Love Keeps Going, and ME $_$

[loooli]

.

أعتذر على الصور الي حجمها كبير, مافيني أحوس بحجمها وكذا $:

التدوينة بالعامي الفاصل XD

معليش إذا خربت عليكم جمال المسلسل




* مشهد *



الحلقة السادسة
الدقيقة 21

بلا مبالاة, وبدون مقدمات اتصل عليها يهزأها,
هي جالسه مكتئبه بعد ما كنسلت زواجها بآخر يوم

قال: وينك! يعني عشان سبب تافه تخونين أكثر شخص مخلص لك يتشحذك تسوين له خبز توست وماتعطينه وجه؟

ردت عليه ويحاول فيها طيب غصب عشان توافق تصلح له التوست الي سبب له أزمة بحياته

صار يفقد الإبداع لما ما يلاقي الخبز الي هي تسويه :/
ووراه طلبات لازم يلحنها خخخ وينشب لها لحد ماوافقت انهم يتقابلون ويتناقشون

وتنكيلاً بالملحن الموسيقي المشهور XD
اجتمعت فيه بمكان يجتمعون فيه شيبان وعجايز يطلعون إبداعاتهم ويغنون
وهاتك يا تعذيب نفسي

لما حاول يتكلم معها كانت ترفض
سألها عن السبب, قالت لأن الناس مانفعت فيهم طيبتي (يعنني مابي احرق الاحداث)
قال: اكرهيهم قد مافيك وش دخلني انا ماسويت لك شي
قالت: يكفي انو لك علاقه فيهم؟
قال: مايصلح لازم يكون فيه عدل عندك
قالت: وش الفايدة؟ وش استفدت لما عاملت الكل باحترام وش لقيت!
والحين جاي انت تبيني اسوي لك خبز توست؟

قالها: الحين جيتي تلومين غيرك؟
أحد منهم طلب منك تعاملينه بالشكل هذا؟
احد ضربك على يدك او هددك بسكين عشان تعاملينه بطيب وتخدمينه وتخلينه مبسوط منك؟
بأي حق تزعلين منهم للدرجة هذي؟

قالت: عاملتهم بالشكل هذا بسبب الحب, غلط تصرفي؟
قال: أكيد غلط, لأنك بالشكل هذا ماخليتي لنفسك أي اعتبار او تقدير,
وحقروك الناس, وش بيخليهم يحترمونك ويقدرونك؟ وانتي تمشين وتحاولين ترضينهم طول الوقت
وأهملتي نفسك بشكل كامل, يستغلونك ويحتقرونك ويكرفونك بسهولة
الطبيعي أصلا انهم يكرهونك بالحالة هذي

*تحس ان المشهد طول ): وخربت جماله عليكم بأسلوبي*

بوقف هنا لأن هنا صار الكلام الجميل الي كتبت جزء منه في تويتر






Love Keeps Going

للتحميل بترجمة انجليزية:

http://www.d-addicts.com/forum/viewtopic_99737.htm

التدوينة هذي اختلطت فيها مشاعري وتجاربي, مع ملاحظاتي على الناس حواليني
و ما هيج المشاعر وخلاني أتكلم عنها الا دراما تايوانية شفتها

للممثل: مايك هي

يحتاج شطحة غزل باللغة التايوانية وجمالها؟
لا ما يحتاج
لكن صراحة يعني أحس حبي لها وافتتاني فيها يشبه حب الناس للغة الفرنسية وانبهارهم فيها

不哭 Don't Cry (Bu Ku)
المقدمة
Don't Cry

Click to view

نبدأ ؟
كيف ابدأ كلامي؟

المسلسل يحتاج تعطونه فرصة, لا تحكمون من اول 40 دقيقة لأنه ممل وبايخ في البداية
وللناس الي يشوفون مسلسلات تايوانية لأول مره
انتبهوا!!! لاحد يجي يقول ماعلمتيني من قبل
إذا كنتوا من الناس الي مايحبون حرق الأحداث بليز ابعدوا عن التايوانيين XDD
تراهم يسمعون بالتشويق, يجيبون نهايات القصة وأهم احداثها بالفواصل والمقدمة
لأنهم ناس أعتقد انعم متعقدين, مايمشي سوقهم الا بالحرق واللقطات الي تحمس خخخخخ
خاصة الرومانسية
وتعرفون وش بيصير ومصير القصة والاحداث توصل لويين XD



المسلسل كان يتكلم عن بنت اسمها شياومي لي

**

**
شياو مي لي

بنت خدوم, تحب تساعد الكل وماتخيب ظن أحد فيها, مايشكي لها أحد مشكلته الا قامت تحلها عنه
التحول هذا صار لها بسبب طلاق أمها وابوها وهي بعمر 9 سنوات
وكانوا يتهاوشون على اخوها كل واحد فيهم يبيه معه, مايبونها لأنها غبية!
وهالشي خلاها تقرر ماتكون عبئ على أحد
تعتمد على نفسها وتساعد غيرها
كله خوف من انها تُهجر, بسبب عدم فايدتها ):

مشابهة الشخصية لي في الواقع:

أشوف فيني شخصية البطلة من صغري لحد 5 سنوات ورا بس!
بدأ التغيير الجذري فيني من خمس سنوات تقريبا
طبعاً من ناحية اني أخدم وأقدم وأضحي عشان ما يحس احد بإني ثقيلة عليه

الفرق انها مخفة, تسولف مع صديقها وتسأله وش يتمنى
سايرها بالمزاج الي كانت فيه وأعطاها حلم مستقبلي مفاجئ جابه من راسه فجأه
مادرى بعد كم اسبوع الا هي تقوله ترى كل شي جاهز وحلمك راح يتحقق خخخخخخخخ

وليتها وقفت على كذا وبس.. -_!
لكنها نشبة خخخخ
إذا حطت براسها شي لازم تسويه
من قوة ما نشبت لـ يي لي عشان يساعدها
سألها انتي ماعندك كبرياء؟
قالت وش بينفعني فيه؟ ماراح يعطيني فلوس ولا يسوي لي شي
مستعده اسوي لك الي تبي عشان تساعدني خخخخ
كرهته بعيشته



(مايك هي) يي لي
ملحن مشهور عصبي مزاجي متعنت  لسانه سليط وبذيء =___=!!

ودي اقول اني اشوف فيه فتى المستقبل XD بس كل شي ولا اللسان البذيء عندي :/

لو طبقتها على واقعي انا .. أعتقد انو الشخصية الي أحدثت فيني التغيير الكبير والمرعب
هو هايد!
هوسي فيه ماكان بس لانه وسيم وصوته جميل وابي اجمع صوره واتفرج عليه كل يوم استمتع بجماله وخلاص!

علاقتي بهايد كانت أعمق, كنت أشوف فيه الأشياء الي كنت أتمناها عندي
واكتشفت انها موجوده عندي لكني مقفله عليها مع مشاعري بمفتاح "حب الغير وخدمتهم اهم من حب نفسي"!



هههههههه
واصله معه والحواجب معقودة من قلة الحيلة
نشبت له نشبه أليمه

XDD

*كان فيه فصلة مريعة هنا $: على مايك هي طبعا مو هايد*
(مسوية تمويه خخخ)

مايك هي, وش تبي بالتحديد لو سمحت؟!
مالقيت كلام اكتبه *فيس تلمع عيونه دموع وحب ومشاعير وكل شي جميل*

انا هالادمي من زمان كنت احبه وخاش مزاجي بعنف
لكن اني انقطع عنه فوق سنه او ثنتين بدون ما اشوف له شي!
وفجأه اطيح على دراما له تلعب فيني وبمشاعيري لعب مو طبيعي :"

وليش يعني ليش هو بالذات دراماته قصيره مو طويله
وش فيها لو بيسوون له دراما من 50 حلقه مثلا :"

مهما حاولت أقنع نفسي ان شكله مو عاجبني بالدراما هذي

*بالبداية بس* ميت1
إلا ان شخصيته فيها هبلت بي :"
يعني سادي عنيد شايف نفسه فوق الناس وما يطق خبر لأحد!!

ويستمتع بانه يسفل بالشعب ع الرايح والجاي :""

ماجبت جديد دايما شخصياته كذا بالدرامات الي راحت

ومع اني متعوده عليها لكن كل مره يخرشني بشكل *فيس يصيح*

يعني الواحد وش يسوي اذا كان من الحماس بيومين شاف 10 حلقات

والمسلسل كله 13 حلقه بس!! وش يسوي بعدين؟ كيف يتصرف؟

ابي انبسط وقت اطول مابي الدراما تخلص :"

صح ان الحلقه ساعه كامله تخليك تشبع من الوناسه
لكن بصبحيه وحده تروح 5 حلقات بدون ماتحس ._.
ومابي تخلص ماشبعت من هالادمي :"

مع اني شفته بترجمه عربية مستواها رديئ لغويا للدرجه الي ماافهم منها بعض الاحداث
لكن مخي تعود وصار دايركتلي (تلقائياً) يصحح ويرقع ويألف قصه تتناسب مع الاحداث XD
ماعندي مشكله اذا كنت ماسكه خط مع الحدث الرئيسي

< شغل استعباط غبي $:

**
*

*فاصل فلسفي عني $: الي مايبي يدوخ راسه او مو مهتم فيني يطمره XD *

لما تكون إنسان عايش حياته لـ غيره بكل تفاصيل حياته وأفكاره وحتى اهتماماته
 يعيشها بالكيفيه الي يحبها غيره, مو لأنه هو فعلا يحبها!
يفكر لغيره وعن غيره, يراعي مشاعر غيره على حساب نفسه, يجامل ويتحمل ويكذب لغيره
ويكون حدود تفكيره بأي شي يطمح/ يتمنى/ يحلم فيه: هل الشخص المقابل راح يوافق/ يرضى ويهتم للي اقوله ولا لا؟
إذا لا, بيكون مصير الأفكار والطموحات والاحلام النسيان والتطنيش
يشيل مسئولية غيره ويتحمل عواقبها, يتحمل مزاج غيره المتقلب وغضبه حتى بدون مايخطي بحقه!

والمشكله انو الشخص ما يحس بالخطأ الكبير الي هو جالس يسويه
يظلم نفسه بحجة انه يحب غيره, مهما كان الشخص الـ غير هذا اخو صديق عائله زوج
ومايدري انه مو بس يظلم نفسه, لكنه يظلم غيره معه.. ولما يمر الوقت يكتشف الغلطة
او يتوضح الموضوع بين وقت ووقت بـ مزاجيات وتقلبات غريبه
زعل مفاجئ او عزلة, او هروب مؤقت لحد مايخف إحساس الغضب عنده والي مايكون عارف سببه!

أحيان يكون الشخص عارف بالشي هذا ويتعذر لنفسه بأنه ما يحب يشوف نفسه كشخص غير مرغوب فيه
الفكرة المغلوطة عنده هي انه إذا اهتم بنفسه راح يتجاهل غيره نهائيا

ما أقصد هنا الأنانية وعدم التفكير بالآخرين ابدا
لكني أقصد اهتماماتك وهواياتك وأسلوب تفكيرك وشخصيتك
ببساطة أقصد انك تعرف نفسك بشكل واضح

مثلا:
-اتابع أفلام غربية لأن صديقتي تتابعها وبس حتى لو انا ما استمتع كثير فيها!
 غلط احب اتابع هندي, اتابع واتكلم عن الهندي عند صديقتي واقولها مايعجبني الغربي!
-أحب لبس معين لانه موضه وبس, يناسبني او مايناسبني مو مهم اهم شي امشي ع الموضه!
 وين رأيي وذوقي؟

- ما أشكي ولا أتكلم براحتي مع اهلي لاني ما ابي اضايقهم, الي فيهم كافيهم وانا اتحمل غصب اني اسمع مشاكلهم واتفرج عليهم واشيل اللوم عنهم وبس!
اسكت لاني ما ابي اكون بنت مزعجه, او عاقه بأهلها, او ماتشكر فضلهم, او ماتحترمهم, او او او

- يكون تعاملي مع صديقتي بشكل رسمي وما اسوي غير الي احسه بيشد انتباهها بغض النظر هل انا ارتاح بالطريقه هذي او لا,
هل طبيعتي تخليني اسوي كذا ولا انا جالسه اتصنع؟ مو مهم
المهم ما اتلقى منها نقد على تفكيري وتصرفاتي ولبسي واهتماماتي,
اكون لها مثل ماتبيني هي واريح راسي ..

- خوف من سوء الفهم
- خوف من اللوم والعتب او الضحك والاستهزاء
كل هذي نماذج للشخصية الي تعيش حياتها لـ غيرها بالمقابل تظلم نفسها..  
عشت جزء كبير من حياتي على نظام الشخصية هذي
 ضحيت بعلاقات وبجزء كبير مني لما قررت أتغير
ما أفتخر بأي شي سويته بذاك الوقت الي اكتشفت فيه اني جالسه ارتكب خطأ كبير بحق نفسي وغيري
حقيقة: مازلت أتعلم وأقاوم, كلامي هنا مايعني اني تخلصت من هالشي نهائي!

كانت صدمه بالنسبة لي..
جزء من مثاليتي المريعة اهتز
مع إدراكي المسبق وإقتناعي بإني ماعندي مشكله أطنش نفسي وما أهتم بشي وأسوي الي علي لأهلي

همم وش مناسبة الكلام هذا كله؟
جايه اتكلم لكم عن نفسي وبس؟ الموضوع وش دخله؟
لاتخافون, ماراح أقلب الموضوع تحليل نفسي لشخصيتي XD

الأفكار هذي جت في بالي لما كنت أتابع الدراما
وحبيت أتكلم عنها

**
*
**

قفلة /

كنت أتمنى لو الدراما انعرضت من قبل وخلتني أتعلم الدرس بدري
قبل لا أعيش الفوضى والحوسه الي عشتها, لكن الحمدلله كل شي مريت فيه كان له تأثير إيجابي
حتى الأشياء الي ما احبها ولا ابي اتذكرها
تأثيرها الإيجابي في حياتي وشخصيتي أقوى من اني أتحسر و أتمنى لو اني ماعشت التجارب البايخه الي عشتها