáти я́снiи проповéдницы,/ закóны произложи́вшiи Хрiстóву исполнéнiю,/ вожди́ к Вы́шним, рáйстiи вхóды,/ Хрiстá умоли́те// низпослáти душáм нáшим вéлiю ми́лость.
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Стiхúра: Рáдуйся, святи́телей трóица,/ небошéственнiи земни́и А́нгели,/ ми́ра спасéнiе, человéков рáдость/ и вселéнныя учи́телiе,/ Слóва побóрницы,/ врáчеве премýдрiи недýгов душéвных и телéсных,/ приснотекýщiя рéки духóвныя,/ словесы́ напая́ющiи земнóе все лицé,/ Богослóвнiи стéпени, златослóви Божéственнiи,/ Хрiстá умоли́те// низпослáти душáм нáшим вéлiю ми́лость.
Восхвáлятся преподóбнiи во слáве/ и возрáдуются на лóжах свои́х. (Пс.149:5)
Стiхúра: Рáдуйся, святи́телей трóица,/ земны́я твéрди сóлнца,/ лучи́ и свети́ла от Трисóлнечнаго озарéнiя,/ помрачéнных прозрéнiе,/ цвéти благовóннiи рая́ краснéйшiи,/ Богослóве, мýдрый же Васи́лiе, Златоýсте,/ дщи́цы Дýха, скрижáли Богоначертáнныя,/ сосцы́, источáющiи спасéнiя млекó,/ мýдрости украшéнiе,/ Хрiстá умоли́те// душáм нáшим даровáти вéлiю ми́лость.
Свящéнницы Твоú облекýтся прáвдою, и преподóбнiи Твоú возрáдуются.(Пс.131:9)
Глас 5: Вострýбим трубóю пéсней,/ да ликовствýим прáзднственная и взыгрáем, рáдующеся,/ в пречестнóе торжествó учи́телей нáших./ Святи́телiе и лю́дiе да стекýтся и восплéщут в пéснех,/ я́ко учéнiй источи́вшiя рéки превели́кiя три,/ добротóчныя присноживóтныя Дýха/ пáстырiе и учи́телiе,/ Пречестны́я Трóицы трегýбыя священнотаи́нники,/ сошéдшеся, да восхвáлим./ Филосóфи - мýдрыя, iерéи - пáстыри,/ грéшницы - предстáтели, ни́щiи - обогати́тели,/ сýщiи в скóрбех - утéшители,/ пýтницы - спутешéственники,/ и́же в мóри - кóрмчiи/ и вси, и́же вездé тéпле предваря́ющiя,/ Божéственныя архiерáрхи похваля́юще, тáко рцем:/ пресвяти́и учи́телiе,/ потщи́теся изъя́ти вéрныя от житéйских соблáзнов// и избáвити вéчных мук моли́твами вáшими.
Слáва Ѻтцý и Сы́ну и Святóму Дýху.
Стiхúра Трióди, глас 6: О́тче Благи́й, удали́хся от Тебé, не остáви менé,/ нижé непотрéбна покажи́ Цáрствiя Твоегó:/ враг вселукáвый обнажи́ мя и взят моé богáтство,/ душéвная даровáнiя блýдно расточи́х./ Востáв ýбо обрáщься к Тебé вопiю́:/ сотвори́ мя я́ко еди́наго от наéмник Твои́х,/ менé рáди на Крестé пречи́стеи Твои́ рýце простры́й,/ да лю́таго звéря исхити́ши мя,/ и в пéрвую одéжду облечéши мя,// я́ко еди́н Многоми́лостив.
И҆ ны́не и прúсно и во вéки векóв. Амúнь.
Глас 2: Преблагословéнна еси́, Богорóдице Дéво,/ Воплóщшим бо ся из Тебé ад плени́ся,/ Адáм воззвáся,/ кля́тва потреби́ся,/ Éва свободи́ся,/ смерть умертви́ся, и мы ожи́хом./ Тем воспевáюще вопiéм:/ благословéн Хрiстóс Бог,// благоволи́вый тáко, слáва Тебé.
Возглас: Слáва Тебé, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрїстé, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцá, поми́луй нас. Яко Ты есѝ Един Свят; Ты есѝ Един Госпóдь, Iисýс Хрїстóс, в слáву Бóга Отцá, ами́нь.
На всяк день благословлю́ Тя и восхвалю́ и҆́мя Твоé во вéки, и в век вéка.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоé во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был еси нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебé. Гóсподи, к Тебé прибегóх, научѝ мя твори́ти вóлю Твою́, яко Ты есѝ Бог мой, яко у Тебé истóчник животá, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, поми́луй нас. (3 раза)
Хор: Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помилуй нас.
Тропáрь воскрéсный, глас 2: Воскрéс из грóба и ýзы растерзáл еси áда,/ разруши́л еси осуждéнiе смéрти, Гóсподи,/ вся от сетéй врагá избáвивый;/ яви́вый же Себé апóстолом Твоим,/ послáл еси я на прóповедь,/ и тéми мир Твой пóдал еси вселéнней,// Еди́не Многоми́лостиве.
Гóсподи поми́луй (40 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Гóсподи поми́луй (12раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Утвердѝ, Бóже, святýю правослáвную вéру, правослáвных хрiстiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 раза)
Гóсподи, благословѝ.
ОТПУСТ
Гóсподи, Iисýсе Хрїстé, Сыне Бóжiй, моли́твами пречи́стыя Своея́ Мáтере, святы́х слáвных и всехвáльных Апóстол, преподóбных и Богонóсных отéц нáших и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Стiхúра евáнгельская вторáя, глас 2: С ми́ры пришéдшим я́же с Марíею женáм,/ и недоумевáющимся,/ кáко бýдет им улучи́ти желáнiе,/ яви́ся кáмень взят,/ и Божéственный ю́ноша утоля́я мятéж душ их,/ востá бо, глагóлет, Iисýс Госпóдь./ Тéмже проповéдите проповéдником Егó,/ ученикóм в Галилéю тещи́,/ и ви́дети Егó воскрéсша из мéртвых,// я́ко Жизнодáвца и Гóспода.
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрїстý, Царéви нáшему Бóгу.
Прiиди́те, поклони́мся и припадéм Самомý Хрїстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моé. Вонмѝ глáсу молéнiя моегó, Царю́ мой и Бóже мой, яко к Тебé помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебé лукáвнуяй, нижé пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебé лю́бящiи имя Твоé. Яко Ты благослови́ши прáведника, Гóсподи: яко орýжiем благоволéнiя венчáл еси нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты еси. Не отвратѝ человéка во смирéнiе, и рекл еси: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травá мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л еси беззакóнiя нáша пред Тобóю: век наш в просвещéнiе лицá Твоегó. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегó, и от стрáха Твоегó, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы́ Твоя. Испóлнихомся заýтра ми́лости Твоея, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны еси, лéта в ня́же ви́дехом злáя. И при́зри на рабы́ Твоя́, и на делá Твоя, и настáви сы́ны их. И бýди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебé, Гóсподи. Пою́ и разумéю в путѝ непорóчне, когдá прiи́деши ко мне? Прехождáх в незлóбiи сéрдца моегó посредé дóму моегó. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпé мне сéрдце стропти́во, уклоня́ющагося от менé лукáваго не познáх. Оклеветáющаго тай и҆́скренняго своегó, сегó изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредé дóму моегó творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебé Бóже. (3 раза)
Гóсподи, помúлуй. (3 раза)
Тропáрь воскрéсный, глас 2: Егдá снизшéл еси́ к смéрти, Животé Безсмéртный, тогдá ад умертви́л еси́ блистáнiем Божествá. Егдá же и умéршыя от преиспóдних воскреси́л еси́, вся Си́лы Небéсныя взывáху: Жизнодáвче, Хрiстé Бóже наш, слáва Тебé.
Слáва Отцý и Сы́ну и Святóму Дýху.
Тропáрь святúтелей, глас 4: Я́ко апóстолов единонрáвнiи,/ и вселéнныя учи́телiе,/ Влады́ку всех моли́те,/ мир вселéнней даровáти,// и душáм нáшим вéлiю ми́лость.
И ны́не и прúсно и во вéки векóв. Амúнь.
Богорóдичен: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблá есѝ цвет нетлéнiя. Дéву, я́ко пребылá есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогó молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы́ человéческiя, и сохраню́ зáповеди Твоя́. Лицé Твоé просветѝ на рабá Твоегó и научѝ мя оправдáнiем Твои́м.
Да испóлнятся устá моя хвалéнiя Твоегó, Гóсподи, я́ко да воспою́ слáву Твою́, весь день великолéпiе Твоé.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 раза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстé, Сыне Бóжїй, поми́луй нас. Ами́нь.
КОНДАК
Кондáк воскрéсный, глас 2: Воскрéсл еси́ от грóба, Всеси́льне Спáсе, и ад, ви́дев чýдо, ужасéся, и мéртвiи востáша; тварь же ви́дящи срáдуется Тебé, и Адáм свесели́тся, и мiр, Спáсе мой, воспевáет Тя при́сно.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрїстé Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесá очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрїстé, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицá Твоегó, да в нем ýзрим Свет Непристýпный: и испрáви стопы́ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 8: Взбрáнной Воевóде победи́тельная,/ я́ко избáвльшеся от злы́х,/ благодáрственная восписýем Ти́ раби́ Твои́, Богорóдице;/ но я́ко имýщая держáву непобеди́мую,/ от вся́ких нас бед свободи́, да зовéм Ти́:// рáдуйся, Невéсто Неневéстная.
Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.
Гóсподи, поми́луй. (3 раза)
Гóсподи, благословᴎ́.
Гóсподи, Iисýсе Хрїстé, Сыне Бóжїй, моли́твами пречи́стыя Своея́ Мáтере, святы́х слáвных и всехвáльных Апóстол, преподóбных и Богонóсных отéц нáших и всех святы́х, поми́лует и спасéт нас, я́ко Благ и Человеколю́бец.
С утрá чти часы и обéдницу