Atako en la metroo
Kelka dii ante nun mi sidis en metro-vagono. Apud me sideskis viro kun dika anorako ne lasante a me sata spaco, quo ne poke iritis me. Staciono. Haltas la treno, ek- ed eniras homi. Ri-startas la treno. Dope ulu sat forte batas vitro-karelo per ulo harda. Ka idioto volanta signalar ad ulu en la staciono? Itere bato. Itere... Me ne vidas qua ton facas, nam me sidas veho-direcione. Venas mea staciono. Me staceskas ed iras a dope, ube es pordo, kelke regardante por la kauzo dil trublo sen identifikar ol. Ja kun la vizajo al pordo, me subite audas neklara, maligna voco laute dicanta ulo quale: "Quo esas?! Ka vu havas problemo pri me?!" Me ne reaktas. Apertesas la pordo. Exakte quande me es livanta la treno, yen la vocacho en mea nuko: "He, me parolas kun vu!!" Me decensas la vagono, fulmin-rapide turnas e vidas, direte dop me, groteska vizajo kun pelo bruneta e labii alterita. Me forte retro-pulsas la kerlo aden la vagono. Kelka plasta saketi, semble ilua, falas adsur la sulo dil staciono. Kriante il venas ek la vagono atakonte. Me per mea pugni, gantizita pro la koldeso, kelkfoye frapas lua vangi e kelke retro-pazas. La altra homi, shokite, quik haltas e formacas mi-cirklo. Audesas feminal voco: "Ambi cesez!" Pos instanto mea adverso ri-rekteskas e komencas dansar quaze boxisto, movante sua pugni en cirkleti e vokante "He, yes! Haha, haha!" Me stacis ye du, tri pazi de lu, afrontante lu, dum ke il duris dansar, facante moveti provokanta e vokante "Hehe! Haha!" - ma ne vere atakis. Me do pos kelka tempo livis la loko.