Ang bawat pagbigkas mo na tila walang kahulugan
Patibong
Marahil hindi mo lang napapansin
na ang bawat salitang nagsasakatawang-tao
sa iyong mga labi
ay isa-isang humuhukay
ng mga patibong sa daanang aking tinatahak
papalayo sa iyo.
Ang bawat pagbigkas mo na tila walang kahulugan
ay katumbas naman ng aking pagkahulog.
Hindi mahirap ang umiwas; madaling ingatan
ang aking nilalakaran
upang makalayo sa iyo,
ngunit sadyang malayo ang mga paa sa isip,
at pumapagitna ang makapangyarihan ngunit hungkag na damdamin:
mas pinipili pa nitong magpatiwakal sa mga libingang ito
kaysa tanggapin ang di-maiwasang paglayo mula sa iyo.